• Home
• Canon Text
• Romanized
• śāstrapiṭaka
• yoginītantraṭīkā
• 5 mantroddhāravidhiḥ

5 mantroddhāravidhiḥ

Technical Details

 

[atha mantroddhāravidhiḥ]

mantroddhāramataḥ paramabhidhāsye vajrayoginīhṛdayam |

karṇātkarṇamupāgatamāsyādāsyaṃ tathā kramataḥ ||1||

 

mantroddhāramityādi| mantroddhāramabhidhāsya iti sambandhaḥ|ataḥ paramiti| āveśādyanantaraṃ paraṃ śreṣṭhaṃ vā| vajrayoginīhṛdayamiti| kolamukhyā hṛdayaṃ hṛdayamantramityarthaḥ| hṛdayamiva hṛdayaṃ vā| karṇātkarṇamiti karṇākarṇikayā| upāgataṃ samāyātam| atirahasyabhūtatvāditi bhāvaḥ| āsyādāsyamiti| ekaguruvaktrādaparaguruvaktramityarthaḥ| tatheti| avyabhicā(ca)ritavṛttitayā dīpāddīpāntaramiveti bhāvaḥ| kramata iti| paripāṭyā vetyarthaḥ||1||

 

pūrvoditamiva cakraṃ saṃlikhya marudgaṇālayopetam |

tatra likhet paripāṭita āliṃ kāliṃ tathaivaikonām ||2||

 

     cakramāha- pūrvoditamivetyādi| ālimakārādiṣoḍaśasvarān| tathā tenaiva krameṇa kāliṃ kakārādihakāraparyantaṃ trayastriṃśadakṣarāṇi| likhediti sambandhaḥ| ekonāmiti| kṣakārarahitāṃ ṣakārakakārābhyāmeva tasyoktatvāt| kiṃkṛtvetyāha-pūrvoditamiva cakraṃ saṃlikhyeti| pūrvoditamiva cakraṃ dharmodayākāraṃ likhitvā tatra madhye likhedityarthaḥ| ivaśabdastu  dharmodayākāramātrasūcanārthaḥ,pūrvoktacakrasya devīmantralikhitatvāt| marudgaṇālayopetamiti| marudgaṇā ūnapañcāśavāyavastatsaṃkhyenālayena sthānenopetamupagatam| ūnapañcāśadapi koṣṭhakāni dharmodayākārāṇīti bhāvaḥ| uktañca śrīcakrasaṃvare- "sarva(rvaṃ)dharmodayaṃ viśvam"iti| paripāṭita iti kramataḥ| upadeśāgataścakrakramo likhyate-

 

  vidhu dahana bāṇa muni nava śaṃkara madana krameṇa koṣṭhānām| dharmodayākṛtīnāṃ kuryādupadeśato nyāsaḥ (sam)|

 

   dharmodayāṃ likhitvā rekhātritayasvarūpiṇīṃ purataḥ|

   yā yā yathā trirekhā ṣaṭ ṣaṭ pradeśā tathā tathā madhye||

 

   iti sapta saptaguṇitavyāni saṃlikhya gṛhāṇi dakṣiṇāvartaiḥ|

   varaṭake prathamamakāro nipatati madhye sa ca hakāraḥ|

 

   triguṇaviśuddhayā tridalaṃ kamalaṃ tasmin varṇāśca pavanaviśuddhayaiva dharmodayāsu līnāḥ| pavana ityeva sarvaṃ saṃkalitam|

 

   akārarūpiṇī devī kiñjalke saṃvyavasthitā|

   hakārarūpī bhagavān heruko madhyadeśagaḥ||2||

 

jhādharagaṃ ḍādharasthaṃ hādharagavibhūṣitaṃ samāyuktam |

trikamādito vilikhya sadakṣaraṃ tattvaparidīpi ||3||

 

  mantroddhāramāha-jhādharagetyādi| trikamādito vilikhyamiti sambandhaḥ| avyaktaguṇasaṃdohe napuṃsakaliṅgam| kiṃ tadityāha-jhādharagaṃ jhādharasthamiti  jhakārasyādharago'dhasi sthitaḥ,akāra ityarthaḥ| ḍādharasthamukāraḥ| hādharagavibhūṣitamiti hakārādharageṇa makāreṇa śirasyaṅkitam| samāyuktamiti| akārokārābhyāmokāraḥ,makārasya sthāne binduḥ| sendurityupadeśato boddhavyaḥ| prathamametadeva trikam omkārasvarūpaṃ likhanīyamityarthaḥ| om om om| sadakṣaramiti viśiṣṭārthapratipādakatvāt| indubindusamāyogādeva pavanarūpasyokārasya śūnyatāyāmakārarūpiṇyāṃ laya iti omkāraśabdasyāmnāyārthaḥ| tritvaṃ tu kāyavākcittarūpeṇaikaṃ (kya)pratipādanārtham| ata eva tattvaparidīpi tattvaprakāśakamityarthaḥ||3||

 

bhordhvagataṃ chordhvasthitasametaṃ ṭordhvasthitaṃ tadanu lekhyam |

ḍādharayutaṃ ṣādharagaṃ ṣordhvasthitayuktaśordhvagatam ||4||

 

    aparamāha-bhordhvagatamityādi| bhakārasyordhvagataṃ sakāraḥ| sa|  chordhvasthitasametaṃ ṭordhvasthitamiti| chordhvasthitena ba (va)kāreṇa sametaṃ saṃyuktam| ṭordhvasthitaṃ rephaḥ| tadanu lekhyaṃ tadanantara (raṃ)likhanīyamityarthaḥ| rva| ḍādharayutaṃ ṣādharagamiti| ḍakārasyādharam ukāraḥ,tena yutaṃ ṣādharagamiti bakāraḥ| bu| ṣordhvasthitayuktaśordhvagatamiti| ṣakārasyordhvasthitaṃ dhakārastena yuktaṃ  saṃyuktaṃ śakārasyordhvagataṃ dakāraḥ| ddha| likhyamiti sarvatra yojyam||4||

 

ñādharayutalṛtalasthaṃ ṭādharayutapordhvasaṃsthitaṃ tadanu |

ṭhādharagānvitaphordhvagamaivāmayutaṃ haṭāntaḥstham ||5||

 

    aparamāha- ñādharayutalṛtalasthamityādi| ñakārasyādharagam ākāraḥ,tena yutaṃ lṛkārasya talasthaṃ ḍakāraḥ| ḍā| ṭādharayutapordhvasaṃsthitaṃ  tadanviti| ṭakārasyādharam ikārastena yutaṃ pakārasyordhvasaṃsthitaṃ kakāraḥ| tadanu tadanantaraṃ lekhyam| ki| ṭhādharagānvitaphordhvagamiti|ṭhasyādharagam ī,tenānvitaṃ phakārasyordhvagaṃ nakāraḥ| nī| aivāmayutaṃ haṭāntaḥ sthamiti| aikārasya vāma ekāraḥ| tena yutaṃ hakāraṭakārayorantaḥsthaṃ yakāraḥ| ye||5||

 

casamadhyagataṃ ṭhasavyagasametaṃ bhādharasusaṃsthitam |

tadanu hathamadhyagataṃ tavāmagasaṃyuktaṃ ṭhalamadhyagaṃ paścāt ||6||

 

     punarāha-casamadhyagamityādi| cakārasakārayormadhyagaṃ ba(va)kāraḥ| va| ṭhasavyagasametaṃ bhādharasusaṃsthitamiti| ṭhasavyagena repheṇa sametaṃ saṃyuktaṃ bhakārasyādharasusaṃsthitaṃ jakāraḥ| tadanu lekhyamiti yojyam| jra| hathamadhyagatamiti hakārathakārayormadhyagaṃ vakāraḥ| va| tavāmagasaṃyuktaṃ ṭhalamadhyagaṃ paścāditi| takārasya vāmagaṃ ṇakārastena yuktaṃ ṭhakāralakārayormadhyagaṃ rephaḥ| paścāllekhyamiti śeṣaḥ| rṇa||6||

 

sarvakalāntaphamadhyaṃ tṛtīyavargādivāmagasametam |

ṇordhvayutaṃ lādharagaṃ chordhvasthaṃ bhatalagaṃ ṭhasavyayutam ||7||

 

     punarāha- sarvakalāntaphamadhyaṃ tṛtīyavargādivāmagasametamityādi| sarvakalāntā aḥkārastasya phakārasya madhyaṃ nakāraḥ| tṛtīyavargasyādiḥ ṭakāraḥ| tasya vāmagam īkārastena sametaṃ saṃyuktam| nī| ṇordhvayutaṃ lādharagamiti| ṇakārasyordhvam ekāraḥ,tena yutaṃ saṃyuktaṃ lakārasyādharagaṃ yakāraḥ| ye| chordhvasthamiti| chakārasyordhvaṃ ba(va)kāraḥ| va| bhatalagaṃ ṭhasavyayutamiti| bhakārasya talagaṃ jakāraḥ| ṭhasavyaṃ dakṣiṇaṃ rephaḥ,tena yutaṃ lekhyamiti yojyam| jra||7||

 

tordhvagayutaṃ ṣādharagaṃ thordhvagasaṃyuktaṃ ṇādharagaṃ paścāt |

phādharagaṃ ṭhādharayutaṃ phordhvasthaṃ ṇordhvayutaṃ lādharagam ||8||

 

    punarapyāha- tordhvagayutaṃ ṣādharagamityādi| takārasyordhvagam aikāraḥ,tena yutaṃ ṣakārasyādharagaṃ ba(va)kāraḥ| vai| thordhvasaṃyuktaṃ ṇādharagaṃ paścāditi| thakārasyordhvagam okāraḥ,tena saṃyuktaṃ ṇādharagaṃ rephaḥ paścāllekhyamityarthaḥ| ro| phādharagamiti phakārasyādharagaṃ cakāraḥ| ca| ṭhādharayutaṃ phordhvasthamiti| ṭhakārasyādhara īkāraḥ,tena yuktaṃ phakārasyordhvasthaṃ nakāraḥ| nī| ṇordhvayutaṃ lādharagamiti| ṇakārasyordhvaṃ ekāraḥ| tena yuktaṃ lādharagaṃ yakāraḥ| ye||8||

 

ḍādharaśūnyasametaṃ trivatalagaṃ cordhvasthitaṃ ratalam |

thādharayutaṃ śādharagaṃ ñādharagasamāyuktaṃ cāpi ||9||

 

    punarapyāha-ḍādharaśūnyasametaṃ trivatalagamityādi| ḍakārasyādhara ukāraḥ,śūnyaṃ binduḥ,indusahitamityupadeśaḥ| tābhyāṃ sametaṃ saṃyuktaṃ trayaṃ ca tato vakārasya talagaṃ hakāraṃ ceti trivatalagaṃ hakāratrayaṃ hrasvokāratrayasahitaṃ hakāratrayamityarthaḥ| hu hu hu | yadyapi śrīmacchabarapādīyasādhanaprakriyāyāṃ hūkāratrayamabhyupetam,tathāpi bhinnasādhanatvādatra hrasvasvīkāro'pyavivāda eva| cordhvasthitamiti cakārasyordhvasaṃsthitaṃ phakāraḥ| ratalamiti rephasya talaṃ ṭakāraḥ| eṣa phaṭkāroddhāre'pi| phaṭkāratrayamupadeśād boddhavyam| thādharayutaṃ śādharagaṃ ñādharagasamāyuktaṃ cāpīti| thakārasyādharagaṃ vakāraḥ,tena yutaṃ śakārasyādharagaṃ sakāraḥ| ñakārasyādharageṇākāreṇa samāyuktamiti tam| svā||9||

 

sayamadhyagaṃ jhavāmagasametamuktākṣarakṛto rahasyaḥ |

mantro'yamaśanidevyā lekhyo japyo vibhāvyaśca ||10||

 

      punarapyāha-sayamadhyagaṃ jhavāmagasametamiti sakārayakārayormadhyagaṃ  hakāraḥ| jhakārasya vāmagena ākāreṇa sametaṃ saṃyuktam | hā| uktākṣarakṛto rahasyamiti| uktākṣarebhya ālikālibhyaḥ kṛta āhṛta ākṛṣṭo'yaṃ rahasyo'prakāśyaḥ| paramapadaprāptihetutvāt| ko'sāvityāha- mantro'yamaśanidevyā iti| aśanidevī vajradevī kolāsyā,tasyā ayaṃ mantraḥ| kiṃbhūtaḥ?lekhyo japyo vibhāvyaśceti| lekhyaḥ sindūrapātavidyāvidhānādau| japyo bhāvanājanitakhedānandanam| vibhāvyo devīkamalodare| cakārastu lakṣaṇasūcanārthaḥ||10||

 

cintāmaṇiḥ kalpakuṭhāgrakumbhaḥ

śrīkāmadhugdhenurapi praśastāḥ |

te sādhyamānā dadatīha vittā -

nyayaṃ tu saukhyaṃ sadhanaṃ dadāti ||11||

 

iti tattvajñānasaṃsiddhau mantroddhāravidhiḥ ||

 

     anuśaṃsāmāha-cintāmaṇirityādi| ayaṃ tu mantrarājaḥ sadhanaṃ saukhyamanuttarasukhaṃ dadātīti sambandhaḥ| cintāmaṇiḥ vasuvarṣaratnaviśeṣaḥ| kalpakuṭhaḥ kalpavṛkṣaḥ,agrakumbho bhadraghaṭaḥ,śrīḥ sampattiḥ,kāmo abhilāṣaḥ,tatprerikā dhenuḥ śrīkāmadhenurityarthaḥ| te sādhyamānā iti| te catvāro'pi sādhyamānā iha saṃsāre vittāni dhanāni dadati arpayanti,ayaṃ tu bhuktimuktī pradadātītyarthaḥ||11||

 

iti śrīmarmakalikānāmatattvajñānasaṃsiddhipañjikāyāṃ mantroddhāravidhiḥ ||