• Home
• Canon Text
• देवनागरी
• सूत्रपिटक
• महायानसूत्र
• शीलनिर्देशपरिवर्तः

शीलनिर्देशपरिवर्तः

Technical Details

शीलनिर्देशपरिवर्तः।



दशेमे कुमार अनुशंसाः परिशुद्धशीलस्य बोधिसत्त्वस्य महासत्त्वस्य। कतमे दश ? यदुत ज्ञानं च परिशोधयति परिपूरयति। बुद्धानां भगवतामनुशिक्षते। अगर्हितो भवति पण्डितानाम्। प्रतिज्ञातो न चलति। प्रतिपत्तौ तिष्ठति। संसारात् पलायते। निर्वाणमर्पयति। निष्पर्युत्थानो विहरति। समाधिं प्रतिलभते। अदरिद्रश्च भवति। इमे कुमार दशानुशंसाः परिशुद्धशीलस्य बोधिसत्त्वस्य महासत्त्वस्य॥

तत्रेदमुच्यते -

ज्ञानं च परिपूरेति बुद्धानामनुशिक्षते।

अगर्हितः पण्डितानां भोति नित्यं विशारदः॥ १॥

प्रतिज्ञातो न चलति प्रतिपत्तौ च तिष्ठति।

अर्पेति येन निर्वाणं संसारातः पलायते॥ २॥

निष्पर्युत्थितो विहरति समाधिं लभते लघु।

अदरिद्रश्च भवति शीलस्कन्धे प्रतिष्ठितः॥ ३॥

ज्ञानं च तस्यो परिपूर्णु भोति

अनुशिक्षते चाति तथागतानाम्।

न चास्य निन्दां प्रकरोन्ति पण्डिताः

तथा हि तस्यो परिशुद्ध शीलम्॥ ४॥

प्रतिज्ञातोऽसौ न चलाति पण्डितः

तथा हि शूरः प्रतिपत्तिये स्थितः।

दृष्ट्वा च संसारमनेकदोषं

पलायते निर्वृति येन याति॥ ५॥

पर्युत्थितं चित्तु न भोति तस्य

तथा ह्यसौ शीलबले प्रतिष्ठितः।

क्षिप्रं समाधिं लभते निरङ्गणं

परिशुद्धशीलस्यिमि आनुशंसाः॥ ६॥



इति श्रीसमाधिराजे शीलनिर्देशपरिवर्तो नाम सप्तविंशतिमः॥