• Home
• Canon Text
• Romanized
• śāstrapiṭaka
• kośa
• 5 anityatāvargaḥ

5 anityatāvargaḥ

Technical Details

(5) anityatāvargaḥ



sukhaṃ kṣayāntam



kṣayāntaṃ hi sukhaṃ sarva na sukhaṃ vidyate dhruvam |

saṃsṛjenna sukhaṃ tasmāt yadīcchet sukhamātmanaḥ ||1||



mṛtyuḥ sarvānapi ākarṣati



gacchatāṃ tiṣṭhatāṃ caiva hasatāṃ krīḍatāmapi |

avisahyo mahāvego mṛtyurnaśyati dāruṇaḥ ||2||

na tatstha mihāmutra yatrāsau pratipadyate |

tathāpi nāma saṃmūḍhā janayitvā vaśaṃgataḥ ||3||

(na bālaṃ na yuvānaṃ vā) na sthavirameva vā |

gṛhasthamagṛhasthaṃ vā yadā'sau nāpakarṣati ||4||

sukhitaṃ duḥkhitaṃ vāpi guṇavantaṃ tathaiva ca |

vratasthamavratasthaṃ vā yadā'sau nāpakarṣati ||5||

duḥśīlaṃ śīlavantaṃ ca (dāninaṃ ca tathottamam ) |

rājānaṃ cottamaṃ cāpi yadā'sau nāpakarṣati ||6||

daivaṃ vā nārakaṃ vāpi tiryañca pratajaṃ tathā |

pramattamapramattaṃ vā yadā'sau nāpakarṣati ||7||

kāmadhātūpapannaṃ vā rūpadhātau sthitañca yaḥ |

ārupyadhātūpapannaṃ vā yadā'sau nāpakarṣati ||8||

karmapāśo jarādaṇḍo vyādhidaṇḍo mahāvanam |

raktopamo mṛtyurayaṃ sattvānādāya gacchati ||9||

evaṃvidhe pratibhaye mṛtyau paramadāruṇe |

(upasthite pravartante) surāḥ kāmavimohitāḥ ||10||



patanāntaṃ sarvasukhaṃ santyajet

yad duḥkhaṃ cyavamānasya devalokāt surasya ca |

narake yadbhavaṃ duḥkhaṃ viprayogapuraḥsaram ||11||



viṣamākṣikasaṃyuktaṃ yathānnaṃ cāpi (śobhanam) |

(tato) devagataṃ saukhyaṃ patanāntaṃ visarjayet ||12||



kṣīṇapuṇyasya dīnasya svadārairvarjitasya ca |

yad duḥkhaṃ cyavamānasya tasyaupamyaṃ na vidyate ||13||



sukṛtakṣīṇamandasya dvipasyeva gatattviṣaḥ |

śāmyati devasya yadduḥkhaṃ mahadduḥkhaṃ prajāyate ||14||



devasyāpi cyavanam

tṛṣṇāviṣayavṛddhasya śokopahatacetasaḥ |

mandavāgdehaceṣṭasya devasya cyavanād bhayam ||15||



duḥkhasya viṣayataratvam

yathā yathā sukhāsvādāḥ kāmā paramavañcakāḥ |

(tathā) tathā bhavatyeva teṣāṃ duḥkhaṃ mahattaram ||16||



yatamānasya yad duḥkhaṃ devalokān prajāyate |

tasyāntareṇa narakaṃ kalāṃ nārhati ṣoḍaśīm ||17||



cyavanāntaṃ devalokaṃ maraṇāntaṃ tadā bhuvi |

dṛṣṭvā duḥkhaṃ ( bhavatyeva śreyase kriyatāṃ manaḥ) ||18||



saukhyaṃ patanāntam

patanāntaṃ sadā saukhyaṃ nāsti lokasya nityajāḥ |

tad buddhvā kāraṇaṃ sarva śreyase kriyatāṃ manaḥ ||19||



sarva duḥkhāntam

sarve kṣayāntā nicayā patanāntā samucchrayāḥ |

saṃyogā viprayogāntā maraṇāntaṃ hi jīvitam ||20||



jātasya maraṇaṃ nityaṃ na tasyāstīti nityatā |

na bhūtārāvitānena triṣu dhātuṣu dṛśyate ||21||



garbhameke vinaśyanti tathaike sūtikāgṛhe |

parisarpaṇakāścaike tathaiva ( ca vinaśvarāḥ) ||22||



maraṇaṃ dhruvam

udayāstaṃ ca gamanaṃ bhāskarasya pradṛśyate |

tathā jātasya sarvasya sthitaṃ maraṇamagrataḥ ||23||



sarva sukhaṃ kṣayāntam

kṣayāntaṃ hi sukhaṃ sarva yo na vindati mohadhīḥ |

sa paścānmaraṇe prāpte (duḥkhāya janibhāgbhavet ) ||24||



kuśalaṃ kārya- (karaṇaṃ kuśalī ca) priyaḥ sadā |

sukhaṃ hi dharmācaraṇaṃ kathayanti manīṣiṇaḥ ||25||



anityamadhruvaṃ sarva pariṇāme kaṭuḥ sadā |

saṃsāraḥ kathito buddherhetustattvavicāraṇe ||26||



devāḥ sukhapramattā ye teṣāṃ sukhamaśāśvatam |

cyavamānasya ca yadduḥkhaṃ devalokāt surasya hi ||27||



tasyopamānaṃ naivāsti narakānnarakaṃ hi tat |

kimete nāvabudhyante patanāntaṃ sadā sukham ||28||



ajarāmaravallokaṃ paśyanti sukhamohitāḥ |

cyutyupapattimallokaḥ saṃkhyā tasya na vidyate |

na codvijanti puruṣāstṛṣṇayā parivañcitāḥ ||29||



abhiyāti sadā janma tvaritaṃ yāti yauvanam |

saṃyogo viprayogaśca sahajaḥ paridṛśyate |

vimūḍhā nānupaśyanti viṣayaiḥ parivañcitāḥ ||30||



tṛṣṇāvivaśā devāḥ cyavanti



cyavanti devāḥ vivaśāstṛṣṇayā parimohitāḥ |

sā bhūmistāni padmāni vanāni vividhāni ca ||31||



sarvapadārthānāmāpātaramaṇīyatvam

śikharāgrāṇi ramyāṇi ratnavanti mahānti ca |

sarāṃsi nadyo vividhā ratnapāṣāṇabhūṣitāḥ ||32||



vṛkṣā vicitrakusumāḥ paṅktibhirvividhaiḥ sthitāḥ |

harmyāgrāṇi ca ramyāṇi ratnavanti mahānti ca ||33||



kalpavṛkṣā hemamayā kecidvaidūrya nirmalāḥ |

rājatāstapanīyāśca vimiśrā vararohiṇaḥ ||34||



bhramarairūpagītāśca vibhānti kamalākarāḥ |

vibhūṣaṇāni ramyāṇi devārhāṇi ca sarvataḥ ||35||



sarva kṣaṇikam

sarvametat tathaivāsti janastu parivartate |

māyābudbudaphenābhaṃ gandharvanagaropamam ||36||



sukhaṃ sarvasya devasya tṛṣṇayā vañcitasya hi |

sa vināśya janaṃ sarva bhrāmayitvā bhavārṇave ||37||



tṛṣṇaiva duḥkhamūlam

tṛṣṇā viṣāgnisadṛśā lokānāmatra tiṣṭhati |

avitṛptā kāmabhogairapi taptā sukhodbhavā ||38||



kālānalena nirdagdhā kva te devagaṇāḥ gatāḥ |

sarvathādhigatā yeyaṃ tṛṣṇā lokavitanvinī ||39||



yayā vimohitā devāḥ kālasya vaśamāgatāḥ |

devāsurā narā yakṣā narake yānti jaṅgamāḥ ||40||



kālapāśayojitaṃ traidhātukamidam

gacchanti vivaśāḥ sarve kālapāśaṃ durāsadam |

traidhātukamidaṃ sarva kālapāśena yojitam ||41||



tṛṣṇāvimohitāḥ maraṇaṃ na paśyanti

na ca paśyanti vivaśāstṛṣṇāmohena mohitāḥ |

anena hi yathā devāḥ śataśo'tha sahastraśaḥ ||42||



gatāḥ kālāgninirdagdhā viṣayairdhanasaṃbhavaiḥ |

parasya dṛśyate maraṇamātmano naiva dṛśyate ||43||



paścātte vyasane prāpte vindante duḥkhamātmanaḥ |

pramādakaluṣaṃ ceto viṣayābhirataṃ sadā ||44||



na vindanti dhruvaṃ mṛtyuṃ dehināṃ sahajasthitam |

sukhottaramanāśasya pramādābhiratasya ca ||45||



mṛtyusainyamupaitīdaṃ pramāthi viṣasannibham |

na mantrauṣadhakarmāṇi na devā nāsurāstathā ||46||



kālapāśabaddhasya na ko'pi trātā

kālapāśena baddhasya trātāro na bhavanti te |

rajasā guṇṭhitaṃ vaktraṃ ātmano naiva vindati ||47||



tṛṣṇāyā heyatve hetuḥ

prāpteścyavanabhūto'yaṃ mṛtyuḥ paścād bhaviṣyati |

lolupasya sadā yatnairavitṛptasya tṛṣṇayā ||48||



sahasā'bhyeti maraṇaṃ yannadṛṣṭaṃ sukhārthinām |

ayaṃ tavāgraho duḥkhaṃ mṛtyunā preṣito mahān ||49||



asmādanantaraṃ mṛtyurbhaviṣyati sudāruṇaḥ |

mahāgirivarādasmāt vanopavanabhūṣitāt ||50||



baddhānarā viṣayagā svakarmaphalabhoginaḥ |

krīḍāvihāriṇastāvat kvacit tṛṣṇāsukhaṃ na hi |

tarṣyayā tṛṣṇayā mūḍhāḥ patanti vivaśā bhuvi ||51||



dhūmasyānantaraṃ vahniryathā bhavati nityaśaḥ |

tathā cyavanaliṅgasya pṛṣṭhataścyavanaṃ sthitam ||52||



jātyā jātyā dhruvaṃ mṛtyuścārogye sati ruk sthitā |

sampattau vyasanaprāptiyauvane sahajā jarā |

sarvaiḥ priyairviyogaśca na saṃyogo dhruvaṃ sthitaḥ ||53||



dharmatāyāḥ mahattvam

dharmateyaṃ sadāloke samyagbuddhena deśitā |

ubhayasya kṣayo nāśo janasyo parivartate ||54||



jātau satyāṃ yathā mṛtyuravaśyaṃ sthita eva hi |

kṣīyate sukṛtaṃ karma āyūṃṣi kṣaṇikāni hi ||55||



saṃvarādikaṃ bhajadhvam

saṃvara dharmavinaye bhajadhvaṃ puruṣottamāḥ |

abhyeti yauvanaṃ sarvaṃ jīvitaṃ cānugacchati ||56||



sarvasya nāśaśālitvam

naśyanti sarvadā sarvā mā pramāde manaḥkṛthā |

na nityaṃ labhyate svargo na nityaṃ kṣaṇasampadā ||57||



yasya yāvannābhipatanaṃ tāvat kṣipraṃ (pra)yujyatām|

(tasya jāte hi patane tat prayogo vṛthā bhavet ) ||58||



ayaṃ sa hi drumavano nānāratnavibhūṣitaḥ |

latāgahvarasaṃcchannaḥ padmākaravibhūṣitaḥ ||59||



jāmbūnadamayaiśśuddhaiḥ prāsādaiḥ ratnacitritaiḥ |

nānāvidhaiḥ prastravaṇairlatābhirupaśobhitaḥ ||60||



karmasākṣījanasyāsya bhitvā gaganamucchritaḥ |

kalpāgnivirato meruḥ sarvathā na bhaviṣyati ||61||



kiṃ punarye surāstatra phenabudbudasannibhāḥ |

utpadyante vinaśyanti pramādamadamohitāḥ ||62||



sukhaduḥkhamanantaṃ ca svecchākāmaphalodbhavam |

devalokād yathā devāḥ patanti narake punaḥ ||63||



tad duḥkhaṃ paramaṃ kaṭu

śarīramānasaiduḥkhairvidyamāneṣu sarvataḥ |

na tacchakyaṃ pramatte syāt tadduḥkhaṃ paramaṃ kaṭu ||64||



viyogaduḥkhaṃ duḥkhanāmagrataḥ paripaṭhyate |

taccadevagatau nityamagrataḥ sampravartate ||65||



sarvapriyairmanāpaiśca viprayogo bhaviṣyati |

na ca devāḥ prapaśyadhvaṃ maraṇāntaṃ hi jīvitam ||66||



cyutikāle tu samprāpte vihvalendriyacetasā |

jānīdhvaṃ tatparaṃ duḥkhaṃ yadavaśyaṃ bhaviṣyati ||67||



sarvaṃ kṣaṇikam

akālacakrapratimaṃ gandharvanagaropamam |

tribhave saṃbhavaṃ sarva phenabudbudasannibham ||68||



yaḥ phenarāśau saṃmūḍhaḥ kuryācchādanasaṃstaram |

sa mūḍhaḥ saṃskṛte kuryādabhisvādaṃ bhramātmakam ||69||



mṛtyumahimā

na devā na narā yakṣā nāsurā garuḍāstathā |

trāyante mṛtyusamaye karmaṇā paritapyatām ||70||



yāvannāyāti samaye mṛtyurājaḥ sudāruṇaḥ |

tāvattu sukṛtaṃ kārya mā paścāt paritapyatha ||71||



yadbhūtakāmajaṃ saukhyaṃ prākṛtaṃ viṣayodbhavam |

mṛtyukāle samutpanne tiṣṭhanti na budharṣamā ||72||



kiṃ kariṣyanti saukhyāni kiṃ striyaḥ kiñcabāndhavāḥ |

mṛtyunā hriyamāṇasya devalokāt samantataḥ ||73||



sthirāstā bhūmayaḥ sarvā vanopavanabhūṣitāḥ |

mṛtyurajjvā vibaddhaśca tvantu kālena nīyase ||74||



ākāśe jaladā yadvada vāyunā samudīritāḥ |

saṃśliṣṭāśca viyujyante saṃsāre prāṇinastathā ||75||



ṛtau ṛtau yathā puṣpamāgatairdṛśyate naraiḥ |

vyatīte tu ṛtau sarve pratiyānti yathāgatāḥ ||76||



yathā kāle samutpanne modante sukṛtaiḥ surāḥ |

vyatīte tu śubhe kāle pratiyānti yathāgatāḥ ||77||



ṛtau ṛtau yathā vṛkṣe parṇajāyate'nekaśaḥ |

vyatīte tu śubhe kāle śīryate tat samantataḥ ||78||



yathā parṇopamādetanna saukhyamabhayaṃ bhave |

śīryate satataṃ saukhyaṃ nāsaukhyaṃ vidyate dhruvam ||79||



prābṛṭkāle yathā varṣamākāśe na nivartate |

tathā saukhyamidaṃ sarva gacchati na nivartate ||80||



barhiṇāṃ ca yathā nādo vāyunā samudīritaḥ |

śrūyate tatpraṇāśāya tathā saukhyamidaṃ smṛtam ||81||



yathā hi jvalane kṣiptaṃ dhruvaṃ kālaṃ pradahayate |

tathā vahanyupamaḥ kālaḥ kāṣṭhavaccaratāṃ smṛtaḥ ||82||



āgatāśca gatāścaike śataśo'tha sahastraśaḥ |

saṃvego na bhavatyeṣā tṛṣṇayā mohitāstathā ||83||



yathā yathā mahāsaukhyaṃ svayaṃ bhogo yathā yathā |

tathā tathā mahad duḥkhaṃ patanāntodbhavaṃ dhruvam ||84||



jātyādi duḥkhaparamparā

jātirduḥkhā jarā duḥkhā maraṇaṃ duḥkhameva ca |

priyaiśca saha viśleṣo duḥkhasyaiṣā paramparā ||85||



mṛtyunā na bibhet

ekasya patanaṃ dṛṣṭvā kathaṃ nodvijate janaḥ |

mamāpi patanaṃ hyetat sarvapāpairbhaviṣyati ||86||



yaḥ paśyati bhayaṃ dūrāt pratipattau ca vartate |

(sa)mprāpte mṛtyusamaye na vibheti gatavyathaḥ ||87||



vibhujyamāno daunaiśca mṛtyuḥ svajanabāndhavaiḥ |

yadduḥkhaṃ mṛtyusamaye tanna śakyaṃ prabhāṣitum ||88||



patanāntaṃ hi maraṇaṃ patamāno yathā giriḥ |

niṣpratyanīkaṃ balavat puruṣānapakarṣati |

saṃśliṣyate mahāvegaḥ samprahārī ca sarvadā ||89||



taṃ jñātvā mā pramādeṣu stubadhvaṃ devasattamāḥ |

saṃśleṣayati viśleṣaṃ yauvane ca sadā jarā ||90||



jīvite ca sadā mṛtyuḥ padametat sadā sthitam |

anityenā'gninā'vaśyaṃ dagdhabyo yatra gocaraḥ ||91||



kalpānte kiṃ punardevā ye phenakadalīsamāḥ |

na tadasti bhavet kiñcid yad jñānaṃ saṃskṛtaṃ calam ||92||



yannityaṃ (ca) sukhaṃ vā syādetatsthānaṃ na vidyate |

upasthitamiva jñeyaṃ maraṇaṃ sarvajantubhiḥ ||93||



yasmāt tasya pratīkāraḥ sarvopāyairna śakyate |

rūpaṃ kṣaṇikameteṣāṃ vayo'pi kṣaṇikaṃ tathā ||94||



kṣīyate ca tathā saukhyaṃ na ca buddhayantyamedhasaḥ |

yadā tat sarvameteṣāmanekaṃ śubhalakṣaṇam ||95||



janmataḥ kālacakreṇa paripāṭayā vināśitam |

tathaivaitat purā naṣṭamanekaśatalakṣaṇam ||96||



tathaitadapi janmaiṣāṃ mṛtyurājo hariṣyati |

pramādamanasāṃ hyeṣāṃ nityaṃ sukhavihāriṇām ||97||



nidhanāya kālapāśo'yamabhyeti sukhanāśakaḥ |

sukhārogyabalaprāṇapriyaviśleṣakārakaḥ ||98||



balavanmṛtyurājo'sau samīpamupasarpati |

yaḥ samīpagato hyeṣāṃ pramattānāmanekaśaḥ ||99||



sukhanāśaḥ suniścitaḥ

jīvitaṃ saha saukhyena tvaritaṃ nāśayiṣyati |

dīrghakālamidaṃ dhvastaṃ pramādāpahatāḥ surāḥ ||100||



nāvabuddhayanti mohāndhāḥ saukhyena pratibodhitāḥ |

yadā hīnaprabhāhyete vihvalendriyacetasaḥ ||101||



yamalokaṃ patiṣyanti tadā jñānasya tatphalam |

jīyate bata kālo'yaṃ kṣaṇikaṃ ca yathā sukham ||102||



tathāpi raktamanaso nāvabuddhayantyacakṣuṣaḥ |

ramyād ramyataraṃ yānti nityaṃ sukhavihāriṇaḥ ||103||



prayāsyanti yathā hayete mṛtyurājo hariṣyati |

jarā jātivipattīnāṃ yo na mūḍho viṣīdati ||104||



sa paścāt mṛtyusamaye tapyate (hīnacetasā) |

sukhaṃ deveṣu samprāpya (tadetad) guṇasammatam ||105||



kṛtahutaṃ vināśāntaṃ kṣaṇikaṃ jīvitaṃ calam |

yathā hi yad vināśāntaṃ tathaiṣāmapi jīvitam ||106||



acireṇāpi kālena bhaviṣyati na saṃśayaḥ |

yāvannāyāti maraṇaṃ yāvad buddhiranāvilā ||107||



manasā dharmaratiḥ kāryā

tāvaddharmarataṃ dhārya manobalena dhīmatā |

sarvajīvitanāśāya sarvasaukhyakṣayāya ca ||108||



priyaviyogaḥ niścitaḥ

sarvapriyaviyogāya mṛtyurāśrayameti ca |

tasminnāpte mahādhyāne mṛtyuḥ paramadāruṇaḥ ||109||



nānyat trāṇamṛte dharmāt tasmād dharmarato bhavet |

upapannasya devasya yā prītirupapadyate ||110||



nāsau cyavanaduḥkhasya kalāmarhati ṣoḍaśīm |

mṛtyukāle samutpanne na kaścit kasyacit tathā ||111||



sarvasya nāśatvam

na ca gacchantimapyekaṃ padamekaṃ hi gacchati |

yadā jātaṃ tadāramya naro mṛtyuparāyaṇaḥ ||112||



nānāmohaparītastu bhayametanna vidyate |

yadā te cyavanaṃ prāpte bhavabhogakaraṃ param ||113||



tadā vindati mūḍhātmā yad bhayaṃ mṛtyujaṃ mahat |

viṣayoragasandaṣṭā tṛṣṇā viṣavimohitā ||114||



na vindanti sadā devāścyavanānte mahad bhayam |

cyavanti ca tathā duḥkhamutpādayanti dehinām ||115||



yathopapattiścyavanaṃ devānāṃ samprajāyate |

karmavāyusamudbhrāntaṃ prayogeṇa ca duḥkhitam ||116||



puruṣaṃ nayate mṛtyuravaśaṃ (sukhavañcitam ) |

na mātaro na pitaro na mitrāṇi na bāndhavāḥ ||117||



sahāyatāṃ vrajantīyaṃ puruṣaṃ kālacoditam |

asahāyo janaścāyaṃ janaḥ prakṛtivañcitaḥ ||118||



mana eva pāśabandhanam

kevalaṃ tu manaḥpāśairbandhanairbadhyate janaḥ |

na janaḥ svajanaśceha trātā bhavati kasyacita ||119||



gṛhīta iva keśeṣu mṛtyunā dharmamācaret

mṛtyukāle samutpanne svajano'pi yathā janaḥ |

yastvaṃ paśyasi devānāṃ sukhametanmahodayam ||120||



tat prasahyamahādevo mṛtyurājo hariṣyati |

tvaritaṃ yāti janmedaṃ na ca vindati bāliśaḥ ||121||



paścāttu vyasane prāpte prativindanti duḥkhinaḥ |

yadi duḥkhādbhayaṃ tvaritaṃ yadi mṛtyubhayaśca yaḥ ||122||



dharme hi kriyatāṃ buddhirevaṃ sukhamavāpsyatha |

vināśāntaṃ sadā saukhyamanityaṃ sarvataścalam ||123||



devatvaṃ patanāntam

sarvadevakṛtaṃ saukhyaṃ na ca vindanti mohitāḥ |

abhūtvā ca cyavantyete bhūtvā'vaśyaṃ hi cañcalāḥ ||124||



devāḥ patanabhāvāya dharmateyaṃ vyavasthitā |

pramattāḥ kāmabhogeṣu ye devāścalamānasāḥ ||125||



na paśyanti surāstīvraṃ vyasanāntaṃ hi jīvitam |

yadaiva jāyate devastadaiva maraṇāya saḥ ||126||



śreyase matiḥ karttavyā

divasānte yathā rātriravaśyaṃ pratipadyate |

divasaṃ jīvitaṃ proktaṃ rātriḥ sthānmaraṇopamā ||127||



tasmāt tadubhayaṃ jñātvā śreyase kriyatāṃ manaḥ |

tadetadartha nṛṇāṃ hi strīrāgavaśavartinām ||128||



tadiṣṭaṃ mṛtyusainyena prasahayamavamarditam |

bhāvābhāvādibhirmūḍhān vañcayitvā striyo narān ||129||



prayānti mṛtyusamaye svakarmaphalabhoginaḥ |

padmopavanaśaileṣu nadīnāṃ nirjhareṣu ca ||130||



bahuśaḥ krīḍanaṃ kṛtvā kūpāyā'bhigatāḥ priyāḥ |

avaśyambhāvi maraṇamavaśyaṃ ca viyogitā ||131||



tathāpi nāma puruṣā nityaṃ rāgavaśānugāḥ |

sukhitaṃ duḥkhitaṃ vā(pi) jīrṇamanyatra yauvanam ||132||



mṛtyurājo'vamardati

duṣkulīnaṃ kulīnaṃ vā mṛtyurājo'vamardati |

surūpaṃ vā virūpaṃ vā balavantaṃ tathā'balam ||133||



sanāthaṃ naṣṭanāthaṃ vā mṛtyurājo'vamardati |

rājānaṃ vā tathā mṛtyuḥ gṛhiṇaṃ vā tathā yatim ||134||



krūraṃ vā mṛdukaṃ vāpi mṛtyurājo'vamardati |

nirdhanaṃ vā daridraṃ vā saguṇaṃ nirguṇaṃ tathā ||135||



striyaṃ vā puruṣaṃ vāpi mṛtyurājo'vamardati |

pravāsinaṃ gṛhasthaṃ vā jale vāpi sthalesthitam ||136||



sthitaṃ vā giriśṛṅgeṣu mṛtyurājo'vamardati |

jāgarantaṃ tathā suptaṃ bhuñjānaṃ vā tathā sthitam ||137||



pramāthī sarvalokasya mṛtyurājo'vamardati |

bhūmisthaṃ (vā) vimānasthaṃ videśasthaṃ tathā gṛhe ||138||



krakacaḥ kālacakro'yaṃ mṛtyurājo'vamardati |

bhāgyavantaṃ tathā dhanya nistriśaṃ (caiva) dharmikam ||139||



rogiṇaṃ svasthadehaṃ vā mṛtyurājo'vamardati |

caṇḍaṃ suśīlinaṃ cāpi kadarya dhaninaṃ tathā ||140||



pramattamapramattaṃ vā mṛtyurājo'vamardati |

nārakeyaṃ tathā pretaṃ tiryañco manujaṃ tathā ||141||



anivṛttabalotsāho mṛtyurājo'vamardati |

kāmadhātau ca ye devā rūpadhātau ca ye sthitāḥ ||142||



tān sarvān hi pratibalān mṛtyurājo'vamardati |

ārūpyeṣu ca ye devāḥ samāpattiniveśakāḥ |

tān sarvānapi vai devān mṛtyurājo'vamardati ||143||



sarva vināśāntam

yad jātaṃ saṃskṛtaṃ kiñcid tad vināśāntameva hi |

tannāsti saṃskṛtaṃ kiñcid yasya nāśo ca vidyate |

mṛtyorbalamidaṃ jñātvā kāmadoṣaṃ ca sarvataḥ ||144||



tṛṣṇayā vañcanaṃ cāpi viramadhvaṃ bhavārṇavāt |

tadaitad vyasanaṃ matvā mṛtyorapi calācalam ||145||



sudāntaṃ kriyatāṃ cittam

sudāntaṃ kriyatāṃ cittaṃ yenedaṃ bhrāmyate jagat |

vanopavanaśailebhyo vimānebhyaśca sarvataḥ ||146||



sarvadevāḥ paciṣyanti kālāgnivinipātitāḥ |

pramādamanaso mūḍhā bhūyo viṣayajihimatāḥ ||147||



tṛṣṇāpāśena sambaddhā devāḥ yāsyanti durgatim |

rabhasaṃ jīvitaṃ saukhyaṃ prayāti khalu dehinām ||148||



na ca vindanti vibudhā jātyandhā iva satpatham |

jalabudbudasaṃkāśaṃ jīvitaṃ sarvadehinām ||149||



nadītaraṅgacapalaṃ yauvanaṃ vyativartate |

anityā (hi)kaṭākṣekṣāpraduḥkhāstuṣitāḥ surāḥ ||150||



rāgasya heyatvam

nirvāyatyavaśo dīno dīpaḥ snehakṣayādiva |

karmakṣayaparikṣipto dvādaśāro mahābalaḥ ||151||



dharmacakro bhavatyeṣa nipātī syānna cañcalaḥ |

vicitraviṣayāramyā anekasukhamaṇḍitāḥ ||152||



kālagrāsāḥ sarve bhavanti

tuṣitāḥ patanti vivaśāḥ kālasya vaśamāgatāḥ |

kālasya vaśamāpannā yathā rohanti pādapāḥ ||153||



te punaḥ kālamāsādya bhavanti vigatatviṣaḥ |

yathā kālaṃ samāpadya bhavanti sukhitāḥ surāḥ ||154||



punastamaiva saṃsṛtya patanti vivaśā hi te |

karmakālaṃ samāsādya loko'yaṃ parivartate ||155||



sukhaṃ vrajati duḥkhaṃ hi kālasya vaśamāgataḥ |

yadvṛttaṃ prākśubhaṃ karma tacca duṣṭamahodayam ||156||



tadidaṃ bhuñjate svargaṃ kṣīyate ca tataḥ punaḥ |

sahetukasya sarvasya kṣaṇikasya viśeṣataḥ ||157||



anityatāparāmarśo nāsau bhavati sarvataḥ |

ye bhāvāḥ saṃskṛtā nityāḥ sarve te vipralobhinaḥ ||158||



vipralobhya janaṃ yāti dharmateyaṃ vyavasthitā |

śīghrasrotā yathā nadyastathā saukhyaṃ śarīriṇām ||159||



kṣaṇikaṃ jīvitaṃ sarva na ca vindanti bāliśāḥ |

jarā vyādhiśca mṛtyuśca vipattiḥ karmasaṃkṣaye ||160||



bhavantyetāni devānāṃ nityānāṃ kāmacāriṇām |

nāyurdhruvaṃ bhavatyeva na saukhyaṃ triṣu dhātuṣu ||161||



na (ca) vindanti vivaśā devāḥ kāmena mohitāḥ |

varṣadhārā yathā''kāśe duḥsthā bhavati sarvataḥ ||162||



tathā saukhyamidaṃ sarva varṣadhāropamaṃ sadā |

vāyunā pāṃsavo yānti anyonya parighaṭṭitāḥ ||163||



bhrāmyate gagane 'vaśyastathā śleṣaḥ śarīriṇām |

suciramapi saṃramyaṃ nityatā nāsti dehinām ||164||



acintyārthe saukhyamidaṃ na ca vindanti bāliśāḥ |

vāteritaṃ tu yat saukhyaṃ vināśāntaṃ bhaviṣyati ||165||



sukhasya duḥkhamiśritatvam

vināśaṃ naiva budhyanti kāminaścittavañcitāḥ |

duḥkhamiśraṃ sukhamidaṃ pracchannamiva vidyate ||166||



padmamālāparicchinno viṣapūrṇo yathā ghaṭaḥ |

odanaṃ viṣasammiśraṃ maraṇāntaṃ (hi) tat tathā ||167||



tathā saukhyamidaṃ sarva tasmāt tat parivarjayet |

ādau madhye tathā cānte narakāya bhaviṣyati ||168||



utpādasthitibhaṅgāni sarvāṇi vastūni

utpādasthitabhṅgāntaṃ sarva saṃskṛtamucyate |

sarva ca saṃskṛtaṃ saukhyaṃ nanu bhaṭṭārameva tat ||169||



bhaṭṭārañca vilāsaśca (su)vyayakṣaṇikaṃ tathā |

sukhaṃ ca jīvitaṃ sarva tasmāt tat parivarjayet ||170||



ādau madhye tathā cānte śreyasyeva manaḥ sadā |

sudāntaḥ śuddhacitasya mṛtyukāle na sīdati ||171||



maraṇasyāvaśyambhāvitvam

avaśyambhāvi maraṇaṃ priyasya ca viyogatā |

na ca cintayataḥ kāle viṣaye vipralobhinaḥ ||172||



jarāmaraṇacakraṃ tamaviṣahyaṃ sudāruṇam |

pādapān devagān sattvān na ca buddhayantyacakṣuṣaḥ ||173||



sarvasya jātasya cyavanaṃ bhavati

cyavamānasya devasya vikalendriyacetasaḥ |

yad duḥkhaṃ sukaraṃ tasya naupamyamiha vidyate ||174||



yathā yathā mahat saukhyaṃ tṛṣṇopahatacetasaḥ |

tathā tathā mahad duḥkhaṃ cyavamānasya duḥsaham ||175||



kṛtvā hi saṃskṛtaṃ karma na jñātvā karmaṇaḥ sthitiḥ |

mṛtyukāle samutpanne paścāttāpena dahayate ||176||



mṛtyoḥ pūrvameva svahitamādheyam

yāvannāpyeti maraṇaṃ yāvacca kṣaṇasampadaḥ |

tāvat svahitamādheyameṣa mārgaḥ sukhāvahaḥ ||177||



cyavanaṃ devalokeṣu maraṇaṃ narabhūmiṣu |

viditvā kaḥ pumān āsthāṃ kuryātsopadrave bhave ||178||



sarva vināśi

tailavartipraṇāśena dīpanāśo yathā dhruvam |

karmakriyā tathā kasya vinipātaḥ surālayāt |

bhittināśo yathā'vaśyaṃ cittanāśo dhruvaṃsthitaḥ ||179||



karmanāśāttathā saukhyamavaśyaṃ vinipadyate |

kṣīṇapuṇyāḥ nipatyante devāḥ sarve surālayāt ||180||



anityataiṣāṃ sarveṣāṃ sattvānāṃ vinipātikā |

mṛtyuḥ pivati bhūtāni jarā pivati yauvanam ||181||



vyādhiḥ pivati cārogyaṃ na ca loko'vabudhyate |

upapannāḥ subahuśaḥ pratītāścāpyanekaśaḥ ||182||



jāyate jīryate cāyaṃ cyavane copapadyate |

na kṣaṇo'sti muhūrto vā parivartastathāpi vā ||183||



yatra mṛtyurvilambena na ca loko'vabudhyate |

upapannāstu bahuśaḥ pratītāścāpyanekaśaḥ ||184||



yanna mṛtyuvilambaḥ syānna ca loko'vabudhyate |

anityaṃ jīvitaṃ sarva na vilambi ca yauvanam ||185||



sarvabhūtānyanityāni na ca loko'vabudhyate |

ante krameṇa naśyanti bhāvāḥ kṣaṇavilamvinaḥ ||186||



sambaddhāḥ karmasūtreṇa na ca loko'vabudhyate |

devakoṭisahastrāṇi vanopavanasevinām ||187||



nimīlitāni kālena na ca loko'vabudhyate |

paṅkābhāvacarā devāḥ pramattā bhogatṛṣṇayā ||188||



yāsyanti vilayaṃ sarve na ca loko'vabudhyate |

phenabudbudasaṅkāśaṃ svapnadravyopamaṃ sukham ||189||



kṣayaṃ prayāti śīghraṃ ca na ca loko'vabudhyate |

sarvasya sarvathā sarvo vināśo niyato bhave ||190 ||



na ca bālasya saṃsārānnirvedamupapadyate |

na sarvaḥ sarvathā sarva sarvopāyaiḥ prayatnaśaḥ |

saṃtrātā bhavane prāpte mṛtyukāle sudāruṇe ||191||



mṛtyurityabhidhīyate

vyucchettā sarvasaukhyānāṃ duḥkhanāmākaro mahān |

viśleṣaḥ sarvabandhānāṃ mṛtyurityabhidhīyate ||192||



bhayopanetā bhūtānāṃ duḥkhānāmudadhiḥ samaḥ |

vyāmohakarttā buddhīnāṃ mṛtyurityabhidhīyate ||193||



sañchettā jīvitānāmindriyāṇāṃ ca nāśakaḥ |

amṛśyaḥ sarvabhūtānāṃ mṛtyurityabhidhīyate ||194||



adhṛṣyaḥ sarvabhūtānāmajeyaḥ sarvakarmaṇām |

vināśaḥ sarvasattvānāṃ mṛtyurityabhidhīyate ||195||



avaśyambhāvi tattvānāmantakaṃ sarvadehinām |

nikāyabhāganāśo'yaṃ mṛtyurityabhidhīyate ||196||



sadeva yakṣagandharva-piśācoraga-rakṣasām |

kālacakravināśī (ca) mṛtyurityabhidhīyate ||197||



asaṃyamī pramāthī ca bahnivat sarvadehinām |

krūraścāvinivarttyaśca mṛtyurityabhidhīyate ||198||



skandhāyatananāśaśca ārupyasyātha cetasaḥ |

kāladharmo mahāveśo mṛtyurityabhidhīyate ||199||



śreyase matiḥ karaṇīyā na tu pramāde

sa eva dhā(ta)ve śīghraṃ vinipātāya dehinām |

śreyase kriyatāṃ yatno mā pramādeḥ manaḥ kṛthāḥ ||200||



gataṃ jīvanaṃ nāyāti

yathā (hi śīghra) gamanaṃ pakṣiṇāṃ pavanasya vā |

tathā śīghrataraṃ yāti jīvitaṃ sarvadehinām ||201||



gato nivartate vāyurnivartante ca pakṣiṇaḥ |

jīvitaṃ yanniruddhaṃ tu tasya nāgamanaṃ punaḥ ||202||



drutaṃ kṣīyanti karmāṇi drutamabhyeti cāntakaḥ |

avaśyambhāvi viśleṣaṃ na ca vindanti devatāḥ ||203||



anirvāyo mahāvegaścatuḥsatyanivarhaṇaḥ |

avaśyambhāvi balavāneṣa mṛtyurupaiti ca ||204||



śruti pramādino devāḥ sukhena parivañcitāḥ |

na vindanti mahad duḥkhaṃ yadavaśyaṃ bhaviṣyati ||205||



saṃskṛtasya hi sarvasya samayasya viśeṣataḥ |

vināśo bhavati (cā)sau dharmateyaṃ bhave bhave ||206||



jarāyauvananāśāya prāṇanāśāya cāntakaḥ |

vipattibhūtanāśāya sthitā (vai) nāśahetavaḥ ||207||



evaṃvidhe mahāghore vyasane (vai) mahad bhaye |

pramādino hi yad devāḥ nūnamete ca cetanāḥ ||208||



anāgatabhayaṃ yo hi paśyati jñānacakṣuṣā |

sa paṇḍita iti jñeyo viparītastu bāliśaḥ ||209||



karmakṣaye sukhasya nāśaḥ

vimūḍhamanasaḥ sarve vañcitāḥ svena cetasā |

karmakṣaye tu naśyanti dīpā snehavaśādiva ||210||



anekaviṣayāṇāṃ ca idaṃ saukhyamanuttamam |

bhuktvā karmakṣayo bhūta vinipāto bhaviṣyati ||211||



anityatvānavagamādadharmaratiḥ

jalataraṅgacapalaṃ jīvitaṃ yāti dehinām |

na ca budbudaniḥsāramavagacchanti bāliśāḥ ||212||



phenarāśiściraṃ tiṣṭhed upāyaiḥ katibhirnanu |

na tu devāściraṃ tiṣṭhantyanityo bhāvanamiti ||213||



lobhavaśādeva mṛtyorupekṣā

kṛṣyate bhūriyaṃ sarvā manujaiḥ phalakāṃkṣibhiḥ |

na ca saṃdṛśyate mṛtyurlābhasaktairapaṇḍitaiḥ ||214||



kṣaṇe kṣaṇe vivardhante lobhāśā mohite jane |

na ca vindanti saṃsārāḥ kṣīyamāṇāḥ kṣaṇe kṣaṇe ||215||



daṇḍatrayamupasaṃharati

jarādaṇḍo'yamabhyeti yauvanāntakaro nṛṇām |

ārogyaśaktināśāya vyādhidaṇḍo'yamāgataḥ |

daṇḍatrayamidaṃ ghoraṃ sasurā'suranāśakam ||216||



abhyeti na ca mūḍho'yaṃ lokaṃ paśyati bāliśaḥ |

parasparaṃ pralobhācca svajanaṃ snehacañcalam ||217||



mohabaddhāḥ mṛtyuṃ viyogaṃ ca nāvagacchanti

gacchatyanyonyasaṃśliṣṭo mohabaddhe jane janaḥ |

putrapautraprapautrāṇāṃ vaśagāścāpi ye narāḥ ||218||



karmaskandhasya duḥkhāvahatvam

sarve tena bhaviṣyanti tvaṃ tu saṅgena bādhyase |

jīvitāntakaraḥ śatrurna viśaṅko mahābalaḥ ||219||



so'vilambī mahāvego mṛtyureṣo'bhyupaiti ca |

calācalavidhirjñeyaḥ karmaskandhairnidarśitaḥ ||220||



devādīnāṃ kṣayo bhavati

devanāgāḥ (sa)gandharvā piśācoragarākṣasāḥ |

na śaktāścyavane kṣāntaṃ balaṃ tasya tathāgatam ||221||



tattvadarśako durgatiṃ nādhigacchati

calācalavidhirjñeyaḥ karmaṇā tattvadarśakaḥ |

aliptaḥ pāpakairdharmairna sa gacchati durgatim ||222||



iti anityatāvargaḥ pañcamaḥ