• Home
• Canon Text
• देवनागरी
• शास्त्रपिटक
• मध्यमक
• प्रतीत्यसमुत्पादहृदयकारिका

प्रतीत्यसमुत्पादहृदयकारिका

Technical Details

प्रतीत्यसमुत्पादहृदयकारिका

नागार्जुनकृता


द्वादश येऽङ्गविशेषा मुनिनोद्दिष्टाः प्रतीत्यसम्भूताः।

ते क्लेशकर्मदुःखेषु सङ्‍गृहीतास्त्रिषु यथावत्॥१॥



आद्याष्टमनवमाः स्युः क्लेशाः कर्म द्वितीयदशमौ च।

शेषाः सप्त च दुःखं त्रिसङ्‍ग्रहा द्वादश तु धर्माः॥२॥



त्रिभ्यो भवति द्वन्द्वं द्वन्द्वात्प्रभवन्ति सप्त सप्तभ्यः।

त्रय उद्भवन्ति भूयस्तदेव [तु] भ्रमति भवचक्रम्॥३॥



हेतुफलञ्च [हि]सर्वं जगदन्यो नास्ति कश्चिदिह सत्त्वः।

शून्येभ्य एव शून्या धर्माः प्रभवन्ति धर्मेभ्यः॥४॥



स्वाध्यायदीपमुद्रादर्पणघोषऽर्ककान्तबीजाम्लैः।

स्कन्धप्रतिसन्धिरसङ्‍क्रमश्च विद्वद्भिरवधार्यौ॥५॥



य उच्छेदं प्रकल्पयत्यतिसूक्ष्मेऽपि वस्तुनि।

प्रतीत्यसम्भवस्यार्थमविज्ञः स न पश्यति॥६॥



नापनेयमतः किञ्चित् प्रक्षेप्यं नापि किञ्चन।

द्रष्टव्यं भूततो भूतं भूतदर्शी विमुच्यते॥७॥



प्रतीत्यसमुत्पादहृदयकारिका

आचार्य नागार्जुनकृता

समाप्ता।