• Home
• Canon Text
• 48 hastakāvadānam

48 hastakāvadānam

Technical Details

48 hastakāvadānam |



mattebhakumbhoccakucābhirāmāḥ

karpūrahārāṃśuvilāsahāsāḥ |

prītipradāḥ puṇyavatāṃ bhavanti

prauḍhā yuvatyaśca vibhūtayaśca ||1||



tathāgate bhagavati śrāvastyāṃ vanacāriṇi |

abhavatsuprabuddhākhyaḥ śrīmān gṛhapatiḥ purā ||2||



babhūva hastako nāma tasyātidayitaḥ sutaḥ |

pūrvārjitānāṃ puṇyānāṃ sākāra iva saṃcayaḥ ||3||



tasya janmadine jātaścāmīkaramayo mahān |

ekībhūta ivāścaryavrajaḥ pravarakuñcaraḥ ||4||



sa gajendraḥ kumāraśca tatpituśca manorathaḥ |

lokakautukakośāśca pūrṇatāṃ tyulyamāyayuḥ ||5||



sa śaśīva śiśuḥ kāle kalānilayatāṃ gataḥ |

ruruce rucimān sarvalokalocanabāndhavaḥ ||6||



sa śanaiḥ pūritābhogabhujastambhavibhūṣaṇam |

lebhe manobhavārambhabhavanaṃ navayauvanam ||7||



kadācidatha bhūbhartuḥ sa prasenajitaḥ sutām |

tanucīvaracihnena sahajena virājitām ||8||



kanyāṃ cīvarakanyākhyāṃ lāvaṇyalalitānanām |

udyānadarśanāyātāṃ dadarśāyatalocanām ||9||



akliṣṭarūpāmālokya tāmaparyuṣitadyutim |

vismayasmarayostulyamāyayau sahasā vaśam ||10||



so'cintayadaho kāntamidamatyadbhutaṃ vapuḥ |

yasmin bhāti mukhavyājādadoṣaviśadaḥ śaśī ||11||



lāvaṇyamapratimameva bibhati tanvī

bandhūkabandhuradharo madhurasvabhāvaḥ |

drohodyataḥ sarasavidrumapallavānāṃ

bimbaprabhāprasabhabhramavandhyakāraḥ ||12||



vakrkraṃ na kṣamate madaṃ śaśamṛtaḥ kleśnāti kāntiḥ sudhā-

mutphullotpalakānanasya kurute dṛṣṭiḥ prabhābhrtsanam |

manye manmathasaṃgamocitatanoḥ sāptnyabhītipradā

līlāyāsyāḥ sahasā vilāsalaharīśoṣaṃ vidhatte rateḥ ||13||



udvṛtte kaṭhine parodharayuge naśyadviveke ciraṃ

yasyā doṣamaye'pyaho guṇavatā hāreṇa baddhā sthitiḥ |

yaccāsminnavalambate'mbujadhiyā rolambarekhā mukhe

lolākṣyāḥ kimapi praśāntanayane līnaṃ munīnāṃ manaḥ ||14||



iti cintayatastasya vapuḥ puṣpaśaropamam |

vilokya bhūpatisutā babhūvāścaryaniścalā ||15 ||



hṛte lajjāṃśuke tasyāḥ smareṇa smitakāriṇā |

pratyagrapulakākīrṇaṃ vapuḥ spaṣṭamadṛśyata ||16 ||



ruddhā navābhilāṣeṇa vailakṣyeṇa nivartitā |

manastatraiva nikṣipya sā śūnyeva śanairyayau ||17 ||



rājadhānīṃ samāsādya lajjāvismayamanmathaiḥ |

mīliteva nilīneva proṣiteva babhūva sā ||18 ||



kumāro'pi svabhavane samudbhūtamanobhāvḥ |

tāmevendumukhīmagre saṃkalpairalikhanmuhuḥ ||19 ||



sa tāṃ mānasasarvasvaṃ smaravidyāmiva smaran |

pradadhyau kurlabhām matvā tanayām cakravartinaḥ ||20 ||



janmāntare tanuryasya tapaḥparicitā ciram |

dhanyaḥ sa tāmavāpnoti latāṃ sukṛtaśākhinaḥ ||21||



ramyapradānapuṇyena taddarśanamavāpyate |

na jāne tāni puṇyāni yeṣāṃ tatsaṃgamaḥ phalam ||22||



tadvakrkraśītakiraṇasmaraṇotsavena

tasyāśca durlabhatayā virahoṣmaṇā me |

no vedmi kiṃ dhṛtiriyaṃ kimayaṃ vimohaḥ

kiṃ jīvitaṃ kimasubhiḥ sahaḥ viprayogaḥ || 23||



tadvakrkrabjajitaḥ prasahra bhajate kṣaiṇyaṃ kṣapāvallabhaḥ

tadbhūvibhramalajjitaṃ ca vinatiṃ dhate dhanurmānmatham |

tasyāh pallavapeśaladyutimuṣā śoṣādhareṇārditaṃ

nūnaṃ prāpya parājayaṃ vanamahīṃ bimba samālambate ||24||



iti pūrṇenduvadanāvadanadhyānaniścalah |

niśāṃ nināya saṃtyaktaḥ serṣyayeva sanidrayā ||25||



kanyādarśanavṛttāntaṃ tatastena niveditam |

śrutvā pitāsya saṃkrantacintāparicito'bhavat ||26||



sa tamūce vayaṃ putra rājño'sya puravāsinah |

sa kathaṃ te duhitaraṃ cakravartī pradāsyati ||27||



aśakyaṃ naiva kurvanti samīhante na durlabham |

asaṃbhāvyaṃ na bhāṣante mānakāmā manīṣiṇaḥ ||28 ||



cūtacampakavallīṣu svādhīnāsu nirādaraḥ |

cintayan pārijātasya latām śuṣyati ṣaṭpadaḥ ||29 ||



tava tasyāśca saṃbandhaḥ prājganmavihito yadi |

tadavaśyaṃ bhavatyeva niṣprayatnaphalodayah ||30 ||



āśāpāśairanākṛṣṭaṃ vicārairakadarthitam |

prayatnabhārairaśrāntaṃ vidhatte bhavitavyatā ||31||



ityākarṇya piturvākyaṃ tattatheti vicintayan |

na cetaḥ kanyakānītaṃ samānetuṃ śaśāka saḥ ||32||



sa gatvā dantayugalaṃ yayāce hemakuñcaram |

navasaṃdarśane rāġyaḥ prītiyogyamupāyanam ||33||



puṇyabandhena kariṇā dattaṃ dantayugaṃ tataḥ |

sa hemamayamādāya draṣṭuṃ bhūmipatiṃ yayau ||34||



sa ratnaruciraṃ prāpya bhavanaṃ pṛthivīpateḥ |

praviśyaḥ praṇataḥ prītyai hemadantadvayaṃ dadau ||35 ||



bhūbhujā viśrutaguṇaḥ prasādenābhinanditaḥ |

varaṃ gṛhāṇetyuktaśca sa na jagrāha kiṃcana ||36 ||



tasyādīnadyuteścakre mānamabhyadhikaṃ nṛpaḥ |

aucityacārucaritaḥ priyaḥ kasya na niḥspṛhaḥ ||37||



sa sadā darśane rāġyaḥ kāñcanāṅgāni dantinaḥ |

punarjātanavāṅgena dattāṇi prīyate dadau ||38 ||



tamuvāca mahīpālaḥ sevāpraṇayayantritaḥ |

dūtīṃ manaḥprasādaya vadanadyutimudvahan ||39 ||



prabhūtahemasaṃbhārāṃ gurvīṃ sovāmimāmaham |

na sahe prauravārgo hi bhavaṇīyo mahībhṛtām ||40 ||



saṃvibhajya janānītaiḥ kā prītirmama kāñcanaiḥ |

tavānarghaguṇā mūrtiriyameva mama priyā ||41||



lobhaḥ puruṣaratneṣu bhūṣaṇārheṣu śobhate |

rājñāṃ kośeṣu sīdanti hemaratnāśmasaṃcayāḥ ||42 ||



samīhitatamaṃ tubhyaṃ kiṃ prayacchāmi kathyatām |

niḥśeṣakośadānena na nāmānuśayo'stu me ||43||



rājñṃ dṛkpātapātreṇa prāpyante yadi na śriyaḥ |

tadanarthaṃ gatārthinyā ko'thaḥ pārthivasevayā ||44||



ityuktaḥ kṣitipālena kumāraḥ kalitāñjaliḥ |

tamabhāṣata bhūpāla dātumarhati ko'paraḥ ||45 ||



anarthitena ratnāni vibudhebhyaḥ prayacchatā |

tadunnidraṃ samudrasya mudritaṃ bhavatā yaśaḥ ||46 ||



mahatāpi prayatnena pūryate na mahāśayaḥ |

alpakānāṃ tadairśvaryaṃ dāridyaṃ tanmahīyasām || 47 ||



kiṃ tu tvadbhujaguptānāṃ dharmamārgeṇa jīvatāṃ |

janānāṃ nāsti dāridyaṃ draviṇaṃ yena mṛgyate ||48 ||



dhanārthino na tu vayaṃ na ca sevādhikāriṇaḥ |

dhanaṃ dhanaṃ dhanadhiyāṃ māna eva manasvinām ||49 ||



mīladguṇena parameśvarasevanena

nurmūlatām sumanasāṃ sahasā gatānām |

dainyātpunaḥ kṛpaṇapaṇyapathe cyutānāṃ

na sparśamātramapi sādhujanaḥ karoti ||50 ||



arthitvānmaraṇam varaṃ tanubhṛtām dainyāvasannātmanām

arthī sarvajanāvamānavasatiḥ satkārayogyaḥ śavaḥ |

kumbhastāvadadhah prayāti guṇavān kūpāvatāre paraṃ

yāvanmohatamaḥpraveśavivaśaḥ prāpto'rthitā lambate ||51||



sāmānyā dhanasaṃpadaḥ krayakṛṣiprāpyā sadā dhīmatāṃ

saṃtoṣo yadi nāsti tatkimaparā bhūmirnidhānāvṛtā |

santyevātiśayaprasādaniratāstā hemaratnakriyāḥ

kasyeṣṭaḥ priyasaṃgamāya vapuṣāṃ sevāmayo vikrayaḥ ||52||



ityapāradhiyastasya vacaḥ śrutvā mahīpatiḥ |

gṝhyatāmaparaṃ kiṃcidityabhāṣata sādaraḥ ||53 ||



aucityacaturālāpaḥ karkaśo'pi nṛpāṃ priyaḥ |

kṛpaṇaścāṭukāro'pi karṇaśūlāya kevalaḥ ||54 ||



aurdāryaparituṣṭena sa rājñabhyarthitaḥ param |

tamūce yadu tuṣṭo'si sutā mahyaṃ pradīyatām ||55||



ityukte tena nṛpatiḥ saṃdehāndolitāśayaḥ |

prātarvaktāhamityuktvā kṣaṇaṃ kṣmātalamaikṣata ||56||



sa kumāraṃ visṛjyātha pradhānāmātyamabravīt |

prasādarabhasenaiva kṛtaṃ vākcāpalaṃ mayā ||57 ||



cakravartikulotpannā kanyā puṇyapaṇocitā |

kathaṃ sāmānyapaurāya guṇamātreṇa dīyate ||58 ||



dadāmīti pratiśrutya paścādanuśayākulaḥ |

kathaṃ sarādhano bhūtvā bhaviṣyāmyarthiniṣphalaḥ || 59 ||



kathaṃ prāptasya tasyāhaṃ prātardraṣṭ mukhaṃ puraḥ |

priyo'pyapriyatāṃ yātaḥ sa me durlabhayecchayā ||60 ||



nūnaṃ guṇopapanno'pi prakṛtyaiva śarīriṇām |

vakti yāvanna dehīti tāvadgavati vallabhah ||61 ||



iti bhūmipateḥ śrutvāḥ vaco dolāvalambinaḥ |

tamuvāca mahāmātyaḥ saṃcintyāvasarocitam ||62 ||



anālocitaparyantāḥ pratyagrasarasādarāḥ |

svabhāvarabhasā eva bhavanti prabhubuddhayaḥ ||63 ||



aśakyārthanayā tena lubdheneva guṇodayaḥ |

rājasevāpravṛttena hemahastī vināśitaḥ ||64 ||



vācyo'sau bhavatā svairaṃ kanyārthī punarāgataḥ |

hemahastinamāruhya prāptaḥ prāpsyasi me sutām ||65 ||



tenotkṛttaḥ svahastena kutastasya sa kuñjaraḥ |

na cāsau tadvirahitaḥ punarāyāti lajjayā ||66 ||



ityamātyasya vacasā nṛpatiryuktimāśritaḥ |

prāptaṃ kumāramanyedyustadevābhimukho'vadat ||67 ||



kumāro'pi gṝhaṃ gatvā vivāhocitamaṅgalaiḥ |

haumadviradamāruhya svajanena sajāyayau ||68 ||



svarṇavāraṇasaṃrūḍhaṃ tamāyāntaṃ mahīpatiḥ |

vilokyāścaryavibhavaṃ mene puṇyavatāṃ varam || 69 ||



kautukādatha bhūpālastaṃ gajaṃ hemavigraham |

āruroha mahotsāhaḥ sumerumiva vajrabhṛt ||70 ||



ārūḍhe pṛthivīpāle na cacāla sa kuñjaraḥ |

prasarsarpa kumāreṇa punaścālaṃkṛtāsanaḥ ||71||



taṃ jñātvā nṛpatirdevaṃ tatprabhāveṇa vismitaḥ |

dhanyo'smīti vadan kanyāṃ dadau tasmai smaraśriyam ||72 ||



abhyarcya kanyāratnena nṛpatiḥ puruṣottamam |

harṣotsavasamuddhūtaḥ sudhāsindhurivābabhau ||73 ||



tataḥ kumāre dayitāmādāya svagṛhaṃ gate |

saphalo'bhūdanaṅgasya kārmukākarṣaṇaśramaḥ ||7a4 ||



nave vayasi bhogārhe navakāntāsamāgame |

tasyābhūdvibhavodāraḥ sadā navanavotsavaḥ ||75 ||



tataḥ kadācidbhūpālaḥ kṛtakṛtyaḥ prasenajit |

puṇyaprabhāvaṃ jāmātuḥ kalayan samacintayat ||76 ||



aho divyaḥ prabhāvo'sau kumārasya pradṛśyate |

na hi sāmānyapuṇyānāṃ pāko bhavati tadvidhaḥ ||77 ||



kulaṃ lakṣmīharmyaṃ hṛtaśaśimadā rūpalaharī

vayaḥ saṃbhogārhaṃ guṇaparicayo bhūṣaṇacayaḥ |

yaśaḥ puṇyodyānaprasṛtakusumollāsaruciraṃ

na vidmaḥ kasyāyaṃ kuśalapariṇāmasya vibhavaḥ ||78 ||



iti saṃcintya suciraṃ sa saṃjātakutūhalaḥ |

sarvajñadarśanāvaddhamāruroha manoratham || 79 ||



sa jātātaramāhūya sutāṃ ca sacivaiḥ saha |

bhagavantaṃ yayau draṣṭuṃ manasā prathamaṃ gataḥ ||80 ||



yāte dṛṣṭipathaṃ jetavane saṃtyajya vāhanam |

upasṛtyaḥ nṛpaḥ padbhyāṃ bhagavantaṃ vyalokayat ||81 ||



sa taṃ praṇamya tatpādapadmabhūtiśikhāmaṇiḥ |

sutāṃ jāmātaraṃ cāsmai namro nāmnā nyavedayat ||82 ||



upaviṣṭeṣu sarveṣu praṇāmānatamauliṣu |

papraccha rājā sarvajñaṃ bhagavantaṃ kṛtāñjaliḥ ||83 ||



ayaṃ guṇagaopetaḥ kumāraḥ śrīmatāṃ varaḥ |

haimeva dantināyāto bhagavan kena karmaṇā ||84 ||



iyaṃ cīvarakanyā ca matsutāsya navā vadhūḥ |

kena puṇyaprabhāveṇa jīvitādadhivallabhā ||85 ||



iti pṛṣṭaḥ kṣitīśena sarvavidbhagavān jinaḥ |

tamūce bhūpate puṃsāṃ puṇyodbhūtā vibhūtayaḥ ||86 ||



yadudāro yaducito yad bhrājiṃṣṇu yadadbhutam |

spṛhaṇīyaṃ ca yalloke tattatpuṇyasamudbahvam ||87 ||



vipaśvī bhagavān pūrvaṃ sugataḥ saha bhikṣubhiḥ |

cacāra lokakṛpayā rājño bandhumataḥ pure ||88 ||



tasminnavasare tatra kumāryā saha dārakaḥ |

vikrīḍāvartmani puraḥ kṛtvā dārumayaṃ gajam ||89 ||



tau vilokya samāyāntaṃ dhmātajambūnadadyutim |

phullapadmadalākārakaruṇāsnigdhalocanam ||90 ||



bhagavantaṃ samudbhūtatadbhaktisarasonmukhau |

krīḍāgajaṃ nivedyāsmai praṇatau tasthatuḥ puraḥ ||91 ||



bhagavānapi sarvajñastayorjñātvā manoratham |

dayayā caraṇasparśaṃ vidadhe dārudantinaḥ ||92 ||



samyak cittaprasādena dṛṣṭau bhagavatātha tau |

praṇīdhānaṃ vivāhāya cakraturdārakau mithaḥ ||93 ||



kulaprabhāvavibhavairbhūyājjanma mamocitam |

vāhanaṃ hemadantī ca kumārasyetyabhūnmatiḥ ||94||



dṛṣṭvā bhagavataḥ kanyā saṃsaktre cārucīvare |

janmacīvarayuktāṃ syāmahametacintayat ||95 ||



sa eṣa praṇidhānena jātasteneha hastakaḥ |

iyaṃ cīvarakanyā ca tanucīvaralakṣaṇa ||96 ||



iti kṣrutvā kṣitipatistadvṛttaṃ sugato'ditam |

mukuṭaspṛṣṭatatpādapadmaḥ svabhavanaṃ yayau ||97 ||



yāte savismayaṃ rājñi kumāraḥ saha jāyayā |

kathyamānaṃ bhagavatā dharmaṃ śuśrāva śuddhadhīḥ ||98 ||



tatastau jātavairāgyau kṣīṇasaṃsāravāsanau |

pravrajyayā jitakleśau śuddhāṃ bodhimavāpatuḥ || 99 ||



vitatasukṛtapuṇyābhyāsayogena puṃsāṃ

bhavati kuśalabhājāṃ dharmakāmārthasaṃpat |

abhimatamatha bhuktvā tatphalaṃ sadārāste

vighanagaganakāntiṃ śāntimante bhajante ||100 ||



iti kṣemandraviracitāyāṃ bodhisattvāvadānakalpalatāyāṃ

hastakāvadānamaṣṭacatvāriṃśaḥ pallavaḥ ||