• Home
• Canon Text
• Romanized
• śāstrapiṭaka
• yoginītantraṭīkā
• Sahajadvibhujahevajrasādhanam

Sahajadvibhujahevajrasādhanam

Technical Details

p.1

ācāryaśrīmad-alalavajrapādānām

sahajadvibhujahevajrasādhanam

namaḥ śrīhevajrāya

svacittaṁ sarvadaṁ sarvaṁ guruṁ hevajravajriṇam|

praṇamya yoginīcakraṁ sahajaṁ kiñciducyate ||1||

cittaṁ prakṛtiviśuddhaṁ sthiracalabhāvasvabhāvamiti vimalam |

grāhyagrāhakavirahitamanu pamamajamadvayakhaśa(sa)mam ||2||

tadevācaittaṁ sugatāḥ sasutāḥ krodhāśca sarvadevatyaḥ |

cittaṁ caitattribhavaṁ samamiti lokaḥ sukhī bhavatu ||3||

nocchedi viśvaṁ khasamaṁ svabhāvā -

datopyalagnaṁ sadapati dharmi |

syātbhrāntimātraṁ sakalārthakāri

jñānasvabhāvādupalabhyate ca ||4||

ādyantadvayabhāga kalpavigamādāmūlamunmūlitam

bāhyānnāsti punarmano bhramavaśāt jātañjagaccitraṁ(tra)vat |

mrakṣepāpacayena nirjitamiti svacchaṁ budhāḥ sevyatā -

majñānāñca(cca) bhavo jinaiḥ śama iti proktaṁ parijñāvatām ||5||

rūpādayo'tra pratibhānti ye'mī

śāntasvabhāvasumanaḥ prasūtāḥ |

p.2

te devatākāravatopabhuktā

buddhatvalakṣmīphaladā bhavanti ||6||

bhavaśamatvaṁ svamano jinatvaṁ

bodhyaṅgatāṁ(tā) kleśagaṇaśca yatra |

prayāti tatra kriyatāṁ praveśaḥ

sarvajña mārge'tisunirmale'smin ||7||

avidyāvāsanābaddhaṁ cittaṁ [baddhaṁ] prakīrtitam |

tadeva vāsanāmuktaṁ muktamityabhidhīyate ||8||

bandhamokṣavinirmuktaṁ cittaṁ vibhramavarjitam |

sadasada(du)bhayānyatvairyato muktamakalpitam ||9||

svakalpavāsanāyogāt sāmvṛ[ta]padavasthitam |

śūnyatākaruṇāgarbhaṁ bodhicittaṁ tadeva ca ||10||

pāramparamparānnetuṁ duḥkhāddhenoriva sthitam |

cintāmaṇirivāśeṣasamīhitaphalapradā ||11||

vātāgnijalabhūmyūrddhvaṁ padmenducihnabījataḥ |

jagāda maṇḍalaṁ vajrī bālānāṁ tanna tattvataḥ ||12||

utpannamaṇḍalaṁ siddhaṁ śrīmaddhevajravajriṇaḥ |

saṁśuddhaskandhadhātvādidevatāvṛndasaṁyutam ||13||

siddhaṁ khadhātupadmendo[:] śāntamakṣararūpaṁ(pa)kam |

asatsaṁkalpanirmuktaṁ bhagajñānasvabhāvataḥ ||14||

tadudbhavaṁ jagatsarvamutpattikramapakṣataḥ |

avācyāddheturūpaḥ syātsudṛḍhaṁ phalarūpi ca ||15||

prasphuradraśmisuvyaktaṁ jagatsthiracalātmakam |

acintyānantanirmāṇa(ṇaṁ) sarvabuddhaguṇālayam ||16||

p.3

atastadeva saṁpūjya bāhyābhyantarapūjayā |

samupabhujyate rūpaṁ gandhaḥ sparśo raso dhvaniḥ ||17||

yadevamādikaṁ sarvaṁ pūjā bāhyā nigadyate |

yathābhūta parijñānaṁ pūjā bāhyā trivajriṇām ||18||

manasaḥ kālika(kaṁ) karma hānirityaghadeśanā |

śubhe dharme pravṛttiśca puṇyānāñcānumodanā ||19||

samyaksanmārgasyāśra yaṇaghātaṁ [?] |

kāyavākcittasaṁśuddhiḥ śuddhaṁ triśaraṇaṁ matam ||20||

bodhicittasamutpādo jagadarthodyataṁ manaḥ |

svacihnaṁ tadidaṁ sarvamityevaṁ muninoditam ||21||

teneṣṭaputravatmaitrī sthitā sattve svabhāvataḥ |

duḥkhāddu(dduḥ)khasya hetorvā svaparoddhartukāmatā ||22||

karuṇā karuṇā sāpi svābhāviko(kā)vasaṁsthitā |

anyeṣāṁ sukhalābhena sukhatvaṁ yattu jāyate ||23||

akāmammanaso'jasraṁ pramodo muditā matā |

jagadarthaṁ pratijñātaṁ kartumupāyacintanāt ||24||

arthāntara parityāgādupekṣā parikīrtitā |

atha śūnyamasvabhāvaṁ jalacadropamañjagat ||25||

pratītijaṁ jagatprāha varjitaṁ turyakoṭibhiḥ |

ni[:]svabhāvatayā śūnyaṁ nimittaṁ [ta]mahetutaḥ ||26||

ūrdhvasyāpagamāt sarvaṁ jagatpraṇidhivarjitam |

kṛtrimakalpanānāśādanabhisaṁskṛtalakṣaṇam ||27||

ataḥ skandhādikaṁ śūnyamādyanutpannarūpataḥ |

tasmāt sahajarūpeṇa śūnyatābodhiragrataḥ ||28||

p.4

ajñānamitiradhvansi samyakjñānamahā[ra]vau |

cittamātramakṣaraṁ śuddhaṁ siddhaṁ tadudbhavaṁ sphuṭam ||29||

anantākāśaparyantadikprākāraśobhitam |

vajramayī mahīmadhye vyomapañjaramadhyagam ||30||

anādinidhanaṁ śāntaṁ svacchaṁ tribhavamaṇḍalam |

tatra madhyasthitaṁ ści(ci)ttavajradhṛgavikāriṇam ||31||

sa eva sahajaḥ prokto dvitīyaṁ bījasaṅgraham |

svacihnabījanirjāto heyopādeyatattvavit ||32||

tṛtīyaṁ bimbaniṣpattirityāha tattvavit svayam |

tatra deva[tā] yacchāntaṁ sthitaṁ cittaṁ svabhāvataḥ ||33||

bījamanāśritaṁ turyamakṣaranyāsameva tu |

śūnyatākaruṇājātaḥ prajñopāyādvayātmakaḥ ||34||

jagaddvibhujahevajraḥ sthitaḥ sahajarūpataḥ |

tathāṣṭāvaṣṭadikvakre yoginyaḥ kāmamūrttayaḥ ||35||

tāsvāryāṣṭāṅga mārgasya svabhāvairmmanasa(si) sthitāḥ |

prajvalatsuprabhālokavyaktāśeṣanirālayaḥ(yāḥ) ||36||

tasya hṛdbījasaṁbhūtadīptipūritadiṅmukha - |

khadyotā iva lakṣyante vyuditāḥ sūryakoṭayaḥ ||37||

yasyāsya vātātativepitāni

kṣetrāṇyanantāni jināśrayāṇi |

teṣāṁ rajobhiḥ pramitāni tāni

srontī nayatvaśriyamāvahanti ||38||

evaṁvidhaṁ sthiraṁ vyaktaṁ siddhaṁ sarvamidaṁ jagat |

ādarśasthamiva svacchaṁ paśyannādarśa ucyate ||39||

p.5

samatvaṁ caikarūpatvāt svānyayoḥ samatā matāḥ(tā) |

prasphuṭākārasadrūpasyekṣaṇāt pratyavekṣaṇā ||40||

tadvatkurvan ja[ga]tkṛtyaṁ kṛtyānuṣṭhānamucyate |

jāto yaḥ sahajākāraḥ kleśajñe yāvṛteḥ kṣayāt |

sarvadā suviśuddhākhyo dharmadhāturiti smṛtaḥ ||41||

itthaṁ cittaṁ svabhāvaṁ tadyajjaga[t] kiñcidīkṣate |

praveśo jñānasattvasya jñānājjagadabhedataḥ ||42||

jñānāmṛtamayaḥ sekāccittamekañca lakṣayan |

svādhipākrāntamauliḥ syāt jñānasya jñānamudraṇā ||43||

svākāradhāraṇāddharmmaḥ kāyaḥ svābhāviko mataḥ |

viśvopabhuñjanaṁ kāmaṁ kāyaḥ saṁbhoga ucyate |44||

nirmiṇoti jagadyasmāt kāyo nirmāṇasaṁjñakaḥ |

avidyākṣayātkāyo'yaṁ mahāsukha iti smṛtaḥ ||45||

itthaṁ maṇḍalacakrametadi(da)khilaṁ traidhātukanirmala(kairnirmalaṁ)

puṇyajñānamayaṁ vicitraṁ(tra)managhaṁ śuddhaṁ svabhāvādidam |

sattvācintyamahāsukhotsavarasaiḥ pūrṇaṁ kimapyadbhutaṁ

niḥśaṅkaṁ bhava bhuṁkta nirmamamidaṁ cetastvayā nirmitam ||46||

siddhimadvayacidrūpahetuśūnyamarūpi ca |

na sthitaṁ kṣāyyajātatvādviśvaṁ śrīherukī yati ||47||

adhunā kathyate śuddhiḥ kāyādīnāṁ viśodhanā |

sarveṣāṁ khalu vastūnāṁ viśuddhastathatā matā ||48||

ataḥ śuddhāḥ svataḥ skandhāyatanendriyadhātavaḥ |

bhavedaṣṭadalaṁ padmamaiśvaryādaṣṭabhirguṇaiḥ ||49||

tiraskaroti yato nityaṁ tejasā tribhavaṁ samam |

tadviśuddhyā kathyate'sau sūryasyopari saṁsthitāḥ ||50||

p.6

dharmadhātusthitatvena gataprāṇottamā manaḥ |

jagatsahajarūpatvāt sahajākāratayā sthitaḥ ||51||

anityatājagaddagdhaḥ tasmāddhūlitavigrahaḥ |

pañcāśatvarṇamālābhirmuṇḍamālāvibhūṣitaḥ ||52||

pañcabuddhasvabhāvatvāt pañcamudrāsamanvitaḥ |

jagat jñānaikarūpatvādekākāratayā sthitaḥ ||53||

bhavanirvāṇarūpatvādadvayākā[ra]rūpadhṛk |

abhedyatvāddhṛtavajro dakṣiṇe(ṇa)tvena dakṣiṇe ||54||

vāmatvāddhāryate vāme prajñā khaḍgāṅgarūpiṇī |

kapālaṁ saṁskṛtaṁ vāme kaṁ sukhaṁ tasya pālanāt ||55||

puṇyajñānasvabhāvatvādbhujadvayavibhūṣitaḥ |

kalpanākleśanāśāya dveṣānnīlakalevaraḥ ||56||

avidyāhānaye kruddhastrikāyatvāttrilocanaḥ |

satyadvayasthitatvena pādadvitīyasaṁsthitaḥ ||57||

ardhaparyaṅkanāṭyastho viśvamupahasanniva |

viśvasyopari rūpatvādūrdhvakeśasvayaṁbhuvaḥ ||58||

anyadavayavaṁ sarvaṁ sarvabuddhaguṇairyutam |

sahajatvaviruddho'yaṁ saṁvaraḥ kathyate'dhunā ||59||

maṇḍalaṁ pādalekha(khaṁ) syāt malanāt maṇḍalamucyate |

sarvadharmaparijñānaṁ pūjā prajñāgrapūjanam ||60||

hastavikṣepaṇaṁ mudrā dhyānaṁ sahajacintanam |

stutigītādikaṁ kṛtyaṁ saṁkallya tyajanaṁ baliḥ ||61||

śruvākārastu kuṇḍāgnirbhakṣaṇaṁ homa ucyate |

prajñājalasudhāpānaṁ japaṁ jalpanamucyate ||62||

p.7

manastu trāṇabhūtatvāttanmantramiti kīrtitam |

bhramaṇaṁ tasya sattvārtho vacanadeśanā matā ||63||

karākhyā karmamudrā syāt dharmamudrā bhujāḥ smṛtāḥ |

svābhā samayamudrā tu mahāmudrā niruttarā ||64||

vāyujapo'tha maitryādirā kṛtirvītarāgatā |

yathābhimatadhyānañca cittasya sthairyakārakam ||65||

svapnajñāne sukhadhyāne nidrāyāḥ samadarśane |

cakṣurādau mano nyastaṁ sthairyameti suniścitam ||66||

viśvavajraṁ sukhākāra ekatattvārthadīpakam |

gatyāgatirathārūḍhamacintyamupadeśataḥ ||67||

śrīmadalalavajreṇa yogiṇītantragopitam |

pañcavidhakramoddeśaṁ leśamatraiva sūcitam ||68||

atigāḍhatarāropātsphuṭarūpasya yoginaḥ |

kāyavākcittavajraṁ karmasaṁkalpānakṛtamatam(?) ||69||

samīkṣya mṛtyuṁ priyaviprayogaṁ

vyādhiṁ jarākarmavipākamugram |

nityaṁ janā niścalacittavṛttyā

svadevatā bhāvayata prayata(t)nāt ||70||

śraddhāṁ ca vīryaṁsmaraṇaṁ samādhi -

prajñāṁ sadā rakṣatapañcadharmān |

vyāpādakāmoddhatasaṁśayākhyān

middhañca pañcāpi vivarjjayadhvam ||71||

nandipādājñayā svalpaṁ likhitaṁ siddhasādhanam |

tenāryavajrayoginyaḥ kṣamā kurvantu me sadā ||72||

p.8

yadatropacita(taṁ) puṇyaṁ likhanāt sādhanasya me |

tenā'stu nikhi[lo] lokaḥ śrīmaddhevajrarūpakaḥ ||73||

iti sahajamacintyaikāntamādyantatu(ta)sthaṁ

gagananagarakalpaṁ maṇḍalaṁ viśvametat |

bhavaśamasamarūpiprasphuṭaṁ niḥsvabhāvam

prabhavatu bhavabhājāṁ sarvasampattihetoḥ ||74||

iti sahajadvibhujahevajrasādhanaṁ samāptam |

kṛtiriyamācāryaśrīmadalalavajrapādānām ||