• Home
• Canon Text
• Romanized
• sūtrapiṭaka
• tantra
• kriyā tantra
• Atha pañcāśaḥ paṭalavisaraḥ

Atha pañcāśaḥ paṭalavisaraḥ

Technical Details

|| śrīḥ ||



āryamañjuśrīmūlakalpam |

(tṛtīyo bhāgaḥ|)



atha pañcāśaḥ paṭalavisaraḥ |



atha khalu bhagavāṃ vajrapāṇiryakṣasenāpatiḥ tasyāṃ parṣadi sannipatito'bhūt | sanniṣaṇṇaḥ utthāyāsanādekāṃśamuttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya sa yena bhagavāṃstenāñjaliṃ praṇamya bhagavantametadavocat - yo hi bhagavaṃ mañjuśriyā kumārabhūtena krodharājā yamāntako nāma bhāṣitaḥ tasya kalpaṃ vistaraśo bhagavatā na prakāśitam | nāpi mañjuśriyā kumārabhūtena | ahaṃ bhagavaṃ paścimatā janatāmavekṣya bhagavatā parinirvṛte śāsanāntardhānakālasamaye vartamāne mahābhairavakāle yugādhame sarvaśrāvakapratyekabuddhavinirmukte buddhakṣetre tathāgataśāsanasaṃrakṣaṇārthaṃ dharmadhātucirasthityarthaṃ sarvaduṣṭarājñāṃ nivāraṇārthaṃ ratnatrayāpakāriṇāṃ nigrahārthaṃ vaineyasattvakauśalācintyabodhisattvacaryāparipūraṇārthaṃ acintyasattvapākamabhinirharaṇārthaṃ ca paścime bhagavaṃ kāle paścime sugatasamaye śāsanavipralope vartamāne ya imaṃ yamāntakaṃ nāma krodharājānaṃ yathāvidhi kalpavinirdiṣṭaṃ prayokṣyati tasya siddhiḥ bhaviṣyati | niyataṃ ca duṣṭarājñāṃ śāsanāpakāriṇāṃ ca sattvānāṃ mahāyakṣāṇāṃ mahotsāhināṃ nigrahānugrahapravṛttānāṃ mahākaruṇāvirahitānāṃ teṣāmayaṃ krodharājā prayoktavyaḥ nānyeṣām ||



atha bhagavāṃ tūṣṇīmbhāvena buddhavikurvaṇādhiṣṭhānaṃ nāma samādhiṃ samāpadyate sma | mañjuśrīḥ kumārabhūto'pi tūṣṇīmbhāvena sthito'bhūt | sarvāvantaśca parṣanmaṇḍala ṣaḍvikāraṃ prakampamajāyata |



bhītāśca devasaṅghā uktrastāḥ sarvabāleśāḥ |

sarvadevāśca nāgāśca dānavendrāḥ samātarāḥ ||

sarve ca grahamukhyādyā devasaṅghāḥ prakampire |

mānuṣā prakampe bhinnamanaso duṣṭacittāśca pūtanāḥ ||

ārttā bhītāḥ tataste vai raudracittā narādhipāḥ |

śaraṇaṃ te tadā jagmuḥ dharmarājasya śāsanam ||

guhyakendrasya yakṣasya vajrapāṇimahādyuteḥ |

mañjughoṣasya te bhītāḥ kumārasyaiva mantrarāṭ ||

samayaṃ ca tadā cakre mañjughoṣasya antike |

paritrāyasva bho bāla ! sarvasattvānukampaka ! ||

nirdahiṣyāmi no adya krūrakamantraiḥ sudāruṇaiḥ |

krodhena mūrcchitā hyadya pratiṣṭhāma mahītale ||

tatastāṃ bodhisattvā vai bālarūpī mahādyutiḥ |

mā bhaiṣṭhatha surāḥ ! sarve ! yakṣarākṣasadānavā ! ||

samayaṃ vo mayā hyuktaḥ alaṅghyaḥ sarvadevataiḥ |

mānuṣāmānuṣāścāpi sarvabhūtaistu kevalaiḥ ||

maitracitta sadā bhūtvā tanmantraṃ smarate sadā |

sambuddhaṃ dvipadāmagryaṃ śākyasiṃhaṃ narottamam ||

tenaiva bhāṣitaṃ mantraṃ uṣṇīṣādyāḥ salocanāḥ |

trailokyaguravaścakī tejorāśiṃ jayodbhavam ||

vijayoṣṇīṣamantrādyāṃ padmapāṇiṃ salokitam |

avalokitanāthaṃ ca bhṛkuṭī tārāṃ yaśasvinīm ||

devīṃ ca sitavāsinyāṃ mahāśvetā yaśovatīm |

vidyāṃ bhogavatīṃ cāpi hayagrīvaśca mantrarāṭ ||

ete hyabjakule mantrā pradhānā jinaniḥsṛtā |

ekākṣaraścakravartī vā mantrāṇāmadhipatiṃ prabhum ||

smṛtvā devadevaṃ ca mantranāthaṃ mahādyutim |

krodhamaprabhavo tasya yamānto nāma nāmataḥ ||

avalokitanāthasya cetāṃsi karuṇodayāḥ |

mahākaruṇākṛṣṭamanaso pūrvabuddhaiḥ prakāśitā ||

sā tārā tārayate jantūṃ avalokitabhāṣitā |

vidyā samādhijā āryā stryākhyā saṃjñārūpiṇī ||

bodhisattvo'tha carate bodhicārikamuttamām |

lokadhātusahasrāṇi asaṅkhyā bahudhā punaḥ ||

paryaṭanta tadā devī sattvānāṃ hitakāraṇā |

strīrūpadhāriṇī bhūtvā mantrarūpeṇa dehinām ||

vidhineyatadāṃ sattvāṃ bodhiyāneti yojayet |

caryā bodhisattvānāṃ acinteyaṃ prakāśitā ||

vajrapāṇiṃ tathā vīraṃ mantrāṇāmadhipatiṃ smaret |

māmakīṃ kulandarīṃ devīṃ trailokyapratipūjitām ||

śaṅkulā mekhalāṃ caiva vajramuṣṭiṃ yaśasvinīm |

krodhendratilakaṃ śatruṃ nīladaṇḍaṃ sabhairavam ||

ete dūtigaṇāḥ krodhāḥ vidyādhyakṣāḥ prakīrtitāḥ |

pradhānāṃ vajrakule sarve asmadrakṣitā hi te ||

gajagandhaṃ tathā loke bodhisattvaṃ maharddhikam |

mahāsthānagataṃ dhīmaṃ bodhisattvaṃ maharddhikam ||

jyeṣṭhaṃ tanayamukhyaṃ tu samantabhadraṃ suśobhanam |

yaḥ smaret tadā kāle bhayaṃ teṣāṃ na vidyate ||

māṇibhadraṃ tathā nityaṃ jambhalaṃ yakṣamuttamam |

sarvaśrāvakapratyekaṃ buddhānāṃ ca kuto bhayam ||

smaraṇāt pūjanāt teṣāṃ mahārakṣā prakīrttitā |

bṛhat phalaṃ tadā devāṃ puṇyābhāṃ ca asaṃjñakā ||

strīrūpadhāriṇāṃ devīṃ vītarāgāṃ maharddhikām |

ratnatraye ca pūjāṃ vai prasannā jinaśāsane ||

teṣāṃ na vidyate kiñcit mitrāmitrabhayaṃ yadā |

samayaṃ tatra ityuktaḥ alaṅghyaṃ sarvamantribhiḥ ||

etat krodhavare khyātaṃ yamāntasyaiva varṇite |

samaye ca sthitāṃ sattvāṃ abhakṣāḥ sarvamānuṣāḥ ||

tataste hṛṣṭamanasaḥ sarve devā hyamānuṣāḥ |

samaye tasthire sarve jinaputrānubuddhinā ||

yakṣasenāpatiḥ kruddhaḥ vacanaṃ cet parābhavam |

samprakampya tadā sarvāṃ lokadhātumasaṅkhyakām ||

nirarthaṃ krodharājaṃ tu kimarthamidaṃ prakāśitam |

jinaputraistadā pūrvaṃ sattvānāṃ vinayakāraṇāt ||

prabhāvaṃ krodharājasya udyaṣṭaṃ ca purātanam |

evamuktāstato vajrī vajraṃ nikṣipyaṃ tasthure ||

tataḥ prahasya matimāṃ bālarūpī maharddhikaḥ |

kumāro mañjughoṣo vai imāṃ vācamudīrayet ||

mā praduṣya mahāyakṣa ! vajrapāṇi ! maharddhika ! |

mayā prakāśito hyeṣa krodharājo maharddhikaḥ ||

tavaiva mantraṃ dāsyāmi yathecchaṃ samprakāśaya |

tvayā na śakyaṃ krodhasya prabhāvaṃ parikīrtitam ||

tayaiva saṃsthito hyeṣa dehastha iha dṛśyate |

ākṛṣṭaḥ tena vai tubhyaṃ hṛdayaṃ te yadi pṛcchasi ||

na śakyaṃ nivarttituṃ hyatra krodhāviṣṭo hi vai prabho |

yathecchaṃ samprakāśayasva samayaṃ tyaktvānumanyataḥ ||

asnāte prasupte ca grāmyadharmānuvarttite |

tailābhyakte arakṣe ca duṣṭacitteṣu vā sadā ||

tyakto mantravaraiḥ sarvaiḥ aprasanneṣu śāsane |

vaicikitso tathā martyo aśrāddheṣu duḥsthite ||

saddharmaratnasaṅghe ca pratikṣeptavyāḥ samāhite |

nagnake ca sadocchiṣṭe aśucyācāragocare ||

agupte hyamantrayukte ca nityocchiṣṭe hi nirghṛṇe |

devāvasathacaityeṣu vihārāṅgaṇamaṇḍale ||

maithunābhiratā tatra teṣāṃ krodho vināśayet |

samayabhraṣṭā prasannāśca mantrayuktimajānakā ||

iṣiskhalitagatācārā teṣāṃ krodho nipātayet |

sarveṣāṃ mānuṣāṃ loke apramādo na vidyate ||

pramādamabhirāginyaḥ samayabhraṃśānucchidriṇe |

hanyante krodharājena aprayuktaistu mantribhiḥ ||

sarvathā bāliśāḥ sarve pramādā vaśagāminaḥ |

vītarāgāṃ sadā muktvā pratyekārhaśrāvakām ||

sarve vai krodharājasya vadhyā daṇḍyāśca sarvataḥ |

evamuktāstu mañjuśrī karuṇāviṣṭena cetasām ||

acintyaṃ caryabuddhānāṃ bodhisattvāṃ maharddhikām |

evamuktvā tataḥ sarvāṃ tūṣṇīmbhūto hi tasthure ||

atha vajradharaḥ śrīmāṃ bhūyo vajraṃ parāmṛśet |

gṛhya vajraṃ tadā tuṣṭo labdhvānujñāṃ prabhāṣata iti ||



āryamañjuśriyamūlakalpād bodhisattvapiṭakāvataṃsakānmahāyānavaipulyasūtrāt aṣṭacatvāriṃśattamaḥ yamāntakakrodharājaparivarṇanamantramāhātmyaniyamapaṭalavisaraḥ parisamāpta iti ||