• Home
• Canon Text
• Romanized
• sūtrapiṭaka
• mahāyānasūtra
• Samādhyanuśikṣaṇāparivartaḥ

Samādhyanuśikṣaṇāparivartaḥ

Technical Details

samādhyanuśikṣaṇāparivartaḥ |



tatra kumāra yo bodhisattvo mahāsattvaḥ sarvadhamāṇāṃ svabhāvaṃ prajānāti, tasyeme evaṃrūpā guṇānuśaṃsā bhavanti-sa tathāgatānāṃ bhūtaṃ guṇavarṇaṃ bhāṣate | na ca tathāgatān vyākhyāti asatā abhūtena | tat kasya hetoḥ ? yayā dharmatayā tathāgataḥ prabhāvyate, tāṃ dharmatāṃ yathābhūtaṃ prajānāti | anantāt buddhaguṇān prajānāti | tat kasya hetoḥ ? anantā hi kumāra buddhaguṇā acintyāścintāpagatāḥ | tenāśakyaṃ cintayituṃ vā pramātuṃ vā | tat kasya hetoḥ ? cittaṃ hi kumāra niḥsvabhāvamarūpyanidarśanam | iti hi kumāra yatsvabhāvaṃ cittaṃ tatsvabhāvā buddhaguṇāḥ, yatsvabhāvā buddhaguṇāstatsvabhāvāstathāgatāḥ, tatsvabhāvāḥ sarvadharmāḥ | yaḥ kumāra bodhisattvo mahāsattva evaṃ sarvaguṇasvabhāvanirdeśaṃ yathābhūtaṃ prajānāti, ayaṃ kumāra ucyate bodhisattvo mahāsattvo nidhyāptimānasaḥ | niḥsaraṇakuśalaḥ | traidhātukaniḥsaraṇaṃ yathābhūtaṃ prajānāti | yathāvadarśī avitathavādī ananyathābhāṣī, yathāvādī tathākārī, anabhiniviṣṭastraidhātuke traidhātukasamatikrāntaḥ | samatikrāntaḥ kāmabhūmiṃ rūpabhūmiṃ ārūpyabhūmiṃ kleśabhūmiṃ nāmabhūmiṃ ghoṣabhūmim | akṣarapadanayakuśalaḥ | akṣaravibhāvitajñānaḥ | anabhilapyadharmakovidaḥ | akṣarajñaḥ | akṣarakuśalaḥ | akṣarapadaprabhedajñānakuśalaḥ | akṣarapadaprabhedavistārajñānakuśalaḥ | sarvadharmapadaprabhedakuśalaḥ | sarvadharmapadaprabhedavistārakuśalaḥ | sarvadharmavyavasthānajñānakuśalaḥ | niścitayā buddhyā samanvāgato'nabhibhūtaḥ sarvamāraiḥ pāpīyobhirmārakāyikābhiśca devatābhiḥ ||

asmin khalu punardharmaparyāye bhāṣyamāṇe aṣṭānavaterniyutānāṃ devamānuṣikāyāḥ prajāyāḥ pūrvaparikarmakṛtāyāḥ koṭīśatasahasrāvartāyā dhāraṇyā anāvaraṇāyāśca dharmavipaśyanāyāḥ kṣānteḥ pratilambho'bhūt | te ca sarve bhagavatā vyākṛutā aṣṭācatvāriṃśatā kalpairasaṃkhyeyaśatasahasrairanuttarāṃ samyaksaṃbodhimabhisaṃbhotsyante | sarve ca anyānyanāmāna ekāyuṣpramāṇā anyānyeṣu buddhakṣetreṣu anuttarāṃ samyaksaṃbodhimabhisaṃbhotsyante | tatredamucyate -

yo bodhisattva matimān prāpnoti anuttarāṃ varāṃ bodhim |

arthe ca dharmi kuśalo carati sa dharmasvabhāvasmi || 1 ||

nābhūt bhaṇati vācaṃ buddhānāṃ yādṛśā guṇaviśeṣāḥ |

sa hi dharmu taṃ jinānāṃ jānati śūro vigatakaṅkṣāḥ || 2 ||

ekārtha sarvadharmān prajānati ca śūnyatāṃ sa ekāṃśam |

nānārthu nāsti teṣāṃ ekārthe śikṣito bhavati || 3 ||

niṣkalpānavikalpān anopalambhāṃśca jānāti matimān |

kṣati akṣaye'sya saṃjñā prahīṇa sarvā niravaśeṣā || 4 ||

na hi rūpato daśabalān paśyati so dharmakāya narasiṃhān |

nāpi lakṣaṇehi tasya prahīṇa sarve viparyāsāḥ || 5 ||

dharmā acintya ete cintāpagatā svabhāva upaśāntāḥ |

evaṃ prajānamānaḥ paśyati buddhān dvipadaśreṣṭhān || 6 ||

yatha jñātvātmasaṃjñāstathaiva sarvatra preṣitā buddhiḥ |

sarve ca tatsvabhāvā dharma viśuddhā gaganakalpāḥ || 7 ||

na hi jāta mānase'sya niḥsaraṇaṃ jñātva sarvadharmāṇām |

traidhātuke vimuktipraṇidhānu na vidyate tasya || 8 ||

yathāvadarśi bhoti avitathavacano'nanyathābhāṣī |

sarvaṃ ca tasya vacanaṃ niścarati jinānubhāvena || 9 ||

atikrāntu kāmabhūmiṃ kileśabhūmiṃ ca rūpa ārūpyān |

dharmeṣvasaktamanasaḥ pramudita carate jagahitāya || 10 ||

atikrāntu nāmabhūmiṃ ghoṣo jñāna svabhāvena cayikaḥ |

yāvacciraṃ pi bhaṇato na vidyate niśrayastasya || 11 ||

saṃjñāpracāru nāsti dṛṣṭiviparyāsu sarvaśaḥ kṣīṇaḥ |

suniścitā buddhiśca te gaganopamadhīrāḥ || 12 ||

vihāra koṭīniyutā bhaveyu vikṣepaṇārtha cittasya |

abhibhavati sarvamārān na cāpi teṣāṃ vaśamupaiti || 13 ||

sarvi jahyu mārajālaṃ pariśuddhaḥ śīlavānaparidāhaḥ |

dhyānasukhasmi nirataḥ prajānati ca śūnyakaṃ lokam || 14 ||

lokāśca skandha uktāstāṃścāpi sa śūnyakān prajānati |

anutpādānanirodhān sarvān gaganopamān dharmān || 15 ||

ātmānaṃ sa tyajate na caiva śikṣāṃ śrutāṃ daśabalasya |

so śīlapāramiṃ gata upapadyati yatra praṇidheti || 16 ||

vicarantu buddhakṣetrān paśyati buddhakoṭīniyutāni |

na svargaṃ prārthayate na cāpi praṇidhānato muktaḥ || 17 ||

na bhraṃśayati sa vīryaṃ muhūrtamātramapi dharma caramāṇaḥ |

praśaṃsitaśca bhoti buddhabhirdaśadiśe loke || 18 ||

tasmāttarhi kumāra śrutvā dharmānimān samādhismin |

jahiyāna jñātralābhaṃ prakāśaya mahājane dharmam || 19 ||

ya icchati svayaṃbhūrbhaveya buddho mahāguṇasamaṅgī |

iha śikṣitvā kuśalo daśabaladhārī bhavati buddhaḥ || 20 ||



iti śrīsamādhirāje samādhyanuśikṣaṇāparivarto nāma dvādaśaḥ || 12 ||