• Home
• Canon Text
• Romanized
• śāstrapiṭaka
• abhidharma
• Aṣṭamo binduḥ

Aṣṭamo binduḥ

Technical Details

 

aṣṭamo binduḥ

 

pariśuddhendriyāṇi

 

1 | rāgadveṣamohaiścittasaṃprayogo nāma kleśaḥ sa ucyate saṃyojanaṃ | (tat-)parihātukāmasya (trividhaṃ bhavati prahāṇaṃ)| viṣkaṃbhaṇa(-prahāṇaṃ)| (tadaṃga-)prahāṇaṃ | prajñayā samuccheda (-prahāṇaṃ)ca || viṣkaṃbhaṇa (-prahāṇaṃ)katamat | aprāpte'nāsravacitte śīlagrahaṇabhāvanabhyāṃ sthāpayati rāgadveṣamohān cittaṃ bhavatyanupādānamiti viṣkaṃbhaṇa (prahāṇaṃ)|| (tadaṃga)prahāṇaṃ katamat | prāpya dhyānasamādhiṃ parityajati kāmaduścaritamakuśaladharmāṃśceti (tadaṃga)prahāṇaṃ || prajñayā samucchedaprahāṇaṃ katamat | prabuddhamate duḥkhamālaṃbya bhāvayataḥ (kleśa)samuccheda iti (prajñayā)samuccheda(prahāṇaṃ)| yathā viṣkaṃbhaṇa(kāle)yathā vā (tadaṃga)prahāṇakale (cittasya)viśuddhirnāpi vā viśuddhiḥ (na tathā samucchedaprahāṇakāle)| anāsravaprajñayā prahāṇaṃ tu viśuddhireva ||

 

2 | dvāviṃśatirindriyāṇi | (tatra)bāhyāyatanāni (ṣoḍaśa)| puruṣendriyaṃ strī jīvita duḥkha sukha daurmanasya saumanasya upekṣā śraddhā smṛti samādhi prajñā ājñāsyāmi ājñā ājñātāvīndriyaṃ | adhyātmikāni ṣaḍindriyāṇi yathā pūrvamuktāni || puṃlakṣaṇaṃ puruṣavijñānamiti puruṣendriyaṃ | strīlakṣaṇaṃ strīvijñānamiti strīndriyaṃ | traidhātukajīvanalakṣaṇamiti jīvitendriyaṃ | paṃca vijñānasaṃyuktā sukhā vedaneti sukhendriyaṃ | paṃcavijñānasaṃprayuktā duḥkhā vedaneti duḥkhandriyaṃ | manovijñānasaṃprayuktā sukhā vedaneti saumanasyendriyaṃ | manovijñānasaṃprayuktā duḥkhā vedaneti daurmanasyendriyaṃ | ṣaḍvijñānasaṃprayuktā aduḥkhā'sukhā vedanetyupekṣendriyaṃ | sarvakuśaladharmeṣu śraddhānamiti śraddhendriyaṃ | evaṃ vīrya-smṛti-samādhi-prajñendriyāṇi | dṛḍhaśraddhādṛḍhadharmamārgasaṃgrāhakāṇi anāsravāṇi navendriyāṇītyājñāsyāmīndriyaṃ | śraddhāvimokṣadarśanamārgasaṃgrāhakāṇi anāsravāṇi navendriyāṇītyājñendriyaṃ | aśaikṣamārgasaṃgrāhakāṇi anāsravanavendriyāṇi ājñātāvīndriyaṃ ||

 

3 | indriyārthaḥ katamaḥ | balavattvaṃ paṭutvaṃ ceti indriyārthaḥ | ṣaḍupalabdhipuruṣastrījīvitendriyāṇi nava lokadhātau balavanti paṭūni ca | paṃca vedanendriyāṇi (sukhaṃ saumanasyaṃ duḥkhaṃ daurmanasyamupekṣā ceti)kleśotpāde balavanti paṭūni ca | śraddhādipaṃcendriyāṇi kuśaladharmeṣu balavanti paṭūni ca | trīṇyanāsravāṇīndriyāṇi (ājñāsyāmi-ājñā-ājñātāvī ceti)mārgaprāptihetutvānmārge balavanti paṭūni ca | sarvendriyāṇāṃ pṛthakpṛthak svaṃ balaṃ bhavati pāṭavaṃ ca ||

 

4 | dvāviṃśatīndriyeṣu kati kāmadhātupratisaṃyuktāni kati rūpārūpyadhātupratisaṃyuktāni katyapratisaṃyuktāni || catvārīndriyāṇi kāmadhātu pratisaṃyuktāni | puruṣastrīduḥkhadaurmanasyendriyāṇi || paṃcendriyāṇi kāmarūpadhātupratisaṃyuktāni | cakṣuḥśrotraghrāṇajihvākāyendriyāṇi || sāsrave sukhasaumanasyendriye kāmarūpadhātupratisaṃyukte || sāsravāṇi upekṣāmanojīvitendriyāṇi śraddhādīni ca paṃcendriyāṇi sakalatridhātupratisaṃyuktāni | anāsravāṇi mana indriyamupekṣendriyaṃ sukhasaumanasyendriye śraddhādīni paṃcendriyāṇi apratisaṃyuktāni | etāni navendriyāṇi tribhiranāsravendriyaiḥ ājñāsyāmīndriyājñendriyājñātāvīndriyaiḥ sahādhiṣṭhānāni ||

 

5 | dvāviṃśatīndriyeṣu katyupāttāni katyanupāttāni | sukhādipaṃcendriyāṇi śraddhādipaṃcendriyāṇi mana indriyaṃ trīṇyanāsravendriyāṇi ca bhavantyanupāttāni | avaśiṣṭānyanyānīndriyāṇi bhavanti upāttāni vā anupāttāni vā ||

 

6 | dvāviṃśatīndriyeṣu kati kuśalāni katyakuśalāni katyavyākṛtāni | aṣṭāvindriyāṇi kuśalāni śraddhādīni paṃca trīṇi cānāsravāṇi | aṣṭāvavyākṛtāni cakṣurādipaṃcendriyāṇi puruṣastrījīvitendriyāṇi ca | ṣaṣṭhaṃ (mana indriyaṃ)vivekṣyamāṇaṃ | mana indriyaṃ sukhādīni paṃca vedanendriyāṇi bhavanti kuśalāni vā akuśalāni vā avyākṛtāni vā ||

 

7 | dvāviṃśatīndriyeṣu kati sāsravāṇi katyanāsravāṇi | śraddhādīni paṃca sukhaṃ saumanasyamupekṣā manaśca bhavanti sāsravāṇi vā anāsravāṇi vā | paścimāni trīṇyekadhānāsravāṇyeva | daśendriyāṇi sāsravāṇi cakṣuḥ śrotraṃ ghrāṇaṃ jihvā kāyaḥ puruṣaḥ strī jīvitaṃ daurmanasyaṃ duḥkhaṃ ceti ||

 

8 | triyonijātiḥ pratilabhate dve indriye kāyendriyaṃ jīvitendriyaṃ ca | aupapādukajāteḥ ṣaṭ sapta aṣṭau vā (indriyāṇi | tathāhi |)aliṃgānāṃ ṣaṭ | ekaliṃgānāṃ sapta | dviliṃgānāmaṣṭau cakṣurādīni paṃca jīvitastrīpuruṣendriyāṇi ca | avaśiṣṭānāmindriyāṇāṃ krameṇa pratilābhaḥ | rūpadhātau prathamaṃ ṣaḍindriyāṇāṃ pratilābhaḥ paṃcānāṃ vedanendriyāṇāṃ jīvitendriyasya ca | arūpadhātau prathamaṃ kevalasya jīvitendriyasya pratilābhaḥ || kāmadhātau avyākṛtacittasya (pudgalasya)kramamṛtyau (indriyāṇi nirudhyante)catvāri | aṣṭau vā | nava vā | daśa vā || akuśalacittasya mṛtyau nava | trayodaśa vā | caturdaśa vā | paṃcadaśa vā ||

 

9 | dvāviṃśatīndriyeṣu kati satyadarśanaheyāni kati bhāvanāheyāni katyaheyāni | catvāri indriyāṇi satyadarśanaheyāni vā bhāvanāheyāni vā aheyāni vā (katamāni catvāri |)manaḥsukhasaumanasyopekṣendriyāṇi | daurmanasyendriyaṃ satyadarśanaheyaṃ vā bhāvanāheyaṃ vā | śraddhādīni paṃcendriyāṇi bhāvanāheyāni vā aheyāni vā | trīṇyanāsravendriyāṇi aheyāni | avaśiṣṭānīndriyāṇi bhāvanāheyāni ||

 

[ityabhidharmāmṛtaśāstre pariśuddhendriyanirdeśo nāmāṣṭamo binduḥ ||]