• Home
• Canon Text
• Romanized
• śāstrapiṭaka
• madhyamaka
• navamaḥ paricchedaḥ

navamaḥ paricchedaḥ

Technical Details

 

navamaḥ paricchedaḥ

mīmāṃsātattvanirṇayāvatāraḥ

 

eke'pavargasanmārgadhyānajñānāpavādinaḥ |

kriyāmātreṇa tatprāptiṃ pratipādyānapatrapāḥ ||1||

 

śāstroktavrīhipaśvājyapatnīsaṃbandhakarmaṇaḥ |

nānyo mārgo'pavargāya yukta ityāhurāgamāt ||2||

 

rāgādidoṣaduṣṭatvāt puruṣasya vaco mṛṣā |

vedo'puruṣakartṛtvāt pramāṇamiti gṛhyate ||3||

 

karturasmaraṇācceṣṭo vedo'puruṣakartṛkaḥ |

saṃpradāyānupacchedādāgamo'sau tadatyaye ||4||

 

atyantākṣaparokṣe hi pratipattiḥ kathaṃ bhavet |

adṛṣṭaliṅgasaṃbandhe svargāpūrvādivastuni ||5||

 

nityaḥ śabdo dhvanivyaṅgyaḥ saṃbandho'rthena nityataḥ |

pratipatturyato'rtheṣu pratipattiḥ prajāyate ||6||

 

advipravṛtterabhyāsāt pratyabhijñānatastathā |

śabdavacchrāvaṇatvāddhi nityaḥ śabdo'vasīyate ||7||

 

anumānāt pṛthak cāsau pramāṇatvāt tadanyavat |

ekānekārthaviṣayapratipattirathāpi vā ||8||

 

adṛṣṭaliṅgasaṃbandhapadārthamatihetutaḥ |

bhinnagocaradhījanmakāraṇatvādathāpi vā ||9||

 

apūrvo'pi kriyāvyaṅgyaḥ kriyā mokṣe'pi sādhanam |

somapānādikā vidvān nirjayedantakaṃ yathā ||10||

 

devarṣijuṣṭaśiṣṭeṣṭaṃ purāṇaṃ vartma śobhanam |

vedārthabāhyaiḥ strīśūdrairyuktaṃ yat tyajyate trayī ||11||

 

yadihāsti tadanyatra yannehāsti na tat kvacit |

catuṣṭaye'pi dharmādau tadevānyatra dṛśyate ||12||

 

dūṣayitvā trayīmārgaṃ hetubhirhetuvādinaḥ |

anumānapradhānatvāt svanayaṃ dyotayanti ye ||13||

 

pādasparśādivāndhānāṃ viṣame pathi dhāvatām |

anumānapradhānānāṃ pātasteṣāṃ na durlabhaḥ ||14||

 

na cāsti kaścit sarvajño nedānīṃ dṛśyate yataḥ |

sarvajñatā hi buddhasya kalpitā lokapaktaye ||15||

 

apramāṇaṃ vaco bauddhaṃ kṛtakatvāt tadanyavat |

asarvajñaśca saṃbuddhaḥ puruṣatvāt tadanyavat ||16||

 

apramāṇaṃ vaco bauddhaṃ trayīdarśanadūṣaṇāt |

yad yathoktaṃ tathoktaṃ tadyathā nagnāṭadarśanam ||17||

 

tadatrāpi parīkṣante yathābhūtagaveṣiṇaḥ |

pakṣapātaviṣaṃ hitvā śabdārthanyāyakovidāḥ ||18||

 

saṃpradāyānupacchedādāgamasyāgamatvataḥ |

sarvasyāgamatāsiddheḥ kiṃ tattvamiti dhāryatām ||19||

 

yat parīkṣākṣamaṃ yuktyā vacanaṃ cet tadāgamaḥ |

tadeva tāvanmīmāṃsyaṃ paścāt tenoditaṃ hi yat ||20||

 

tatra tatpratipakṣatvājjñānānmuktiritīṣyatām |

āmayapratipakṣatvādauṣadhād vyādhimuktivat ||21||

 

kriyātvānna kriyābhīṣṭā kṛṣivanmuktyavāptaye |

adhītve sati vācyatvānmitakālatvato'pi vā ||22||

 

nṛvāk ced doṣaduṣṭatvādapramāṇamitīṣyate |

sauvarṇikādivākyena hetuḥ syād vyabhicāravān ||23||

 

prāmāṇyamatha vedasya sādhyate'kartṛkatvataḥ |

asādhāraṇatā hetoḥ syādasiddhārthatāpi ca ||24||

 

anuvādādakartṛtve bauddhamapyastyakartṛkam |

pūrvabauddhābhisaṃbuddhaṃ yato buddhairanūdyate ||25||

 

kṛtakatvānumānācca pakṣabādhānumānataḥ |

karturasmaraṇāsiddherhetośca syādasiddhatā ||26||

 

samantrasyaiva saṃbhūto mantrakartuḥ purā yadi |

śāstraṃ vā samabhipretaṃ tatkartṛkamakartṛkam ||27||

 

sakartṛkatvaṃ śāstrasya kimevaṃ na pratīyate |

tatsahotpannakartṛtvājjātismarakṛtairyathā ||28||

 

pratipattyānuguṇyena varṇāmnāyādathāpi vā |

gṛhyete vedavākyānāṃ na kiṃ puruṣakartṛtā ||29||

 

itaśca vedavākyānāṃ matā puruṣakartṛtā |

vivakṣitārthadhījanmakāraṇatvād yatheṅgitam ||30||

 

anumeyaśca vedo'yaṃ asatpuruṣakartṛkaḥ |

bhūtahiṃsāsurāpānakriyoktermagaśāstravat ||31||

 

viṣopayuktivaddhiṃsā yadi mantraparigrahāt |

nābhīṣṭāniṣṭaphaladā śāstroktervāpi dānavat ||32||

 

mantrakarṣaṇacūrṇādyairāgamyāgamanaṃ hi yat |

tenānaikāntikaḥ pūrvo madyapānena cottaraḥ ||33||

 

āyuśchedaprayogatvādiṣṭo mantraparigrahaḥ

aniṣṭaphaladaḥ karturviṣaśastraprayogavat ||34||

 

svaśāstra eva cedukte siddhaḥ saṃsāramocakaḥ |

sāmānyena ca hetūktau syādanyatarāsiddhatā ||35||

 

yajñe paśūnāṃ hiṃsā cennāniṣṭaphaladāyinī |

tādarthyād brāhmaṇārthā hi yatheṣṭā pacanakriyā ||36||

 

bhoktrarthāḥ paśavo'bhīṣṭā bhogyatvāt tad yathāṅganā |

tasmād yajñārthatāsiddheḥ paśūnāṃ hetvasiddhatā ||37||

 

antarvedyāṃ ca hiṃseyaṃ saṃcintyābhrāntimāraṇāt |

aniṣṭaphaladā karturāyatyāṃ tad yathetarā ||38||

 

itaścāniṣṭaphaladā hiṃsā yajña itīṣyate |

saṃcintyajīvitocchedi duḥkhādhānād yathetarā ||39||

 

yādṛk phalamadhiṣṭhāne dṛṣṭe hi kurute kriyā |

kartustādṛgadṛṣṭe'pi hiṃsā vā tad yathetarā ||40||

 

vyākhyātaṃ madyapānādi pratyākhyānād yathoditāt |

madyaṃ na madahetutvāt sevyaṃ dhustūrakādivat ||41||

 

na madyapānaṃ nirdoṣaṃ yajñe mantraparigrahāt |

madyatvāt tad yathānyatra dṛṣṭo mantraparigrahāt ||42||

 

dṛṣṭaṃ na liṅgamastīti yadi svargādyaniścayaḥ |

liṅgādanumitatvācca niśceturniściterna kim ||43||

 

advipravṛtterityatra dīpe'pyadvipravṛttitaḥ |

vyabhicāritayā hetoḥ śabdanityatvamapyasat ||44||

 

sattvādanityaḥ śabdo'yaṃ kriyāvat kiṃ na gṛhyate |

athavā dehaceṣṭāvaddhīhetutvād vināśyayam ||45||

 

abhyāsapratyaṃbhijñānahetvoranvayahīnatā |

nābhyāsapratyabhijñāne'nitye'dṛṣṭe kvacid yathā ||46||

 

śabdatvanityatāsiddheḥ śabdatvaṃ na nidarśanam |

abhivyaktiniṣedhācca dhvanivyaṅgyo na cāpyayam ||47||

 

śrāvaṇo yadi śabdaste dhvanivyaṅgyaḥ kathaṃ mataḥ |

pratipattistu saṃketādasau śabdaḥ prasajyate ||48||

 

saṃketāsaṃbhavādādau pratipattirna yujyate |

saṃsāravadanāditvāt saṃketasyānuvādataḥ ||49||

 

anumāne pramāṇatvaṃ bhinnaṃ ca na tadātmanaḥ |

ato'naikāntiko hetuḥ pramāṇatvāditīritaḥ ||50||

 

bhinnagocaratāsiddherhetośca syādasiddhatā |

bhinnagocaradhījanmakāraṇatvasya netaraḥ ||51||

 

anekārthavinābhāvādanumānamapīṣyate |

naikārthapratipaddheturasmācchābdānna bhidyate ||52||

 

adṛṣṭaliṅgasaṃbandhe parārthādanumānataḥ |

pratipattiryato bodhye tasmādarthāntaraṃ na saḥ ||53||

 

nānumānāt pṛthakchābdaḥ parokṣamatihetutaḥ |

saṃbandhasmṛtyapekṣatvādanumānaṃ yathā svataḥ ||54||

 

nāpūrvo'pi kriyāvyaṅgyaḥ śabdavyaktiniṣedhavat |

ghaṭavad vāpyabhivyakterapūrvo'nitya iṣyatām ||55||

 

anityaṃ somapānādikriyāphalamitīṣyate |

kriyāphalatvāt tanneṣṭā kāmanaimittikaṃ phalam ||56||

 

na mokṣaprāpikā yuktā somapānādikī kriyā |

kriyātvāt tadyathā neṣṭā kāmanaimittikī kriyā ||57||

 

na jayatyantakaṃ tasmādenaṃ panthānamāśritaḥ |

parapraṇeyairjuṣṭo'yaṃ vicārākṣamabuddhibhiḥ ||58||

 

trayīmārgapraṇetṝṇāṃ brahmakeśavaśūlinām |

dṛṣṭvā kleśātmikāṃ caryāṃ yuktaṃ yat tyajyate trayī ||59||

 

jñānena jñāninaḥ pāpaṃ dahatyagnirivendhanam |

atastejoviśeṣācca na teṣāṃ pratyapāyitā ||60||

 

yat kleśadahanāyālaṃ tajjñānaṃ jñānino viduḥ |

nātaḥ prakurute pāpaṃ jñānī taddhetvasaṃbhavāt ||61||

 

siddhiyogo na lipyeta karmaṇā pātakena vā |

iti bruvāṇaiḥ sanmārgānnaṣṭairanye'pi nāśitāḥ ||62||

 

tatvārthadarśanī buddhiḥ brahmādīnāṃ na ceṣyate|

tilottamāyāṃ saṃraktau kathaṃ brahmatriśūlinau ||63||

 

pūrvaṃ krodhāgninādagdho dadāha tripuraṃ katham |

pūṣṇaḥ śaśāsa dantāṃśca bhagasyāpi ca locane ||64||

 

brahmahā madyapaḥ kāmī dṛṣṭatattvo yadīśvaraḥ |

kā kathādṛṣṭatattvānāṃ tatpaddhatyanugāminām ||65||

 

kathaṃ ca keśavaḥ keśicāṇūranarakādikān |

vyayojayadakāruṇyādasubhirvaśubhiśca tān ||66||

 

parāṅganādhanādāyī madyapaḥ prāṇidhātakaḥ |

dṛṣṭatattvo yadi harirjitaṃ śavarataskaraiḥ ||67||

 

prajāpālanadakṣatvādasurān surakaṇṭakān |

nāto doṣo ghnato'pyasti tasya ced dharmaguptaye ||68||

 

parastrīdraviṇādānamāyāśāṭhyapravṛttayaḥ |

kiṃ na tyaktā hi vāñchāsti tasya ced dharmaguptaye ||69||

 

adharmaścendriyo nāsya kathaṃ tatsṛṣṭikāritā |

adṛṣṭadoṣairajñatvāt tatsṛṣṭirathavā kṛtā ||70||

 

tṛṣṇayā pāti lokaṃ vā tṛṣṇādāsaḥ kathaṃ kṛtī |

kāruṇyāccet kathaṃ lokaṃ māyayā samamūmuhat ||71||

 

kiṃ nāsureṣu kāruṇyaṃ mṛtyujātyādiduḥkhiṣu |

sarvatra samadarśitvānnārisaṃjñāsya yujyate ||72||

 

rāgadveṣādiśabalaṃ kimīdṛk caritaṃ hareḥ |

anāryacaritaścaivaṃ kathaṃ sa puruṣottamaḥ ||73||

 

anyaivāsau harermūrtiḥ śivā yadi vikalpyate |

dṛṣṭvā hi yatayo yāṃ na punaryānti punarbhavam ||74||

 

na satī nāsatī cāsau nāsau sadasatī matā |

tasmāt sattvādasattvācca sadasattvācca sā parā ||75||

 

matsyādimūrtaiḥ sānyā cedanyatvādacyutā na sā |

ananyatvādananyāpi sāpyaśāntā yathetarā ||76||

 

athāpyaśāntā tasyaikā śāntānyaikātmanaḥ sataḥ |

bandhakī nāma sādhvī syāccharīrārdhena saṃyatā ||77||

 

sadādiśabdāvācyatvāt parā ceti na yujyate |

sato hi paratā yuktā yuktā kāraṇatāpi ca ||78 ||

 

kāraṇatvapratikṣepādanyatvasya ca pūrvavat |

na kāraṇaṃ na cānyāsau nācyutaścāpyajātitaḥ ||79||

 

acyuto yadi bhāvaḥ syāt sa naṣṭaḥ syād rasādivat |

acyuto yadyabhāvaḥ syādasaṃścāsau khapuṣpavat ||80||

 

sadasattā na yuktaivaṃ yathāgneruṣṇaśītate |

athāpyanabhilāpyaḥ syād yukto'sau kathamacyutaḥ ||81||

 

na cāsyānabhilāpyatvamātmavat tanniṣedhataḥ |

acyuternācyutaḥ kaścidasti cennācyuto'cyutaḥ ||82||

 

mūrtiranyā ca yā tasya klṛptā vyasanaguptaye |

kathamālambamānāstāṃ mucyante nirmumukṣavaḥ ||83||

 

indriyāṇīndriyārthebhyaḥ kūrmo'ṅgānīva saṃharan |

oṃkāraṃ vyāharan smṛtyā tadbhakto mucyate yadi ||84||

 

muktirna haribhaktānāṃ yujyate haridarśanāt |

vikalpasmṛtiyogatvāt tadyathā haridarśanāt ||85||

 

nirvikalpāpi dhīrneṣṭā yogayuktasya muktaye |

nimittagrahaṇān mithyā kiṃ punaḥ parikalpitā ||86||

 

rāgādisamudācārād brahmādīnāṃ kirātavat |

tattvacintāṃ nirākarṣyaḥ saṃdeho na hi kāraṇe ||87||

 

tathyadharmopadeśena pratipattyāpi vā svayam |

dharmaguptirbhavantī syāt sā dvidhāpyeṣu duḥsthitā ||88||

 

sarve ca sṛṣṭihetutvaṃ bruvate svātmanaḥ pṛthak |

kasyātra vacanaṃ bhūtamabhūtaṃ vā vikalpyatām ||89||

 

tadekatvādadoṣaśced brahmāpi brahmahā katham |

ekatvapratiṣedhācca tadekatvamayuktimat ||90|| thismuc

 

ātmabhede'pi cāyogāt tritayaṃ ceśanaṃ katham |

duḥkhahetau vimūḍhānāṃ tacchāntyuktau kathāstu kā ||91||

 

vedayogopadeśāditaduktervikalatvataḥ |

na tāvat tathyadharmoktyā śaktāste dharmaguptaye ||92||

 

pratipadvikalatvācca nālaṃ netuṃ parān śamam |

yathā netā svamārgeṇa prapātapatitaḥ parān ||93||

 

trayyāṃ hetuviparyastaiḥ kalpanājālakalpitaiḥ |

ayuktiyuktaṃ mīmāṃsyaṃ yuktaṃ yat tyajyate trayī ||94||

 

neśādikāraṇaṃ viśvaṃ yuktamityuditaṃ purā |

satyapīśādikartṛtve kiṃ hi tat kṛtakaṃ bhavet ||95||

 

ātmā tāvadajanyatvānna tatkṛtaka iṣyate |

dharmādharmau na tasyeṣṭau tadguṇatvād yathādhunā ||96||

 

deho'pi tābhyāṃ nirvṛttaḥ sukhaduḥkhopalabdhaye |

deho'pi dehināṃ tasmād yukto neśādikartṛkaḥ ||97||

 

kalpādou dehināṃ dehaḥ prākkṛtādṛṣṭahetutaḥ |

sukhādyutpattihetutvāt tad yathādyatanī tanuḥ ||98||

 

īśvarasya yadaiśvaryaṃ taccet puṇyakṛtaṃ bhavet |

tatpuṇyaparatantratvādīśvaraḥ syādanīśvaraḥ ||99||

 

īśvarasya yadaiśvaryamakasmāccet tadiṣyate |

tasyānyairapi sāmānyādīśvaraḥ syādanīśvaraḥ ||100||

 

īśvaro jñasvabhāvaścet tena tatkartṛkaṃ jagat |

kāraṇānuvidhāyitvāt sarvaṃ te cetanaṃ jagat ||101||

 

īśvaro yadi hetuḥ syājjagat syādaṇimādivat |

īśvaro vā na hetuḥ syājjagaccennāṇimādivat ||102||

 

īśvaraḥ karmakartā cet pacyate narakeṣvapi |

tadanyeṣāṃ hi pāke vā kṛtanāśākṛtāgamau ||103||

 

duḥkhahetośca nityatvāt tadduḥkhopaśamaḥ kutaḥ |

noṣṇavyupaśamo dṛṣṭo jvalatyeva vibhāvasau ||104||

 

ekasya vāvicitrasya kathaṃ kāryavicitratā |

nāpi cecchādivaicitryād yuktaikasya vicitratā ||105||

 

nityo'navayavaḥ sūkṣmaḥ kāraṇaṃ jagataḥ kila |

ekaḥ sarvagataśceti kimāścaryaṃ tato'param ||106||

 

krīḍārthaṃ tannimittaṃ cet tasyāḥ prītiphalaṃ kila |

prītau svaparatantratvādīśvaraḥ syādanīśvaraḥ ||107||

 

anyonyabhakṣaṇād bhītaistiryagbhirdurlabhotsavaiḥ |

niṣpeṣacchedadāhādiduḥkhārtairnārakairapi ||108||

 

nṛbhirjanmajarārogabhayaśokaklamārditaiḥ |

prīyate yo namastasmai rudrāyānvarthasaṃjñine ||109||

 

kṛpaṇā dhanino yad vā parānnādāśca sāttvikāḥ |

svarge cādharmiṇaḥ kecid vyaktamīśvaraceṣṭitam ||110||

 

alpāyuṣo guṇadhanā durvṛttāśca cirāyuṣaḥ |

dātāraṃścālpavibhavā vyaktamīśvaraceṣṭitam ||111|||

 

bauddhā hi sukhinaḥ kecit tadbhaktā duḥkhinaśca kim |

īśvarājñāvidhānācca puṇyabhāk kiṃ na pāpakṛt ||112||

 

vaicitryakarmaṇo'jñasya taddhetutvena vācyatā |

etena sṛṣṭikartṛtvaṃ pratyuktaṃ brahmakṛṣṇayoḥ ||113||

 

saṃyamitamatidvāraḥ sthāpayitvā śive manaḥ |

tathoṃkāramabhidhyāyan dhārayan dhāraṇāṃ hṛdi ||114||

 

kṣityādidhāraṇābhyāsāt prāksamāhitamānasaḥ |

īśe prasanne duḥkhāntaṃ gacchatītyetadapyasat ||115||

 

manojñānodayo yāvat tāvanmuktirna yujyate |

manojñānodayāt pūrvaṃ yathā muktirna yujyate ||116||

 

muktirneśvarabhaktānāṃ yujyate sthāṇudarśanāt |

upalambhavihāritvāt tadyathā sthāṇudarśanāt ||117||

 

duḥkhe heturyadīśaḥ syānnityatvāt so'pratikriyaḥ |

ato duḥkhāntagamanaṃ neśvarādasti kasyacit ||118||

 

etena śeṣāḥ pratyuktā brahmaviṣṇvātmavādinaḥ |

prītiścaivamayuktatvānneśādau dhīyate dhiyaḥ ||119||

 

pāpaprakṣālanaṃ cādbhiḥ śubhādikrayavikrayam |

dṛṣṭvā durvihitaṃ trayyāṃ yuktaṃ yat tyajyate trayī ||120||

 

pāpaṃ prakṣālyate nādbhiraspṛṣṭeranidarśanāt |

akledād vāsanādhānāt smṛtijñānaśubhādivat ||121||

 

na pāpaṃ pātayatyambhaḥ pauṣkaraṃ jāhnavādi vā |

spṛśyatvāt kledanāccāpi gṛhasyandikapūyavat ||122||

 

avagāhādinā kṣaye prākkṛtāpuṇyakarmaṇām |

kṛtatīrthābhiṣekānāṃ duḥkhaṃ na syādahetukam ||123||

 

na ca karmakṣaye cāpi na kaścit pātakī bhavet |

saṃśucyatyantarātmādbhirityuktiścet tadapyasat ||124||

 

santānāntarasaṃkrāntaṃ na pāpamiti gṛhyate |

amūrtatvād yathā rāgadveṣamohādyasaṃkramaḥ ||125||

 

na dānagrahaṇaṃ yuktaṃ puṇyāderiti niścayaḥ |

cittena saṃprayogitvāt tadyathā sukhaduḥkhayoḥ ||126||

 

brahmalokādigamanaṃ jvalanādiprapātataḥ |

dṛṣṭvā durvihitaṃ trayyāṃ yuktaṃ yat tyajyate trayī ||127||

 

heturnāgniprapātādi brahmalokādyavāptaye |

prāṇabādhe kāraṇatvācchalabhādiprapātavat ||128||

 

nānnapānaparityāgaḥ svargaprāpaka iṣyate |

kṣutsaṃtāpādihetutvādanicchānaśanādivat ||129||

 

abhojanādau puṇyaṃ ca tyāgāt pāpanirvṛttivat |

satyatyāgādibhirhetoḥ syādevaṃ vyabhicāritā ||130||

 

bhuktityāgo na puṇyāya yat kriyeyamapātakā |

yacchubhamanaskārasya tyaktamanasikāravat ||131||

 

trikoṭiśuddhaṃ yanmāṃsaṃ na tad bhakṣitamenase |

rasādipariṇāmitvād bhaikṣānnaṃ na yathainase ||132||

 

na māṃsabhakṣaṇaṃ bhoktuṃ bhujyate'pāpakāraṇāt |

kṣutpratīkārahetutvād yadṛcchāgatabhaktavat ||133||

 

aśucitvādabhakṣyaṃ cenmāṃsaṃ kāyo'pi cintyatām |

bījasthānādupastambhādaśucirviṭkṛmiryathā ||134||

 

śukrādisaṃbhavādeva matsyamāṃsaṃ vigarhitam |

tad ghṛtakṣīrādihetoḥ syādevaṃ vyabhicāritā ||135||

 

māṃsādaḥ prāṇighātī cet tannimittatvato mataḥ |

ajinādidharairhetoḥ syādevaṃ vyabhicāritā ||136||

 

na māṃsabhakṣaṇaṃ duṣṭaṃ tadārnī prāṇyaduḥkhanāt |

muktābarhikalāpāditaṇḍulāmbūpayogavat ||137||

 

saṃkalpajatvād rāgasya na heturmāṃsabhakṣaṇam |

tadvināpi tadutpattergavāmiva tṛṇāśinām ||138||

 

acetaneṣu caitanyaṃ sthāvareṣu prakalpitam |

dṛṣṭvā durvihitaṃ trayyāṃ yuktaṃ yat tyajyate trayī ||139||

 

sacittakā hi taravo na caturyonyasaṃgrahāt |

madhyacchede'pi vāspandājjaḍatve sati loṣṭavat ||140||

 

sparśato yadi saṅkocād yathā maṇḍalakārikā |

sacittake tathābhīṣṭe samaṅgāñjalikārike ||141||

 

vahnisaṃspṛṣṭakeśādyaiḥ syāddhetorvyabhicāritā |

cūrṇapāratasaṃsṛṣṭakeśairvāpi viśeṣataḥ ||142||

 

cikitsyatvānna taravo yujyante hi sacittakāḥ |

vinaṣṭasyāpi madyādeḥ pratyāpatteśca saṃśayaḥ ||143||

 

samānaprasavād vṛddherdohadācca sacittakāḥ |

ṛtujatvāt tathā svāpānnāpīṣṭāsturagādivat ||144||

 

dadruvidrumavaiḍūryakeśahemāṅkurādibhiḥ |

vyabhicārāt tu taravo na sidhyanti sacittakāḥ ||145||

 

acittakatvādevaiṣāṃ dohadādyaprasiddhataḥ |

hetavaḥ syurasiddhārthā gadaiśca vyabhicāriṇaḥ ||146||

 

sattvakarmādhipatyena kālajāḥ pādapādayaḥ |

narake svargaloke ca śastraratnadrumā yathā ||147||

 

yathārtho hi trayīmārgo brahmoktervaidyakādivat |

atītānāgatajñairvā tadukteścet prasādhyate ||148||

 

[149-67 available only in Tibetan]

 

mīmāṃsātattvanirṇayāvatāro nāma navamaḥ paricchedaḥ

idrumavaiḍūryakeśahemāṅkurādibhiḥ |

vyabhicārāt tu taravo na sidhyanti sacittakāḥ ||145||

 

acittakatvādevaiṣāṃ dohadādyaprasiddhata