• Home
• Canon Text
• Romanized
• sūtrapiṭaka
• jātaka
• 34 śatapatra-jātakam

34 śatapatra-jātakam

Technical Details

34. śatapatra-jātakam



protsāhyamāno'pi sādhurnālaṃ pāpe pravartitumanabhyāsāt| tadyathānuśrūyate-

bodhisattvaḥ kilānyatamasmin vanapradeśe nānāvidharāgaruciracitrapatraḥ śatapatro babhūva| karuṇāparicayācca tadavastho'pi na prāṇihiṃsākaluṣāṃ śatapatravṛttimanuvavarta|



bālaiḥ pravālaiḥ sa mahīruhāṇāṃ puṣpādhivāsairmadhubhiśca hyadyaiḥ|

phalaiśca nānārasagandhavarṇaiḥ saṃtoṣavṛttiṃ vibharāṃcakāra||1||



dharmaṃ parebhyaḥ pravadan yathārhamārtān yathāśakti samuddharaṃśca|

nivārayaṃścāvinayādanāryānudbhāvayāmāsa parārthacaryām|| 2||



iti paripālyamānastena mahāsattvena tasmin vanapradeśe sattvakāyaḥ sācāryaka iva bandhumāniva savidya iva rājanvāniva sukhamabhyavardhata|



dayāmahattvātparipālyamāno vṛddhiṃ yathāsau guṇato jagāma|

sa sattvakāyo'pi tathaiva tena saṃrakṣyamāṇo guṇavṛddhimāpa||3 ||



atha kadācitsa mahāsattvaḥ sattvānukampayā vanāntarāṇi samanuvicaraṃstīvravedanābhibhavādviceṣṭamānaṃ digdhaviddhamivānyatamasmin vanapradeśe reṇusaṃparkavyākulamalinake sarasaṭaṃ sihaṃ dadarśa| samabhigamya cainaṃ karuṇayā paricodyamānaḥ papraccha-kimidaṃ mṛgarāja ? bāḍhaṃ khalvakalyaśarīraṃ tvāṃ paśyāmī|



dvipeṣu darpātirasānuvṛttyā javaprasaṅgādathavā mṛgeṣu|

kṛtaṃ tavāsvāsthyamidaṃ śrameṇa vyādheṣuṇā vā rujayā kayācit||4||



tad brūhi vācyaṃ mayi cedidaṃ te yadeva vā kṛtyamihocyatāṃ tat|

mamāsti yā mitragatā ca śaktistatsādhyasaukhyasya bhavān sukhī ca||5||



siṃha uvāca-sādho pakṣivara ! na me śramajātamidamasvāsthyaṃ rujayā vyādheṣuṇā vā| idaṃ tvasthiśakalaṃ galāntare vilagnaṃ śalyamiva māṃ bhṛśaṃ dunoti| na hyenacchaknomya bhyavahartumudgarituṃ vā| tadeṣa kālaḥ suhṛdām| yathedānīṃ jānāsi, tathā māṃ sukhinaṃ kuruṣveti|



atha bodhisattvaḥ paṭuvijñānatvādvicintya śalyoddharaṇopāyaṃ tadvacanaviṣkambhapramāṇaṃ kāṣṭhamādāya taṃ siṃhamuvāca-yā te śaktistayā samyak tāvatsvamukhaṃ nirvyādehīti| sa tathā cakāra| atha bodhisattvastadasya kāṣṭhaṃ dantapālyorantare samyagniveśya praviśya cāsya galamūlaṃ tattiryagavasthitimasthiśakalaṃ vadanāgreṇābhihṛtyaikasmin pradeśe samutpāditaśaithilyamitarasmin parigṛhya paryante vicakarṣa| nirgacchanneva tattasya vadanaviṣkambhaṇakāṣṭhaṃ nipātayāmāsa|



sudṛṣṭakarmā nipuṇo'pi śalyahṛnna tatprayatnādapi śalyamuddharet|

yadujjahārānabhiyogasiddhayā sa medhayā janmaśatānubaddhayā||6||



uddhṛtya śalyena sahaiva tasya duḥkhaṃ ca tatsaṃjanitāṃ śucaṃ ca|

prītaḥ sa śalyoddharaṇādyathāsīt prītaḥ saśalyoddharaṇāttathāsīt|| 7||



dharmatā hyeṣā sajjanasya|

prasādhya saukhyaṃ vyasanaṃ nivartya vā sahāpi duḥkhena parasya sajjanaḥ|

upaiti tāṃ prītiviśeṣasaṃpadaṃ na yāṃ svasaukhyeṣu sukhāgateṣvapi||8||



iti sa mahāsattvastasya tadduḥkhamupaśamayya prītahṛdayastamāmantrya siṃhaṃ pratinanditastena yatheṣṭaṃ jagāma|



atha sa kadācitpravitataruciracitrapatraḥ śatapatraḥ paribhraman kiṃcitkvacit tadvidhamāhārajātamanāsādya kṣudagniparigatatanustameva siṃhamacirahastasya hariṇataruṇasya māṃsamupabhuñjānaṃ tadrudhirānurañjitavadananakharakesarāgraṃ saṃdhyāprabhāsamālabdhaṃ śaranmeghavicchedamiva dadarśa|



kṛtopakāro'pi tu na prasehe vaktuṃ sa yācñāvirasākṣaraṃ tam|

viśāradasyāpi hi tasya lajjā tatkālamaunavratamādideśa||9||



kāryānurodhāttu tathāpi tasya cakṣuṣpathe hrīvidhuraṃ cacāra|

sa cānupaśyannapi taṃ durātmā nimantraṇāmapyakaronna tasya||10||



śilātale bījamiva prakīrṇaṃ hutaṃ ca śāntoṣmaṇi bhasmapuñje|

samaprakāraṃ phalayogakāle kṛtaṃ kṛtaghne vidule ca puṣpam||11||



atha bodhisattvo nūnamayaṃ māṃ na pratyabhijānīta iti nirviśaṅkataraḥ samabhigamyainamarthivṛttyā prayuktayuktāśīrvādaḥ saṃvibhāgamayācata-



pathyamastu mṛgendrāya vikramārjitavṛttaye|

arthisaṃmānamicchāmi tvadyaśaḥpuṇyasādhanam||12||



ityāśīrvādamadhuramapyucyamāno'tha siṃhaḥ krauryamātsaryaparicayādanucitāryavṛttiḥ kopāgnidīptayātipiṅgalayā didhakṣanniva vivartitayā dṛṣṭyā bodhisattvamīkṣamāṇa uvāca-mā tavadbhoḥ|



dayāklaibyaṃ na yo veda khādana visphurato mṛgān|

praviśya tasya me vaktraṃ yajjīvasi na tadbahu||13||



māṃ punaḥ paribhūyaivamāsādayasi yācñayā|

jīvitena nu khinno'si paraṃ lokaṃ didṛkṣase||14||



atha bodhisattvastena tasya rūkṣākṣarakrameṇa pratyākhyānavacasā samupajātavrīḍastatraiva nabhaḥ samutpapāta| pakṣiṇo vayamityarthataḥ pakṣavisphāraṇaśabdenainamuktvā pracakrāma|



athānyatamā vanadevatā tasya tamasatkāramasahamānā dhairyaprayāmajijñāsayā vā samutpatya taṃ mahāsattvamuvāca-pakṣivara, kasmādimamasatkāramasya durātmanaḥ kṛtopakāraḥ| san saṃvidyamānāyāṃ śaktāvapi marṣayasi ? ko'rthaḥ kṛtaghnenānenaivamupekṣitena ?



śaktastvamasya nayane vadanābhighātād

visphūrjitaḥ pramathituṃ balaśālino'pi|

daṃṣṭrāntarasthamapi cāmiṣamasya hartuṃ

tanmṛṣyate kimayamasya balāvalepaḥ||15||



atha bodhisattvastathāpyasatkāraviprakṛtaḥ protsāhyamāno'pi tayā vanadevatayā svāṃ prakṛtibhadratāṃ pradarśayannuvāca-alamalamanena krameṇa| naiṣa mārgo'smadvidhānām|



ārte pravṛttiḥ sādhūnāṃ kṛpayā na tu lipsayā|

tāmavaitu paro mā vā tatra kopasya ko vidhiḥ||16||



vañcanā sā ca tasyaiva yanna vetti kṛtaṃ paraḥ|

ko hi pratyupakārārthī tasya bhūyaḥ kariṣyati||17||



upakartā tu dharmeṇa paratastatphalena ca|

yogamāyāti niyamādihāpi yaśasaḥ śiryā||18||



kṛtaśceddharma ityeva kastatrānuśayaḥ punaḥ|

atha pratyupakārārthamṛṇadānaṃ na tatkṛtam||19||



upakṛtaṃ kila vetti na me parastadapakāramiti prakaroti yaḥ|

nanu viśodhya guṇaiḥ sa yaśastanuṃ dviradavṛttimabhipratipadyate||20||



na vetti cedupakṛtamāturaḥ paro na yokṣyate'pi sa guṇakāntayā śriyā|

sacetasaḥ punaratha ko bhavetkramaḥ samucchritaṃ pramathitumātmano yaśaḥ||21||



idaṃ tvatra me yuktarūpaṃ pratibhāti-

yasmin sādhūpacīrṇe'pi mitradharmo na lakṣyate|

aniṣṭhuramasaṃrabdhamapayāyācchanaistataḥ||22||



atha sā devatā tatsubhāṣitaprasāditamanāḥ sādhu sādhviti punaruktamabhipraśasya tattatpriyamuvāca-



ṛte jaṭāvalkaladhāraṇaśramādbhavānṛṣistvaṃ viditāyatiryatiḥ|

na veṣamātraṃ hi munitvasiddhaye guṇairupetastviha tattvato muniḥ||23||



ityabhilakṣya pratipūjyainaṃ tatraivāntardadhe|

tadevaṃ protsāhyamāno'pi sādhurnālaṃ pāpe pravartitumanabhyāsāditi sajjanapraśaṃsāyāṃ vācyam| evaṃ kṣāntikathāyāmapyupaneyam-evaṃ kṣamāparicayānna vairabahulo bhavati, nāvadyabahulo bahujanapriyo manoṅaśceti| evaṃ pratisaṃkhyānabahulāḥ svāṃ guṇaśobhāmanurakṣanti paṇḍitā iti pratisaṃkhyānavarṇe vācyam| tathāgatamāhātmye ca bhadraprakṛtyabhyāsavarṇe ca-evaṃ bhadraprakṛtirabhyastā tiryaggatānāmapi na nivartata iti|



||iti śatapatra-jātakaṃ catustriṃśattamam||



|| kṛtiriyamāryaśūrapādānām ||