• Home
• Canon Text
• Romanized
• śāstrapiṭaka
• stotra
• śākyamuni
• Devātiśayastotra

Devātiśayastotra

Technical Details

devātiśayastotra

namo buddhāya||

pratyakṣato na bhagavān sugato na viṣṇur

ālokyate na ca haro na hiraṇyagarbhaḥ|

teṣāṁ tu rūpacaritātiśayaprabhāvān

śrutvā vicārayata ko guṇavān na veti||1||

viṣṇuḥ samudyatagadāyudharaudrapāṇiḥ

śaṁbhur lalannara śirograkapālamālī|

ekāntaśāntacaritātiśayas tu buddhaḥ

kaṁ pūjayāmi uta śāntam aśāntarūpam||2||

duryodhanādikulanāśakaro babhūva

viṣṇur haras tripuradāhakaraḥ kilāsīt|

krauñcaṁ guho 'pi dṛḍhaśaktihataṁ cakāra

buddhas tu kevalam asau jagato hitaiṣī||3||

pīḍyo mayāyam ayam eva tu rakṣaṇīyo

vadhyo 'yam ity api surottamanītir eṣā|

niḥśreyasābhyudayasaukhyahitaikabuddher

buddhasya naiva ripavo na ca vañcanīyāḥ||4||

rāgādidoṣajanakāni vacāṁsi viṣṇor

unmattaceṣṭitakarāṇi tathaiva śaṁbhoḥ|

niḥśeṣadoṣaśamakāni tathāgatasya

vandyatvam arhati ca ko 'tra vicārayadhvam||5||

yaś codyataḥ paravadhāya ghṛṇāṁ prahāya

trā ṇāya yaś ca jagataḥ kṛpayā pravṛttaḥ|

rāgi ca yo bhavati yaś ca vimuktarāgaḥ

vandyo 'nayoḥ ka iha nāma vadānucintya||6||

(1)

śakraṁ vajradharaṁ balaṁ haladharaṁ

viṣṇuṁ ca cakrāyudhaṁ

skandaṁ śaktidharaṁ śmaśānanilayaṁ

rudraṁ triśūlāyudham|

etān duḥkhabhayārditān gataghṛṇān

bālān vicitrāyudhān

nityaṁ prāṇivadhodyatapraharaṇān

kas tān namasyed budhaḥ||7||

na yaḥ śūlaṁ dhatte

na ca yuvatim aṅke suvadanāṁ

na cakraṁ śaktiṁ vā

na ca kuliśam ugraṁ na ca halam|

vinirmuktaṁ kleśaiḥ

parahitavidhānodyatadhiyaṁ

śaraṇyaṁ lokānāṁ

tam ṛṣim upayāto 'smi śaraṇam||8||

rudro rāgabalāt striyaṁ vahati yo

hiṁsro hriyā varjito

viṣṇuḥ krūrataraḥ kṛtaghnacaritaḥ

skandaḥ svayaṁ jñātahā|

krūrāśā mahiṣāntakṛn naravasā-

māṁsāśinī pārvatī

pānepsī ca vināyako daśabale

svalpo 'pi doṣo 'sti kaḥ||9||

bandhur na naḥ sa bhagavān arayo na cānye

sākṣān na dṛṣtacara ekatamo 'pi caiṣām|

śrutvā vacaḥ suruciraṁ tu pṛthag viśeṣaṁ

buddhaṁ guṇātiśayalolatayā sritāsma||10||

(2)

nāsmākaṁ sugataḥ pitā na ripavas

tīrthyā dhanaṁ naiva no

dattaṁ tena tathāgatena na hṛtaṁ

kiṁ cit kāṇādādibhiḥ|

kiṁ tv ekāntajagaddhitaḥ sa bhagavān

buddho yataś cāmalaṁ

vākyaṁ sarvamalāpahāri ca tatas

tadbhaktimanto vayam||11||

hitaiṣī yo nityaṁ

satatam upakārī ca jagataḥ

kṛtaṁ yena svāsthyaṁ

bahuvidharujārtasya jagataḥ|

sphuṭaṁ yasya jñeyaṁ

karatala ivābhāti sakalaṁ

prapadyadhvaṁ santaṁ

tam ṛṣim asamaṁ bhaktimana saḥ|| 12||

asarvabhāvena cikitsayā vā

parānuvṛttyā vicikitsayā vā|

ye tvāṁ namasyanti munīndracandra

te 'py āmārīṁ saṁpadam āpnuvanti||13||

paurāṇi śrutir eṣa lokamahito

buddhaḥ kilāsau harir

dṛṣṭvā janma jarāvināśabalatāṁ

lokaṁ kṛpābhyudyataḥ|

jātaḥ śākyakulendrar adbhutamatis

trātā nṛṇāṁ gautamaḥ

śāstāraṁ hitam eva kas tam abudho

nāvaiti mūḍho janaḥ|| 14

(3)

yadā rāgadveṣād

asurasurakanyāpaharaṇaṁ

kṛtaṁ māyāvitvaṁ

dharaṇiharaṇāsaṅgamatinā|

tadā pūjyo vandyo

harir api vimukto 'budhatayā

vinirmuktaṁ buddhaṁ

na namati jano mohabahulaḥ||15||

caturjaladhimekhalākula-

kapālabhārālasāṁ

visṛjya haraye mahīṁ balir

avāpa kaṣṭāṁ daśām|

pradāya manaye piṇḍaṁ

pāṁśulavam aśoko nṛpaḥ

kṣitiṁ sakalacandramaṇḍala-

talāṁśukāṁ prāptavān||16||

pakṣapāto na me buddhe

na dveṣaḥ kapi lādiṣu|

yuktimad vacanaṁ yasya

kāryas tasya parigrahaḥ||17||

avaśyam eṣāṁ katamo 'pi sarvavij

jagaddhitaikāntaviśālaśāsanam|

sa eva dṛśyo matisūkṣmacakṣuṣā

samety aśeṣaiḥ kim anarthapaṇḍitaiḥ||18||

yasya ca nikhilā doṣā

na santi sarve guṇāś ca vidyante|

brahmā vā viṣṇur vā

maheśvaro vā sa me śāstā||19||

(4)

yasya doṣā na vidyante

vidyante cāmitā guṇāḥ|

sarvajño yaḥ kṛpāluś ca

tam ahaṁ śaraṇaṁ gataḥ||20||

evaṁ stute stutisahasranadīsamudre

buddhe vibuddhakamalāyatapattranetre|

yat kiṁ cid asti kuśalaṁ mama vāksamutthaṁ

jātā bhavantu sukhinaḥ khalu tena sarve||21|

devātiśayastotraṁ samāptam||

kṛtir iyam ācāryabhaṭṭavarāhasvāminaḥ||

(5)