• Home
• Canon Text
• Romanized
• śāstrapiṭaka
• kośa
• 13 karmavargaḥ

13 karmavargaḥ

Technical Details

(13) karmavargaḥ



śubhāśubhakarmaṇāṃ phalabhogaḥ



śubhānāmaśubhānāṃ ca karmaṇāṃ phalaniścayaḥ |

bhujyate sukṛtaṃ sarva karmabaddhā hi dehinaḥ ||1||



(yadaṅgī)kriyate karma tatkṛdbhiranubhūyate |

cittamānena mūḍhena tṛṣṇānagaravāsinā ||2||



svayameva phalaṃ bhuṅkte

sahāyairbahubhiḥ sārdha kurute karma duṣkṛtam |

ekākī karmaṇastasya phalaṃ bhuṅkte bhave bhave ||3||



karmaṇāmavisaṃyogaḥ sarvaiḥ svajanabāndhavaiḥ |

śubhāśubhaṃ paraṃ loke gacchantamanugacchati ||4||



yatra prayānti puṇyāni gandhastatrānudhāvati |

tathā śubhāśubhaṃ karma gacchantamanugacchati |

svakarmaphaladāyādā prāṇena karmayojinaḥ ||5||



sukṛtaiḥ suralokaṃ gacchanti

sukṛtaiḥ suralokeṣu duṣkṛtaiśca tathāpyadhaḥ |

yadduḥkhaṃ karmaphalajaṃ jāyate kaṭukodayam ||6||



tasyopamānamasuraṃ triṣu dhātuṣu jāyate |

tridoṣajaṃ tricittotthaṃ triṣu dhātuṣu pacyate ||7||



tasya karmavipākasya triṣu dhātuṣu lakṣyate |

hetupratyayasāmagrīsamutthaṃ ca prameva tat ||8||



anyakṛtakarmaṇaḥ phalaṃ nānyo bhuṅkte

na hyanyena kṛtaṃ pāpamanyena paripacyate |

sukarmaphaladāyādaḥ prāṇināṃ sarva eva hi ||9||



pūrvoktānāṃ trividhānāṃ svasya kṛta eva vipāko bhavati

karmaṇastrividhasyāsya na cāpyanyasya pacyate |

catvāriṃśadvipākasya ghoraṃ bhavati ceṣṭitam ||10||



karmaphalavarṇanam

ekaḥ karoti karmāṇi ekaśca phalamaśnute |

ekastarati durgāṇi sahāyo jāyate'paraḥ ||11||



jalāpekṣī jano yastu kurute karma duṣkṛtam |

na jano janaśatānāṃ bhuṅkte hi vyañjanaṃ (kvacit) ||12||



na hyanyena kṛtaṃ karma saṅkrāmatyaparasya tat |

na manye'nādinidhanamasmiṃlloke na cāparaiḥ ||13||



duḥkhāsvādaṃ sukhodbhūtaṃ yena duścaritaṃ kṛtam |

tena carati saṃsāre prerite karmavāyunā ||14||



kasya dharmo vardhate?

anapekṣitatattvasya vyākulīkṛtacetasaḥ |

vardhate sakalo (dharmaḥ) dharmāvṛtamanoharaḥ ||15||



ke narakaṃ gacchanti?

manasā vañcitāḥ sattvā manasā vipramohitāḥ |

gacchanti narakaṃ pāpāstamastamaparāyaṇāḥ ||16||



tamovṛte hi saṃsāre durlabhaṃ buddhaśāsanam |

duḥkhād duḥkhataraṃ yānti yebhyaḥ dharmo na rocate ||17||



anādimati saṃsāre karmajālāvṛtā prajā |

jāyate bhriyate cai(va) svakarmaphalahetunā ||18||



jāyante narake devā nārakeyāstathāvidhāḥ |

manuṣyāḥ pretaviṣaye narakaṃ vā prayānti hi ||19||



sukarmaṇaiva sukham

anyonyaprabhavaṃ dṛṣṭaṃ duḥkhaṃ vā yadi vā sukham |

kleśadharmodbhave janmanyaparādikṛtaṃ ca tat ||20||



asaṅkhyeyakṛtaṃ karma saṃsāre prāṇibhiḥ sadā |

tatra śakyaṃ budhairgantuṃ varjayitvā tathāgataiḥ ||21||



nādharmasya phalaṃ sādhu viparītaṃ na pacyate |

hetoḥ sadṛśatā dṛṣṭā jalasya vividhasya vai ||22||



sādṛśyasya hetuphalaṃ viparītaṃ na jātu hi |

saṃskṛtānāmarūpāṇāṃ hetuḥ pratyayasambhavaḥ ||23||



sahetukaṃ sarva karmaphalam

nāhetukaṃ phalaṃ dṛṣṭaṃ narake tu viśeṣataḥ |

hetusaṅghātasaṃsaktaṃ narakeṣu vipacyate ||24||



kṛtoparatagāḍhānāṃ niyataṃ pāpagāminām |

karmaṇā phalasambandho narakeṣu vipacyate ||25||



deśānāṃ prati kālaṃ tu yat karma (vi)nivartate |

tasya neṣṭaṃ phalaṃ dṛṣṭaṃ tattvamārgavidarśakaiḥ ||26||



udāharaṇapradarśanapūrvakaṃ phalasya karmādhīnatvameveti

dīpādhīnā prabhā yadvat karmādhīnaṃ phalaṃ tathā |

anyo'nyaphalasambhūtaḥ saṃskṛtaḥ sarva eva hi ||27||



pratītyasamutpādasamarthanam

anyonyahetukā dṛṣṭā hyanyonyavaśavartinaḥ |

sādṛśyasyānubandhena dṛśyante tattvadarśakaiḥ ||28||



nāhetuphalasandhānamīśvarādibhirāsthitam |

bhavanti saṃskṛtā dharmā deśitāstattvadarśibhiḥ ||29||



anādimatisaṃsāre hetupratyayasambhave |

sādṛśyaṃ karmaṇā dṛṣṭaṃ viparītaṃ na kalpyate ||30||



buddhasya svarūpam

tatstheṣu karmavaśagāḥ prāṇinaḥ karmahetujāḥ |

sa karmaphalatattvajño (buddha) ityabhidhīyate ||31||



keṣāṃ śāntiḥ na vidyate?

mārgāmārgaviruddhā ye mūḍhā buddhasya śāsane |

(na) teṣāṃ vidyate śāntirādityasya tamo yathā ||32||



karmāyattaṃ sukham



karmāyattaṃ sukhaṃ dṛṣṭaṃ sukhāyattaṃ manastathā |

mano'vaboddhayā(ste)dharmā ye vyutpattivicāriṇaḥ ||33||



sucaritasya karmaṇaḥ phalam

anityāḥ sarvasaṃskārā jalabud budasannibhāḥ |

tasmāt sucaritaṃ karma loke martya paratra ca ||34||



dṛṣṭaṃ karmaphalaṃ loke dṛṣṭā eva vicitratā |

yaḥ pramādaparaḥ puṃsāstasyātmā dhruvamapriyaḥ ||35||



karmarajjvātidṛḍhayā duṣpramokṣasugāḍhayā |

baddhā bālā na gacchanti nirvāṇapuramuttamam ||36||



||iti karmavargastrayodaśaḥ ||