• Home
• Canon Text
• 47 sarvārthasiddhāvadānam

47 sarvārthasiddhāvadānam

Technical Details

47 sarvārthasiddhāvadānam |



svārthapravṛttau vigataspṛhāṇāṃ

paropakāre satatodyatānām |

kleśeṣvabhītā vyasanairanītā

vighnairapīḍākarameti siddhiḥ ||1||



śrāvastyāṃ bhagavān pūrvaṃ jino jetavanasthitaḥ |

dharmākhyānaprasaṅgena bhikṣusaṃghamabhāṣata ||2||



āsīdakhilabhūpālamaulilālitaśāsanah |

siddhārtho nāma sukṛtī sārvabhaumo mahīpatiḥ ||3||



sāgarākhyasya nāgasya sūnurjaladhivāsinah |

sarvārthasiddhaḥ putratvaṃ prayayau tasya bhūpateḥ ||4||



sa bhādrakalpiko bodhisattvaḥ sattvojjvalaprabhaḥ |

jātamātraḥ kṣititalaṃ cakre pūrṇaṃ svaṛddhibhiḥ ||5||



tasya pravardhamānasya dharmasyeva samudyayau |

samastabhuvanavyāpi vibudhābhyarcitaṃ yaśaḥ ||6||



sa kadācidvarodyāne syandanena yuvā vrajan|

dadarśa vṛddhapuruṣaṃ devatānirmitaṃ puraḥ ||7||



taṃ vilokya jarājīrṇaṃ jātavairāgyavāsanah |

saṃsāramiva niḥsāraṃ sa śarīvamamanyata ||8||



udyānayātrāvirataḥ śanaiḥ pratinivṛtya saḥ |

dāridyravidrutacchāyānadrākṣīt kṛpaṇān pathi ||9 ||



dṛṣṭvā tānasukhakleṣṭān karuṇākṛṣṭamānasaḥ |

acintayadaho duḥkhaṃ sahante bhuvi durgatāḥ ||10 ||



adānaprabhavaṃ duḥkhaṃ vadantīti visaṃgatāḥ |

pṛthivyāṃ ratnapūrṇāyāṃ parapiṇḍopajīvinaḥ ||11||



idamevāvisaṃvādi cihnaṃ kaluṣakarmaṇām |

dīnāṃ yadete yācante puruṣaṃ puruṣāḥ param ||12||



aho duṣkṛtameteṣāmavadhūtāḥ pade pade |

yadete mārgaṇodvignā bhikṣitvāpi bubhukṣitāḥ ||13||



iti saṃcintya suciraṃ viścakleśakṣayodyataḥ |

yadaridraṃ jagatkartuṃ ratnārthī jaladhiṃ yayau ||14||



kathacidiva saṃsaktaḥ sa pitrā dṛḍhaniścayaḥ |

smāruhya pravahaṇaṃ ratnadvīpamavāptavān || 15||



tatra pravahaṇārūḍhān vaṇijaḥ sahayāyinaḥ |

so'bravītkriyatām kāmaṃ yuṣmābhirmaṇisaṃgrahaṃ ||16 ||



etaiḥ sāmānyaratnaistu mama nāsti prayojanam |

kośe mahānti bhāsvanti santi ratnottamāni naḥ ||17 ||



kiṃ tu cintāmaṇiprāptyai vipulo'yaṃ mamodyamaḥ |

tena vidrutadāridyrāṃ kartumicchāmi modenīm ||18 ||



śrutaṃ mayā nāgarājaḥ sāgarākhyo mahodadhau|

vasatyasti gṛhe tasya cintitārthaprado maṇiḥ ||19||



vilaṅghya viṣamaṃ mārgaṃ tamādātuṃ vrajāmyaham |

nāsti dhairyasahāyānām durgamaṃ vyavasāyinām ||20 ||



na ca madvirahe kiṃcid vyasanaṃ vo bhaviṣyati |

satyameva parārtho'yaṃ yadi me sukṛtodyamaḥ ||21||



ityuktvā tān samāmantrya pratasthe sthiraniścayaḥ |

mahatīṃ dhṛtimālambya sattvavān pārthivātmajaḥ ||22||



gulphamātreṇa saptāhaṃ gatvā gaṅgamavartmanā |

jānudaghnena saptāhaṃ saptāhaṃ pauruṣeṇa ca ||23||



catvāri saptarātrāṇi tataḥ puṣkariṇījalaiḥ |

gatvā dṛṣṭiviṣān ghorān dadarśa phaṇinaḥ puraḥ ||24||



maitrīyuktena manasā kṛtvā tānatha nirviṣān |

krūrakopairvṛtaṃ yakṣairyakṣadvīpamavāpa saḥ ||25 ||



tatra maitreṇa manasā vītakrodhān vidhāya tān ||26 ||



śuśrāva tairabhihitaṃ vipulotsāhavismitaiḥ ||26||



kumāra sphīṭasattvena tathā vīryeṇacāmunā |

nāgarājasya bhavanaṃ samāhitamavāpya tam ||27 ||



kālena samyaksaṃbuddhaḥ sarvaġyastvaṃ bhaviṣyasi |

śrāvakāśca bhaviṣyāmo vayaṃ tvadanuyāyinaḥ || 28 ||



prasannairiti tairuktamabhinandya nṛpātmajaḥ |

rakṣevarāvṛtaṃ prāpa rākṣasadvīpamutkaṭam || 29 ||



tathaiva vigatakrūravikāraistaiḥ sa pūjitaḥ |

bhūjotkṣepeṇa nikṣiptaḥ kṣaṇānnāgendrasadmāni || 30 ||



sa tatra dīptavibhave divyotsāsasukhocitaḥ |

aśṛṇoddīrghaduḥkhārtisūcakaṃ rodanadhvanim ||31||



sa tamākarṇya sodvegaḥ prakṛtyaiva dayārdradhīḥ |

kimetaditi papraccha dṛṣṭvāgre nāgakanyakām ||32||



sā taṃ babhāṣe saṃsaktaśokoṣmapiśunairmuhuḥ |

mlānayantīṃ svaniśvāsaurbimbādharadalatviṣam ||33||



guṇāvān nāgarājasya putraḥ kamalalocanaḥ |

jyoṣṭhaḥ sarvārthasiddhākhyaḥ priyaḥ pañcatvamāgataḥ ||34||



tataḥ pratigatānande vinivṛttasukhotsave |

dhanena rodanenāsminna bhavedbhavane sthitiḥ ||35||



iti tasyā vacaḥ śrutvā so'ntaḥ paricitāṃ vahan |

svadeśadarśanaprāpto nāgarājāntikaṃ yayau ||36 ||



nāgarājastamāyāntaṃ parijñāya priyāsakhaḥ |

ehyehi putreti vadan babhūvānandavihvalaḥ ||37 ||



martyajanmakathām tena svaṃ cāgamanakāraṇam |

śrutvā niveditaṃ nāgaḥ pariṣvajya jagāda tam ||38 ||



cintāmaṇirayaṃ putra mama maulivibhūṣaṇam |

gṛhyatām tava saṃkalpaṃ na vandhyaṃ kartumutsahe ||39 ||



deyaḥ kṛtajagatkṛtyo mamaivāyaṃ punastvayā |

ityuktvāsmai dadau divyacūḍaṃ ratna vimucya saḥ ||40 ||



hṛṣṭaḥ praṇamya nāgendraṃ yayau pravahaṇāntikam ||41||



samudradevatā tatra taṃ dṛṣṭvā śrutatatkathā |

uvāca kīdṛśaḥ sādho prāptaścintāmaṇīstvayā ||42||



* * * * |

* * * * ||43||



* * * * |

* * * * ||44||



samudre patitaṃ dṛṣṭvā ratnaṃ kṛcchratarārjitam |

sa jagāda dṛḍhodyogavaiphalyodveganiścalaḥ ||45||



aho guṇocitākārā praṇayānmṛduvādinī |

vidveṣakaluṣaṃ karma kṛtvā tvaṃ na vilajjase ||46||



parotkarṣeṣu saṃgharṣaśokakleśamupaiti yaḥ |

śītalā api tasyaitā jvālāvalayitā diśaḥ || 47 ||



paritsāhaḥ priyo yasya tasya sattvamahodadheḥ |

karpūradhavalaṃ dhatte trilokītilakaṃ yaśaḥ || 48 ||



devi prayaccha me ratnamasmādvirama pātakāt |

apavādalatāṃ karma na sādhoradhirohhati ||49 ||



lobhātpramādāddveṣādvā ratnaṃ cenna prayacchasi |

śoṣayāmyeṣa jaladhiṃ tadimaṃ te samāśrayam ||50 ||



ityuktvā pyasakṛttena sā ratne na dadau yadā|

sa tadā svaprabhāveṇa śoṣāyābdheḥ samudyayau ||51 ||



dhyātamātraṃ sahasrākṣavacasā viśvakarmaṇā |

nirmitaṃ sahasā tasya patramāvirabhutkare ||52||



sa tenāgastyaculukākāreṇāmbhaḥ payonidheḥ |

antarīkṣe samutkṣipya cikṣepa kṣamaṇodyataḥ ||53 ||



kṛte bhūbhāgaśeṣe'bdhau tenātyadbhutakāriṇā |

suranirbhartsitā bhītā devatāsmai maṇīṃ dadau || 54 ||



nirvyājaṃ sāhasaṃ dīptiṃ ratnānāmiva tattvataḥ |

prabhāvaṃ vetti mahatāṃ mantrāṇāṃ tapasāṃ ca kaḥ ||55 ||



sphārastāvadapāravārivirasavyāpārahelābalāt

kallolāvaliyantritāmbaratayā ratnākaraḥ śrūyate |

gambhīraḥ punaraprameyamahimā ko'pi prabhāvaḥ satāṃ

yasmin vismayadhāmni cintanavidhāvante plavante dhiyaḥ ||56 ||



tataścintāmaṇiṃ buddhvā nijasārthena saṃgataḥ |

rājasūnuḥ svanagaraṃ prāpa pūrṇamanorathaḥ || 57 ||



kṛtakṛtyaḥ prahṛṣṭenaḥ sa pitrā tatra pūjitaḥ |

dhvajāgre ratnamādhāya jagāda janasaṃsadi || 58 ||



parārtha eva yatno'yaṃ nātmārtho yadi me kkacit |

tena satyena loko'ya sarvaṃ yātvadaridratām ||59 ||



ityukte sattvanidhinā tena dīnadayālunā |

ratnavṛṣṭiraparyantā nipapāta mahītale ||60 ||



tena ratnasamūhena dikṣu sarvāsu bhāsvatā |

yayau janasya dāridyramayaṃ niḥśeṣatāṃ tamaḥ ||61 ||



āśāpāśavatāṃ balāptraviśatāṃ bāhyāṅgaṇaṃ śrīmatāṃ

dvāḥsthāghātavatām muhurvicalatāṃ dehakṣayaṃ kāṅkṣatāṃ

dīnānāṃ maṇirāśiraśmiśabalaḥ śrīsaṃgamaḥ ko'pyabhūt ||62 ||



tacchāsanāduraganāyakameva yāte

cintāmaṇau vigatadainyajane ca loke |

sarvatra dānarasikasya janasya cetaḥ

sarvārthisārthaviratākulitaṃ babhūva ||63 ||



sarvārthasiddhaḥ kṣitipālasūnuḥ

yo'bhūtsa evāhamihānyadehaḥ |

śrutvetivṛttaṃ kathitaṃ jinena

te bhikṣavastanmayatāmavāpuḥ || 64 ||



iti kṣemendraviracitāyāṃ bodhisattvāvadānakalpalatāyāṃ

sarvārthasiddhāvadānaṃ satpacatvāriṃśaḥ pallavaḥ ||