• Home
• Canon Text
• 32 viśākhāvadānam

32 viśākhāvadānam

Technical Details

32 viśākhāvadānam |



vāmāḥ sajjanavāmāḥ prāyeṇa bhavanti nīrogiṇyaḥ |

timironmukhī sarāgā kṣipati raviṃ bhūdharātsaṃdhyā ||1 ||



devadattasya carite bahujanmāntarāśraye |

kathite'pi punaḥ prāha bhagavān jñānasāgaraḥ || 2 ||



purā kaliṅgaviṣaye nṛpatiḥ śatrubhaṅgakṛt |

śrīmānabhūdaśokākhyaḥ prakhyātāsaṃkhyavikramaḥ ||3 ||



tasya śākhaḥ praśākhaśca catvāraḥ sadṛśāḥ sutāḥ |

anuśākho viśākhaścetyabhavan bhuvi viśrutāḥ || 4||



tāruṇyamattāste pitrā sapatnīkāḥ pravāsitāh |

savikāranikāreṇa putrasneho'pi naśyati || 5||



te śanaiḥ kṣīṇapātheyā durdaśāmiva duḥsahām |

vikaṭāmaṭavīṃ prāpyaṃ kṣutkṣāmāḥ samacintayan || 6 ||



etāḥ striyo vipatkāle gulphabandhanaśṛṅkhalāḥ |

kṛcchralabdhe ca bhāginyaḥ sthitāḥ parṇāśane'pi naḥ || 7 ||



iti cintayatāmāsīt teṣāṃ strībadhaniścayah |

durdaśādagdhabhāgyānāṃ ghorā saṃjāyate matiḥ || 8 ||



teṣāṃ madhyādviśākhastu pāpasaṃkalpaśaṅkitaḥ |

bhāryāmādāya kṛpayā palāyya prayayau pṛthak || 9 ||



sā kalaṅkavatī nāma bhṛśaṃ vaiklavyamāgatā |

dūrādhvadhāvanaśrāntā mūrcchitā nyapatadbhuvi || 10 ||



tataḥ sā karuṇārdreṇa bhartrā prāṇakṣayakṣaṇe |

śarāvedhasamudbhūtaṃ pāyitā nijaśoṇitam || 11 ||



tām raktapānasaṃprāptajīvitām sattvasāgaraḥ |

svāṅgaṃ niṣkṛtya māṃsena prāṇavṛttimakārayat || 12 ||



nirjalaṃ ghorakāntāraṃ samuttīrya krameṇa tau |

pracchāyapādapaśyāmaṃ prāptau girinadītaṭam || 13 ||



viśrāntayostayostatra kṛttapādakaro naraḥ |

tīvrākrandī nadīvegenohyamānaḥ samāyayau || 14 ||



dṛṣṭvaiva karuṇāśliṣṭaḥ kaṣṭāṃ vipadamāśritaḥ |

vigāhya saritaṃ dorbhyāṃ viśākhastamatārayat || 15 ||



tataḥ pratyāgataprāṇāṃ toyamūlaphalādibhiḥ |

sa taṃ cakre dinaireva saṃrūḍhacchedanirvyatham || 16 ||



svastho'pi gativaikalyānnaiva gantuṃ kkacit kṣamaḥ |

sa tasthaui tatra tatpatnyā kāle kalitabhojanah || 17 ||



rājaputrastu jāyāyāmabhūdviralasaṃgamaḥ |

siṃhālparatayaḥ śūrāḥ prāyeṇa vijigīṣavaḥ || 18 ||



divyauṣadhirasāhāraparipūrṇatanuḥ śanaiḥ |

tatpatnī vikalāyāsmau cakāra surataspṛhām || 19 ||



snehena nopalipyante na badhyante guṇena ca |

gurave na ca sajjanti svecchasparśasukhāḥ striyaḥ || 20 ||



sā tena niśi niḥśabdaṃ ramamāṇā ghanastanī |

niḥśaṅkasuratātṛptā patiṃ vighnamamanyata || 21 ||



sā patyuḥ svairiṇī tena vidadhe vadhasaṃvidam |

pāpeṣu śikṣākuśalāḥ kaluṣāḥ kila yoṣitaḥ || 22 ||



sā śiraḥśūlamatulaṃ vadantī svasya chadmanā |

cakre likhitapāpāsyā lalāṭe paṭṭabandhanam || 23 ||



tasyāḥ śirorujāṃ tīvrāṃ vyatītaḥ pārthivātmajaḥ |

kāruṇyāttatpratīkāre tāṃ tāṃ yuktimacintayat || 24 ||



viṣādacintāstimitaṃ śvasantaṃ sā jagād tam |

śītārtakūjadbhramarā himamlāneva padminī || 25 ||



evaṃvidhaṃ me kanyāyāh śiraḥśūlaṃ purābhavat |

pāṣāṇabhedalepena bhiṣagbhiśca nivāritam || 26 ||



pāṣāṇabhedavyāpto'yaṃ prāgbhāgo'sy mahībhṛtaḥ |

rājjvāvatīrya bhavatā gṛhyatāṃ yadi śakyate || 27 ||



dhārayiṣyāmi pāṇibhyāmahamālambanaṃ tava |

ityuktaḥ praṇayātpatnayā tathetyāha nṛpātmajaḥ || 28 ||



tatpāṇidhṛtarajjvātha vihitālambanaḥ śanaiḥ |

so'vatīrṇaḥ śilāsphālagarjadgirinadītaṭam || 29 ||



bheṣajādānasaṃsaktaḥ saṃtyaktālambanastayā |

sa papāta mahāśvabhre strīcittacapalāmbhasi || 30 ||



śubhasya karmaṇaḥ śeṣādabhagnatanureva saḥ |

uhyamānaḥ pravāheṇa dhīraścitamacintayat || 31 ||



nārīcittābhamāvartaṃ darśayantyā nijāśayam |

mama strīniyame nūnamupadeśaḥ kṛto'nayā || 32 ||



durvijñeyāḥ pratatamatibhiḥ svapnasaṃkalpakalpā |

rāgadveṣavyasanaviṣamāyāsavinyāsasaktāḥ |

kāmātkāmī sakalajanatāmohane saṃpravṛttāḥ

pātāyaiva kṣasṇaparicitasyāpi māyāḥ striyaśca || 33 ||



iti saṃcintayanneva nadīvegena bhūyasā |

prāpitaḥ sukṛteneva sa purīṃ puṣkarāvatīm || 34 ||



tasminnavasare tatra niṣputre nṛpatau mṛte |

nimittajñairmahāmātyairgṛhītaḥ sa sulakṣaṇaḥ || 35 ||



abhiṣiktaḥ sa taistatra vidhivanmaṅgalodakaiḥ |

abhūdvivāhavidveṣī dṛṣṭastrīcaritādbhutaḥ || 36 ||



kalaṅkavatyapi girau bodhisattvavivarjite |

mandvīryauṣadhiḥ kāle vṛtticchedākulābhavat || 37 ||



skandhe bhagnāṅgamāropya sā grāmapuravartmasu |

janaṃ pativratāsmīti girā bhikṣāmayācata || 38 ||



parivratāgauraveṇa sarvastasyau dadau bahu |

mithyāśīlapravādo'pi sūte vipadi saṃpadam || 39 ||



aṭantī sā śanaiḥ prāptā nagarīṃ puṣkarāvatīm |

satīti vanditā sarvairvṛpadvārāntike yayau || 40 ||



rājā strīvṛttavidveṣī vandate tu pativratām |

iti saṃcintya tadbhaktyā nṛpaṃ prāha puhohitaḥ || 41 ||



dūredeśāntarāddeva prāptā kāpi pativratā |

yayeyaṃ caraṇanyāsairbhūtadhātrī pavitritā || 42 ||



he deva paśya tāṃ śādhvīṃ skandhāropitabhartṛkām |

pativratāpraṇāmena puṃsāmāyurvivardhate || 43 ||



nṛpaḥ purohiteneti tatsaṃdarśanamarthitaḥ |

tamuvāca na jānīṣe brāhmaṇaḥ sarale bhavān || 44 ||



snigdhā strīti pravādo'yaṃ nirvyājeti matibhramaḥ |

satīti vyomapuṣpāptiḥ pāpā strīti na saṃśayaḥ || 45 ||



niṣphalāścagnurohiṇyaḥ saralā janasaṃgame |

nāryo vetasavallarya iva nirmūlabandhanāḥ || 46 ||



bhedadrohaikaśīlābhyo duḥśīlābhyaḥ svabhāvataḥ |

namaḥ strībhyo namaḥ strībhyo namaḥ strībhyo namo namah || 47 ||



dṛṣṭastrīvṛttadoṣāya taccintāvyathitānmane |

apyeṣā pṛthivī mahyaṃ ratnapūrṇā na rocate || 48 ||



nagamṛgavadhūmugdhāstīkṣṇāḥ paraṃ paravañcane

tanuvitaraṇe saktāḥ puṃsāṃ haranti ca jīvitam |

dadhati ca bhayaṃ puṣpāyāte pibanti ca pāvakaṃ

saralakuṭilā naiva jñātā vicāraśataiḥ striyaḥ || 49 ||



tathāpi yadi nirbandhastava paśyāmi tāṃ striyam |

ityuktvā harmyamāruhya tām dadarśa nareśvaraḥ || 50 ||



tāmeva sa parijñāya pāpāṃ kṛttāṅgasaṅginīm |

sacivebhyaḥ kṣitipatistadvṛttāntaṃ nyavedayat || 51 ||



nṛpaṃ sāpi parijñāya pāpā kṣaṇamadhomukhī |

nirastā prayayau tūrṇaṃ pihitaśravaṇairjanaiḥ || 52 ||



viśākhanāmā naranāthasūnuḥ

so'haṃ vadhūḥ sāsya ca devadattaḥ |

śrutvetivṛttaṃ kathitaṃ jinena

bhikṣuvrajastaccaritaṃ nininda || 53 ||



iti kṣemendraviracitāyāṃ bodhisattvāvadānakalpalatāyāṃ

viśākhāvadānaṃ dvātriṃśaḥ pallavaḥ ||