• Home
• Canon Text
• Romanized
• śāstrapiṭaka
• stotra
• bodhisattvacaryā
• Deśanāstava

Deśanāstava

Technical Details

deśanāstava

namo buddhāya||

sarvadoṣarahitaṁ guṇākaraṁ

tvām upetya śaraṇaṁ jagadgurum|

vaidyarājam asamaṁ sadāturo

deśayāmi nijadoṣavikriyām||1||

srotasīva saritaḥ sudustare

durvitarkitavicāritormiṇi|

kleśanakramākaraughasaṁkule

sve 'pi cetasi na śāntir asti me||2||

rāgavāridhimahormisaṁkule

saṁśrayeyam aśubhāplavaṁ yadi|

śuṣkakakṣam iva tatra nirdahan

dveṣavahnir upahanti me manaḥ||3||

dveṣavahniparitāpaśāntaye

bhāvayāmi yadi maitracittatām|

tatra sarvajanasaukhyalālitaṁ

snehapaṅkam avagāhate manaḥ||4||

snehapaṅkamalinaṁ viśuddhaye

kṣālayāni tad upekṣayā yadi|

tatra sarvajagadartihāriṇī

lokanātha karuṇāpi hīyate||5||

bhāvayāmi karuṇāṁ yadi prabho

kheda  eva mama jāyate mahān|

śāntaye 'sya muditāṁ bhajāmi ced

uddhataṁ bhavati cañcalaṁ manaḥ||6||

(1)

saṁvije yadi mudaḥ praśāntaye

tatra cittam alasaṁ visīdati|

udyamena yadi nītam unnatiṁ

gocarībhavati mānavairiṇaḥ||7||

tasya śātrur iva sarvaśūnyatā

tatra śāmyati parārtham ādaraḥ|

saṁvṛtiṁ yadi parārtham ādade

tatra bhāsyati mano dhanāśayā||8||

alpitaṁ ca vibhavārjane manaḥ

sarvadoṣamadirāṁ ca pāyitam|

mohitaṁ ca madamohanidrayā

sarvam eva ca hataṁ samīhitam||9||

dātum icchati mano yadāpi me

matsareṇa balinātibhūyate|

taṁ vidhūya yadi nāma dīyate

dīrgharātram anutapyate tadā||10||

śraddhayā yadi punaḥ prasāditaṁ

tatphale patati pāralaukike|

niḥspṛhīkṛtam anityasaṁjñayā

nirnimittam alasaṁ viṣīdati||11||

bandhubhūtam api sarvajanmasu

prekṣya lokam atiduḥkhapīḍitam|

nātha yady api parārtham īhate

grasyate vivaśam ātmasaṁjñayā||12||

ātmadṛṣṭim anuyāty ahaṁkṛtiḥ

sā mameti kurute parigraham|

tatra mānamadamanmathādayaḥ

pīḍayanti kupitā ivārayaḥ||13||

(2)

kleśajālam abhitaḥ samudyataṁ

mārasainyam iva bhairavaṁ tadā|

kṛṣṇapakṣarajanī vijṛmbhate

kālarātrir iva dāruṇā tadā||14||

vedmi pāpam anutāpaduḥsahaṁ

duḥkhajanmapariṇāmadāruṇam|

vyācarāmi ca tathāpi tat svayaṁ

kiṁ nu kaṣṭataram asty ato 'dhikam||15||

vāritaṁ yadi parāpakārato

mānasaṁ vividhaduḥkhahetukam|

kṣobhyate tad asipattraniṣṭhurair

durjanair anapakāravairibhiḥ||16||

kṣantum icchati mano yadāpi me

nahyate tadupanāhabandhanaiḥ|

tan nirodhaparipiṇḍitoddhataṁ

dveṣavahnipariśoṣaniṣṭhuram||17||

caṇḍadṛṣṭiviṣajuṣṭakoṭaraṁ

varjayanti vihagās taruṁ yathā|

gopitaṁ pratighavikriyaṁ tathā

varjayanti kuśalā mamāśayam||18||

aśmanīva raviraśmitāpite

bhasmanīva pariśoṣadhūṣare|

vartmanīva sikatābhrasaṁkule

dharmavṛṣṭir aphalā mamāśaye||19||

ātmaduḥkham avicintya dāruṇaṁ

maddhitārtham iva yaḥ samudyataḥ|

kṣāntidānaparamopakāriṇaṁ

lokanātha na sahe tam apy aham||20||

(3)

vidviṣann api ca vidravann api

prasphurann api ca pīḍayann api

śikṣayaty avirataṁ sa tādṛśo

mādṛśaṁ na ca gurur vibhāti me||21||

prārthanīyam adhigamya durlabhaṁ

kṣāntilābhaparamaṁ mahotsavam|

kṣāntiśīla yadi nāma na kṣame

kṣāntihetur aparo 'sti ko mama||22||

kleśarākṣasagṛhītam ākulaṁ

sajvaraṁ svahitam apy anādṛtam|

vīkṣya lokam avalokanākṣamaṁ

dveṣa eva karuṇā na me prabho||23||

ātma karmaphalabhājanaṁ janaṁ

vedmi sarvam avaśaṁ vinaśvaram|

kalpayāmi ca paraṁ kṛtāgasaṁ

paśya mohatimirasya jṛmbhitam||24||

doṣavāridhir ahaṁ na ca kṣame

doṣaleśam api nātha kasyacit|

kṣantum anyaguṇasampado 'pi yan

notsahe tad idam adbhutaṁ param|| 25||

prāvṛṣīva paritaḥ samudyatāḥ

kleśameghanivahā muhurmuhuḥ|

kurvate manasi me samāgamaṁ

tyaktalajjam alasaṁ dhig ambhasām||26||

utsahe yadi vijetum ojasā

kleśajālam uditaṁ samādhinā|

styānamiddhatimiraṁ vijṛmbhate

vardhate ca śayanāsanaspṛhā||27||

(4)

rāgapāśavivaśīkṛtaṁ mano

dveṣadagdham abhimānakhaṇḍitam|

sarvadoṣaśaraśaktitomaraiś

caryamāṇam abhito vimuhyati||28||

labdhasaṁjñam upanahya tiṣṭhati

trasyati pratihataṁ viṣīdati|

māyayā śaṭhatayā ca vañcitaṁ

viklavaṁ bhramati māragocare||29||

yad yad eva śamathāvalambanaṁ

tatra tatra muhur arpitaṁ manaḥ|

kleśapāśavivaśaṁ tatas tataḥ

kṛṣyate viṣayalobharajjubhiḥ||30||

vīryam udvahati jātam uddhataṁ

tat parityajati jāyate layaḥ|

durlabhāsya samayuktiyuktatā

kiṁ karotu mama cittam ākulam||31||

prajñayā carati jātam uddhataṁ

dhāraṇāṁ bhajati jāyate layaḥ|

durlabhāsya yuganaddhavāhitā

kiṁ karotu mama cittam ākulam||32||

yatnato vahati jātam uddhataṁ

tan mṛdū bhavati jāyate layaḥ|

durlabhā pratipad asya madhyamā

kiṁ karotu mama cittam ākulam||33||

dahyamānam api doṣakānanaṁ

dhyānadāvadahanair muhurmuhuḥ|

ātmadṛṣṭidṛḍhamūlam arpitaṁ

prāvṛṣīva paritaḥ prarohati||34||

(5)

kleśakarmaphalamātrasaṁtatiṁ

paśyato yad api sā nirvartate|

cittasaṁtatir api prahīyate

dūra eva jagadartham udyamaḥ||35||

snehamātrarahitasya yoginaḥ

sarvasattvanirapekṣagāminaḥ|

cittasaṁtatir upaiti nirvṛtiṁ

dīpasaṁtatir ivopadhikṣayāt||36||

bodhicittam amṛtaṁ rasāyanaṁ

yac ca sarvajagadartināśanam|

bodhihetur avikalpabhāvitaṁ

tatra dhāvati vikalpa eva me||37||

svapnarūpam iva naiva gṛhyate

kena cij jagati kiṁ cid ity api|

bhāvayann api carāmi gocare

bodhyabodhakavikalpavidviṣaḥ||38||

dehi dṛṣṭim amalāṁ mayi prabho

paśya vaiśasam idaṁ sudāruṇam|

yatra yatra mama sārakalpanā

tat tad eva purato viśīryate||39||

kiṁ karotu bhagavān ihāthavā

pūrvajanmakṛtadoṣa eva me|

sarvalokatimirāpaho ravir

nāndhyam andhatamasām apohati||40||

dīrghakālikanidānasevinas

tatra cāviratamūḍhacetasaḥ|

mītapāṇicaraṇasya kuṣṭhinaḥ

kiṁ karotu sakṛd oṣadhaṁ kṛtaṁ||41||

(6)

kleśatiktarasasekavāsitaṁ

cittapādapam anādikālikam|

svādubhāvam upanetum akṣamāḥ

kiṁ bhavantu guṇavāribindavaḥ||42||

sarvadoṣamayam eva me mano

bodhihemarasabhūtam adbhutam|

tat tad eva guṇajātam arpitaṁ

doṣabhāvam upanīya tiṣṭhati||43||

yad yad eva kathitaṁ mahauṣadhaṁ

tat tad eva mayi jāyate viṣam|

yuktir eva hi paraṁ rasāyanaṁ

sā ca nāsti yadi nāsti nirvṛtiḥ||44||

yā tu nirdahati doṣapūraṇaṁ

nāpi doṣam aparaṁ prakupyate|

sā ca yuktir iti buddhir asti me

kīdṛśīti na punar viniścayaḥ||45||

āśayānuśayadhātuvāsanāṁ

doṣahetuviparītayojitām|

dhyāyatāṁ tadupadeśabhāvanāṁ

śāntir atra nācirād bhaviṣyati||46||

sarvadoṣarahitasya tāyinaḥ

sarvadharmaparamārthavedinaḥ|

citrarūpam api te nirūpitaṁ

sarvadoṣakaluṣaṁ vyapohati||47||

tat punas tava puraḥ sthitaṁ vapuḥ

paśyatāṁ ruciralakṣaṇojjvalam|

śrotrapeyam amṛtaṁ ca śṛṇvatāṁ

kleśajālam akhilaṁ viśīryate||48||

(7)

yat punaḥ parataro 'pi te vibho

dharmakāyasavitā niruttaraḥ|

cintito 'pi jagatām anudbhavo

hanti caiva timiraṁ tad adbhutam||49||

yatra tatra śamathe vyavasthito

yena tena parameṇa cetasā|

sarvalokasukhado yathā tathā

yo 'si so 'si bhagavan namo 'stu te||50

sarvadoṣamalinātmanā mayā

sarvadoṣarahitasya te puraḥ|

deśitaḥ svakaluṣo 'ghasaṁcayas

tvaṁ jagadgurur ataḥ paraṁ prabhuḥ||51||

puṇyam atra yad upārjitaṁ mayā

tena māravijayaśriyā yutāḥ|

bhāvanāmayam upetya satpathaṁ

buddhabodhim upayāntu dehinaḥ||52||

deśanāstavaḥ samāptaḥ||

kṛtir iyaṁ candragomipādānām iti||

(8)