• Home
• Canon Text
• 40 udrāyaṇāvadānam

40 udrāyaṇāvadānam

Technical Details

40. udrāyaṇāvadānam |



tulyameva puruṣeṇa bhujyate

kāyabhājanagataṃ śubhāśubham |

dehināṃ vividhakarmajaṃ phalaṃ

na hyabhuktamupayāti saṃkṣayam ||1 ||



bhagavān sugataḥ pūrvaṃ pure rājagṛhābhidhe |

kalandakanivāsākhye vijahāra vanāntare || 2 ||



bimbisāraḥ kṣitipatistatrābhūdviśrutaḥ śriyā |

ākaraḥ saravratnānāṃ ratnākaram ivāparaḥ || 3 ||



babhūva samaye tasmin raurukākhye pure nṛpaḥ |

śrīmānudrāyaṇo nāma yaśaścandramahodadhiḥ || 4 ||



tasya candraprabhā nāma patnī candrānanābhavat |

śikhaṇḍī yuvarājaśca sūnurvikramakarkaśaḥ || 5 ||



hiruko bhirukaśceti tasyāmātyau babhūvatuḥ |

gaṇanīyau na vinaye yayuḥ śukrabṛhaspatī || 6 ||



jātā bhūmibhujaḥ prītirlekhakhatviṣastayoḥ |

raverdūrasthitasyāpi kamalākarayoriva || 7 ||



apūrvaratnanicayapreṣaṇairbahuśastayoḥ |

paripūrṇaṃ paraṃ prāpa sakhyaṃ prema vidhānataḥ || 8 ||



dūrasthāpi paraṃ prītiḥ satāṃ kīrtirivākṣayā |

saṃsaktāpi khalaprītistṛṇajvāleva na sthirā || 9 ||



kadāciddivyaratnāṅkaṃ kavacaṃ kāñcanojjvalam |

prāhiṇod bimbisārāya sāramudrāyaṇo nṛpaḥ || 10 ||



viṣahsastrāgnirakṣārhaṃ vicitraratnakaṃ ca tat |

suhṛtpreṣitamādāya provāca saciavān nṛpaḥ || 11 ||



idaṃ me prahitaṃ tena saujanyamiva bhūbhujā |

sarva rakṣākṣamaṃ varma gāḍhapremanivedakam || 12 ||



na paśyāmyasya sadṛśaṃ pratideyaṃ tathādhikam |

alpapratikriyā śalyamupakārāpakārayoḥ ||13 ||



ucitaṃ cintyatāṃ kiṃcit preṣaṇīyamato'dhikam |

sarvairbhadbhirityuktvā nṝpaścintākulo'bhavat || 14 ||



atha dhīmān mahāmātyaściraṃ dhyātvā tamabravīt |

varṣakārābhidho vipraḥ sarvavidyāsu pāragaḥ || 15 ||



ato bahuguṇaṃ rāgannekamevāstyupāyanam |

tasya saṃpreṣane yatnaḥ kriyatāṃ yadi śakyate || 16 ||



ya eṣa bhagavān buddhaḥ sthitastvadviṣayāntike |

devānāmādarasthānaṃ paṭastatpratimānvitaḥ || 17 ||



aśeṣalokakalyāṇakalikākalpapādapaḥ |

citre svapne'tha saṃkalpe pṛthupuṇyaiḥ sa dṛśyate || 18 ||



iti mantrivacaḥ śrutvā tathetyuktvā mahīpatiḥ |

gatvā bhagavate namrastamevārthaṃ nyavedayat || 19 ||



anujñātastatastena nṛpaścitrakarān varān |

ādideśāśu bhagavatpratimollekhakarmaṇi || 20 ||



jinasyālokayantaste mūrti rūpavśīkṛtāḥ |

yayuḥ pramāṇagrahaṇe pragalbhā apyaśaktatām || 21 ||



saṃkrāntāṃ nimalapaṭe chāyāṃ bhagavatastataḥ |

suvarṇabhāvanābhikhyāṃ te śanaiḥ samapūrayan || 22 ||



prāḥiṇodatha bhūpālastaṃ buddhapratimāpaṭam |

jagannayanapuṇyānāṃ mūrtānāmiva saṃcayam || 23 ||



bimbisārasya hastāṅkalekhāmudrāyaṇo nṛpaḥ |

paṭasya purataḥ prāptām hṛṣṭaḥ svayamavācayat || 24 ||



sugatacaraṇapadmanyāsapuṇyopakaṇṭhāt

tridaśapuraviśeṣānmāgadhodāraradeśāt |

kuśalakalitamūrtirbhūpatirbimbisāraḥ

kṣititalatilakaṃ tvāṃ dharmabandhurbravīti || 25 ||



etatte prahitaṃ hitaṃ bhavamahāmohāmaye bheṣajaṃ

rājadveṣaviṣāpahaṃ bhagavato bimbaṃ śaśāṅkatviṣaḥ |

tṛṣṇāpacchamanaṃ prasannamadhuraṃ tvannetrapātrārpitaṃ

dhanyaḥ puṇyarasāyanaṃ piba haṭhādākaṇṭhamutkaṇṭhitaḥ || 26 ||



sanmārge viniyojanaṃ sguṇagaṇādhāne sadādhyāpanaṃ

durvyāpāranivāraṇam thirasukhaprāptau paripreraṇam |

nirvyājopakṛtau nirantaratayā sarvātmanā vartanaṃ

kartavyaṃ kimataḥ paraṃ priyahitaṃ kalyāṇamitraiḥ satām || 27



iti lekhārthamāsvādya suhtpremāmṛtocitam |

rājā gajādhirūḍhasya paṭasya prayayau puraḥ || 28 ||



abhinandya tamānandāt sāmātyaḥ sapurohitaḥ |

hemasiṃhāsanotsaṅge sa prasārya nyaveśayat || 29 ||



lāvaṇyapuṇyanilayaṃ dṛṣṭvā tatsaugataṃ vapuḥ |

namo namah prabuddhāyetyavadajagatījanaḥ || 30 ||



buddhābhidhānaṃ śrutvaiva pulakālaṃkṛtākṛtiḥ |

puṣpavarṣe surairmukte vismito'bhūnmahīpati || 31 ||



puṇyaṃ bhagavataḥ śrutvā sa tatra caritāmṛtam |

payodānādasotkaṇṭhanīlakaṇṭhatulāṃ yayau || 32 ||



dvādaśāṅgaṃ paṭasyādha sānulomaviparyayam |

pratītyasamutpādaṃ ca dṛṣṭvā mohaṃ mumoca saḥ || 33 ||



srotaḥprāptiphalenaivaṃ dṛṣṭasatyo'tha bhūpatiḥ |

dideśa pratisaṃdeśaṃ sakhyurbhikṣurvisarjanaiḥ || 34 ||



bimbisārastatastasmai kṛtvā bhagavato'rthanām |

kātyāyanaṃ ca vyasṛjat śailākhyām cāpi bhikṣuṇīm || 35 ||



udrāyaṇasya nṝpaterāryaḥ kātyāyano'tha saḥ |

pūjāvidhāyinastatra vidadhe dharmadeśanām || 36 ||



dharmadeśanayā tasya saṃgataḥ sumahān janaḥ |

srotaḥsakṛdanāgāmiphalārhatpadamāptavān || 37 ||



tasmin gṛhapatī khyātau tiṣyapuṣyābhidhau pure |

śāntyai pravrajya tasyāgre parinirvṛtimāpatuḥ || 38 ||



kālena vihitai stūpau dehānte jñātibhistayoḥ |

tannāmacihnāvadyāpi vandante caityavandakāḥ || 39 ||



devyāścandraprabhāyāśca śaolākhyā sāpi bhikṣuṇī |

krameṇāntaḥpure cakre satataṃ dharmadeśanām || 40 ||



kadācidatha bhūpālah krīḍagāragatāṃ priyām |

tāmajñāsīnnimittajñaḥ saptāhāvadhijīvitām || 41 |



jñātasaṃsāracaritastatastāṃ vaśudhādhipaḥ |

anujajñe śubhapadaṃ prātuṃ pravrajyayā puraḥ | 42 ||



svākhyāte dharmavinmaye bhikṣukyā nṛpatergirā |

devī pravrajitā dehaṃ dine tatyāja saptame || 43 ||



cāturmahārājikeṣu deveṣu sahasaiva sā |

prayātā devakanyātvaṃ jagāma jinakānanam || 44 ||



tatra pūrṇenduvadanā divyābharaṇabhūṣitā |

dṛṣṭvā śākyamuniṃ hṛṣṭā sā papātāsya pādayoḥ || 45 ||



prakīrṇadivyapuṣpāyāstasyāścakre tathāgataḥ |

dharmopapādanaṃ yena dṛṣṭasatyā jagāma sā || 46 ||



sā gatvā nagaraṃ patyurvyomnā mūrtirivaindavī |

vibodhya niśi suptasya cakre bodhiprakāśanam || 47 ||



yātāyāṃ svapadaṃ tasyāṃ prabhāte vasudhādhipaḥ |

pravrajyābhimukhaḥ putramabhiṣicya śikhaṇḍinam || 48 ||



prajātrāṇāya nikṣipya taṃ mahāmātyayostataḥ |

nṛpaterbimbisārasya suhṛdaḥ sa yayau puram || 49 ||



bimbisārastamāyātaṃ vigatacchatracāmaram |

nṛpopacāraiḥ praṇataḥ prītipūtairapūjayat || 50 ||



viśrāntamāsanāsīnaṃ sa tamūce savismayaḥ |

hṛṣṭhaḥ saṃdarśanenāsya śrīviyogena duḥkhitaḥ || 51 ||



rājannanantasāmantamauliviśrāntaśāsanaḥ|

pākaśāsanatulyastvaṃ kathamevamupāgataḥ || 52 ||



abhinnavakrkraprakṛterguptamantrasya dhīmataḥ |

pareṇa rājyaharaṇaṃ vīra saṃbhāvyate na te || 53 ||



iti pṛṣṭaḥ sa suhṛdā sasmitastamabhāṣata |

rājan vṛddhivibhūtirme na priyā sarvagāminī || 54 ||



viṣayāsvādavaimukhyād vitṛṣṇena mayā svayam |

utsṛṣṭamiva saṃtyaktamaiśvaryaṃ bhogabhājanam ||55 ||



tvayā kalyāṇamitreṇa sugatapratimāpaṭaḥ |

yo'sau hitāya prahitaḥ s avairāgyagururmamaḥ || 56 ||



adhunā tvatprasādena gatvā bhagavato'ntike |

icchāmyavāptuṃ pravrajyāmagārādanagārikaḥ || 57 ||



iti sakhyurvacaḥ śrutvā tattatheti vicintya ca |

sādarastadvivekena bimbisārastamabravīt || 58 ||



dhanyo bahumataścāsi satāṃ tvaṃ pṛthivīpate |

kathaṃ saṃsāravimukhī jātā te matirīdṛśī || 59 ||



saṃtoṣavibhavo bhogasubhagaḥ śobhase param |

lakṣaṇaṃ śuddhasattvānāṃ vairājyābharaṇaṃ manah || 60 ||



kiṃ sāmrājyamahaujasā sarajasā duḥsādhanaiḥ sādhanaiḥ

kiṃ bhogaiḥ kṣaṇabhojanaiḥ kulaṣadaiḥ kiṃ sattvaduḥkhaiḥ sukhaiḥ |

saṃsāroparamāya cetasi satāṃ janmāntaropārjitaṃ

vairāgyaṃ kurute padaṃ yadi mahāmohaprarohāpaham || 61 ||



yena prāṇamanaḥpriyā vasumatī saṃtyajyate līlayā |

trailokyābhimate'pi yaḥ smarasukhe vaimukhyadīkṣāguruḥ |

saṃmohavysanāturaṃ jagadidaṃ yenānukampāspadaṃ

puṇyaiḥ ko'pi sa jāyate matimatāṃ saṃsāravāmaḥ śamah || 62 ||



ityuktvā bimbisārastaṃ nītvā veṇuvanāśramam |

sapraṇāmaṃ bhagavate tadvṛttāntaṃ nyavedayat || 63 ||



udrāyaṇo'pi sugatākāraṃ suciracintitam |

vilokya harṣādātmānaṃ kṛtakṛtyamamanyata || 64 ||



parṇāmavyagraśirasā saṃsāracchedini tanau |

papāta bhagavaddṛṣṭistasya pravrajyayā saha || 65 ||



bhikṣubhāvamathāsādya pātrapāṇiḥ sa cīvarī |

nagare piṇḍapātārthī cakāra janavismayam || 66 ||



prajāḥ śikhaṇḍī dharmeṇa pālayitvā prasannadhīḥ |

yātaḥ kālena kāluṣyamadharmābhirato'bahvat || 67 ||



kaluṣaṃ kāñcanarucivyaktavidyudvilāsinī |

na kasya kurute lakṣmīrmeghamāleva mānasam || 68 ||



anāyattaṃ mahāmātyau hiruko bhirukaśca tam |

adharmakarmanirataṃ kruddhau tatyajatuḥ prabhum || 69 ||



tatpade vihitau rājñā sacivau daṇḍamugdarau |

cittānuvṛttikuśalau svairaṃ saktaṃ tamūcatuḥ || 70 ||



prajārañjanasaṃsaktā rājadaurjanyavādinaḥ |

svayaśaḥkhyāpanāyaiva jāyante dhūrtamantriṇaḥ || 71 ||



na dharmaṃ na sukhaṃ nārthaṃ na kīrti na ca jīvitam |

gaṇayanti prabhorarthe te bhṛtyā bhavyabhaktayaḥ || 72 ||



nākhaṇḍitā nākṣayitā nātaptā nāpyapīḍitāḥ |

kurvantyarthakriyā rājñastilatulyāḥ kila prajāḥ || 73 ||



iti bruvāṇau tau rājñā niyuktau rājyacintane |

lobhāt pravṛttau durnītau hantuṃ niḥśaraṇāḥ prajāḥ || 74 ||



nirvicāre durācāre kumatau pṛthivīpatau |

luptasatye mahāmātye prajānāṃ jīvitaṃ kutaḥ || 75 ||



udrāyaṇo'thācireṇa kadācid vaṇijaṃpathi |

nijadeśāgataṃ vārtāṃ papraccha nṛparāṣṭrayoḥ || 76 ||



so'vadaddeva kuśalī sutastava mahīpatiḥ |

kiṃ tu sanmantrirahitaḥ kumantrivaśamāgataḥ || 77 ||



tatra prajānāṃ vitatopatāpaḥ

ko'pi pravṛttaḥ prabhuśāsanena |

yenādya tatkutsitadeśajanma

divāniśaṃ śocati pauralokaḥ || 78 ||



yatra dhvāntaṃ sṛjati taraṇiryatra candro'gnivarṣī

yatrodeti prakaṭamamṛtādutkaṭaḥ kālakūṭaḥ |

yatra trātā harati nṛpatirjīvavṛttiṃ prajānāṃ

tatrākrandaṃ prasṝtavipulopaplavaṃ kaḥ śṛṇoti || 79 ||



ityāsaktanṛpāyāsakhinnasyārtimayaṃ vacaḥ |

duḥsahaṃ vaṇijaḥ śrutvā sa tamūce kṛpānidhiḥ || 80 ||



dadgirā tvamito gatvā tūrṇamāśvāsaya prajāḥ |

sthāpayiṣyāmyahaṃ dharme svayametya śikhaṇḍinam ||81||



ityuktastena sānandaḥ svadeśaṃ śanakairvaṇik |

gatvā prajānāṃ vidadhe svairamāśvāsanaṃ puraḥ || 82 ||



pravāde prasṛte tasminnamātyau daṇḍamudgarau |

atītabhūpāgamanatrastau bhūpatimūcatuḥ || 83 ||



sarvatra śrūyate deva pravādaḥ sādhuninditaḥ |

vṛddhaḥ pravrajito rājā rājyārthī yatnavāniti || 84 ||



tīvravrataparikliṣṭaḥ saṃbhogābhimukhādaraḥ |

lajjāṃ pravrajyayā sārdhaṃ tyaktvā sa punareṣyati || 85 ||



rājannapakkavairāgyāstyajanti sahasaiva yat |

tat pūrvābhyadhikaṃ teṣāṃ prayāti priyatāṃ punaḥ || 86 ||



lokasthitiviruddheṣu viṣayeṣu viśeṣataḥ |

spṛhā saṃjāyate jantorapathyeṣviva rogiṇaḥ || 87 ||



sukhotsekātparityaktaṃ prahastamupāgatam |

prāyaḥ sarvaṃ bhavatyeva jaḍasyāmramiva priyam || 88 ||



tasmādbhavantamutsārya pratāpanidhimāsanāt |

kṣīṇaḥ śaśīva sthaviraḥ sa rājyaṃ bhoktumicchati || 89 ||



cīvarodvignagātrasya varavastrābhilāṣiṇaḥ |

jātāsya muṇḍite mūrdhni ratnāṅkamukuṭaspṛhā || 90 ||



ratnaharmyeṣu navatāsaṃbhogavibhavodbhavam |

tyaktvā vilāsamāyāsaṃ vanavāsaṃ saheta kaḥ || 91 ||



mṛduśayanasukhārhā ye kathaṃ śerate te

hariṇakharakhurodyatkatkaṇṭakāsu sthalīṣu |

madhu vidhukaraśītaṃ yairnipītaṃ kathaṃ te

vanajagajamadoṣṇaṃ tiktamambhaḥ pibanti || 92 ||



adhunaiva tavāsannapraveśaviṣamasthiteḥ |

ādyaṃmataṃ nyāyavidāṃ rājaputra nipātanam || 93 ||



tasmādanāgato rājā pūrvaṃ vadhyastava prabho |

dīpaṃ hanti pataṅgo hi na dagdhaścetsamāpatan || 94 ||



tayoriti girā kṣipramabhūd bhūpatirākūlaḥ |

khalameghaiḥ kaluṣatāṃ nītaṃ kasya na mānasam || 95 ||



sa tau babhāṣe sāśaṅkaḥ krakacakrūratāṃ gataḥ |

bādhaḥ sādhāraṇaścāyaṃ yuvayormama cāgrataḥ || 96 ||



bhavadbhyāmeva vinayopāyaviśrāntayā dhiyā |

vicārya kāryatātparyaṃ yad yuktaṃ tadvidhīyatām || 97 ||



iti rājñā kṛtotsāhau tau visṛjyāśu ghātakān |

udrāyaṇasyāgrapathaṃ vadhāyaiva babandhatuḥ || 98 ||



so'piprajñāparitrāṇe niyoktuṃ putramudyataḥ |

bhagavantaṃ samabhyetya vrajāmīti vyajijñapat || 99 ||



sarvajñenābhyanujñātaḥ svakṛtaṃ bhujyatāmiti |

karmapāśasamākṛṣṭaḥ sa yayau rorukaṃ puram || 100 ||



tasmādvrajantaṃ nirvyājamācāramiva durjanāḥ |

duṣṭāmātyaprayuktāste jagnurvartmani ghātakāḥ || 101 ||



tasya cāīvarapātrādīn gṛhītvā nihatasya te |

vyadevayan kṛtaṃ prītyau rājākāryamamātyayoḥ || 102 ||



tataḥ pāpaprahṛṣṭābhyāṃ nṛpastābhyāṃ pradarśitam |

dṛṣṭvā mumoha sahasā raktāktaṃ cīvaraṃ pituḥ || 103 ||



sa labdhasaṃjñaḥ śanakaiḥ śuśoca na tathā gurum |

yathā patitamātmānaṃ ghore narakagahvare || 104 ||



so'vadadvatsa saṃprāptaṃ phalaṃ khalajanānmayā |

aiśvaryamadhulubdhena pāpapātamapaśyatā || 105 ||



aho bata nirālambe ghore narakasaṃkaṭe |

unnatārohiṇāṃ sadyaḥ pātakaṃ khalasaṃgatam || 106 ||



kṛtametanmahatpāpaṃ duṣṭāmātyadhiyā mayā |

patitasya mamedānīṃ pāvako'pi na pāvakah || 107 ||



tulyaṃ pituścārhatasya vadhe kā mama niṣkṛtiḥ |

pītaṃ yatra mayaikasmin pātre sadahanaṃviṣam || 108 ||



vṛddhe pitari niḥsaṅke śamaṃ pravrajyayāśrite |

svacitta niśitaṃ śastraṃ lobhādvyāpāritaṃ mayā || 109 ||



yatsaṃcintitameva kampajanakaṃ śrotuṃ nayat śakyate

dṛṣṭaṃ yacca karoti śokakalanāṃ niścetanānāmapi |

yatra krairyamapi prayāti mṛdutāṃ tīvrānutāpāgninā

tatrāpi prasaranti nirghṛṇadhiyām nistriṃśatīkṣṇāḥ kriyāḥ || 110 ||



ityuktvā duḥkahsaṃtaptaḥ pralāpamukharānanaḥ |

nyavārayattayoḥ kopātpraveśaṃ duṣṭamantriṇoḥ || 111 ||



guṇāntaraṃ parijñāya bhirukaṃ hirukaṃ ca saḥ |

ānināya prasādyāśu purāṇau sacivau pituḥ || 112||



tataścintākṛśe rājñi śokāt pāṇḍuratām gate |

svairaṃ tajjananīmetya duṣṭāmātyāvavocatām || 113||



devi tvatanayaḥ śrīmān svabhāvasaralāśayaḥ |

rājyarakṣāṃ na jānāti svajanocchedakarkaśām || 114||



pitā pravrajito'pyasya rājyaṃ hartumupāgataḥ |

āvābhyāṃ praśamaṃ nītastatra kā nāma vācyatā || 115 ||



nīcatantropapannaścet kramo'yamaśubhakramaḥ |

rājyābhilāṣiṇo bhikṣostasyāpi sa kathaṃ kramaḥ || 116 ||



āvāṃ pitṛvadhakridhād vāritau bhūbhujā padāt |

svayamadyāpi śokena kiṃ mithyā pariśuṣyate || 117 ||



sukṛtaṃ kṛtamāvābhyām prabhorduḥkhakṛśāṅgatā |

bhavanti sarvabhāveṣu bhṛjyā evāparādhinaḥ || 118 ||



gataṃ śocati kiṃ rājā yatkṛtaṃ kṛtameva tat |

upekṣyate tvayā devi kasmāccintākṛśaḥ sutaḥ || 119 ||



tābhyāmityuditaṃ śrutvā sā rājajananī śanaiḥ |

ūce taralikā nāma tadvākyavihitādarā ||120 ||



ānantaryamidaṃ karma dvayornarakapātakam |

yuṣmanmatādupanataṃ rājñaḥ pūrvakṛtena vā ||121||



ahaṃ tu vārayāmyasya śokaṃ pitṛvadhodbhavam |

arhadvadhodbhavaṃ duḥkhaṃ bhavadbhyāmapi vāryatāṃ || 122||



iti tau svairamādiśya sā gatvā pārthivāntikam |

tamuvāca śucākrāntaṃ parikṣīṇamivoḍupam ||123||



dharmādharmamayaṃ putra rājyaṃ rājñāṃ bahucchalam |

pāpānāṃ śaṅkayā tasmin kiṃ śucā pariśuṣyasi ||124||



piturvadhāt pratapto'si yadi nāma gurupriyaḥ |

tatrocyate samutsṛjya lajjāṃ tvadduḥkhasaṃkaṭe ||125||



svairaṃ jātastvamanyena na sa taddharmataḥ pitā |

svecchāhārasukhāḥ putra striyo hi nirapatrpāḥ || 126 ||



ityapriyamapi śrutvā rājā tadvacanaṃ rahaḥ |

pitṛvaiśasapāpograduḥkhasaṃtāpamatyajat | 127 ||



prakurvantyastādrerudayagiriṇā kleśakalanāṃ

kṣaṇāt kṣoṇīkṣmābhṛdvighaṭanavonodaṃ vidadhati |

sṛjantyetā vahniṃ sapadi salilāttacca dahanā-

daśādhyaṃ nārīṇāṃ na hi bhavati kiṃcitrtribhuvane || 128 ||



atha so'rhadvadhenaiva śalyatulyena pīḍitaḥ |

nṛpaḥ papraccha dharmajñānniṣkṛtiṃ tasya karmaṇaḥ || 129 ||



tatastau duṣṭasacivau tiṣyapuṣyākhyacaityayoḥ |

mārjārapotau dhṛtvāntaḥsaktāvāmiṣaśikṣayā || 130 ||



niṣiddhāvapi dhāṣṭaryena praviśya nṛpateḥ sabhām |

tamūcatustīvratāpasaṃtāpapraśamārthinam || 131||



deva mithyaiva bhavatā cittamāyāsyate bhṛśam |

sarvakalyāṇā loke'smin nārhantaḥ santi te matāḥ || 132||



yadi satyaṃ bhaveyuste nabhaso rājahaṃsavat |

ṛddhimantaḥ kathaṃ teṣāmanyena vadhasaṃbhavaḥ || 133||



na santi tasmādarhantaḥ kutastadvadhapātakam |

sīmāvivādaḥ kastatr yatra grāmo na vidyate || 134||



tiṣyapuṣyau gṛhapatī yāvarhatpadamāpatuḥ |

mārjārāvantare jātau tāvevādy asvacaityayoḥ || 135 ||



prakaṭau tau ca dṛśyete pratyakṣaṃ kasya saṃśayaḥ |

pratyayo yadi nāstyeva svayaṃ kiṃ na nirīkṣyate || 136||



ityuktvā bhūpateḥ kṛtvā khalau dolākulaṃ manaḥ |

jagmatuḥ sahitau tena caityasaṃdarśanāya tau || 137 ||



apūrvakautukāveśāt tatra saṃghaṭite jane |

vilokanodyate rāġyo sāmātye duṣṭamantriṇau || 138 ||



āmiṣābhyāsasaṃbaddhatiṣyapuṣyābhidhānayoḥ |

dhūrtau cakraturāhvānaṃ śanairbālabiḍālayoḥ || 139 ||



tau tiṣyapuṣyāvarhantau mārjārau stho yuvāṃ yadi |

pradakṣīṇaṃ vā kriyatāṃ tena satyena caityayoḥ || 140 ||



māṃsadānakṣaṇe tābhyāmiti vācamudīritau |

tūrṇaṃ nirgatya mārjārau cakratustau pradakṣiṇam ||141||



taddṛṣṭvā sahasāvāptapratyaye sānuge nṛpe |

yāte durjanamāyaiva jagajjayamahīṃ yayau || 142||



muṣṭau vāyuṃ dṛṣadi kamalaṃ citramākāśadeśe

jihvāgre ca pracuraracanāsṛṣṭisaṃhāralīlāḥ |

kiṃ vā nānyat paśuśiśudhiyāṃ mohanāyendrajālaṃ

mūrtaṃ dhurtāḥ kṣaṇaparicitapratyayaṃ darśayanti || 143 ||



niṣpratyayaparo rājā tataḥ saugatadarśane |

āryakātyāyanasyāgre śraddhāpūjāmavārayat || 144 ||



rājadhānyāṃ niṣiddho'tha bahireva sasānugaḥ |

vineyakṛpayā tatra tasthau śailā ca bhikṣuṇī || 145||



tataḥ kadācidāyāntaṃ dṛṣṭvā kātyāyanaḥ puraḥ |

nṛpatiṃ janasaṃpātādavamānabhayād yayau || 146 ||



preṣitaṃ pūrvamantribhyāṃ vrajantamavalokya tam |

duṣṭāmātyau narapatiṃ dīghavairāvavocatām || 147 ||



rājannamaṅgalanidhirmuṇḍo'yaṃ viśiraḥ pathi |

dṛṣṭo'dya bhikṣurasmābhirna vidmaḥ kiṃ bhaviṣyati || 148 ||



na paśyāmi mukhaṃ rājñaḥ pāpasyeti bhaṇatyasau |

tathā hi kṣaṇamekānte gatvā dūramitaḥ sthitaḥ || 149 ||



śrutvaitaddurjanāmarṣāduvācānucarān nṛpaḥ |

eṣa dūrasthitaḥ pāṃśumuṣṭibhiḥ pūryatāmiti || 150 ||



pūryamāṇaḥ sa taiḥ pāṃśumuṣṭibhirduṣṭaceṭakaiḥ |

divyāṃ kuṭīṃ praveśena parihārāya nirmame || 151 ||



amarṣakopitāḥ sarpāḥ vyāghrā vā pītalohitāḥ |

śānterāyānti mṛdutāṃ nat u bhūpaticeṭakāḥ || 152 ||



tataḥ prayāte nṛpatau pāṃśurāśiśatāvṛtam |

duḥkhādūcaturabhyetya hiruko bhirukaśca tam || 153 ||



ārya kṛcchramavāpto'si rājñā krūreṇa duṣkṛtaiḥ |

locanāni dhigasmākaṃ yairidaṃ dṛśyate pureḥ || 154 ||



mohāndhaḥ pātakaśvabhre durjanaiḥ pātito nṛpaḥ |

karmaṇo vayamapyasya darśanāt pāpabhāginaḥ || 155 ||



bhūriyam bhūripāpārtā tyājyā prājyamatestava |

duḥsahaḥ khalasaṃvāsaḥ tyāgaḥ kasya na saṃmataḥ || 156 ||



prayāti na śamaḥ śamaṃ kṣayamupaiti naiva kṣamā

bhavanti na ca buddhayaḥ paruṣaroṣadoṣaspṛśaḥ |

vasanti na vimānanā manasi śalyatulyāḥ satāṃ

na duṣṭajanavarjanādaparamāsti loke sukham || 157 ||



aiśvaryaṃ guṇināmadhonipatanāyāsaprayāsapradaṃ

gāmbhīryaṃ timirākāraṃ praviśatāṃ prāṇāpahaṃ prāṇinām |

naṣṭā sāpi nikṛṣṭduṣṭkuṭilavyālairupādeyatā

kūpasyeva khalasya nāsti tadaho doṣāliyuktaṃ yataḥ || 158 ||



tayoriti vacaḥ śrutvā mahākātyāyano'vadat |

na nikāre'pi me kopaḥ karmaṇo gatirīdṛśī || 159 ||



etāvadeva me duḥkhaṃ yanmūḍhasya mahīpateḥ |

khalasaṃgamadoṣeṇa bhayaṃ mahadupasthitam || 160 ||



prathame hi mahāvāyuḥ pureasya nipatiṣyati |

dvitīye puṣpavṛṣṭiśca vastravṛṣṭistataḥ pare || 161 ||



rūpyavṛṣṭiścaturthe ca hemavṛṣṭiśca pañcame |

ratnavṛṣṭistataḥ ṣaṣṭhe pāṃśuvṛṣṭiśca saptame || 162 ||



tayā sabandhurāṣṭro'say na bhaviṣyati bhūpatiḥ |

tasmād bhavadbhyāṃ gantavyaṃ ratnānyādāya bhūyase | 163 ||



iti tadvacanaṃ śrutvā viniścitya tatheti tau |

hirukaḥ śyāmakaṃ putraṃ tasyopasthāpakaṃ vyadhāt || 164 ||



bhirukaśca sutāṃ śyāmāvatīmādāya pāṇinā |

abhyetya bhikṣukīṃ śailāṃ praṇayādidamabravīt || 165 ||



ārye bhavatyā me kanyā ghoṣilasya gṛhaprabhoḥ |

gṛhe samarpaṇīyeyamāsannapratipannayā || 166 ||



evamuktvārpayitvā tāvamātyau jagmaturgṛham |

śailāpi kanyāmādāya prayayau ghoṣilālayam || 167 ||



tataḥ krameṇa tadabhūdyathoktaṃ bhikṣuṇā pure |

jñānadīpavatī prajñā yathātattvaṃ hi paśyati || 168 ||



ṣaṣṭhe'hni ratnavarṣe'tha patite ratnapūritām |

yayaturnāvamādāya tāvamātyāvalakṣitau || 169 ||



tau dakṣiṇāṃ diśaṃ gatvā cakraturnagaradvayam |

hiruko hirukākhyānaṃ bhirukākhyaṃ tathāparaḥ || 170 ||



pare'hni pāṃśuvarṣeṇamahatā patatā nṛpaḥ |

sabandhurāṣṭraḥ pralayṃ prayayau narakātithiḥ ||171 ||



sadaṇḍimudgare rāġyi yāte kilbiṣaśeṣatām |

taṃ mantriputramādāya vyomnā kātyāyano yayau || 172 ||



tamevānugatā prītyā nabhasā puradevatā |

tadāġyayā khavacanīkarvaṭe vidadhe sthitim || 173 ||



bhikṣupuṇyānubhāvena bhāgyairmantrisutasya ca |

adhiṣṭhānena devyāśca śrīmattadabahvat puram || 174 ||



tatrātha devatā cakre caityaṃ kātyāyanasya sā |

suravatyāṃ yadadyāpi vandante caityavandakāḥ || 175 ||



mantrisūnumathādāya lagnaṃ cīvarakarṇike |

lambanaṃ sa yayau vyomnā deśaṃ kātyāyanaḥ param || 176 ||



lambate lambate ko'yamityukte vismayājjanaiḥ |

babhūvuste janāstatra lambakā iti viśrutāḥ || 177 ||



atrāntare divaṃ yāte tatrāputre mahīpatau |

sa kṛtaḥ śyāmako rājā lakṣaṇajñistadājñayā || 178 ||



gatvā bhokkānakaṃ nāma diśā kātyāyanastataḥ |

jananyāstatra saṃśuddhāṃ vidasdhe dharmadeśanām || 179 ||



sā dṛṣṭasatyā putrasya yaṣṭīmādāya sādaram |

vandyamādyapi mahatī yaṣṭicaityamakārayat || 180 ||



śrāvastīmatha sotkaṇṭhaḥ prāpya kātyāyanaḥ śanaiḥ |

jinaṃ vilokya sānandaścakre tatpādavandanam || 181 ||



udrāyaṇasutakathām tatra tena niveditām |

ākarṇya bhikṣubhiḥ pṛṣṭaḥ sarvaġyastānabhāṣata || 182 ||



lubdhakah kālapāśākhyaḥ nidadhe vāgurām puraḥ || 183 ||



yantraṃ pāśāvṛtaṃ datvā yāte tasmin yadṛśchayā |

pratyekabuddhastaṃ deśaṃ prāpya viśrāntimāptavān || 184 ||



tasya puṇyānubhāvena bandhaṃ na viviśurmṛgāḥ |

na hi śuddhātmanāmagre prāpnotyakuśalaṃ janah || 185 ||



lubdhako'pi tato'bhyetya pāśānālokya nirmṛgān |

pratyekabuddhaṃ krodhāndho viṣadigdheṣuṇāvadhīṭ || 186 ||



tasya sāyakaviddhasya jvalajjvalanatejsaḥ |

prabhāvamadbhutaṃ dṛṣṭvā pādayornipapāta saḥ || 187 ||



akāryakaraṇodvegasaṃtāpādatha lubdhakaḥ |

nininda śocannātmānaṃ saṃtyajya śaravāgurāḥ || 188 ||



parinirvāṇamāptasya tasyāsthīni nidhāya saḥ |

chatradhvajādisaṃbhāraiḥ stūpaṃ cakre sadārcitam || 189 ||



lubdhakastena puṇyena babhūvodrāyaṇo nipaḥ |

vadhāt pratyekabuddhasya bahuśo vadhamāptavān || 190 ||



nandanāmno gṛhapatermadalekhābhidhā sutā |

babhūva dhanadhanyādisphūtiḥ karvaṭavāsinaḥ || 191 ||



sā kadācinmadotsiktāḥ gṛhamārjanareṇubhiḥ |

pratyekabuddhamāyāntaṃ pathi mohādavākirat || 192 ||



tasminneva dine tasyāściracintābhirarthitaḥ |

varaḥ stanabharārtāyā varaṇārthī samāyayau || 193 ||



mūdhni pratyekabuddhasya pāṃśumuṣṭiunipātanāt |

pratyāsannavivāhāhamiti bhrātaramāha sā || 194 ||



tatastasyāh pravādena cikṣipurvaraṇāptaye |

mūrdhni pratyekabuddhasya rajāṃsi prauḍhakanyakāḥ || 195 ||



guṇākārapravṛttena prayayena vimohitāḥ |

nirvicārya pravartante viruddheṣvapi vastuṣu || 196 ||



pravṛttapātakācāre tasmin buddhabudhābhidhau |

nivāraṇaṃ gṛhapatī karmaṇastasya cakratuḥ || 197 ||



saiva kanyā narapatiḥ śikhaṇḍī pāpabhāgabhūt |

pravādakartā tadbhrātā bhikṣuḥ katyāyano'pyayam || 198 ||



jātau gṛhapatī rūḍhaduṣṭācāranivāraṇāt |

puripatāpānnirmuktau hiruko bhirukaśca tau || 199 ||



iti bhagavataḥ śrutvā vākyaṃ vicārya ca bhikṣavaḥ

phalapariṇatiṃ jñātvā citrām śubhāśubhakarmaṇām |

khalajanavacastulyaṃ śatruṃ vicārasamaṃ guruṃ

sukṛtasadṛśaṃ bandhuṃ loke na kiṃcana menire || 200 ||



iti kṣemendraviracitāyāṃ bodhisattvāvadānakalpalatāyā-

mudrāyaṇāvadānaṃ catvāriṃśaḥ pallavaḥ ||