• Home
• Canon Text
• 1 prabhāsāvadānaṃ

1 prabhāsāvadānaṃ

Technical Details

kṣemendraviracitā



bodhisattvāvadānakalpalatā |



namaḥ sarvajñāya |



1 prabhāsāvadānaṃ |



cittaṃ yasya sphaṭikavimalaṃ naiva gṛhṇāti rāgaṃ

kāruṇyārdre manasi nikhilāḥ śoṣitā yena doṣāḥ |

akrodhena svayamabhihato yena saṃsāraśatruḥ

sarvajño'sau bhavatu bhavatāṃ śreyase niścalāya ||1||



sacchāyaḥ sthiradharmamūlavalayaḥ puṇyālavālasthiti-

rdhīvidyākaruṇāmbhasā hi vilasadvistīrṇaśākhānvitaḥ |

saṃtoṣojjvalapallavaḥ śuciyaśaḥpuṣpaḥ sadāsatphalaḥ

sarvāśāparipūrako vijayate śrībuddhakalpadrumaḥ || 2 ||



jāyate jagaduddhartuṃ saṃsāramakarākarāt |

matirmahānubhāvānāmatrānuśrūyate yathā || 3 ||



asti prabhāvatī nāma hemaharmyagṛhairvṛtā |

purī prabhāvatīva dyaurvimānaiḥ puṇyakarmaṇām || 4 ||



vidyādharavatī siddhagandharvagaṇasevitā |

gāṃ śritā śakranagarī sukṛtena satāmiva || 5 ||



sevitā satataṃ satyavratadānadayāmayaiḥ |

rājadhānīva dharmasya puṇyāvasathaśālinī || 6 ||



abhūdbhūtilakastasyāṃ prabhāso nāma bhūpatiḥ |

saprabhā sādarairyasya kīrtirabhyarcyate suraiḥ || 7 ||



guṇasaurabhasaṃbhārāḥ sarvāsāṃ hariṇīdṛśām |

yadyaśaḥpuṣpamañjaryo yātāḥ karṇavataṃsatām || 8 ||



upāyajñasya yasyājñāṃ suvaṇakusumojjvalām |

mālāmiva mahīpālā maulicakreṣu cakrire || 9 ||



taṃ kadācitsamāsīnamabhyetya bhuvaneśvaram |

uvāca kṣitivinyastajānurnāgavanādhipaḥ || 10 ||



deva divyadyutirdantī gṛhīto'smābhiradbhutaḥ |

tvatkīrtiśravaṇādbhūmimairāvaṇa ivāgataḥ || 11 ||



dvāri sthito'sau dviradastridaśārhaḥ pradṛśyatām |

bhṛtyānāṃ prabhunāṃ dṛṣṭaḥ saphalo hi pariśramaḥ || 12 ||



etadākarṇya nṛpatirnirgatyāmātyasaṃmataḥ |

dadarśa dviradaṃ dvāri kailāsamiva jaṅgamam || 13 ||



uddāmasaurabhāhūtairbhramarairgaṇḍaḍiṇḍimaiḥ |

śṛṅgārābharaṇodāraṃ vasantamiva sevitam || 14 ||



dantaparyantaviśrāntakaraṃ mīlitalocanam |

smarantaṃ vindhyakadalīsallakīkānanaśriyaḥ || 15 ||



agastyaśāsanād yātaṃ bhuvi kuñjararājatām |

sphuratsaptacchadāmodaṃ vindhyācalamivonnatam || 16 ||



taṃ vilokya kṣitipatirdantastambhavibhūṣitam |

lakṣmīvilāsabhavanaṃ vismayādityacintayat || 17 ||



aho navanavotkarṣā nirmāṇāścaryaśālinām |

karmaṇāmanavacchinnā saṃsārasargasaṃtatiḥ || 18 ||



amanthena sudhāmbhodheranāyāsena vāsukeḥ |

anākarṣeṇa śailasya kenāyaṃ janito gajaḥ || 19 ||



atha hastimahāmātraṃ saṃyātaṃ nāma bhūpatiḥ |

ādideśārcitādeśaṃ gajo'yaṃ damyatāmiti || 20 ||



tadādiśya mahīpāle yāte'ntaḥpuramandiram |

nāgaṃ jagrāha saṃyātaḥ sarvaśikṣābharakṣamam || 21 ||



sa sacchiṣya iva prājñaḥ prāgjanmābhyāsayantritaḥ |

nītastena prayatnena sarvaśikṣāvinītatām || 22 ||



bahudānanirudvegaḥ śaktyutsāhayutaḥ kṣamī |

ripupraghātasugatiḥ sa rājñastulyatāṃ yayau || 23 ||



damyakriyāsamuttīrṇaṃ tatastaṃ kuñjareśvaram |

nareśvarāya saṃyātaḥ kṛtakṛtyo nyavedayat || 24 ||



dṛṣṭvā tamaṅkuśāyattaṃ nirvikārabalodayam |

utsāhaśikharārūḍhaṃ mene rājā jayaśriyam || 25 ||



sa saṃjātapraharṣotthadākṣyaśikṣādidṛkṣayā |

tamāruroha sotsāhaḥ sahasrāṃśurivodayam || 26 ||



saṃyāto'tha gajendrasya mantrīva vaśavartinaḥ |

sarvamaṇḍalasaṃcāracāturthaṃ samadarśayat || 27 ||



gajaprekṣāprasaṅgena mṛgayākelilālasaḥ |

rājā nijotsāhamiva vyagāhata vanaṃ mahat || 28 ||



sa yayau ratnakeyūrakiraṇairdūrasarpībhiḥ |

sallakīpallavavarairdignāgānāhvayanniva || 29 ||



vrajantaṃ tatra dadṛśustaṃ vane vanadevatāḥ |

praharṣavismayākīrṇakarṇapūrīkṛtekṣaṇāḥ || 30 ||



śabarīkabarīpāśapuṣpasaurabhanirbharāḥ |

vaindhyā vasuṃdharādhīśaṃ marutastaṃ siṣevire || 31 ||



atha vindhyopakaṇṭheṣu svacchandasukhaśākhiṣu |

smṛtvā vilāsavṛttāntaṃ gajaḥ sotkaṇṭhatāṃ yayau || 32 ||



kariṇyāḥ premabaddhāyā gandhamāghrāya sa dvipaḥ |

nītiṃ nṛpa ivotsiktastatyājāṅkuśayantraṇām || 33 ||



savegaṃ dhāvatastasya rāgākṛṣṭasya daṇḍinaḥ |

vimūḍhasyeva saṃsāre nābhavadviratiḥ kkacit || 34 ||



dṛṣṭvā prabhañjanajavaṃ kuñjaraṃ rājakuñjaraḥ |

vrajantaṃ jātasaṃdehaḥ saṃyātamidamabravīt || 35 ||



aho batāyaṃ bhavatā vinayaṃ grāhito gajaḥ |

dṛṣṭaḥ prayāto vaimukhyaṃ gurorasyāṅkuśasya yaḥ || 36 ||



bhramatīva diśāṃ cakramanuyāntīva pādapāḥ |

pādanyāsabhareṇāsya kṣībeṇādhūrṇate kṣitiḥ || 37 ||



asmin deva ivākāle prayāte pratikūlatām |

sarvāḥ puruṣakārasya niṣphalā yatnavṛttayaḥ | 38 ||



vacaḥ śrutveti saṃyātaḥ prabhorāyātasādhvasaḥ |

śikṣāpavādavailakṣyāduvāca racitāñjaliḥ || 39 ||



deva sarvakriyāyattaḥ kuñjaro'yaṃ mayā kṛtaḥ |

kariṇīgandhamāghrāya yātaḥ kiṃ tvadya vikriyām || 40 ||



nopadeśaṃ na niyamaṃ na dākṣiṇyaṃ na sādhutām |

smaranti jantavaḥ kāmaṃ kāmasya vaśamāgatāḥ || 41 ||



kena ratirasotsiktā viṣayābhimukhī matiḥ |

adabhraśvabhravibhraṣṭaśaolakulyeva vāryate || 42 ||



śarīraśramaśikṣāyāṃ damakāḥ kuśalā vayam |

manoniyamaśikṣāyāṃ munayo'pi na paṇḍitāḥ || 43 ||



rāgādagaṇitāyāsaḥ skhalitākhilasaṃyamaḥ |

eṣa dhāvatyamāreṇa mūrkhaḥ khala iva dvipaḥ || 44 ||



vṛkṣaśākhāṃ samālambya tyajemaṃ pṛthivīpate |

vyasanī patitaḥ satyaṃ pātayatyeva durjanaḥ || 45 ||



saṃyātasya vacaḥ śrutvā tatkālasadṛśaṃ nṛpaḥ |

tenaiva sahitaḥ śākhāmālalambe mahātaroḥ || 46 ||



avatīrya taroraśvamāruhya nṛpatau gate |

prāpyāliliṅga kariṇīṃ vigāhya gahanaṃ gajaḥ || 47 ||



tataḥ śāntasmaro hastī dinairabhyetya saptabhiḥ |

svayamālānasaṃbaddhastasthau bhuktvā yathāsukham || 48 ||



śikṣāsaṃyamayantritaṃ taṃ dṛṣṭvā svayamāgatam |

saṃyātaḥ kauśalotkarṣaharṣādrājñe nyavedayat || 49 ||



rāgavāgurayākṛṣṭaḥ prayayau yaḥ smarāturaḥ |

śikṣāyāmavisaṃvādī so'yaṃ prāptaḥ svayaṃ gajaḥ || 50 ||



saṃketayantrito vaśyo rasajñaḥ sallakībhuvām |

saṃtaptalohakavalaṃ gṛhṇāti vinaye sthitaḥ || 51 ||



eṣa kāmarasākṛṣṭaḥ kaṣṭāṃ vikṛtimāyayau |

punaḥ prakṛtimāpannaḥ praśāntamadanajvaraḥ || 52 ||



śakyā damayituṃ deva siṃhavyāghragajādayaḥ |

na tu rāgāsavakṣībaviṣayābhimukhaṃ manaḥ || 53 ||



etadākarṇya bhūpālastattatheti vicintayan |

uvāca satyamucitaṃ saṃyāta kathitaṃ tvayā || 54 ||



apyasti kaścilloke'smin yena cittamadadvipaḥ |

nītaḥ praśamaśīlena saṃyamālānalīnatām || 55 ||



ityukte de vatāviṣṭaḥ saṃyātastamabhāṣata |

deva santi jagatkleśaniḥśeṣonmūlanodyatāḥ || 56 ||



vivekālokitā loke vairāgyajanitāgrahāḥ |

śamasaṃtoṣaviśadā buddhā eva prabodhinaḥ || 57 ||



iti buddhābhidhāṃ śrutvā samyaksaṃbodhicetasaḥ |

rājñaḥ prāgjanmajābhyāsapraṇidhānamajāyata || 58 ||



vinimajjajjagadidaṃ saṃsāre makarākare |

saṃtārayeyaṃ saṃbodhimuktaḥ kuśalasetunā || 59 ||



athocurdevatā vyonmastaṃ śuddhāvāsakāyikāḥ |

samyaksaṃbodhisaṃbuddho bhaviṣyasi mahāmate || 60 ||



iti tadvacanaṃ śrutvā rājā virajasāṃ varaḥ |

jātismaro divyacakṣuḥ prayayau bodhisattvatām || 61 ||



atha sa vipulasattvastattvanikṣiptacakṣu-

rbhavajalanidhimajjatsarvabhūtānukampī |

abhavadabhinavodyatsaṃvuditsāhayogā-

ddalitakuśalasetuḥ sattvasaṃtāraṇāya || 62 ||



iti kṣemendraviracitāyāṃ bodhisattvāvadānakalpalatāyāṃ

prabhāsāvadānaṃ nāma prathamaḥ pallavaḥ samāptaḥ ||