• Home
• Canon Text
• Romanized
• sūtrapiṭaka
• mahāyānasūtra
• Yakṣāśrayarakṣāparivartaḥ

Yakṣāśrayarakṣāparivartaḥ

Technical Details

|| yakṣāśrayarakṣāparivartaḥ ||



yaḥ kaścicchrīmahādevi śrāddhaḥ kulaputro vā kuladuhitā vātītānāgatapratyutpannānāṃ buddhānāṃ bhagavatāmacintyāṃ mahatīṃ vipulāṃ vistīrṇāṃ sarvopakaraṇaiḥ pūjāṃ karttukāmaḥ syāt | atītānāgatapratyutpannānāṃ buddhānāṃ bhagavatāṃ gambhīraṃ buddhagocaraṃ parijñātukāmo bhavet | tenāvaśyaṃ tatra pradeśe vihāre vāraṇyapradeśe vā yatrāyaṃ suvarṇaprabhāsottamaḥ sūtrendrarājaḥ vistareṇa saṃprakāśyate | tenāvikṣiptacittenāvirahitaśrotreṇāyaṃ suvarṇaprabhāsottamaḥ sūtrendrarājaḥ śrotavyaḥ ||



atha khalu bhagavānimamevārthaṃ bhūyasyā mātrayā saṃparidīpayamānastasyāṃ velāyāmimā gāthā abhāṣata ||

ya icchetsarvabuddhānāṃ pūjāṃ kartumacintiyām |

gambhīraṃ sarvabuddhānāṃ gocaraṃ ca prajanitum || 1 ||

sarvadeśopasaṃkramya vihāraṃ layanaṃ tathā |

yāvaddeśīyate sūtraṃ svarṇabhāsottamaṃ tvidam || 2 ||

acintiyamidaṃ sūtramanantaguṇasāgaram |

mocakaṃ sarvasattvānāmanekaduḥkhasāgarāt || 3 ||

ādiṃ sūtrasya paśyāmi madhyamanidhanaṃ tathā |

atigambhīrasūtrendra upamānaṃ na vidyate || 4 ||

na gaṅgārajasā caiva na dharaṇyāṃ na sāgare |

na cāmbaratalasthasya kiṃcicchakyopamā kṛtum || 5 ||

dharmadhātupraveśena praveṣṭavyaṃ tadantaram |

yatra dharmātmakastūpaṃ gambhīraṃ supratiṣṭhitam || 6 ||

tatra ca stūpamadhye'sminpaśyecchākyamuniṃ jinam |

idaṃ sūtraṃ prakāśantaṃ manojñena svareṇa ca || 7 ||

yāvanti kalpakoṭyo vai asaṃkhyeyā acintiyāḥ |

divyamānuṣyakāṇyeva sukhāni hyanubhūyate || 8 ||

yadā sa evaṃ jānīyādyattatra sūtra śrūyate |

evamacintiyaṃ mahyaṃ puṇyaskandhaṃ samārjitam || 9 ||

ākramedyojanaśataṃ pūrṇamagnikhadāvṛtam |

yaḥ sakṛcchuṇituṃ sūtraṃ sahetu vedanāṃ bhṛśam || 10 ||

samanantarapraviṣṭasya vihāraṃ layanaṃ tathā |

apagacchati pāpāni sarvaduḥsvapnalakṣaṇā || 11 ||

grahanakṣatrapīḍā ca kākhordagrahadāruṇā |

samanantarapraviṣṭasya sarve bhonti parāṅmukhāḥ || 12 ||

tādṛśamāsanaṃ tatra kurvīta padmasaṃnibham |

yādṛśaṃ nāgarājaiśca darśitaṃ supināntare || 13 ||

tatrāsanopaviṣṭasya idaṃ sūtraṃ prakāśayet |

likhitaṃ vācayeccaiva tathaiva paryavāpnuyāt || 14 ||

avatīryāsanādeva anyadeśe gato bhavet |

dṛśyante pratihāryāṇi tatrāsanagatāni ca || 15 ||

dharmabhāṇakarūpaṃ ca kadācittatra dṛśyate |

kadācidbuddha rūpaṃ ca bodhisattvaṃ kadācana || 16 ||

samantabhadrarūpāṇi kvacinmañjuśriyastathā |

kvacinmaitraiyarupāṇi dṛśyante tatra āsane || 17 ||

kvacitkevalamābhāsaṃ kvaciddevopadarśanam |

muhūrtenābhidṛśyante punaścāntarahāyiṣu || 18 ||

sarvatra saṃsiddhikaraṃ praśastaṃ buddhaśāsanam |

dhanyamaṅgalasampannaṃ saṃgrāme ca jayāvaham || 19 ||

jambudvīpamidaṃ sarvaṃ yaśasā pūrayiṣyati |

sarve ca ripavastasya nirjitā bhonti sarvathā || 20 ||

nihataśatruḥ sadā bhoti sarvapāpavivarjitaḥ |

sadā vijitasaṃgrāmaḥ śriyā sa ca pramodati || 21 ||

brahmendrāstridaśendrāśca lokapālāstathaiva ca |

vajrapāṇiśca yakṣendraḥ saṃjñeyaśca nararṣabhaḥ || 22 ||

anavatapta nāgendraḥ sāgaraśca tathaiva ca |

kiṃnarendrāḥ surendrāśca garuḍendrāstathaiva ca |

etāṃśca pramukhān kṛtvā sarvāṇi devatāni ca || 23 ||

te ca tā nityaṃ pūjanti dharmastūpamacintiyam |

praharṣitā bhaviṣyanti dṛṣṭvā sattvāḥ sa gauravāḥ || 24 ||

te'pyevaṃ cintayiṣyanti devendrāḥ sarva uttamāḥ |

devatāścaiva tāssarvā vakṣyanti ca parasparam || 25 ||

etā paśyatha sarvāṇi tejaḥ śrīpuṇyasaṃcitā |

uptakuśalamūlena āgtāste narā iha || 26 ||

ya imaṃ sūtragambhīraṃ śravaṇārthamihāgatāḥ |

acintiyaprasādena dharmastūpe sagauravāḥ || 27 ||

ete kāruṇikā loke ete sattvahitaṃkarāḥ |

ete gambhīradharmāṇāṃ saddharmarasabhojanam || 28 ||

dharmadhātupraveśena ya ete praviśanti ca |

ye śṛṇvanti idaṃ sūtraṃ ye cānyāñśrāvayanti ca || 29 ||

buddhā śatasahasrāṇi tebhiste pūrvapūjitāḥ |

etena kuśalamūlena idaṃ sūtraṃ śṛṇvanti ca || 30 ||

te sarve devarājendrāḥ sarasvatī tathaiva ca |

śrīśca vaiśravaṇaścaiva tathā caturmahādhipāḥ || 31 ||

yakṣaśatasahasrebhirṛddhimadbhirmahābalaiḥ |

teṣāṃ rakṣāṃ kariṣyanti divārātrāvatandritāḥ || 32 ||

mahābalaiśca yakṣendrairnārāyaṇamaheśvarau |

aṣṭāviṃśatiścāpyanye saṃjñeyapramukhāṇi ca || 33 ||

yakṣaśatasahasrebhirṛddhimadbhirmahābalaiḥ |

teṣāṃ rakṣāṃ kariṣyanti sarvatrāsabhayeṣu ca || 34 ||

vajrapāṇiśca yakṣendraḥ pañcayakṣaśatairapi |

sarvebhi bodhisattvebhisteṣāṃ rakṣāṃ kariṣyati || 35 ||

maṇibhadraśca yakṣendraḥ pūrṇabhadrastathaiva ca |

kumbhīro'ṭāvakaścaiva piṅgalaśca mahābalaḥ | 36 ||

ekaikaścaiva yakṣendraḥ pañcayakṣaśtairvṛtaḥ |

teṣāṃ rakṣāṃ kariṣyati yebhiḥ sūtramidaṃ śrutam || 37 ||

citrasenaśca gandharvo jinarājo jinarṣabhaḥ |

maṇikaṇṭho nīlakaṇṭhaśca varṣādhipatireva ca || 38 ||

mahāgrāso mahākālaḥ svarṇakeśī tathaiva ca |

pāñcikaśchagalapādaśca mahābhāgastathaiva ca || 39 ||

praṇālī mahāpālaśca markaṭo vālireva ca |

sūciromaḥ sūryamitro ratnakeśastathaiva ca || 40 ||

mahāpraṇālī nakulaḥ kāmaśreṣṭhaśca candanaḥ |

nāgāyano haimavataḥ sātāgiristathaiva ca || 41 ||

sarve ta ṛddhimantaśca mahābalaparākramāḥ |

teṣāṃ rakṣāṃ kariṣyanti yeṣāṃ sūtramidaṃ priyam || 42 ||

anavatapto hi nāgendraḥ sāgaro'pi tathaiva ca |

mucilinndairelāpatrau ubhau nandopanandakau || 43 ||

nāgaśatasahasrebhirṛddhimadbhirmahābalaiḥ |

teṣāṃ rakṣāṃ kariṣyanti sarvato bhayabhairavāt || 44 ||

valī rāhurnamuciśca vemacitraśca saṃvaraḥ |

prahrādaḥ kharaskandhaśca tathānye cāsurādhipāḥ || 45 ||

asuraśatasahasrebhirṛddhimadbhirmahābalaiḥ |

teṣāṃ rakṣāṃ kariṣyanti utpātabhayabhairavāt || 46 ||

hārītī bhūtamātā ca pañcaputraśatairapi |

teṣāṃ rakṣāṃ kariṣyanti saptamātṛsthitāni ca || 47 ||

caṇḍā caṇḍālikā caiva yakṣiṇī caṇḍikā tathā |

dantī ca kūṭadantī ca sarvasattvaujahāriṇī || 48 ||

ete sarva ṛddhimanto mahābalaparākramāḥ |

teṣāṃ rakṣāṃ kariṣyanti samantena caturdiśaḥ || 49 ||

sarasvatī ca pramukhā devatā ca acintiyā |

tathā śrīpramukhāścaiva sarvāṇi devatāni ca || 50 ||

pṛthivī devatā caiva phalaśasyādhidevatā |

ārāmavṛkṣacaityāni vāsinyonadi devatā || 51 ||

te sarve devatāsaṃghāḥ supraharṣitacetasāḥ |

teṣāṃ rakṣāṃ kariṣyanti yeṣāṃ sūtramidaṃ priyam || 52 ||

yojayanti ca te sattvā āyurvarṇabalena ca |

śrīpuṇyatejalakṣmībhiste nityālaṃkaronti ca || 53 ||

grahanakṣatrapīḍāśca sarvāste śamayanti ca |

alakṣmīpāpaduḥsvapnaṃ sarve te nāśayanti ca || 54 ||

pṛthivīdevatā caiva gambhīrā ca mahābalā |

suvarṇaprabhāsottamasūtrendrarasatarpitā || 55 ||

aṣṭaṣaṣṭisahasrāṇi śatāni yojanāni ca |

yāvadvajratalasthānaṃ varghate pṛthivīrasaiḥ || 56 ||

pūrṇaṃ ca śatayojanaṃ purastātsaṃnivartati |

ūrdhvaṃ snehayate mahī itaḥ sūtraśravaṇabalāt || 57 ||

sarvāśca devatāścāpi daśadikṣu vyavasthitāḥ |

suvarṇaprabhasottamasūtrendrarasatarpitāḥ || 58 ||

ojovanto varā bhonti lakṣmīvīryavalānvitāḥ |

sukhena prīṇitā bhonti nānārasasamarpitāḥ || 59 ||

sarvatra jambudvīpe'sminphalaśasyavanadevatāḥ |

praharṣitā bhaviṣyanti iha sūtre prakāśane || 60 ||

śasyāni ca tṛṇānyeva vicitrakusumāni ca |

vicitrāḥ phalavṛkṣāśca rohayanti samantataḥ || 61 ||

sarvāṇi phalavṛkṣāṇi ārāmāṇi vanāni ca |

supuṣpitaṃ kariṣyanti nānāgandhapramoditam || 62 ||

vicitrebhiśca puṣpebhirvicitrebhiḥ phalairapi |

sarvāstṛṇavanaspatyo rohayanti mahītale || 63 ||

sarvatra jambudvīpe'sminnāgakanyā acintiyāḥ |

prahṛṣṭacetasodbhūtāḥ padminīṣūpasaṃkraman || 64 ||

rohayanti vicitrāṇi sarvāsu padminīṣu ca |

padmakumudotpalāni ca puṇḍarīkastathaiva ca || 65 ||

dhūmātra jālinī muktaṃ bhavate gagaṇaṃ śubham |

tamorajovinirmuktā diśo bhonti prabhāsvarāḥ || 66 ||

sūryaḥ sahasrakiraṇai raśmijālena suprabhaḥ |

gambhīreṇāvabhāsena harṣitaścodayiṣyati || 67 ||

jambūnadasuvarṇasya vimānāntarasaṃsthitaḥ |

sūryendradevaputrāśca itaḥ sūtrāt sutarpitāḥ || 68 ||

upayānti jambudvīpe sūtrendrāḥ saṃpraharṣitāḥ |

anantaraśmijālena bho bhāsyanti samantataḥ || 69 ||

sahabodhitamātreṇa raśmijālapracodane |

nānāpadminīsaṃchannā kamalā bodhayiṣyanti || 70 ||

sarvatra jambudvīpe'sminnānāśasya phalauṣadhīḥ |

paripācayanti samyak taṃ cātapayate mahim || 71 ||

candrasūryau viśeṣeṇa avabhāsetāṃ tadantaram |

samyagvahanti nakṣatrā vātavarṣaṃ tathaiva ca || 72 ||

subhikṣaṃ bhavate sarvaṃ jambudvīpe samantataḥ |

viśeṣeṇa ca tadrāṣṭraṃ yatra sūtramidaṃ bhavet || 73 ||



iti śrīsuvarṇaprabhāsottamasūtrendrarāje yakṣāśrayo

nāmarakṣāparivartaḥ pañcadaśamaḥ ||