• Home
• Canon Text
• 24 abhiniṣkramaṇāvadānam

24 abhiniṣkramaṇāvadānam

Technical Details

24 abhiniṣkramaṇāvadānam |



hasati sakalalolālokasargāya bhānuḥ |

paramamamṛtavṛṣṭayai pūrṇatāmeti candraḥ |

iyati jagati pūjyaṃ janma gṛhṇāti kaścit

vipulakuśalasetuḥ sattvasaṃtāraṇāya || 1 ||



purā śuddhodanaḥ śrīmān rājā śākyapure'bhavat |

yaśaḥśaśāṅkajanakaḥ sudhāsindhurivāparaḥ || 2 ||



khalāsaktā svabhāvena lakṣmīrguṇigaṇārpitā |

āścaryakāriṇā yena kṛtā satpakṣapātinī || 3 ||



adyāpyakhiladiktīryavanāsaktairvivekibhiḥ |

yaśobhiḥ śucibhiryasya munivratamivohyate || 4 ||



syāmahaṃ śuddhamāteti purā praṇidhitaḥ kila |

viśvakarmasuto martyamājagāmāmaladyutiḥ || 5||



kīrtiḥ satpuruṣasyeva tasyābhūdvallabhā param |

mahāmāyābhidhā devī candrasyeva kumudvatī || 6 ||



sāpaśyaddantinaṃ śvetaṃ svapne kukṣau vihāyasā |

gatamārohaṇaṃ śaile praṇatiṃ ca mahājanāt || 7 ||



atrāntare bodhisattvastuṣitāt tridaśālayāt |

garbhaṃ tasyāḥ samāpede svayaṃ lokānukalpayā || 8 ||



vahantī bodhisattvaṃ sā garbhe bhuvananandanam |

induṃ dugdhābdhiveleva babhūva pāṇḍuradyutiḥ || 9 ||



ikṣvākurājavaṃśyena tena garbhasthitena sā |

bhūrnidhānavatīvābhūd bhavyalakṣaṇalakṣitā || 10 ||



babhūva dohadastasyā dānapuṇyamayodayaḥ |

aṅkure'pyavisaṃvādi sahakārasya saurabham || 11 ||



atgha kālena saṃpūrṇaṃ sā lumbinīvane sthitā |

asūta tanayaṃ devī divākaramivāditiḥ || 12 ||



māturgarbhamalāspṛṣṭaṃ kukṣiṃ bhittvā sa nirgataḥ |

tāṃ cakre'tha svabhāvena svasthāṅgī vigatavyathām || 13 ||



nirgacchanneva ruddho'sau balajijñāsayā kṣaṇam |

śakreṇa vajrasārāṅgastasyāśakyatvamāyayau || 14||



jātamātaḥ śuiśurgatvā svayaṃ sapta padāni saḥ |

diśo vilokayannūce suvyaktākṣarayā girā || 15 ||



iyaṃ nirvṛtiḥ pūrvā ca gatirlokeṣu dakṣiṇā |

paścimā jātirapyeṣā saṃsārādiyamuttarā || 16 ||



iti tasya bruvāṇasya pṛthivī samakampata |

tamakṣayabalaṃ dhartumaśakteva jagadgurum || 17 ||



chatraṃ tasya yaśaḥ śubhraṃ sattvasmeraṃ sacāmaram |

vyomāmbudhārādhautasya jagṛhustasya devatā || 18 ||



asminnavasare pṛṣṭaḥ s vastrīyeṇāsitābhidhaḥ |

nāradena prabhāṃ dṛṣṭvā kiṣkindhādristhito muniḥ || 19 ||



kasmādarkaśatāloka ivālokaḥ pradṛśyate |

tamodaridrāṃ yeneti girayaḥ saguhāgṛhāḥ || 20 ||



vismayāditi tenoktaḥ so'vadaddivyalocanaḥ |

jātaḥ puṇyaprabhāso'yaṃ bodhisattvasya janmani || 21 ||



acireṇaiva taṃ vatsa drakṣāvaḥ kuśalāptaye |

ityuktvā munirānandād viśrāntisukhito'bhavat ||22||



putrajanmani sarvārthasiddhiṃ śuddhodanaḥ param |

dṛṣṭvā sarvārthasiddho'yamiti nāmāsya nirmame ||23 ||



śākyavardhananāmābhūd yakṣaḥ śākyapurāśrayaḥ |

yatpraṇāmeṇa śākyānāṃ śiśavo nirupadravāḥ || 24 ||



tatsthityā preṣitaḥ pitrā praṇāmāya saguhyakaḥ |

taṃ bodhisattvamālokya nipapātāsya pādayoḥ || 25 ||



athotsaṅge samādāya hṛṣṭastaṃ pṛthivīpatiḥ |

lakṣaṇāni nimittajñaistasya dehe vyalokayat || 26 ||



lakṣaṇajñāstataḥ sarve nṛpamūcuḥ savismayāḥ |

deva divyakumāro'yaṃ lakṣaṇairupalakṣyate || 27 ||



jāyate lakṣaṇairetairviśvaviśrāntaśāsanaḥ |

śakrādhipaścakravartī bhagavān sa tathāgataḥ || 28 ||



dīrghāṅgulidalau cakralāñchanau supratiṣṭhitau |

aruṇau caraṇāvasya kāntau kamalakomalau || 29 ||



rājahaṃsa iva prāṃśuḥ sajālāṅgulipallavaḥ |

eṣa jānuyugaḥ śrīmānājānubhujabhūṣitaḥ || 30 ||



sakośabastiguhyaśca nyagrodhaparimaṇḍalaḥ |

dakṣiṇāvartaromāṅkaḥ pariṇāhasamonnatiḥ || 31 ||



rajomalalavāspṛṣṭastajāmbūnadadyutiḥ |

hastapādāṃsakaṇṭhāgraspaṣṭasaptacchadākṛtiḥ || 32 ||



dīrghapratanujihvaśca meghadundubhiniśvanaḥ |

abhinīlākṣagokṣmaḥ sahajoṣṇīṣamastakaḥ ||34 ||



sitorṇāṅko bhruvorbhāgaḥ svastikoraḥsthalojjvalaḥ |

lekhāśṛṅgābjahasto'yaṃ chatrākāraśirāḥ śiśuḥ || 35||



rājannayam te tanayaścakravartī bhaviṣyati |

samyaksaṃbodhisaṃbuddhaḥ sarvajño vā bhaviṣyati || 36 ||



ityuktvā teṣu jāteṣu lebhe harṣaṃ mahīpatiḥ |

saptabhidivasaiḥ śāsturjananī tridivaṃ yayau || 37 ||



tasya janmani śākyānāṃ munīnāmiva śāntatā |

dṛṣṭvā yadā śākyamunirnāmābhūtsa tadā śiśuḥ || 38 ||



devānāmapi devo'yamiti niścitya tejasā |

devātideva ityasya nāma cakre mahīpatiḥ || 39 ||



nāradenātha sahitastattvadarśī tapovanāt |

taṃ samabhyāyayau draṣṭumādarādasito muniḥ || 40 ||



sa bodhisattvaṃ bālārkamiva kalpaprakāśanam |

dṛṣṭvā vikāsivakrkraśrīrlebhe kamalatulyatām || 41 ||



so'brāvīdvihitātithyaṃ nṛpatiṃ praṇataṃ muniḥ |

rājan guṇagaṇeneva spṛhaṇīyo'si sūnunā || 42 ||



etāni lakṣaṇānyasya mokṣalakṣmīsamāgamam |

vadanti cakravartiśrīḥphalaṃ naiṣāṃ vinaśvaram || 43 ||



asya bodhiprabhāveṇa saṃbuddhasy mukhāmbujam |

dhanya padmākarasyeva netrapātraṃ kariṣyati || 44 ||



vibudhāḥ śuddhasattvasya bodhidugdhamahodadheḥ |

dhanyā vāgamṛtairasya bhaviṣyantyupajīvinaḥ ||45||



puṇyabhāji jagatyasminneka evāsmi vañcitaḥ |

etatsaṃdarśanaṃ yasya pūrṇakālasya durlabham || 46 ||



ityuktvā nṛpamāmantrya gatvā vyomnā tapovanam |

suprasannaṃ manaḥ kṛtvā dehatyāgamacintayat || 47 ||



sa paryantopadeśāya nāradenābhicoditaḥ |

tamuvācāmṛtaṃ vatsaṃ kumāraḥ kathayiṣyati || 48 ||



adhigamyāmṛtaṃ tasmānnṛpasūnoranāmayam |

tariṣyasi bhavāmbodhimityuktvā tanumatyajat || 49 ||



śrīrasatkriyāṃ tasya kṛtvā sapadi nāradaḥ |

yayau vārāṇasīṃ siddhyai lebhe kātyāyanābhidhām || 50 ||



vardhamānaḥ kumāro'tha sarvavidyāsu pāragaḥ |

lipipravīṇo'bhinavām lipiṃ brāhmīṃ vinirmame || 51 ||



nāgāyutasamaprāṇe tasmin jagati viśrute |

vaiśālikaiḥ priyāyāsmai preṣito mattakuñjaraḥ || 52 ||



bhaviṣyati cakravartītyasya prātamupāyanam |

devadattaḥ paridveṣāt taṃ jaghāna mahāgajam || 53 ||



cyutaṃ cakarṣaṃ dvidataṃ nandaḥ sapta padāni tam |

kumārastu tadutkṣipya prākārād bahirakṣipat || 54 ||



ekanārāvanirbhinnasaptatālamahītalaḥ |

chedyabhedyāstraśastreṣu sa evātiśayaṃ yayau || 55 ||



tatatulyaguṇāṃ patnīṃ rājasūnuryaśodharām |

avāpa viśrutāṃ loke śuddhaśīla ivonnatim || 56 ||



atrāntare mahāvātavicyutaḥ saptayojanaḥ |

saritpravāhasaṃrodhaṃ vidadhe vipuladrumaḥ || 57 ||



sāṃ sphāratarusaṃruddhā rohikā nāma nimnagā |

śīlabhraṣṭeva vanitā prayayau pratilomatām || 58 ||



rājaputrastamutkṣipya bhaṅktvā vikṣupya taṃ drumam |

nyavārayat prajāmatsyajalakallolaviplavam || 59 ||



tataḥ kadācidudyāne haṃsaṃ niśitayantriṇā |

devadattena nihataṃ kumāraḥ samajīvayat || 60 ||



saṃtāpaṃ tadvivādena devadatto'dhikaṃ yayau |

na sahante hi kuṭilāstulyakulagoṇonnatim || 61 ||



kadācid gopikā nāma kumāraṃ rājakanyakā |

kandarparūpamālokya kimapyautsukyamāyayau || 62 ||



śuddhodanaḥ sutasthaitāṃ jñātvā cittocitāṃ vadhūm |

apūrayadvivāhena manmathasya manoratham || 63 ||



naimittikāstato'bhyetya nṛpamūcuḥ suniścayāḥ |

putraste cakravartī vā munirvā saptame'hani || 64 ||



tacchrutvā nṛpatiḥ sūnoścakrāvrtipadāptaye |

pravrajyācakitaścintāṃ dinasaṃkhyāmayīṃ yayau || 65 ||



lolāṃ sarvaḥ srhiyaṃ vetti śāntasthirasukhāmapi |

atthāpi bhogaraktānāṃ saṃpatsvevādaraḥ param || 66 ||



tataḥ kadācidudyānavihārāya nṛpātmajaḥ |

prayayau rathamāruhya valgutuṅgaturaṅgamam || 67 ||



sa vivarṇaṃ jarājīrṇam kīrṇaśīrṇaśiroruham |

suśuṣkaparuṣākāraṃ dadarśa puruṣaṃ pathi || 68 ||



sa taṃ dṛṣṭvā nijaṃ kāyamālokyācintayacciram |

aho paryāptapāko'yaṃ kāyasyāsya jugupsitaḥ || 69 ||



vayaḥ paryāptamāpto'pi paryāptaṃ nāśrayatyayam |

atīva palitavyājājjarā vṛddhaṃ hasatyasau || 70 ||



śarīre saṃtatasnāyupāśaprotāsthipañjare |

vṛddhaḥ puṣṇāti manye'hamaho mohavihaṅgamam || 71 ||



sārathe kiṃ karotyeṣa kiṃ na yāti tapovanam |

asṃkocameti vṛddhasya dehena saha sā matiḥ || 72 ||



vṛddho'valambate yaṣṭiṃ na tu dharmamayīṃ dhiyam |

jarākuṭilakāyasya svabhāvo nirvivekatā ||73 ||



jugupsāṃ janayatyeṣa vṛddhaḥ praskhalitākṣaraiḥ |

vacobhiścyutadantābhairgalallālālavākulaiḥ || 74 ||



naṣṭā dṛṣṭiḥ kṛśaḥ kāyaḥ śaktirluptā hatā śrutiḥ |

tathāpi mohād dṛṣṭaiva vṛddhasya taruṇīpriyā || 75 ||



dhatte dhavalatāṃ vṛddhaḥ kimetāmatigarhitām |

lolā paraṃ viraktāpi yadyasyātipriyā tanuḥ || 76 ||



iti cintayatastasya nirvedaḥ samajāyata |

manyamānasya sāpāyaṃ kāyaṃ nicayamāpadām || 77 ||



punaśca samaye'nyasminnapaśyad vyādhitaṃ naram |

vipakkakūṇapaprāyaṃ sapūyamiva pāṇḍaram || 78 ||



sa pradadhyau tamālokya samuddiśya nijāṃ tanum |

aho nu sahajaivāsmin kāye rogagaṇodgatiḥ || 79 ||



idameva mahaccitramiyaṃ māṃsamayī tanuḥ |

na yāti kledavaiklavyaṃ kṣaṇaṃ paryuṣīte'pi yat || 80 ||



iti dhyātvā sa sodvegaḥ śarīravicikitsayā |

babhūva rājyasaṃbhopgarāge vigatitādaraḥ || 81 ||



athānyasmin kṣaṇe mālyavastrācchāditavigraham |

dadarśa dehasatkāravyagrabandhujanaṃ śavam || 82 ||



taṃ dṛṣṭvā sahasodvegadayāduḥkhaghṛṇākulaḥ |

ciraṃ niḥsārasaṃsāraparihāramacintayat || 83 ||



eṣa pretavanaṃ yāti saṃsaktāṃ hṛdaye vahan || 84 ||



aho nu viṣayābhyāsavilāsādhyavasāyinām |

nṛṇāmantyakṣaṇe kaṣṭā kāṣṭhapāṣāṇatulyatā || 85 ||



udvegavāribhavasāgarabudbude'smin

kālānilākulitakarmalatāgrapuṣpe |

māyāvadhūnayanavibhramasaṃvibhāge

puṃsāṃ ka eṣa vapuṣi sthiratābhimānaḥ || 86 ||



noktaṃ kiṃcit parahitayutaṃ na śrutaṃ dharmayuktaṃ

naiva ghrātaṃ kuśalakusumaṃ satyarūpaṃ na dṛṣṭam |

naiva spṛṣṭaṃ śamapadamiti vyaktamāsaktacintā-

viśrānto'yaṃ vahati sahasā niścalatvaṃ gatāyuḥ || 87 ||



rājasūnurvicintyeti śarīraṃ vipadāplutam |

aśeṣaviṣayāsaṅge parām naḥ snehatām yayau || 88 ||



athāgre nirmitaṃ devaiḥ sa śuddhāvāsakāyikaiḥ |

vyalokayat pravrajitaṃ pātrakāṣāyadhāriṇam || 89 ||



taṃ dṛṣṭvaiva babhūvāsya pravrajyābhimukhī matiḥ |

īpsitālokanaprītyā svabhāvo hi vibhāvyate || 90 ||



virāgyakāraṇam tatra nṛpasūnoḥ pade pade |

vilokya sārathiḥ sarvaṃ kṣitipāya vyanedayat || 91 ||



kumāro'tha piturvākyāt grāmālokanakautukī |

vrajan pathi nidhānāni vivṛtāni vyalokayat || 92 ||



tatpūrvapuruṣanyastaiḥ strīkarairutthitānyapi |

yadā sa nāgrahīttāni tadā viviśurambudhim || 93 ||



tataḥ sa karṣakān pāṃśuvyāptapāṇḍuśiroruhān |

vidīrṇapāṇicaraṇān kṣutpipāsāśramāturān || 94 ||



halakaddālaviṣamollekhapakṣavraṇāditān |

vilokya kleśavivaśān babhūva karuṇākulaḥ || 95 ||



vidhāya dayayā teṣāṃ draviṇauradaridratām |

sa vṛṣāṇāṃ vṛṣarataḥ kleśamuktimakārayat || 96 ||



tataḥ pratinivṛtto'tha sānujaḥ pārthivātmajaḥ |

madhyāhnapṛthusaṃtāpe taralastaraṇitviṣaḥ || 97 ||



rathaghoṣonmukhaśikhiśyāmīkṛtadigantaraḥ |

svedavārikaṇākīrṇaḥ prabhāsnigdhavanasthalīm || 98 ||



so'varuhya rathāttatra gaṇḍaskhalitakuṇḍalah |

viśrāṇtyai viśrutayaśā jambucchāyāmaśiśriyat || 99 ||



sa babhārorasi vyaktāṃ svedāmbukaṇasaṃtatim |

vapurāśleṣalalitāṃ hārasyeva kuṭumbinīm || 100 ||



chāyāsu parivṛttāsu śanakaiḥ sarvaśākhinām |

tasya jambūtarucchāyā na cacāla tanustanoḥ || 101 ||



sā tasya śītalacchāyā tāpaklāntimavārayat |

saṃsāraviratasyeva tīvravairāgyavāsanā || 102 ||



putradarśanasotkaṇṭhastaṃ deśamatha bhūpatiḥ |

ājagāma gajotsarpatrastabhramaracāmaraḥ || 103 ||



chāyāṃ sa niścalāṃ dṛṣṭvā kumārasya prabhāvataḥ |

gauravādbhutasaṃprāptaḥ praṇataṃ praṇanāma tam || 104 ||



tataḥ sa sahitaḥ pitrā nagaraṃ gantumudyataḥ |

apaśyat puraparyante śmaśānaṃ śavasaṃkulam || 105 ||



sa dṛṣṭvā kuṇapākīrṇamaśivaṃ śivakānanam |

sodvegaṃ sārathiṃ prāha sthagitasyandanaḥ kṣaṇam || 106 ||



sārathe paśya jantūnāṃ kāyāpāyamatīṃ daśām |

dṛṣṭvedamapi rāgārdraṃ mano mohapramādinām || 107 ||



parastrīdarśanāttṛptaṃ netramāsvādya sādaram |

asyāsatyavatī jihvā paśya kākena kṛsyate || 108 ||



asyāḥ stanamukhanyastanakhollekhasukhasthitiḥ |

khṇḍayatyadharaṃ gṝdhraḥ kāmīva madanirbharah || 109 ||



ete dṛṣṭaniṣakṭavāyasaśakṛnniṣṭhivinaḥ pādapā

mūrcchantīva vipākapūyakuṇapāghrāṇena niṣkūṇitāḥ |

dṛṣṭvā gṛdhravidāryamāṇamasakṛt kīṇārdratantra śavaṃ

bhūyo vātavilolapallavakarairācchādayantīva ca ||110 ||



kṣībasyevācalasya drutahṛtahṛdayā jambukī kaṇṭhasaktā

raktābhivyaktakāmā kamapi nakhamukhollekhamāsutrayantī |

āsvādyāsvādya yūnaḥ kṣaṇamadharadalaṃ dattadantavraṇāṅkaṃ

lagnānaṅgakriyāyāmiyamatirabhasotkarṣamāviṣkaroti || 111 ||



ityuktvā jātaviratirbhavabībhatsakutsayā |

kalayan kleśanirvāṇaṃ praviveśa purāntaram ||112 ||



tatra harmyagatāpaśyat taṃ kanyābhijanojjvalā |

mṛgajā nāma mṛgajānodinī mṛgalocanā ||113 ||



sarāgataralā dṛṣṭḥ śrotrasaṃcāriṇī param |

abhūttaddarśane tasyāḥ sahasaiva virekiṇī || 114 ||



sā tadālokanenaiva bālā lajjāsahiṣṇūnā |

smareṇeva samākṛṣṭā sakhīṃ prāha puraḥsthitām || 115 ||



kā dhanyā lalanā loke sparśenāsya śaśitviṣaḥ |

yasyā madanasaṃtaptā tanurnirvāṇameṣyati || 116 ||



nirvāṇaśabdaṃ śrutvaiva rājaputraḥ samīhitam |

tāṃ dadarśonmukhaḥ padmavanānīva diśan dṛśā || 117 ||



sa tasyāstena vacasā vapuṣā va prasāditaḥ |

hāraṃ suvṛttaṃ cittaṃ ca vikṣepāsyai guṇojjcalam || 118 ||



ālokanānukūlyena bhāvaṃ vijñāya bhūpatiḥ |

putrasyāntaḥpurapade tāmādāya nyaveśayat || 119 ||



ṣaṇṇāṃ kāṇtāsahasrāṇāṃ vṛtamantaḥpuraṃ tataḥ |

viveśa rājatanayaḥ priyāṃ śāntiṃ vicintayan || 120 ||



atrāṇtare narapatiṃ prāhurnaimittikāḥ sphuṭam |

munirvā cakravartī vā prātaste bahvitā sutaḥ || 121 ||



tataḥ saṃcintya nṛpatiḥ pravrajyām cakitaḥ param |

akārayat puradvāraguptiṃ ruddhagamāgamām || 122 ||



droṇodanamukhān bhrātṝn dvāreṣu viniveśya saḥ |

nagarasya svayaṃ makhye tathā sāmātyasainikaḥ || 123||



rājaputrādatha prāptagarbhā devī yaśodharā |

vabhāṣe śāradīva dyauḥ pratyāsannendupāṇḍurā ||124||



ekarātrāvaśeṣe'tha nagaradvārarakṣaṇe |

śamapravṛttārkamabhūt pravrajyābhimukhaṃ dinam || 125 ||



ciraṃ vicarya saṃsāraṃ śāntiṃ yāte divaspatau |

kāṣāyāmbaramālambya yayau saṃdhyāvadṛśyatām || 126 ||



aśeṣāśātamomohavirāmavimalāṃ śanaiḥ |

indurgāmuditaścakre pūrṇālokavilokinīm || 127 ||



sarāgatāpe vabhasaścetasīva gate ravau |

śuddhenduhṛdayasyābhūt prasādaḥ ko'pyaviplavaḥ || 128 ||



athāsminnantare kāntāsaṃtatāntaḥpurodare |

ratnaharmyapraviṣṭendudyutisaṃdohahāsini || 129 ||



niḥsāravirasaṃ sarvaṃ rājasūnurvilokayan |

jagāa gaganasvacchasvacchandocchalitasmṛtiḥ || 130 ||



gaṇo'yaṃ nārīṇāṃ madanadahanolkāparikaraḥ

parityājyastīvravyasanaśatasaṃtāpasacivaḥ |

idānīṃ yuktā me tarutalalatāśītalare

parityaktāgārapraśamasukhasāre pariṇatiḥ || 131||



etāścandradyutimadamayā yāmi nāryo vane'smin

nidrāmudrāniyamitadṛśaḥ saṃstarasrastavatrāḥ |

svapnotpannānucitavacanāḥ keśasaṃchāditāṃsāḥ

kṣipraṃ mandānilavicalitān lajjayantīva dīpān || 132||



saralasrastagātrāṇāṃ nirlajjānāṃ vivāsasām |

suptānāṃ ca mṛtānāṃ ca bhedaḥ ko nāma dehinām || 133 ||



iti tasya bruvāṇasya saṃjāte gamanodyame |

mithaḥ kathā samabhavannagaradvārarakṣiṇām || 134 ||



bho bhoḥ kaḥ ko'tra jāgarti jāgrato nāsti viplavaḥ |

prabhucittagrahavyagrāḥ samagrā eva jāgrati || 135 ||



jāgarti saṃsāragṛhe manīṣī mohāṇdhakāre svapiti pramattaḥ |

jjīvitameva loke mṛtasya suptasya ca ko viśeṣaḥ || 136 ||



iti marhyasthitaḥ śrutvā rātrau rājasutaḥ kathāḥ |

prasthitaṃ satpatheneva nijaṃ mene manoratham || 137 ||



nivṝtterlakṣaṇaṃ dṛṣṭvā sa svapnaṃ kṣaṇanidrayā || 138 ||



tataḥ prabuddhā sahasā trastā devī yaśodharā |

tatkālopanataṃ svapnaṃ dayitāya nyavedayat || 139 ||



paryaṅkābharaṇāngāni svapne bhagnāni me vibho |

śrīrvrajantī mayā dṛṣṭvā candrārkau ca torihitau || 140 ||



ityākarṇya sa tāmūce mugdhe satyavivarjitaḥ |

saṃsāra eva svapno'yaṃ svapne svapno'pi kīdṛśaḥ || 141 ||



svapne'dya nābhisaṃjātā latā vyāptā vihārasā |

merūpadhānaśirasā pūrvapaścimavāridhau || 142 ||



bhujābhyāṃ caraṇābhyām ca dakṣiṇābdhirmayā dhṛtaḥ |

bhadre svapnaḥ śubho'yaṃ te strīṇāṃ bhartuśubhaṃ śubham || 143 ||



ityukte bodhisattvena noce kiṃcid yaśodharā |

punaśca nidrābhimukhī babhūva mīlitekṣaṇā || 144 ||



śakrabrahmamukhāḥ sarve sametyātha sudhābhujaḥ |

cakrire bodhisattvasya sattvotsāhaprapūraṇam || 145 ||



tairdevaputrāścatvāraḥ samādiṣṭā mahājavāḥ |

sahāyā gamane tasya bhūśailābdhidhṛtikṣamāḥ || 146 ||



śakrādiṣṭena yakṣeṇa pāñcikākhyena nirmitaiḥ |

saharmyāsaktasopānairavatīrya viniryayau || 147 ||



suptaṃ sārathimādāya chandakākhyaṃ prabodhya saḥ |

utsādamiva jagrāha kaṇṭhakākhyaṃ turaṅgamam || 148 ||



taṃ tīkṣṇaruciraṃ lakṣmīkaṭākṣataralaṃ harim |

sa cakre saṃyamālīnaṃ mūrdhi saṃspṛśya pāṇinā || 149 ||



śamodyame sumanasā s ako'pyantarbahiḥ samah |

śiśavo'pi vimuñcanti yatprabhāveṇa cāpalam || 150 ||



balajijñāsayā nyastaṃ tenātha caraṇaṃ kṣitau |

na te kampayituṃ śekurdevaputrāḥ savismayāḥ || 159 ||



chandakena sahāruhya nistaraṅgaṃ turaṅgamam |

sa jagāhe mahadvyoma vimalaṃ svamivāśayam || 152 ||



prayayau taralāvartinartitoṣṇīṣapallavaḥ |

saṃsarpipavanollasaiḥ śokocchvāsa iva śriyaḥ || 153 ||



tasyābharaṇaratnāṃśulekhābhiḥ śabalaṃ nabhaḥ |

jagrāha sūtrapatrālīvicitramjiva cīvaram || 154 ||



irṇāśrubindukalitā vilolanayanotpalāḥ |

vrajantaṃ dadṛśurdṛśyāstamantaḥpuradevatāḥ || 155 ||



saṃsāramiva vistīrṇaṃ puraṃ sanṛpabāndhavam |

dūrāt pradakṣiṇīkṛtya kṣamyatāmityabhāṣata || 156 ||



kṣapāyāṃ kṣaṇaśeṣāyām jane nidrābhimudrite |

taṃ dadarśa mahānnāma prabuddho rājabāndhavaḥ || 157 ||



divi dṛṣṭvā vrajantaṃ taṃ śaśāṅkaśaṅkayā hṛtaḥ |

ūce ciraṃ vicāryoccairbāṣyāzncitavilocanah || 158 ||



citrametad viraktavtaṃ bandhujīvopamasya te |

kumāra rucirākāra na yuktaṃ yuktakāraṇam || 159 ||



vaṃśotkarṣaviśeṣārthū nibaddhāśaḥ pitā tvayi |

kasmānnirāśa kriyate sarvāśābharaṇa tvayā || 160 ||



iti śākyasya mahataḥ śrutvā vākyaṃ nṛpātmajaḥ |

tamūce bāndhavaprītirbandho vandhanaśṛṅkhalā || 161 ||



ayaṃ kāyaḥ kṣayaṃ yāti mithyāgṛhasukhapriyaḥ |

viṣayograviṣrtānāmamṛtāyatanaṃ vanam | 162 ||



hastākṛṣṭastriphaṇiphaṇabhṛnmastakanyastamṛtyu

kaṇṭhābaddhitkaṭaviṣalatāpallavālolamālaḥ |

dīptāṅgāraprkaragahanaṃ gāhate durgamārgaṃ

saṃsāre'smin viṣayanicaye sapramodaḥ pramādī || 163 ||



ityudīrya vrajan vyomnā vilaṅghya nagaraṃ kṣaṇāt |

bahirbhūtalamabhyetya sa yayau vājinā javāt || 164 ||



mahatā śākyamukhyena bodhitasyātha bhūpateḥ |

antaḥpure ca kāntānāmudbhūtaḥ karuṇaḥ svaraḥ || 165 ||



atha brahmendradhanadapramukhastridaśairvṛtaḥ |

rājasūnurvanaṃ prāpa gatvā dvādaśayojanam || 166 ||



avaruhyātha turagātg vimucyābharaṇāni saḥ |

uvāca sūcitānandaśchandakaṃ vadanatviṣā || 167 ||



gṛhītvābahraṇāni tvaṃ hayaṃ ca vraja mandiram |

medānīmasti me kṛtyametairmāyānibandhanaiḥ || 168 ||



vane'sminnahamekākī śamasaṃtoṣabāndhavaḥ |

ekaḥ saṃjāyate jantureka eva vipadyate || 169 ||



viṣamaviṣayayogaṃ bhogamutsṛjya re kaḥ

sarasarati viśeṣakleśaśoṣapravṛttaḥ |

paribhavabhuvane'sminneṣa naḥ saṃniveśaḥ

śamitamadanakāntiḥ śāntimeva śrayāmi || 170 ||



ityuktvābharaṇānyasya dīptānyaṅke mumoca saḥ |

tyaktaśokānvitānīva muktāpakkaṇasaṃcaye || 171 ||



cūḍāṃ niskṛṣya khaṅgena sa cikṣepa nabhaḥsthale |

śakraśca tam samādāya nināya divamādarāt || 172 ||



keśaḥ kleśa ivotkṛtto yatra tena mahātmanā |

keśapratigrahaṃ caityaṃ sadbhistatra niveśitam || 173 ||



chandako'pyaśvamādāyaṃ prayātaḥ saptabhirdinaiḥ |

śanaiḥ prāpa puropāntaṃ śokārtaḥ samacintayat || 174 ||



śūnyaṃ turagamādāya parityajya nṛpātmajam |

draṣṭuṃ śaknomi nṛpatiṃ kathaṃ putrapralāpinam || 175 ||



vicintyeti hayaṃ tyaktvā sa tatraiva vyalambata |

śūnyāsanaḥ paraṃ vājī mūrtaḥ śoka ivāviśat || 176 ||



taṃ dṛṣṭvāntaḥ purajanaḥ sāmātyaśca mahīpatiḥ |

pratipralāpamukharāścakrire nikhilā diśaḥ || 177 ||



udbhūtārtasvaraiḥ kaṇṭhaiḥ sotkaṇṭhaiḥ sa viṣādavān |

sarvairgṛhītakīrṇāśrurvājī jīvitamatyajat || 178 ||



sa bodhisattvasaṃsparśapuṇyaprāptipavitritaḥ |

jagrāha brāhmaṇakule janma saṃsāramuktaye || 179 ||



śakradattaṃ kumārastu yatra kāṣāyamagrahīt |

kāṣāyagrahaṇam tatra caityaṃ cakre mahājanaḥ || 180 ||



vibhavamabhavavṛttyai janma janmapramuktyai |

vijanamapi janānāṃ mohagartānnivṛttyai |

iti sa kuśalakāmaḥ kāmamutsṛjya bheje

guṇakṛtajanarāgaḥ ślāghyatāṃ tyaktarāgaḥ || 181 ||



iti kṣemendraviracitāyām bodhisattvāvadānakalpalatāyā-

mabhiniṣkramaṇāvadānaṃ caturviśaḥ pallavaḥ ||