• Home
• Canon Text
• 24 nāgakumārāvadānam

24 nāgakumārāvadānam

Technical Details

24 nāgakumārāvadānam|



bhikṣavaḥ saṃśayajātāḥ sarvasaṃśayacchettāraṃ buddhaṃ bhagavantaṃ pṛcchanti-kuto bhadanta tena nāgakumāreṇa tatprathamataḥ śraddhā pratilabdhā ? bhagavānāha-bhūtapūrvaṃ bhikṣavo'sminneva bhadrakalpe viṃśativarṣasahasrāyuṣi prajāyāṃ kāśyapo nāma śāstā loka utpannastathāgato'rhan samyaksaṃbuddho vidyācaraṇasaṃpannaḥ sugato lokavidanuttaraḥ puruṣadanmyaśārathiḥ śāstā devamanuṣyāṇāṃ buddho bhagavān| sa evaṃ śrāvakāṇāṃ dharmaṃ deśayati-etāni bhikṣavo'raṇyāni śūnyāgārāṇi parvatakandaragiriguhāpalālapuñjābhyavakāśaśmaśānavanaprasthāni prāntāni śayanāsanāni dhyāyata| bhikṣavo mā pramādata| mā paścādvipratisāriṇo bhūta| idamasmākamanuśāsanam| tatra kecidbhikṣavaḥ sumerupariṣaṇḍāyāṃ gatvā dhyāyanti, kecinmandākinyāḥ puṣkariṇyāstīre, kecidanavatapte mahāsarasi, kecit saptasu kāñcanamayeṣu parvateṣu, kecit tāsu tāsu grāmanigamarājarāṣṭradhānīṣu gatvā dhyāyanti||



anyatamaśca cirajātako nāgakumāraḥ suparṇinā pakṣirājena sumerupariṣaṇḍāyāmupariṣṭādapahriyate| yāvat tena bhikṣavo dhyānādhyayanayogamanasikārayuktā viharanto dṛṣṭāḥ| dṛṣṭvā cāsya cittamabhiprasannam| prasādajātaḥ saṃlakṣayati-muktā hyete āryakā evaṃvidhād duḥkhāt| cyutaḥ kālagato vārāṇasyāṃ ṣaṭkarmanirate brāhmaṇakule jātaḥ| unnīto vardhito mahān saṃvṛttaḥ| so'pareṇa samayena kāśyapasya samyaksaṃbuddhasya śāsane pravrajitaḥ| tenodyatā ghaṭatā vyāyacchatā sarvakleśaprahāṇādarhattvaṃ sākṣātkṛtam| arhan saṃvṛttaḥ pūrvavadyāvanmānyaśca pūnyaścābhivandyaśca saṃvṛttaḥ| sa saṃlakṣayati-kuto'haṃ cyutaḥ ? tiryakṣu| kutropapannaḥ ? manuṣyeṣu| kutra mama mātāpitarau ? yāvat paśyati nāgabhavane rudantau tiṣṭhataḥ| sa tatra gataḥ| gatvā pṛcchitumārabdhaḥ-amba tāta kasyārthe ruditaḥ ? tau kathayataḥ -ārya, sucirajātako'smākaṃ nāgakumāraḥ suparṇinā pakṣirājenāpahṛtaḥ| sa kathayati-ahamevāsau| ārya, tādṛśaḥ sa duṣṭanāgo yadvayaṃ sugatigamanamapi na saṃbhāvayāmaḥ, prāgevedṛśānāṃ dharmāṇāṃ lābhī bhaviṣyati| tena tau smāritau| pādayornipatya kathayataḥ- ārya, evaṃvidhāstvayā guṇagaṇā adhigatāḥ| ārya tvaṃ piṇḍakenārthī, vayaṃ puṇyenārthikāḥ| ihaiva tvamāgamya divase divase bhaktakṛtyaṃ kṛtvā gaccha| sa nāgabhavane divyāṃ sudhāṃ paribhuktvā āgacchati| tasya śrāmaṇerakaḥ sārdhavihārī| sa bhikṣubhiruktaḥ-śrāmaṇeraka, ayaṃ te upādhyāyaḥ kutra bhuktvā bhuktvā āgacchati ? sa kathayati-nāhaṃ jāne| te kathayanti-nāgabhavane divyāṃ sudhāṃ paribhujya paribhujyāgacchati| tva kasyārthe na gacchasi ? sa kathayati-ayaṃ maharddhiko mahānubhāvo yena gacchati| kathamahaṃ gacchāmi ? te kathayanti- yadā ayaṃ ṛddhyā gacchati, tadā tvamasya cīvarakarṇikaṃ gṛhāṇa| sa kathayati-mā pateyam| te kathayanti-bhadramukha, yadi sumeruḥ parvatarājā cīvarakarṇikamavalambate, nāsau patet, prāgeva tvaṃ patiṣyasīti| yo yasmin sthāne'ntardhāsyati, tena tatra nimittamudgṛhītam| sa tatpradeśaṃ pūrvameva gatvā avasthitaḥ| sa cāntardhāsyatīti tena cīvarakarṇikaṃ gṛhītam| tau upari vihāyasā prakrāntau yāvat tau nāgairdṛṣṭau| tayordve te āsanaprajñaptikṛtau| dvau maṇḍalakau āmārjitau| sa saṃlakṣayati -kasyārthe'yamapara āsanaḥ prajñaptaḥ ? sa pratinivartya paśyati yāvat śrāmaṇerakam| sa kathayati-bhadramukha, tvamapyāgataḥ ? upādhyāya, āgato'ham| śobhanam| nāgāḥ saṃlakṣayanti-ayamāryo maharddhiko mahānubhāvaḥ| śakyate divyāṃ sudhāṃ kārayitum| ayamanyo na śakyate| taistasya divyā sudhā dattā, tasyāpi prākṛta āhāraḥ| sa tasya pātragrāhakaḥ| tena tasya pātraṃ gṛhītaṃ yāvat tatraikā odanamijya (?) vatiṣṭhate| sā tenāsye pakṣiptā yāvaddivyamāsvādanam| sa saṃlakṣayati-īdṛśā api matsariṇo nāgāḥ| ekadhye niṣaṇṇayorasya divyā sudhā dattā, mamāpi prākṛta āhāraḥ| sapraṇidhānaṃ kartumārabdhaḥ- yanmayā bhagavati kāśyape samyaksaṃbuddhe'nuttare mahādakṣiṇīye brahmacaryaṃ cīrṇam, anenāhaṃ kuśalamūlenaitaṃ nāgamasmādbhavanāccyāvayitvā atraivopapadyeyamiti| tasya dṛṣṭa eva dharme ubhābhyāṃ pāṇibhyāṃ jalaṃ syanditumārabdham| nāgasyāmi śirortirbādhitumārabdhā| sa kathayati-ārya, anena śrāmaṇerakenāśobhana-cittamutpāditam| pratinivartāpayatu enam| sa kathayati-bhadramukha, apāyā hyete, nivartaya cittam| sa gāthāṃ bhāṣate-



pravaṇībhūtamīdaṃ cittaṃ na śaknomi nivārayitum|

ihasthasyaiva me bhadanta pāṇibhyāṃ syandate jalam||1||



sa taṃ nāgaṃ tasmādbhavanāccyāvayitvā tatraivopapannaḥ| tatra bhikṣavastena nāgakumāreṇa tatprathamataḥ śraddhā pratilabdhā||



iti śrīdivyāvadāne nāgakumārāvadānam||