• Home
• Canon Text
• Romanized
• śāstrapiṭaka
• sveṣṭadevatā
• Ādikarmāvatārapratibaddham

Ādikarmāvatārapratibaddham

Technical Details

p.1

ādikarmāvatārapratibaddham

bhagavati tāre namastubhyam |

ye kecinmanuṣyāḥ śokabhayaduṣkhā(duḥkhā)dibhiḥ paripīḍyanānnā(nā)stanniḥsaraṇavāñchayā parānuvṛttyā vā śraddhayā vā kalyāṇamitramupasaṁkrāmanti | te tena kalyāṇamitreṇa tathā tathā dṛṣṭāntaviṣe(śe)ṣairduḥkhādyudvegāt sukhābhiṣvaṅgārthaṁ vinivarttya sarvasattvasādhāraṇakṛpāparisata(ṣad) bodhicitte niyojayitavyāḥ | hīnadṛṣṭiviṣayādapi nivarttayitavyāḥ |

udvegaśca yathā ṣaḍgatigatāḥ sattvāḥ sarva eva duḥkhālīḍhāḥ sukhavāsanābhibhūtamanasaḥ | teṣāṁ trividhaduḥkhapraviṣṭatvamāvedanīyam | atra yeṣāṁ cittaṁ na tathā prasīdati daśa(rśa)nāntaraprasaṅgāt kusīdatayā vā te hīnāḥ | yeṣāṁ ca śrāvakapratyekabuddhagotratvāccittaṁ na prasīdati te madhyāḥ | te ca sarve hīnamadhyatve niyojayitavyāḥ | yeṣāṁ cittaṁ parārthakaraṇapravaṇamupajāyate te samyaksaṁbuddhasūnumārge niyojayitavyāḥ | yeṣāṁ tu nivartatte cittaṁ svayaṁ vā gotrabalavattayā sattvoddharaṇānugatacittāste dhanyā eva | evaṁ hīnamadhyotkṛṣṭabhedamājñāya | ye hīnāste paryupāsanamātre niyojyāḥ | ye tu madhyotkṛṣṭāste'nanya śāstṛkatāyāmekāyane ca | evaṁ jñātvā dhārmikeṇa sattvāḥ paripācayitavyāḥ | evaṁ trividhe'pi śaraṇagamane | hīnā upāsanaśaraṇe | madhyotkṛṣṭā anyaśāstṛkatāyāmekāyane ca | evaṁ jñātvā dhārmikeṇa sattvāḥ paripācayitavyāḥ |

evaṁ trividhe'pi śaraṇagamane | hīnā upāsanaśaraṇe | madhyotkṛṣṭā ananyaśāstṛkatve ekāyane ca | tatkathaṁ gṛhī(hi)ṇā bodhisattvena sthātavyam ? kathaṁ pratipattavyam ?

evaṁ(va)mukte bhagavānugraṁ gṛhapatimetadavocat - sādhu sādhu gṛhapate yuṣmākametadanurūpaṁ yadyupametamarthaṁ paripraṣṭavyaṁ manyadhve | tena hi gṛhapate, śṛṇu sādhu ca suṣṭhu ca manasi kuru bhāṣiṣye | yathā gṛhiṇā bodhisattvena śikṣāguṇasamādāna śreṣṭhacārikatāyāṁ sthātavyam | yathā pratipatta -

p.2

vyam | evaṁ bhagavannityugro gṛhiṇabhi(?)rbhagavataḥ pratyaśrauṣīt | bhagavāṁstasyaitadavocat - iha gṛhiṇā bodhisattvena agāramadhyāvasatā buddhaṁ śaraṇaṁ gatena bhavitavyam | dharmaṁ śaraṇaṁ gatena bhavitavyam | saṁghaṁ śaraṇaṁ gatena bhavitavyam | tena dharmacchandikena pañcamaṇḍalakena trimaṇḍalakena vā praṇamya ekāṁsottarāṅgena dakṣiṇajānumaṇḍalāvanigatenotkuṭukena vā sapuṣpāñjalinā kalyāṇamitra(trā)striḥ prārthayitavyāḥ |

duḥkhālīḍhaṁ jagad dṛṣṭvā jagaduḥ(dduḥ)khaśamāya ca |

śaraṇaṁ gantumicchāmi dadarthaṁ śaraṇatrayam ||1||

tataḥ kalyāṇamitre śāstṛsaṁjñā śāstṛprema śāsṛgauravaṁ cotpādayitavyam | aparāḥ saṁjñā utpādayitavyāḥ | vaidyasaṁjñā śūrasaṁjñā | ātmani cāturasaṁjñā kātarasaṁjñā cotpādayitavyā | anuśāsanīṣu bhaiṣajyasaṁjñā | pratipattiṣu vyādhinirghātanasaṁjñā | anuśāsanīṣu praharaṇasaṁjñā | dharmapratipattiṣu kleśāripunirghātanasaṁjñā | paścā[d] dharmacakramudrāsthitaśākyamuniṁ maṇḍalapūrvakaṁ pañcopacārapūjayā saṁpūjya puṣpāñjalitrayeṇa praṇamyātmādhiṣṭhānāya yāceta | tvadadhiṣṭhānā tvamivāhaṁ buddhā bhūya dharmacakraṁ pravartayeyam | tato buddhādīnāṁ maṇḍalakānittthaṁ kṛtvā pañcopacārapūjayā saṁpūjya uktānuvādeneti śaraṇaṁ gacchet | tatra hīnamadhyotkṛṣṭānāṁ yathāsaṁkhyaṁ maṇḍalakaniryātanādividhiḥ |

aiśvaryārogā jananī balapuṣṭivivarddhanī |

pratibhājananī samyaksarvasiddhikarī sadā ||2||

pūjā jagadguroryasmāt tasmātkāryaprayatnataḥ |

traikālyaṁ parameśasya saṁbuddhasya jagadguroḥ ||3||

tasyā vidhānaṁ vakṣyāmi yathāvadanupūrvaśaḥ |

jātivyādhijarāmṛtyūnsaṁsmṛtyānubhavanniva ||4||

aṣṭamyāñca caturdaśyāṁ paurṇamāsyāṁ sadaiva tu |

upoṣadhaḥ prayatnena karttavyo'ṣṭāṅgikaḥ sadā ||5||

p.3

alaṁkṛtā tanuryasya mahāpuruṣalakṣaṇaiḥ |

karomi maṇḍalaṁ tasmai bhāvāt kaivalyasiddhaye ||6||

saṁmārjanakāle dānaṁ gomayamityādi gāthe paṭhitavye | dharmasaṁ ghamaṇḍalakaraṇe tadguṇakīrttanaṁ kartavyam |

tṛṣitā jantavo ṣe(ye?)na dharmato yena tarpitāḥ |

dadāmi ghaṭikāṁ tasmai bhāvāt kaivalyasiddhaye ||7||

ghaṭikāpradāne ||

jagato gurave bhaktyā guṇine kleśaśatrave |

anarghāya dadāmyarghaṁ muktāśubhraṁ viśuddhaye ||8||

arghapradāne ||

idaṁ te paramaṁ puṣpaṁ jalajaṁ sthalajaṁ tathā |

dadāmi parayā bhaktyā gṛhṇa yathāsukhaṁ   ||9||

saṁtyajya śataśaḥ prāṇān yena bodhirupārjitā |

parārthakāriṇe puṣpaṁ nivā(rvā)ṇāya dadāmyaham ||10||

puṣpa pradāne ||

yasya stūpasahasrāṇi pūjyante devamānuṣaiḥ |

tasya devātidevasya dhūpo'yamanumodyatām ||11||

dhūpapradāne ||

yena stūpapradīpena ajñānamitiraṁ hatam |

tasmai sarvavide bhaktyā dīpadānaṁ dadāmyaham ||12||

p.4

pradīpapradāne ||

kuṁkumodakasekena pūracandanasu[nda]raiḥ |

saṁmālabha(mbha)namuddāmajināya pratipādayet ||13||

sarvatrisāhasravisārigandhai -

ga(rga)ndhottamaistānanulepayāmi |

uttaptasammṛṣṭasudhāma(dhauta)hema-

prabhojvalān sarvamunīndrakāyān ||14||

samālabha(mbha)napradāne ||

naivedyaṁ sarvasaṁyuktaṁ khādyabhojyasamanvitam |

varṇagandharasopetaṁ dadāmi saṁpragṛhyatām ||15||

prāsādiko maṇḍalena pūjanīyaśca puṣpataḥ |

divyaṁ sa labhate cakṣuryaḥ pradīpaṁ prayacchati ||16||

lābhī syāt divyagandhānāṁ gandhadhūpapradānataḥ |

bhogyalābhī tu naivedyādvarṇalābhī tu vastradaḥ ||17||

praṇāmādunu(nna)takule labhate janma sarvadā |

ādeyavākyaḥ satataṁ stotraṁpāṭhād bhavennaraḥ ||18||

pradakṣiṇena matimān smṛtimāṁśca sadā bhavet |

mokṣārthaṁ yaḥ karotyetat so'nte mokṣamavāpsyati ||19||

ityapi sa bhagavāṁstathāgato'rhan samyaksaṁbuddho vidyācaraṇasampannaḥ sugato lokavidanuttaraḥ puruṣadamyaśā(sā)rathiḥ śāstā devānāñca manuṣyāṇāñca buddho bhagavān | tasmai buddhāya bhagavate śākyamunaye idaṁ maṇḍalakaṁ niryātayāmi |

dharmo nāma aupaśamiko virāgāṇāṁ pravaraḥ parinirvāṇikaḥ sugatapraveditaḥ | tasmai dharmāya idaṁ maṇḍalakaṁ niryātayāmi |

p.5

santi saṁghe srota-āpattiphalapratipannakāḥ srota-āpannāḥ | santi saṁghe sakṛdāgāmiphalapratipannakāḥ sakṛdāgāminaḥ | santi saṁghe'nāgāmiphalapratipannakā anāgāminaḥ | santi saṁghe'rhatphalapratipannakā arhantaḥ | eṣa bhagavantaḥ śrāvakasaṁghe ā[ha]vanīyaḥ prāhavanī-yo'ñjalikaraṇīyaḥ sāmīcīkaraṇīyo'nuttaraṁ puṇyakṣetraṁ lokasya dakṣiṇīyaḥ | tasmai āryasaṁghāya idaṁ maṇḍalakaṁ niryātayāmi | evaṁ puṣpādyapi niryātanīyam |

tena jitvā śaṭhaṁ māraṁ prāpya buddhatvamuttamam |

bhaveyaṁ bhavakhinnānāṁ śaraṇaṁ sarvadehinām ||20||

saṁsarāmi bhave yāvattāvat sugatijaḥ pumān |

bhaveyaṁ sādhusaṁsargī dhīmān lokahite rataḥ ||21||

iti praṇidhiñca vidadhīta | ahaṁ bhadanta upāsako yāvajjīvaṁ buddhaṁ śaraṇaṁ gacchāmi dvipadānāmagryam | yāvajjīvaṁ jīvitaparyavasānaṁ yāvat | buddhamaśaikṣān buddhakārakānakṣayajñānādīn dharmān śaraṇaṁ gacchāmi duḥkhaparitrāṇārthamāśrayatvenāṅgīkaromi | dvipadānāmagryaṁ svaparārthasampallakṣaṇairguṇairyuktatvāt sarvasattvaprativiśeṣṭam | yāvajjīvaṁ dharmaṁ śaraṇaṁ gacchāmi virāgāṇāṁ śreṣṭham | dharmaṁ nirvāṇaṁ virāgāṇamagryam | laukikamārgalabdhebhyo virāgebhyo'nā-sravamārgalābhādaparihāṇīyatvātkuśalanityatvācca śreṣṭham | yāvajjīvaṁ saṁghaṁ śaraṇaṁ gacchāmi gaṇānāmagryam | saṁghaṁ śaikṣāśaikṣān saṁghaka(kā)rakān dharmān | gaṇānāmagryaṁ sarvapravrajitasaṁghebhyo'bhedyatvādanuttarapuṇyakṣetratvācca pravaram | tadanena nirvāṇāśayaṁ vinā na saṁvaraṁ pratilabhate | nirvāṇāśayaśca śaraṇagamanamantareṇa na bhavatīti jñeyam |

tathāhi - buddhaṁ śaraṇaṁ gacchāmītyanena nirvāṇamārgasyopadeṣṭā samāśrito bhavati | dharmaṁ śaraṇaṁ gacchāmītyagradharmatvānnirvāṇaṁ samāśritaṁ bhavati | saṁghaṁ śaraṇaṁ gacchāmīti nirvāṇapurayāyinaḥ sahāyakāḥ samāśritā bhavantītyevametanmantavyam |

upāsako ratnatrayopāsanāt kuśaladharmopāsanāt yathāvihitaśikṣāpadaparipālanācca | dvitīyamapyahamupāsako yāvajjīvaṁ buddhaṁ śaraṇaṁ gacchāmi | yāvajjīvaṁ dharmaṁ śaraṇaṁ gacchāmi | yāvajjīvaṁ saṁghaṁ śaraṇaṁ gacchāmi |

tṛtīyamapyahamupāsako yāvajjīvaṁ buddhaṁ śaraṇaṁ gacchāmi | yāvajjīvaṁ dharmaṁ śaraṇaṁ gacchāmi | yāvajjīvaṁ saṁghaṁ sa(śa)raṇaṁ gacchāmi | buddhe śaraṇagataḥ | dharme śaraṇagataḥ | saṁghe śaraṇagataḥ | so'haṁ triśaraṇagata upāsako bhūtvā |

p.6

imāṁ velāmupādāya yāvat prātarihāntare |

na sattvaṁ ghātayiṣyāmi na hariṣye parasvakam ||22||

bramhacaryaṁ cariṣyāmi varjayiṣye mṛṣāvacaḥ |

pramādāyatanaṁ madyaṁ na yāsyāmi kathañcana ||23||

nṛtyagītaṁ vibhūṣāñca varjayiṣyāmi sodvacām |

uccaiḥ śayyāṁ mahāśayyāṁ trikāle'pi ca bhojanam ||24||

evaṁ poṣadhamaṣṭāṅgamarhatāmanuśikṣayā |

viśuddhaṁ dhārayiṣyāmi yathā buddhena deśitam ||25||

tena jitvā śaṭhaṁ māraṁ prāpya buddhatvamuttamam |

bhaveyaṁ bhavakhinnānā(nāṁ) śaraṇaṁ sarvadehinām ||26||

saṁsarāmi bhave yāvattāvat sugatijaḥ pumān |

bhaveyaṁ sādhusaṁsargī dhīmān lokahite rataḥ ||27||

buddhamaṇḍalasya madhye'kṣobhyaḥ | pūrvādidikṣu yathākrameṇa vairocanādayaḥ | dharmamaṇḍalasya madhye prajñāpāramitā | yathākrameṇa daśabhūmaka-candrapradīpa-laṅkāvatāra-gaṇḍavyūhāḥ | saṁghamaṇḍalakasya madhye lokeśvaraḥ | yathākrameṇa maitreya-gaganagañja-samantabhadra-vajrapāṇi-mañjughoṣa-sarvanivaraṇaviṣkambhi-kṣitigarbha-jñānottarāḥ |

eṣāṁ mantrāḥ - oṁ hrīḥ lokeśvarāya svāhā | oṁ ma(mai) maitreyāya svāhā | oṁ ga gaganagañjāya svāhā | oṁ samantabhadāya svāhā | oṁ ya yakṣādhipataye svāhā | oṁ ma mañjughoṣāya svāhā | oṁ ska viskambhiṇe svāhā | oṁ kṣi kṣitigarbhāya svāhā | oṁ jña jñānottarāya svāhā |

adyāgreṇa yāvadābodhimaṇḍaparyantamahamamukanāmā imāṁ velāmupādāya buddhaṁ bhagavantaṁ śaraṇaṁ gacchāmi śāstāraṁ daiśikaṁ dvipadānāmagryam | evaṁ dvirapi trirapi | pūrvavad dharmaṁ śaraṇaṁ gacchāmi | virāgāṇāṁ pravaram | evaṁ dvirapi trirapi || tathā'vaivartikabodhisattvasaṁghaṁ śaraṇaṁ gacchāmi gaṇānāṁ śreṣṭham | evaṁ dvārapi trirapi || tatra samyakprayuktasyānanyaśāskṛkatvam | adyaprabhṛti buddho me śāstā nānye śāstrāraḥ | trirapyevam ||

anyasya tu yāvajjīvaṁ saṁghasāmānyaśaraṇañca deyam | paścād buddhānīnāmātmānaṁ sākṣitvena bodhayati | adyaprabhṛti śaraṇagatamupāsakamāryānāṁ dhārayantu avagacchantviti | trirapi ||

p.7

tata etacca kuśalamūlamanuttarāyāṁ samyaksambodhau pariṇāmayitavyaṁ sarvajñatāpariṇāmena yathāta ityādinā | tathā śaraṇaguṇodbhāvanam -

bahavaḥ śaraṇaṁ yānti parvatāṁśca vanāni ca ||28||i[tyā]dinā |

paścāta -

adya me saphalaṁ janma sulabdho mānuṣo bhavaḥ |

adya buddhakule jāto buddhaputro'smi sāṁpratam ||29||

tato ratnatrayekārāṁ kārayedgurupūjāṁ ca | ekamayanaṁ copadiśediti | evaṁ pratipannenaivaṁ śikṣitavyam | buddhaṁ bhagavantaṁ dṛṣṭvā ahamapi dvātriṁśanmahāpuruṣalakṣaṇaiḥ samalaṁkṛtaṁ buddhakāyaṁ pariniṣpādayiṣyāmīti cittamutpādayati | iti śikṣate | yaiśca kuśalamūlairdvātriṁśanmahāpuruṣa-lakṣaṇāni samudānīyante | teṣāṁ kuśalamūlānāṁ samudānayanāya vīryamārabhate | evaṁ gṛhapate gṛhī bodhisattvo buddhaṁ śaraṇaṁ gato bhavati | kathañca gṛhapate gṛhī bodhisattvo dharmaṁ śaraṇaṁ gato bhavati | iha gṛhapate gṛhī bodhisattvo dharmaṁ śaraṇaṁ gato bhavati | sapratīśo dharmādhviko dharmarāgaratirato dharmanimno dharmaprāgtāro dharmarakṣako dharmaguptisthito dharmapāśā(śo) dharma caryāyāṁ sthito dharmaparyeṣī dharmabalo dharmapraharaṇo dharmakṛtyakārī | sa evaṁ dharmasamanvāgataḥ smṛtiṁ pratilabhate | ahamanuttarāṁ samyaksambodhimabhisaṁbudhya sadevamānuṣāsa(su)rasya lokasya dharmeṇa dharmasaṁvibhāgaṁ kariṣyāmīti | evaṁ gṛhapate gṛhī bodhisattvo dharmaṁ śaraṇaṁ gato bhavati | kathañca 

p.8

gṛhapate gṛhī bodhisattvaḥ saṁghaṁ śaraṇaṁ gato bhavati | iha gṛhapate gṛhī bodhisattvaḥ saṁghaṁ śaraṇaṁ gataḥ sacet paśyati bhikṣuṁ srota-āpannaṁ vā sakṛdāgāminaṁ vānāgaminaṁ vā'rhantaṁ vā śrāvakayānīyaṁ vā mahāyānīyaṁ vā paśyati | sa tatra sagauravo bhavati | sapratīśaḥ pratyutthānaguruvaḥ suvacāḥ pradakṣiṇagrāhī sa tān samyaggatān samyakpratipannān santiṣṭhannevaṁ smṛtiṁ pratilabhate | ahamapyanuttarāṁ samyaksambodhimabhisaṁbudhya śrāvakaguṇapariniṣpattaye pratyekabuddhaguṇaniṣpattaye dharmaṁ deśayiṣyāmīti | sa teṣu sagauravo bhavati sapratīśo na ca tebhyaḥ kiñcit spṛhyati |

evaṁ gṛhapate gṛhī bodhisattvaḥ saṁghaṁ śaraṇaṁ gato bhavati | punaścaturbhirdharmaiḥ samanvāgato gṛhapate gṛhī bodhisattvo buddhaṁ śaraṇaṁ gato bhavati katamaiścaturbhirbodhicittasyānutsargeṇa | samādānasyākhaṇḍanatayā | mahākaruṇāyā aparityāgena | anyayā na sthānavyālambanatayā ca | ebhirgṛhapate caturbhirdharmaiḥ samanvāgato hṛhī bodhisattvo buddhaṁ śaraṇaṁ gato bhavati | caturbhi[:] gṛhapate dharmaiḥ samanvāgato gṛhī bodhisattvo dharmaṁ śaraṇaṁ gato bhavati | katamaiścaturbhirdharmavādināṁ pudgalānāṁ sevanabhajanaparyāsanena satkṛtya dharmaśravaṇena | dharmaṁ śrutvā yoniśa upaparīkṣaṇena | yathāśrutānāñca dharmāṇāṁ paryāptānāṁ parebhyo deśanāsaṁprakāśanatayā | tasya dharmadānanirjātasya kuśalamūlasyānuttarāyāṁ samyaksaṁbodhau pariṇāmanatayā | ebhirgṛhapate caturbhirdharmaiḥ samanvāgato gṛhī bodhisattvo dharmaṁ śaraṇaṁ gato bhavati |

punaca(śca)turbhirgṛhapate dharmaiḥ samanvāgato gṛhī bodhisattvaḥ saṁghaṁ śaraṇaṁ gato bhavati |[katamaiścaturbhiranavakrāntasamyaktvaniyamānāṁ śrāvakayānīyānāṁ sarvajñatācittaṁ rūpayati | yeṣā saṁgrahaṁ karoti dharmaṁ saṁgrahena yojayati avaivartikabodhisattvasaṁghapratiśaraṇaṁśca(ṇañca) bhavati na śrāvakasaṁghapratiśaraṇam | śrāvakaguṇāya caryai na] ca tadguṇādhimuktyā'dhimucyate | ebhigṛ(rgṛ)hapate caturbhidharmaiḥ samanvāgato gṛhī bodhisattvaḥ saṁghaṁ śaraṇaṁ gato bhavati |

śaraṇaṁ buddhadharmāderdvārabhūtaṁ jinoditam |

kriyatāṁ śaraṇaṁ tasmātśukladharmo'pi nānyathā ||30||

agatvā śaraṇaṁ sattvā ye bodhau kṛtaniścayāḥ |

gacchanti naiva paryantaṁ kṣatapotā yathodadheḥ ||31||

gurvādyupāsane prāgvad bhūmyādigrahaṇakramaḥ |

viśeṣastu tadevātra maṇḍalaṁ parimaṇḍalam ||32||

p.9

tanmadhye bhāvayenmeruṁ h-ja-śṛṅgāṣṭaśobhitam |

catūratnamayaṁ divyaṁ caturasraṁ suśobhanam ||33||

pūrvādirūpyavaidūryasphaṭikasvarṇabhūṣitam |

svarṇadaṇḍamadho hā-jaṁ dvīpopadvīpamaṇḍitam ||34||

arddhacandrasitaṁ ya-jaṁ pūrvavidehakam |

dehottaravidehābhyāṁ yā-jābhyāṁ pārśvato vṛtam ||35||

jaṁbūdvīpaṁ trikoṇañca dakṣiṇe raṁ-bhavaṁ nyaset |

rā-jābhyāṁ śāṭhamantribhyāṁ dvīpābhyāṁ pārśvato vṛtam ||36||

godānīyāparaṁ va-jaṁ vṛttaṁ paścimato nyaset |

amaravara-vā-ja(jā)bhyāṁ dvīpābhyāṁ parivāritam ||37||

uttarakurukaṁ dvīpaṁ caturasraṁ calaṁ bhavam |

kurukaurava-lā-jābhyāṁ dhyāyādubhayato vṛtam ||38||

vajrendranīlavaidūryamarakatābjamagakaiḥ |

svarṇamuktāpravālādyairdhyātvā sthānāni pūrayet ||39||

paryante ca ra-lā-rājairdikṣu strīnaracakrakaiḥ |

maṇinā koṇabhāgeṣu yā-ya-la-vā-bhavairapi ||40||

khaḍgadvipārśvaratnaiśca nidhibhiśca tathāṣṭabhiḥ |

saṁpūrṇamaṇḍalaṁ kṛtvā tadbījaiḥ kāyasaṁyutaiḥ ||41||

sthānasaṁjñāḥ samuccārya puṣpairgandhādisaṁyutaiḥ |

pūrvadattaṁ samākṛṣya tattatsthāneṣu yojayet ||42||

puṣpāṇi ca pratiṣṭhāpya dīpādīṁśca tanmantrataḥ |

gurubhyo bodhisattvebhya āśayena nivedayet ||43||

saṁstutya pariṇāmanā visarjanañca pūrvavat | muriti visarjayet | anenaiva sarddha(ddha)rmamaṇḍalaṁ gururā(gurvā)dyupāsanamaṇḍalañca |

p.10

saddharmamaṇḍalaṁ meruṁ caturdvīpasamanvitam |

ratnairnānāvidhaiḥ pūrṇaṁdhyātvā kuryādvicakṣaṇaḥ ||44||

svabījanāma satpuṣpairyathāsthānaṁ tu pūjayet |

sarvātmakāya dharmāya datvā dharmaṁ paṭhet kṛtim ||45||

sattvānāṁ hitamutthāne śāsanasya cirasthitim |

saṁcintya maitracittañca vicaretkaruṇātmakaḥ ||46||

sarve sattvāḥ sarve prāṇāḥ sarve bhūtāśca kevalāḥ |

sarve vai sukhinaḥ santu sarve santu nirāmayāḥ |

sarve bhadrāṇi paśyantu mā kaścitpāpamāgamat ||47||

jagadduḥkhaikabhaiṣajyaṁ sarvasampatsukhākaram |

lābhasatkārasahitaṁ ciraṁ tiṣṭhatu śāsanam ||48||

śāsanacirasthitiḥ ||

ātmanaiva samān sattvānanantakṣetrasambhavān |

buddhameghāstatputrāśca niḥsa(sṛ)tya sarvame(?)kaśrayāt ||49||

mañjubhadratanoḥ śuddhiṁ prāpayantviti cintayan |

vidyārājaṁ pravartteta vārānaṣṭau kṛpātmakaḥ ||50||

namaḥ sarvabuddhabodhisattvānāṁ namo'stu te mahāvīra sarvasattvahitaṁkara tiṣṭha sarvatra sarveṣāṁ dharmāṇāṁ adhiṣṭhāya svāhā || maitrīvihāraḥ || etadapyādikarmāvatārapratibaddhamiti |

granthapramāṇamasya 1 śatagrantha 10 ||