• Home
• Canon Text
• Romanized
• śāstrapiṭaka
• kośa
• 10 madyajugupsāvargaḥ

10 madyajugupsāvargaḥ

Technical Details

10) madyajugupsāvargaḥ



madyapānavarṇanasādhanapradarśanam



madyapānaṃ na seveta madyaṃ hi viṣamuttamam |

naśyanti kuśalā dharmā madyapānaniṣevaṇāt ||1||



yaḥ sevate sadā madyaṃ tasya buddhirasaṃsthitā |

balabuddhī na dharmo'sti tasmānmadyaṃ vivarjayet ||2||



nāśānāmuttamaṃ nāśaṃ madyamuktaṃ manīṣibhiḥ |

tasmānmadyaṃ na seveta (madyaṃ) nāśayate naram ||3||



aniṣṭāḥ pāpakā dharmā madyapānaniṣevaṇāt |

bhavanti tasmād viṣavanmadyapānaṃ vivarjayet ||4||



dhanakṣayaṃ pāpakaraṃ kausīdyakaramuttamam |

madyapānasthitā doṣāḥ tasmāt tat parivarjayet ||5||



rāgasyoddīpanaṃ madyaṃ krodhasyāpi tathaiva ca |

mohasyoddīpakaṃ bhūyastasmānmadyaṃ vivarjayet ||6||



madyamūlamanarthasya hāsasya narakasya ca |

sarvendriyavināśānāṃ hetubhūtaṃ hyanarthakam ||7||



atiharṣābhidhānasya śokasya ca bhayasya ca |

vāgdoṣasyā'tidamyasya pāruṣyasyā''spadaṃ hi tat ||8||



madyenā''kṣiptamanasaḥ puruṣāḥ paśubhiḥ samāḥ |

kāryākārya na vindanti tasmānmadyaṃ vivarjayet ||9||



madyakṣipto hi puruṣo jīvannapi mṛto mataḥ |

ya icchejjīvitaṃ saukhyaṃ sa madyaṃ varjayet sadā ||10||



madyaṃ sarvadoṣāspadam

sarvadoṣāspadaṃ madyaṃ sarvānarthakaraṃ sadā |

sarvapāpeṣu sopānaṃ tamasāmālayo mahān ||11||



madyena pretaloke narake vā patanam

madyena narakaṃ yānti pretalokaṃ tathaiva ca |

tiryakṣu yānti puruṣā madyadoṣeṇa vañcitāḥ ||12||



viṣādapi viṣaṃ madyaṃ narakānnarakaṃ tathā |

vyādhīnāṃ ca paraṃ vyādhirmadyamuktaṃ manīṣibhiḥ ||13||



madyena hānipradarśanam

buddhīndriyavināśāya dharmaratnaṃ kṣayāya ca |

yo'tirekaparaṃ madyaṃ brahmacaryabadhāya ca ||14||



madyena laghutāṃ yānti pārthivā śāstracakṣuṣaḥ |

kiṃ punaḥ prākṛtā martyā madyapānavilambitāḥ ||15||



madyasya vināśakaratvam

kuṭhāraḥ sarvadharmāṇāṃ hrīvināśakaraṃ param |

madyaṃ niṣevitaṃ martyairvināśāyopakalpyate ||16||



madyena jñānājñānavivekaśūnyapradarśanam

na jñānaṃ nāpi vijñānaṃ na kāryāṇi na ca kriyām |

jānīte puruṣaḥ sarva madyena hṛtacetasā ||17||



madyasevanasya paritāpasādhanam

akasmāt tapyate janturakasmāt paritapyate |

bhavatyakasmāt pāpī (ca) yo madyamanusevate ||18||



madyasya buddhisammohajanakatvam

buddhisammohajanakaṃ lokadvayavināśakam |

vahniśca mokṣadharmāṇāṃ madyamekaṃ vyavasthitam ||19||



madyasya kimpākatvam

abhyāse madhuraṃ madyaṃ vipāke paramaṃ kaṭu |

kimpākādapi kimpākaṃ madyamuktaṃ parīkṣakaiḥ ||20||



narakasya sādhanaṃ madyam

na madye viśvaseddhīmān naraṃ vakṣyati māmiti |

śītasparśa vipākoṣṇaṃ madyaṃ narakagāmikam ||21||



sampattau vyasanaṃ madyaṃ devānāṃ tu viśeṣataḥ |

yathā yathā sukhā prītistannāśe vyasanaṃ tathā ||22||



madyapānamadonmattāḥ sattvā mohavaśānugāḥ |

sākṣyamohamayaṃ pānaṃ pibanti rasatṛṣṇayā ||23||



madyaṃ mohamayaṃ pāna pītvā kālena coditāḥ |

nākāt pratyakṣanarakaṃ tasmāt madyaṃ na saṃspṛśet ||24||



darśanātpānācca madyapānaṃ mohajanakam

darśanāt sparśanāt pānāta madyaṃ mohayate naram |

tasmāt sa madyapānaṃ ca dūrataḥ parivarjayet ||25||



darśanājjāyate lobhaḥ sparśanād gandhasambhavaḥ |

gandhād rasābhilāṣaśca rasanādadhamā matiḥ ||26||



manīṣiṇaḥ madyasevanātpatanti

naikasarvādhamaṃ nyāsaṃ kathayanti manīṣiṇaḥ |

nāmarūpaniṣedhāya yathā madyaṃ niṣevitam ||27||



madyapānaphalasūcanam

vāgbhrāmayati mastiṣkaṃ cakṣuṣīdhvanireva ca |

sambhrāntivimatirmūḍho na kiñcit pratipadyate ||28||



striyo'pi madyapāyinamupahasanti

striyo'pyupahasantīmaṃ puruṣaṃ patitaṃ bhuvi |

niśceṣṭaṃ kāṣṭhasadṛśaṃ niścalaṃ patitaṃ bhuvi ||29||



madyapānaṃ maraṇādapi nikṛṣṭataram

sambhāvitasya maraṇaṃ madyapānaṃ prakīrtyate |

hālāhalādabhyadhikaṃ kārāvāsādhikaṃ ca tat ||30||



madyapānavarjanaṃ śreyaskaram

ādīnavāśca ṣaṭ triṃśanmadyapānādavasthitāḥ |

tasmādādīnavo jñeyaḥ sa hi tad varjayet sadā ||31||



madyapānaṃ viduṣo'pi jantoḥ malinīkaraṇāya bhavati

atijātasya viduṣo malinīkaraṇaṃ mahat |

kāśapuṣpasamaṃ jantuṃ kurute laghusattvaram ||32||



viṣayānaladagdhaḥ kāryākāryaśūnyo bhavati

pramādauhyati magnānāṃ viṣayairapahṛṣyate |

madyapānena bhūyaśca manovyāmohakāriṇā ||33||



viṣayānaladagdhasya kāryākāryamajānataḥ |

vanopavanalabdhasya madyapānasya kiṃ punaḥ ||34||



madyapānaṃ mohāya pāpāya jāyate

rasena śobhanaṃ madyaṃ pariṇāmena dāruṇam |

pariṇāmaphalaṃ pāpaṃ narakeṣūpapadyate ||35||



pītaṃ janayate mohaṃ mohāt pāpeṣu rakṣyate |

saṃraktahṛdayo bālo narakānupadhāvati ||36||



madyapānamadhamatvasādhanam

prakarṣa janayatyādau vipāke dainyamuttamam |

tṛṭ chedaṃ kurute cāsau paścāddāhaṃ sudāruṇam ||37||



tad buddhiṃ nāśayatyādau paścānnāśayate sukham |

tasmāt sa puruṣo dhīro yo madyaṃ nānusevate ||38||



madyaniṣeviṇo vihagasadṛśā bhavanti

vihagaiḥ sadṛśaṃ yānti puruṣā madyasevinaḥ |

tulyaṃ vyāmohajanakaṃ madyaṃ mohamahāviṣam ||39||



vimohitā durgatimadhigacchanti

yairmadyaṃ viṣavad dṛṣṭaṃ tairdṛṣṭaṃ padamuttamam |

yaistu tad virasaṃ pītaṃ pītaṃ tāmra (ka) lohitam ||40||



niṣpratīkārakarmāṇi yaḥ karoti vimohitaḥ |

madyapānasamāviṣṭaḥ so'nte gacchati durgatim ||41||



madyapānasevināṃ nāśo bhavati

ekatra sarvapāpāni madyapāna (niṣevaṇam) |

yasmānnāśayate (madyaṃ) cittamūlaśca saṃvaraḥ ||42||



madyapāyī naṣṭadharmo bhavati

naikāṅgitā hi cittasya na dharmāṇāṃ vicāraṇā |

yaḥ pā(pa)nirato bhikṣurbhavenmadyaniṣevaṇāt ||43||



madyenākṣiptamanaso kuśalasya ca ghātakaḥ |

naṣṭadharmasya sattvasya nāyaṃ loko na cāparaḥ ||44||



īryyāpathaṃ na jānāti na kālaṃ nāpi deśanām |

saddharmato viruddhaśca tucchaṃ kimapi bhāṣate ||45||



svayaṃ tāvanna jānāti kimidaṃ kathyate mayā |

vākpāruṣyaṃ kathaṃ cānyaṃ parijñāsyatyaśobhanam ||46||



lāghavaṃ yāti lokasya dharmācca parihīyate |

nidhana puruṣairdṛṣṭaṃ madyajvalanasevanāt ||47||



madyapānaṃ kutsāṃ sampādayati

nāśo bhavatyatīte hi vartamāne suhṛjjane |

anāgate kutsitānāṃ madyaṃ traikālyanāśakam ||48||



madyaṃ dharmapradūṣakameva

nāmarūpavināśāya cittanāśāya dehinām |

utpannadoṣajanakaṃ madyaṃ dharmapradūṣakam ||49||



madyavarjanaṃ dharmāya pānañca mṛtyurna bhavati

samāhitā dharmaśīlāḥ puruṣā madyavarjakāḥ |

te yānti paramaṃ sthānaṃ yatra mṛtyurna vidyate ||50||



||iti madyajugupsāvargo daśamaḥ ||