• Home
• Canon Text
• Romanized
• śāstrapiṭaka
• kośa
• 12 vāgvargaḥ

12 vāgvargaḥ

Technical Details

(12) vāgvargaḥ



nirvāṇābhilāṣukaḥ pāruṣyaṃ varjayet

pāruṣyaṃ varjayet dhīmān samyagvāg bhīrato bhavet |

mādhuryābhirato jarntunirvāṇasyāntike sthitaḥ ||1||



vācaṃ paśyan sadābhāṣenmalināṃ ca vivarjayet |

vāṅmanenā'bhibhūtā ye te yānti narakaṃ narāḥ ||2||



ekadharmavyatītasya mṛṣāvādasya dehinaḥ |

pratīrṇapratilokasya nākārya pāpamastiha ||3||



mṛṣāvāg na prayoktavyā

mṛṣāvācaṃ na bhāṣeta sarvā pratyayakārikām |

yathā badhyati saṃsāre sugatiṃ naiva paśyati ||4||



sādhupratyayatenīhā sarvavidveṣakārikā |

kāntāraḥ sarvādharmāṇāṃ mṛṣāvāca pravartate ||5||



jātamātrasya martyasya kaṭhārī jāyate mukhe |

paścāt chinattyātmānaṃ vācā durbhāṣitaṃ vadan ||6||



sarvā kāryapatākā sā sarvapāpaprasūtikā |

tamasāṃ yonirekā sā yāṃ vācaṃ bhāṣate mṛṣā ||7||



satyena hīnāḥ puruṣāḥ sarvasādhuvivarjitāḥ |

tṛṇavad yānti loke'smin pratyapāyeṣu duḥkhitāḥ ||8||



na vadedanṛtaṃ dhīraḥ kaṣṭā hyanṛtavāditā |

pūtigandhyasukhī cāpi paścāttāpena tapyate ||9||



satyamahimā

satyaṃ ca na vivarjeta tasya dharmo na vidyate |

vinivartitadharmasya sthitaṃ duḥkhamanekajam ||10||



satyaṃ sarvadharmāṇāṃ pradīpabhūtam

pradīpaḥ sarvadharmāṇāṃ sādhūnāṃ ratnavat priyam |

svargasya ca paraṃ vartma satyamuktaṃ gatajvaraiḥ ||11||



satyaṃ na hi divaṃ yāti mokṣasyā'satyavādinaḥ |

satyahīnā hi puruṣāḥ paśutulyāḥ prakīrtitāḥ ||12||



jaghanyānāṃ jaghānyāste yeṣāṃ na vidyate |

satyaṃ dharmasya sopānaṃ jyotiṣāmākaro mahān ||13||



panthāśca mokṣadharmāṇāṃ dhanānāṃ dhanamuttamam |

pāpakaiśca (pari)trāṇāṃ satyamuktaṃ manīṣibhiḥ ||14||



satyabhūṣitaṃ vāg bhūṣaṇasyāpi bhūṣaṇam

jyotiṣāṃ paramaṃ jyotiścakṣuścakṣuṣmatāmapi |

draviṇena vinā satyaṃ bhūṣaṇasyāpi bhūṣaṇam ||15||



nidhānamatulaṃ satyamahārya (sarvasādhakam) |

gacchanti (satyā yiṇaḥ) puruṣāḥ paramāṃ gatim ||16||



na tathā bhāsate rājā nānālaṅkārabhūṣitaḥ |

satyena bhūṣito dhīmān śobhate devavad yathā ||17||



na mātā na pitā cātha mitrāṇi na ca bāndhavāḥ |

trāṇamevaṃ yathā śrutvā tasmāt satyaparo bhavet ||18||



anṛtanindā

vahnīnāṃ paramo vahnirviṣāṇāṃ paramaṃ viṣam |

durgatīnāṃ ca sopānamanṛtaṃ parikīrtitam ||19||



viṣāgnitulyasaṃsparśa vartayedanṛtaṃ pumān |

anṛtena hi yo deva dagdhaityabhidhīyate ||20||



satyāsatyayoḥ parasparavirodhitvam

tasmāt sarvābhisāreṇa (na vadeda) nṛtaṃ pumān |

sarva bhayādikaṃ kaṣṭamanṛtaṃ kīrtitaṃ budhaiḥ ||21||



vahnīnāṃ paramo vahnirnirdahedapi sāgaram |

kiṃ punaryo mṛṣāvādī kāṣṭhaloṣṭhasamākṛtiḥ ||22||



satyaṃ tyaktvā mṛṣāvādaṃ yo naraḥ pratipadyate |

ratnaṃ tyaktvā sa pāpātmā pāṣāṇaṃ pratipadyate ||23||



yasyātmā na bhavet dviṣṭo yasya vā narakaṃ priyam |

mṛṣāvādaṃ svadehāgnim abuddhiḥ sa niṣevate ||24||



sadedaṃ satyavacanaṃ bhūṣaṇaṃ sarvadehinām |

satyaṃ tyaktvā mṛṣāvāde kasmād yānti kubuddhayaḥ ||25||



satyaṃ guṇānāmagryaṃ vai doṣāṇāmanṛtaṃ smṛtam |

guṇāṃstyaktvā kathaṃ mūḍho doṣeṣu paridhāvati ||26||



bījaṃ sarvasya duḥkhasya mṛṣāvādaḥ prakīrtitaḥ |

tathā satyaṃ sukhasyaiva tasmānnānṛtako bhavet ||27||



satyavādī hi puruṣaḥ priyaḥ sarvasya dehinaḥ |

cakṣurdoṣaimṛṣāvādī tasmānnānṛtako bhavet ||28||



devakalpāḥ sadā kṛṣṭāḥ puruṣāḥ satyavādinaḥ |

nārakeyāstathā mūḍhā janā hyanṛtacetasaḥ ||29||



kalyāṇānāṃ paraṃ satyaṃ doṣāṇāmanṛtaṃ tathā |

doṣavarjī guṇadveṣī puruṣaḥ puruṣottamaḥ ||30||



sukhodayaṃ sukhodarkaṃ sukhena paripacyate |

sukhena labhate satyaṃ(satyaṃ) nirvāṇagāmikam ||31||



duḥkhodayaṃ kaṭuphalaṃ duḥkhena saha pacyate |

anṛtaṃ sarvaduḥkhāntaṃ kaḥ pumān na vivarjayet ||32||



nānyadeśāgataṃ satyaṃ nānyasmāt prārthyate hi tat |

sarvatīrthottamaṃ satyaṃ na tīrthasalilāvṛtam ||33||



dīpānāṃ ca paro dīpaḥ satyaṃ buddhena deśitam |

auṣadhānāṃ paraṃ tacca sadā duḥkhaniṣūdanam ||34||



amṛtañca viṣañcaiva jihvāpāśe sthitaṃ nṛṇām |

amṛtaṃ satyamityuktaṃ viṣaṃ tūktaṃ mṛṣāvacaḥ ||35||



yasyānṛtamabhipretaṃ tasya satyaṃ dhruvaṃ sthitam |

viṣantu yasyābhimataṃ tasyeṣṭaṃ syānmṛṣāvacaḥ ||36||



viṣeṇa niścitaṃ nāśo mṛṣāvādena niścitaḥ |

mṛtavat sa pumānasti yo mithyātvabhibhāṣate ||37||



nātmano hi hitaṃ pathyaṃ ( para)sya na kathañcana |

paścāttu paraduḥkhāya tat kathaṃ sevyate nṛbhiḥ ||38||



deśe deśe mayā dṛṣṭaṃ janmamṛtyusahasrakam |

paraḥ sahastraṃ janayennāśayedanṛtaṃ vacaḥ ||39||



abhijātasa niṣkarṣo dvijātīnāṃ ca bhūṣaṇam |

darśanaṃ mokṣamārgasya satyamityabhidhīyate ||40||



tṛṣṇānadī hayamārāṇāṃ satāṃ satyena karmaṇām |

pūrvavat satyamityuktaṃ paraṃ sugatadeśikam ||41||



anādinidhane loke tṛṣṇāpāraṅgatā (narāḥ) |

nāstyatrāṇaṃ yathā satyamiti dharmavido viduḥ ||42||



abhidhyāpāśo na sevanīyaḥ

satyavadhyā sadā kleśā vajravadhyā yathā nagāḥ |

hatā(ste) puruṣā (jñeyā ye ') bhidhyā parivañcitāḥ ||43||



paracittasamenedaṃ rūpādyaiḥ parivañcyate |

abhidhyāmānasaṃ pāśaṃ sevitaṃ na vicakṣaṇaiḥ ||44||



dahyate'vikṛta ātmā tailadīptirivānalaḥ |

abhidhyādagdhamanasaḥ kāraṇaṃ nopalabhyate ||45||



vyāpādaḥ sattvān mohayatyeva

yasmāt tat sarvadā varjyaṃ kaṭukāśāviṣodayam |

vyāpādamohitāḥ sattvā nityaṃ tadgatamānasāḥ ||46||



na śāntimadhigacchanti sarpā iva bileśayāḥ |

atha kūrasvabhāvā ye vyāpādaparamā narāḥ ||47||



na teṣāṃ vidyate saukhyamādityena yathā tamaḥ |

na dharme nārthanikaro na dharmā na ca bāndhavāḥ ||48||



rakṣanti puruṣān sarvān vyāpādāhatacetasaḥ |

tamasāmākaro hyeṣa vyāpāda iha kathyate ||49||



vyāpādayati janakaṃ vyāpādaḥ parikīrtitaḥ |

avyāpādaḥ paraṃ śreyo na vyāpādaḥ kathañcana ||50||



avyāpādaparā ye tu te yānti padamacyutam |

niyatātathavādī yo'dharmavādī na dhārmikaḥ ||51||



sa cauraḥ sarvalokasya na cauraḥ prākṛtaḥ smṛtaḥ |

dharmavādī naro yastu carate dharmameva yaḥ ||52||



sa yāti śāśvataṃ sthānaṃ yatra gatvā na śocyate |

mithyāvacohata (pumān) laukikaḥ samprakīrtyate ||53||



lokottaraiḥ kalpaśataiḥ kadācit kathyate na vā |

tasmāt lokottaraṃ vākyaṃ laukikaṃ na kathañcana ||54||



saṃsārabandhanaṃ dṛṣṭaṃ laukikaṃ viṣavad vacaḥ |

tṛṣṇārataḥ sadā puṇyānmucyateti suniścitam ||55||



lokottaro (naro) dhanyo vidvadbhiḥ samudāhṛtaḥ |

hitaṃ tattvaṃ ca yo mūḍho na gṛhṇāti gurorvacaḥ ||56||



satyavādī sadā devatābhiḥ puraskṛtaḥ

sa paścād vyasane prāpte tapyate svena cetasā |

satyavādī sadā dānto devatābhiḥ puraskṛtaḥ ||57||



priyo bhavati lokasya paścād deveṣu modati |

priyo bhavati lokasya paścād svāntena(vardhate ) |

darśanīyaṃ mukhaṃ cāsya devalokeṣu jāyate ||58||



abhūtavādī puruṣaḥ sarvasattvopapātakaḥ |

tamonicayasaṅkāśo jīvannapi mṛtaḥ samaḥ ||59||



kathaṃ na jihvā patitā vākyasaṃstutikattṛkā |

mṛṣā vadati yo vācaṃ sadbhūtaguṇanāśikām ||60||



mukhe sannihito byālo mukhe sannihito'phalaḥ |

(mukhe)sañjvalito vahniryo vācā bhāṣate mṛṣā ||61||



jihvā saṅgrathitaiḥ pāśaiḥ narakasyāgrahetukaiḥ |

chettā ca dharmahetūnāṃ mṛṣāvādaḥ pravartate ||62||



na tasya mātā na pitā buddho nāpi samvaraḥ |

yaḥ pāpabuddhiḥ patito mṛṣāvādaṃ prabhāṣateḥ ||63||



akasmāllaghutāṃ yāti ṣaḍbhiśca parivartate |

mucyate devatābhiśca yo vācaṃ bhāṣate mṛṣā ||64||



asaṅgṛhītavākyasyā'vicārya krodhanasya ca |

capalasyā'lpabhāgyasya sthitaṃ duḥkhamanantakam ||65||



parasya duḥkhaṃ dṛṣṭvāpi sattvaḥ sattvopapātakaḥ |

paravyasanavat tajjñaḥ pumān narakagāmikaḥ ||66||



ye yathāvādino marttyā na ca tatkāriṇaḥ sadā ||67||



satyameva svargasya nirvāṇasya ca sopānam

satyaṃ svargasya sopānaṃ nirvāṇadvārameva tat |

tasmāt satyaparo nityaṃ nityaṃ dharmagatiḥ smṛtiḥ ||

68||



anṛtaṃ na vadet



aśokamajaraṃ sthānaṃ prayāti puruṣottamaḥ |

varjayedanṛtaṃ dhīmān ninditaṃ tattvadarśibhiḥ ||69||



||iti vāgvargo dvādaśaḥ ||