• Home
• Canon Text
• 23 viśvaṃtarāvadānam

23 viśvaṃtarāvadānam

Technical Details

23 viśvaṃtarāvadānam |



cintārantādadhkarucayaḥ sarvalokeṣvanindyā

vandyāste'nyaiḥ puruṣamaṇayaḥ ke'pyapūrvaprabhāvāḥ |

yeṣāṃ naiva priyamapi paraṃ putradārādi datvā

sattvārthānām bhavati vadanamlānatā dainyadūtī ||1 ||



bhagavān bhikṣubhiḥ pṛṣṭaḥ purā śākyapure jinaḥ |

jagāda pūrvavṛttāntaṃ devadattakathāntare ||2 ||



purī babhūva viśvākhyā viśvāsavasatiḥ śriyaḥ |

viśvopakārasaktasyasukṝtasyeva janmabhūḥ || 3 ||



saṃjayākhyo'bhavat tasyāmamitratimirāṃśumān |

netrānandasudhāsūtirvicitracarito nṛpaḥ || 4 ||



tasya viśvaṃtaro nāma vadānyastanayo'bhavat |

apūrvatyāginā yena hṛtaṃ kalpatayoryaśaḥ || 5 ||



īrṣyāvirahitāstulyaṃ vidagdhena prsādhitāḥ |

satyena bhāratī yena dānena śrīḥ śrutena dhīḥ || 6 ||



adyāpi yasya dikkāntākarṇābharaṇatām gatam |

vibhāti ketakīgarbhapalāśaviśadaṃ yaśah || 7 ||



sa kadāciddadau divyaratnālakāramarthine |

athaṃ vijayasāmrājyamanorathaharaṃ tviṣā ||8||



datte rathavare tasmin vismayenākhilo janaḥ |

babhūvākrāṇtahṛdayaścintayā ca nareśvaraḥ || 9 ||



mahāmātyānathāhūya harṣahīno mahīpatiḥ |

uvācopacitodvegacintākrāntamanorathah || 10 ||



datto rathaḥ kumāreṇa sa jaitraḥ śatrumardanaḥ |

yatprabhāvārjitā seyaṃ mahārathavarūthinī ||11 ||



lakṣmī sukhaniṣaṇṇā me yātā niścalatām tayā |

rathe sauryapathe tasmin jayakuznje ca kuñjare || 12 ||



iti rājavacaḥ śrutvā tamabhāṣanta mantriṇaḥ |

rājan doṣastavaivāyaṃ vātsalyena pramādyataḥ || 13 ||



dharmaḥ kasya na harṣāya dānaṃ kasya na saṃmatam |

kiṃ tu mūlahatādvṛkṣānnivartante palārthinaḥ || 14 ||



vikrītaḥ paradeśe ca rathastena dvijanmanā |

ityuktvā mantriṇaḥ sarve śalyaviddhā ivābhavan || 15 ||



atha kālena saṃprāpte vasante madanotsave |

vipāke sukṛtasyeva hṛdayānandadāyini || 16 ||



svayaṃgrahopajīvyasya madhormadhukarārthinaḥ |

lokaḥ puṣpavanairyāto yaśobhiriva śubhratām || 17 ||



aśokaṃ lokasacchāyamupakārodyataṃ drumam |

madhu vidhūtaṃ saṃnaddhe kalikālaṃ kṛtaṃ jagat || 18 ||



rājaputraḥ samāruhya kuñjaraṃ rājavardhanam |

yayau phullān vane druṣṭumarthikalpatarustarūn || 19 ||



vrajantaṃ prati sāmantaprayuktātaṃ dvijāḥ pathiḥ |

babhāṣire samabhyetya svastivādapuraḥsarāḥ || 20 ||



cintāmaṇirgīyase tvaṃ ślāghyo jagati jaṅgamaḥ |

yasya saṃdarśanenārthī gāḍhamāliṅgyate śriyā || 21||



dvāveva viśrutotkarṣavideṣau bhadrajanmani |

dānārdrahastastvaṃ loke gajaścāyaṃ sthironnatiḥ || 22 ||



asmabhyaṃ sukṛtpdāra kuñjaro'yaṃ pradīyatām |

tvadanyena vadānyena dātumeṣa na śakyate || 23 ||



ityarthitastaiḥ sotsāhaḥ sa tebhyastu dadau dvipam |

sajīvamiva sāmrājyaṃ saśaṅkhadhvajacāmaram ||24||



datvā bodhipradhānena śuddhadhīḥ |

ratharatnaṃ dvipendraṃ ca so'bhūdānandanirbharaḥ || 25||

śrutvaiva nṛpatirdattaṃ viśrutaṃ jayakuznjaram |

rakṣāprakārarahitāṃ rājalakṣmīmamanyata || 26 ||



sa rājyabhraṃśabhītena kupitena mahībhujā |

niṣkāsitaḥ kumāro'tha pratasthe praṇipatya tam || 27 ||



mādrīdayitayā sārdhaṃ jālinaṃ nāma dārakam |

kṛṣṇābhidhāṃ tathā kanyāmādāya sa yayau vanam || 28 ||



vane'pi śeṣa ṃ sa dadau vāhanādikamarthine |

samaṃ hi mahatāṃ sattvaṃ saṃpatsu ca vipatsu ca || 29 ||



mādyrāṃ kadācidyātāyāṃ puṣpamūlaphalāptaye |

brāhmaṇaḥkaścidabhyetya rājaputramabhāṣata ||30 ||



paricārakāhīnāya caturau bālakāvimau |

dehi mahyaṃ mahāsattvaṃ sarvado hyasi viśrutaḥ || 31 ||



śrutvaitadavicāryaiva dārakau dayitau param |

datvā sa tasmai sahasā sehe tadvirahavyathām || 32 ||



dhanaputrakalatrādi loke kasya navallabham |

dānādanyadvadānyānāṃ na dayāvatām || 33||



atha mādrī samabhyetya bālakau bālavatsalā |

apaśyantī puraḥ patyuḥ patitāpannamūrcchitā || 34 ||



sā labdhasaṃjñā dīptena vyāptā śokakṛśānunā |

śiśupradānavṛttāntaṃ śrutvaivābhūtpalāpinī || 35 ||



tasyāścetasi duḥkhāgnirapatyasnehaduḥsahaḥ |

priyapremānusṛtyaiva prayayau puṭapākatām || 36 ||



atrāṇtare samabhyetya viprarūpaḥ sureśvaraḥ |

bhṛtyārthī dayitām patnīṃ rājaputramayācata || 37 ||



yācitastena sahasā śucaṃ jāyāviyogajām |

dhiyā saṃstabhya sattvābdhiḥ sa tasmai vitatāra tām || 38 ||



sadyaḥ pradānataralāṃ saṃtrastāṃ hariṇīmiva |

so'vadaddayitāmantaḥ kalayan bodhivāsanām || 39 ||



samāśvāsihi kalyāṇi na śokaṃ kartukarhasi |

svapnapraṇayakalpo'yamasatyaḥ priyasaṃgamaḥ || 40 ||



śuśrūṣayā dvijasyāsya dharme te ramatām matiḥ |

vilolalokayātrāyāṃ dharmaḥ sthirasuhṛt satām || 41 ||



dṛṣṭvā sarve svajanasujanā bāndhavāścānubhūtāh

nyastā kaṇṭhe kṣaṇaparimalamlāyinī mitrālā |

dāre putre kṣapitamaniśaṃ yauvanaṃ jīvitaṃ ca

prāpto nāptaśtiraparicayaḥ ko'pi dharmādṛte'nyaḥ || 42 ||



ityuktvā vallabhāṃ lobhaparityāgāduvāha saḥ |

dyutiṃ vadanapadmena dhairyavṛttiṃ ca cetasā || 43 ||



viyogaśokavikalāṃ mādrīṃ dṛṣṭvā kṛpākulaḥ |

nijarūpaṃ samādhāya śacīpatiruvāc atām || 44 ||



viṣādaṃ mā kṛthāh putri devo'haṃ tridaśeśvaraḥ |

arthibhyastvā dadātyeṣa tasmādasi mayarthitā || 45 ||



adhunā saiva patyustvaṃ nyāsībhūtā mayārpitā |

taṃ dadātyeṣa nānyasmau dīyate katham || 46 ||



kariṣyāmi tavāvaśyaṃ dārakābhyāṃ samāgamam |

ityudīrya sahasrākṣaḥ sahasāṇtaradhīyataḥ || 47 ||



atha tau dārakau vipraḥ samādāyārthalipsayā |

viśvāmitrapuraṃ gatvā lobhādvokretumudyatah ||48 ||



viśyāmitraḥ parijñāya rājaputrasya dārakau |

jagrāha mahatārthena bāṣpasaṃruddhalocanaḥ || 49 ||



kālena tridivaṃ yāte viśvāmitramahīpatau |

bheje viśvaṃtaro rājyaṃ paurāmātyagaṇārthitaḥ || 50 ||



rājye viraktasya tasya dānavyasaninaḥ param |

sattvena vardhamānarddhirna kaścid yācako'bhavat || 51 ||



tadvittapūrṇavibhavo brāhmaṇaḥ so'pi jambukah |

kṛtaghnaḥ svaprabhāvānme saṃpadityabhyadhājjanam || 52 ||



viśvaṃtaraḥ sa evāham devadattaḥ sa ca dvijaḥ |

uktveti cakre bhagavān bhikṣūṇāṃ dānadeśanām || 53 ||



ālambanaṃ śvabhraśatāvapāte

ghorāndhakāre suciraprakāśaḥ |

āśvāsanaṃ duḥsahaduḥkhakāle

dānam narāṇāṃ paralokabandhuḥ || 54 ||



iti kṣemendraviracitāyām bodhisattvāvadānakalpalatāyāṃ

viśvaṃtarāvadānam nām atrayoviṃśaḥ pallavaḥ ||