• Home
• Canon Text
• Romanized
• sūtrapiṭaka
• tantra
• tantra darśana
• 6 caturmudrā

6 caturmudrā

Technical Details

 

6 [caturmudrā]|

 

evam - vajrasattvaṃ praṇamyādau viśuddhajñānatanmayam |

mudrānvayaḥ samāsena kriyate ātmabuddhaye |

 

iha hi mudrānvayavibhrāntyā mūḍhamanaso bhramanti bhavārṇave duḥkhitāḥ | teṣāṃ sukhena caturmudrārthapratipattaye tanrānusāreṇa mahāsukhasādhanaṃ prasādhyate | caturmudreti -karmmamudrā,dharmmamudrā,mahāmudrā,samayamudrā | tatra karmmamudrāyāḥ svarūpaṃ nirūpyate | karmma yā kāyavāk cittacintā tatpradhānā mudrā kalpanāsvarūpā,tasyāṃ karmmamudrāyāṃ ānandā jāyante kṣaṇabhedena bheditāḥ -

 

kṣaṇajñānāt sukhajñānaṃ evaṃkāre pratiṣṭhitam |

ānandāścatvāraḥ - ānandaḥ,paramānandaḥ,sahajānandaḥ,viramānandaḥ | anyathā-

 

paramaviramayormadhye lakṣyaṃ vīkṣya dṛḍhīkuru |

iti yaduktaṃ tat saṅgataṃ na bhavati | catvāraḥ kṣaṇāḥ -

vicitra,vipāka,vilakṣaṇa,vimardda | madhye vilakṣaṇaṃ dattvā seke boddhavyam | haṭhayoge punaḥ sahajavilakṣaṇayorante sthitirboddhavyā | sekahaṭhayoge cedaṃ nirdiṣṭaṃ bhagavatā | sahajaṃ satsarvvaṃ sahajacchāyānukāritvāt sahajamityabhidhīyate | sahajacchāyā sahajasadṛśaṃ jñānaṃ pratipādayati iti | sahajaṃ prajñājñānam | ata eva prajñājñāne sahajasyotpattirnāsti | yasyāḥ sahajaṃ nāma svarūpaṃ sarvvadharmmānāmakṛtrimalakṣaṇaṃ iti yāvat | tasmāt karmmamudrāṃ prāpya nispandaphalamutpadyate | sadṛśaspando niṣpandaḥ | sādṛśyaṃ yathā darpaṇārpitaṃ mukhasya pratibimbaṃ mukhaṃ na bhavati | na pūrvvasiddhaṃ nāpyadhunāsiddhaṃ tadeva mukhapratibimbaṃ sādṛśyamātramāpādayati tathāpi lokāḥ svamukhaṃ dṛṣṭamiti kṛtvā bhrāntyā santuṣṭā bhavanti | tathaivācāryyāḥ kumatadāḥ prajñājñānamāsādya sahajamanubhūtaṃ iti kṛtvā santoṣaṃ utpādayanti,santuṣṭāśca santo dharmmamudrāyā vārttāmapi na jānanti | dharmmamudrāmajānānā kevalayā karmmamudrayā kṛtrimayā kathamakṛtrimabhūtaṃ sahajākhyaṃ utpadyate | sajātīyāt kāraṇāt sajātīyasya eva kāryyasya utpattirbhavati na tu vijātīyāt yathā śālībījāt śālyaṅkurotpattirbhavati natu kodravyasya | tathā dharmmamudrāyā akṛtrimāyāḥ sakāśāt akṛtrimaṃ sahajaṃ utpadyate | tasmāt dharmmamudraiva kāraṇam | abhede bhedopacāreṇa mahāmudrāyāḥ | kasmāt?tarhi bhagavatoktam -

 

ekārākṛti yaddivyaṃ madhye vaṃkārabhūṣitam |

ālayaṃ sarvvasaukhyānāṃ buddhaṃ ratnakaraṇḍakam ||

 

iti | buddhacchāyānukāritvāt karaṇḍakaṃ sthānaṃ ādhāraḥ,tasmāt karmmāṅganāyā ānandasandoharatnākaraṃ  saroruham | tat svacchamāsthānaṃ volakakkolarasasaṃyogena avadhṛtyā samvṛtibodhicittamaṇyantargataṃ yadā bhavet tadā kṣaṇikanāmā parasahajākhyaṃ jñānamutpadyate | na tat sahajanispandaḥ | tatsvarūpeṇa prajñājñānānandatrayaḥ kṣaṇacatuṣṭayānvitaṃ mekaṃ haṭhayoge ca karmmamudrāyā niṣpandaphalamuktam |

 

|karmmamudrāniṣyandanirddeśaḥ prathamaḥ ||1||

 

om-dharmmamudrā dharmmadhātusvarūpā niṣprapañcā nirvvikalpā akṛtrimā utpādarahitā karuṇāsvabhāvā paramā nandaikasundaropāyabhūtā | pravāhanityatvena sahajasvabhāvā yā prajñāyāḥ sahajodayatvena abhinnā yā sā dharma mudretyabhidhīyate | anyat lakṣaṇaṃ tasyāḥ saṅkulājñānāndhakāre taraṇikiraṇasadṛśaṃ gurūpadeśataḥ tṛṇatu[ṣa]samā tatrāpi bhrāntiśalyavarjjitaṃ bodhyavyam | sakalakṣitijalapavanahutāśanairmahāśavalitaṃ trailokyaikasvabhāvaṃ nistaraṅgaśūnyatākaruṇābhinnaṃ ca bodhyavyam | uktaṃ ca bhagavatā -

 

lalanā prajñāsvabhāvena rasanopāyasaṃsthitā |

avadhutī madhyadeśe tu grāhyagrāhakavarjjitā ||

 

etannipunenāpi tathatākāreṇa sannikṛṣṭakāraṇatvena mārgo jñātavyaḥ | mārgajñāne sādaranirantaraṃ mārgābhyāsāt nirodhasya sahajasvabhāvasya sākṣātkṛtitvaṃ bhavati | tathā coktam -

 

nāpaneyaṃ ataḥ kiñcit prakṣeptavyaṃ na kiñcana |

draṣṭavyaṃ bhūtato bhūtaṃ [bhūta]darśī vimucyate ||

 

lalanā rasanā tayormadhyadeśe nivāsinī avadhūtī saivādhigatasakalapadārthasahajasvabhāvaikacittavṛtteḥ sadgurūpadeśato dharmmamudrā mahāmudrāyā abhedena hetubhūtā |

 

dharmmamudrāvipākaphalanirddeśaḥ dvitīyaḥ ||2||

 

āḥ-mahāmudreti | mahati cāsau mudrā ceti mahāmudrā (ceti)| mahāmudrā niḥsvabhāvā jñeyādyāvaraṇavivarjjitā śaradamalamadhyāhnagaganasaṅkāśā sakalasampadādhārabhūtā bhavanirvvāṇaikasvarūpā anālambanakaruṇāśarīrā mahāsukhaikarūpā | tathā ca,amanasikārā dharmmā kuśalā manasikārā dharmmā akuśalā pravacane ca |

 

avikalpitasaṅkalpa apratiṣṭhitamānasa |

asmṛtyamanasikāra nirālamba namo'stu te ||

 

iti yā sā mahāmudretyabhidhīyate | tayā mahāmudrayā acintyasvarūpayā samayamudrākhyaphalaṃ jāyate |

 

mahāmudrāvaimalyanirddeśastṛtīyaḥ ||3||

 

hū-samayamudreti sambhoganirmmāṇakāyākārasvabhāvena svacchākāreṇa ca sattvārthāya vajradharasya herukākāreṇa visphuraṇaṃ yat sā samayamudreti copadiśyate | tāṃ ca samayamudrāṃ gṛhītvā cakrākāreṇa pañcavidhaṃ jñānaṃ pañcavidhaṃ parikalpya ādarśa-samatā-pratyavekṣaṇā-kṛtyānuṣṭhāna-suviśuddha-dharmmadhātubhiḥ ādiyoga-maṇḍalarājāśri-karmmarājāśri-binduyoga-sūkṣmayogaiḥ samayamudrācakraṃ bhāvayantyācāryyāḥ | tena te kṛtapuṇyā bhavanti | tataśca na dharmmamudrāphalalābhino bhavanti,niyatārthakāraṇāt niyatasyaiva kāryyasyotpattiriti vacanāt | tasmāt sahajasiddharasāt na bedhena sthiracalādayo yena vā bālaparikalpitā te saṃbodhikā[raṇa]tāmupayānti |

 

na mantrajāpo na tapo na homo

na māṇḍaleyaṃ na ca maṇḍalaṃ ca |

sa mantrajāpaḥ sa tapaḥ sa homaḥ

tanmāṇḍaleyaṃ tanmaṇḍalaṃ ca ||

 

samāsataḥ cittaṃ samājarūpīti | samāsataḥ sarvvadharmmāṇāmekākārato yadut mahāsukhākārataḥ cittamitibodhicittaṃ samājarūpīti | dharmmamudrāmahāmudrābhiṣekarūpaṃ vā jñānaṃ satsamāja ityabhidhīyate |

 

samayamudrāpuruṣakāraphalanirddeśaḥ caturthaḥ samāptaḥ ||4||