• Home
• Canon Text
• Romanized
• sūtrapiṭaka
• tantra
• kriyā tantra
• Atha ekaviṃśaḥ paṭalavisaraḥ

Atha ekaviṃśaḥ paṭalavisaraḥ

Technical Details

atha ekaviṃśaḥ paṭalavisaraḥ |



atha khalu bhagavān śākyamuniḥ punarapi śuddhāvāsabhavanamavalokya mañjuśriyaṃ kumārabhūtamāmantrayate sma | asti mañjuśrīḥ ! tvadīye kalpavisare sarvasādhanopayike mantracaryābhiyuktasya sādhanakāle sarvamantrāṇāṃ sarvakalpavistareṣu rāhurāgamanasurāṇāmadhipateḥ sarvagrahānāyakasya grahasaṃjñā candradivākarādiṣu nakṣatrayogena dṛśyante | ta śṛṇu sādhu ca suṣṭhu ca manasi kuru te bhāṣiṣye ||



evamukte bhagavatā śākyamuninā samyak sambuddhena mañjuśrīḥ kumārabhūtaḥ uttarāsaṅgaṃ kṛtvā bhagavatastriḥpradakṣiṇīkṛtya dakṣiṇaṃ jānumaṇḍalaṃ pṛthivyāṃ pratiṣṭhāpya yena bhagavāṃ tenāñjali pragṛhya bhagavataścaraṇayornipatya punarevotthāya bhagavantamanimiṣaṃ vyavalokayamānaḥ utphullanayano bhūtvā hṛṣṭatuṣṭo bhagavantamevamāha - tat sādhu bhagavāṃ nirdiśatu rāhorāgamanam ; yatra sattvānāṃ mantracaryābhiyuktānāṃ siddhikālaṃ bhaveyuriti sarvasattvānāṃ ca sukhodayaṃ śubhāśubhanimittaṃ vā; taṃ nirdiśatu bhagavāṃ | yasyedānīṃ kālaṃ manyase ||



atha khalu bhagavān śākyamuniḥ mañjuśriyasya kumārabhūtasya sādhukāramadāt | sādhu mañjuśrīḥ ! yastvaṃ tathāgatametamatha paripraśnase sarvasattvānāṃ ca hitāyodyuktaḥ | tena hi mañjuśrīḥ ! śṛṇu bhāṣiṣye | sarvasattvānāṃ nirdiśaśceti ||



ādau tāva grahaiḥ krūraiḥ rāhoścandramaṇḍale |

āgamodite kāle yathāvantaṃ nibodhitā ||

yadā devāsuraṃ yuddhaṃ vartate ca mahad bhayam |

tadāsau daityarājā vai dānavendro maharddhikaḥ ||

mahābhayaḥ pramāṇā vai samantāducchrito mahāṃ |

+ + + + + + + + + + sumeroradhiko bhavet ||

mahāpramāṇaḥ krūro'sau atidarpātidarpitaḥ |

prabhaviṣṇurgraho mukhyo yadā bheje surālayam ||

tataḥ pāṇinā parāmṛśya sumeruṃ devasammitim |

apsarāṃ prekṣate daityaḥ yadā kāle nabhastalam ||

tadā candramasapūrṇaḥ kare vāme sa daityarāṭ |

nānāmaṇayastasya kare kaṅkanatāṃ gatā ||

tadā bhuvi loke'smiṃ grahabhūteti kathyate |

yadā padmarāge'smiṃ arcirbhavati raktakā ||

tadā tārkikā mānavā āhuḥ āgreyaṃ maṇḍalaṃ vibhoḥ |

yadā tu nīlarakte'smiṃ prabhā nīlatāṃ vrajet ||

tadā nīlamiti jñeyaṃ śaśine bhāskare'pi vā |

māhendramiti kathyate tārkikā bhuvi mānavā ||

vāyavyamaṇḍalamityāhustārkikā eva te tadā |

vividhā ratnamālebhyo vividhā ratnasambhavā ||

vividhaṃ tārkike śāstre vividhā gatiyonijāḥ |

vividhaiva kriyā teṣāṃ vividhā phalasampadā ||

samyag jñānavihīnānāṃ bāliśānāmiyaṃ kriyā |

tasmāt tathāgataṃ jñānaṃ samyak tena niyojayet ||

asurasya tadā dṛṣṭiḥ ajñāneṣveva divaukasām |

rathaṃ sampūrṇayāmāsa śaśinasya mahātmane ||

yadā kāle bhuvi martyānāṃ rāhorāgamanaṃ bhuvi |

śaśimaṇḍalamākramya yadā tiṣṭhati sa grahaḥ ||

tadā mahad bhayaṃ vidyānakṣatreṣveva nibodhatām |

aśvinyeva yadā yuktaḥ śaśine bhāskaramaṇḍalau ||

ubhau tau yugmataḥ grāsaṃ divā rātrau ca kathyate |

aśvinyāgamanaṃ nityaṃ durbhikṣaṃ taṃ vidurbudhāḥ ||

bharaṇyāṃ tu yadā candraṃ ravervā maṇḍalāśrayet |

vividhā sasyaniḥṣpattiḥ subhikṣaṃ cāpi nirdiśet ||

kṛttikāsu yadā candraḥ rāhunā grasyate dhruvam |

rātrau vā yadi prabhāte vā yāmānte ninditaṃ hitam ||

tadā vindyā mahad duḥkhaṃ vyādhisambhavameva vā |

madhyadeśeṣu nānyatra bhavennakṣatramādibhiḥ ||

janapadeṣveva vaktavyo nṛpairbodhividhodbhavaiḥ |

mṛgaśirāsu yadā candraḥ bhāskaro vā nabhastale ||

rāhuṇā grastapūrvau tau astaṃ yātau maharddhikau |

pūrvadeśe narā yātu vyādhibhirhanyate tadā ||

nṛpādhyakṣā gatāyuṣyā tatra deśe vinirdiśet |

ārdrāyāṃ punarvasuścaiva grastau ca śaśibhāskarau ||

rudhirāktā mahīṃ sarvāṃ mlecchadeśeṣu kīrtayet |

anyonyahatavidhvastā hataprāṇā gatāyuṣā ||

nirdiṣṭā tatra deśe'smin pūrvamuttarayostadā |

nikṛṣṭā pāpakarmāṇaḥ mlecchataskaratāṃ gatāḥ ||

puṇyāśleṣau yadā candre bhāskare vā nabhastale |

rāhuṇā grastabimbā tau madhyāhne vārddharātrataḥ ||

tadā vidyānmahādoṣa paścādanyāṃ nṛpeśvarām |

maghāsu yadi grasyetau śaśibhāskaramaṇḍalau ||

rāhuṇā saha mudyanto astaṃ yātau grahottamau |

tadā prahāya taṃ vidyājjambūdvīpeṣu sarvataḥ ||

durbhikṣarāṣṭrabhaṅgaṃ ca mahāmāriṃ ca nirdiśet |

ubhau phalgunisaṃyuktau rāhurāgamanaṃ bhavet ||

madhyāhne'thavā rātre ca mucyate ca punaḥ kṣaṇāt |

subhikṣaṃ tato vidyājjambūdvīpeṣu dṛśyate ||

hastacitre yadā rāhuḥ grasate candrabhāskarau |

grastau saha mucyete astaṃ yātau ca duḥkhadā ||

mahāmāribhayaṃ tatra taskarāṇāṃ samantataḥ |

nṛpāśca nṛpavarā śreṣṭhā hanyante vyādhibhistadā ||

diśaḥ sarve samantādvai durbhikṣaṃ cāpi nirdiśet |

viśākhasvātinau yuktau nakṣatravarapūjitau ||

rāhorāgamanaṃ vidyāt paśūnāṃ pīḍasambhavām |

vividhā kulamukhyāstu hanyante śastribhistadā ||

jyeṣṭhānurādhasaṃyuktau nakṣatrau varavarṇitau |

rāhorāgamanaṃ tatra subhikṣaṃ vā vinirdiśet ||

mūlena yadi candrasthaḥ rāhurdṛśyati bhūtale |

udayantaṃ tadā grastaṃ uditaṃ vāpi sarvataḥ ||

astaṃ yātena tenaiva śaśino rāhuṇā sadā |

prācyādhyakṣo vinaśyeyuḥ pūrvadeśajanālayāḥ ||

mahāntaṃ śastrasampātaṃ durbhikṣaṃ cāpi nirdiśet |

paracakrabhayād bhinnā trastā gauḍajanā janā ||

rājā vai naśyate tatra vyādhinā saha mūrchitaḥ |

ubhau aṣādau tadākāle rāhurdṛśyati medinīm ||

tatra duḥkhaṃ mahāvyādhi tatra dṛśyati bhūtale |

nṛpamukhyāstadā sarve duṣṭacittā parasparam ||

dhaniṣṭhe śravaṇe caiva nirdiṣṭaṃ lokaninditam |

nānā gaṇamukhyā vai viśliṣṭānyonyatadbhuvā ||

pūrvabhadrapade caiva nakṣatre śatabhiṣe tathā |

rāhurāgamanaṃ dṛśyeta subhikṣaṃ caivaṃ nirdiśet ||

uttarāyāṃ yadā yuktaḥ nakṣatre bhadrapade tathā |

rāhurāgamanaṃ śreṣṭhaṃ divā rātrau tu ninditam ||

revatyāṃ tu yadā candraḥ rāhuṇā grasta sarvataḥ |

udayantaṃ tathā bhānorniśirvā candramaṇḍale ||

astaṃ yāto yadā rāhurgrahamukhyaiḥ sahottamaiḥ |

madhyadeśācca pīḍyante māgadho nṛpatervadhaḥ ||

etad gaṇitaṃ jñānaṃ mānuṣāṇāṃ mahītale |

nakṣatrāṇāmetat pramāṇaṃ caiva kīrtitam ||

aśakyaṃ mānuṣairanyaiḥ pramāṇaṃ grahayonitam |

nakṣatramālā vicitrā vai bhramate vai nabhastale ||

etanmānuṣāṃ saṅkhyāttato'nyad devayonijām |

yo yasya grahamukhyo vā kṣetrarāśisamoditā ||

nakṣatraṃ kathitaṃ pūrvaṃ tasya taṃ kurute'nyathā |

īṣat pramāṇaṃ na doṣo'sti bahuvācāsti ninditam ||

etat pramāṇakāle vai grahamukhyo'rthakṛt smṛtaḥ |

kālaṃ kathitaṃ jñeyaṃ niyamaṃ caiva kīrtyate ||

nakṣatrarāśisaṃyuktaḥ kampo nirghāt ulkinaḥ |

sagrahau yadi tatrasthau ravicandrau tu dṛśyate ||

ubhayāntaṃ tadā tasya nakṣatrāṃ jātibhūṣitām |

anyathā niṣphalaṃ vidyāt prabhāvaṃ vāpi nindite ||

tasmājjape tadā kāle mantrasiddhisamoditā |

dhūmravarṇaṃ yadākāśaṃ dṛśyate sarvataḥ sadā ||

tadā mahad bhayaṃ vidyāt paracakrabhayet tadā |

śaśine bhāskare cāpi dhūmravarṇo yadā bhavet ||

paryeṣā dvitrayo vā vā tatra vidyānmahad bhayam |

dhūmikāyāṃ bhaved vṛṣṭiḥ sarvakāle bhayānake ||

kutsitaṃ sarvato vidyāttatra vyādhisamāgamam |

grīṣme śarade caiva dhūmikā yadi jāyate ||

samantāt saptarātraṃ tu tatra vidyānmahad bhayam |

divā vā yadi vā rātrau dhūmikā yadi jāyate ||

nakṣatrairgrahacihnaistu tithivārāntareṇa vā |

pūrvavat kathitaṃ sarvaṃ yathā nirghāt ulkinām ||

taireva divasaiḥ pūrvaṃ dhūmikāyā niyojayet |

ardharātre'tha madhyāhne dhūmikā jāyate sadā ||

tatra vidyānmahodvegaṃ nṛpatīnā purottamām |

śarade yadi hemante grīṣme prāvṛṣe'pi vā ||

dhūmikā sarvato jñeyā nakṣatraiścaiva kīrttitaḥ |

śubhāśubhaṃ tathā jñeyaṃ divā vā yadi vāniśā ||

niḥphalaṃ cāpi vidyā vai saphalāṃ cāpi kīrttitām |

sarvataḥ bhūmikampe vāpi tatholkacaikato rāhusamāgamam ||

tatra dhūmo bhaved yadyat samantāścaiva nabhastale |

acirāt tatra tad rājyaṃ ghātyate śastribhiḥ sadā ||

prabhavaḥ sarvato deśe mṛtyuścaiva prakirtyate |

saptāhādvijayamukhyā bhuvi vātā sattvayonayaḥ ||

ghātyante sarvato nityaṃ śastribhirmṛtyuvaśānugā |

anyonyāparato rājyaṃ kṛpāvarjitacetasaḥ ||

vibhinnā śastribhiḥ kṣipraṃ vaṇijā nṛpayonayaḥ |

grīṣme sitavarṇastu nabho yatra pradṛśyate ||

mahāvyādhibhayaṃ tatra nīle caiva śivodayam |

pītanirbhāsamudyantaṃ savitā dṛśyate yadā ||

grīṣme ca kathitā mṛtyuḥ śaratkāle ca ninditam |

hemante ca vasante ca tāmravarṇaḥ pradṛśyate ||

anyathā pītanirbhāsau nindito lokavarjitaḥ |

śarade grīṣmato jñeyaḥ mitivarṇaḥ praśasyate ||

prāvṛḍkāle tathā śubhre pīto vā na ca + + + + |

mahāprabhāvasaṅkāśaṃ mahānīlasamaprabhaḥ ||

namo jñeyaṃ sadākālaṃ sarvasaukhyaphalapradam |

viparītaṃ tato vidyā deśamāvāsapīḍanam ||

sasyopaghātamāriṃ ca durbhikṣaṃ cāpi mucyate |

atikaṣṭaṃ surā hyetaṃ bhayaṃ vā rasadūṣitam ||

mahāpraṇādaṃ ghoraṃ ca śukre vai ca nabhastale |

tatkṣaṇādeva sarveṣāṃ nṛpatīnāṃ prāṇoparodhinam ||

tato'nyacchubhasaṃyuktaṃ śreyasā caiva kalpayet |

sagrahe bhāskare candre yadā rāho mahadbhaye ||

naśyante janapadāstatra vividhā karmayonijā |

tato'nyacchubhasaṃyuktaṃ śabdaṃ lokapūjitam ||

śreyasārthe niyoktāsau suraśreṣṭhā grahottamā |

vividhā mantra siddhyante vividhā mūlaphalapradā ||

vividhā vā na vā sarve vividhā prāṇasambhavāḥ |

anekākārasampannā svarūpā vikṛtāstadā ||

nānāpraharaṇāścaiva nānāśastrasamudbhavā |

sarvamatayo hyagrā mūlamantrasubhūṣaṇā ||

sarve te sādhyamāne vai siddhiṃ gaccheyu sagrahā |

grahe candre yadā bhāno rāhuṇārtho'pi sagrahe ||

tasmiṃ kāle tadā jāpī mantramāvartayet sadā |

sarve te varadāścaiva + + + + bhavanti te ||

sattvopakāraṃ phalaṃ hyetat pratiṣṭhā tatra dṛśyate |

sidhyante mantrarāṭ kṣipraṃ grahe japtā sarāhuke ||

saptabhirdivasairmāsaiḥ pakṣaiścāpi supūjitāḥ |

mantrāṇāṃ siddhinirdiṣṭā sagrahe candrabhāskarau ||

yāmānte ardharātre vai siddhiruktā tathāgataiḥ |

vidhiyuktāstu vai mantrā vihīnāṃ neṣyate dhruvam ||

brahmasyāpi mahātmānaṃ kiṃ punarbhuvi mānuṣām |

śakrasyāpi ca devasya rudrasyāpi triśūline ||

viṣṇoścakragadāhaste tārkṣasyāpi mahātmane |

neṣyate siddhireteṣāṃ vidhihīnena karmaṇām ||

mantre sujapte yukte ca tantrayuktena hetunā |

sidhyante itarasyāpi + + + + + + + + + + + ||

vidhinā mānuṣairmuktā vidyātattvasubhūṣitā |

sidhyante sagrahā kṣiptā japtā kāleṣu yojitā ||

dadāti phalasaṃyuktaṃ vidyā sarvatra yojitā |

hetukarmaphalā vidyā + + + hetudūṣaṇī ||

karma sahetukaṃ vidyā vidyāddhetuphalodayā |

vidyā karmaphalaṃ caiva hetu cānya niyojayet ||

catuḥprakārāttathā vidyā caturthā karmasu yojitā |

dadyāt karmaphalaṃ kṣipraṃ sā vidyā hetuyojitā ||

sā vidyā phalato jñeyā buddhaiścāpi supūjitā |

vidyā sarvārthasaṃyuktā pravarā sarvakarmikā ||

pradadyuḥ karmato siddhiṃ sā vidyā karmasu yojitā |

śreyasā caiva yojayet na mantrāṇāṃ gatigocaram ||

prabhāvaṃ mantrasiddhiṃ ca lokatattvaṃ nibodhatām |

niḥphalaṃ karmato vā vā phalaṃ karmaṃ ca tatra ca ||

+ + + + + + + lokatattvaniyojitām |

dṛśyate phalaheturvā mantrā buddhaiśca varṇitā ||

na phalaṃ karma kramaṃ hanti nāphalaṃ karma kriyā parā |

phalaṃ karmasamārambhāt siddhi mantreṣu jāyate ||

guṇaṃ dravyakramāyogā kramaṃ dravyākriyākramā |

mantrarāṭ siddhyate tatra phalā karmeṣu yojitā ||

vidhidravyasamāyuktaḥ vṛttastho karmayojitaḥ |

na yoniḥ karmato jñeyaṃ yo niyuktaḥ sadā phale ||

na bṛhatkarmatāṃ yānti siddhimantrakṣaraṃ sadā |

tadā mantrī japenmantraṃ vidhiyonisamāśrayā ||

kālakramā guṇāścaiva vidhiyonigatisaugataḥ |

siddhyante mantrarāṭ sarve vidhikālārthasādhikā ||

na guṇaṃ dravyato jñeyaṃ nādravyaṃ guṇamucyate |

guṇadravyasamāyogāt saṃyogānmantramarcayet ||

arcitā devatāḥ sarve āmukhenaiva yojayet |

tatpramāṇaṃ guṇaṃ dravyaṃ kṣipramantreṣu sādhayet ||

kramaḥ kālaguṇopetaḥ guṇakālakramakriyā |

caturdhā dṛśyate siddhiḥ mantreṣveva suyojitā ||

prabhāvaṃ guṇavistāraṃ sattvanītisukhodayam |

pradadyuḥ sarvato mantrā guṇeṣveva niyojitāḥ ||

prabhavaṃ sarvataḥ karma guṇadravyaṃ ca siddhyate |

nāpi dravyā guṇāmetā dravyakarmācca varjitā ||

na siddhiṃ dadyu tatkṣipraṃ yatheṣṭamanasodbhavāt |

mānasā mantranirdiṣṭā na vācā manasā vinā ||

vānyato mantravijñeyā na vānyā manase vinā |

nānyakarmā manaścaiva saṃyogāt siddhiriṣyate ||

na dṛṣṭikarmato hīnā neṣṭaṃ karmavivarjitam |

samyag dṛṣṭi tathā karmaṃ vāk cittaṃ ca yojitam ||

siddhyante devatāḥ kṣipraṃ mantratantrākṣaroditam |

samyagdṛṣṭisamāyogā samyak karmāntayojayoḥ ||

+ + + + + + mantrā siddhyanti sarvadā samyak |

karmāntavāksumopetaṃ samyagdṛṣṭisuyojitam ||

siddhyante sarvato mantrāḥ samyak karmāntayojitāḥ |

na cittena vinā mantraṃ na smṛtyā saha cittayoḥ ||

samyak smṛtyā ca citte ca dṛśyate mantrasiddhaye |

na smṛtyā ca vinirmuktā mantra uktastathāgataiḥ ||

smṛtyā samādhibhāvena samyak tena niyojitāḥ |

dṛśyante ūrjitaṃ mantraiḥ sidhyante ca samādhinā ||

samyaksamādhino bhāvo mantrā lokasupūjitām |

tatprayogā imā mantrāḥ samādhyā paribhāvitā ||

sidhyante mantrarāṭ tatra yogaṃ cāpi supuṣkalam |

samyak samādhibhirdhyeyaṃ mantraṃ dhyānādikaṃ param ||

sidhyante yogino mantrā nāyogāt siddhimucyate |

yo mayā kathitaṃ pūrvaṃ samyaguktasuyojitam ||

nānyathā siddhimityāhurmunayaḥ sattvavatsalāḥ |

nāsaṅkalpād bhavenmantraḥ samyak tattvārthayojitāḥ ||

saṅkalpā mantra sidhyante samyak te vidhiyojitāḥ |

na pūjya mantrarāṭ sarve samyak saṅkalpavarjitāḥ ||

sidhyante sarvato mantrāḥ samyagājīvayojitā |

samyak saṅkalpato jñeyaṃ mantreṣveva sukhodayam ||

ājīve śuddhitāṃ yāti mantrā samyak prayojitā |

sidhyante bhuvi nirdiṣṭā mantramukhyā suyojitā ||

ājīvaṃ hi phalaṃ yukto samyageva suyojayet |

samyak sañjīvarato mantrī śuddhacittaḥ sadā śucau ||

śucinaḥ śucikarmasya śucikarmāntacāriṇaḥ |

sidhyante śucino mantrā kaśmalākaśmale sadā ||

kravyādā yetarā mantrā ye cānye parikīrtitā |

sidhyante mantriṇāṃ mantrāḥ kravyādeṣveva bhāṣitāḥ ||

rudraviṣṇurgrahā corai garuḍaiścāpi maharddhikaiḥ |

yakṣarākṣasagītāstu sidhyante mantrakaśmalāḥ ||

vividhairbhūtagaṇaiścāpi piśācairmantrabhāṣitāḥ |

svayaṃ na sidhyate vidhinā hīnā aśaucācārarateṣvapi ||

vidhinā yojitā kṣipraṃ aśauceṣveva siddhidā |

tasmānmantraṃ na kurvīta vidhihīnaṃ tu karmayoḥ ||

sidhyante sāśravā mantrā vidhikarmasuyojitāḥ |

sādhyāstu tathā mantrā āryā buddhaistu bhāṣitā ||

teṣāṃ siddhi vinirdiṣṭā mārgeṣveva suyojitā |

āryāṣṭāṅgikaṃ mārga catuḥsatyasuyojitam ||

caturdhyāna sadāceyaṃ catvāraścaraṇāśritāḥ |

bhidyante mantramukhyāstu pravarā buddhopadeśitā ||

anākhyeyasvabhāvaṃ vai gaganābhāvasvabhāvatām |

mantrāṇāṃ vidhinirdiṣṭāṃ āryāṇāṃ ca mahaujasām ||

bhūmyānāṃ vidhinirdiṣṭā siddhimārgavivarjitam |

vidyānāṃ kathayiṣye'haṃ tannibodhya divaukasāḥ ||

daśakarmapathe mārge kuśale caiva subhāṣite |

sidhyante divyamantrāstu vidhidṛṣṭena karmaṇā || iti |



bodhisattvapiṭakāvataṃsakānmahāyānavaipulyasūtrādāryamañjuśrīmūlakalpādekunaviṃśatipaṭalavisarāt pañcamaḥ

grahotpādaniyamanimittamantrakriyānirdeśaparivartapaṭalavisaraḥ parisamāpta iti ||