• Home
• Canon Text
• Romanized
• śāstrapiṭaka
• mahāyogatantraṭīkā
• Jñānasiddhi

Jñānasiddhi

Technical Details

śrīmadindrabhūtiviracitā

Jñānasiddhiḥ|

prathamaḥ paricchedaḥ||

namo vajrasattvāya|

praṇipatya jagannāthaṁ sarvajinavarārcitam|
sarvabuddhamayaṁ siddhivyāpinaṁ gaganopamam|| 1||

sarvadaṁ sarvasattvebhyaḥ sarvajñaṁ varavajriṇam|
bhaktyā'haṁ sarvabhāvena vakṣye tatsādhanaṁ param||2||

aśeṣayogatantroktaṁ vajrayānamanuttaram|
ye na jānanti muḍhāste bhramantīha bhavārṇave|| 3||

ye tu sattvāḥ samāruḍhāḥ sarvasaṅkalpavarjitāḥ|
te spṛśanti parāṁ bodhiṁ janmanīhaiva sādhakāḥ|| 4||

mudrāmaṇḍalamantrādyairjāpabhāvanatatparaiḥ|
naiva siddhiṁ parāṁ yānti kalpāsaṅkhyeyakoṭibhiḥ|| 5||

rūpayauvanasampatterbhogaiśvaryabalasya ca
janmagotrapravṛttasya na citte mānamudvahet|| 6||

(1)

matimān paṇḍito'smīti sarvaśilpakalāsu ca|
kuśalaḥ pārthivaścāhamiti citte na yojayet|| 7||

śīlavān śrutavān vīro [rūpā] dyairapi saṁyutaḥ|
[svamukteḥ] paramukteśca nātmānamupalabhyate|| 8||

sarvasattvamanovyāpī vajrasattvaḥ svayaṁ sthitaḥ|
iti sañcintya yogātmā na kañcidavakalpayet||9||

bālā mūrkhā daridraśca duḥśīlā rogapīḍitāḥ|
evamādyairanekaiśca saṁyuktān nāvamānayet|| 10||

bhakto ratnatraye śrāddho bodhicittavibhūṣitaḥ|
sarvasattvānukampī ca samayī saṁvare sthitaḥ|| 11||

śuṣkalohitamāṁsaṁ ca bodhicittavimiśritam|
mahodakasamāyuktaṁ bhakṣayet tattvavit sadā|| 12 ||

naraśvahayagodīpaṁ kariṇāṁ gardabhasya ca|
bhakṣayet tattvasiddhyarthaṁ sarvasaṅkalpavarjitam|| 13||

ghātayet tribhavo[tpattiṁ] paravittāni hārayet|
kāmayet paradārānvai mṛṣāvādamudīrayet|| 14||

karmaṇā yena vai sattvāḥ kalpakoṭiśatānyapi|
pacyante narake ghore tena yogī vimucyate|| 15||

mahopāyasamāyukto yogī lokārthakārakaḥ|
[nākāryaṁ] vidyate tasya sarvasattvajugupsitam|| 16||

(2)

prajñopāyasamāyogāt nāsti pāpaṁ prakīrttitam|
ityuvāca svayaṁ vajrī vajrasattvavikurvitaḥ|| 17||

bhakṣābhakṣyavinirmuktaḥ peyāpeya vivarjitaḥ|
gamyāgamyavinirmukto bhaved yogī samāhitaḥ|| 18||

pratītyotpannasadbhāvān sarvabhāvān vicārayet|
gatāgativinirmukto['nupapannān] nirātmakān|| 19||

māyopamādidṛṣṭāntairyojyate pratijānatā|
ahaṁ mama vikalpaṁ ca na kuryād yogatattvavit|| 20||

sarvavyāpī mahāvajraḥ sarvākāśapratiṣṭhitaḥ|
sarvasattvamanovyāpī sarvapuṇyamahodayaḥ|| 21||

anyonyavyāpako vajraḥ sarvavit lokanāyakaḥ|
eṣa vajradharo rājā sarvamantreṣu varṇitaḥ ||22||

guruprasādo yasyāsti sa labhet tattvamuttamam|
anyathā kliśyate bālaḥ cirakālavimohitaḥ|| 23||

gururbuddho bhaved dharmaḥ saṅghaścāpi sa eva hi|
prasādād jñāyate tasya yasya ratnatrayaṁ varam|| 24||

ajñānatimirāndhānāmeṣa mārgapradarśakaḥ|
sa bhavet sarvasaukhyāgryaḥ sarvakāmapradāyakaḥ|| 25||

dharmagambhīraniṣṭhātmā viviktakaruṇātmakaḥ|
ratnatrayapratiṣṭhārthī dharmadāne nirāmiṣaḥ|| 26||

(3)

sa guruḥ śiṣyasadgrāhī sarvabuddhānukārakaḥ|
ityuvāca jagannātho nānye vai guravaḥ smṛtāḥ|| 27||

yasmānna tatsamo hyasti pūjanīyo mahāmuniḥ|
tasmāt sarvaprayatnena pūjayed guruvaraṁ vratī|| 28||

tatsamo vidyate loke mānyo na tribhave janaḥ|
vajrasattvaḥ svayaṁ loke sarvasampattaye sthitaḥ|| 29||

ārādhyo'nekadhā śiṣyaiḥ satsampadamabhīipsubhiḥ|
akṣīṇa puṇyakāmaiśca sarvavighnavināyakaiḥ|| 30||

sarveṣāṁ samayānāṁ hi samayo'yaṁ niruttaraḥ|
rakṣyo'yaṁ bhavatā nityaṁ sarvasa[mpatpra]dāyakaḥ|| 31||

labdhuṁ jñānavaraṁ divyaṁ sarvasaṅkalpavarjitam|
vajrajñānābhiṣikto hi sādhayed bodhimuttamām|| 32||

samyag jñānasamāyukto lekhyamṛṇmayamaṇḍale|
gṛhṇīyādabhiṣekaṁ cet samāyād bhraśyate hyasau|| 33||

samayabhraṁ[śato] duḥkhaṁ kāyikaṁ mānasaṁ tathā|
arthanāśo bhavet tasya maraṇaṁ śīghrameva ca|| 34||

mṛte ca nārakaṁ duḥkhaṁ kalpakoṭiśatānyapi|
anubhūya ya dottiṣṭhet cāṇḍāle hīnaje kule|| 35||

(4)

utpadyate sa mūḍhātmā muko vā vikalo'thavā||
jātyandho hi bhaved jāto jātau jātau ma saṁśayaḥ|| 36||

sarvatāthāgataṁ jñānaṁ vajrayānamiti smṛtam|
tenābhiṣikto matimān abhiṣikto'bhidhīyate|| 37||

sa yogī sarvabuddhātmā sarvadevāntike gaṇaiḥ|
kṛtāñjalipuṭairbhūtvā abhivandyo jagatpatiḥ|| 38||

[kurvanti rakṣaṇaṁ] vīrā bodhisattvā mahābalāḥ|
buddhāścāpi mahātmāno vajrakāyāḥ sadā sthitāḥ|| 39||

satya dharmaparo hyeṣa buddhavartmapravarttakaḥ|
sagauravāḥ praśaṁsanti adhiṣṭhānasamanvitāḥ|| 40||

lokapālāstathā cānye mahābalaparākramāḥ|
sarvasthānagatasyāpi rakṣamāṇāḥ pratiṣṭhitāḥ|| 41||

ye cāpi sarvalokeṣu māravighnāḥ pratiṣṭhitāḥ|
te'pi tasya na kurvanti vighnaṁ bhītāḥ prayānti ca|| 42||

sarvadevādayaḥ siddhāḥ sarvākāśacarācarāḥ|
na laṅghayanti ca taṁ te'pyapāyagatibhīravaḥ|| 43||

vīryasya jñānavijñānasiddherhā nirbhavatyapi|
yadi mohavaśādeva laṅghayanti vimohitāḥ|| 44||

sarvajño varado vādī varṇasaṁsthānake vinā|
gatāgativinirmukto acālyaḥ sarvavāyubhiḥ|| 45||

(5)

dahyate nāgniskandhena plāvyate na jalena ca|
bhidyate nahi śastreṇa tīkṣṇenāpi prayatnataḥ|| 46||

apratiṣṭhiṁ yathākāśaṁ vyāpi lakṣaṇavarjitam|
idaṁ tat paramaṁ tattvaṁ vajrajñānamanuttaram|| 47||

khyātā samantabhadreti mahāmudrā ca saṁjñitā|
dharmakāyamidaṁ jñeyamādarśajñānamityapi|| 48||

pratibimbaṁ yathādarśe svakīyaṁ dṛśyate dhruvam|
dharmakāyastathā jñāne dṛśyetādarśamaṁsthite|| 49||

sarvatāthāgataṁ jñānamātmanaḥ prāṇināmapi|
ekasvabhāvasambodhau samatājñānamucyate|| 50||

ādiśuddhamanutpannaṁ prakṛtyaiva prabhāsvaram|
anyānyavyāpakajñānāt pratyavekṣaṇakaṁ smṛtam|| 51||

sarvatra sarvadā sarvaṁ buddhakṛtyapravarttanam|
sarvabuddhaikakāryatvāt kṛtyānuṣṭhānamucyate|| 52||

kleśajñeyāvṛtaṁ sarvaṁ yadā muktaṁ bhavet tadā|
suviśuddhamiti khyātaṁ vajriṇāṁ varayoginām|| 53||

tathā vaineyadharmeṣu sarvakāmamagaṇeṣu ca|
sarvabuddhaikasambhogāt kāyaḥ sāmbhogiko mataḥ|| 54||

sarvalakṣaṇasaṁyukto nānākāyo hyalakṣaṇaḥ|
nirmitatvāt ca buddhānāṁ kāyo nairmāṇiko mataḥ|| 55||

(6)

jñātvā tadbhāvato yogī mahāmudrāprasiddhaye|
sidhyate janmanīhaiva sarvasaṅkalpavarjitaḥ|| 56||

mahāmudreti vijñeyā sarvabuddhamayā śivā|
siddhā sā'nekatantreṣu deśitā varayoginā|| 57||

garbhacakraṁ mānayet ca kṣetre kṣetre pratikṣaṇam|
sarvatāthāgataṁ samyak tatra sandhārayed vratī|| 58||

kumārakrīḍanaṁ sarvaṁ śilpasandarśanaṁ tathā|
antaḥpurāt niṣkramaṇaṁ māradharṣaṇameva ca|| 59||

devāvatāraṇaṁ caiva dharmacakrapravartanam|
mahānirvāṇaṁ [sandṛśyaṁ ya ] ccānyat sarvakrīḍanam|| 60||

sarvavajramayaṁ sarvaṁ yogī nityaṁ prabhāvayet|
nāpūrvaṁ dṛśyate hya[sya] nāyojyaṁ pūrvasaṁsthitam|| 61||

sarvatāthāgataṁ kṛtyaṁ sarvavajramayaṁ śivam|
traikālyaṁ yattu paryantaṁ sarvamevāvalokayet|| 62||

sarvavāgviṣayātītaṁ sarvalakṣaṇavarjitam|
īdṛśaṁ cintayed yogī [sarvabuddhatvadāyakam||63||

sarvabhūmivinirmuktaṁ kāryakāraṇavarjitam|
siddhaṁ vibhāvayan yogī] janmanīhaiva siddhyati|| 64||

sarvopāyavidhijñasya yoginaḥ sarvavajriṇaḥ|
sidhyate'nuttaraṁ tattvaṁ vajrasattvavaro yathā|| 65||

(7)

sthitaḥ supto niṣasmaśca caṁkramedathavāpi ca|
bhāṣaṇe vajravākye ca vajrasattvatvamāvahet|| 66||

rūpaśabdarasasparśānupabhujya sadā vratī|
pūjāṁ tu sarvabuddhānāṁ karomīti samārabhet|| 67||

sattvebhyo'pi tadā dadyād bhaktavastrādikaṁ tathā|
anyad vāpi ca yat kiñcit tathaiva vidhimācaret|| 68||

nṛtyagītaistathā vādyaiḥ puṣpamālyādibhūṣaṇaiḥ|
sragdāmacāmaraiḥ chatraiḥ parātmānaṁ prapūjayet|| 69||

sugandhi gandhalepādyairapi liptaṁ yathāvidhi|
ātmānaṁ pūjayed yogī sarvabuddhamanusmaran|| 70||

vratī vā muṇḍito vā'tha gṛhī vā sevako'tha vā|
rājā vā sevakādhyakṣo yathā'sau rocayed vratī|| 71||

tathāsau kurute yogī sarvathā na praduṣyati|
sarvakalpavinirmukto yathākāmakriyākaraḥ|| 72||

sarvabhāvasvabhāvo'sau sarvabuddhamayo vibhuḥ|
svayambhūḥ kāmacārī ca sarvasattvahṛdi sthitaḥ|| 73||

bhāvayet tattvayogī sa sarvatattvamanusmaran|
sarvavajramayaṁ siddhaṁ laghu vajratvamāpnuyāt|| 74||

nātra vighnā na mārāśca sarve vaśyā bhavanti ca|
sarvaduḥkhavinirmuktamātmānaṁ sādhayed vratī|| 75||

(8)

sidhyate sarvabuddhatvaṁ dine vidhivivarjitam|
ātmānaṁ sarvasaṁyuktaṁ sadā paśyan mahāvratī|| 76||

sarvapūjāviśeṣaiśca ātmānaṁ pūjayet sadā|
anyebhyo'pi tathā deyaṁ vajrasattvamanusmaran|| 77||

sarvasattvānnasambhūtān prāṇino'pi [viḍu]dbhavān|
saṁgṛhya ca mahāyogī bhakṣayet tattvasiddhaye|| 78||

mahāpradīpasaṁyuktaiḥ samaye'nyairjugupsitaiḥ|
pañcāmṛtaṁ sadā bhakṣaṁ pūjyāścaiva tathāgatāḥ|| 79||

sarvāṅgakutsitāyāṁ vā na kuryādavamānanām|
striyaṁ sarvakulotpannāṁ pūjayed vajradhāriṇīm| 80||

ajātapuṣpasaṁyuktāṁ bodhicittasamanvitām|
[seva]yet tattvasiddhyarthaṁ nirvikalpavidhisthitaḥ|| 81||

caṇḍālakulasambhūtāṁ ḍombikāṁ vā viśeṣataḥ|
jugupsitakulotpannāṁ sevayan siddhimāpnuyāt|| 82||

dvijātikulasambhūtāḥ kanyāḥ kāmyāstu yoginaḥ|
yathā cittaṁ na praduṣyeta tathā kāryaṁ suśobhanam|| 83||

mañcakaiḥ cchadi (?) sammiśraiḥ puroṣādivimiśritaiḥ|
pūjayed vajrasattvātmā nirvikalpena cetasā|| 84||

yathākāmakriyākārī yathārucitaceṣṭitaḥ|
sādhayed vajrasattvatvamanyathā kliśyate dhruvam|| 85||

(9)

vratopavāsaniyamairdevatārupabhāvanaiḥ|
nānābhujasamāyuktaiḥ sidhyate nahi sādhanaiḥ|| 86||

jambūdvīparajaḥkalpamantrajāpavibhāvanaiḥ|
sidhyate nahi buddhatvaṁ mahāvīryavatāmapi|| 87||

evamādyairanekaiśca śiśubhiḥ kalpitairnayaiḥ|
durlabhaṁ sugatau janma vajrasattvaṁ kathaṁ bhavet|| 88||

mahāmaṇḍalamudrādīn jagāda bhagavān muniḥ|
samyagjñānasamāyogabhavyatāvigatātmanām|| 89||

svasaṁvedyasvabhāvaṁ yat tattvaratnamanuttaram|
yuktyāgamavicāraistu grahītuṁ ye tu na kṣamāḥ|| 90||

ajñānamohasaṁcchannā aparīkṣakabuddhayaḥ|
ādikarmikagrā[hyā]ste hīnadharmasya bhājanāḥ|| 91||

tān pratyuktā jagannāthaiḥ vajrasattvavibhāvanaiḥ|
bhujavarṇasamāyuktamudrāmaṇḍalakaistathā|| 92||

aparapratyupāyairye gambhīrajñānabhājanāḥ|
akampyāḥ pāpamitraiśca māravighnavināyakāḥ|| 93||

teṣāṁ tattvamidaṁ śuddhaṁ sarvakalpavivarjitam|
agamyaṁ sarvasattvānāṁ brahmādīnāṁ ca sarvathā|| 94||

deśitaṁ lokanāthaistu jñānama[tya]dbhutaṁ param|
siddhidaṁ janmanīhaiva sarvabuddhamayaṁ śivam|| 95||

iti jñānasiddhau tattvanirdeśaḥ prathamaḥ paricchadaḥ|

(10)

dvitīyaḥ paricchedaḥ|

pañcabuddhasvabhāvatvāt pañcaskandhā jināḥ smṛtāḥ|
dhātavo locanādyāstu buddhakāyastato mataḥ|| 1||

evaṁ cet prāṇinaḥ sarve sambuddhāstribhave sadā|
buddhatvāya kriyāḥ sarvā vṛthaiva śrutabhāvanāḥ|| 2||

buddhatvāt sarvalokasya sarve'pi tribhavena tu|
sukhaduḥkhapipāsādibādhā tasya na yujyate|| 3||

ṣaḍabhijñādayaścāpi bodhau guṇavibhūtayaḥ|
kathaṁ te na pravarttante buddhakāyo bhaved yadi||4||

yastvevaṁ na prajānāti sa sambuddho bhavet katham|
evaṁ jānāti cet kaścidasau buddho bhaviṣyati|| 5||

kramādabhyāsayogena yasya cintā pravarttate|
buddho bhavedasau yogī nānye buddhatvasādhakāḥ|| 6||

svabhāvād yadi te buddhā nābhyāsena prayojanam|
sayuktikasadābhyāsaṁ yuktito'yuktivarjitam|| 7||

yadyanātho janaḥ kaścit rājā'hamiti bhāvayet|
kalpakoṭiśatenāpi nāsau rājyamavāpnuyāt|| 8||

mithyākalpanayā yasmād rājyaṁ tasya na vidyate|
mithyābhāvanayā tasmād buddhatvaṁ na bhaviṣyati|| 9||

(11)

tantrarājeṣu saṁbaddhaiḥ skandhadyāyatanādiṣu|
tattvaṁ nāmabhiruddiṣṭaṁ saṁyuktaṁ samabhāṣayā|| 10||

[śukraṁ] vairocanaṁ khyātaṁ vajrodakaṁ tathā'pram|
strīndriyaṁ ca yathā padmaṁ vajraṁ puṁsendriyaṁ tathā|| 11||

svabhāvād devatākāyaṁ tasmād vaktuṁ na yujyate|
yuktyāgamānusāreṇa yasmād vaktuṁ na śakyate||12||

kṛtakaṁ devatārūpaṁ vajrasattvo bhaved yadi|
saṁskṛto jāyate tasmāt naśyate tu ghaṭādivat|| 13||

tato niṣphalatāṁ yāyāt bodhicaryā tvanekadhā|
bhāvanā'pi kimarthaṁ syād yadi bhūtvā vinaśyati|| 14||

manomayakṛtaṁ rūpaṁ kathaṁ saṁskṛtamucyate|
kathaṁ vinaśyati caitat śrṛṇu mohārṇavādhunā|| 15||

cittasya kalpanā hyeṣā sāpi saṁskṛtalakṣaṇā|
manasā kalpitaṁ yat tadavināśi kathaṁ bhavet|| 16||

bhujavarṇasamāyuktaṁ yathāpūrvavyavasthitam|
akṛtaṁ devatārūpaṁ bhāvyate tanmayā'dhunā|| 17||

akṛtaṁ devatārūpaṁ bhāvyate tat tvayā yadi|
sthitaṁ pūrvamanutpannaṁ bhāvyate kiṁ prayojanam|| 18||

bhaveyaṁ tādṛśaṁ rūpaṁ matvā hamiti bhāvanā|
bhāvane dve vicārye'tra yoginā rūpasādhane|| 19||

(12)

tādṛśo'haṁ bhaveyamiti yadi dhyānaṁ prakalpyate|
yadā dhyānaṁ sphuṭībhūtaṁ dṛśyate devatā tu sā|| 20||

paṭādau rūpamālokya yadā dhyānaṁ [ prakalpyate|
tadā] ............................ jātasya te budhāḥ (?) || 21||

ajātaṁ devatārūpaṁ dhyāne tatra gataṁ yadi|
sarvābhijñāpravṛttestu [ta]d rūpaṁ caiva tatkṣaṇāt|| 22||

evaṁ cet nāsti te samyak tad dhyānenāgataṁ bhavet|
tvayā niṣpāditaṁ rūpaṁ kṛtakaṁ kiṁ na budhyase|| 23||

ahaṁ taditi pakṣe tu dvayaṁ tatra na vidyate|
siddhasya sādhanaṁ nāsti kathaṁ dhyānaprakalpanā|| 24||

sarvajñatvaṁ hi sarvajño na bhūyaḥ prāptumicchati|
buddhakṛtyaṁ tvayā kāryaṁ buddhatvaṁ nānyakāritā|| 25||

evaṁ te nāsti samyaktvaṁ kathaṁ mithyā prakalpyate|
akṛtaṁ buddhakṛtyaṁ yat tadevāhammatirvṛthā|| 26||

akṛtaṁ devatārūpaṁ tadidānīṁ vicāryate|
akṛtaṁ śakyate vaktuṁ rūpitvānna ghaṭādivat|| 27||

ata eva jagannāthā bālānāṁ pratibodhane|
nirvāṇaṁ darśayantyeva rūpasyānityadarśakāḥ|| 28||

tasmāt tvarūpavāna buddhaḥ kvacit loke pravarttate|
buddharūpaprasiddhyarthaṁ na kāryā rūpabhāvanā|| 29||

(13)

na rūpiṇo yathā buddhā yuktyā yastvajaḍātmakaḥ|
pradeśastho bhaved rūpī ṣaḍabhijñaḥ kathaṁ bhavet|| 30||

lokadhātuṣu [kāyādyā] rūpādyāyatanādiṣu|
na teṣāmāgatistatra netrādyāyatanādiṣu|| 31||

gamanaṁ cakṣurādīnāṁ yadā naivopalabhyate|
kathaṁ teṣāṁ samāyogo'yogitvānna ca sarvavit||32||

gatvā cet tat prajñānāti kramād jñātuṁ kathaṁ kṣamaḥ|
jñeyastānantasadbhāvāt sarvajño na tathāpi saḥ|| 33||

buddhānāṁ cakṣurādibhirato naiva prayojanam|
cakṣurādivinirmuktaḥ kāyo'nyo nopalabhyate|| 34||

pratimeva tu niśceṣṭo buddhakāyo hi labhyate|
yasmāt saṁvedānābhāvāt buddharūpaṁ na sarvavit|| 35||

divyaṁ cakṣuḥ kṛpālūnāṁ buddhānāmasti sammatam|
divyaśrotrādisarvāṇi sarvajñāste kathaṁ nahi|| 36||

yadi jñānena jānīyād buddhakāyena kiṁ tadā|
kāyasthaṁ vetti tad jñānamataḥ kāyo hi sarvavit|| 37||

kāyād bhinnamabhinnaṁ vā buddhajñānaṁ bhaviṣyati|
kāyena saha saṁyuktaṁ nirvāṇe naśyate [hi] tat|| 38||

kāyasya nāśadharmitvāt jñānaṁ cāpi vinaśyati|
ato naivatratā yuktā buddhānāṁ jñānakāyayoḥ|| 39||

(14)

kāyasthaṁ ced bhaved jñānaṁ kāyābhāve na sarvavit|
pratītyasambhavaṁ jñānamato nāśamavāpnuyāt||40||

vināśijñānakāyānāṁ sarvajñattvaṁ na yujyate|
ato'pi buddhakāyo hi sarvajño na vidhīyate|| 41||

jñānādanyatvapakṣe tu buddhakāyaḥ kathaṁ bhavet|
buddhasya pratimetyevaṁ vaktuṁ yuktaṁ hi yoginā|| 42||

tasmāt mūḍhataro loko yo rūpaṁ dhyātumicchati|
buddhajñānaprasiddhyarthamākāśe bhoktumicchati|| 43||

sattveṣu karuṇāhīnāḥ śraddhāprajñāvivarjitāḥ|
gambhīrodāradharmeṣu buddhisteṣāṁ bhavennahi|| 44||

eteṣāṁ dharmahīnānāmitaścetaśca dhāvatām|
unmattavat prayāteṣu [yu]gapad dharmamohitām|| 45||

karuṇā mahatī kāryā sattvebhyo'pi viśiṣṭatā|
nāpamānamato yuktaṁ samyagjñānopadeśakaiḥ|| 46||

jñānasiddhau rūpabhāvanāniṣedho dvitīyaḥ paricchedaḥ|

(15)

tṛtīyaḥ paricchedaḥ|

rūpabhāvanayā tāvat vajrasattvo na midhyati|
sākārakalpanā'pyevaṁ vajrasattvaṁ na sādhayet|| 1||

ākāra eva tad jñānamākārād vā tiraskṛtam|
yadyākāro bhaved jñānamevaṁ tāvanna yujyate|| 2||

ākāraṁ ced na tad jñānaṁ jñānasyākāratā nahi|
yathākāśo ghaṭo na syāt naivākāśo ghaṭo bhavet|| 3||

arūpaṁ na bhavet rūpaṁ [arūpī] rūpavān nahi|
arūpi jñānamākhyātamākārā rūpiṇaḥ smṛtāḥ|| 4||

kathaṁ tayorekatā hi bhavediti prakalpyate|
ākāraṁ jñānameveti kalpanā naiva yujyate|| 5||

anyadoṣaprasaṅgācca śṛṇu saṁkṣepato'dhunā|
yadyākāro hi tad jñānaṁ saṁskṛtatvaṁ prasajyate || 6||

asaṁskṛto bhaved bhāvo nahi loke sa vidyate|
kṛtakatvād vināśitvaṁ buddhajñāne kathaṁ bhavet|| 7||

anādinidhanaṁ śāntamityuvāca tathāgataḥ|
tatsutāśca mahābhāgā āhurjñānamasaṁskṛtam|| 8||

māyopamaṁ hi tatsarvaṁ pratibhāsaṁ nirucyate|
utpādaviratī na staḥ kathaṁ jñānaṁ [hi] tad bhavet|| 9||

(16)

cakṣurvijñāna[mārgaṁ] yat tad jñānena vikalpyate|
vikāritvaṁ prasajyeta buddhajñānasya nānyathā|| 10||

avikāraṁ tu tad jñānaṁ sarvabuddheḥ pradarśitam|
tasmānna yujyate vaktumekatvamiti niścayaḥ|| 11||

jñānasya pratibhāso'yaṁ na tad jñānaṁ prakalpyate|
pratibhāmanirodhena jñānaṁ kasmānnirudhyate|| 12||

tasmādasiddhamekatvaṁ tvadvācaiva suniścitam|
ekatvaṁ tu kimarthaṁ hi parikalpayase [vṛthā|| 13||

yuktyāgamaviruddhatvāt niṣphalatvācca sarvathā|
jñānaṁ tadeva sākāramityevaṁ nahi yujyate|| 14||

ākārād vyatirikte tu jñāne jñānaṁ na yujyate|
jñeye sati bhaved jñānaṁ na tu jñeye tiraskṛte|| 15||

ākārebhyaḥ pṛthagbhūtaṁ jñānaṁ ced yadi kalpyate|
ākārāśca pṛthagbhūtā jñānādeva nirāśrayāt|| 16||

jñānasyotpādakāle tu nākārāṇāṁ mamudbhavaḥ|
ākārāṇāṁ samutpāde jñānaṁ naivopapadyate|| 17||

yathā ghaṭasya niṣpattau na paṭasyodbhavo bhavet|
pṛthaktvādeva dharmāṇāmevaṁ loke pradṛśyate|| 18||

(17)

na hyajātena putreṇa putrī bhavitumarhati|
evaṁ nirāśraye jñāne sākāraṁ kathamiṣyate|| 19||

kimapekṣya bhaved jñānaṁ sākāraṁ yena tedbhavet|
sākārajñānamityeva ākārarahitaṁ na tu|| 20||

ākārarahite jñāne sākāratvaṁ kathaṁ bhavet|
ākāraiḥ sahitaṁ yat tu tat sākāraṁ prakalpate|| 21||

sarvākāravinirmuktaṁ buddhajñānaṁ kathaṁ bhavet||
ākāreṇa vinā'pīha sākāratvaṁ bhaved yadi|
buddhajñānaṁ vinā buddhaḥ kathaṁ tattvaṁ bhaviṣyati||22||

na tad jñānaṁ na sarvajñaḥ pṛthagjñāne vikalpate|
atha sākāratā jñāne siddhiṁ naivopapadyate|| 23||

ākāreṇa samāyuktaṁ sākāratvaṁ bhaved yadi|
na saṁyogatayā dṛṣṭaṁ buddhavat saṁpravarttake|| 24||

rūpiṇo nahi saṁyogā arūpeṇaiva sarvathā|
yathākāśena saṁyogāt na [ghaṭasyodbhavo bhavet]|| 25||

ākāreṇa ca yuktaṁ [hi] sākāratvaṁ bhaved yadi|
sāpekṣatvād vināśitvaṁ viṣāmagryaṁ bhaviṣyati|| 26||

pratītyasambhavaṁ yat tad buddhajñānaṁ bhavennahi|
saṁskṛtatvaṁ yathā jñāne sākāratvaṁ na sidhyati|| 27||

(18)

ākārajñānayoścaiva anyatvaṁ tu tayoryadi|
anyonyakaṁ mayoktaṁ ca kathaṁ jñānaṁ bhaviṣyati|| 28||

ākārāśca pṛthagjñānādityevaṁ yadi kalpate|
jñānādanyatayā teṣāmajñānatvaṁ prasajyate|| 29||

ākārebhyo yathā'nyattu nirākāramato bhavet|
tathā jñānaṁ nirākāraṁ kathamevaṁ na kalpate|| 30||

jñānasiddhau sākāranirākaraṇastṛtīyaḥ paricchedaḥ|

(19)

caturthaḥ paricchedaḥ|

pratiṣiddhaṁ tu sākāraṁ yathāyuktiprakalpitam|
nirākāraṁ bhavennaivaṁ yathā taducyate'dhunā|| 1||

nirākāramipi jñānaṁ bhaved yadi vikalpitam|
ākārairvigatatvāttu kimasau vetti sarvavit|| 2||

sarvajñatvaṁ na tasyāsti na jñānatvāt ca kalpanā|
jaḍatvaṁ ca prasajyeta sarvākāramapaśyataḥ|| 3||

ajaḍaṁ bodharūpaṁ tu nirākāramiti smṛtam|
vetti sarvantu yat satyamabhūtaṁ vettyasau katham|| 4||

sarvakalpavinirmuktān sarvadharmān nirātmakān|
evaṁ jānāti tad jñānamalīkaṁ vettyasau katham|| 5||

māyopamādidṛṣṭāntaiḥ sarvadharmān prabudhya taiḥ|
deśitaṁ sarvabuddhaiśca tatra tatra jagaddhitaiḥ|| 6||

māyādyā ye tu dṛṣṭāntā mithyākalpena kalpitāḥ|
na vidyante svabhāvena sa kathaṁ vetti sarvavit|| 7||

śaśaśṛṅgaṁ na tad vetti nāpi vandhyā sutaṁ tathā|
abhāvatvāt kathaṁ vetti nirākāramato bhavet|| 8||

māyodayo hi dṛṣṭāntā nirdiṣṭāḥ sasutairjinaiḥ||
abhāvaṁ kalpanāmātraṁ sarvathā nahi sidhyati|| 9||

(20)

dṛṣṭāntaireva te tulyā dharmāścet sarvathā smṛtāḥ|
bhaveyurna ca dṛṣṭāntāḥ sādhyatvāt sarvayatnataḥ|| 10||

puruṣe siṁhadṛṣṭānto yathā loke pravarttate|
śauryādiguṇasaṁyogāt na tu pucchādisambhavaiḥ||11||

tasmānna sarvathā'bhāvāḥ sarvabhāvāḥ svabhāvataḥ|
yuktyāgamānusāreṇa boddhavyaṁ puruṣottamaiḥ|| 12||

tasmāt tvayā yududdiṣṭaṁ bālollāpanagāminā|
na tadbhūtaṁ vadantyeva jagaduddharaṇodyamāḥ|| 13||

śaśaśṛṅgaṁ yathā'bhāvaṁ vandhyāyāḥ putravat tathā|
na kvacit sarvabhāvānāmabhāvo deśito jinaiḥ|| 14||

yadi rūpādayo bhāvā vidyante naiva sarvathā|
divyacakṣuḥ kathaṁ siddhaṁ buddhānāṁ karuṇātmanām|| 15||

divyaśrotrādayaḥ sarve na bhavanti tatastathā|
sarvajño hi tato na syādabhijñānāmabhāvataḥ|| 16||

nirākāreṇa jñānena buddhakāye susaṁyute|
sarvābhijñāḥ pravarttente sarvavittvaṁ kathaṁ nahi| 17||

cakṣurādibhirevaite rūpādyāyatanādayaḥ|
anubhāvyāḥ sacetaskairevaṁ loke pravarttate|| 18||

rūpādayo na santīti tvayaivoktaṁ punaḥ punaḥ|
abhāvena kathaṁ yogo bhavediti prakalpyate|| 19||

(21)

yadyabhāvena yogaḥ syād yuktaṁ vaktuṁ tvayedṛśam|
abhāvaḥ sarvathā yeṣāṁ tadyogaḥ kathamiṣyate|| 20||

ayoge'pi bhaved jñānaṁ praṇidhānavaśāt tathā|
karoti sarvasattvārthaṁ yathā vaineyabhājane|| 21||

nāsau kiñcid yadā vetti sattvārthaṁ kurute katham|
nāvedako hi sarvajño na kṛpā sattvasaṅgrahe|| 22||

praṇidhānena sattvārthaḥ cintāmaṇirivāparaḥ|
karotīti na tadbhaktyā pratibhāti satāmiha||23||

sarvasattvārthasaṁsiddhau niyatatvaṁ sadā yataḥ|
cintāmaṇirataḥ khyātaṁ jñānaṁ tadajaḍātmakam||24||

adṛṣṭe'pyakṛtaṁ yatra svakīyā jñānakalpanā|
sarvajño'haṁ jagatsvāmya pyabhūvamiti kiṁ nahi|| 25||

bodhicittaṁ samutpādya sarvasambhārasaṁvṛtaḥ|
mahotsāho mahāvīryo bhāvanācintanādibhiḥ|| 26||

saddharmaśravaṇādyaistu duḥkhe naiva prayojanam|
apūrvasyādayo nāsti sthitapūrvaṁ ca naśyati|| 27||

īdṛśaṁ yadi buddhatvaṁ vṛthā sarvamato'khilam|
bhayebhyo maraṇādibhyo mukto nārakapīḍanāt|| 28||

priyāpriyādiduḥkhaiśca rahitastvajaḍātmakaḥ|
sarvadharmasvabhāvajñaḥ sarvajño hi nirucyate|| 29||

(22)

svabhāvajñānasarvajña iti sambuddhadeśitaḥ|
sarvaṁ pratyakṣato vetti sarvajñastena kathyate|| 30||

[nihanti] nārakaṁ duḥkhaṁ saṁsāre'pi pravarttakam|
cakravarttyādisaukhyaṁ ca labhate nātra saṁśayaḥ|| 31||

jñānasiddhau nirākāranirākaraṇaścaturthaḥ paricchedaḥ|

(23)

pañcamaḥ paricchedaḥ|

evaṁ doṣasamūḍhatvāt nirākāramato na cet|
tato niścittatātattvamadhunā pratiṣidhyate|| 1||

kiñcinmūḍhatarāvasthaṁ jñānamicchanti mohinaḥ|
mūḍhabhāvanayā mūḍhaṁ prāpnuvantyeva durṇayāḥ|| 2||

hetunā sadṛśaṁ jñānaṁ phalaṁ loke tu yujyate|
kodravā nahi jāyante śālayaḥ kvacideva tu|| 3||

nirvikalpamato jñānaṁ nahi yuktaṁ vidhīyate|
jñānasya nirvikalpatvamanyathā nahi yujyate|| 4||

jñānasya nirvikalpatvaṁ satyamuktaṁ tathāgataiḥ|
tattvajñānasya mūḍhasya nirvikalpatvakalpanā||5||

jñānaṁ bauddhamanābhogaṁ nirvikalpamataḥ smṛtam|
sañcintya karuṇābhāvāt natu niścittatā bhavet|| 6||

nirvikalpatvamajñānaṁ kvacideva na deśitam|
nahi dharmāḥ parā vo'sti anyathā tattvagrāhiṇām|| 7||

sarvajñaḥ sarvadarśo ca sarvalokārthakārakaḥ|
tatra tatra jagannāthairdeśitaḥ karuṇātmabhiḥ|| 8||

(24)

nirvikalpanamātratvaṁ smaraṇaṁ kriyate yadi|
padānyetāni sarvāṇi smaryante tu kathaṁ nahi|| 9||

ubhayārthavihīnatvāt na jñānaṁ nāpi sarvavit|
pratiṣiddhamidaṁ tattvaṁ mithyājñānaṁ tu mohinām|| 10||

jñānasiddhau mūḍhabhāvanāniṣedhaḥ pañcamaḥ paricchedaḥ|

(25)

ṣaṣṭhaḥ paricchedaḥ|

nāśvāsaṁ nāpi praśvāsaṁ tattvaṁ bhavitumarhati|
tayormadhye bhavannāpi vāyustattvaṁ kathaṁ bhavet||1||

madhye na kiṁcidapyasti kathaṁ tattvaṁ bhaviṣyati|
vāyuryadi bhavettattvaṁ bhastrāpārśve bhaviṣyati|| 2||

preraṇe bhastrayā vāyoḥ tathaiva kṣepaṇe'pi ca
yathā kaścit dhamed bhastrāṁ tadvaddeho dhamenmanaḥ|| 3||

na vāyudhamakaḥ kaścit na vāyudhmāmakastathā|
kāyasya dhamakeneva bhastrāyā dhamakena ca|| 4||

na viśeṣaḥ tayordṛṣṭo yogibhiḥ tattvadarśibhiḥ|
nareṇa manasā tulyaṁ dhamakatvakriyāṁ prati|| 5||

bhrastrāyā vāyunā tulyaṁ śvāsapraśvāsavāyunā|
bhastrāvātaṁ yathā tattvaṁ dehavāyustathā bhavet|| 6||

dehavāyuḥ yadā tattvaṁ sarvadvāravinirgatam|
na tattvaṁ yujyate vaktu [māveśa]tvāt prabhaṁjanaḥ|| 7||

bhraṣṭa[mārgaga]mūḍhānāṁ mithyātattvaprabhāvinām|
na teṣāṁ sugatau janma gatirekaiva nārakī|| 8||

jñānasiddhau āśvāsapratiṣedhaḥ ṣaṣṭhaḥ|

(26)

saptamaḥ paricchedaḥ|

mukhaṁ dvīndriyajaṁ kecit tattvamāhurnarādhamāḥ|
[tattvaṁ] mahāsukhaṁ naiva pravadanti jinottamāḥ|| 1||

pratītyotpādasambhūtaṁ na tattvaṁ jāyate kvacit|
na tatsukhaṁ svabhāvena vidyate sarvadā yataḥ|| 2||

sarvatāthāgataṁ jñānaṁ svasaṁvedyasvabhāvakam|
sarvasaukhyāgrabhūtatvāt mahāsukhamiti smṛtam||3||

anityaṁ mahāsukhaṁ naiva sadā nityaṁ mahāsukham|
kacchakaṇḍūyanotpannaṁ kathaṁ mahāsukhaṁ nahi|| 4||

rāgatulyaṁ sukhaṁ nāsti tajjinebhyaḥ samādadan|
bhuñjīta sarvakāmāṁśca jugupsāṁ naiva kārayet||5||

yogabhadraṣu sarveṣu vajrasattvena deśitam|
yogināṁ cittasaukhyārthaṁ na tattvaṁ paramārthataḥ|| 6||

jñānasiddhau mahāsukhaprativarṇikāpratiṣedhaḥ saptamaḥ|

(27)

aṣṭamaḥ paricchedaḥ|

[svasaṁ]vedyaṁ pratiṣiddhaṁ samyagjñānamato nahi|
mithyā tattvāni sarvāṇi kalpitāni sumohinām||1||

svabuddherna niṣedhyāni anyānyapi vicakṣaṇaiḥ|
samyak tattvaṁ yathā labhyaṁ tadidānīṁ prakathyate||2||

parītabuddhayaḥ sattvā alpapuṇyālpavīryyakāḥ|
kathaṁ te prāpnuyurjñānaṁ sarvatāthāgataṁ param||3||

[a]nukramaṁ vravīmyeṣa sarvabuddhaistu deśitam|
jānunī saṁpratiṣṭhāpya dharaṇyāṁ supratiṣṭhitaḥ|| 4||

vadedevaṁ tataḥ śrāddho ṛjukāyaḥ kṛtāñjaliḥ|
saṁbuddhāḥ śāsano loke bhaviṣyanto'pyanāgatāḥ|| 5||

varttamānā gatāścaiva saddharmmapratideśakāḥ|
sarvabuddhānahaṁ vande etān tattvapradeśakān||6||

ahaṁ niryyātayāmyeṣa  pūjopasthānakarmmaṇi|
ātmānaṁ sarvabuddhānāṁ pratigṛhṇantu nāyakāḥ||7||

sarvapūjāviśeṣaistu pūja[yaṁśca] jagadgurūn|
ākāśadhātuparyyantai[rā] sumeruparigrahaiḥ||8||

dharmmadhātusamutpannairarcitairvi[vi]dhairvaraiḥ|
atītānāgataiḥ sarvairvajrasattvavikurvitaiḥ|| 9||

(28)

samutpannāni pāpāni sarvāṇyapi [sa tattva ]vit|
pratideśya samādadhyādakarasambaraṁ punaḥ|| 10||

yat puṇyaṁ sarvabuddhānāṁ tatsutānāṁ ca dhīmatām|
śrāvakasaṅghabuddhānāṁ yaccānyat sarvadehinām||11||

anumode tathā puṇyaṁ sarvajanmasu yatkṛtam|
svakīyaṁ parakīyaṁ ca saṁhṛṣṭena tu cetasā|| 12||

dharmmatattvarathārūḍhā daśādiksarvataḥ sthitāḥ|
dharmmadyotanadakṣāstu mahākāruṇyacetasaḥ|
prakāśayantu te dharmmā vijñaptiṁ tatkaromyaham|| 13||

kṛtāñjalipuṭo bhūtvā'sau nirvāntu kadā katham|
bhaveyuḥ prāṇino buddhāḥ sarve yāvat pratiṣṭhitāḥ|| 14||

tāvat tiṣṭhantu te nāthāḥ sarvasattvārthakārakāḥ|
kāyavāṅmanamaṁ puṇyaṁ kṛtaṁ kāritameva vā|| 15||

yaccānumoditaṁ kiṁcit tena loko'stu sarvavit|
trikālaṁ tu yathāśaktyā puṣpādibhiḥ prapūjya ca|| 16||

maṇḍalaṁ sarvabuddhebhyo vajrasattvebhya eva ca|
kṛtvā pañcāmṛtaṁ miśraṁ amiśraṁ vā prakalpitam|| 17||

sarvakalpavimuktātmā gṛhṇīyāt samayādikam|
tattvasaṁgrahatantrādau sthitaṁ samayasambaram|| 18||

praṇinaśca [na] te ghātyā adattaṁ naiva cāharet|
nācaret kāmamithyā vā mṛṣāṁ naiva hi bhāṣayet||19||

(29)

sarvānarthasya mūlatvāt madyapānaṁ vivarjayet|
paiśunyamatha pāruṣyaṁ sambhinnālāpabhāṣaṇam||20||

avidyāsattvavidveṣamithyādṛṣṭiṁ ca sarvathā|
utpādayāmyapūrvaṁ tu sthāpayiṣyāmi nirvṛtau|| 21||

samādhyaṅgaṁ tataḥ sarvaṁ gṛhṇīyāt saṁvaraṁ param|
bodhicittaṁ tathotpādyaṁ sarvapuṇyamahodayam||22||

sarvasattvaṁ mahāntaṁ ca sthāpya sarvajñabhūmiṣu|
sarvaduḥkhaharo hyeṣāṁ bhaveyaṁ karuṇātmakaḥ|| 23||

sarvasampatpradātā ca bodhimārgopadeśakaḥ|
samyak cittaṁ samutpādyaṁ samatvaṁ sarvadehiṣu|| 24||

bodhicittamidaṁ jñeyaṁ anyathā vitathaṁ bhavet|
bodhicittaṁ na tannāma viṣamatvaṁ yadā sthitam|| 25||

na tadutpadyate jñānaṁ ādimadhyāntavarjjitam|
nādhiṣṭhānaṁ prakurvanti sarvadā sarvavajriṇaḥ|| 26||

sarvadevādayaścāpi na taṁ rakṣanti vidviṣaḥ|
tasmādupāyavidyogī sarvasattvaikabāndhavaḥ||27||

avisaṁvā[da]kaṁ cittaṁ samutpādya tato dṛḍham|
kṛtenānena sambuddhāḥ tuṣṭāḥ sarvakṛtātmakāḥ|| 28||

adhiṣṭhānaṁ prakurvanti mahābalaparākramāḥ|
māravighnāpadaścāpi nāvatāragaveṣakāḥ|| 29||

vajrapāṇyādayo hṛṣṭā rakṣāṁ kurvanti nityaśaḥ|
sarvapāpaviśuddhiṁ ca labhate'sau narottamaḥ|| 30||

(30)

sarvapuṇyodayaścāpi samyakjñānodayaṁ bhavet|
anyathā nahi tattvānāṁ u[da]yaṁ sarvathā bhavet|| 31||

tasmādādau vidhānajño ya[d]jñānaṁ prāptumicchati|
janmanīhaiva siddhyartha [ni]rupadravatāṁ prati|| 32||

sarvavighnavināśārthaṁ āyurārogyavarddhanam|
karaṇīyamato'vaśyaṁ yoginā phalakāṅkṣiṇā||33||

nānātantreṣu nirddiṣṭaṁ kṛpayā buddhavajriṇā|
eṣa mārgasthito yogī śuklapakṣe yathā śaśī|
vṛddhikramaṁ mamāyāti kṣayaṁ na tu kadācana|| 34||

hīnavīryyo yadā kaścit buddhatvaṁ prāpnuyānnahi|
cakravarttisukhaṁ rājyaṁ sarvajanmasu kārayet||35||

yatpuṇyaṁ sarvabuddhānāṁ sarvadikkālabhāvinām|
tattasya romakūpāgre pravadanti jinottamāḥ||36||

jñānasiddhau puṇyajñānasambhāraprāptyupāyo'ṣṭamaḥ||

(31)

navamaḥ paricchedaḥ|

kathaṁ deśanayā pāpaṁ kṣayaṁ gacchet sudāruṇam|
anumodanayā puṇyaṁ kathaṁ sambhujyate tathā|| 1||

praṇāntapātakādīni karttavyaṁ kvacidavravīt|
kvacinneti ca tantreṣu kathaṁ tanna virudhyate||2||

pañcāmṛtādikaṁ sarvaṁ abhakṣyaṁ gamyate tathā|
apriyādīnyanekāni kathaṁ taistu śubhodayaḥ||3||

yathākramaṁ vravīmyeṣāṁ tantre tantre nidarśitam|
mandadhījanabodhārthaṁ sarvabuddhaiḥ [savajribhiḥ]||4||

yatkarmma kriyate kiñcit kāyavāṅmanasaiḥ kriyā|
caturtho vidyate nānyasteṣāmevaṁ vicāryyate|| 5|

cittena ca vinā kāyaḥ kiñcit karttuṁ bhavet kṣamaḥ|
vacanaṁ ca vinā tena bhavet naiva kadācana|| 6||

kāye vākkarmmaṇī tasmādbhavatāṁ mānase'dvayam|
cittenaiva jagat sarvaṁ kriyate yat śubhāśubham|| 7||

hitārthaṁ yadbhavetkarmma sarvaṁ saccaritaṁ bhavet|
viparyyayādapuṇyaṁ tat pravadanti jinottamāḥ|| 8||

(32)

cittenaiva tu tatsarvaṁ kriyate yat śubhāśubham|
cittenaiva bhavennāśa ityuvāca jagadguruḥ|| 9||

sattvāpakāraniṣpannaṁ yatpāpaṁ parikīrttitam|
hitacittaṁ samutpādya saṁbhraṣṭaḥ pratideśayet|| 10||

utsāhena kṛtaṁ pūrvaṁ apakārasamanvitam|
pratipakṣāt bhavennāśo yasmāt tenaiva tatkṛtam||11||

ghaṭamutpādya yaḥ kaścit bhanattyeva tu tat svayam|
tathā pāpaṁ samutpannaṁ nāśayet ātmanā sa tu|| 12||

deśayiṣyāmyahaṁ paścāditi mūḍhaḥ karoti cet|
na cāsya deśanā yuktā na pāpaṁ tasya naśyati|| 13||

tathā puṇyavināśaśca tadvadeva bhavatyapi|
kṛte puṇye'pi chi[dra]tvād bhavennāśaṁ na saṁśayaḥ|| 14||

dadataśca yadā citte dātumicchā na varttate|
datte'pi ca na tatpuṇyaṁ prabhaviṣyati kasyacit||15||

sarveṣāmadhikaṁ sthānaṁ yatra sarvaṁ vinaśyati|
kalpakoṭisahasraiśca samupāttaṁ śubhaṁ mahat|| 16||

utpannabodhicittasya puṇyasambhārasañcayaḥ|
kalpakoṭiśatopāttaḥ kṣaṇādeva vinaśyati|| 17||

tādṛśe'pratighe nānyad dvitī[yama]nuje'priye|
tato'pi rakṣyamatyarthaṁ evamuktaṁ tathāgataiḥ|| 18||

tasmin svalpopakāreṇa puṇyarāśirmahān bhavet|
sarveṣāṁ sarvasaukhyānāṁ ākaratvādguṇodadhau|| 19||

(33)

kecinmūḍhatarā bālā yuktyāgama[ma]paśyakāḥ|
kalpenaiva bhavet pāpaṁ ityā[huḥ svā]tmanāśakāḥ||20||

kalpanārahito yogī yadi pāpairna lipyate|
dveṣādyutpādahetau tu vikāritvaṁ na yujyate||21||

vihāya laukikīṁ vṛttimanyathā tu bhavenna kim|
śirasā gamanaṁ yuktaṁ tathā pāṣāṇabhakṣaṇam|| 22||

śītavātapipāsādivādhā tasya na yujyate|
ākrośādyapakāraiśca na khedamupasaṁharet|| 23||

svakīyaṁ yadi karttavyaṁ lobhādyākṛṣṭaduḥstyajam|
nirvikalpaṁ prakalpyeta na tathānyatra tadbhavet|| 24||

anutpādakṣayaṁ naiva pāpānāṁ karmmaṇāmiha|
krodhāhaṅkārayogācca na pāpaṁ pariśudhyate||25||

devataiva ca tat sarvaṁ karotīti prakalpyate|
utpādāt pūrvamevāsau kārayet na kathaṁ bhṛśam||26||

devataiva karotīti mithyeyaṁ parikalpanā|
yasmāt lobhābhibhūtānāṁ kriyeyaṁ kartumicchatām||27||

anumodādisarvāṇi cintāyatnāni sarvataḥ|
puṇyasaṁbhārayuktāni jñātavyānīha dhīdhanaiḥ|| 28||

kāyavāksahitaṁ hīnaṁ tatpuṇyaṁ sama[ma]stu te|
ekānta tīvracittasya yatpuṇyaṁ buddhavarṇitam||29||

(34)

prāṇihiṁsādi yat karmma lobhādyāviṣṭacetasaḥ|
kuśalaṁ na bhavet sarvaṁ puṇyaṁ tu karuṇotthitam|| 30||

yat karmma parahitārthaṁ kriyate tu kṛpātmakaiḥ|
tat sarvaṁ puṇyamityāhurjagadāśāprapūrakaiḥ||31||

niṣedhyamapyanujñātaṁ kṛpayā dṛḍhacetasām|
na tu svārthābhibhūtānāṁ karuṇāhīnadehinām||32||

kṛte puṇye'pyanarthāya kasyaciddviṣyato janam|
pāpameva bhavet tasya pravadanti jinottamāḥ||33||

uktaṁ ca-

kalpāntādbodhisattvānāṁ śubhaṁ vā yadi vā'śubham|
sarvaṁ kalyāṇatāmeti teṣāṁ vaśyaṁ yato manaḥ|| 34||

iti jñānasiddhau pāpapuṇyotpādavināśaparijñānanirddeśo
navamaḥ||

(35)

daśamaḥ paricchedaḥ|

pañcāmṛtamavighnārthaṁ cittasaṁsādhanāparaiḥ|
ajādimāṁsamapyevaṁ yogināṁ vihitaṁ jinaiḥ|| 1||

sarve'pi prāṇinaḥ sarvaṁ bhakṣanto'pi na buddhakāḥ|
na prajānanti te muḍhāścintā vigatabuddhayaḥ||2||

sarvasampūrṇabhūtatvāt kāyastāvat śucirna hi|
tatsrāvabhakṣakaḥ kaścit sarvaṁ bhuktaṁ na tena kim||3||

kṣīrādikaṁ tathā sarvaṁ sarveṣāmeva [de]hinām|
bhakṣyābhakṣyaprasiddhānāṁ śucitvaṁ naiva sidhyati||4||

bhaktavastūni sarvāṇi aśucīni prabudhyate|
yasmājjalena saṁbhūtiḥ teṣāmiha pradṛśyate|| 5||

vṛṣṭirjalasamuhena sarvaṁ prakṣālya kutsitam|
sarvasasyāni niṣpādya samudrādīn viśet tataḥ|| 6||

tajjairaśucibhiryuktairnāgairutthāpitaṁ jalam|
punarvṛṣṭeḥ tathā sarvasasyaṁ sampādayejjalam||7||

puṣkariṇyādike tadvat sarveṣāṁ sarva[kṣā]lanam|
śucyaśucyādikaṁ tasmāt sarvaṁ naivātra vidyate|| 8||

(36)

śucitvaṁ asti cet kiñcit aśucitvaṁ bhaviṣyati|
śucyabhāvādaśucitvaṁ sarvathā nopalabhyate||9||

āpekṣikatvamanyonyapārāpārakavadyathā|
laukikī kalpanaivaiṣā śucyaśucyādikalpanā||10||

jñānasiddhau śucyaśucyakalpanāvivikto nāma daśamaḥ||

(37)

ekādaśaḥ paricchedaḥ|

agamyāgamanasyāpi vicāraḥ kriyate'dhunā|
yogināṁ samanujñātaṁ aviruddhaṁ yathā tu tat||1||

sarveṣāṁ dehināmeva astyevotpādanāśanam|
tacca karmmavaśādeva sarvadā tribhave [bhave]t||2||

mātā pitā ca putraḥ syāt putro mātā pitā bhavet|
ceṭī bhāryyāpi tau syātāṁ bhāryyā mātā bhavatyapi||3||

evamādīni rūpāṇi anekāni suvistaraiḥ|
bhave'nādau bhavantīti vajrasattvena deśitam||4||

evaṁ sthite tu saṁsāre dīrghakālapravarttite|
mātā pitā na [bhū]to hi kaścit sattvo na vidyate||5||

duhitrādyāḥ tathā sarvāḥ prāgbhūtāḥ santi ṣaḍgatau|
tasmācca mahatī kāryyā kṛpetyuktā jinottamaiḥ||6||

ata eva tu te nāthāḥ vajrasattvādayo varāḥ|
duhitrādiranujñā[to] yogināṁ cittasādhane||7||

kalpanājalapūrṇasya saṁsārasya mahodadheḥ|
vajrayānaṁ samāruhya ko vā pāraṁ gamiṣyati||8||

mithyājñānāni sarvāṇi yuktyāgamasamāyutaiḥ|
niṣiddhāni kramāt tāni sarvadoṣākarāṇi hi| 9||

jñānasiddhau gamyāgamyarahito nāma ekādaśaḥ||

(38)

dvādaśaḥ paricchedaḥ|

vajrajñānaprabodhārthaṁ yuktirapyucyate'dhunā|
yogatantroktadṛṣṭāntairhitāyottamayoginām||1||

rūpakāyādayo bhāvāstattvarūpaṁ yathā na te|
tadvāraṇaṁ kṛtaṁ pūrvaṁ arūpatvaṁ tataḥ sthitam||2||

sarvadoṣaprasaṅgitvād bhāvastattvaṁ bhavet nahi|
abhāvo'pi na tat tattvaṁ sarvaduḥkhākaraṁ param||3||

bhāvābhāvau na tau tattvaṁ bhavet tābhyāṁ vivarjitam|
na deśasthamato yuktaṁ sarvajño na bhavet tadā|| 4||

vyāpitvaṁ vajrakāyatvaṁ avikāritvaṁ eva ca|
sarvajñatvamataḥ siddhiṁ samyagjñānasya yuktitaḥ|| 5||

rūpiṇo nahi vyāpitvaṁ vajrakāyamato nahi|
avikāryyaṁ na tasyāsti na sarvajño bhaviṣyati|| 6||

kramāt jānāti yaḥ kaścit sarvaṁ nāsau prabuddhyate|
jñeyānāmapramāṇatvānnāsau sarvajña iṣyate|| 7||

kalpakoṭisahasreṇa nāsau jñātuṁ bhavet kṣamaḥ|
ekasminneva digbhāge yat jñeyaṁ parikīrttitam||8||

utpadya cet bhavennāśaḥ tasmādutpādyate nahi|
susthitaṁ caiva jñānaṁ tat bhramamātravināśanam|| 9||

gatāgataṁ bhavedyasya [susthitatvaṁ ] na vidyate|
calatvādekadeśasthānnāśastasya prayujyate||10||

(39)

avarṇyo yo bhaveddharmmaḥ kastaṁ nāśayituṁ kṣamaḥ|
śastrodakaviṣāgnīnāṁ buddho jāto bhavet na tu|| 11||

sarvākārapratiṣṭhātmā niścalo gaganopamaḥ|
asaṁkliṣṭo'vikāraśca sarvathā sarvakālikaḥ||12||

asārvakāliko yastu na sarvajño bhavet sa tu|
tasmāt sarvaprakālaṁ tu bhavitavyaṁ iti smṛtam|| 13||

sthitamevaṁ mahājñānaṁ sarveṣāmeva dehinām|
na prajñānanti muḍhāste bālā mohapaṭāvṛtāḥ|| 14||

loṣṭaśca dhāvati kṣipto nāsau prakṣepakastathā|
evaṁ cittena yaddhāvyaṁ taddhāvati na citta[kam] ||15||

cittena bhāsyate yattat tadeva tu nirīkṣyate|
idaṁ tat kīdṛśaṁ cittamiti cintā na varttate|| 16||

jñānasiddhau tattvasthāpanaṁ nāma dvādaśaḥ||

(40)

trayodaśaḥ paricchedaḥ|

eṣa mūḍhataro loko mokṣārthamātmaniścaye|
prapāte'pi kṣipatyeva parjanyena pracoditaḥ||1||

īdṛśī dṛśyate ceṣṭā bahūnāmapi dehinām|
santyajya sugatau [yānamanyat mārgaṁ samāśrayet]|| 2||

tadvidho manujaḥ kaścit mārgamanyat pradarśayet|
pṛcchako'pi na taṁ pṛcchet [yena tattvaṁ] prabudhyate|| 3||

yadi mohavaśāt mārgaṁ darśayantamapaśyakam|
na śivaṁ labhyate gantustanmārgeṇaiva yāyinaḥ|| 4||

svayamapaśyako mārgaṁ kathamanyaṁ nayedbhṛśam|
dvāveva yadi gacchetāṁ tayorduḥkhaṁ na saṁśayaḥ|| 5||

aṭavyāṁ saṁpraviṣṭasya jātyandhasya yathā kriyā|
dvitīyaṁ tādṛśaṁ kaścit kathaṁ grāmaṁ praveśayet||6||

evaṁ jātyandhabhūtāste samyag jñānamapaśyakāḥ|
aśaktāstatpadaṁ prāptuṁ kathamanyaṁ tu prāpayet||7||

tasmāt parīkṣya karttavyaṁ gurūṇāṁ paryyupāsanam|
śiṣyairbhaktisamāyuktaiḥ pravadanti jinottamāḥ|| 8||

ratnatrayeṣu buddhātmā kṛpāvān sarvajantuṣu|
tyāgādisaṁyato dhīraḥ sarvapuṇyamahodayaḥ||9||

(41)

bodhicittasamutpannaḥ prasanno guṇavān sudhīḥ|
akrodhano mahotsāhī dharmmagambhīraniścayaḥ|| 10||

sayuktikaṁ dharmmadānaṁ nirā[bhā]saṁ sadā matam|
alpecchatā sadā tasya sambhāradvayasambhṛtaḥ|| 11||

gurureṣa samākhyātaḥ sarvabuddhaiḥ savajribhiḥ|
sa eva sarvasattvānāṁ śāsako lokanāyakaḥ|| 12||

anye ca guravaḥ khyātā mithyājñānābhimāninaḥ|
lobhādyarthaṁ prakurvanti dharmma[sya] deśanāṁ parām||13||

pāpamitraśca te bālāḥ sattvanāśe pratiṣṭhitāḥ|
mārapākṣikagotrāste'parātmāno vināśakāḥ||14||

varjanīyā[śca te ] sattvā na teṣāṁ paryyupāsanam|
na teṣāṁ pratighaṁ kuryyāt na te [pūjya]tarā bhavet|| 15||

śrāvakaiḥ saha saṁvāso [yathā] neṣṭaṁ tathāgataiḥ|
tathaivaivaṁvidhaiḥ sārddhaṁ na saṁvāso viśiṣyate|| 16||

pūrvāktalakṣaṇaiḥ tasmāt ācāryyo hi vidhīyate|
śiṣyasya lakṣaṇaṁ caivaṁ kathyate sa yathā bhavet|| 17||

jñānasiddhau gurulakṣaṇanirddeśaḥ trayodaśaḥ||

(42)

caturdaśaḥ paricchedaḥ|

naukārūḍho yathā kaścit karṇadhāraḥ suśikṣitaḥ|
pāraṁ mahodadheryāti nānyathā pārago bhavet||1||

tadvad gurau triratne ca bodhicitte ca bhaktimān|
karuṇā ca tathā loke nauriyaṁ saṁprakīrttitā|2||

guruḥ karṇadharo vidvān naukā dharmmaḥ prakāśitaḥ|
saṁsārapāragantṝṇāṁ vajrasattvena deśitam|| 3||

karṇadhāraṁ vinā naukā pāraṁ prāptuṁ kṣamā nahi|
guṇaiḥ sarvaiḥ prapūrṇopi nā gururbhavapāragaḥ|| 4||

tasmādevāsya caivedaṁ kāryaṁ sarvaṁ dṛḍhavrataiḥ|
sadā pūjārato yogī bāhyairādhyātmikaistathā|| 5||

vandanādikriyāḥ sarvāḥ prakuryyāt sarvakālikāḥ|
śraddhā prajñāsamāyuktaḥ kṛpārdraḥ sarvajantuṣu|| 6||

akrodhano'visaṁvādī tyāgādiguṇa[bhūṣitaḥ]|
suvīryyaśca mahotsāhī gurorājñāṁ sadā karaḥ|| 7||

ājñaptaśca svayaṁ buddhā pari[caryā]dikaṁ [care]t|
yathāśakti yathālābhaṁ bhojyabhaktādikaṁ tathā|| 8||

(43)

tiraskāre kṛte'pyevaṁ svayameva na durmmanāḥ|
śiṣyaḥ sarvaguṇopeto yuktyāgamaparīkṣakaḥ|| 9||

aparīkṣakajātīyaḥ pṛcchet parahitañca yaḥ|
śiṣyo ca bhavituṁ śakto buddhairevaṁ pradarśyate|| 10||

mṛtpiṇḍo hi yathā bālaiḥ kṣipyate yatra tatra vai|
tadvat paravaśaḥ kaścit [sa śiṣyatvasya] bhājanam|| 11||

jñānasiddhau śiṣyalakṣaṇaparicchedaḥ caturddaśaḥ||

(44)

pañcadaśaḥ paricchedaḥ|

samyaktattvaṁ yathābhūtaṁ pūrvvamuktaṁ sayuktikam|
sarvatantre sthitaṁ tattvaṁ tebhyaḥ kiñcinnigadyate|| 1||

coraśabdo [yathā] loke bhakṣyārthaṁ pratipādayet|
keṣāñcit coramevāhuḥ tantre'pyevaṁ padāstathā||2||

tairevākṣaranirddeśairmṛdumadhyādhimātrakaiḥ|
dharmmaśraddhocyate buddhaiḥ sattvānugrahakārakaiḥ|| 3||

kevalaṁ tattvamevāhuḥ kaścit [madhyendriya] stathā|
kaścit mṛdvindriyaḥ karma kevalaṁ vakti nānyathā||4||

śrīsamājottare deśitam-
anādinidhanaṁ śāntaṁ bhāvābhāvākṣayaṁ vibhum|
śūnyatākaruṇābhinnaṁ bodhicittamiti smṛtam|| 5||

anādinidhanamiti utpādavināśābhāvam| anena
vyāpitvaṁ avikāritvaṁ sārvakālikatvaṁ ca kathitam|
deśastharūpivikārikālāntarikānāṁ vināśitvāt| arū-
pitve'pi deśastho yadi syāt vināśyeva bhavati| yathā
kastūrīkādīnāṁ sugandhaṁ arūpyapi deśasthatvāt kastūrī-

(45)

kādīnāṁ tadvāsitadravyasya vā'bhāve vināśi syādvikāri
ca| śāntamiti sarvakleśānāmāgantukatvāt prakṛtiśāntam|
pūrvoktaguṇayuktatvā[ttadeva] bhāvābhāvākṣayam| vibhuṁ prabhuṁ
svāmī sarveṣāṁ laukikalokottarārthasampādakatvāt| śūnyatā-
karuṇābhinnaṁ iti| sarvadharmmaniḥsvabhāvatayā sarvatathāgata-
jñānaparijñānaṁ śunyatā [tayā] karuṇayā vā abhinnamekī-
bhūtaṁ yat cittam| karuṇā nāma sarvasattvān asminneva
jñānarāje pratiṣṭhāpayiṣyāmi, sarvasukhopadhānaiśca pari-
vārayiṣyāmīti samyagāśayaḥ| etaduktaṁ bhavati-
sarvadharmmasvabhāvajño yogī sarvatathāgataiḥ|

saha anyonyavyāpakabhāvena sadā sthito buddhakṛtyakaraḥ
sarvasattveṣu mahākaruṇāpramāṇānugataṁ bodhicittaṁ vajra ityarthaḥ|

anena bhāvanāpyevaṁ karttavyeti nidarśitam| bodhi-
cittamiti smṛtamiti aśeṣayogatantreṣvevaṁ abhiprāpayati|
ādikarmmikādīnāṁ tu bodhicittaṁ sarvasattvānanuttarāyāṁ
samyaksambodhau pratiṣṭhāpayāmīti cittamātram| punastatraiva
deśitam-
samājaṁ mīlanaṁ proktaṁ sarvabuddhābhidhānakam||6||

arūpiṇām anādinidhanatvāsambhavāddharmmakāyā eva
buddhāḥ| teṣāṁ mīlanaṁ sarvatathāgatajñānavajradharatvameva
nirddiṣṭamanyathā rūpakāyena yadi mīlanaṁ syāt paramāṇu-
pramāṇādi sarvatathāgatānāṁ mīlane ākāśamapi

(46)

prapūryyādhikatarā bhaveyuḥ| sarvaśabdasya niravaśeṣatvāt
cittānāmalpānāṁ mīlanaṁ yujyate| punastatraiva tathā
utpannakramāṇāṁ akṣataṁ samyag jñānam| evaṁ ca tatraiva
prakāśitam-
dhyāyanti ye'muṁ suviśuddhamanādibhāvamityādi|
prathamapaṭale'pi-
athāyaṁ sarvākāśadhātuḥ sarvatathāgatavajramayasaṁsthito'bhūt|
punaḥ-
anutpanneṣu dharmmeṣu na bhāvo na ca bhāvanā|
ākāśavadayogena iti bhāvaḥ pragīyate|| 7||

punaḥ-

prakṛtiprabhāsvarā dharmmā ādiśuddhā nabhaḥsamāḥ|
bodhinā'bhisama[yamidaṁ] bodhinayaṁ dṛḍham||8||

navame paṭale-
kramaśotpattikaṁ caiva kramaśotpannakastathā|

tadyathā- api nāma kulaputrā ākāśaḥ sarvatrānugataḥ|
ākāśānugatāni sarvadharmmāṇi, tāni na kāmadhātu-
sthitāni nārupadhātusthitāni na caturmmahābhūtasthitāni|
evameva kulaputrāḥ sarvadharmmā anugantavyāḥ| imamarthaṁ ca
maṁvijñāya tathāgatāḥ sarvasattvānāṁ cāśrayaṁ vijñāpayanta
evaṁ dharmmaṁ deśayanti| evameva kulaputrā ākāśavada-
niruktāste tathāgatasamayā anugantavyāḥ| tadyathā - api

(47)

nāma kulaputrāḥ kāṇḍaṁ ca mathanīyaṁ ca puruṣahastavyāyā-
ma[ñca] pratītya dhūmaḥ prādurbhavati agnimabhinirvarttayati| sa
cāgnirna kāṇḍe sthito na mathanīyasthito na puruṣahasta-
vyāyāmasthitaḥ| evameva kulaputrāḥ sarvatathāgatavajrasamayā
anugantavyāḥ gamanāgamanādyairiti|
daśame paṭale-
kāyavākcittavajrāṇāṁ kāyavākcittabhāvanam|
nirvikalpanirālambasamatā na kvacit sthitam|| 9||
dvādaśe paṭale-
khatulyasamayabhūteṣu nirvikalpasvabhāviṣu|
svabhāvaśuddhadharmmeṣu nāṭako'yaṁ prabhāvyate|| 10||

ṣoḍaśe paṭale-
pātanaṁ vajrasūtrasya rajaso'pi nipātanam|
na kāryyaṁ mantratattvena kārayet nāpi durllabhāḥ|| 11||

maṇḍalasūtrasvarajaḥpātanādikaṁ ca na kuryyāt| mantra-
tattveneti manaḥsantrāṇabhūtatvāt mantrajñānaṁ samyagjñānaṁ
nidarśitaṁ ityarthaḥ| yadyevaṁ mohāt karoti cet bodhi-
rduṣkaro bhavatīti| maṇḍalenādikarmmikasattvakṛpākaruṇā-
buddhatvaṁ vajradha[ratvaṁ] ca durlabhaṁ bhavatītyarthaḥ| tasmāt samyag-
jñānābhiyuktena mahāyoginā maṇḍalalikhanapraveśābhi-
ṣekādikaṁ niṣiddhaṁ iti|

(48)

locanā vajrasattvānāṁ dīpyamānā svabhāvataḥ|
jñānaṁ tāthāgataṁ śuddhaṁ tadvairocanamucyate|| 12||

sarvāśiṣṭajanaiḥ jñānaṁ mithyāgurujanairapi|
aprakampyasvabhāvatvāt akṣobhyo'sau prakathyate|| 13||

ratnāni prabhavatnyeva buddhādi niyato dhruvam|
jñānasattvārthayuktaṁ tad ratnasambhavamucyate|| 14||

apratiṣṭhitanirvāṇaṁ aliptaṁ bhavanirvṛtau|
asaṁkhyaguṇasaṁyogāt amitābhaḥ sa ucyate|| 15||

sarvasattvārthakāryyāṇāṁ prasādhakatamaḥ svayam|
avandhyaṁ tat mahājñānaṁ amoghasiddhirucyate|| 16||

sūkṣmamaudārikaṁ rūpaṁ traikālyaparibhāvitam|
dṛśyate sarvakṣetrasthaṁ locanā tena kathyate|| 17||

sarvatāthāgataṁ jñānamātmīyaṁ māmakaṁ yataḥ|
anyonyavyāpakādeva māmakī tena tat smṛtam|| 18||

sarvadoṣaharaṁ jñānaṁ sarvatāthāgataṁ param|
maṇḍalavāsinī khyātā sarvasaṁśodhanodyatam|| 19||

mahākaruṇayā nityaṁ jagaduddharaṇāśayam|
sattvottāraṇadakṣatvāt tārājñānaṁ prakāśitam|| 20||

dhātubhūtān pṛthivyādīn buddhajñānopabhoginām|
locanādyāstu kīrttyante sarvakāmopabhoginām|| 21||

(49)

maraṇādibha[yānmu]ktaṁ sarvatāthāgataṁ param|
pra[kṛ]ṣṭaṁ damanajñānaṁ tato yamāntakaḥ smṛtaḥ||22||

mithyājñānaṁ [nivā]ryyāśu mūḍhasattvaprakāśitam|
samyak jñānapratiṣṭhātmayogāt prajñāntakaḥ smṛtaḥ|| 23||

jagadāhlādanaṁ sarvannātigṛhṇan vicārayan|
bhaveṣṭaliptasambodhiṁ tena padmāntakaḥ smṛtaḥ||24||

vighnādibhirvimuktātmā jñānaṁ sarvārthasādhakam|
sarvabuddhamayaṁ siddhaṁ tena vighnāntakaḥ smṛtaḥ|| 25||

jñānajñeyaṁ vinā na syāt samāpattirataḥ smṛtā|
tribhavābhimukhaṁ jñānaṁ rāgāditrayasādhanam||26||

sarvabuddhamayaṁ śuddhaṁ trimukhaṁ tat prakīrttitam|
suviśuddhasya sadbhāvāt śuklavarṇaṁ prakāśitam|| 27||

sarvadā [nānu]pītatvaṁ raktaṁ kāruṇyavat sadā|
ratnatrayopakārādi kartturdamanamucyate|| 28||

jñānaṁ tat kṛṣṇamityāhurjagadarthakaraṁ param|
nānopāyavicitratvāt śyāmavarṇaṁ prakāśitam|| 29||

rūpādyāyatanādīni prabhujyante svayaṁ yataḥ|
ṣaḍbhujaṁ kathyate tena jñānaṁ bauddhaṁ tathāgataiḥ|| 30||

bodhicittaṁ bhaved vajraṁ prajñā ghaṇṭā vidhīyate|
cakraṁ ajñānacchedācca ratnaṁ tu durllabhādapi|| 31||

(50)

bhavadoṣairaliptatvāt jñānaṁ tat padmamucyate|
khaḍgaḥ kleśārisaṁcchedāt utpalaṁ plavanāt tataḥ||32||

saṁsārajalanimagnairyasmāt jñānaṁ na jñāyate|
buddhānugānāṁ sattvānāṁ tāḍanānmudgaraṁ smṛtam||33||

daṇḍena śāsanāddaṇḍajñānaṁ tat sattvaśāsakam|
anyonyavyāpakābhedā[t] viśvavajramiti smṛtam|| 34||

evam mayā śrutamekasmin samaye bhagavān sarvatathāgata-
kāyavākcittahṛdayavajrayoṣidbhageṣu vijahāra ekasminneva
kāle| bhagavānaiśvaryyādiguṇayuktatvāt| hṛdayaṁ jñānaṁ tadeva
vajrayoṣit abhedyaprajñāsvabhāvatvāt, tadeva bhagaṁ sarva-
kleśabhañjanāt, teṣu sarvatathāgatakāyavākcittahṛdayavajra-
yoṣidbhageṣu vijahāra|

etaduktaṁ bhavati- sarvatathāgatajñāneṣu anyonyavyāpya-
vyāpakabhūteṣu yogino jñānaṁ tadantargatameva sarvathaiva sthita-
mini tattvaṁ sarvajñāneṣu krameṇa sthitamityarthaḥ| anabhi-
lāpyānabhilāpya ityādi aprameyabodhisattvamahāsattvaiḥ
sahetyarthaḥ| te'pyananaiva nyāyena saṁsthitā ityabhiprāyaḥ|

uktaṁ ca tattvasaṁgrahe tantrarāje- sarvatathāgatamahābodhi-
dṛḍhasattva ityārabhya anādinidhanaḥ śānto bhagavān mahā-
bodhisattvavajraḥ samantabhadro mahābodhisattvaḥ sarvatathāgata-
hṛdayeṣu vijahāra|

(51)

atha sarvatathāgatāḥ prāhuḥ- kathaṁ tvaṁ kulaputrānuttarāṁ
samyaksambodhimabhisaṁbhotsyase yastvaṁ sarvatathāgatatattvānyabhi-
jñāya iṣṭatarāṇyupahasasīti||

sarvārthasiddhibodhisattva āha- bhagavantaḥ sarvatathāgatāḥ
ājñāpa[yatha] kathaṁ pratipadyāmīdṛśaṁ tattvamiti|
tathāgatā āhuḥ- pratipadyasva kulaputra svacittapratyave-
kṣaṇasamādhānena prakṛtisiddhena rucijaptena mantreṇeti oṁ
cittaprativedhaṁ karomīti|

mahābodhisattva āha| ā jñāto bhagavantaḥ sarvatathā-
ga[tā]ḥ svahṛdi candramaṇḍalākāraṁ paśyāmi|

prakṛtiprabhāsvaramidaṁ kulaputra cittaṁ candramaṇḍalavat|
candramaṇḍalaṁ prakṛtiprabhāsvaraṁ tadvat jñāna| yathākramācca-

prakṛtiprabhāsvaramidaṁ kulaputra cittaṁ candramaṇḍalavat|
candramaṇḍalaṁ prakṛtiprabhāsvaraṁ tadvat jñānam| yathākramācca-
[ndra]maṇḍalaṁ sampūrṇaṁ bhavati tadvat prakṛtiprabhāsvaraṁ citta-
ratnamapi paripūrṇaṁ bhavati| yathā candramaṇḍalamāgantuka-
kalābhiḥ sūryyamaṇḍa[la]raśamyapagamāt kramāt pūrṇaṁ dṛśyate
tadvat prakṛtipariśuddhaṁ cittaratnamapi sarvakleśamalakalaṅkāpa-
gamakramāt paripūrṇabuddhaguṇaṁ dṛśyate iti|

advayasamatāvijaye'pi-
oṁ sarvatathāgatajñānavajrasvabhāvātmako'ham|
punarnavamapaṭale-
svacchaṁ hi sarvasattvānāṁ cittaṁ śāntaṁ prabhāsvaram|
aliptaṁ vividhairbhāvaiścittādyattattvabhāvanā||35||

(52)

buddhakāyavidhānajña upabhuṁjīta tattvataḥ|
anyathā naiva sidhyanti sarvamantrodayāḥ śubhāḥ|| 36||

punaśca trayodaśe paṭale-

maṇḍalaṁ sarvabuddhānāṁ tattvajñānācca maṇḍalam|
sādhakānāmidaṁ tattvaṁ cintāmaṇirivādbhutam|| 37||

guhyendumaṇitilakaṁ tantrarāje'pi kathitam|
sarvāṅgabhāvanā'tītaṁ kalpanākalpavarjitam||38||

mātrābindusamātītametat maṇḍalamuttamam|
punastatraiva-

sa caiva sarvabhāvena sarvadā samavasthitaḥ|
anādinidhanaḥ sattvo vajrasattvaḥ paraṁ sukham||39||

punaḥ-

bodhicittādṛte nānyat saukhyamasti tridhātuke|
bodhicittamayaṁ saukhyaṁ sarvasaukhyaprasarpaṇam|| 40||

mahāsamayatantre'pi nirddiṣṭam-

ahaṁ ca kāmarūpāgraḥ sarvabuddhairadhiṣṭhitaḥ|
mayā'pi dharmmakāyāgrāḥ sarvabuddhā hyadhiṣṭhitāḥ ||41||

punaśca-

surato bhagavānnityo vajrasattvo mahāsukhaḥ|
ataḥ prasūtiryyasmāttasmādidaṁ na ca lakṣyate|| 42||

(53)

punaśca-

mahāsattvo mahāvajro vajrasattvastaducyate|
tasya tattvam-

anādinidhanaḥ sattvo vajrasattvo mahārataḥ|
samantabhadraḥ sarvātmā bodhibuddhaḥ tridhātuke|| 43||

sthāvaraḥ sarva evāgro mahāvajro mahāvalaḥ|
jaṅgamaścittasaṁskārāt sarvakṛt sarva eva hi|| 44||

uktaṁ ca māyājāle'pi-

jñānaikacakṣuramalo jñānamūrttistathāgataḥ|
niṣphalaḥ sarvago vyāpī sūkṣmavījamanāśravaḥ|| 45||

bodhicittotpādaḥ saptamapaṭale-

anutpanneṣu dharmmeṣu anakṣaramanālayam|
kalpakalpanayā varjjya utpādo'yaṁ pragīyate|| 46||

punastatraiva-

prakṛ[tyā]bhāsvarā dharmmā ādiśuddhā hyanāvilāḥ|
na bodhirnāpi buddhatvaṁ na sattvo nāpi jīvitā|47||

śrīvajramaṇḍalālaṅkāre nigaditam-

sarvatra sarvadhātau tu sarvasattvā[śca] sarvataḥ|
sarvakāyamayaṁ vyāpya cittadhāreva saṁsthitā|| 48||

anāśravā[di]cintā ca nirmmalā nirmmamā svayam|
śūnyā gaganasamā caiva bhāvābhāvavivarjitā|| 49||

(54)

anādinidhanā śāntā sarvadharmmeśvarī ca sā|
vibhratī sarvarūpāṇi satyadvayasamāśritā|| 50||

paramā paramārthena dharmmakāyeti sā smṛtā|
sarvendriyaṁ ca vijñānaṁ cittaṁ sarvatra sarvataḥ|| 51||

manojñānamiti khyātā prajñā buddhirmati smṛtiḥ|
vipaśyanā ca sarvajñajñānasya vyavadānataḥ|| 52||

śāśvatocchedanirmmuktā avintadvaya[varjitā]|
saṁvṛtyā paramārthena dvidhā tasyāḥ prakalpanā||53||

yathendhanaṁ samāśritya tejovījaṁ tu saṁsthitam|
tileṣu va yathā tailaṁ rasa ikṣoḥ prakalpitaḥ|| 54||

puṣpeṣu vā yathā gandho dadhni navanītaṁ yathā|
sarvatra sarvasattveṣu sthāvare jaṅgameṣu ca|
rupārūpagatā cāpi mahāmudrā pratiṣṭitā|| 55||

punaḥ-

jñānamamaraṇamalakṣaṇamaghoṣamanādiśuddhaṁ vimalaṁ prabhāsvaraṁ
anabhilāpyamiti|
sambaratantre nigaditam-

na yogaḥ pratibimbeṣu niṣiktādiṣu jāyate|
bodhicittamahāyogāt yoginastena devatāḥ|| 46||

(55)

bodhicittaṁ idaṁ vajraṁ sarvabuddhatvamātmanaḥ|
tasmāt sārvātmyayogena sarvabuddhatvamāpnute|| 47||

enaṁ paśyanti saṁyuktaṁ sarvathā pūjayanti [ye]|
dṛṣṭāstaiḥ pūjitāścaiva sarvabuddhā bhavanti hi|| 48||

darśanasparśanābhyāṁ ca sarvabuddhasya vā'sya hi|
amaṇḍalapraviṣṭā[śca] dṛṣṭasatyā bhavanti hi|| 49||

darśanasparśanābhyāṁ ca śravaṇasmaraṇena ca|
sarvapāpairvimucyante pūjyante sarvasiddhibhiḥ|| 50||

sarvayogasamāyogaiḥ sarvabuddhasya vā'sya hi|
[nāryo'pi]hi vimucyante buddhabodhiṁ smṛśanti ca|| 51||

sarvatra sarvataḥ sarvaṁ sarvathā sarvadā svayam|
sarvabuddhamayaṁ siddhaṁ svamātmānaṁ prapaśyati|| 52||

sarvātmasaṁsthitāścainaṁ pūjayanti tathāgatāḥ|
sarvapūjāmahāmeghavyūhaprasarasañcayaiḥ|| 53||

sarvabhogopabhogai[śca] sevyamānairyathāsukham|
svādhidaivatayogena sva[mā]tmānaṁ prapūjayet||54||

punaśca-

vicitrakarmmayogena vicitravinayātmanā|
sattvānāṁ vinayārthāya tadanye vidhayaḥ smṛtāḥ|| 55||

punaḥ-
anādinidhanaḥ sattvo vajrasattvaḥ paraṁ yataḥ|
subhageti ca vikhyāto susthito buddhamudrayā|| 56||

(56)

punaśca-

vicitrakarmmayogena vicitravidhikāṅkṣiṇām|
buddhavajradharādyāstu kṛtakā vinayāḥ smṛtāḥ || 57||

granthabāhulyabhayātparamādyaguhyaghanoccayādi na likhita-
miti|

jñānasiddhau tantroktatattvākṣaraparanidarśanaparicchedaḥ
paṁcadaśaḥ||

(57)

ṣoḍaśaḥ paricchedaḥ|

evaṁ jñānavaraṁ samyagupāyena samāyutam|
bhāvayitvā sutīrthyātmā janmanyatraiva sidhyati||1||

upāyaḥ karuṇāmūlaṁ bodhicittaṁ susaṁbhṛtam|
samatā sarvasattveṣu triratne varapūjyatā||2||

āsākṣātkaraṇaṁ śunyaṁ sarvakāmavirāgitā|
paribho[go']pi pūjārthaṁ sarvatāthāgataṁ vahet|| 3||

praṇāmamāditaḥ kṛtvā yāvatī pariṇāmanā|
upāya [e]ṣa saṁbuddhaiḥ karuṇādiḥ pradeśitaḥ|| 4||

evaṁ sopāyavidyogī sarvabuddha ivāparaḥ|
na tasyopadravaṁ kiñcit sadā sarvatra vidyate|| 5||

mantramudrādiyogena parīkṣā parikīrttitā|
sarvāgamanibandheṣu sarvabuddhaiśca [ta]tsutaiḥ|| 6||

tairava sasutairbuddhaiḥ kalpakoṭiśatāntaram|
rakṣā kṛtā tathā naiva yathaiva jñānabhāvinaḥ|| 7||

caturīryyāpathairyuktā bhāvanā samudāhṛtā|
sthānaṁ ca yoginā rocyaṁ sarvasaukhyapra[dā]yakam||8||

nopavāsarato yogī na snānaśuddhikalpanaḥ|
nānākalpaviviktātmā bhaved yogī varātmakaḥ|| 9||

kāyikaṁ mānasaṁ duḥkhaṁ nāvakāśaṁ pradāpayet|
sarvasaukhyasamāyuktaḥ sidhyate nātra saṁśayaḥ|| 10||

(58)

jñātayaḥ sarvasattvā vai na paro'styatra ṣaḍgatau|
tasmānna kutracit grāhyaviśeṣo hyupalabhyate|| 11||

sthāne deśe gṛhe vā'tha pustake pratimāsu ca|
sarvagrāhyavinirmmukto yogī buddhaistu varṇitaḥ|| 12||

jñānasiddhau upāyanirddeśanaparicchedaḥ ṣoḍaśaḥ|

(59)

saptadaśaḥ paricchedaḥ|

samyagjñānasamutpanno yogī prārthayate yadā|
abhiṣekaḥ pradātavyastraidhātukanamaskṛtaḥ|| 1||

sarvopakaraṇairyuktaḥ sarvapūjāsusaṁvṛtaḥ||
ārādhayedvaraṁ vajraguruṁ sarvaguṇārṇavam||2||

bhakṣyabhojyādiyuktena puṣpagandhādikena ca|
sampūjya maṇḍalaṁ kṛtvā kṛtāñjalipuṭo gadet||3||

samyagjñānavaraṁ prāptaṁ prasādāt karuṇātmaka|
svasaṁvedyasvabhāvaṁ ca ādattamapi niścayam||4||

idamevādvayaṁ jñānaṁ nānyajjagati vidyate|
pītaṁ dharmmāmṛtaṁ prāpya prārthayeta mahāgurum||5||

sarvasattvārthakāryyāṇi yathāśaktyā karomyaham|
dharmmadāne nayet ko'pi [hi]taṁ dāsyāmyahaṁ yathā|| 6||

abhiṣeka[va]raṁ ratnaṁ prasādāt prāpyate yadi|
gṛhītumahamicchāmi prasādaṁ kurutābhayam||7||

guruṇāpi hi dṛṣṭena guṇapūrṇā janā yadi|
[evaṁ deyaṁ prasādādi] sarvabuddhānuvarttitam||8||

vaktavyaṁ kṛpayā yuktaṁ vacaḥ sarvārthasampradam|
dharmmarājyābhiṣekāgramabhiṣekaṁ niruttaram||9||

(60)

tato dināvadhiṁ kṛtvā śiṣyāya vacanaṁ vadet|
amukasmin dine vatsa kariṣyāmi prapuraṇam||10||

manasā bhavato vaśyaṁ kuru cittamato dṛḍham|
duṣpūraṇaṁ yato na syāttathā kāryyaṁ mahāmate||11||

tato dināvadhiṁ prāpte sarvabuddhān prapūjayet|
āryyasaṅghāya bhojyaṁ ca dadyāccaiva sadakṣiṇam|| 12||

gaṇabhojyamudāraṁ ca gurūṇāṁ ca viśeṣataḥ|
yathāśaktyā tvanāthānāṁ [vidhiṁ sarvaṁ] samācaret|| 13||

tato gurordakṣiṇādyā sarvabuddhānuvarṇitā|
sarvato viśvagurave siddhimuttaradakṣiṇam||14||

yasya yadduṣparityājyaṁ taduttamamiti smṛtam|
yadyadiṣṭataraṁ kiñcit viśiṣṭatarameva vā|
tattaddhi gurave deyaṁ tadevākṣayamicchatā|| 15||

athāsyābhimataṁ syādvai citraṁ kāryyamathāpi vā|
taddeyamathavā kāryyaṁ svalpamapyuttamaṁ hitam|| 16||

athottamaṁ bhavedyasya [dadyāccet taṁ na dakṣiṇām]|
sarvācāryyāpamānena sa nityaṁ duḥkhamāpnute|| 17||

sambaratantroktā dakṣiṇeyam|
ātmānamapi niryyātya punarmūlyaistu mokṣayet|
nānātantreṣu nirddiṣṭā dakṣiṇeyaṁ niruttarāa|| 18||

(61)

tataḥ-

sarvabuddhamayaṁ yogaṁ sarvasampatsukhodayam|
agamyaṁ sarvasattvānāṁ lokanāthena bhāṣitam||19||

sarvatāthāgataṁ cittaṁ sarva[vākkāya] sambhavam|
dvayorapyevamājñāya adhiṣṭhānaṁ prayojayet|| 20||

mānasaṁ sarvamevedaṁ kāyikaṁ vāksamudbhavam|
sarvabuddhamadhiṣṭhāyānujñāṁ tasya pradāpayet|| 21||

abhiṣiktamimaṁ buddhairatītānāgatairapi|
sarvavajradharaiścāpi sarvavajradharāya ca|| 22||

ekakāyo'si buddhānāṁ tvamidānīmanāhataḥ|
dharmmābhiṣekadānena kuru sattveṣvanugraham|| 23||

ratnatraye yathāśaktyā rakṣā kāryyā śubhodayā|
vajrasattvā[dikaṁ] kāryyaṁ sarvabuddhairnidarśitam|| 24||

mayyavamanyanā kāryyā na tvayā varavajriṇā|
viṣamā parihāreṇa kālaṁ kṛtvā sudāruṇam||25||

ghoraṁ narakaduḥkhaughaṁ mā bhūt kalpaśatāntaram|
mithyādharmmasamācārā ye tu lokaviḍambakāḥ|| 26||

na teṣu sambhavaṁ kuryyāt saddharmmapratipakṣakāḥ|
mūḍhā dharmmavihīnāste sva sukhodayamānasāḥ|| 27||

puṇyahīnāḥ parāṁ bodhiṁ naiva prāpsyanti durnayāḥ|
itastataśca saṁsāre te bhramanti hi ṣaḍgatau|| 28||

(62)

lokamohanaśīlāśca saddharmmapratipakṣakāḥ|
evaṁvidhā aneke ca dharmmabhramasamāśrayāḥ|| 29||

na teṣāṁ sugatau janma buddhatvaṁ api durlabham|
etebhyastu sadā rakṣā bhavita[vyā] mahāmate|| 30||

mārapāśanibaddhāste parātma[vidhi]nāyakāḥ|
kuru sattvārthamadhunā sarvabuddhādhipa svayam||31||

yathāvinayato dharmmaṁ prakāśaya jane'khile|
saṁśayaṁ nahi dharmme tu karttavyamadhunā tvayā|| 32||

nābhiṣekaṁ punargrāhyaṁ [tvayedānīṁ mahāmate]|
samyak dharmmaparo vidvān traidhātukanamaskṛtaḥ|
abhiṣekaṁ tvayā prāptaṁ vidyate na [hyataḥ] param||33||

sarvatāthāgatajñānavarābhiṣiktasya yoginaḥ māhātmyaṁ
śrīsamāje  nirddiṣṭam- tadyathā sarvatathāgatakāyavāk-
cittavajraguhyasamabhiṣikto bhagavantaḥ ācāryyāḥ sarvatathā-
gataiḥ sarvabodhisattvaiśca kathaṁ draṣṭavyaḥ?

sarvatathāgatāḥ prāhuḥ- bodhicittaṁ vajraṁ iva kulaputrāḥ
sarvatathāgataiḥ sarvabodhisattvaiśca draṣṭavyam| tat kasmāddhetoḥ ?
bodhicittavajraścācāryyo dvayameva tadadhikāraṁ yāvat
kulaputrāḥ saṁkṣepataḥ kathayāmi| yāvanto daśadiglokadhātuṣu
buddhāḥ bodhisattvāśca tiṣṭhanti prayanti ca sarve te trikāla-
samayamāgatya tamācāryyaṁ sarvatathāgatapūjābhiḥ saṁpūjya sarva-

(63)

buddhakṣetre punarapi prakāśayanti| evaṁ ca vāgvajrākṣaraṁ
niścārayanti| pitāsmākaṁ sarvatathāgatānāṁ mātāsmākaṁ
sarvatathāgatānāmiti| tadyathā- api nāma kulaputrā
yāvanto buddhā bhagavanto daśasu dikṣu pracaranti teṣāṁ ca
buddhānāṁ bhagavatāṁ yāvantaḥ kāyavākcittapuṇyaskandhā
ācāryyasya romakūpāgravivare viśiṣyate| tat kasmāt
hetoḥ ? bodhicittaṁ kulaputrāḥ sarvabuddhajñānānāṁ sārabhūta-
mutpattibhūtaṁ yāvat sarvajñajñānākaramiti|

jñānasiddhau vajrajñānābhiṣekavidhiḥ saptadaśaḥ|

(64)

aṣṭādaśaḥ paricchedaḥ|

mahājñānaprabhavitamahāyogīśvarasya prabhāvaṁ kalpakoṭi-
śatenāpi sarvatathāgatairapi na śakyaṁ varṇayitum| śrīsambaroktaṁ
kiñcinmātraṁ kathyate-

sarvatra sarvataḥ sarvaṁ sarvathā sarvadā svayam|
sarvabuddhādibhi[rloke] sarvabhāvān bhavatyasau|| 1||

buddhakṣetreṣu sarveṣu buddhanirvāṇamāvahan|
darśaya buddhakāryāṇi buddhanirmāṇamāyayā||2||

buddhavajradharādīnāṁ viśvarūpatridhātmakaiḥ|
traidhātukamahārāja sarvakāryāṇi darśaya||3||

sandhivigrahapūrdvāri rājyaṁ māyāvikurvitam|
traidhātukamahārāja avaṣṭabhya ca sāhasaiḥ||4||

pramādo'yaṁ jagat sarvaṁ viśvanarttita darśaya|
evamādyāstvanantāgrāḥ dharmadhātusamāgamaiḥ||5||

ākāśadhātuparyantāḥ sarvabuddhādayo varāḥ|
samāviśanti sarvātmā siddhyaiśvaryaprasiddhibhiḥ||6||

sarvato viśvavinayaṁ sattvadhātuṁ prasādhayet|
vikrīḍati vicitraḥ śrīvajrasattvastathāgataḥ|| 7||

(65)

ratikrīḍāvikurvitaḥ sarvato viśvasambaraiḥ|
sarvākāśāvakāśaḥ śrīvajrasattvaḥ pratiṣṭhitaḥ|| 8||

ityāha bhagavān śrīvajrasattvaḥ-

sarvaśuddhyadhimokṣeṇa prasahya balavānadhaḥ|
parākramakramaṇāt tu sarvalokān pramardayet||9||

anyantu duṣṭaraudrāgraṁ sattvadhātumanekadhā|
pāpaiścaurairavaskandhaiḥ sarvameva viśodhayet|| 10||

cchalena māyayā caiva prasahya balavānadhaḥ|
pañcāyudhanibandhaiśca sarvalokān jayat tadā||11||

vijitya sakalāṁ siddhiṁ jagat sthāvarajaṅgamam|
vicitravinayopāyaiḥ svaparānanupālayet||12||

kāminīnāṁ bhavet kāmo raudrāṇāṁ raudramuttamam|
saumyānāṁ paramaṁ saumyaṁ [haṭhānāṁ ] haṭhavikramaḥ||13||

parameśaṁ samākramya prasahya balavānadhaḥ|
umādevīṁ samākṛṣya copabhogairbhunaktyasau|| 14||

nārāyaṇaṁ samākramya prasahya balavānadhaḥ|
rūpiṇīṁ tu samākṛṣya upabhogairbhunaktyasau|| 15||

prajāpatiṁ samākramya prasahya balavānadhaḥ|
praśāntadevīmāsādya upabhogairbhunaktyasau|| 16||

(66)

kāmadevaṁ samākramya prasahya balavānadhaḥ|
ratiprītidhṛtyaiśvaryyaṁ samākramya bhuna[ktyasau]|| 17||

evamādyāstvanantāgrā vajrakarmmāgravikramāḥ|
evamādyā vikurvanti nānātantra [nidarśanāt]|| 18||

jñānasiddhau prabhāvanirddeśo nāma adhimātrendriya-
vidhānamaṣṭādaśaḥ||

(67)

unaviṁśaḥ paricchedaḥ|

yastu samyak na vettyeva mithyātattvasuyogavān|
[madhyendriyo] hi vikhyātastatkṛtyamadhunocyate|| 1||

namaskārādikaṁ sarvaṁ yatpūrvaṁ mārgamuktavān|
tatsarvamapi karttavyaṁ gāthāḥ sāmājikāstathā||2||

sarvākāravaropetāṁ jhaṭityeva svadevatām|
niṣpādya pūrvavad yogī mārgastho japamārabhet||3||

avasāne tu karttavyaṁ sarvabuddhāḥ sa aurasāḥ|
prasādaṁ mama karttavyaṁ śaraṇye'sya kṛpātmakāḥ||4||

anādikālamadyāpi saṁsāre saṁsarannaham|
khinno'smi sarvadā duḥkhaiḥ samyagjñānamapaśyakaḥ|| 5||

yathā jñānodayo bhūyāt tathāhaṁ karttumudyataḥ|
krameṇānena saṁyukto yadi samyak pravarttate|
bhavet jñānodayaṁ tasya na mithyāmārgayāyinaḥ|| 6||

jñānasiddhau madhyendriyavidhinirddeśa ekonaviṁśatitamaḥ||

(68)

viṁśatitamaḥ paricchedaḥ|

mudrāmaṇḍalavarṇādibhujasthānavibhāvitāḥ|
samādhitrayamudrādidvārāścaiva mahadbhujāḥ||1||

nānāprapañcanāmnāyāt sarve te mṛdavaḥ smṛtāḥ|
teṣāmapi yathānyāyaṁ vravīmi tattvasambhavam|| 2||

madhyādhimātramārgeṣu pratiṣṭhāya yathānayam|
tantroktaṁ sarvadā kāryyaṁ devatāmantrajāpinā|| 3||

yadi cittaṁ samaṁ yasya jñānaṁ tasyodayaṁ bhavet|
anyathā nahi tatprāptiḥ kalpakoṭiśatairapi|| 4||

sarvadā cintayā yukto mahākāruṇyavān sudhīḥ|
pūrvoktalakṣaṇopeto yogī jñānavaraṁ labhet||5||

madhyāntayordva[yo]ścaiva bhāvanāmātramukhyatā|
samyak jñānodayārthāya proktā kṛtyamapaśyatā|| 6||

tattvaṁ vinā na buddhatvaṁ tattvaṁ mārgaṁ vinā na [ca]|
[tanmārgasthitayoreva] pratipadjñānamāvahet|| 7||

mārgabhraṣṭo bhaved yastu karuṇāhīnacetasām|
lābhādyarthaṁ prapañcātmā na teṣāmudayo bhavet|| 8||

jñānasiddhau mṛdvindriyanirddeśaparicchedaḥ viṁśatitamaḥ||

(69)

amukasya idaṁ guhyaṁ sarvatantreṣu gopitam|
tannirddiṣṭaṁ mayā samyak yogināṁ jñānasiddhaye|| 1||

vajrajñānavaro yogo yeṣāṁ naiva hi vidyate|
bhāvanāṁ devatārūpaiḥ karttumudyaktacetasām||2||

darśanaṁ pustakasyāpi na dātavyaṁ prajānatā|
vajrajñānapratikṣepāt narakaṁ yānti mohitāḥ|| 3||

teṣāṁ narakahetutvāt so'[pya]vīciṁ vrajennaraḥ|
tatparānarthasadbhāvādrakṣaṇīyamiti dhruvam|| 4||

anyathā samayabhraṁśo bhavediti prakāśitam|
yogatantreṣvanekeṣu sarvabuddhaiḥ kṛpātmakaiḥ|| 5||

vidhūtakalpanājālaṁ vajrajñānamidaṁ param|
sādhanaṁ vajrasattvasya kṛtamārgaṁ sayuktikam|| 6||

sādhanopāyikāṁ kṛtvā yanmayopacitaṁ śubham|
tenāstu sarvasarttvānāṁ vajrasattvatvamuktamam|| 7||

|| śrīmadoḍiyānavinirggatā jñānasiddhirnāma
sādhanopāyikā samāptā||

|| kṛtiriyaṁ śrī-indrabhūtipādānām||

(70)