• Home
• Canon Text
• 3 maṇicūḍāvadānam

3 maṇicūḍāvadānam

Technical Details

3 maṇicūḍāvadānam |



asminnadbhutasarge makarākarajāyamānamaṇīvarte |

ko'pi prakaṭitasugatiḥ puruṣamaṇirjāyate (bhavyaḥ) || 1 ||



asti saubhiprabhāpūrakarpūraparipāṇḍuram |

sāketaṃ nāma nagaraṃ saubhāgyatilakaṃ bhuvaḥ || 2 ||



sevyaiḥ prabhāsattvamayairgaṅgāvimalamānasaiḥ |

tīrthairiva sthitaṃ yatra pavitraḥ puṇyakartṛbhiḥ || 3 ||



yaśaḥkusumite yatra puṇyasaurabhanirbhare |

ramante sukṛtodyāne nandane puravāsinaḥ || 4 ||



tatrābhūd bhūpatirbhuriguṇaratnamahodadhiḥ |

bhīturyaśaḥśaśāṅasya mehacūḍa iti śrutaḥ || 5 ||



sadā sadāśrayārheṇa kalikālāpahāriṇā |

kṛtaḥ kṛtayugeneva yena dharmadharo janaḥ || 6 ||



mahīpatiḥ kṣamāśaktaḥ śrīvṛtaḥ karuṇārataḥ |

vallabho'bhūt prajānāṃ yaḥ prakhyāto vijitendriyaḥ || 7 ||



amarāsavasaṃpūrṇamahiṃsāsatradīkṣitaḥ |

dadau yaḥ sarvabhūtānāṃ puṇyāmabhayadakṣiṇam || 8 ||



nirmado yaḥ prabhāve'pi vibhave'pi priyaṃvadaḥ |

kṣamāśīlaḥ prabhutve'pi yauvane'pi jitendriyaḥ || 9 ||



gambhīreṇonnatimatā śūreṇa śaśikāntinā |

satpakṣeṇa kṣitibhṛtā yenātanyata vismayaḥ || 10 ||



rājñastasyādvitīyasya babhūvābharaṇadvayam |

tyāgapūrṇaṃ ca kāruṇyaṃ tārūṇyaṃ sukṛtaśriyaḥ || 11 ||



padmākarasya tasyābhūddevī kāntimatī priyā |

prabhātaśrīriva sadā nirdoṣābhyudayotsavā || 12 ||



nītiḥ prabhuguṇevena tyāgena śrīrivojjvalā |

rarāja rājacandreṇa sā śīleneva cārutā || 13 ||



sadānandanavikhyātayaśaḥprasarayā tayā |

merūstridivalakṣmyeva babhau bhūmibhṛtāṃ varaḥ || 14 ||



kāle kalyāṇanilayaṃ bhartuḥ sā garbhamādadhe |

bhūtyai bhuvanapadmasya divākaramivāditiḥ || 15 ||



araṇiḥ pāvakeneva velevābdheḥ sudhāṃśunā |

brahmābjeneva govindanābhirgarbheṇa sā babhau || 16 ||



tasyā garbhānubhāvena dohadābhimataṃ nṛpaḥ |

dadau sarvārthisārthebhyo vāñchitābhyadhikaṃ vasu || 17 ||



punarbhūmibhujā pṛṣṭā dohadaṃ śubhagarbhiṇī |

sarasvatīva sā cakre svayaṃ saddharmadeśanām || 18 ||



pūrṇapuṇyamaṇirdharmanidhirvidhisamuddhṛtaḥ |

vupadvipuladuḥkhebhyaḥ sadā rakṣati rakṣitaḥ || 19 ||



kāntāradurgeṣu paricyutānāṃ

tāpāturāṇāṃ paralokamārge |

snigdhaḥ pravṛddhaḥ phalapūritāśaḥ

chāyātarurdharmasamo'sti nānyaḥ || 20 ||



ālokastimire vipadviṣamaṇiḥ pāte karālambanaṃ

yācñākalpatarurjagajjayarathaḥ pātheyamanthe pathi |

duḥkhavyādhimahauṣadhaṃ bhavabhayodbhāntāśayāśvāsanaṃ

tāpe candanakānanaṃ sthirasuhṛddharmaḥ satāṃ bāndhavaḥ || 21 ||



ityādi dharmadhavalaṃ śrutvā nṛpavadhūvacaḥ |

dharmaikaśaraṇaḥ śrīmān babhūva bhuvane janaḥ || 22 ||



tataḥ kālena saṃpūrṇaṃ dyaurivāmṛtadīdhitim |

asūta dārakaṃ devī jagattimiradārakam || 23 ||



ajāyatāsya sahajaścūḍālaṃkaraṇaṃ maṇiḥ |

prāgjanmāntarasaṃsakto viveka iva nirmalaḥ || 24 ||



sa babhau subhagastasya mūrdhni puṇyamayo maṇiḥ |

yasya prabhāprabhāveṇa yāminyo dinatām yayuḥ || 25 ||



soṣṇīṣasya maṇestasya pīyūṣasyandibindivaḥ |

nayanti hematām lohaṃ duritaṃ śamayanti ca || 26 ||



śiśorjātismarasyātha vacasā tasya bhūpatiḥ |

dadau hema sadārthibhyaḥ sarvaṃ maṇirasodbhavam || 27 ||



puṣparatnadhvajacchatrapatākāvyajanāṃśukaiḥ |

apūrayan puraṃ vyonmastasya janmani devatāḥ || 28 ||



suprakāśoditāśeṣavidyāvidyotitātmanaḥ |

maṇicūḍa iti khyātaṃ nāma tasyākaronnṛpaḥ || 29 ||



sa cakārāśayaṃ harṣapīyūṣocchalitaṃ pituḥ |

abhijātaḥ suto jātaḥ pārijāta ivodadheḥ || 30 ||



paulomīva jayanteṇa jananī pūjyajanmanā |

babhau tena kumāreṇa kumāreṇeva pārvatī || 31 |



tataḥ kālena sukṛtasopānaiḥ pṛthivīpatau |

divyadhāmasamārūḍhe maṇicūḍo'bhavannṛpaḥ || 32 ||



arthicintāmaṇestasya dānena paripūrite |

loke puṇyasukhāloke nārto'bhūnna ca yācakaḥ || 33 ||



tasya bhadragirirnāma babhūvaṃ gajapuṃgavaḥ |

prabhorivānukāreṇa dānārdrakarapuṣkaraḥ || 34 ||



taṃ kadācinmahāsthānasthitaṃ bhuvananāyakam |

bhavabhūtiḥ samabhyāyādbhṛguvaṃśabhavo muniḥ || 35 ||



divyakānyāṃ samādāya lāvaṇyalalitānanām |

mūrtāmiva prabhālakṣmīmakṣīṇasya kṣapāpateḥ || 36 ||



kucayoravivekena rāgeṇa caraṇābjayoḥ |

netrayoścāpaleneva sā jagatyatilajjitā || 37 ||



tapaḥśriyeva sahitaṃ taṃ kanyānugataṃ munim |

aoūjayat prajānāthaḥ kṛtāsanaparigraham || 38 ||



kanyāpi nṛpamālokya dhīraṃ gambhīrasundaram |

parapīḍāsu kāruṇyānnyastacāpamiva smaram || 39 ||



cūḍāratnasya kīraṇairduritakṣayakāribhiḥ |

likhantaṃ kuṅkumeneva dikṣu rakṣākṣarāvalim || 40 ||



vikṣepakṣiptamarutā cāmareṇa virājitam |

socchāseneva sattvena jagatsaṃtāraṇaṃ vinā || 41 ||



ratnodāreṇa hāreṇa hṛdayagrahakāriṇā |

pātālavipadāṃ śāntyai śaiṣeṇeva niṣevitam || 42 ||



vahantaṃ mahatā doṣṇā kṣamāṃ cittena ca kṣamām |

prayayau sābhilāṣasya vismayasya vidheyatām || 43 ||



gṛhītvā munirutsaṅge kuraṅgataralekṣaṇām |

jīvanīṃ tāmanaṅgasya jagād jagatīpatim || 44 ||



uditena jagannetraśatapatravikāśinā |

bhavatā bhāti loko'yaṃ devena ca vivasvatā || 45 ||



aho nu tava nāstyeva vibhūtisulabhodbhavaḥ |

sādhoriva guṇadveṣaḥ saṃmohopacito madaḥ || 46 ||



lokanāthasya te lokakāruṇyapūrṇacetasaḥ |

rājan maitrījuṣā kīrtiḥ sthirā pāramitā param || 47 ||



akhedasaralo dātā nirvyājasukṛto bhavān |

ata eva viśeṣeṇa mānanīyo manīṣiṇām || 48 ||



padmodarasamudbhūtā kanyā kamalalocanā |

homāvaśeṣapayasā vardhiteyaṃ mayāśrame || 49 ||



gṛhyatāmagramahiṣī patnītve bhavatā nṛpa |

viṣṇoḥ śrīiva yogyeyaṃ tavaiva puruṣottama || 50 ||



yajñapuṇyaphalaṃ pūrṇaṃ kālena mama dāsyasi |

ityuktvā vidhinā rājñe kanyāṃ datvā yayau muniḥ || 51 ||



priyāṃ padmāvatīṃ rājā ratiṃ prāpyeva manmathaḥ |

araṃsta rucirodyāne sukṛte puṇyavāniva || 52 ||



tataḥ kālena sā putraṃ vaṃśavalliva mauktikam |

asūta padmacūḍākhyaṃ guṇānāṃ darpaṇaṃ pituḥ || 53 ||



śakrādibhirlokapālairanullaṅghyamahodayaḥ |

saṃstūyamānacaritaḥ svayaṃ kamalajanmanā || 54 ||



yaśaḥsaurabhasaṃbhārasaṃpūritadigantaraḥ |

sarvārthisārthakalyāṇakalanākalpapādapaḥ || 55 ||



smṛtvā munervacaḥ kāḻe kartuṃ vipuladakṣiṇām |

ahiṃsāvasusaṃpūrṇāmājahāra mahīpatiḥ || 56 ||



tasmin yajñe samājagmuḥ sarvakāmairanargale |

munayo bhārgavamukhā nṛpā duṣprasahādayaḥ || 57 ||



vartamāne makhe tasmin niḥsaṃkhyavasuvarṣiṇi |

rakṣorūpaḥ samuttasthau vahnimadhyāt sureśvaraḥ || 58 ||



upasṛtya sa bhūpālaṃ kṛśo vikṛtavigrahaḥ |

kṣuptipāsārdito'smīti yayāce pānabhojanam || 59 ||



śāsanādatha bhūbhartustasmai vividhabhojanam |

upaninyuḥ paricitāḥ pānaṃ ca paricārakāḥ || 60 ||



tataḥ kiṃcidvihasyaiva kṣitipaṃ prāha rākṣasaḥ |

nedamasmatpriyaṃ rājan vayaṃ hi piśitāśanāḥ || 61 ||



sadyohatasya māṃsena rudhireṇa ca bhūyasā |

tṛptirutpadyate'smākaṃ dīyatāṃ yadabhīpsitam || 62 ||



sarvakāmaprado'sīti tvamahaṃ samupāgataḥ |

dadāmīti pratiśrutya na niṣedhastavocitaḥ || 63 ||



iti rakṣavacaḥ śrutvā karuṇakulito nṛpaḥ |

ahiṃsāniyamenābhūdarthivaimukhyaduḥkhitaḥ || 64 ||



so'cintayattadā daivājjāto'yaṃ dharmasaṃśayaḥ |

na sahe duḥsahāṃ hiṃsāṃ naṃ naiṣphalyamarthinaḥ || 65 ||



na ca māṃsaṃ śarīrebhyo labhyate vaiśasaṃ vinā |

nāhaṃ pipīlakasyāpi kāyakleśalavaṃ sahe || 66 ||



datvāhaṃ sarvabhūtebhyaḥ puṇyāmabhayadakṣiṇam |

kathamasmai prayacchāmi māṃsaṃ prāṇivadhodbhavam || 67 ||



iti saṃcitya nṝpatistamūce karuṇākulaḥ |

svaśarīrasamutkṛttamasṛṅbhāṃsaṃ dadāmi te || 68 ||



ityukte bhūmipatinā babhūvākulitaṃ jagat |

na ca dehavyayotsāhaṃ sacivāstasaya sehire || 69 ||



praṇayādvāryamāṇo'pi bhūpālairmunibhistathā |

dadau svadehamutkṛtya tasmai māṃsamasṛgvasām || 70 ||



ākaṇṭhaṃ pītaraktena rākṣasena kṣitiprabhoḥ |

bhakṣyamāṇeṣu māṃseṣu kṣḥaṇaṃ khṣitirakampataḥ || 71 ||



tataḥ padmāvatī devī patiṃ dṛṣṭvā tathāgatam |

vilapantḻ nipatitā mohamūrcchākulābhavat || 72 ||



manujendrasya devendrastaddṛṣṭvā sattvamūrjitam |

rakṣorūpaṃ parityajya tamuvāca kṛtāñjaliḥ || 73 ||



aho nu karmaṇā rājan duṣkareṇa tavāmunā |

romāñcakañcukākīrṇaḥ kāyaḥ kasya na jāyate || 74 ||



aho puṇyamasāmānyamaho sattvamanuttaram |

aho dhariyamamaryādaṃ rājān virajasastava || 75 ||



duḥkhitāḥ paraduḥkheṣu nirlobhā durlabheṣu ca |

vipakṣeṣu kṣamāvantaḥ santaḥ sukṛtasetavaḥ || 76 ||



samunmiṣati ko'pyeṣa sattvotsāho mahātmanām |

trailokyaṃ karuṇārdrāṇāṃ yena yātyanukampyatām || 77 ||



uktveti divyauṣadhibhistaṃ kṛtvā svasthavigraham |

prasādya lajjāvanataḥ śakraḥ svanilayaṃ yayau ||78 ||



tataḥ samāpte vidhivadyajñe rājñāṃ mahīpatiḥ |

cakre munivarāṇāṃ ca pūjāṃ tridaśapūjitaḥ || 79 ||



sa ratnavarṣairyajñānte kanyāgrāmapurapradaḥ |

sahitaṃ tridaśārheṇa hariṇā hemamālinā || 80 ||



dadaru rājagajaṃ brahmarathākhyāya purodhase |

yojanānāṃ śataṃ tūrṇaṃ ekenāhnā prayāti yaḥ || 81 ||



tasmai samarpitaṃ dṛṣṭvā rājñā bnhadragiriṃ gajam |

abhūdduṣprasaho rājā tatspṛhākṛṣṭamānasaḥ || 82 ||



prayāteṣvatha bhūpeṣu vismiteṣu makhaśriyā |

samarpite yajñaphale bhārgavāya mahībhujā || 83 ||



tamuvāca samabhyetya svastivādapuraḥsaram |

marīciśiṣyo vāhīkaḥ prāptapūjāsano munoḥ || 84 ||



rājannadhyayanasyānte gururme gurudakṣiṇām |

īhate paricaryārthī sāmānyajanadurlabhām || 85 ||



ekastvameva vidhinā nirmito durlabhapradaḥ |

bahavo jātu jāyante na loke kalpapādapāḥ || 86 ||



devī padmāvatī putrasahitā gurave mama |

tapaḥkṛśāya vṛddhāya dīyatām paricārikā || 87 ||



ityukte muninā rājā dayitāviprayogajām |

rujaṃ saṃstabhya manasa tamūce dhairyabhūdharaḥ || 88 ||



prayacchāmi mune tubhyamīpsītām gurudakṣiṇām |

sahitāṃ yuvajārena jīvitābhyadhikāṃ priyām || 89 ||



ityuktvā sasutāṃ tasmai dadau padmāvatīṃ nṛpaḥ |

svajīvite vinisnehastyāgaḥ sattvamayātmanām || 90 ||



ādāya rājadayitāṃ virahakleśakātarām |

saputrāmāśramaṃ gatvā pradadau gurave muniḥ || 91 ||



atrāntare duṣprasahaḥ kururājaḥ kṣitīśvaram |

dṛpto yayāce dūtena bhūtyai bhadragiriṃ gajam || 92 ||



purohitārpitaṃ rājā na dadau d viradaṃ yadā |

tadā vipulasaunyena svayaṃ yoddhuṃ samāyayau || 93 ||



balinā kururājena ruddheṣu puravatmasu |

babhūva bhūmipālasya sainyaṃ raṇarasodbhaṭam || 94 ||



sa vīrakuñjarahariḥ śakto'pyarividāraṇe |

janakṣayabhayodvignaḥ kāruṇyāt samacintayat || 95 ||



aho'nukūlamitram me rājā duṣprasahaḥ param |

mātaṅgalobhamohena sahasā śatrutāṃ gataḥ || 96 ||



snehāntāḥ sujanaiḥ snehā niḥsnehāntāśca madhyamaiḥ |

durjanairghoravairāntā bhavanti prāṇahāriṇaḥ || 97 ||



aho bibhavalibhena kṣaṇakṣayiṇi jīvite |

samudyamo'yamasmākaṃ paraprāṇanipātane || 98 ||



hiṃsayāpapraśāntānām saktānāṃ kalikarmasu |

raṇaraktābhiṣiktānāṃ bhaktārtho'yaṃ samudyamaḥ || 99 ||



sevāvikrītajīvānāṃ caṇḍapiṇḍārthināmayam |

kalaho duḥsahaḥ kruryapiśunānāṃ śunāmiva || 100 ||



aho vibhavalubdhānām parasaṃtāpaśītalāḥ |

svasukhāyaiva dhāvanti nṛśaṃsacaritā dhiyaḥ || 101 ||



ye yudhi siddhisaṃnaddhā raktāntām bhuñjate śriyam |

kutaḥ kruratare teṣāṃ hṛdaye karuṇākaṇaḥ || 102 ||



eṣa duṣprahaso rājā lubdho vibahvamohitaḥ |

na vadhyaḥ sāparādho'pi kāruṇyāyatanaṃ mama || 103 ||



iti cintayatastasya kāuṇyāta kānanaiṣiṇaḥ |

pratyekabuddhāścatvāraḥ svayaṃ vyomnā samāyayuḥ || 104 ||



prātapūjāsanāḥ śrutvā sarvajñāstatsamīhitam |

rājñaḥ praśamaśīlasya prasannāstattvamūcire || 105 ||



saṃmohapaṭalāndheṣu saṃsāriṣu dayālutā |

śobhate tava bhūpāla sattvalokavivekinaḥ || 106 ||



kriyatāmīpsitaṃ rājan bodhau buddhirnidhīyatām |

saṃprati pratirodhe'smin vanameva vigāhyatām || 107 ||



svairanirjnarajnaṅkārakīrṇasaṃtoṣaśīkarāḥ |

viviktakānanoddeśāḥ śamināmeva vallabhāḥ || 108 ||



ityuktvānugrahadhiyā vidhāyāsya viyadgatim |

prabhāprasādhitadiśaste tena sahitā yayuḥ || 109 ||



yāteṣu svapadaṃ teṣu himavattaṭakānanam |

saṃprāpya pṛthivīpālaḥ prayatapraśamo'bhavat || 110 ||



vivekavimalāstasya dhiyaḥ sattvavatāmiva |

babhuḥ priyanivuḥ pūrṇanirvāṇyo (?)vanabhūmayaḥ || 111 ||



bhūdharāntarite tasmin sahasā bhūpabhāsvati |

śuśucurmohatimiraprāptaśokaprajāḥ prajāḥ || 112 ||



tatastatsacivā jagmurmarīcaṃ munimāśrame |

śaktaṃ rājyasya rakṣāyai rājaputraiṃ yayācire || 113 ||



muninā nirvikāreka dattamādāya mantriṇaḥ |

subhaṭāgresarah prāpa kururājaṃ raṇājire || 115 ||



sa tena hatavidhvastabhagnasyandnakuñjarah |

palāyanaparitrāṇaḥ prayayauḥ hastināpuram || 116 ||



balinā rājaputreṇa jite duṣprasahe yudhi |

mantribhistadbhujanyastā bhūmiḥ śeṣadhṛtiṃ yayau || 117 ||



rāġyo duṣprasahasyātha kālena kaluṣātmanah |

babhūvāvṛṣṭidurbhikṣamarakopalpavaḥ pure || 118 ||



sa vicintyānutāpārtastībrāṃ janapadāpadam |

na viveda paritrāṇaṃ viphalasvastikakriyaḥ || 119 ||



pṛṣṭhā vipatpratīkāraṃ tenāmātyāstamūcire |

duḥsaho'yaṃ mahārāja prajānāṃ vyasanodbhavaḥ || 120 ||



maṇicūḍasya bhūbharturyadi cūḍāmaṇiḥ prabho |

labhyate sa sudhāsyandī teneyaṃ tīryate vipat || 121 ||



cārebhyaḥ śrutamasmābhiḥ sa rājā himavattaṭe |

sthitaḥ saṃsāravaimukhyavivekavimalāśayaḥ || 122 ||



arthitaḥ sa dadātyeva viśvacintāmaṇirmaṇim |

putradāraśarīrādi nādeyaṃ tasya kiṃcana || 123 ||



iti mantrivacaḥ śrutvā tathetyādhārya cetasi |

sa dvijān maṇiyācñāyau visasarja tadantikam || 124 ||



asminnavasare rājā maṇicūṣaścaran vane |

marīcerāśramopāntamavāpa vipulaṃ muneḥ || 125 ||



devī padmāvatī tatra phalamūladhṛtavratā |

vrajantī vijane bhītā vipune muniśāsanāt || 126 ||



śabarairmṛgayāyātairdṛṣṭvā kaṣṭadaśāṃ śritā |

jughṛkṣubhiḥ kampamān ācukrośa karuṇasvaram || 127 ||



ākarṇya karuṇākrande kurarūīkūjitopamam |

hā rājan maṇicūḍeti trāyasveti suduḥsaham || 128 ||



sahasābhidrutaḥ kāntām dadarśa nṛpatirnijām |

rāhusaṃtrāsitasyendordyutiṃ nipatitāmiva || 129 ||



vītarāgāṅgavasanāṃ nirañjanaparigrahām |

vadantīmiva saṃbhogasaṃyogānāmanityatām || 130 ||



tāṃ rājahaṃsasugatām vihārastanamaṇḍalām |

aśrukāṣāyanayanāṃ vilokya karuṇāvanīm || 131 ||



saṃsāracaritāścaryavicāreṣvapi karkaśam |

kṛpākipāṇīnirlūnamivāsīrbhūpatermanaḥ || 132 ||



ekākīnaṃ vane devī vigatacchatracāmaram |

dṛṣṭvā nāthamanāthaiva lokanāthaṃ tathāgatam || 133 ||



tadviyogaviṣākrāntā taddarśanarasākulā |

śokaharṣasamākīrṇā babhūva bhṛśavihvalā || 134 ||



sā nītā śabarā rājñā śāpabhītāḥ pradurdruvuḥ |

na nāmābhyudaye bhānordṛṣṭaṃ sapratibhaṃ tamah || 135 ||



atrāntare śamadveṣī sar vabhūtāśayāśayaḥ |

māraḥ puruṣarūpeṇa sametya nṝpamabravīt || 136 |||



rājan rājīvanayanāṃ priyāṃ praṇayiṇīmimām |

na tyakrumarhasyajane vane vanajalocana || 137 ||



iyaṃ hi te manovṛttiriva niḥsukhatāṃ gatā |

varjitā rājyabhogena rājarāja na rājate || 138 || |



etadārkarṇya nṛpatistaṃ vijñāya manobhavam |

antarāyaṃ vivekasya pratyabhāṣata sasmitaḥ || 139 ||



jānāmi tvāmahaṃ kāmamakāmaṃ śamasaṃyame |

saṃtoṣavatām ko nāma bhavatā na vimohitaḥ || 140 ||



itivādini bhūpāle sahasāntarite smare |

babhūva viklavā devī taptā virahavahninā || 141 ||



duḥkhitāṃ tāmārtaduḥkhāṃ patibhogaviyoginīm |

uvācāśvāsayan rājā jāyāṃ jitamanobhavaḥ || 142 ||



devi dharmakriyāyuktā na śokaṃ kartumarhasi |

duḥkhāvasānī virasaḥ sarvo'yaṃ bhogacibhramaḥ || 143 ||



dehināṃ yaditāsaṅgāstaraṅgataralāyuṣām |

lolapadmapalāśāgraskhalajjalalavākulāḥ || 144 ||



imā muhūrtanartakyaḥ kālameghataḍillatāḥ |

saṃsārasarparasanā vilāsacapalāḥ śriyāḥ || 145 ||



bhogakṣaṇenaiva viyogarogo

vibhūtayaḥ svapnavivāhatulyāḥ |

vātāhatā dīpaśikhā sukhaśrī-

runmattanṝtyaṃ bhavavṛttametat || 146 ||



sarvopajīvyā karuṇā na lakṣmīḥ

dharmaḥ prakāśaḥ satataṃ na dīpāḥ |

yaśāṃsi ramyāṇi na yauvanāni

sthirāṇi puṇyāni na jīvitāni || 147 ||



satyavratastāmiti sāntvayitvā

visṛjya jāyāṃ nilaye maharṣeḥ |

cacāra saṃsāraparāṅbhukhānāṃ

saṃtoṣapuṇyeṣu tapovaneṣu || 148 ||



tadāgatāste tvarayā visṛṣṭāḥ

pañca dvijā duṣprasahena rājñā |

tamarthināmakamakālabandhuū

viśuddhasattvaṃ dadṛśurvanānte || 149 ||



te svastivādaṃ śanakaurvidhāya

viśastadhairyā iva sādhvasena |

tamūcire sūcitatīvratapāḥ

dīrghoṣṇaniśvāsasamīraṇena || 150 ||



rājan pure duṣprasahasya rājñaḥ |

krūropasargaurhataśāntavargaḥ |

janaḥ kṛtaḥ kṛttasamastakāmaḥ

prakāmamārtasvanamātraśeṣaḥ || 151 ||



aśoṣadoṣapraśamaikahetuḥ

trailokyarakṣāprathitaprabhāvaḥ |

cūḍāmaṇirdeva bhavadvitīrṇaḥ

karoti tasyopanipātaśāntim || 152 ||



dayāyuṣaścandanapallavārdrāḥ

svacchāśayāścandramaṇiprakāśāḥ |

saṃtāpakāle śaraṇaṃ janānāṃ

bhavadvidhā eva bhave bhavanti || 153 ||



ityarthitastairaviluptasattvaḥ

saṃpūryamāṇaḥ karuṇārasena |

uvāca saṃcintya janopatātaṃ

saṃkrāntamantaḥ śrutivartmaneva || 154 ||



aho sa rājā sahate kathaṃ nu

devopaghātena nipīḍitānām |

vidāritāntaḥkaraṇaṃ prajānāṃ

viyogaḥduḥkhodbhavamārtanādam || 155 ||



ayaṃ maṇirmastakamūlajanmā

niṣkṛttya tūrṇaṃ pratigṛhṛtāṃ me |

dhanyo'smi yadyarthijanasya duḥkha-

kṣaye kṣaṇaṃ kāraṇatāṃ vrajāmi || 156 ||



ityuktamātre vasudhādhipena

dharādharāmbhodhimahīdharitrī |

ciraṃ cakampe cakiteva tasya

śirastaṭotpāṭanatīvraduḥkhāt || 157 ||



tataḥ kṛpākomalacittavṛtteḥ

sutīkṣṇaśastrādapi tīkṣṇacittaḥ

svayaṃ śiraḥ pāṭayituṃ pravṛttaḥ || 158 ||



tadduṣkaraṃ karma nareśvarasya

vyomni vimānairnalināsanādyāḥ |

surāḥ savidyādharasiddhasākhyāḥ

samāyayudraṣṭumaluptasattvam || 159 ||



vipāṭyamāne śirasi prasahya

ratnaprabhāvibhramamādadhānaiḥ |

sa raktapūrairabhikṣiktakāyaḥ

sehe vyathāmarthisukhe pravṛttaḥ || 160 ||



vilpkya taṃ sattva nibaddhadhairyaṃ

tīvravyathāveganimīlitākṣam |

yayurvirāmaṃ na nṛśaṃsavṛtte-

rviprāḥ kṣaṇaṃ rākṣasatāmavāptāḥ || 161 ||



vicārya rājā śvaśarīraduḥkhaṃ

saṃsāriṇāṃ kleśamayaṃ śarīram |

evaṃvidhairduḥkhasahasralakṣaiḥ -

rākrāntamityārtataro babhūva || 162 ||



so'cintayaddehanibaddharatna-

dānena yatpuṇyphalaṃ mayāptam |

tenograduḥkhaṃ kalayāmi mā bhū-

dapuṇyapāke narake narāṇam || 163 ||



samuddhṛte rakravasavasikte

tasminmaṇau niścalatālumūlāt |

mūrcchākulo'pi prayayau saharṣaṃ

saṃpūraṇenārthimanorathasya || 164 ||



sa kampamānāṅgulipallavena

datvā svahastena maṇiṃ dvijebhyaḥ |

nimīlayan samtamasena lokaṃ

papāta tigmāṃśurivātiraktaḥ || 165 |



aluptasattve patite pṛthivyāṃ

tasmin surāṇāṃ saha puṣpavarṣaiḥ |

maṇiṃ samādāya yayurdvijāste

tūrṇaṃ puraṃ duṣprasahasya rāġyaḥ || 166 ||



sa ten asadyaḥ śamitopasargaḥ

svargocitāsāditabhogavargaḥ |

tadbodhisattvasya samastasattva-

saṃtāraṇārhaṃ praśaśaṃsa sattvam || 167 ||



atrāntare kiṃcidavāptasaṃjñaṃ

nareśvaraṃ viśrutaratnadānam |

samāyayurbhārgavagautamādyā

marīcimukhyā munayo vanebhyaḥ || 168 ||



marīcimevānugatā ca devī

padmāvatī vīkṣya parikṣataṃ tam |

saṃmohavegābhihatā papāta

kṣaṇaṃ kṣitau bālalateva lūnā || 169 ||



digantasaṃcāriṇī cāraṇānāṃ

nabhaścarāṇāṃ nṛpasādhuvāde |

sarājaputrāḥ saha mantrimukhyaiḥ

prajāḥ prajānāthamathopajagmuḥ || 170 ||



vīkṣyaḥ kṣitīśaṃ kṣatajokṣitāṅga-

makṣīṇasattvaṃ patitaṃ pṛthivyām |

pṛthavyathākleśajuṣaṃ janānā-

mabhūdabhūtārthavikalpajalpaḥ || 171 ||



kuṭhārikaiḥ kaiścidaho dayārdraḥ

sarvārthisevyaḥ saralaḥ suvṛttaḥ |

durātmabhiḥ svārthalavābhiyuktaiḥ

chāyātaruḥ kaṣṭamayaḥ nikṛttaḥ || 172 ||



aho parārthojjhitajīvito'yaṃ

parāṃ camatkāradaśāṃ prayātaḥ |

sasaurabhacchinnatanurgatātmā

bhavatyudāraḥ sahakāra eva || 173 ||



lubdhasya na svaḥ svajano'pi jantoḥ

na kāmakāmasya dhane'nurodhaḥ |

sarvātmanā sattvahitodyatasya

deho'pi na snehapadaṃ dayāloḥ || 174 ||



yeṣāṃ kṛte dainyamayaṃ prayāti

sarvātmanā cārthijano'rthibhāvam |

ta eva dīnoddharaṇavratānāṃ

prāṇāḥ paritrāṇapaṇe tṛṇāni || 175 ||



iti pravāde vividhānubhāve

vijṛmbhamāṇe munimaṇḍalasya |

bhūpālamabhyetya sabāṣpacakṣu-

rmunirmarīciḥ praṇayāduvāca || 176 ||



aho nu niṣkāraṇabandhubhāva -

mālambya rājan dayayā janasya |

prajāparitrāṇavidhānabhūmi-

stanustaveyaṃ tṛṇavadvitīrṇā || 177 ||



kṣayaḥ pravṛtto nirapekṣavṛtte-

stavārthibandhornijajīvite'pi |

yadeṣa kāmaṃ kamalānikāyaḥ

kāyastvayāpāyapade niyuktaḥ || 178 ||



apyasti rājan sukṛtavrate'smin

phalaspṛhā prāṇapaṇe'pi kācit |

asthārthihetostava pālubheda-

khedādvikāraṃ bhajate na cetaḥ || 179 ||



ityadbhutāviṣkṛtamānasena

munīndramadhye muninā sa pṛṣṭaḥ |

uvāca saṃstabhya rujaṃ prayatnā-

draktābhiṣiktaṃ vadanaṃ pramṛjya || 180 ||



phalaspṛhā nāsti mune mamānyā

kiṃ tveka eva pracuro'bhilāṣaḥ |

yaddhorasaṃsāranimagnajantu-

saṃtāraṇāyaiva bhave bhaveyam || 181 ||



arthipriye dehavidāraṇe'smin

naivāsti me ko'pi vikāraleśaḥ |

yadyeṣa satyaḥ samayo mayokta-

stadastu me svasthamidaṃ śarīram || 182 ||



ityuktamātre sahajānubhāve

sattvocite sa tyadhanena rājñā |

abhūdvapuḥ satyabalena tasya

rūḍhavraṇaṃ tatkṣaṇajātaratnam || 183 ||



tataḥ suraiḥ śakraviriñcimukhyai -

rnātapraharṣairmunibhiśca sarvaiḥ |

abhyarthito'pi kṣitipālanāya

bhogābhilāṣī na babhūva bhūpaḥ || 184 ||



avāptasaṃjñā muninā prayuktā

padmāvatī rājasutena sārdham |

patiṃ yayāve virahopaśāntyai

siṃhāsanākrāntisukhaṃ prajānām || 185 ||



tatastamabhyetya kṛpākulāste

pratyekabuddhā jagato hitāya |

dehaprabhāpūritadigvibhāgā

babhāṣire harṣamivodgirantaḥ || 186 ||



cirādavāpte virahāvasāne

punaḥ parityāgadaśāmasahyām |

na rājaputraḥ sahate na devī

duḥkhānubandho hyasamṛnnipātaḥ || 187 ||



svamarthine yaḥ radadāti deha -

māpannaduḥkhapraśamaikahetuḥ |

kathaṃ sa kuryāt svajane'pyupekṣāṃ

dharmo'pyayaṃ yasya parārtha eva || 188 ||



ityuktamākarṇya nareśvarastai-

statheti niścitya dhiyā kathaṃcit |

vyomnā vimānaiḥ svapurīmavāpya

bheje nijaṃ rājyapadaṃ saputraḥ || 181 ||



iti sa vipulasattvaḥ satyavān bodhisattvaḥ

suciravihitarājyaḥ saugataṃ dhāma bheje |

jinapuramaṇicaityacchatraratnapradīpa-

prakaṭitavividhaśrīrlakṣaṇābhyastabodhiḥ || 190 ||



ityāha bhagavān buddhaḥ svavṝttāntanidarśane |

dānopadeśe bhikṣūṇāṃ samyaksaṃbodhisiddhaye || 191 ||



iti kṣemendraviracitāyāṃ bodhisattvāvadānakalpalatāyāṃ

maṇicūḍāvadānaṃ nāma tṛtīyaḥ pallavaḥ ||