• Home
• Canon Text
• 31 kalyāṇakāryavadānam

31 kalyāṇakāryavadānam

Technical Details

31 kalyāṇakāryavadānam |



pratyakṣalakṣaṇaparīkṣita eṣa loke

saṃlakṣyate sujanadurjanayorviśeṣaḥ |

arkaḥ prakāśaviśadaṃ vidadhāti viśva-

mandhīkaroti nikhilaṃ jagadandhakāraḥ || 1 ||



sarvajñaḥ pūrvavṛttāntamaśeṣamavalokayan |

asminneva kathārambhe bhagavān punarabravīt || 2 ||



nṛpaḥ pātaliputrākhye pure bhūmipuraṃdaraḥ |

abhūtpuraṃdaro nāma mandiraṃ puṇyasaṃpadaḥ || 3 ||



kalyāṇakārī tasyābhūt sūnurguṇagaṇonnataḥ |

akalyāṇābhidhānaścadvitīyo nirguṇaḥ sutaḥ || 4 ||



kalyāṇakārī sarvārthikaruṇākalpapādapaḥ |

chatrāvaśeṣāmakarod dāṇaśīlaḥ śriyaṃ pituḥ || 5 ||



tasmai manoramāṃ nāma puṇyaseno mahīpatiḥ |

dūtaṃ visṛjya lekhena svasutām v acasā dadau || 6 ||



pratyāsannavivāho'tha nṛpaṃ rājasuto'bhyadhāt |

prāptaḥ pariṇayastāta saṃpratyeṣa na me mataḥ || 7 ||



vātsalyapeśalatayā madāttāḥ prakṛtiśriyaḥ |

mayā dānavyasaninā koṣaste śuṣirīkṛtaḥ ||8||



tasmātpravahaṇenāhaṃ samuttīrya mahodadhim |

ratnadvīpaṃ vrahāmyeva divyaratnārjanodyataḥ || 9 ||



divyasaṃpadamāsādya kariṣye dārasaṃgraham |

kalatramakṛtārthasya trāsanaṃ sukhasaṃpadām || 10 ||



iyuktvā sa pituḥ prāpya śāsanaṃ caraṇānataḥ |

jagāhe jaladhiṃ lolakallolāliṅgitāmbaram || 11 ||



bhrātā tamanuvajrāja saujanyavyañjano'nujaḥ |

nirguṇaḥ saguṇadveṣadrohamantarvicintayan ||12 ||



jyeṣṭhastamabravīdvatsa samudre karmaviplavāt |

ahaṃ grāhyastvayā skandhe jāte pravahaṇakṣaye || 13 ||



iti bhrātrā kṛtāśvāsastathetyūve sa taṃ śaṭhaḥ |

doṣodyataḥ praṇayitāṃ khalaḥ samavalambate || 14 ||



tataḥ pravāhaṇārūḍhaḥ pavanairanukūlatām |

yātaiḥ puṇyairiva prāpya ratnadvīpaṃ nṛpātmajaḥ || 15 ||



dovyaratnāni saṃprāpya pratyāvṛtte tataḥ śanaiḥ |

rājaputre pravahaṇaṃ drāgabhañjat prabhañjanaḥ || 16 ||



bhagne pravahaṇe tasmin bhrātaraṃ pūrvasaṃvidā |

sa jagrāha śaṭhaḥ kaṇṭhe taṃ bhujaṅga ivānujaḥ || 17 ||



karmavāteritastūrṇaṃ kūlaṃ prāpya nṛpātmajaḥ |

avāpa sahasā nidrāmāndhyaprathamadūtikām || 18 ||



tasya suptasya ratnāni dṛṣṭvā baddhānyathānujaḥ |

prahartuṃ vyasanacchidre krūraḥ samupacakrame || 19 ||



utpāṭya gāḍhabaddhasya sa tasya nayanāmbujam |

taṃ tārakaṃ bhayāmbhodhau cakāra gatatārakam || 20 ||



āttaratne gate tasmin vājasūnurgatadyutiḥ |

mātaṅgonmūlitāmbhoja ivābhūtkamalākaraḥ || 21 ||



sa babhūva nirālokaḥ śokatīvratamovṛtaḥ |

kṛṣṇapakṣakṣapārambha iva sūryenduvarjitaḥ || 22 ||



atrāntare samāyātastaṃ deśaṃ gokuśādhipaḥ |

rājaputraṃ vilokyāndhamabhūt saṃkrāntatadvyathah || 23 ||



sa taṃ nītvā svanilayaṃ paricaryāparaḥ pārḥ |

tasyāsīdguṇasaujanyasnehāveśavaśīkṛtaḥ || 24 ||



tatra śokasujāṃ śāntyai sadā cetovinodinīm |

vīṇāṃ svarapravīṇo'sau pūrvābhyastamavādayat || 25 |



satsaṃgamaḥ pṛthuvivekakathābhoyogaḥ

kāvyāsavaḥ priyasuhṛtpraṇayo vihāraḥ |

vīṇāsvanah kusumakāntavanāntavāsaḥ

śokāgnitaptamanasāmamṛtāvagāhaḥ || 26 ||



tasya gopapateḥ patnī tīgavīṇāvicakṣaṇā |

paśyantī rājatanayaṃ prayayau sābhilāṣatām || 27 ||



kṛtopadeśā satataṃ kuṭilā vīṇayeva sā |

mūrcchantī navarāgeṇa sotkaṇṭhā samacintayat || 28 ||



subhago'yaṃ mamātīva dṛśi citte ca cartate |

nivartate na me tāpaḥ premṇi cenna pravartate || 29 ||



dhanyeyaṃ nakhasaṃpātaiḥ kkaṇantī rāgiṇīmuhuḥ |

yātāsya vallakī puṇyairaṅkārohaṇayogyatām || 30 ||



iti saṃcintya sā svairaṃ tamuvāca savibhamam |

spṛśantī tatkarāmbhojaṃ sakampakarapallavā || 31 ||



lalanāsulabhāṃ lajjāṃ mamedaṃ tvadgataṃ manaḥ |

akṛtajña iva prītiṃ na saṃsmarati mānada || 32 ||



na śīlaṃ na kulācāraṃ nābhimānaṃ na saṃśayam |

apekṣante smarakṣiptā vailakṣyarahitāḥ striyaḥ || 33 ||



praṇayānmama saṅkalpaṃ saphalaṃ kartumarhasi |

bhavanti mānitāḥ prītyai devatā iva yoṣitaḥ || 34 ||



iti tasya vacaḥ śrutvā bhinnasvaraviśṛṅkhalam |

capalāṃ rājaputrastāṃ trastāntaḥkarṇo'vadat || 35 ||



neyaṃ mātaḥ samucitā sataḥ śīlaparicyutiḥ |

dhikkilbiṣaviṣaspṛṣṭaḥ naṣṭaśīlasya jīvitam || 36 ||



parāṅganāpariṣvaṅgamaṅgairaṅgīkaroti yaḥ |

āliṅgati pataṅgo'yaṃ narakāgniśikhāṃ punah || 37 ||



paropakāraniratāh paradāranirādarāḥ |

ye'pyahiṃsāvyasaninaste jīvanti mṛtāḥ pare || 38 ||



iti tenoktamākarṇya sābhūdbhagnamanorathā |

nidhanābhyadhikaḥ prītipratiṣedho hi yoṣitām || 39 ||



tataḥ svapatimabhyetya bhujaṅgī bhaṅgamāgate |

manorathe manyuviṣaṃ vamantīva jagāda sā || 40 ||



paravatsalatā sādho doṣāya saralasya te |

ko hyavijñātaśīlānāṃ svādhīnīkurute gṛham || 41 ||



pareṣu bhṛśamāśvāsaṃ spṛśataste na śobhanam |

guptaṃ cittaṃ ca vittaṃ ca jano jānāti kasya kaḥ || 42 ||



paradārasahasrākṣastvayāndhaḥ sa gṛhe dhṛtaḥ |

dīnāndhajanavātsalyāt paśya tasyocitaṃ phalam || 43 ||



adyāhaṃ tena vijane saṃgame bhṛśamarthitā |

yadyasya nayane syātāṃ syāt kathaṃ me palāyanam || 44 ||



ityuktaḥ sa tayā kopāttapto gopapatirbhṛśam |

dvare niṣkāsya taṃ cakre gehaṃ cittaṃ ca śītalam || 45 ||



pitā tyajati yatputraṃ suhṛnmitraṃ nihanti yat |

bandhucchedāsidhārāṇāṃ taddārāṇāṃ vijṛmbhitam || 46 ||



bhruvordṛśoryatkauṭilyaṃ yattaikṣṇyaṃ yacca cāpalam |

kucayoryacca kāṭhinyaṃ tatsarvaṃ hṛdi yoṣitām || 47 ||



kalyāṇakārisārthena pathaḥ saṃtāritaṃ śanaiḥ |

pitari tridivaṃ yāte śuśrāva bhrātaraṃ nṛpam || 48 ||



sa puraṃ puṇyasenasya śvaśurasya mahīpateḥ |

kālena prāppa dūrādhvakleśapraśamabāndhavam || 49 ||



atrāntare sutā tatra mahībharturmanoramā |

vācā dattā purā yasmai tasminnabdhicyute śrute || 50 ||



āhūteṣu narendreṣu niviṣṭeṣu yathākramam |

āruhya ratnaśibikāṃ svayaṃvarabhuvaṃ yayau || 51 ||



vilokayantī bhūpālān sā śanaiścalalocanā |

yadṛcchayāgataṃ tatra rājaputraṃ dadarśa tam || 52 ||



andho'pi tasyāḥ sahas āsa yayau priyatāṃ dṛśoḥ |

grahamadhye kumudvatyā meghāndho'pi priyaḥ śaśī || 53 ||



nṛpeṣu pratiyāteṣu vilakṣeṣvaphalāgamāt |

mahīpatisutāntastaṃ vavre guṇavinirgatam || 54 ||



sāpu hāraṃ parikṣipya kaṇṭhe tasyāyatekṣaṇā |

śanakaurmadhurālāpā tvadvaśāsmītyuvāca tam || 55 ||



strīvṛttacakitaḥ so'pi vijane tāmabhāṣata |

prajñādaridrayā nedaṃ striyā yuktaṃ kṛtaṃ tvayā || 56 ||



smarasauhārdamitreṣu padmanetreṣu rājasu |

sthiteṣu vandhyajanmāndhaḥ kasmādasmi vṛtastvayā || 57 ||



anyavakrkrāvalokinyo jāyāścakṣuṣmatāmapi |

vadhūḥ kiṃ punarandhasya dine'pyanyābhisārikā || 58 ||



lalanābhirna me kṛtyaṃ pratyayastāsu nāsti me |

kulakūlanipātinyo nimnagāḥ kuṭilāḥ stiyaḥ || 59 ||



ityuktā tena paruṣaṃ lajjālolā nṛpātmajā |

tamūce nātha sar vatra na śaṅkāṃ kartumarhasi || 60 ||



dṛṣṭadoṣaḥ kkacinnāryām yadi tvamatiśaṅkitaḥ |

aduṣṭāpi tvayā nāma tadvyāptā kriyate katham ||61 ||



tvayyeva yadi me prītirananyaśaraṇam manaḥ |

tena satyena te netramekaṃ bhavatu nirmalam || 62 ||



ityuktamātre sudṛśā dakṣiṇaṃ tasya lecanam |

satyānubhāvenābhūttatpraphullakamalopamam || 63 ||



rājaputraḥ prahṛṣṭo'tha tām prasādya silocanām |

uvāca tanmukhāmbhojalāvaṇyaguṇacismitḥ || 64 ||



kalyāṇakārī subhagaḥ sa evāhaṃ nṛpātmajaḥ |

yasmau purā tvaṃ guruṇā vacasā pratipāditā || 65 ||



sa evāhaṃ yadi paraṃ nirvairaḥ pāṭane dṛśaḥ |

tena satyena nayanaṃ svasthaṃ bhavatu me'param || 66 ||



satyopayācaneneti sahasaivāsya locanam |

dvitīyamapi vaimalyamavāpa saha cetasā || 67 ||



tato viditavṛttena puṇyasenena bhūbhujā |

kṛtasāhāyyakaḥ prāpa svarājya sa priyāsakhaḥ || 68 ||



kalyāṇkārī yaḥ so'haṃ devadattaḥ sa cānujaḥ |

tena pūrvānubhāvena tadvidho'dyāpi vartate || 69 ||



ityudāramupakāranirmalaṃ

bodhisattvacaritaṃ niśamya te |

bhikṣavaḥ khalviceṣṭitaṃ ca ta-

ttulyamapratimavismayaṃ yayuḥ || 70 ||



iti kṣemendraviracitāyāṃ bodhisattvāvadānakalpalatāyāṃ

kalyāṇākāryavadānamekatriṃśaḥ pallavaḥ ||