• Home
• Canon Text
• Romanized
• śāstrapiṭaka
• madhyamaka-yogācāra
• Puṇyavṛddhirnāma navadaśaḥ paricchedaḥ

Puṇyavṛddhirnāma navadaśaḥ paricchedaḥ

Technical Details

puṇyavṛddhirnāma navadaśaḥ paricchedaḥ |



anyo'pi puṇyavṛddhaye hetuḥ kāryaḥ, yo'yaṃ sarvāvasthāsu sattvārthaḥ | yathā kathitaṃ cāryaratnameghe-sa tathāgatacaitye vā tathāgatavigrahe vā puṣpaṃ vā dhūpaṃ vā gandhaṃ vā dadat sarvasattvānāṃ dauḥśīlyadaurgandhyamalāpanayanāya tathāgataśīlapratilambhāya ca pariṇāmayati | sa samārjanopalepanaṃ kurvan sarvasattvānāmaprāsādikeryāpathavigamāya prāsādikeryāpathasaṃpade ca pariṇāmayati | sa puṣpacchatramāropayan sarvasattvānāṃ sarvakleśaparidāhavigamāya pariṇāmayati | sa vihāraṃ praviśannevaṃ cittamutpādayati-sarvasattvān nirvāṇapuraṃ praveśayeyam | sa niṣkramannevaṃ cittamutpādayati-sarvasattvān saṃsāracārakānniṣkrāmayeyam | sa labhanadvāramuddhāṭayannevaṃ cittamutpādayati- sarvasattvānāṃ lokottareṇa jñānena nirvāṇasugatidvāramuddhāṭayeyam | sa pidadhadevaṃ cittamutpādayati- sarvasattvānāṃ sarvāpāyadvārāṇi pidadhyām | sa niṣīdannevaṃ cittamutpādayati- sarvasattvān bodhimaṇḍe niṣādayeyam | sa dakṣiṇena pārśvana śayyāṃ kalpayanevaṃ cittamutpādayati- sarvasattvāneva parinirvāpayeyam | sa tato vyuttiṣṭhannevaṃ cittamutpādayati- sarvasattvān vyutthāpayeyaṃ sarvakleśaparyutthānebhyaḥ | sa śarīragatyā gacchannevaṃ cittamutpādayati- sarvasattvā mahāpuruṣagatyā gacchantu | sa tatropaviṣṭa evaṃ cittamutpādayati- sarvasattvā niḥśalyakriyā yaduta rāgadveṣamohebhyaḥ | sa śaucaṃ kurvannevaṃ cittamutpādayati- sarvasattvānāṃ kleśamalān prakṣālayeyam | sa hastau prakṣālayannevaṃ cittamutpādayati- sarvasattvānāṃ sarvakleśavāsanāmapanayeyam |

sa pādau prakṣālayannevaṃ cittamutpādayati- sarvasattvānāmanekaprakārāṇi kleśarajāṃsyapanayeyam | mukhaṃ prakṣālayannevaṃ cittamutpādayati- sarvasattvānāṃ sarvadharmamukhāni pariśodhayeyam | sa dantakāṣṭhaṃ bhakṣayannevaṃ cittamutpādayati- sarvasattvānāṃ nānāvidhān kleśamalānapanayeyam | sarvāṃ kāyāvasthāṃ sarvasattvahitasukhāya pariṇāmayati | tathāgatacaityaṃ vandamāna evaṃ cittamutpādayati-sarvasattvā vandanīyā bhavantu sadevakasya lokasyeti ||



athavā yathā āryaprajñāpāramitāyām- punaraparaṃ śāriputra vyālakāntāramadhyagatena bodhisattvena mahāsattvena nottrasitavyam, na saṃtrasitavyam, na saṃtrāsamāpattavyam | tatkasmāddhetoḥ? tathā hi tena sarvaṃ parityaktaṃ sarvasattvānāmarthāya | tenaivaṃ cittamutpādayitavyam- sacenmāṃ vyālā bhakṣayeyuḥ, tebhya eva taddānaṃ dattaṃ bhavatu | mama ca dānapāramitāparipūrirbhaviṣyati | abhyāsannā ca bhaviṣyati[bodhiḥ] | tathā ca kariṣyāmi yathā me'nuttarāṃ samyaksaṃbodhimabhisaṃbuddhasya satastatra buddhakṣetre tiryagyonigatāḥ sattvāḥ sarveṇa sarvaṃ na bhaviṣyanti, na prajñāsyante | corakāntāramadhyagatena śāriputra bodhisattvena mahāsattvena nottrasitavyaṃ na saṃtrasitavyaṃ na saṃtrāsamāpattavyam | tatkasmāddhetoḥ? sarvasvaparityāgakuśalā hi te bodhisattvā mahāsattvāḥ | utsṛṣṭakāyenāpi ca bodhisattvena bhavitavyaṃ parityaktapariṣkāropa- karaṇena ca | tenaivaṃ cittamutpādayitavyam- te cenme sattvāḥ pariṣkāropakaraṇāni haranti, tebhya evaitaddhanaṃ dattaṃ bhavatu | sacenmāṃ kecijjīvitād vyaparopayeyuḥ, tatra mayā na dveṣo na krodha utpādayitavyaḥ | teṣāmapi mayā na kāyena na vacasā na manasā aparāddhavyam | evaṃ ca me tasmin samaye dānapāramitā ca śīlapāramitā ca kṣāntipāramitā ca paripūriṃ gamiṣyati | anuttarā ca me samyaksaṃbodhirabhyāsannā bhaviṣyati | tathā ca kariṣyāmi, tathā pratipatsye, yathā me'nuttarāṃ samyaksaṃbodhimabhisaṃbuddhasya satastatra buddhakṣetre ete cānye ca doṣāḥ sarveṇa sarvaṃ sarvathā sarvaṃ na bhaviṣyanti, na prajñāsyante | pānīyakāntāramadhyagatena śāriputra bodhisattvena mahāsattvena nottrasitavyaṃ na saṃtrasitavyaṃ na saṃtrāsamāpattavyam | tatkasmāddhetoḥ? asaṃtrastadharmāṇo hi bodhisattvā mahāsattva bhavanti | evaṃ cānena cittamutpādayitavyam - sarvasattvānāṃ mayā sarvatṛṣṇācchedāya śikṣitavyam | na bodhisattvena mahāsattvena saṃtrāsamāpattavyam | sacedahaṃ tṛṣṇayā kālaṃ kariṣyāmi, api tu khalu punaḥ sattvānāmantike mahākaruṇācittamutpādayiṣyāmi- aho batālpapuṇyā amī sattvā yadeteṣāṃ loke evaṃrūpāṇi pānīyakāntārāṇi prajñāyante | tathā punarahaṃ kariṣyāmi, tathā pratipatsye, yathā me'nuttarāṃ samyaksaṃbodhimabhisaṃvuddhasya satastatra buddhakṣetre sarveṇa sarvaṃ sarvathā sarvaṃ pānīyakāntārāṇi na prajñāsyante | tathā ca sarvasattvān puṇyaiḥ saṃyojayiṣyāmi, yathā te aṣṭāṅgopetapānīyalābhino bhaviṣyanti | tathā dṛḍhaṃ vīryamārapsye sarvasattvānāṃ kṛtaśo yathā vīryapāramitā tasmin samaye paripūriṃ gamiṣyati | punaraparaṃ śāriputra bubhukṣākāntāramadhyagatena bodhisattvena mahāsattvena nottrasitavyaṃ na saṃtrasitavyaṃ na saṃtrāsamāpattavyam | evaṃ cānena saṃnāhaḥ saṃnaddhavyaḥ- tathā dṛḍhaṃ vīryamārapsye, tathā ca svaṃ buddhakṣetraṃ pariśodhayiṣyāmi, yathā me'nuttarāṃ samyaksaṃbodhimabhisaṃbuddhasya satastatra buddhakṣetre sarveṇa sarvaṃ sarvathā evaṃrūpāṇi bubhukṣākāntārāṇi na bhaviṣyanti, na prajñāsyante | sukhitā eva te sattvā bhaviṣyanti sukhasamaṅginaḥ sarvasukhasamarpitāḥ | tathā ca kariṣyāmi yathā teṣāṃ sattvānāṃ yo ya evābhiprāyo bhaviṣyati, yadyadevākāṅkṣipyanti manasā, tattadeva prādurbhaviṣyati, tadyathāpi nāma devānāṃ trāyastriṃśānāṃ manasā sarvaṃ prādurbhavati, manasā sarvamutpadyate | tathā dṛḍhaṃ vīryamārapsye yathā teṣāṃ sattvānāṃ dhārmikā abhiprāyāḥ paripūriṃ gamiṣyanti, avaikalpaṃ ca jīvitapariṣkāraiḥ sarvasattvānāṃ bhaviṣyati sarveṣāṃ sarvataḥ sarvadeti ||

evamayam-

sarvāvasthāsu sattvārthaḥ

puṇyavṛddhihetuḥ | vistaratastvāryagocarapariśuddhisūtre draṣṭavyaḥ ||

kiṃ ca-

dharmadānaṃ nirāmipam |

puṇyavṛddhinimittaṃ bhavati ||



yathoktamāryādhyāśayasaṃcodanasūtre-viṃśatirime maitreya ānuśaṃsā nirāmiṣadāne, yo lābhasatkāramapratikāṅkṣan dharmadānaṃ dadāti | katame viṃśatiḥ? yaduta- smṛtimāṃśca bhavati, matimāṃśca bhavati, buddhimāṃśca bhavati, gatimāṃśca bhavati, dhṛtimāṃśca bhavati, prajñāvāṃśca bhavati, lokottarāṃ ca prajñāmanuvidhyati, alparāgo bhavati, alpadveṣo'lpamohaḥ, māraścāsyāvatāraṃ na labhate, buddhairbhagavadbhiḥ samanvāhriyate , amanuṣyāścainaṃ rakṣanti, devāścāsyaujaḥ kāye prakṣipanti, amitrāścāsyāvatāraṃ na labhante, mitrāṇi cāsya abhedyāni bhavanti, ādeyavacanaśca bhavati, vaiśāradyāṃśca pratilabhate, saumanasyabahulaśca bhavati vidvatpraśastaśca, anusmaraṇīyaṃ cāsya taddharmadānaṃ bhavati | ime maitreya viṃśatiranuśaṃsā iti ||



āryaprajñāpāramitāyāṃ tvāha- sacetvamānanda śrāvakayānikānāṃ pudgalānā śrāvakabhūmau dharma deśayeḥ, tasyāṃ ca dharmadeśanāyāṃ ye trisāhastramahāsāhastre lokadhātau sattvāste sarve'rhattvaṃ sākṣātkuryuḥ | tadadyāpi tvayā me śrāvakeṇa śrāvakakṛtyaṃ na kṛtaṃ syāt | sacetpunaḥ tvamānanda bodhisattvasya mahāsattvasyaikamapi prajñāpāramitāpratisaṃyuktaṃ padaṃ deśayeḥ, prakāśayeḥ, evamahaṃ tvayā śrāvakeṇārādhitaḥ syām | tayā ca pūrvikayā dharmadeśanayā ye trisāhastramahāsāhastre lokadhātau sattvāste sarve'rhatvaṃ prāpnuyuḥ | teṣāṃ cārhatāṃ yaddānamayaṃ puṇyakriyāvastu śīlamayaṃ puṇyakriyāvastu bhāvanāmayaṃ puṇyakriyāvastu, tatkiṃ manyase ānanda api nu sa bahu puṇyaskandhaḥ? āha- bahu bhagavan, bahu sugata | bhagavānāha- ataḥ sa ānanda śrāvakayānikapudgalo bahutaraṃ puṇyaskandhaṃ prasavati, yo bodhisattvānāṃ mahāsattvānāṃ prajñāpāramitāpratisaṃyuktaṃ dharma deśayati | ato'pyānanda bahutaraṃ puṇyaskandhaṃ prasavati, yo bodhisattvo mahāsatvo'parasya bodhisattvasya prajñāpāramitāpratisaṃyuktaṃ dharmaṃ deśayati, antaśa ekadivasamapi | tiṣṭhatvānanda ekadivasaḥ, antaśaḥ prāgbhaktamapi | tiṣṭhatvānanda prāgbhaktam, antaśa ekanālikāmapi | yāvadantaśa ekakṣaṇasaṃnipātamapi | peyālaṃ | idamānanda tasya bodhisattvasya mahāsattvasya dharmadānaṃ sarvaśrāvakayānikānāmapi sarvapratyekabuddhayānikānāṃ ca pudgalānāṃ kuśalamūlamabhibhavati | evaṃ kuśalamūlasamanvāgato bodhisattvo mahāsattvaḥ, evaṃ kuśalamūlaṃ samanvāharana, asthānamānanda anavakāśo yatsa bodhisattvo mahāsattvo vivarteta anuttarāyāḥ samyaksaṃbodheḥ | naitatsthānaṃ vidyata iti ||



kathaṃ dharmadānaṃ dātavyam? yathā āryasaddharmapuṇḍarīke'bhihitam-

kālena co(vā)cintayamānu paṇḍitaḥ

praviśya layanaṃ tatha ghaṭṭayitvā |

vipaśya dharmaṃ imi sarvayoniśo

utthāya deśeta alīnacitaḥ ||

sukhasthito bhoti sadā vicakṣaṇo

sukhaniṣaṇṇastatha dharma bhāṣate |

udāraprajñapta karitva āsanaṃ

caukṣe manojñe pṛthivīpradeśe ||

caukṣaṃ ca so cīvara prāvaritvā

suraktaraṅgaṃ ca prasannaraṅgaiḥ |

āsevakaṃ(kān) kṛṣṇa tathā daditvā

mahāpramāṇaṃ ca nivāsayitvā ||

sa pādapīṭhasmi niṣadya āsane

vicitradūṣyehi susaṃstṛtasmin |

sudhautapādaśca upāruhitvā

snigdhena śīrṣeṇa mukhena cāpi ||

dharmāsane tatra( cātra) niṣīdiyānaḥ

ekāgra sattveṣu samaṃ vipaśyan(samāgateṣu) |

upasaṃhareccitrakathā bahūśca

bhikṣūnatho(co) bhikṣuṇikāstathaiva ||

kilāsitāṃścāpi vivarjayīta

na cāpi utpādayi khedasaṃjñām |

aratiṃ ca sarvāṃ vijahīta paṇḍito

maitrībalaṃ parṣadi bhāvayecca ||

bhāṣecca rātriṃdivamagradharmān

dṛṣṭāntakoṭīniyutaiḥ sa paṇḍitaḥ |

saṃharṣayettāṃ (tparṣa) ca tathaiva toṣayet

na cāpi kiṃcitatra jātu prārthayet ||

khādyaṃ ca bhojyaṃ ca tathānnapānaṃ

vastrāṇi śayyāsanacīvarāṇi |

gilānabhaiṣajya na cintayetsaḥ |

na vijñapetparṣadi kiṃcidanyat ||

anyatra cinteya sadā vicakṣaṇaḥ

bhaveya buddho'hamime ca sattvāḥ |

etacca me sarvasukhopadhānaṃ

yaṃ dharma śrāvemi hitāya loke ||

atraivāha- na ca kasyacidantaśo dharmapremṇā'pyadhikataramanugrahaṃ karoti ||

āryacandrapradīpasūtre'pyāha-



adhyeṣayeyuryudi tvāṃ te dharmadānasya kāraṇāt |

prathamaṃ vāca bhāṣeyā nāhaṃ vaipulyaśikṣitaḥ ||

evaṃ tvaṃ vāca bhāṣeyā yuṣme( āyuṣmān) vā vijñapaṇḍitāḥ |

kathaṃ mahātmanāṃ śakyaṃ purato bhāṣituṃ mayā |

sahasaiṣāṃ na jalpeta tulayitvā tu bhājanam |

yadi bhājanaṃ vijānīyā anadhīṣṭo'pi deśayeḥ ||

yadi duḥśīlān paśyesi pariṣāyāṃ bahūn sthitān |

saṃlekhaṃ mā prabhāṣestvaṃ varṇaṃ dānasya kīrtayeḥ ||

bhaveyuryadi cālpecchāḥ śuddhāḥ śīle pratiṣṭhitāḥ |

maitraṃ cittaṃ janitvā tvaṃ kuryāḥ sāṃlekhikīṃ kathām ||

parīttā yadi pāpecchāḥ śīlavanto'tra vistarāḥ |

labdhapakṣastadā bhūtvā varṇa śīlasya kīrtayeḥ || iti ||



uktaṃ ca āryasāgaramatisūtre- tadyathā same | samavati | śamitaśatru | aṅkure | maṅkure | mārajite | karāḍe | keyūre | oghavati | ohokayati | viśaṭhanirmale | malāpanaye | okhare | kharograse | grasane | hemukhī | parāṅyukhī | āmukhī | śamitāni sarvagrahabandhanāni | nigṛhītāḥ sarvaparapravādinaḥ | vimuktā mārapāśāḥ | sthāpitā buddhamudrāḥ | samuddhātitāḥ sarvamārāḥ | acalitapadapariśuddhayā vigacchanti sarvamārakarmāṇi | imāni sāgaramate mantrapadāni dharmabhāṇakena supravṛttāni kṛtvā, dharmāsanakena supravṛttāni katvā, dharmāsananiṣaṇṇena sarvāṃ parṣadaṃ bodhyākārābhinirhṛtayā maitryā spharitvā ātmani vaidyasaṃjñāmutpādya dharme bhaiṣajyasaṃjñāṃ dharmaśravaṇikeṣvāturasaṃjñāṃ tathāgate satpuruṣasaṃjñāṃ dharmanetryāṃ cirasthitikasaṃjñāmutpādya imāni mantrapadānyāmukhīkṛtya dharmasaṃkathā karaṇīyā | tasya samantādyojanaśate na māro na mārakāyikā vā devatā upasaṃkramayiṣyanti vicakṣuḥkaraṇe | ye'pyenamupasaṃkramiṣyanti, te'pyasya na śakṣyantyantarāyaṃ kartumiti ||



atraivāha- dharmabhāṇakena caukṣeṇa śucisamudācāreṇa susnātena śucinivāsitena bhavitavyamiti || evaṃ dharmadānam ||

bodhacittaṃ ca puṇyasya vṛddhihetuḥ samāsataḥ || 26||

yathoktamāryaratnakaraṇḍakasūtre-

tadyathāpi nāma mañjuśrīrnānāgandhavṛkṣāśca caturdhātusaṃgṛhītā vivardhante, evameva mañjuśrīrnānāsaṃbhāropacitaṃ bodhisattvasya kuśalamūlaṃ bodhicittasaṃgṛhītaṃ sarvajñatāpariṇāmitaṃ vivardhate | iti ||

eṣādikā adikarmikāṇāṃ sahasā bodhisattvaśikṣā smaraṇārthamupadarśitā | vistaratastu buddhaviṣaya eva | atra cāsyā yathoktāyāḥ śikṣāyāḥ-



siddhiḥ samyakprahāṇānāmapramādāviyojanāt |

smṛtyātha saṃprajanyena yoniśaścintanena ca || 27||



tatra anutpannānāṃ pāpakānāmakuśalānāṃ dharmāṇāmanutpādāyaiva chandaṃ janayati, vyāyacchati, vīryamārabhate, cittaṃ pragṛhṇāti, samyakpraṇidadhātītyanena rakṣā | utpannānāṃ ca prahāṇāya chandaṃ janayatītyanena śuddhiḥ | anutpannānāṃ kuśalānāṃ dharmāṇāmutpādāya chandaṃ janayati | yāvadutpannānāṃ ca sthitaye bhūyobhāvāya chandaṃ janayatītyādi anena vṛddhiḥ | etāni ca nityamapramādādhiṣṭhitāni kāryāṇi ,sarvakuśalamūlānāṃ tanmūlatvāt ||

yathoktamāryacandrapradīpasūtre-

yāvanti dharmāḥ kuśalāḥ prakīrtitāḥ

śīla śrutaṃ tyāgu tathaiva kṣāntiḥ |

sarveṣa mūlaṃ hyayamapramādo

nidhānalambhaḥ sugatena deśitaḥ ||iti||



ko'yapramādo nāma? iṣṭavighātāniṣṭāgamaśaṅkāpūrvakaṃ pratikāratātparyam | tadyathā tīvrakopaprasādasya rājño bhaiṣajyatailaparipūrṇabhājanaṃ gṛhītvā picchilasaṃkrameṇa bhṛtyasya gacchataḥ ||



uktaṃ hi āryatathāgataguhyasūtre- tatra katamo'pramādaḥ? yadindriyasaṃvaraḥ | sa cakṣuṣā rūpāṇi dṛṣṭvā na nimittagrāhī bhavati, nānuvyañjanagrāhī | evaṃ yāvanmanasā dharmān vijñāya na nimittagrāhī bhavati, nānuvyañjanagrāhī | sarvadharmeṣvāsvādaṃ cādīnavaṃ ca niḥśaraṇaṃ ca yathābhūtaṃ prajānāti | ayamucyate apramādaḥ || punaraparam- apramādo yatsvacittasya damanam, paracittasyārakṣā, kleśarateraparikarmaṇā, dharmarateranuvartanam, yāvadayamucyate'pramādaḥ | yasya guhyakādhipate śraddhā cāpramādaśca, tasyānulomikena vīryeṇa kāryam, yena tānapramādakāraṇān śraddhākāraṇāṃśca dharmān samudānayati | yasya guhyakādhipate śraddhā cāpramādaśca vīryaṃ ca , tena smṛtisaṃprajanye yogaḥ karaṇīyaḥ, yena smṛtisaṃprajanyena sarvān bodhipakṣān dharmānna vipraṇāśayati | yasya guhyakādhipate śraddhā cāpramādaśca vīryaṃ ca smṛtisaṃprajanyaṃ ca, tena yoniśaḥprayoge yogaḥ karaṇīyaḥ | yoniśaḥprayukto hi guhyakādhipate bodhisattvo yadasti tadastīti prajānāti, yannāsti tannāstīti prajānāti | yāvadasti saṃvṛtyā cakṣurityādi ||



tathā atraivāha-



sadā'pramādo hyamṛtasya mūlaṃ

sattvārthayuktasya ca bodhicittam |

yadyoniśaścaiva vivekacitta-

maparigrahaḥ sarvasukhasya mūlam || iti ||

āha ca-

parātmasamatābhyāsādbodhicittaṃ dṛḍhībhavet |

āpekṣikaṃ parātmatvaṃ pārāvāraṃ yathāmṛṣā ||

tatkūlaṃ na svataḥ pāraṃ kimapekṣyāstvapāratā |

ātmatvaṃ na svataḥ siddhaṃ kimapekṣya paro bhavet ||

tadduḥkhena na me bādhetyato yadi na rakṣasi |

nāgāmikāyaduḥkhātte bādhā tatkena rakṣasi ||

ahameva tadāpīti mithyeyaṃ parikalpanā |

anya eva mṛto yasmādanyastatra prajāyate ||

anyaścejjāyate tatra kiṃ puṇyena prayojanam |

yūnaḥ kiṃ vṛddhakāyasya sukhāya dhanasaṃcayaiḥ ||

mṛte garbhagate tāvadanyo bālaḥ prajāyate |

mṛte bālye kumāratvaṃ tannāśāyāgato yuvā ||

tannāśāccāgato vṛddhaḥ ekaḥ kāyaḥ kathaṃ mataḥ |

evaṃ pratikṣaṇaṃ cānyaḥ kāyaḥ keśanakhādivat ||

atha bālyaparityāgādbālo yāti kumāratām |

kāyasvabhāvo vaktavyo yo'vasthārahitaḥ sthitaḥ |

kāyaścetpratimākāraḥ peśībhasmasu nāsti saḥ |

sūkṣmabhāvena cettatra sthaulyaṃ tyattvā vyavasthitaḥ |

anirdeśyaḥ svataḥ prāptaḥ kāya ityucyate na saḥ ||

tatra cintaiva me nāsti dṛśyakāyastu nāśavān |

avasthāmiśca saṃbandhaḥ saṃvṛtyā caiva dṛśyate |

āgamācca tadastitvaṃ yuktayāgamanivāritam |

na guṇavyatirekeṇa pradhānaṃ vidyate yataḥ ||

na ca trīṇi pradhānāni tathā sattā guṇā api |

pratyekaṃ tryātmakāste'pi śeṣaṃ naikavidhaṃ jagat ||

acetanaṃ ca vastrādi tatsukhādyātmakaṃ katham |

sukhāderna paṭotpattiṃḥ paṭādestu sukhādayaḥ |

paṭādīnāmahetutvādabhāvastatsukhaṃ kutaḥ ||

tasmādāgamayuktibhyāmanityaṃ sarvasaṃskṛtam |

taddhetuphalasaṃbandhaḥ pratyakṣatvānna sādhyate ||

svasaṃtāne ca dṛṣṭo'sau nityeṣu ca kathaṃ yathā |

paramāṇustu naiko'sti digbhedānupapattitaḥ |

dīpatailaṃ kṣayaṃ yāti kṣīyamāṇaṃ na lakṣyate |

evaṃ bhāvā na lakṣyante kṣīyamāṇāḥ pratikṣaṇam ||

saṃtānaḥ samudāyaśca paṅktisenādivanmṛṣā |

tatrābhyāsādahaṃkāraḥ parasmin kiṃ na jāyate ||

tasmādevaṃ jagat jñeyaṃ yathāyatanasaṃcayaḥ |

aprāptameva tadduḥkhaṃ pratikārya parātmanoḥ ||

ayuktamapi cedetatsvātmanyastītaratra na |

yadayuktaṃ nivartyaṃ tat svamanyadvā yathābalam ||

kṛpayā bahu duḥkhaṃ cetkasmādutpādyate balāt |

jagadduḥkhaṃ nirūpyedaṃ kṛpāduḥkhaṃ kathaṃ bahu ||

evaṃ bhāvitasaṃtānāḥ paraduḥkhasamapriyāḥ |

avīcīmavagāhante haṃsāḥ padmavanaṃ yathā ||

sattveṣu mucyamāneṣu ye te prāmodyasāgarāḥ |

taireva nanu paryāptaṃ mokṣeṇāpyarasena kim ||

evaṃ parārthaṃ kṛtvāpi na mado na ca vismayaḥ |

na vipākaphalākāṅkṣā parārthaikāntatṛṣṇayā ||

daśadiksattvasaṃpattirātmīyāsya na saṃśayaḥ |

nāstīrṣyāvakāśo'pi parasaukhye svasaṃjñayā ||

pareṣāmātmano vāpi sāmānyā pāpadeśanā |

puṇyānumodanā caivaṃ buddhādhyeṣaṇayācanam ||

pariṇāmanamapyevaṃ nirviśeṣaṃ pravartate |

puṇyaṃ pravartate tasmādanantaṃ sattvadhātuvat ||

ayaṃ sa mārgaḥ pravaraḥ kṣemānantasukhotsavaḥ |

bodhisattvamahāsārthaḥ kalilaprītivardhanaḥ ||

pālyamānaśca satataṃ vajrapāṇyādiyāntrikaiḥ |

māragulmikasaṃtrāsajananairbuddhakiṃkaraiḥ ||

saṃbuddharājatanayā bodhicittarathasthitāḥ |

vahante tena mārgeṇa stūyamānāḥ surādibhiḥ ||

tasmādātmatvamāropya sattveṣvabhyāsayogataḥ |

parātmaduḥkhaśāntyarthamātmādīn sarvathotsṛjet ||

tṛṣṇā parigraho yasya tasya duḥkhaṃ na śāmyati |

pariṇāmavināśitvātsa duḥkhajanako yataḥ ||

loke duḥkhāgnitapte ca kā ratiḥ svasukhe bhavet |

samantāddahyamānasya nakhādāhe'pi kiṃ sukham ||

ātmatṛṣṇā ca sarveṣāṃ duḥkhānāṃ mūlamuttamam |

tasmānnihanmi tāmeva sattvebhyaḥ svārthamutsṛjan ||

tadagradūtī jñātecchā jetavyā sarvayatnataḥ |

ātmatattvasmṛtiṃ kṛtvā pratītyotpādacintayā ||

yadbhayānnotsṛjāmyetattadevādadato bhayam |

pratikṣaṇaṃ hi yātyeva kāyaścittaṃ ca me yataḥ ||

yadi nityāpyanityena nirmalā malavāhinā |

bodhiḥ kāyena labhyeta nanu labdhā mayaiva sā ||

evamātmānamṛtsṛjya sarvasattvārthamācaret |

bhaiṣajyapratimākalpo lokadharmeṣvacintakaḥ ||

sarvasattvārthamantritve svaprajñāṃ viniyojayet |

yuktayā saṃrakṣya tu dravyaṃ sattveṣu vopayojayet ||

svakāye parakāye vā yadduḥkhaṃ neha duḥkhakṛt |

sattvānāṃ bhogavinnatvāt kleśāḥ śodhyāḥ prayatnataḥ |

lokopajīvyātsattīrthādbhujaṃgakuṇapā iva ||

puṇyakṣetramidaṃ śuddhaṃ saṃpatsasyamahāphalam |

sukhadurbhikṣasaṃtaptaṃ jagatsaṃtarpayiṣyati ||

lābhasatkārakāyādi tyaktaṃ nanu jane mayā |

kopaḥ kasyārthamadyāpi mṛṣā vā tanmayoditam ||

svārthaghneṣu yadi dveṣaḥ kṛpā kutra bhaviṣyati |

nirdayasyāpi kaḥ koṣaḥ parārtho yadi naśyati ||

ākrośādikṣamāḥ satyabhikṣukasturikādayaḥ |

svāmyaśanena durnyastā nopabhogyā bhavanti te ||

cintayati pratīkāraṃ na ca svāmihitecchayā |

nāpi saṃcodayatyenaṃ bhogārthaṃ nopayāti ca ||

anusmṛtyopasmṛtyaitānakṛṣṭoptā jinātmajāḥ |

nānāviṣayadhātunāṃ sarvendriyamahāgadān ||

vijñapya smārayitvaitān kruddhānapyupakāriṇaḥ |

svabhāvātyaktamādhuryāḥ sukhayantyeva duḥkhitān ||

dhātavaḥ pañca bhūvāritejonilakhasaṃjñitāḥ |

yāvatsatvāḥ sthitāstāvatsarveṣāmarthakāriṇaḥ ||

sarvaduścaritenaiṣāṃ sattvārthādvinivartanam |

evametān karomyeṣa dhātūn ṣaḍapi nirvyathān ||

yāvadākāśaniṣṭhasya niṣṭhā lokasya saṃbhavet |

tāvatsthāsyāmi lokārthaṃ kurvan jñānapuraḥsaraḥ ||

ātmācāryo'nuśiṣyāddhi sadātmānaṃ suśiṣyavat |

apṛṣṭvā cātmanātmānaṃ balenārakṣitakriyaḥ ||

ka eva mama duḥkhena duḥkhī syānme bhayādbhayī |

taddoṣānuśayajño vā yathātmagururātmanaḥ ||

avirāgyapalāyī ca karuṇāviṣayo'pi vā |

nityasaṃnihitaścāpi śiṣya ātmasamaḥ kutaḥ ||

kleśonmatto'tha mohāndhaḥ prapātabahule pathi |

skhalan pade pade śocyaḥ para ātmā ca sarvadā ||

skhalitānveṣaṇaṃ tasmātsamānavyasanājjanāt |

na yuktaṃ yujyate tvatra guṇān dṛṣṭvādbhutaṃ mahat ||

naikena śakyamādātuṃ mayā doṣamahodadhiḥ |

kṛtyamanyairmamaivātra ko'nyadoṣeṣu me kṣaṇaḥ ||

paracodanadakṣāṇāmanadhīṣṭopakāriṇām |

vākyaṃ mūrdhnā pratīcchāmi sarvaśiṣyo bhavāmyaham ||

saṃgrāmo hi mamaikasya bahubhiḥ kleśaśatrabhiḥ |

tatraikena raṇāsaktamanye nighnanti māṃ sukham |

tatra yaḥ pṛṣṭhato bhītiṃ śrāvayedanyato'pi vā |

pradviṣṭo vā prasanno vā same prāṇapradaḥ suhṛt ||

alisaṃghātanīlena cīrabhāraṇabhāriṇā |

vicitrasurabhisphītapuṣpa[śe]kharahā [cā]riṇā ||

yugapatsarvadigbuddhakṣetrasāgaracāriṇā |

balinā pratikāryeṇa sarvamārāpahāriṇā ||

narakapretasaṃtāpapraśamonmuktavāriṇā |

saṃsāragahanāntasthabhavyasattvārthasāriṇā ||

jagannetrotsavotpādibalālaṃkāradhāriṇā |

viduṣā bālavapuṣā lokavismayakāriṇā ||

majuśrīsaṃjñakaṃ yattatpiṇḍībhūtaṃ jagaddhitam |

sarveṇaivātmabhāvena namastasmai punaḥ punaḥ ||

anekaduḥkhasaṃtaptaprahlādanamahāhradam |

trailokyatṛṣṇāpātālaprapūraṇamahāmbudam ||

jagadiṣṭaphalasphītadaśadikkalpapādapam |

prārthitaprāptisaṃhṛṣṭajagannetrotpalārcitam ||

vismayodgataromāñcairbodhisattvaśataiḥ stutam |

mañjuśriyaṃ namasyāmi praṇāmairutarottaraiḥ ||

niḥśeṣaduḥkhavaidyāya sukhasattrapradāyine |

sarvākāropajīvyāya mañjughoṣāya te namaḥ ||

iti jinatanayānāṃ sarvathātyadbhutānāṃ

caritamupanibadhyopārjitaṃ yacchubhaṃ me |

bhavatu sukhamanantaṃ dehināṃ tena yāvat

sugatapadamanantavyomasīmādhipatyam ||

puṇyavṛddhirnāma ekonaviṃśaḥ paricchedaḥ ||



||samāptaścāyaṃ bodhisattvavinayo'nekasūtrāntodbhṛtaḥ śikṣāsamuccayaḥ ||