• Home
• Canon Text
• Romanized
• śāstrapiṭaka
• kośa
• 8 tṛṣṇāvargaḥ

8 tṛṣṇāvargaḥ

Technical Details

(8) tṛṣṇāvargaḥ



tṛṣṇāgnireva narakabhūtaḥ

bhavotārāya tṛṣṇāgnirjvalanaḥ śīta ucyate |

narake nārake yo'gnistṛṣṇāgnistriṣu dhātuṣu ||1||



kalpabhūto hyayaṃ vahniḥ yo'yaṃ narakasambhavaḥ |

bahujvālākulo vahniḥ tṛṣṇāhetusamudbhavaḥ ||2||



karmakṣayād vimucyante narakāt pāpakāriṇaḥ |

triṣu dhātuṣu dahyante narāstṛṣṇāvaśānugāḥ ||3||



anādimati saṃsāre tṛṣṇāgniratibandhakaḥ |

tṛṣṇāgnirnarakaṃ tasmānnāgnirnarakasambhavaḥ ||4||



tṛṣṇāgniḥ śarīraṃ manaśca dahati

gātradāhaṃ paraṃ kuryānnārakeyo hutāśanaḥ |

śārīraṃ mānasaṃ dāhaṃ tṛṣṇāgniḥ kurute nṛṇām ||5||



tṛṣṇāgniḥ sāmānyāgninā viśiṣyate

tasmād viśiṣyate vahniḥ tṛṣṇāhetusamudbhavaḥ |

nārakeyo'samaścaiva tṛṣṇāgnirnitarāṃ smṛtaḥ ||6||



ayamagniḥ trikālasambhavaḥ

tristhānagaḥ trihetuśca trikarmaparidīpakaḥ |

trikālasambhavo jñeyastṛṣṇā'gniparakastathā ||7||



tṛṣṇāgniḥ sadaiva sarvatra dāhakaḥ

rāgāgnirdahyate svarge dveṣāgnistiryage tathā |

mohāgnirdahyate pāpe tṛṣṇāgniḥ sarvadā sthitaḥ ||8||



tṛṣṇāgneḥ svarūpa-nirūpaṇam

mānerṣyādhūmaviśikhaḥ saṅkalpe dhanasambhavaḥ |

lobhāgnirdahate lokaṃ nāgniḥ kāmasamudbhavaḥ ||9||



tṛṣṇāgnirviṣayasevanenaiva vardhate

lobhāśīviṣadaṣṭā ye teṣāṃ śarma na vidyate |

sevito bhāvito lobho bhūya evābhivardhate ||10||



lobhasamo ripurbhuvi nāsti

yathā yathendhanaṃ prāpyānalo vardhatyanekaśaḥ |

śakyaḥ pālayituṃ(vahni) rlobhavahnirna(śakyate) ||11||



cakravad bhramate loko lobhena parivañcitaḥ |

anādinidhane loke nāsti lobhasamo ripuḥ ||12||



viśanti sāgarajale lobhena parivañcitāḥ |

śastrasaṅghātagahanaṃ yuddhaṃ saṃpraviśanti ca ||13||



lobhahetorhi bhūpālā nāśayanti parasparam |

śastrāsibhairavaprotā yuddhayante dhanatṛṣṇayā ||14||



tṛṣṇāviṣavinirmuktā lobhāṅgāravivarjitā |

samaloṣṭakāñcanā ye nirvāṇasyāntike hi te ||15||



lobhāgniḥ sarvāpekṣayā viṣamaḥ

atīvānupapannasya dhanalobhena dahyate |

na vahnirviṣamastatra lobhāgniryatra vartate ||16||



lobhaśāntiṃ vinā nirvāṇakathā vṛthā

lobhādhāraprayatnena hanyāt tān rabhasā budhaḥ |

anirvāpitalobhasya nirvāṇaṃ dūrataḥ sthitam ||17||



bhavasukhaparityāgī bhavajaṃ duḥkhaṃ nāpnoti

bhavābhilāṣiṇīṃ nāndīṃ nābhinandanti ye narāḥ |

na teṣāṃ bhavajaṃ duḥkhaṃ svapne samupavidyate ||18||



tṛṣṇābaddhān janān mṛtyuḥ śambūka iva karṣati

matsyān yathā jālabaddhān śambūkaḥ parikarṣati |

tṛṣṇābaddhāṃstathā sattvānmṛtyuḥ samupakarṣati ||19



tṛṣṇāviṣaṃ kutrāpi na muñcati

saviṣaiḥ sāyakairviddho mṛgo yatra (pra)dhāvati |

tatra tatra viṣaṃ yāti tathā tṛṣṇāviṣaṃ nṛṇām ||20||



pravāhapravahannadyā gatirgatya'nudhāvinī |

yathā nirdahate bālān śuṣkendhanamivānalaḥ ||21||



āpātaramyā(viṣayā) vipākajvalanopamāḥ |

tasmāt tṛṣṇā vimoktavyā yadi saukhyaṃ hi rocate ||22||



yathā hi vaḍiśagrastā mīnā mṛtyuvaśānugāḥ |

tathā prataptā viṣayān paridhāvanti duḥkhitāḥ ||23||



tṛṣṇāgniḥ narakādapi mahān

narakaṃ nārakeyaṃ ca tṛṣṇānihitaṃ mahat |

patanti nidhanā martyāḥ paradāropajīvinaḥ ||24||



tṛṣṇāprerito munirapi duḥkhamanubhavati

na ceṣṭitamanopāpatṛṣṇayā prerito muniḥ |

ṣaḍindriyasamudbhūto viṣayendhanadāhakaḥ ||25||



devānapi tṛṣṇāgnirdahatyeva

tṛṣṇāgnirdahate devaṃ kāyāgnirna kathañcana |

sukhāvṛtāḥ sukharatāḥ sukhe(na) parivañcitāḥ ||26||



tṛṣṇāparivañcitaḥ patanamapi nāvagacchati

patanaṃ nāvagacchanti tṛṣṇayā parivañcitāḥ |

jvālāmālākulaḥ sarvaḥ saṃsārastṛṣṇayā''vṛtaḥ ||27||



tṛṣṇāgninā vaśībhūtā janā gacchanti durgatim |

tṛṣṇāgnibhiḥ parivṛtaḥ suralokaḥ samantataḥ ||28||



tṛṣṇāgniḥ sadaiva vardhate

dahyate vivaśo raktaḥ kāmabhogavaśīkṛtaḥ |

yathā yathendhanaṃ prāpya jvalanaṃ saṃpravardhate ||29||



tathā tathā sukhaṃ prāpya tṛṣṇāgnirvardhate nṛṇām |

parivartayate puṃsaḥ kāṣṭhāgnirdāhadīpakaḥ ||30||



tṛṣṇāgnirdahate lokaṃ parihātuṃ na śakyate|

ye viśālāṃ nadīṃ tīrṇā saṅkalpakṛtabhairavīm ||31||



tṛṣṇāpāśaśūnyaḥ paramāṃ śāntimāpnoti

te gatāḥ paramāṃ śāntiṃ yān hi tṛṣṇā na bādhate |

tṛṣṇāpāśavimuktā ye saṅgadoṣavivarjitāḥ ||32||



nirmuktapāpakalmāṣā vītaśokā hi te budhāḥ |

kalpakoṭisahasrāṇi tṛṣṇayā vañcitā narāḥ ||33||



tṛṣṇayā vañcito lokastṛṣṇāmevopāste

(na)te tyajanti(viṣayān) māyāmohavaśaṃgatāḥ |

tṛṣṇayā vañcito lokastṛṣṇāmevopasevate ||34||



lavaṇodaṃ tṛṣātoyaṃ yathā pibati nārikaḥ |

na tena (tuṣyati) janturmuhuśca pariśuṣyati ||35||



duḥkhakarīṃ tṛṣṇāṃ na seveta

viṣayeṣveva tṛṣṇārtaśceṣṭate puruṣo'dhamaḥ |

tasmāt tṛṣṇāṃ na seveta sā hi tṛṣṇā durāsadā ||36||



tṛṣṇāvaśo naiva pramucyate

tṛṣṇāvaśo hi puruṣaḥ saṃsārānnaiva mucyate ||

anuttamāni saukhyāni bhuktvā deveṣu jantavaḥ ||37||



tṛṣṇāpāśavikṛṣṭāḥ narakaṃ patanti

tṛṣṇāpāśavikṛṣṭāste patanti narakaṃ punaḥ |

asvatantrādikalyāṇaṃ nityaduḥkhamayaṃ kaṭu ||38||



tṛṣṇayā kadāpi tuṣṭirna bhavati

tṛṣṇāyāḥ sevanānmuktaḥ sanmārgamadhigacchati |

satṛṣṇasya kutastuṣṭirviṣayeṣu bhaviṣyati ||39||



sā tṛptiryā vitṛṣṇasya vītaśokasya dehinaḥ |

evaṃ vitarkavihitāḥ pramādena ca vañcitāḥ ||40||



tṛṣṇayā devānapi narakaṃ yānti

tṛṣṇayāḥ toṣitā devāḥ patanti narakaṃ punaḥ |

viḍambaneyaṃ paramā yatsurā narakaṃ gatāḥ ||41||



krīḍakāḥ paramā bhūtvā kāmasya vaśamāgatāḥ |

na codvijanti saṃsārān prāṇinaścittamohitāḥ ||42||



tṛṣṇayā duḥkhataraṃ padamāpnoti

duḥkhād duḥkhataraṃ yānti tṛṣṇayā parivañcitāḥ |

yathā yathā sukhasyāptirvardhate jālinī tathā ||43||



jālinīvahnidagdhasya narakānupakarṣati |

satṛṣṇasya vitarkā ye teṣāṃ saṃkhyā na vidyate ||44||



viṣayagāminaḥ tṛṣṇayā mṛtyumukhameva praviśanti

avitarkavitarkantu mṛtyurājo vikarṣati |

vitarkakāmavaśagāstṛṣṇāviṣayagāminaḥ ||45||



kāmāsvādapramattāḥ viṣayiṇo duḥkhinastiṣṭhanti

sukhasya bhoginaṃ dṛṣṭvā na vidvadbhistatheṣyate |

kāmāsvādapramattānāṃ prāṇināṃ viṣayārthinām ||46||



dehinaḥ tṛṣṇayā dahayante

jālinī bādhate nityaṃ yathā badhnanti dehinaḥ |

pañcālambanametattu tṛṣṇayā naiva dahayate ||47||



tṛṣṇāvimuktā vimalā bhavanti

tṛṣṇāvimuktavimalā na pāpapuragāminaḥ |

saṅkalpadoṣā kuṭilā tridoṣarajasodbhavāḥ ||48||



tṛṣṇayā saṃsārasāgare parivarte patanti janāḥ

pramādajalagambhīrāḥ strīrāgakṛtasevanāḥ |

gītatūryasvarāḥ śīghraṃ surāpānācca cañcalāḥ ||49||



sañchannaviṣayā sarve manaḥ kṣiptataraṅgiṇaḥ |

tṛṣṇānadīṣu viṣame vahanti na ca gocare ||50||



gāhante te ca sammūḍhāḥ surā rāgeṇa vañcitāḥ |

tridoṣakāṣṭhasaṃbhūtāḥ pramādānilavegataḥ ||51||



tṛṣṇānalaḥ suragaṇān dahate na ca te viduḥ |

na kṣaṇo nāpi hi lavo na muhūrta kathañcana ||52||



yā na tṛṣṇāvaśagataiḥ suraiḥ samupabhujyate |

tṛṣṇābhūmiriyaṃ kāṣṭhā vitarkajalasambhṛtā ||53||



tṛṣṇāsarpadagdhaḥ kālavaśīkṛto bhavati

yasmin krīḍanti vivaśāḥ devāḥ kāmavaśānugāḥ |

cittādinā pracaṇḍena tṛṣṇāviṣavisarpiṇā ||54||



daṣṭānupañcaśīrṣeṇa kiṃ vṛthā vilapasyatha |

tṛṣṇānadī viśāleyaṃ pañcatīrthasamudbhavā ||55||



tṛṣṇāmohendrajālena viprakīrṇena sarvadā |

tathā prapañcitā devā yathā na śubhabhāginaḥ ||56||



tṛṣṇāviṣayaghṛtasikto vardhata eva

nendriyāṇi sadā kāmaistṛpyanti hi kathañcana |

saṃvardhate tathā tṛṣṇā ghṛtasikto yathā'nalaḥ ||57||



tṛṣṇayā vividhāsu yoniṣu janāḥ bhramanti

nānāvidhaiḥ sukhaireṣā jālinī lokanāśinī |

narakapretatiryakṣu bhrāmayantī narān sadā ||58||



vītatṛṣṇaḥ nirmuktabandhanaḥ paramāṃ gatimāpnoti

mṛtyūpapattidolāyāṃ śliṣyante bāliśāḥ janāḥ |

suśīlāvītatṛṣṇāśca gatāste paramāṃ gatim ||59||



nirmuktabandhanā dhīrā gataśokā gatavyathāḥ |

sukhaṃ prāpnuvanti nityaṃ ye na tṛṣṇāvaśānugāḥ |

janmaduḥkhamayaiḥ pāśairna te vidhyanti sūrayaḥ ||60||



tṛṣṇāvisṛṣṭiḥ jñānāya pravartayati

yeṣāṃ sarvāsvavasthāsu jñāneṣu vihitaṃ manaḥ |

animitte mano yeṣāṃ visṛṣṭā ye ca tṛṣṇayā |

te vītamalakāntārāḥ pāraṃ prāptāḥ sukhodayam ||61||



tṛṣṇāmohapramattāḥ bhave bhave bhramanti

tṛṣṇāmohapramattā ye ratisaukhyāstathaiva ca |

mohitāste devagaṇā bhramiṣyanti bhave bhave ||62||



aharniśaṃ tṛṣṇā tāpayati

kuṭṭanavyavahārā ye paricittāpahāriṇaḥ |

avidyābahulā ye vā nityaṃ dāhābhikāṅkṣiṇaḥ |

na rātrau na divā teṣāṃ hṛdayaṃ suprasīdati ||63||



lobhābhibhūtāḥ tuṣāgnikalpā bhavanti

lobhābhibhūtamanasāṃ parivittābhikāṅkṣiṇām |

teṣāṃ tuṣāgnikalpānāṃ viśvasenna svabhāvataḥ ||64||



viṣayendhana sarpād bhayamevocitam

bibheti hi naraḥ sarvaḥ sarpādiva viṣendhanāt |

lobhena viṣayeṇaivā'bhibhūtāste narā bhṛśam ||65||



tṛṣṇāvaśagāḥ vividhāṃ yoniṃ labhante

te mṛtā narakaṃ yānti pretayoniṃ tathaiva ca |

tasmādapi vinirmuktā narakād vahnisammukhāt ||66||



ākāṅkṣiṇaḥ nityaṃ duḥkhabhāgino bhavanti

pañcajanmaśatānyete bhavanti parikāṅkṣiṇaḥ |

vivarṇā dīnavadanā nityaṃ duḥkhasya bhāginaḥ |

bhavanti manujāḥ sarve lobhopahatacetasaḥ ||67||



vivekasampannāḥ paramāṃ gatiṃ labhante

prahīṇalobhā ye santi nityaṃ jñānābhikāṅkṣiṇaḥ |

buddhimantaḥ sadā santaḥ te gatāḥ paramāṃ gatim |

nirvāṇahṛdayā vītalobhamohāḥ sadā narāḥ ||68||



lobhākṛṣṭasya vinipātaḥ

lobhāśīviṣadaṣṭasya vinipāto dhruvaṃ sthitaḥ |

kriyamāṇo dhruvaṃ loko vardhate sa muhurmuhuḥ ||69||



śuṣkendhanaṃ samādāya yathā vahniḥ pravardhate |

dhanatṛṣṇāratāḥ sattvāḥ dhanopārjanatatparāḥ ||70||



mṛtyukāle samutpanne tyajanti vivaśā dhanam |

yacca tatsambhavaṃ yogāt tat sarva na vinaśyati ||71||



lobhātmā ghoraṃ narakaṃ yāti

tena vittena lobhātmā nīyate narakaṃ bhṛśam |

anyaistadbhujyate vittaṃ sa tu pāpena lipyate ||72||



prayānti narakaṃ ghoraṃ paścāttāpena dahyate |

anartho hyartharūpeṇa sukharūpeṇa vā sukham ||73||



lobhatyāgaṃ prājñaḥ kuryāt

amitraṃ mitrarūpeṇa lobho'yaṃ hṛdi vartate |

na lobhaṃ saṃśrayet prājño lobhāgnirdahyate sadā ||74||



lobhadagdhāḥ narakagāmino bhavanti

tena dagdhā bhṛśaṃ sattvāḥ paścānnarakagāminaḥ |

lokasādhāraṇā hyete vibhavāḥ sukhavarjitāḥ ||75||



tṛṣṇābhayavimuktireva śreyaskarī

teṣāmarthe kathaṃ pāpa kriyate mandabuddhibhiḥ |

tṛṣṇābhayavimuktasya nirāśasya hi sarvataḥ ||76||



vītakāṅkṣasya dhīrasya nityaṃ padamavasthitam |

sampattau dhābate loko vipattau nāvabudhyate ||77||



sampattiḥ kṣayāntā

vipadantā hi sampattiḥ kṣayāntaṃ divasaṃ yathā |

yathā tiṣṭhati sampattiḥ vipattiḥ pāpikā tathā ||78||



kāmabhogairdevā api narakaṃ yānti

avitṛptasya kāmebhyastṛṣṇayā paridahyate |

yasyeṣṭāḥ sampado nityaṃ sukhaṃ cābhimataṃ sadā ||79||



jani nāśayate tāsāṃ tṛṣṇā naṣṭā sukhāvahā |

te devā narakaṃ yānti kāmabhogaistathārpitāḥ ||80||



analāceṣṭitaṃ sarva tad vadanti tathāgatāḥ |

manuṣyā yacca narakaṃ prayā(nti) śataśastathā ||81||



vimugdhāḥ yati jīvanaṃ nāvagacchanti

ceṣṭitaṃ tad viśālāyāḥ yoṣikāyā vidurbudhāḥ |

vimohitā na vindanti tvaritaṃ svalpajīvitam |82||



tṛṣṇayā sukṛtāni vinaśyanti

sukṛtāni ca naśyanti tṛṣṇā naiva vinaśyati |

bhave bhave gatā satvāḥ na vindanti śubhāśubham ||83||



śubhasya phalameveṣṭaṃ yat surāḥ paribhuñjate |

aśubhasya tathā dṛṣṭamasukhaṃ vinipātajam ||84||



śubhāśubhaprahīṇā eva jarāmaraṇarahitā bhavanti

śubhāśubhaprahīṇā ye saṅgadoṣavivarjitāḥ |

te gatāḥ paramaṃ sthānaṃ jarāmaraṇavarjitam ||85||



tṛṣṇānadīparikṣiptaḥ janaḥ kimapi nāvagacchati

pañcāraṃ bhavacakraṃ tat tṛṣṇānābhipuraḥsaram |

nadīrāgaparikṣiptaṃ na ca loko'vabudhyate ||86||



doṣāvartatarā jñeyā saṅkalpamakarākulāḥ |

tṛṣṇānadī viśāleyaṃ na ca loko'vabudhyate ||87||



tṛṣṇā triṣu kāleṣu vañcikā

trikāle vañcanī tṛṣṇā nityamajñānakāriṇī |

na tasyāṃ viśvased dhīmān saṃsārabandhanā hi sā ||88||



tṛṣṇā lokabandhanabhūtā

mitravad dṛśyate kāle śatruvacca nikṛntati |

na tasyāṃ viśvaset prājñaḥ sā hi lokasya bandhanam ||89||



śakyaṃ hi bandhanaṃ chettumāyasaṃ dāruvattathā |

na tṛṣṇābandhanaṃ chettuṃ nityaṃ kāmagaveṣibhiḥ ||90||



yasyeṣṭo bandhabhedo'yaṃ yasyeṣṭaṃ sukhamavyayam |

sa tṛṣṇayā vimuktaḥ (syāt)prajñāśo (dhanakṛd) bhavet ||91||



jñānena tṛṣṇāvṛkṣasya chedanaṃ karttavyam

jñānālokaḥ sukhāloko duḥkhaṃ tṛṣṇātamaḥsmṛtam |

tasmādālokamāsthāya tamo nudati paṇḍitaḥ ||92||



jñānakhaḍgena tīkṣṇena tṛṣṇāvṛkṣaṃ nikṛntati |

nikṛttavṛkṣaḥ (sa) naraḥ sukhaṃ prāpnotyanuttamam ||93||



doṣeṇa bahulā hyeṣā nadī prasravaṇākulā |

doṣā netānahitvā ( na) bhavānmuñcati paṇḍitaḥ ||94||



prajñānāvamāśritya tṛṣṇānadyāḥ pāraṃ gacchati

tṛṣṇānadīṃ tripathagāṃ pramādāvartadustarām |

prajñānāvaṃ samāśritya pāraṃ gacchantyanāmayam ||95||



mahecchatāmahacchatraṃ yena cāyānti bāliśāḥ |

tasmānmahecchatā badhyā tvayeyaṃ jñānacakṣuṣā ||96||



mahecchaiva hṛdayavraṇabhūtā

mahecchatāvraṇastīvro hṛdaye yasya jāyate |

na rātrau na divā tasya sukhaṃ bhavati lobhinaḥ ||97||



saṅkalpe tu na sambhūtaḥ tṛṣṇāvāyusamīritaḥ |

mahecchatāmayo vahnirdahate hṛdayaṃ nṛṇām ||98||



lobhenātmano'hitaṃ kurvanti janāḥ

lobhenāveṣṭitamanāḥ puruṣo laghucetasā |

jīvitānyapi sārāṇi jahāti dhanatṛṣṇayā ||99||



pāpāni hi ca karmāṇi kurvanti puruṣāḥ kṣitau |

dhanalābhena tat sarva pravadanti manīṣiṇaḥ ||100||



ye sāhasaṃ na kurvanti viśanti jvalanaṃ ca yat |

tat sarva lobhadoṣeṇa kurvantyahitamātmanaḥ ||101||



śastrānilāni duḥkhāni vividhāni ca (sarvataḥ) |

viśanti (vai) narā mūḍhā lobhastatra hi kāraṇam ||102||



hṛdayastho manovahnirnityaṃ bahvicchatāṃ nṛṇām |

alpecchatayā (hi) hṛcchāntirbhavatilābhinaḥ ||103||



yathāgnirindhanenaiva praśāntimadhigacchati |

tathā vahvicchatāṃ nṛṇāṃ dhanairvṛddhiḥ prajāyate ||104||



alpecchataiva sukham

bhūpālā (hi) dhanaistṛptāḥ koṭiśo nidhanaṃ gatāḥ |

yāsyanti cānye nidhanaṃ tasmādalpecchatā sukham ||105||



tṛṣṇāvihīna eva sukhamāpnoti

duḥkhaṃ vahvicchatā nṛṇāṃ lakṣaṇaṃ sukhaduḥkhayoḥ |

(heyā sarvaprayatnena ) idamuktaṃ parīkṣakaiḥ |

eṣa panthāḥ śivaḥ śreṣṭho yena tṛṣṇā vaśīkṛtā ||106||



||iti tṛṣṇāvargo'ṣṭamaḥ ||