• Home
• Canon Text
• Romanized
• śāstrapiṭaka
• kośa
• 20 kausīdyavargaḥ

20 kausīdyavargaḥ

Technical Details

(20) kausīdyavargaḥ



kausīdyena jñānahāniḥ

kausīdyamatimāyā ca dambhaḥ pāruṣyameva ca |

niyātabhūmayo dṛṣṭā jñānasya ca vivarjanam ||1||



saṃśleṣaścāpyasādhūnāṃ sādhūnāṃ varjanaṃ tathā |

nāśasya hetavaḥ śaktā mithyādarśanameva ca ||2||



adeśakālasaṃraṃbho vācyāvācyamajānataḥ |

anarthabhūmayo hyetā visrambhaścāpi tanmayaḥ ||3||



anarthabhūmayaḥ

yena tena ca samprītiḥ yatra tatra ca bhojanam |

lāghavaṃ janayatyante'praśaṃsā cātmanastathā ||4||



dhairyanāśaḥ smṛtibhraṃśo virodhaḥ pārthivena ca |

akrāntamṛtyavo hyete krūratā manasi sthitā ||5||



akarmāphalatattvajño dharmādharmavahiṣkṛtaḥ |

puruṣaḥ sādhunirmuktaḥ prapātagamanāśayaḥ ||6||



kausīdyamatinidrā ca rasanā gṛhyate tathā |

puṃdveṣayonayaḥ proktāḥ pāruṣyavacanaṃ tathā ||7||



lobho'pamānasya kāraṇam

atilobho'pamānaśca atimānaśca cāpalam |

dharmavarjyā kāmasevā mohasya paridīpikāḥ ||8||



doṣāṇāṃ mūlaṃ kausīdyam

trayāṇāmiha doṣāṇāṃ kausīdyaṃ mūlamucyate |

vīryārambheṇa duṣyante doṣā manasi sambhavāḥ ||9||



vīryārambheṇa hi phalaṃ hyavaśyamupabhujyate |

nyāyenārabdhatattvasya karmaṇo dṛśyate phalam ||10||



karmaṇastrividhasyāsya phalaṃ trividhamucyate |

trirāśiniyataṃ tacca triśūlaṃ tribhavānugam ||11||



kausīdyasevino durgatiḥ

pāpasevī pracaṇḍo yaḥ kausīdyamapi sevate |

dharmavidveṣakaḥ krūro'nutpathānupadhāvati ||12||



yasya tasya ca santuṣṭo yasya tasya prakupyati |

yatra tatra ca saṃsakto sa mūḍha iti kathyate ||13||



kausīdyaṃ (yat) svamanasaḥ pramādaviṣamūrcchitam |

prapātaṃ taṃ ca saṃrabdhamavisaṃvādakaṃ param ||14||



vīryārambhe mahāpāpakausīdyamalavarjitāḥ |

vimukterupabhoktāraste janāḥ sukhabhāginaḥ ||15||



kausīdyaṃ sarvadharmāṇāmajarāmarakārakam |

tena doṣeṇa mahatā narā duḥkhasya bhāginaḥ ||16||



sahāyaśca sukhāveśī tasmāt tat parivarjayet |

tena viddho hi puruṣaḥ svadhistutyaḥ samantataḥ ||17||



kusīdasyālpabhāgasya mohāpahṛtacetasaḥ |

kutsitaḥ svajanaiḥ sarvairna gatirvidyate śivā ||18||



kausīdyarataḥ pāpībhavati

kausīdyapāpasaṃsargīstyānamiddhaṃ tathaiva ca |

mokṣadvāravighātāya bhavantyete mahābhayāḥ ||19||



duḥkhasyaitāni harmyāṇi

āhrīkyamanapatrāpyamauddhatyaṃ pāpamitratā |

duḥkhasyaitāni harmyāṇi tebhyo rakṣennu paṇḍitaḥ ||20||



kausīdyenābhibhūtā ye nirārambhā gatitviṣaḥ |

socchvāsamaraṇaṃ teṣāṃ jīvitaṃ cāpi niṣphalam ||21||



jīvamānā na jīvanti kausīdyopahatā narāḥ |

mṛtyoratyadhikaṃ hyetat kausīdyamiti manyate ||22||



ārabdhavīryā eva bhavasāgaraṃ taranti

kausīdyapaṅkamagnā ye magnāste duḥkhasaṃstare |

ārabdhavīryā ye puṃsaste tīrṇā bhavasāgarāt ||23||



kausīdyānmandavīryo yaḥ sadā pāparataśca yaḥ |

sa jīvamāno'pi mṛto mṛtastu narakāya saḥ ||24||



mānavānāṃ nirdhanatve kausīdyaṃ kāraṇam

nirdhanāḥ paśubhistulyāste narā duḥkhabhāginaḥ |

parapiṇḍāśino dīnāḥ kausīdyaṃ tatra kāraṇam ||25||



prāyaśastu kusīdānāṃ paradāropajīvinām |

ratābhilāṣo'tyadhiko maithune ca sadā ratiḥ ||26||



te tattvakārikā riktāḥ kevalāhāratatparāḥ |

mṛtyukāle samutpanne dahyante svena cetasā ||27||



śītoṣṇaṃ ca sahantyete kṣutpipāse tathaiva ca |

gātrāntā ca kriyā kāryā yātrā dharmāya sarvadā ||28||



ataḥ kausīdye na matiḥ kāryā

na kausīdye matiṃ kuryāt kuśīle śīlakāmukaḥ |

saṃsāre sīdati nityaṃ na ca duḥkhāt pramucyate ||29||



kudīdānvitaḥ lokavañcito bhavati

paribhūya satāṃ madhye kusīdāllokavañcitaḥ |

vañcitaśca bhavatyante śarmaṇo vā vimucyate ||30||



dharmeṇa vimuktirbhavati

vīryavān smṛtisaṃlabdha ekāntanirataḥ sadā |

vimuktapāpakaidharmairmokṣaṃ prāpnoti yatnataḥ ||31||



kukarmeṣu matiḥ na kāryā

evaṃvidhā duḥkhaparamparā hi,

sattvaḥ kukarmeṣu (matiṃ) na kuryāt |

loke tridoṣānalasampradīpte,

kuryāt parāṃ śāntikṛpā mṛte na ||32||



||iti kausīdyavargo viṃśaḥ ||



cittañca vāk tathā karma saṃyojanantu pāpakam |

naraka-preta-tiryak-kṣut-kausīdyāni vidurdaśa ||



||iti dvitīyam udānam ||