• Home
• Canon Text
• Romanized
• sūtrapiṭaka
• tantra
• tantra darśana
• 7 sekatānvayasaṃgrahaḥ

7 sekatānvayasaṃgrahaḥ

Technical Details

 

7 | sekatānvayasaṃgrahaḥ |

 

namo buddhāyaḥ |

 

kalyāṇamitravārāṅko'pi samādhimājapatyanavagrāhyaḥ |

karatalagatamiva tattvaṃ ṣaṭpañcamaviṣamaṃ dhatte ||

 

vajrācāryyāttu saṃjñānasekatātparyyasaṃgraham |

viditvā kurmahe'nekasekagranthān yathāgamam ||

 

prathamaṃ kalasābhiṣeko dvitīyaṃ guhyamuttamam |

prajñājñānaṃ tṛtīyaṃ vai caturthaṃ tat punastathā ||

 

asyārthaḥ - prathamaṃ kalasābhiṣeka iti,udakamukuṭavajraghaṇṭānāmācāryyalakṣaṇāḥ ṣaṭ kalasābhiṣekāḥ | bāhya vāriṇaiva bāhyamalasya avidyāmalakṣālanāya siñcate 'neneti sekaḥ | eṣāṃ sarvveṣāṃ kalasavyāpārāt kalasābhiṣekasaṃjñā | avaivarttikābhiṣekāścaite ṣaṭtathāgatasvabhāvatvāt | tathāhi udakābhiṣeka ādarśajñānātmako'kṣobhyasvabhāvaḥ,mukuṭābhiṣekaḥ samatājñānātmako ratnasambhavasvabhāvaḥ,vajrābhiṣekaḥ pratyavekṣaṇājñānātmakaḥ amitābhasvabhāvaḥ,adhipatyābhiṣekaḥ kṛtyānuṣṭhānarūpo amoghasiddhisvabhāvaḥ,nāmābhiṣeko avidyānirodhāt vidyānugataviśuddhadharmmadhātujñānātmako vairocanasvarūpaḥ,ācāryyābhiṣekastu vajrajñānasvabhāvaḥ | atra ca pañcābhiṣekaḥ pañcasu locanādividyāyāḥ vyāpārāt | atra ca avidyāmalakṣālanāya akṣobhyarūpeṇa vajrācāryyeṇa vairocanarūpāvalambini śiṣye salilābhiṣeko deyaḥ | evaṃ sarvvatrāhaṅkāraḥ,āgāmibuddhabhāvo acittoṣṇīṣabījabhuto mukuṭābhiṣekaḥ |

 

dvādaśāṅguliparimāṇena dvādaśāṅgapratītyasamutpādaviśuddhā vajram | yatra madhyavṛtterniruttaradharmmatāsūcako hūkāraḥ | tasyārthaḥ,ha iti hetuviyuktaḥ [ū]iti ūhāpagataḥ,a iti apratiṣṭhitasarvvadharmma iti | yatra bhavasarodbha[va]mukhāt sphuranti pañcārarūpiṇo munayaḥ pañcaskandhaviśuddhyā niṣkrāntā bhavaśarīreṇa | iha ca madhyārābhimukhata uparyadhareṇa sarvve rūpādayo vijñānātmakā iti sūcyante | ete ca sarvve sarvvātmakā iti nive[da]yituṃ sarvvatraiva caturaśrī | atha te dharmmasya buddhā hūnādaniveditātmarūpasya pañcāsivimuktakāyāḥ paryyante cānyatra visphuritā śūnyatānimittāḥ praṇihi(hi)tatāvabodhanārthaṃ sarvvatra hullikātrayam | ete ca ādarśasamatāpratyavekṣaṇākṛtvā nuṣṭhānasuviśuddhadharmmadhātulakṣaṇapañcajñānātmakā gurūpadeśato jñeyāḥ | abhedyajñānasūcakaṃ ca samudāyārthaḥ -

 

dṛḍhaṃ sāraṃ asauśīryyaṃ acchedyābhedyalakṣaṇam |

adāhi avināśi ca śūnyatā vajramucyate ||

 

abhedyaṃ vajramiti hevajre | asya ca vajrābhiṣekasy avidhānaṃ utpaśyamānā bhedyajñānabījādhānamiva vidhātuṃ evaṃ vajraghaṇṭā'pi pūrvvābhisandhānena dvādaśāṅguliparimāṇā adhomukhāmbhojavajrasamāpattiniḥ svabhāvena sarvvadharmmasvabhāvaṃ pratipādayituṃ abhedyajñānanigadatāṃ dharmmodayasya bodhayituṃ mūrddhādhobhāge ca vajrāvalīyugalamālinī | tridhātukasvabhāvakūṭāgāratāmasya sthāpayituṃ hārārdhahāraprakāra ata eva pañcatathāgatāṅkitaḥ śūnyatākaruṇābhinnajñānakāraṇatāṃ āvedayitumapari[ṇata]prajñāmukhākhyānam |

 

asya ca dharmma dhātusvarūpasya jñānasya vairocanādipañcatathāgatātmakatāṃ ca rūpādipañcaskandhasvabhāvatāṃ ca pṛthivyādipañcadhāturūpatāṃ ca kathayituṃ ūrddhaṃ pañcāraviracanā | atrāpi madhyasthitārābhimukhādyabhisandhānaṃ pūrvvavat | athābhiṣekamanayā svanantyā vajraghaṇṭayā kurvvīta | anuttarāśeṣadharmmabodhād vikārakaṃ iha prādhānyasyāpanāya hetukatāpratipādanāya ca kāraṇabhūtamapi vajraghaṇṭābhiṣekamullaṅghya prathamaṃ vajrābhiṣekadānam | sarvvadharmmā nāsatā iti pratipādanārthaṃ bhaviṣyanmunīndrapadocitanāmanidānāvadānārthaṃ ca pūrvva nāmavyapanayena svadevatākulagotrānusāreṇa nāmābhiṣekaḥ | ācāryyābhiṣekaśca vajrasamaya-ghaṇṭāsamaya-mudrāsamaya-bhavyatānujñā-vratavyākaraṇāśvāsalakṣaṇaḥ | itaḥ prabhṛti asaṃskṛto bhedayuganaddhabāhibo[dhi]dharmmasamayastvaṃ iti bodhayituṃ vajrasamayaḥ,caturaśītidharmmaskandhasahasraparastvamitipratipādanāya ghaṇṭāsamayaḥ,sveṣṭadevatāsvabhāvastvamiti sthāpayituṃ mudrāsamayaḥ | maṇḍalatattvaṃ maṇḍalaviśuddhilakṣaṇaṃ devatātattvam devatāviśuddhilakṣaṇaṃ ācāryyaparikarmma ca maṇḍalasādhanajñānaṃ pañcapradīpaṃ cāmṛtabhakṣaṇaṃ ca bhavyatātattvaṃ ca naiḥsvābhāvyameṣāmutpannakramapakṣataḥ dharmmacakrapravarttanārthamanujñā | bāhyavratanirākaraṇārthaṃ vajravratadānaṃ pṛthivyādisvabhāvatāsūcanāya vyākaraṇam | tathā hi bhuvo dharādeḥ svaḥ svarūpaṃ bhūrbhūyā iti hi bhūrbhuvaḥ svarityasyārthaḥ | sarvāvaraṇavinirmuktaḥ sarvvabuddhabodhisattvasama[ya]stvaṃ itaḥ prabhṛti bodhanārthamāśvāsaḥ |

 

prajñāśraddhākṣetrīkaraṇārthaṃ samayarakṣaṇārthaṃ ca samānakālobhayasampāditabodhicittapradānaṃ guhyābhiṣekaḥ | prajñopāyaguhyābhyāṃ dīpayata iti vyutpattiḥ | prajñājñānamityatra vyutpattidvayam;prajñayā jñānam,prajñaiva bāhyajñānam | tatra grāhyagrāhakākāradhāraṇī buddhiścaturdhātupañcaskandhasvarūpaṣaddhiṣayātmakāṅganāsvabhāvā prajñā | tasyā nimittabhūtāyā bodhicittajñānamiti pūrvvā vyutpattiḥ | ākāradvayaśūnyā saiva vijñānamityaparā vyutpattiḥ | prajñājñānalakṣitasaptāṅgayuktasādhyaṃ caturthārthamityeke | prajñājñānameva abhyasyamānaśaradamalagaganasaṅkāśaṃ caturthārthamityapare | prajñājñānameva prakṛtirūpaṃ vikārarūpaṃ prakṛtisamutpādātmakaṃ yuganaddhādvayavāhisuviśuddhasvabhāvaṃ caturthārthamityapare | pakṣāntarāṇi ca vistarabhayā nnocyante | atiguhyasekasaṃgrahavidhānamilitena puṇyayutaślo[ke]na nikhilajagato'stu vimalasphuṭasugatasubhāṣite kṣāntiḥ |

 

samāptaścāyaṃ sekatānvayasaṃgraha iti | kṛtiriyaṃ paṇḍitāvadhūtaśrī advayavajrapādānāmiti ||