• Home
• Canon Text
• Romanized
• śāstrapiṭaka
• yoginītantraṭīkā
• 4 śiṣyānugrahavidhiḥ

4 śiṣyānugrahavidhiḥ

Technical Details

 

[atha śiṣyānugrahavidhiḥ]

 

adhyeṣitaśca bahuśaḥ śiṣyaiḥ kṛtamaṇḍalaiḥ padābjanataiḥ |

mantrī tithau daśamyāṃ vidadhītānugrahaṃ teṣām ||1||

 

     śiṣyānugrahavidhimāha- adhyeṣita ityādi| mantrī gurusteṣāṃ  śiṣyāṇāmanugrahaṃ vidadhīteti sambandhaḥ| adhyeṣitaśceti| śiṣyairbahuśo yācitaḥ| cakāra evārthaḥ| kṛtamaṇḍalairiti| kṛtagurumaṇḍalaiḥ| padābjanatairiti pādapadmapatitaiḥ| tithau daśamyāmiti| kṛṣṇāyāmanyāsāṃ samayatithitvenāsvīkārāt| yoginīnāmanupalambhasvarūpatvāt kṛṣṇapakṣa evādhikārāt||1||

 

saṃpūjya mantrarūpāṃ devīṃ cakrasthitāṃ vihitayogaḥ |

ādāya mantrajaptaṃ paramādyaṃ niṣkramet tasmāt ||2||

 

     guroḥ kṛtyāntaramāha- saṃpūjyetyādi| mantrī niṣkramediti sambandhaḥ| tasmāditi devīpūjāsthānāt| kiṃkṛtvetyāha-saṃpūjyeti| devīmabhyarcya| mantrarūpāmiti mantroddhārasthitamantrarūpām| cakrasthitāmiti| sasindūramukuratalalikhitatrikoṇacakrasthitām| tathā ca-

 

     tridalasaroruhamadhye sindūrakṣodadhūsare mukure|

     mantramayīmabhilikhitāṃ gururapi saṃpūjya nirgacchet||

 

iti sādhanavibhaṅge'smadguravaḥ| vihitayoga iti| kṛtabāhyādhyātmaprajñāsaṅgaḥ| prathamaṃ kiñcinmadanapānasamuttejitacittavīraḥ ,dūrotsāritavikalpagaṇaḥ samullāsitaśūnyatā ca| tataḥ prajñāsaṅgena samupajātaparamānando vihitayoga ityāmnāyaḥ| ādāyeti gṛhītvā| paramādyaṃ madanasahitapātram| mantrajaptamiti| pre (trya)kṣarādhiṣṭhitam| śiṣyatoṣaṇārthaṃ svayameva pātraṃ  gṛhītvā nirgacchedityarthaḥ||2||

 

atha vihitapañcamaṇḍalamūrdhvasthaṃ dattadakṣiṇaṃ śiṣyam |

kusumasrajaṃ dadhānaṃ dhyātakekanāthaṃ guruḥ paśyet ||3||

 

     guroḥ kṛtyāntaramāha-athetyādi| athānantaraṃ guruḥ śiṣyaṃ paśyediti sambandhaḥ| vihitapañcamaṇḍalamūrdhvasthamiti| vihitapañcamaṇḍalamadhye maṇḍalamūrdhani samupasthitam| ūrdhvasthitamityupadeśād boddhavyam| ūrdhvasthamiti yogavibhāgād vā| tatpakṣe ca maṇḍalamadhyasthamityupadeśaḥ| gomayādinā vinā mantraṃ pañcamaṇḍalikā kartavyetyāmnāyaḥ| vihitapañcatathāgatamaṇḍalaṃ śiṣyaṃ paśyediti ca paramparāṃ kecinmanyante| dattadakṣiṇamiti| dhanakanakadāsadāsīsvaśarīraniryātanāni samīham| kusumastrajaṃ dadhānamiti| īṣadvikasitasaṃpuṭīkṛtya (ta)hastadvayena puṣpamālādharam| dhyātake(ka)nāthamiti| dhyātaḥ ka eva ke śirasi nātho gururyena sa tathā| āveśamutpādayituṃ paśyedityabhiprāyaḥ||3||

 

tadanu ca yathoktaṃ devīcakraṃ prodyanmarīcikaṃ rayavat |

dhyātvā'ntavāsigātre vajrabhṛt tasya sandadyāt ||4||

 

     aparakṛtyamāha-tadanu cetyādi| tadanu darśanānantaraṃ vajraṃ bibhartīti vajrabhṛnmadanapātraṃ tasya śiṣyasya gururdadyādarpayediti sambandhaḥ| dhyātveti| cintayitvā| yathoktaṃ devīcakraṃ sindūrapātasamayoktatrikoṇacakram|

prodyanmarīcikamiti sphuratkiraṇaṃ ca| rayavaditi vegena bhramat| antavāsigātra iti| śiṣyasya śarīre| nābheradhobhāge dharmodayāyāmityupadeśād boddhavyam| antevāsīti pāṭhe trayodaśamātratvāt chandobhaṅga ityanuktasamāso na svīkartavyaḥ| etadgāthārtha upadeśād boddhavya iti kecidenāṃ na likhya(kha)ntyapīti cakropadeśo likhyate|

 

     ādau ca yallohitapuṣpapūrvamanāmikālekhyamavādicakram|

     trikoṇakaṃ tadvidadhīta dhīmān sū va kṣamiti tryaṅgulamujjvalañca||

 

     sindūrapāte tridalaṃ saroruhaṃ bāṇāgnisaṃkhyākṣaramantrapūrṇam|

     vakārayuktaṃ varaṭakañca kuryāt diśāsu ca svastikamabdhisaṃkhyam||

 

     śrīvajradevīkamale'pi kāmye dharmodayāntargatamantracakram|

     yaduktamāsīttadapi trikoṇaṃ bhrameccakra (laṃ)jñānavidāṃvaraṃ ca||

 

     śiṣyasya cāveśavidhau saroruhaṃ nābheradhaḥ sadgurubhāvanīyam|

     yanmantrapūrṇaṃ tadapi trikoṇaṃ ṣaṭkoṇamāmnāyavihīnameva||

 

     paṭe sarojaṃ tridalaṃ vidadhyād yatrāsti devī svayamekikaiva|

     ṣaḍdevatīvṛndavibhūṣitaṃ vā ṣaṭkoṇametaddvitayañca dṛṣṭam||

 

     bhūmau punarmaṇḍalakṛtyakāle ṣaṭkoṇamantraujamuṣanti santaḥ|

     devyaśca pūjyāḥ ṣaḍapīha koṇe pūrvādiṣu svastikamaṇḍalaṃ ca||4||

 

evaṃ syādāveśastasyotkalikā prakampanaṃ bāṣpaḥ |

pāto jñānotpādaḥ svāsārūpyaṃ cāpi paripāṭayāḥ ||5||

 

       āveśalakṣaṇamāha- evamityādi| evaṃ krameṇa tasya śiṣyasya| āveśo devatādhiṣṭhānaṃ syāditi sambandhaḥ| āveśalakṣaṇamāha-utkaliketyādi| utkalikā romāñcaḥ| prakampanaṃ prakṛṣṭakampaḥ| bāṣpo lolāpātaḥ| pātaḥ patanam| jñānotpādaḥ bhūtabhaviṣyadvartamānajñānalābhaḥ| sarvameva kathayatīti bhāvaḥ| svā (sā)rūpyaṃ ceti| anayā paripāṭyā āviṣṭasya śiṣyasya svarūpaparijñānamapi bhavenna kevalamāveśa ityarthaḥ| vinā svarūpaparijñānaṃ śiṣyānugrahānupapatteḥ||5||

 

tadanu kathayet samādhiṃ pūjāmantraṃ ca vajrayoginyāḥ |

śraddhānvitasya guṇino gurubuddhābhinnasadbhakteḥ ||6||

 

      anuttarakṛtyamāha- tadanvityādi| śiṣyajijñāsanānantaram| guruḥ samādhiṃ kathayediti sambandhaḥ| pūjāmantraṃ ca vajrayoginyā iti| kiravaktrāyāḥ pūjārthaṃ vihitaṃ mantramapi kathayet| śraddhānvitasyeti| satyaratnatrayakarmaphalādisaṃjātasampratyayasya| buddho'sti,dharmo'sti,  saṃgho'sti,pāpamasti,puṇyamastītyādiviśiṣṭavāsanāvāsitāntaḥ karaṇasyeti bhāvaḥ| guṇina iti| aśeṣaguṇaśālinaḥ| gurubuddhābhinnasadbhakteriti| guruśca buddhaśca gurubuddhau,tayorabhinnā samyag bhaktiryasya sa tathā| tathā coktam-

 

         gururbuddho gururdharmo guruḥ saṃghastathaiva ca| iti|

 

   ata eva nāthāṅkaka ityuktam| vairocanasthāne gurorevopādānāt||6||

 

kathayenna yogamenaṃ sadyaḥ pratyayakaraṃ susiddhaṃ vā |

śraddhāvirahitamanaso bhaktivihīnasya śiṣyasya ||7||

 

     niṣedhamāha- enaṃ yogaṃ śiṣyasya na kathayenna prakāśayet| kiṃbhūtasyetyāha-śraddhāvirahitamanasa iti| śraddhātyaktacittasya| bhaktivihīnasyeti| gurubuddhayorabhaktasya| sadyaḥ pratyayakaramiti| acirapratītijananam| saṃpratyayakaramiti pāṭhe mātrādhikaṃ ṣaṣṭhagaṇabhaṅgaśca| susiddhaṃ veti suṣṭhu siddhi[manta]mapi suniṣpannaṃ vā| susiddhidamiti pāṭho'pyapapāṭhaḥ| pūrvoktadoṣaprasaṅgāt||7||

 

vidadhāti yastu pūjāṃ devīcakrasya mantrayuktasya |

tasyāpayānti bhayānyaṣṭau pāpāni ca mahānti ||8||

 

      anuśaṃsāmāha- vidadhātītyādi| tasya yogino bhayānyapayānti naśyantīti sambandhaḥ| aṣṭāviti harikaridahanaprabhṛtijanitāni| pāpānīti pañcānantaryaprabhṛtīni| mahāntīti samucchritāni bhayāni| upaśamakāraṇamāha- vidadhātītyādi| yo yogī devīcakrasya bhagavatyāḥ ṣaḍā(ḍa)racakrasya pūjāṃ karoti tasyetyarthaḥ| mantrayuktasyeti| devīmantraṣaḍayoginīmantrakṛtārcanasya| athavā pūrvoktasindūramantrasaṃpūrṇatrikoṇasya||8||

 

durbhagatā dāridrayaṃ vyādhijarāduḥkhadaurmanasyāni |

bhramakalikaluṣakleśāḥ pīḍā nānāvidhāścāpi ||9||

 

      aparānuśaṃsāmāha- durbhagatetyādi| durbhagatā lokeṣvasaubhāgyam| dāridrayaṃ niḥsvatā| vyādhiḥ kaṣṭādiḥ| jarā vārdhakyam| duḥkhaṃ kāyacittopahatiḥ| daurmanasyaṃ cittaduḥkham| bhramo bhrāntiradharme dharmabuddhiḥ,yathā tīrthikānāṃ hiṃsā svargāya| kalirvivādaḥ| kaluṣaṃ pāpaṃ kalimāhātmyopadiṣṭakaluṣaṃ vā| kleśā rāgadveṣamohāḥ| pīḍā nānāvidhāśceti| nānāprakārabhūtapretapiśācādyupadravāśceti| cakāraḥ samuccaye| apiśabda evārthe| apayāntīti pūrvoktaślokena sambandhaḥ||9||

 

yo japati cakramantraṃ dhyātvā hṛdaye nirodhavācā'sau |

prāpnotyaṣṭau siddhīḥ pañcābhijñāstathāṣṭaguṇān ||10||

 

     aparānuśaṃsāmāha-yo japatītyādi| asau aṣṭau siddhirañjanaguṭikādīni prāpnotīti sambandhaḥ pañcābhijñā iti| divyacakṣuḥ,divyaśrotram ,paracittajñānam ,ākāśagamanam,pūrvanivāsānusmṛtiśca| tathā'ṣṭaguṇāniti| daśabalavaiśāradyādīn,aṇimādīn vā| ya ityādi| yaścakrasahitaṃ mantraṃ dhyātvā hṛdaye manasi nidhāya| japati,tasya syādevetyarthaḥ|  nirodhavāceti vāksaṃyamena||10||

 

dhyāyati yaḥ kiravaktrāṃ pratidivasaṃ yatnataścatuḥsandhyam |

hariharahiraṇyagarbhairjetumaśakyāṃ mṛtiṃ jayati ||11||

 

      aparānuśaṃsāmāha- dhyāyatītyādi| yaḥ kiravaktrāṃ kolamukhīṃ dhyāyati atiyogena manasyāropayati| sa mṛtiṃ jayatīti sambandhaḥ| kiṃbhūtāṃ mṛtimityāha-hariharetyādi| keśavādibhirapi jetumaśakyāmaparājitāmityarthaḥ| pratidivasamiti nityameva| yatnata iti pūjādipuraḥsaram| catuḥsandhyamiti prabhātamadhyāhnasāyāhnārdharātreṣu||11||

 

vastrānnapānadhanadhānyaviśālabhūmi-

prāsādadivyaśayanāsanasādhanāni |

tasyodbhavanti dayitā vividhāśca vidyā

yo bhāvayatyaśanikolamukhīṃ sacakrām ||12||

 

iti tattvajñānasaṃsiddhau sānuśaṃsāśiṣyānugrahavidhiḥ ||

 

      aparānuśaṃsāmāha- vastrānnetyādi| yo'śanikolamukhīṃ vajrakolāsyāṃ bhāvayati tasya vastrādaya udbhavanti sampadyanta iti sambandhaḥ| sacakrāmiti| dharmodayamadhyamantrapūrṇacakrasahitām| vastraṃ cīnāṃśukam| annaṃ bhakṣādikam| pānaṃ pānakādi| dhanaṃ ratnādi| dhānyaṃ yavagodhūmādi| viśālabhūmiḥ vipulatarā vasundharā| prāsādo ramaṇīyagṛham| divyaśayanaṃ vicitraratnakhacitapaṭatūlikā| āsanaṃ siṃhāsanādi| sādhanaṃ gajavājiprabhṛtayaḥ| dayitāśceti hṛdayaṅgamā yuvatayaḥ| vividhā iti nānāprakāraśṛṅgāragītavādyābhijñāḥ| divyā iti devairapi kāmyāḥ||12||

 

iti marmakalikāyāṃ tattvajñānasaṃsiddhipañjikāyāṃ śiṣyānugrahavidhiḥ ||