• Home
• Canon Text
• Romanized
• sūtrapiṭaka
• tantra
• tantra darśana
• 4 pañcatathāgatamudrāvivaraṇam

4 pañcatathāgatamudrāvivaraṇam

Technical Details

 

4 pañcatathāgatamudrāvivaraṇam |

 

namaḥ sarvvavide |

pratītyajātāḥ parikalpaśūnyāḥ

śūnyāḥ svabhāvena na vastusantaḥ |

nocchedināścitracidekarūpā

rūpādayaḥ pañcajinā jayanti ||

 

pañcaskandhāḥ pañcatathāgatāḥ | tatra catvāro kiṃ jñānamātratāpratipādanāya akṣobhyena mudryante?etena bāhyā kārabhāve grāhakaśūnyatayā grāhyagrāhakarahitaṃ paramārthasatsambinmātraṃ vijñānameva tiṣṭhate | idameva śaradamalamadhyāhna(na)gaganāyamānaṃ nirākāravādināṃ maulaṃ jñānaṃ sādhyam | tathā coktam -

śūnyaṃ kalpitarūpeṇa nirābhāsamanākṛti |

satsambitsātamātraṃ vai pṛṣṭhākāracayākulam ||

taduktam,- rūpakāyau tu paścimau iti | tathā ca -

niṣprapañco nirābhāso dharmmakāyo mahāmuneḥ |

rūpakāyau tadudbhūtau pṛṣṭhe māyaiva tiṣṭhate ||

 

iti nanvakṣobhyamudrayaiva siddhatvāt kimarthaṃ tarhi akṣobhyo vajrasattvena mudryate ityāgamaḥ?yāvatkalpitākāraśūnyatāpratipādanāya iti cet tanna | pūrvvamudrayaiva siddhatvāt | tasmāt yathā'kṣobhyamudrayaiva jñānaṃ maulaṃ pṛṣṭhamanyat tathā vajrasattvamudrayā vijñānamapi pṛṣṭhaṃ maulaṃ vajramiti syāt | uktaṃ ca vajraśekhare -

 

dṛḍhaṃ sāramasauśīryamacchedyābhedyalakṣaṇam |

adāhi avināśi ca śūnyatā vajramucyate ||

 

iti | pṛṣṭhe rūpādikaṃ cet,[mau]lajñānādakṣobhyamudrayātadvajra(yā)sattvaṃ pṛṣṭhe'haṃ tanna --- nna kim | sattvamiti pṛṣṭha iti cet tarhi karuṇābhāvāt ucchedavādaprasaṅgaḥ | iṣyate ca -

 

vajreṇa śūnyatā proktā sattvena jñānamātratā |

tādātmyamanayoḥ siddhaṃ vajrasattvasvabhāvataḥ ||

śūnyatākṛpayorbhedaḥ pradīpālokayoriva |

śūnyatākṛpayoraikyaṃ pradīpālokayoriva ||

bhāvebhyaḥ śūnyatā nānyā na ca bhāvo'sti tāṃ vinā |

avinābhāvamiyat kṛtakānityayoriva ||

kathyamāne yathāta [ttve]ucchedo naiva samvṛteḥ |

samvṛtivyatirekena [ka]na tattvamupalabhyate ||

ityādi vistaraḥ | evamakṣobhyavajrasattvayoraikayamiti cet tarhi vijñānarūpādyaparityāge citrādvaitavādo jyāyān |

taduktam -

saccit cinmātramaśeṣakalpa-

śūnyaṃ hi sākāramataṃ mataṃ me |

gacchattṛṇasparśasamānamanye

tanmadhyamārthaṃ pravadanti santaḥ ||

 

citrādvaitavādināṃ tu paramārthasaditi jñānamapeśalam | grāhyagrāhakaśūnyacitrādvaitākṣobhyarūpajñānasya vajrasattvamudrayā vastusattānirastatvāt | taduktam -

rūpādikalpaśūnyaṃ cet jñānamakṣobhyamudrayā |

tadvajrasattvamudrāto vastusattā nirasyate ||

na ca vijñaptimātrasya kalpitākāraśūnyatā |

kriyate vajrasattvena pūrvaṃ tasyānavasthiteḥ ||

 

tadevaṃ paramārthasaditiśalyāpagame sarvvatrāpratiṣṭhānarūpānābhogayuganaddhādvayavādisambedanasiddhamadhyamakasiddhāntaḥ preyān | ayaṃ ca sadgurupādaprasādādavagamyate | nanvatra sambedanasiddhau māyopamādvayavādaprasaṅgena sarvvatrāpratiṣṭhānamiti cet -

 

yat pratītyasamutpannāṃ [notpannaṃ]tat svabhāvataḥ |

svabhāvena yannotpannaṃ utpannaṃ nāma tat katham ||

 

iti | sambedanaṃ ca pratītyasamutpannaṃ tasmāt sambedanamevāpratiṣṭhitamajātapadam |

 

tathā ca -

sambedanamajātaṃ vai vastusattā'pi tādṛśī |

vajrasattvasvarūpaṃ tu jagadeva jagau (sau)muniḥ ||

 

kiñca mañjuśrīstathāgatena pṛṣṭaḥ katamo'sāvacintyadhātuḥ?mañjuśrīrāha,yo dhāturniścito,na cittagamanīyo,na cittaprameyo,na cittacetanayā prativeditavyaḥ,amāvucyate'cintyadhātuḥ | atha ca punarbhagavan cittamevācintyadhātuḥ | tat kasya hetoḥ?na hyacitte citte cittaṃ saṃvidyate | niścitto hi cittaṃ cittasya yathārthāvabodhāt | atha ca sarvvākāro bhagavato'cintyadhātuḥ | anyatrāpyuktam -

avikalpitasaṅkalpa apratiṣṭhitamānasa |

asmṛtyamanasikāra nirālamba namo'stu te ||

catuḥpradīpe -

yaḥ pratyayairjāyati sa hyajāto

na tasya utpāda svabhāvato'sti |

yaḥ pratyayādhīna sa śūnya uktaḥ

yaḥ śūnyatāṃ jānati so'pramattaḥ ||

 

āryyalaṅkāvatāre -

bhrānti vidhūya sarvvā hi nimittaṃ jāyate yahi |

saiva tasya bhaved bhrāntiraśuddhatimiraṃ yathā ||

tathā ca -

mā bhūt sambṛtipratiṣṭhānamata eva munirbhayāt |

bhinatti deśanādharmmamuktā hyaśūnyatātmanā ||

uktaṃ ca hevajre-

svabhāvaścaivādyanutpannaṃ [na]satyaṃ na mṛṣeti ca |

kiñca -

sarvvaḥ samānaḥ pratibhajyamānaḥ

śū[nyo]ktikāṃkṣāmadhiyā kṛtāntaḥ |

bauddhasya bāhyasya vibhāgakartrī

na syā[dā]dikā yadi śūnyatoktiḥ ||

āha ca,ucchedaśūnyatāṃ apanayan -

tathatāṃ ye tu paśyanti madhyamārthānusārataḥ |

te vai tattvavido dhanyāḥ pratyakṣaṃ yadi saṃvidā ||

taduktaṃ ḍākinīvajrapañjare-

śūnyatākaruṇābhinnaṃ yatra cittaṃ prabhāvyate |

so hi buddhasya dharmmasya saṅghasyāpi hi deśanā ||

 

tasmāt pañcākārāṇāṃ pratītya samutpannānāṃ pañca tathāgataḥ svabhāvatvāt,svabhāvasya ca śūnyatākaruṇābhinnatvāt,śūnyatākarunābhinnaṃ jagaditi sthitam | etadeva sadgurorupadeśato dhyānamavicchinnam -

 

nadīsrotapravāhena dīpajyotiḥprabandhavat | -

mantratattvānusārataḥ | tathā cāhurnāgārjjunapādāḥ -

kūṭāgāramidaṃ na yat tribhuvanaṃ na prāṇino'mī janāḥ cakreśo'smin[na]mānuṣo na viṣayā nākṣāṇi na hyādayaḥ |

rūpādyā na ca dharmmatātmakatayā te māṇḍaleyā ime

viśvaṃ maṇḍalacakramākalayataścetaḥ kimu bhrāmyasi ||

pratītyasammavādeva gandharvvapuravat sphuṭam |

na svabhāvasthitaṃ viśvaṃ nākāśāmbhojasannibham ||

uktaṃ ca hevajre-

amī dharmmāstu nirvvāṇaṃ mohāt saṃsārarūpiṇaḥ | iti |

 

|pañcatathāgatamudrāvivaraṇaṃ samāptaṃ iti ||