• Home
• Canon Text
• Romanized
• śāstrapiṭaka
• pramāṇa
• Sambandhaparīkṣā

Sambandhaparīkṣā

Technical Details

sambandhaparīkṣā

namo vītarāgāya||

pāratantryaṁ hi sambandhaḥ siddhe kā paratantratā|

tasmāt sarvasya bhāvasya sambandho nāsti bhāvataḥ||1

rūpaśleṣo hi sambandho dvitve sa ca kathaṁ bhavet|

tasmāt prakṛtibhinnānāṁ sambandho nāsti bhāvataḥ|| 2

parāpekṣā hi sambandhaḥ so 'san katham apekṣate|

saṁś ca sarvanirāśaṁso bhāvaḥ katham apekṣate||3

dvayor ekābhisambandhāt sambandho yadi taddvayoḥ|

kaḥ sambandho 'navasthā ca na sambandhamatis tathā||4

(1)

tau ca bhāvau tadanyaś ca sarve te svātmani sthitāḥ|

ity amiśrāḥ svayaṁ bhāvās tān miśrayati kalpanā|| 5

tām eva cānurundhānaiḥ kriyākārakavācinaḥ|

bhāvabhedapratītyarthaṁ saṁyojyante 'bhidhāyahāḥ|| 6

kāryakāraṇabhāvo 'pi tayor asahabhāvataḥ|

prasidhyati kathaṁ dviṣṭho 'dviṣṭhe sambandhatā katham||7

krameṇa bhāva ekatra vartamāno 'nyaniḥspṛhaḥ|

tadabhāve 'pi tadbhāvāt sambandho naikavṛttimān|| 8

yady apekṣya tayor ekam anyatrāsau pravartate|

upakārī hy apekṣyaḥ syāt kathaṁ copakaroty asan||9

yady ekārthābhisambandhāt kāryakāraṇatā tayoḥ|

prāptā dvitvādisambandhāt savyetaraviṣāṇa yoḥ|| 10

(2)

dviṣṭho hi kaścit sambanbho nāto 'nyat tasya lakṣaṇam|

bhāvābhāvopadhir yogaḥ kāryakāraṇatā yadi|| 11

yogopādhī na tāv eva kāryakāraṇatātra kim|

bhedāc cen nanv ayaṁ śabdo niyoktāraṁ samāśritaḥ|| 12

paśyann ekam adṛṣṭasya darśane tadadarśane|

apaśyan kāryam anveti vināpy ākhyātṛbhir janaḥ|| 13

darśanādarśane muktvā kāryabuddher asambhavāt|

kāryādiśrutir apy atra lāghavārthaṁ niveśitā|| 14

tadbhāvabhāvāt tatkāryagatir yāpy anuvarṇyate|

saṇketaviṣayākhyā sā sāsnāder gogatir yathā||15

(3)

bhāve bhāvini tadbhāvo bhāva eva ca bhāvitā|

prasiddhe hetuphalate pratyakṣānupalambhataḥ|| 16

etāvanmātratattvārthāḥ kāryakāraṇagocarāḥ|

vikalpā darśayanty arthān mithyārthā ghaṭitān iva|| 17

bhinne kā ghaṭanā 'bhinne kāryakāraṇatāpi kā|

bhāve hy anyasya viśliṣṭau śliṣṭau syātāṁ kathaṁ ca tau|| 18

saṁyogisamavāyyādi sarvam etena cintitam|

anyonyānupakārāc can na sambandhī ca tādṛśaḥ||19

janane 'pi hi kāryasya kenacit samavāyinā|

samavāyī tadā nāsau na tato 'tiprasaṅgataḥ||20

(4)

tayor anupakāre 'pi samavāye paratra vā||

sambandho yadi viśvaṁ syāt samavāyi parasparam|| 21

saṁyogajanane 'pīṣṭau tataḥ saṁyoginau na tau|

karmādiyogitāpatteḥ sthitiś ca prativarṇitā||22

saṁyogādyāśraye yogyaṁ ayogyaṁ tac ca jāyate|

nityayogyasvabhāvasya tadvaikalyavirodhataḥ||23

iti tadyogyatāvācyaḥ svabhāvo 'sya nirucyatām|

vibhāgayogagatibhiḥ kim anyair gamanādibhiḥ|| 24

teṣu satsv api tasyeti sambandhasyāprasiddhitaḥ|

yuktaḥ svabhāvabhedo 'yaṁ tat pratikṣaṇajanmanām||25

sambandhaparīkṣākārikā samāptā|| || kṛtir ācāryadharma-

kīrtipādānām|| ||

(5)