• Home
• Canon Text
• Romanized
• sūtrapiṭaka
• tantra
• tantra darśana
• 1 kudṛṣṭinirghātanam

1 kudṛṣṭinirghātanam

Technical Details

 

advayavajrasaṃgrahaḥ |

 

1| kudṛṣṭinirghātanam |

namo buddhāya |

vakṣye kudṛṣṭinirghātamādikarmmavidhānataḥ |

anenaiva vihāreṇa yatnena labhate padam ||

 

iha hi dvidhā sattvāḥ,śaikṣā aśaikṣāśca | tatra āśaya adhimuktiprayogaḥ bhūmiprapannaprayogaśca (ñca)vasitāptiparyyantaḥ hetvavasthāsthitānāṃ śaikṣāṇāṃ suviśuddhādikarmmāvidhānena sambhāradvayasambhṛtasamyaksambodhisampallābhaḥ | aśaikṣāṇāmapi nirastapratipakṣatattvaphalavikalpānāṃ śākyamuneriva praṇidhānavegasāmarthyāt yuganaddhānābhogayogataḥ sattvārthakriyālakṣaṇamavicchinnamādikarmma pravarttata eva iti sthitam | tathā ca -

 

na te'sti manyanā nātha ca vikalpo na veñjanā |

anābhogena te loke buddhakṛtyaṃ pravarttate ||

parārthasampadbuddhānām phalaṃ mukhyatamaṃ matam |

buddhatvādi yadanyattu tādarthyāt phalamiṣyate ||

cintāmaṇirivākampyaḥ sarvvasaṅkalpavāyubhiḥ |

tathāpi sarvvasattvānāmaśeṣāśāprapūrakaḥ ||

 

phalaṃ tattvavipakṣāṇāṃ vidhyapohavivarjjanāt |

sambo(mba)dhirbudhyate dhanyo tatpaścāttvādikarmmaṇi ||

 

nanu śaikṣāṇāmādikarmmavidhānaṃ yujyata eva | katham ?aśaikṣāṇāmapi niḥsvabhāvabhāvināmādikarmmārambhaḥ | ayamapi suvarṇanigaḍabandhana eva | satyam | prajñāpāramitādhigamavirahāt | prajñāpāramitā hi pañcapāramitānāṃ svabhāvaḥ | ata eva -

 

sarvākāravaropetā śūnyateti nigadyate |

 

uktaṃ ca bhagavatā | prajñāpāramitāvirahitāḥ pañcapāramitāḥ pāramitānāmadheyaṃ na labhante |

 

āryyavimalakīrttinirddeśe coktam | prajñārahita upāyo bandhaḥ,upāyarahitā prajñā bandhaḥ,prajñāsahita upāyo mokṣa[:],upāyasahitā prajñā mokṣaḥ | tādātmyaṃ cānayoḥ sadgurūpadeśataḥ pradīpālokayoriva sahajasiddhamevādhigamyate | ata eva -

 

ādikarmma yathoddiṣṭaṃ karttavyaṃ sarvvayogibhiḥ |

śūnyatākaruṇābhinnaṃ yadbodhau jñānamiṣyate ||

 

ādikarmma ca -

pañcapāramitāḥ proktā ādikarmmetisaṃjñayā |

prajñāpāramitā cāsāṃ svabhāvo nābhiriṣyate ||

 

tathā cātra-

dānaṃ śīlaṃ kṣamāṃ vīryyaṃ dhyānaṃ prajñāṃ ca sādaram |

satataṃ sevayan dhīmān sukhī svastho'pi jāyate ||

sambhoganirmmite heturdānaśīlakṣamātrayam |

dhyānaprajñeti dharmmasya vīryyantubha[ya]yormatam ||

 

tasmādbodhisattvena suviśuddhādikarmmavihāriṇā bhavitavyam,viparyyaye ca nāstikavādaprasaṅgaḥ | taduktam -

 

śubhāśubhaṃ yadyapi niḥsvabhāvakaṃ

tathāpi kuryyāt śubhameva nāśubham |

jalendubimbopamalokasamvṛtau

sukhaṃ priyaṃ duḥkhamajasramapriyam ||

 

kathaṃ tarhi śaikṣeṣūnmattavratasthitānāṃ nirvvikalpatādhimuktivatāmādikarmma pravarttatām ?ucyate | śarīradānaṃ kṛtvā caryyāṃ kṛtavān |

 

śarīradānaṃ dattvā [ca]paścāt caryyāṃ samārabhet |

 

iti vacanāt | dānaṃ dattaṃ ca śarīrāvadhi,kāyavāk cetasām sarvvasattvārthāya sambaraṇācchīlam,kṣāntiścakrū(ku)rataptakarapatrādighātasahanatayā,vīryyaṃ cāṣṭalokadharmmābādhopasahanatayā,dhyānaṃ ca sarvvasvabhāvānugatānābhogasvarasavāhitayā,prajñā ca sarvvadharmmānupalabdhilakṣaṇādhigamanatayā |

 

anābhogarasābedhau yasyājastraṃ ...............|

...................  pravarttante sarvvāḥ pāramitāḥ parāḥ ||

 

tasmādunmattavratasthitānāmapyādikarmma pravarttana eva | cārvvākapaśornaṣṭaparalokasya vacanaṃ sarvvathaivāyuktatvāt nodāhṛtam | bhūtaśaikṣaṃ prati bodhisattvasya prathamaṃ dīyate poṣadham | tadanu śikṣopadeśa iti śrīhevajravacanāt prathamaṃ tu poṣadhadānam | samanvāhara bhadantācāryya ahamitthaṃnāmā amukanāmā upāsako buddhaṃ dharmmaṃ saṅghaṃ śaraṇaṃ gacchāmi yāvadābodhimaṇḍataḥ | evaṃ dvirapi trirapi | evaṃ triśaraṇagataṃ māṃ vadanto dhārayantviti | samanvāhara ācāryya ahamamukanāmopāsaka imāṃ belāṃ upādaya yāvat śva[:]sūryyodayamihāntare sarvvaprāṇibadhāt parasvaharaṇāt abrahmacaryyāt tathā vāgbhedāt anṛtātmatvo (do)pajananāt pānāt vikālāśanā[t]mālāvarṇakanṛtyagītalabhitāt śayanāsanāducchritāt adyāhaṃ virataḥ karomyahaṃ tāvat,tadguṇairaṣṭabhiḥ poṣadhagāthā |

 

gṛhapatibodhisattvastu ratnatrayaśaraṇapuraḥsaraṃ prāṇātipātāt adattādānāt kāmamithyācārāt mṛṣāvādāt prakṛtisāvadyāt madyapānāt ca pañcabhyo virataḥ śrutivivekasampanno gṛhapatibodhisattvaḥ parihṛtadaśākuśalaḥ punarakaraṇasambaravān kuśalakarmmacārī prātaḥprahare samutthāya mukhaśaucādikaṃ kṛtvā ratnatrayamanusmaran om āḥ hū ityanena ātmayogarakṣāṃ kṛtvā yathādhigamadhyānajapasaṃstavādikaṃ kuryyāt | nāmasaṅgītiṃ ca triṣkālamāvarttayet |

 

tadanu om jambhalajalendrāya svāhā ityanena parijaptvā 'ṣṭottaraśatapānīyaculikāni jambhalāya dadyāt | tato namaḥ samantabuddhānāṃ sarvvatathāgatāvalokini om sambhara sambhara hū phaṭ svāhā iti mantraṃ saptavārān āvarttya prasāritadakṣiṇakarāṅgulapañcakavinirgatāmṛtapañcadhārābhi[:]pūritadvāramūlaniveśitasajalabalibhaktaśikyakāni māgadhena droṇena pravartti(ka)tāni paśyet | sakalapretapiśācāntaryaghanacchaṭātrayaṃ dattvā bodhisattvabaliṃ dadyāt | idānīṃ sarvvasattveṣvekaputrapremākārā maitrīm,duḥkhāduḥkhahetoḥ saṃsārasāgarāt samuddharaṇavāñchāsvabhāvāṃ karuṇām ,ratnatrayaśaraṇagamanāt samulla[sa]nmanaḥ prabhāvāṃ muditām,adhyāsaṅgaparilakṣaṇāmupekṣāṃ ca vibhāvya sarvvasattvārthodyuktacetā pariśuddhena gomayena viśuddhena ca vāriṇā om āḥ vajjarekhe hū iti maṇḍalādhiṣṭhitabhūbhāge caturasrādi caturṇāmanyatamamabhimatamaṇḍalakaṃ kṛtvā tanmadhye viśvavarṇāṣṭadalakamalavaraṭake sūryyamaṇḍalopari nīlahūkārapariniṣpannaṃ bhūsparśamudrādharaṃ kṛṣṇavarṇaṃ akṣobhyam ,tadanu pūrvvadale śukla om kāraniṣpannaṃ śuklavarṇaṃ bodhyaṅgau (grī)mudrādharaṃ vairocanam,tato dakṣiṇadale pītatrākārajaṃ pītavarṇaṃ varadamudrādharaṃ ratnasambhavam,tataḥ paścimadale raktahrī ḥ kārasambhūtaṃ raktavarṇaṃ samādhimudrādharaṃ amitābham,tata uttaradale śyāmakhakārajaṃ śyāmavarṇamabhayamudrādharamamoghasiddhiṃ ca bhāvayitvā,om āḥ vajrapuṣpe hū ityanena abhimantya sarvvamiṣṭataraṃ ḍhaukayet | ete pañcatathāgatāḥ kāṣāyavastraprāvṛtāḥ soṣṇīṣāḥ śiratuṇḍamuṇḍitāḥ sūryyamaṇḍalāvasthāḥ | vairocanaḥ paraśaśimaṇḍalī,tataścatvāro'kṣobhyābhimukhāḥ,akṣobhyastu sādhakābhimukhaḥ | eṣāmagrataḥ triśaraṇagāthāmimāṃ yathādhigama[mā]mukhīkurvvan tatreyaṃ triśaraṇagāthā -

 

namo buddhāya gurave namo dharmmāya tāyine |

namaḥ saṅghāya mahate tribhyo'pi satataṃ namaḥ ||

 

ratnatrayaṃ me śaraṇaṃ sarvvaṃ pratidiśāmyagham |

anumode jagatpuṇyaṃ buddhabodhau dadhe manaḥ ||

 

ābodheḥ śaraṇaṃ yāmi buddhaṃ dharmmaṃ gaṇottamam |

bodhau cittaṃ karomyepa svaparārthaprasiddhaye ||

 

utpādayāmi varabodhicittaṃ

nimantrayāmyahaṃ sarvvasattvān |

iṣṭāṃ cariṣye varabodhicārikāṃ

buddho bhaveyaṃ jagato hitāya||

 

deśanā sarvvapāpānāṃ puṇyānāṃ cānumodanā |

kṛtopavāsaṃ cariṣyāmi āryyāṣṭaṅgikapoṣadham ||

 

tataḥ -

śīlacandanaliptāṅgā dhyānaprāvaraṇāvṛtāḥ |

bodhyaṅgakusumākīrṇā viharaddhaṃ yathāsukham ||

 

iti paṭhitvā om vajramaṇḍala muḥ ityanena visarjayet | evaṃ mañjuśrīprabhṛtīnapi yathopadeśaṃ pūjayet |

|ṃaṇḍalapūjāvidhiḥ ||

 

dānaṃ gomayamambunā ca sahitaṃ śīlaṃ ca sammārjanaṃ

kṣāntiḥ kṣudrapipīlikāpanayanaṃ vīryyaṃ kriyāsthāpanam |

dhyānaṃ tatkṣaṇamekacittakaraṇaṃ prajñā surekhojjvalā(:)

etāḥ pāramitāḥ ṣaḍeva labhate kṛtvā munermaṇḍalam ||

 

bhavati kanakavarṇaḥ sarvvarogairvimuktaḥ

suramanujaviśiṣṭaścandra vaddīptakāntiḥ |

dhanakanakasamṛddho jāyate rājavaṃśe

sugatavaragṛhe'smin kāyakarmmāṇi kṛtvā ||

 

|ṃaṇḍalānuśaṃsā gāthā ||

 

pratyahaṃ maṇḍalaṃ kṛtvā puṣpagomayavāribhiḥ |

triṣkālaṃ gurave kiñcit dattvā bhaktyā(ktiṃ)ca vandayet ||

 

pareṣāṃ manasastuṣṭiṃ varjayedātmacetasaḥ |

sukhīṃ prāsādiko dhanyaḥ sukhāvatyāṃ sa jāyate ||

 

syāt ṣaṭpāramitāpūrī buddhādibhiradhiṣṭhitaḥ |

anantaguṇasampanno maṇḍalaṃ prakaroti yaḥ ||

 

||ityanuśaṃsā ||

 

prajñāpāramitāṃ samyak maṇḍalādividhānataḥ |

paṭhitvā pūjayennityaṃ tadarthamavagāhanam ||

ekagāthā caturgāthāṃ gāthādvitayadhāraṇīm |

ṣaṇmukhīṃ bhadracaryyāṃ ca triṣkālaṃ ca trikālataḥ ||

ekākṣarīmupādāya lakṣa yāvat samāhitaḥ |

akhaṇḍitasamādānoḥ yathālābhaṃ paṭhet sudhīḥ ||

 

buddhabodhisattvapaṭapustakapratimādīṃśca pūjayet |

|paṭapustakapūjāvidhiḥ ||

 

idānī mahāmaṇḍalavyūhatantrānusāreṇa sarvvakatāḍanavidhiratidiśyate -

 

namaḥ samantabuddhānāṃ om vajrapuṣpe svāhā | mṛttikāgrahaṇamantraḥ |

 

om vajrodbhavāya svāhā | bimbabalanamantraḥ |

om araje viraje svāhā | tailamrakṣaṇamantraḥ |

om dharmmadhātugarbhe svāhā | mudrākṣepanamantraḥ |

om vajramudgarākoṭana svāhā | ākoṭanamantraḥ |

om dharmmarate svāhā | ākarṣaṇamantraḥ |

om apratiṣṭhitavajre svāhā | sthāpanamantraḥ |

om sarvatathāgatamaṇiśatadīpte jvala jvala dharmmadhātugarbhe svāhā | pratiṣṭāmantraḥ |

om svabhāvaśuddhe āhara āhara āgaccha āgaccha dharmma dhātugarbhe svāhā | visarjjanamantraḥ |

 

om ākāśadhātugarbhe svāhā | kṣamāpanamantraḥ |

 

||iti sarvakatāḍanavidhiḥ ||

 

om namo bhagavate vairocanaprabharājāya tathāgatāyārhate samyaksambuddhāya,tadyathā,om sūkṣme sūkṣme same samaye śānte dānte samārope anālambe tarambe yaśovati mahāteje nirākulanirvvāṇe sarvvabuddhādhiṣṭhānādhiṣṭhite svāhā | anayā dhāraṇyā mṛtpiṇḍaṃ bālukāpiṇḍaṃ vā ekaviṃśativārān parijapya caityaṃ kuryyāt | yāvantastasmin paramāṇavastāvantyaḥ koṭyaḥ caityāni kṛtāni bhavanti,paramāṇusaṃkhyātāni puṇyāni pratilabhate,daśabhūmīśvaro bhavati,kṣipraṃ cānuttarāṃ samyaksambodhimabhisambhotsyata idamavocad bhagavān vairocanastathāgataḥ |

 

|ṃahānuśaṃsādhāraṇī ||

 

ye dharmmā hetuprabhavā hetuṃ teṣāṃ tathāgato hyavadat |

teṣāṃ ca yo nirodha evaṃvādī mahāśramaṇaḥ ||

 

iti gāthayā pratiṣṭhāṃ kṛtvā om mano bhagavate ratnaketurājāya tathāgatāyārhate samyaksambuddhāya,tadyathā,om ratne ratne mahāratne ratnavijaye svāhā ityanena caityavandanāṃ kuryyāt | anayā dhāraṇyā ekacaityavandanayā koṭicaityavandanā bhavati |

 

|ṃṛttikāsikatādicaityakaraṇavidhiḥ ||

 

etatsarvvaviśiṣṭapariṇāmanayā pariṇāmyamānaṃ viśiṣṭaphalāvāhakaṃ bhavatīti | prajñāpāramitoktena mahāpariṇāmena pariṇāmayeta| tadyathā,yathā te tathāgatā arhantaḥ samyaksambuddhā buddhajñānena buddhacakṣuṣā jānanti paśyanti tatkuśalamūlaṃ yajjātikaṃ yannikāyaṃ yādṛśaṃ yallakṣaṇaṃ yatsvabhāvaṃ yayā dharmmatayā sambidyate tathā anumode tatkuśalamūlam | yathā ca te tathāgatā arhantaḥ samyaksambuddhā abhyanujānanti pariṇāmyamānaṃ tatkuśalamūlamauttarāyāṃ samyaksambodhau tathāhaṃ pariṇāmayāmi iti | aparam -

 

anena cāhaṃ kuśalena karmmaṇā,

bhaveya buddho na cireṇa loke |

deśeya dharmmaṃ jagato hitāya,moceya sattvān bahuduḥkhapīḍitān ||

|puṇyānumodanāpariṇāmavidhiḥ ||

 

yasya yasya yadājīvyaṃ śuddhājīvyastadarjayet |

kṣāntyarthaṃ vyādhiśāntyarthaṃ bhaiṣajyamiva cintayet ||

 

tato yathāmilitānyeṣu om akāro mukhaṃ sarvvadharmmāṇāmādyanutpannatvāt om āḥ hūṃ phaṭ svāhā ityanena baliṃ dadyāt | om āḥ sarvvabuddhabodhisattvebhyo vajranaivedye hūṃ ityanena naivedyaṃ dadyāt | om hārīti mahāyakṣiṇi hara hara sarvvapāpān kṣīṃ svāhā iti paṭhitvā hārītibhakta piṇḍadvayaṃ dadyāt | agrapiṇḍāśibhyaḥ svāhā iti agrapiṇḍadānam | tadanu om āḥ hūṃ ityanena svapātrabhaktamadhiṣṭhāya yāvadviṣādidoṣaśāntyarthaṃ prathamato'nāmāṅguṣṭābhyāmupaspṛśya bhuñjīta | tadanu yathā sukhaṃ bhuktā utsṛṣṭamannaṃ om utsṛṣṭapiṇḍāśanebhyaḥ svāhā | utsṛṣṭapiṇḍaṃ dadyāt | pariśiṣṭamannamanabhisandhānenaiva parityajet | tathā ca -valiṃ dadyānnaivedyaṃ hārītimagrapiṇḍakam |

mahāphalopabhogyāya utsṛṣṭaṃ pañcamaṃ dadet ||

 

iti | tadanu ācamanādikaṃ kṛtvā pariśuddhabuddhiviśiṣṭasukhasamanvāgatasarvvasattvahita sukhāya idaṃ tridhā''varttayet -

 

rājā dānapatiścaiva ye cānye sattvarāśayaḥ |

prāpnuvantu sadā saukhyamāyurārogyasampadaḥ ||

 

iti | tadanu pariśuddhakāyavāṅmanaḥkarmmā yathecchaṃ viharet | anantaraṃ upaviśya jātakanidānoktadānakathayā kalyāṇamitraiḥ saha gatairvā sārddhaṃ dinamanudinaṃ vā'tivāhayet | tato vikālasandhyāyāmapi dhyānajapasaṃstavādikaṃ yathādhigamākhinnamānasaṃ kuryyāt | yugakārādimantreṇa dattabaliryoganidrayā supyāt | upāsakaśabdaḥ kathaṃ jātavyaḥ ?[u,iti ]--

 

udyukto buddhapūjāyāṃ upaśāntopaśāyakaḥ |

upakārāya sattvānāṃ upāyenānvito bhavet ||

 

pā,iti -

pāpānāvarjayennityaṃ pāpiṣṭhaiḥ saha saṅgatim |

pāpānnivārayan jantoḥ pāpaṃ sarvvatra deśayet ||

 

sa,iti -

samāropavinirmuktaḥ samādhau susamāhitaḥ |

sarvvadā paramānandau sambodhiṃ sādhayed budhaḥ |

 

ka,iti -

karoti sarvvadā yatnaṃ karuṇāṃ paripālayet |

kaṣṭenāpi na cāniṣṭaṃ karotyupakṛtiṃ parām ||

iti vacanāt |

 

akṣaracatuṣṭayānvito'yamupāsakaḥ pāṃrahṛtākuśalakarmmā upacitapuṇyasambhāro 'bhyāsavaśāt jāgraddaśāvat svapne'pi kuśalānyeva karoti |

 

pratibimbanibhaṃ paśyan jagat śuddhamanāvilam |

māyāpuruṣavat sarvvaṃ kuryyādanupalambhataḥ ||

 

ataścāvaivarttika ityabhidhīyate | evamahorātraṃ satatasamitaṃ puṇyasambhāramupārjjayan ābodhimaṇḍaparyyantaṃ sattvahitahetoḥ santiṣṭet |

 

nāmnā gaganagarbho'sau madhyamārthaparāyaṇaḥ(pañcaḥ)|

samādānaṃ karotyeva ādikarmma samāhitaḥ ||

vajjapīṭhāt samāyāto viprajanyaḥ sadāśayaḥ |

tasyābhyarthanayā caitadādikarmma kṛtaṃ mayā ||

 

iha hi gaganagarbhābhyarthanāto mayoktaḥ

katipayapadamātreṇādikarmmābhidhānataḥ |

aghatimiramapāsya klehanirghāta eṣa

aciramamalabuddherbodhaye'bhyāsataḥ syāt ||

 

ādikarmma vidhāyaitat yadalābhi śubhaṃ mayā |

ādikarmma vidhāyaitadutkṛṣṭaṃ labhatāṃ jagat ||

 

|kudṛṣṭinirghātanaṃ samāptamiti ||

 

tatrāvasthāḥ trayaḥ -- hetvavasthā nāma bodhicittāt prabhṛti bodhimaṇḍanivedanaṃ yāvat | phalāvasthā nāma samyksambodhijñānotpattau sarvvakleśaguṇaprahāṇiprāptyavasthā | sattvārthakriyāvasthā nāma  prathamadharmmacakrapravarttanāt prabhṛti āśāsanāntardhānaṃ yāvat |

 

tatra hetvavasthā trividhā;āśayāvasthā,prayogāvasthā,vasitāvasthā ceti | tatra āśayāvasthā sattvānirmokṣapraṇidhānam | taddheta[va]ścatvāraḥ tadyathā -

 

gotra-sanmitrakāruṇya-duḥkhābhīrutvahetavaḥ |

caturbhirpratyayairebhirbodhicittaṃ prajāyate ||

 

iti vacanāt | daśabhirarthairāśayāvasthā | tatra prayogo dvidhā | adhimukticittasya pāramitāḥ sapta | tatra adhimukticaritasya pāramitā daśa-

 

dānaṃ śīlaṃ kṣamā vīryyaṃ dhyānaṃ prajñā upāyatā |

praṇidhānaṃ balaṃ jñānaṃ matāḥ pāramitā daśa ||

 

bhūmiprāptasya catasṛbhiḥ sampadbhiḥ sampannaṃ āśayaprayoga-pratigrāhakadeyasampadbhiriti dānaṃ śīlaṃ kṣāntirvīryyaṃ dhyānaṃ prajñā upāyaḥ -----etāḥ sapta pāramitāḥ | adhimukti caryyācaritapāramitābhyo viśiṣyata iti dvividhā prayogāvasthā |

 

tatra vasitāḥ pañca,tadyathā - kleśa,upapatti,karmma,upāya,sattvaparipākāvasthā ceti |

 

tatra hetvavasthāsthitena sarvvamādikarmma karttavyam | phalāvasthāsatvārthakriyāvasthāsthitasya ca śākyamuneriva anābhogena ādikarmma pravarttata eva iti | vistareṇa kudṛṣṭinirghāte jñeyam |

 

|kudṛṣṭinirghātādivākyaṭippinikeyaṃ śrīmatpaṇḍitāvadhūtādvayavajjapādānāṃ kṛtiriyam |||