• Home
• Canon Text
• 33 nandīpanandāvadānam

33 nandīpanandāvadānam

Technical Details

33 nandīpanandāvadānam |



sa ko'pi puṇyapraśamānubhāvaḥ

śuddhātmanāmastyamṛtasvabhāvaḥ |

yasya prabhāveṇa bhavanti sadyaḥ

krūrā api krodhaviṣapramuktāḥ || 1 ||



purā tathāgate jetavanārāmavihāriṇi |

tadāġyayā bhikṣugaṇe girikānanacāriṇi || 2 ||



sumerupariṣaṇḍāyāṃ sthitvā dhyānaparāyaṇāḥ |

āyayurbhikṣavaḥ pāṇḍuvicchāyavadanāḥ kṛśāḥ || 3 ||



te'tha kṛtvā bhagavataḥ pādapadmābhivandanām |

ūcire bhikṣubhiḥ pṛṣṭā dehadaurbalyakāraṇam || 4 ||



sumeruṃ triguṇāvṛttyā veṣṭayitvā vyavasthitau |

adṛṣṭau vainateyasya nāgau nandopanandakau || 5 ||



tau sadā trividhocchvāsaṃ sṛjataḥ kīrṇapāvakam |

bhavanti bhasma sparśena sahasaiva śilā api || 6 ||



vayaṃ tadviṣaniśvāsairnidagdhā dhyānayoginaḥ |

vivarṇavadanacchāyāh kevalaṃ kṛśatāṃ gatāḥ || 7 ||



iti taiḥ kathite śāstā bhikṣusaṃghārthitaḥ puraḥ |

nāgayordamane yogyaṃ maudgalyāyanamādiśat || 8 ||



sa sumeruṃ samāsādya śṛṅgairāliṅgitāmbaram |

suptau dadarśa nāgendrau yogenāntarhitākṛtiḥ || 9 ||



yodhyamānau śanaistena bubudhāte yadā na tau |

tadā mahānāgavapurbhūtvā sa samaveṣṭayat || 10 ||



prabuddhau pīḍitau tena dṛṣṭvā taṃ bhīṣaṇākṛtim |

viṃdrutau nararūpeṇa tasthaturbhayavihvalau || 11 ||



nāgarūpaṃ parityajya kṛtvā rūpaṃ svakaṃ tataḥ |

palāyamānāvanyonyaṃ t au maudgalyāyano'vadat || 12 ||



nāgau kka gamyate tūrṇa bhayaṃ saṃtyajyatāmidam |

na sa nāgaḥ sthitastatra yena vidrāvitau yuvām || 13 ||



sarvathā yadi nastyea tadbhayād yivayordhṛtiḥ |

kriyate kiṃ śaraṇyasya na buddhasyābhivandanam || 14 ||



iti tenoktamākarṇya vinayāttau tamūcatuḥ |

prasādaḥ kriyatāmārya bhagavaddarśanena nau || 15 ||



iti bravāṇau nāgendrau nītvā bhagavato'ntikam |

sa ta dvṛttāntamāvedya praṇamya samupāviśat || 16 ||



bhagavānatha nāgendrau babhāṣe śaraṇāgatau |

praṇāmaṃ cakratū ratnaprabhābhūṣītabhūtalau || 17 ||



śikṣāpadāni saṃprāpya sarvabhūtābhayapradau |

śaraṇaprāptisamayādadhunā nirbhayau yuvām || 18 ||



ityālokanamātreṇa doṣadveṣavivarjitau |

kṛtau bhagavatā samyak jagmatustaṃ praṇamya tau || 19 ||



saṃdarśanenaiva mahāśayānāṃ

prabhāpadeśena śarīralagnaiḥ |

sīṃsrā api dveṣaviṣoṣmataptāḥ

śamāmṛtaiḥ śītalatāṃ vrajanti || 20 ||



tatpūrvajanmavṛttāṇtaṃ bhikṣubhirbhagavān jinaḥ |

prabhāvavismayātpṛṣṭaḥ sarvadarśī jagādā tān || 21 ||



kṛkirnāma purā śrīmān vārāṇasyāṃ nareśvaraḥ |

kāśyapākhyād bhagavataḥ prāptavān dharmaśāsanam || 22 ||



amātyayoḥ sa vinyasya rājyaṃ nandopanandayoḥ |

babhūva bodhisaṃsaktaḥ satyadarśananirvṛtaḥ || 23 ||



dharmadahrmamayaṃ rājyaṃ kṛtvā tau tasya mantriṇau |

sarvopakaraṇairyuktaṃ vihāraṃ kāśyapāya ca || 24 ||



kālena jātau nāgendrāvetau nandopanandakau |

vihārārpaṇapuṇyena padaṃ merurabhūttayoḥ || 25 ||



iti jinanigaditaphaṇivaracaritaṃ

paratanupariṇatiparicitasukṛtam |

śrutavati śamanayamuniparinivahe

viṣadharaniyamanaguṇanutirudabhūt || 26 ||



iti kṣemendraviracitāyāṃ bodhisattvāvadānakalpalatāyāṃ

nandopanandāvadānaṃ trayastriṃśaḥ pallavaḥ ||