• Home
• Canon Text
• Romanized
• sūtrapiṭaka
• mahāyānasūtra
• Susaṃbhavaparivartaḥ

Susaṃbhavaparivartaḥ

Technical Details

|| susaṃbhavaparivartaḥ ||



sasāgarā tyakta vasuṃdharā tadā yadā babhūva nṛpa cakravartī |

catvāri dvīpāni saratnapūrṇaniryāti tā pūrvajineṣu mahyam || 1 ||

na cāsti tadvastu priyaṃ manāpaṃ

pūrvaṃ ca mahyaṃ na va tyaktamāsīt |

taṃ dharmakāyaṃ parimārgaṇārthaḥ

priyajīvitaṃ tyaktamanekakalpān || 2 ||

yatha pūrvakalpeṣu acintiyeṣu

ratnaśikhisya sugatasya śāsane |

parinirvṛtasya sugatasya tasya

susaṃbhavo nāma babhūva rājā || 3 ||

sa cakravartī caturdvīpa īśvaraḥ

samudraparyantamahī praśāsyate |

jinendraghoṣāya ca rājadhānīya

supto babhūvā tada rājakuñjaraḥ || 4 ||

svapnāntare buddhaguṇāñca śrutvā

ratnoccayaṃ paśyati dharmabhāṇakam |

sthita sūryamadhye va virocamānaṃ

prakāśayantaṃ ima sūtrarājam || 5 ||

svapnādvibuddhaśca babhūva rājā

pītisphuṭaṃ sarvaśarīramasya |

abhiniṣkrarma rājakulāni dṛṣṭu

upasaṃkramī śrāvakasaṃghamagram || 6 ||

karoti pūjāṃ jinaśrāvakāṇāṃ

ratnoccayaṃ pṛcchati dharmabhāṇakam |

kva cāsti bhikṣūriha cāryasaṃghe

ratnoccayo nāma guṇānvitaśca || 7 ||

tenāntareṇā ratanoccayo hi

anyatra gūhāntara saṃniṣaṇaḥ |

vicitraratnaṃ ima sūtrarājaṃ

svadhyāyamānaḥ sukha saṃniṣaṇaḥ || 8 ||

deśenti rājasya tadantareṇa

ratnoccayaṃ bhikṣu sa dharmabhāṇakam |

anyatra gūhāntarasaṃniṣaṇaṃ |

taṃ tena raśmīśriyayā jvalantam || 9 ||

eṣo'tra ratnoccaya dharmabhāṇako

dhāreti gambhīrajinasya gocaram |

svarṇaprabhāsottamasūtraratnaṃ

sūtrendrarājaṃ satataṃ prakāśayet || 10 ||

vanditva pādau ratanoccayasya

susaṃbhavo rāja idaṃ pravīddhi |

deśe hi me pūrṇaśaśāṅka cakraṃ

svarṇaprabhāsottamasūtraratnam || 11 ||

adhivāsayī so ratanoccayaśca

rājñaśca tasyaiva susaṃbhavasya |

sarvatrisāhasrikalokadhātau

praharṣitāssarvi babhūvu devatāḥ || 12 ||

vasudhāpradeśe parame viśiṣṭe

ratnodake gandhajalāmvusikte |

puṣpāvakīrṇāṃ dharaṇīṃ sa kṛtvā

tatrāsanaṃ prāpya tadā narendraḥ || 13 ||

samalaṃkṛtaṃ rājña tadāsanaṃ ca

cchatrairdhvajairghaṇṭasahasranekaiḥ |

nānāvicitrairvarapuṣpacandrair

abhyokire rājña tadāsanaṃ ca || 14 ||

devāśca nāgāsurakiṃnarāśca

yakṣāśca yakṣendramahoragāśca |

divyaiśca māndāravapuṣpavarṣair

abhyāvakīrṇāśca tadāsanaṃ ca || 15 ||

acintiyānanta sahasrakoṭiyo

ye āgatā devabhavāgrakāmāḥ |

abhiniṣkramitvā ratanoccayaṃ hi

abhyo kiranti sma ca sālapuṣpā || 16 ||

so cāpi ratnoccaya dharmabhāṇakaḥ

śubhābhagātraḥ śucivastraprāvṛtaḥ |

upasaṃkramitvā ca tadāsanaṃ hi

kṛtāñjalībhūtva namasyate ca || 17 ||

devendradevāni ca devatāni

māndārapuṣpaṃ ca pravarṣayanti |

acintiyā tūryaśatā sahasrā

pravādayanti sthita antarīkṣe || 18 ||

abhīruhitvā ca sa saṃniṣaṇo

ratnoccayo bhikṣu sa dharmabhāṇakaḥ |

anusmaritvā daśasū diśāsu

acintiyā buddhasahasrakoṭyaḥ || 19 ||

sarveṣa sattvāna kṛpāṃja nitya

kāruṇyacittaṃ samupādayet saḥ |

rājñaśca tasyāpi susaṃbhavasya

prakāśitaṃ sūtramidaṃ tadantare || 20 ||

kṛtāñjalībhūtva sthihitva rājā

yaḥ kāyavācā manumoditaḥ saḥ |

saddharmavegāśrupramuktanetraḥ

pratisphaṭastasya babhūva kāyaḥ || 21 ||

imasya sūtrasya ca pūjanārthaṃ

susaṃbhavo rāja tadantareṇa

gṛhṇitva cintāmaṇirājaratnaṃ

sarvārthahetoḥ praṇidhiṃ cakāra || 22 ||

varṣantu adyā iha jambudvipe

sasaptaratnāṇi ca bhūṣaṇāni

ye ceha sattvāḥ khalu jambudvipe

sukhitāśca bheṣyanti mahādhanāśca || 23 ||

caturṣu dvīpeṣu pravarṣitāni

saptāni ratnāni tadantareṇa |

keyūrahārā varakuṇḍalāni

tathānnapāne vasanāni caiva || 24 ||

dṛṣṭvā ca taṃ rāja susaṃbhavaśca

ratnapravarṣaṃ khalu jambudvīpe |

catvāri dvīpāni saratnapūrṇā

niryātayī ratnaśikhisya śāsane || 25 ||

ahaṃ ca saḥ śākyamunistathāgataḥ

susaṃbhavo nāma babhūva rājā |

yeneha me tyakta vasuṃdharā tadā

catvāri dvīpāni saratnapūrṇā || 26 ||

akṣobhya āsīt sa tathāgataśca

ratnoccayo bhikṣu sa dharmabhāṇakaḥ |

yenāsya rājasya susaṃbhavasya

prakāśitaṃ sūtramidaṃ tadāntare || 27 ||

yanme śrutaṃ sūtramidaṃ tadantare

ekāgravācāmanumoditaṃ ca |

tenaiva mahyaṃ kuśalena karmaṇā

śrotānumodena śrutena tena || 28 ||

suvarṇavarṇaṃ śatapuṇyalakṣaṇaṃ

labheyi kāyaṃ priyadarśanaṃ sadā |

nayanābhirāmaṃ janakāntadarśanaṃ

ratiṃkaraṃ devasahasrakoṭinām || 29 ||

navottaraṃ notisahasrakoṭyā

kalpānabhūvaṃ nṛpacakravartī |

aneka kalpāna sahasrakoṭyo

trailokyarājatva mayānubhūtam || 30 ||

acintiyā kalpa babhūva śakraḥ

tathaiva brahmendra praśāntamānasaḥ |

ārāgitā me balāprameyā

yeṣāṃ pramāṇaṃ na kadāci vidyate || 31 ||

tathā pramāṇaṃ bahu puṇyaskandhaṃ

yanme śrutaṃ sūtranumoditaṃ ca |

yathābhiprāyeṇa mi bodhi prāptā

saddharmakāyaśca mayā hi labdha || 32 ||



iti śrīsuvarṇaprabhāsottamasūtrendrarāje susaṃbhavaparivarto

nāma caturdaśamaḥ ||