• Home
• Canon Text
• 10 sundarīnandāvadānam

10 sundarīnandāvadānam

Technical Details

10 sundarīnandāvadānam |



te ke'pi sattvahitasaṃnihitānukampā

bhavyā bahvanti bhuvane bahvabhītibhājām |

vātsalyapeśaladhiyaḥ kuśalāya puṃsāṃ

kurvanti ye varamanugrahamāgraheṇa || 1 ||



nyagrodhārāmanirataṃ druṣṭuṃ kapilavastuni |

bhagavantaṃ yayau nandaḥ śākyarājasutaḥ purā || 2 ||



naiṣkamyadeśanāmantrakathāntesa puraḥsthitam |

uvāca bhagavān prītyā pravrajyā gṛhyatāmiti || 3 ||



prasādyābhinivedyāsya taṃ nandaḥ pratyabhāṣataḥ |

bhagavan puṇyalābhāpi pravrajyābhimatā na me ||4 ||



sarvopasthāyako bhūtvā bhikṣusaṃghaṃ yathepsitaiḥ |

sarvopakaraṇaistāvat bhikṣyaṃ paricarāmyaham || 5 ||



ityuktvā ratnamukuṭaiḥ spṛṣṭatatpādapaṅkajaḥ |

rājaputraḥ svabhavanaṃ yayau jāyāsamutsukaḥ || 6 ||



sa sundarī samāsādya dayitām ratisundarīm |

vijahāra varodyānaṃ muhūrtavirahāsahaḥ || 7 ||



tataḥ kadācid bhagavān prakṛtyaiva guṇipriyaḥ |

svayaṃ nandasya bhavanaṃ bhikṣusaṃghaiḥ sahāyayau || 8 ||



sānandavadanaḥ kṛtvā nandastatpādavandanāṃ |

taṃ mahāharsanāsīnaṃ pūjayitvā vyajijñapat || 9 ||



keṣāṃ puṇyaprarohāṇāṃ paripāko'yamīdṛśaḥ |

kṛto'yaṃ yadbhagavatā darśanānugrahaḥ svayam || 10 ||



smaraṇaṃ śravaṇaṃ vāpi darśanaṃ vā mahātmanām |

seyaṃ kuśalavallīnāṃ mahatī phalasaṃtatiḥ || 11 ||



asya maitrasya mahatastadālokasya darśanāt |

hṛdayasya vikāsaśrīḥ kasya nāma na jāyate || 12 ||



dānādapi priyataraṃ puṇyādapi mahāphalam |

sadācārādapi śrlāghyaṃ mahatāṃ kilaṃ darśanam ||13 ||



iti tasya bruvāṇasya bhaktipraṇayapeśalam |

abhinandya puraḥ pūjāṃ bhagavān gantumudyayau ||14 ||



anuvavrāja taṃ nandaḥ svacche kanakabhājane |

varopacāramādāya madhuraṃ svamivāśayam || 15 ||



pahcādvrajantamālokya bhaktyā bhagavataḥ pathi |

niraikṣata kaṭākṣeṇa sundarī virahāsahā ||16 ||



gurūṇāmagre sā saralataralāṃ locanagatriṃ

vihāyaiva trāsāñcitamukutitākṣī priyatamā |

nirīkṣyālakṣyaṃ yat kṣaṇamavanatābhūttadadhikaṃ

na gantavyaṃ nāthetyavadadivaṃ maonādavacanam || 17 ||



nandaḥ praṇayiṇīṃ dṛṣṭvā socchvāsaṃ calitānanām |

ayamāgata evāhamacirādityabhāṣata || 18 ||



tataḥ svamāśramaṃ prāptaṃ bhagavantaṃ kṛtāñjaliḥ |

vrajāmi svagṛhaṃ tāvadityāha virahāsahaḥ || 19 ||



tatastamāsanāsīnaḥ praṇataṃ bhagavān puraḥ |

uvāca sasmitaṃ keyaṃ gamane saṃprati tvarā || 20 ||



viṣayāsvādasauhārdasaṃmohārditavetasām |

aho gṛhasukheṣveva nirvedavimukhā matiḥ || 21 ||



guṇābharaṇamevāyurvivekābharaṇo guṇaḥ |

praśamābahraṇaścāsau vairāgyābharaṇaḥ śamaḥ || 22 ||



tajjāḍyaṃ tadasahyaśalyaśalakaṃ nyastaṃ suhṛccetasi

prājñistadgaṇitaṃ virācasamayairvaiphalyamevāyuṣaḥ |

yadvairāgyavivekaśūnyamanasāmete paśūnāṃ yathā

yāntyāyānti ca cakranemicalanairnirlakṣaṇānāṃ kṣaṇāḥ || 23 ||



puṇyaṃ sattvavatām śrutaṃ matimatām śīlaṃ ca vidyāvatām

sarvaṃ bhāgyavatām sukhaṃ śamavatāṃ naiva kkacit durlabham |

duṣprāpastu samastavastuvasateḥ svalpāṃśako'pyāyuṣaḥ

tadyasya kṣayameti niṣphalatayā śocyāya tasmai namaḥ || 24 ||



vāmāvarte viṣayajaladhau pūrṇalāvaṇyasāre

darpotsarpadviṣamamakarāṅkodbhavakṣobhyamāṇe |

nityāsannaprabalavirajaprajjvaladvāḍavāgnau

puṃsāṃ setustaraṇaśaraṇe tīvravairāgyameva || 25 ||



tasmādgṛhāṇa pravrajyāṃ rājaputra jitendriyaḥ |

etāḥ striya iva kṣipraṃ samagamasukhāḥ śriyaḥ || 26 ||



kriyatām kuśalāyaiva brahmacaryaparigrahaḥ |

tyajyatāmeṣa niḥsāragṛhasaṃsāradurgrahaḥ || 27 ||



iti śrutvā bhagavataḥ karuṇābahraṇaṃ vacaḥ |

pratyabhāṣata taṃ nandaḥ pūrvapraṇayayantritaḥ || 28 ||



sadā bhavadupāyaiva pravrajyā bhagavan mama |

bhikṣusaṃghopakārārthe gṛha evādaraḥ param || 29 ||



ityuktvā bhagavadvākyamatikrāntumanīśvaraḥ |

kṛṣyamāṇaḥ priyāpremṇā so'bhūddolākulāśayaḥ || 30 ||



punaḥ punaścakārāsya bhagavān vratadeśanām |

upakārodyatāḥ santaścintayanti na yogyatām || 31 ||



yadā necchati nandastām pravrajyāmajitendriyaḥ |

tadāsya bahgavadvākyamapatadvapuṣi svayam || 32 ||



nandaḥ kāṣāyāvaraṇaḥ pātrapāṇiḥ sa tatkṣaṇam |

babhau cābhīkararucirmahāpuruṣalakṣaṇaiḥ || 33 ||



sa śāsanājjinasyābhūdāraṇyapiṇḍapātrikah |

ākārādanagāratām prayātaḥ pāṃśukūlikaḥ || 34 ||



priyāmuvāha satataṃ śyāmāṃ pravrajito'pi saḥ |

śaśāṅka iva saṃvyaktāṃ hṛdaye lāñchanacchavim || 35 ||



manasaḥ sphaṭikasyeva na vidmaḥ kena vartmanā |

rāgaḥ ko'pi viśatyantarnāpaiti kṣālito'pi yaḥ || 36 ||



virahāpāṇḍuraruciḥ saṃsaktāruṇacīvaraḥ |

sa saṃdhyābhrakalaṅkasya jahāra śaśinaḥ śriyam || 37 ||



vicaran virahākṣamaḥ sa vismṝtadhṛtirvane |

janmavidyāmanaṅgasya na visasmāra sundarīm || 38 ||



saṃpūrṇacandravadanāvadanadhyānaniścalaḥ |

acintyacciraṃ tattadupaviṣya śilātale || 39 ||



aho bhagavatāpyeṣa kṛto yatnādanugrahaḥ |

nāyāti mama vaimalyaṃ rāgādhiṣṭhitacetasaḥ || 40 ||



śrutaṃ saṃsāracaritaṃ niḥsaṅgavratamāsthitam |

tathāpi mṛgasāvākṣīṃ na vismarati me manaḥ || 41 ||



kāntākuṅkumalagnarāgasubhage gātre kṛtaṃ cīvaraṃ |

tatpīnastanamaṇḍalapraṇayinā pātraṃ dhṛtaṃ pāṇinā |

rāgo'yaṃ mama vardhate'sya yadi vānyasyeva vṛddhiḥ paraṃ

yadbodhivyavadhānabhūtamaniśaṃ dhyānaṃ tadālambanam || 42 ||



kṣaṇena māṃ prāptamavehi mugdhe

tāmevamuktvā gamane purastāt |

aho mayā darśanavighnabhūtaṃ

paścāt kṛtaghnavratametadāttam || 43 ||



no gantavyamiti prakampataralā vākyaṃ yadūce na sā

saṃtyajya vyajanaṃ sthite gurujane jagrāha pāṇyañcalam |

yatpādena likhantyapi kṣititalaṃ māmaukṣatālakṣitā

tenātyantaniṣedhamugdhavidhinā baddhaṃ tayā me manaḥ || 44 ||



madviyuktā na sā nūnaṃ śete śokapralāpinī |

puline cakravākīva harmye hariṇyalocanā || 45 ||



hā priye taktasaktena kitaveneva kevalam |

śritaṃ taccittacaureṇa mithyāvratamidaṃ mayā || 46 ||



tyaktvā vratamidaṃ tāvad gacchām idayitāntikam |

anurāgāgnitaptānāṃ tapastāpo hi duḥsahaḥ || 47 ||



rājaputrī cirāyātaṃ nṛśaṃsamavalokya mām |

manyunā navalagnena na jāne kiṃ kariṣyati || 48 ||



na sarvatra vikārāya nikāraḥ premaduḥsahaḥ |

durnivāro bhavatyeva snehalīno rajaḥkaṇaḥ || 49 ||



yasmin kṣaṇe bhagavatā paśyāmi rahitaṃ vanam |

mayā tadaiva gantavyaṃ gṝhamityeṣa niścayaḥ || 50 ||



asminneva śilāpaṭṭe rucirairgiridhātubhiḥ |

likhāmi tām śaśimukhīṃ saṃrpāpyālambanaṃ dhṛteḥ || 51 ||



athavā kathamālekhyaviṣayaṃ yāti sā priyā |

saundaryabidnako yasyāḥ sudhākuvalayendavaḥ || 52 ||



dṛṣṭirmugdhakurangasaṃcaladalivyāptotpalodvātanī

lāvaṇyodadhikūlavidrumavanaṃ bimbādharāgratviṣaḥ |

nirdoṣāmṛtaraśmisārthasaraṇiḥ sā kāpi vaktradyutiḥ

sāndaryaṃ kathamati citrapadavī ścaryasāraṃ vapuḥ || 53 ||



iti saṃcintya sa śanairālilekha śilātale |

sundarīṃ mukhamuktāśrusnātakampākulāṅguliḥ || 54 ||



sa saṃkalpasamudgīrṇaṃ pratibimbamivāśritām |

kṛtvā puraḥ priyatamāmūce'darbāṣpagadgadaḥ || 55 ||



priyāmālikhyāhaṃ nikhilasukhavṛṣṭiṃ nayanayo-

rna paśyāmyudbāṣpaḥ kṣaṇamapi śaraccandravadanām |

ayaṃ nūnaṃ tanvīvirahanirapekṣavratavataḥ

sphurattāpaḥ śāpaḥ kimapi mama pāpādupanataḥ || 56 ||



phullāmbhojavanatviṣā spṛhāvaśāsaktāśrutoyaṃ vapu-

statkālopagatāntarāyajanitaḥ kopaḥ samutsṛjyatām |

haṃho sundari dehi me prativacaḥ kiṃ maunamālambase

satyaṃ tvanmayarāgavīcaramidaṃ cittavrataṃ me vratam || 57 ||



iti bruvāṇaṃ taṃ dṛṣṭvā dūrādālikhitaṃ ca tat |

sāsūyā bhikṣavo'bhyetya bhagavantaṃ babhāṣire || 58 ||



bhagavan durvinītasya vātsalyādeva kevalam |

śunaḥ kusumamāleva pravrajyeyaṃ tvayārpitā || 59 ||



ākhilya sundarīmukhaṃ nandaḥ svairaṃ śilātale |

tatpralāpajapāsakto dhyānālambanatāṃ gataḥ || 60 ||



etadākarṇya bhagavān nandamāhvāyya kananāt |

kimetaditi papraccha priyāvirahamohitam || 61 ||



so'bravīd bhagavan satyaṃ kāntāsaktasya me param |

bhikṣūṇāṃ saṃmate'pyasmin vane na ramate matiḥ || 62 ||



iti dandavacaḥ śrutvā tamūce bhagavān jinah |

mīlayanneva vaktrendukāntyā rāgasaroruham || 63 ||



sādho tāvanna yuktā te saṃrāgānugatā matiḥ |

vighnairnākṛṣyate cetaḥ kalyāṇābhiniveśinām || 64||



kkāyaṃ yogastanutṛṇatulātyaktabhogābhiyogaḥ

kkāyaṃ nindyaḥ kṣaṇasukhalavāsvādasaṃvāda eṣaḥ |

jātyaivāyaṃ harati kuśalaṃ dustaro māramārgaḥ

premāndhānām bhavati sahasā duḥsaho yoktrajātaḥ || 65 ||



ityasya bhagavān kṛtvā ciraṃ vairāgyadeśanām |

saṃsthātavyamihetyuktvā svakṛtyāya svayaṃ yayau || 66 ||



tamevāvasaraṃ nandaḥ saṃcintya gamanocitam |

pratasthe svagṛhaṃ hṛṣṭaḥ sundarīdarśanotsukaḥ | 67 ||



vrajan dvāri pidhānāptairvihārairbahubhiścirāt |

nagarābhimukhaṃ mārgaṃ sa kathaṃcidavāptavān || 68 ||



atha vijñāya sarvajñastaṃ rāgād gantumudyatam |

uvācābhyetya bhagavān nanda tūrṇaṃ kka gamyate || 69 ||



sa jagāda vane tāvat bhagavan nāsti me ratiḥ |

na hyaviśrāntacittānāṃ kriyā kācit prasīdati || 70 ||



sā śrīścāmarahāsinī maṇimayī sā ramyaharmyāvalī

sā bālānilalolacārulatikā kāntā navodyānabhūḥ |

sā tanvī kusumeṣukārmukalatā kṣāmodarī sundarī

no janmāntaravāsanā iva manaḥ saktaṃ vimuñcanti me || 71 ||



sarāgeṇaiva manasā brahacaryaṃ carāmyaham |

vratapañjarabandhena vihaṅga iva yantritaḥ || 72 ||



tyaktvā vrajāmi pravrajyāmastu me narako'kṣayaḥ |

na vītarāgatāmeti mañjiṣṭhāraktamaṃśukam || 73 ||



iti bruvāṇamasakṛt svapadaṃ gantumudyatam |

nivāryānugrahadhiyā tamūce bhagavān jinaḥ || 74 ||



mā kṛthā viplavaṃ nanda ninditaṃ hi śrutāśrutam |

vidvajjanopadiṣṭena yathā yāti pṛthagjanaḥ || 75 ||



vivekavyastadoṣāṇāṃ viduṣāṃ śīlaśālinām |

niḥsārasukhalābhena nākārye dhīḥ pravartate || 76 ||



gāḍharāgagṛhītasya jugupsāyatane param |

jadhanyakarmaṇyāsaktiḥ kiṃ lajjājanane na te || 77 ||



yonijayonisaṃsaktāḥ stanapastanamardinaḥ |

aho bata na lajjante janmanyeva layaṃ gatāḥ || 76 ||



sadāsajjanavarjitā jananījaghanāsaktiḥ |

saṃmohāhatacittānāṃ paśūnāmeva dṛśyate || 79 ||



rāmāramaṇamāno'yaṃ viramya tyajyatāṃ tvayā |

bhogaiḥ saha bhujaṅgānāṃ dṛṣṭo bhavabile kṣayaḥ || 80 ||



jaghanyā janayatyeva na kasya viratiṃ ratiḥ |

yasyāṃ bhavati paryanteṣvapi naiva parāṅmukhaḥ || 81 ||



gṛhajālavimuktastvaṃ kiṃ tatraivābhidhāvasi |

na hi nirgasya sāraṅgaḥ punarviśati vāgurāṃ || 82 ||



iti vākyād bhagavataḥ śāsanena niyantritaḥ |

cintayan sundarīṃ nandaḥ praviveśāśramaṃ punaḥ || 83 ||



tataḥ kadācidādiśya nanda māśramamārjane |

āsanānugrahavyagraḥ prayayau bhagavān punah || 84 ||



tacchāsanāt pravṛttasya nandasyāśramaśodhane |

no bhūtalādapayayau rajo rāga ivāśayat || 85 ||



tasyāhartuṃ gatasyātha salilaṃpārabhāgikam |

muhuḥ pūrṇasamutkṣiptah śūnya evābhavaddhaṭaḥ || 86 ||



tena vighnena gamane sutarām khinnamānasaḥ |

tyaktvā tuprayayau nandaḥ sundarīdarśanotsukaḥ || 87 ||



atha vijñāya sarvaġyastaṃ yāntaṃ divyacakṣuṣā |

babhāṣe sahasābhyetya stambhamānamanorathah || 88 ||



pātrayogena taptasya śyāmaraktaruceḥ param |

aho snehakalaṅkaste dīpasyeva na śāmyati || 89 ||



alaṃ vāmābhilāṣeṇa nīlīrāga ivaiṣa te |

saṃsaktaḥ ko'pi hṛdaye yannādyāpi virajyase || 90 ||



andhīkaroti prārambhe ratistatkālakātaram |

āliṅgati jugupseva vṛtte mukhyāṅgasaṃgame || 91 ||



viṣayākhvādasaṅgena pāpamitrairivendriyaiḥ |

duḥsahavyasanāvarte pātyate narake narah || 92 ||



adhivāsayati sparśalekhenāpi kusaṃgamaḥ |

praklinnamatsyakuṇapāt pūtigandha ivodgataḥ ||93 ||



kalyāṇamitrasaṃparkaḥ sarvathā kuśalāvahaḥ |

śubhāmeda iva vyāpto yaḥ karoti mahārhatām || 94 |



ityukte tasya bhagavān sākṣāts adasatoḥ pathi |

ghrāṇasparśena saṃdarśya cakre tatsaṅgadeśanām || 95 ||



atha nandaṃ samādāya bhagavān gandhamādane |

yayau viriñciramarībālavyajanavījitaḥ || 96 ||



tatra dāvānalapliṣṭāmaniṣṭakliṣṭavigrahām |

kāṇāṃ karmaṭīkāmasmai darśayitvāvadajjinaḥ || 97 ||



imāṃ paśyasi kiṃ nanda māndyanindyatarākṛtim |

kasmaiciducitā ceyaṃ rocate priyadarśanā || 98 ||



sattā sadasatornāsti rāgaḥ paśyati ramyatām |

sa tasya lalito loke yo yasya dayito janaḥ || 99 ||



pakṣapātaṃ samṛtsṛjya satyaṃ nanda tvayocyatām |

asyāstasyāśca sundaryā lāvaṇyasya kimantaram || 100 ||



anarthitvādvayaṃ naiva saundaryāntaravedinaḥ |

arthipriyatvamāyāti prārthitaṃ tacca cārutām || 101 ||



paśyāmyahaṃ viśeṣaṃ tu tasyā nāsyāśca kaṃcana |

ramyatvaṃ māṃsavarmāsthiyantre samayamātrakam ||102 ||



iti pṛṣṭo bahgavatā nandastaṃ pratyabhāsata |

atyantānucitaḥ praśnaḥ ko'pi gauravayantritaḥ || 103 ||



kimetad bhagavān vakti keyaṃ śoke biḍambanā |

kkāpi vā viśvaguravo vineyāḥ prabhaviṣṇavah || 104 ||



ratiḥ sādhikasundaryāḥ parabhāgeṇa rajyate |

yāṃ dṛṣṭvā jagatāṃ jetā na ratiṃ smarati smaraḥ || 105 ||



jyotsnayeva na tatkāntyā nodate kumudākaraḥ |

guṇāntaraṃ na jānāti prasiddhiśaraṇo janaḥ || 106 ||



baddhaṃ tayā vadanasaurabhasārahāra -

mālokya puṣyanicayaṃ phithukeśapāśe |

manye vilāsagatilovanakānticauraiḥ

bhītyeva haṃsahariṇairvanamiva yātam || 107 ||



analpaiḥ saṃkalpairbahuvidhavikalpairanupamā

na sā sāraṅgākṣīlikhitumapi śakyā paricitaiḥ |

tulārohe ysyā vadanaparabhāge laghitaraḥ

sa nūnaṃ tārāṇāṃ gaganamadhirūḍhaḥ parivṛḍhaḥ || 108 ||



puṇyaprahvaṃ lalitalalitabhrūlatālāsyalīlā-

ramyaṃ tasyā yadi na vadanaṃ nandanaṃ labhyate tat |

pravrajyeyaṃ sukṛtamadhikaṃ kiṃkarī kiṃkarī me

kasmādetaṃ vrataparikaraṃ bhārabhūtaṃ vahāmi || 109 ||



iti nandavacaḥ śrutvā bhagavān rāganirbharam |

upakṣipya prabhāveta ta nināya surālayam || 110 ||



adarśayacca tatrāsya līlodyāne śatakratoḥ |

sudhāmanthasamudbhūtāḥ kāntāstridaśayoṣitaḥ || 111 ||



aruṇaiḥ kāntisaṃtānaiḥ pādapadmavanoditaiḥ |

anuyātā ivāmbhodhikūlavidrumakānanaiḥ || 112 ||



viśālalāsyasacivaiḥ pāṇibhirvijitāmbujaiḥ |

saṃsaktaiḥ sahajasyeva pārijātasya pallavaiḥ || 113 ||



kāntimādhuryalalitairmadanānandabāṇdhavaiḥ |

helānimīlitāmbhojavadanaiścandrasundaraiḥ || 114 ||



saṃmohanairjīvanaiśca kṛṣṇasārairvilokanaiḥ |

kālakūṭacchadaspṛṣṭairamṛtoghairivāvṛtāḥ || 115 ||



pūrṇayauvanalāvaṇyāḥ sahasaiva vilokya tāḥ |

nandaḥ sānandavadanaḥ svedasnāta ivābhavat || 116 ||



padmānanāsu vipulotpalalocanāsu

kundastimātu nibiḍastabakastanīṣu |

nandasya tāsu hṛdayaṃ yugapannipatya

dolāvilāsataralālitumavāpa || 117 ||



tataḥ provāca bahgavān nandaṃ tadgatamānasam |

āsāṃ saṃdarśane nanda prītyā te ramate matiḥ || 118 ||



āsāṃ tasyāśca sundaryā lāvaṇye kiyadantaram |

utkarṣaḥ parabhāgeṇa sphuṭamevābhibhāvyate || 119 ||



nirastasundarīrūpaṃ rūpamapsarasām yadi |

tadetā eva kālena kariṣyāmi tvadāśrayāḥ || 120 ||



ārogeṇaiva manasā brahmacaryaṃ prasannadhīḥ |

cara tāvattataste'haṃ dāsyāmyapsarasām gaṇam || 121 |



evaṃ bhagavato vākyānnandaḥ saṃjātaniścayaḥ |

tathetyuktvā vrate cetaścakre svargāṅganāśayā || 122 ||



mandādaraḥ svadāreṣu so'bhūt tatsaṃgamecchayā |

guṇapṇyatulāvṛtternāsti snehasya satyatā || 123 ||



aho cismṛtasaṃvāsapravāsapariśoṣitā |

puṃsāmābhyāsikī prītiḥ sahasānyatra dhāvati || 124 ||



kṣaṇayauvanaramyāṇi premāṇi praṇayavyayaiḥ |

na satyāni na nityāni na sukhāni śarīriṇām || 125 ||



tato bhagavatā nandaḥ kṣaṇānītaḥ svamāśramam |

tanniścayād brahmacaryaṃ cacāra niyatavrataḥ || 126 ||



sa cisasmāra sundaryāḥ kāntisaṃpadamanyadhīḥ |

kṣaṇapramuṣitā prītirmalaṃ yāti guṇeṣvapi || 127 ||



tataḥ kadācidvicaran nandaḥ kkāpi vyalokayat |

karālanarakāsaktāṃ dhīmān kumbhībhṛtāṃ bhuvam || 128 ||



tām vilokyaiva sākampaḥ kimetaditi duḥkhitaḥ |

sa papraccha tadāsaktān ghoranarakakāraṇam || 129 ||



te tamūcuriyaṃ bhūmistaptakumbhīśatācitā |

kalpitā rājaputrasya nandasyānandarāgiṇaḥ || 130 ||



mithyāvrataḥ sa nādyāpi bhajate vītarāgatām |

brahamcaryaṃ caratyeva svargastrūīsaṃgamāśayā || 131 ||



mithyāvratānām lubdhānāṃ rāgadveṣakaṣāyiṇām |

etāsu nityataptāsu kumbhīṣvevākṣayaḥ kṣayaḥ || 132 ||



iti nanda samākarṇya jātaromāñcakañcukah |

tatra cyutāmiva tanūṃ paścāttāpādamanyataḥ || 133 ||



samamyetya tyaktarāgasaṃvāsavāsanah svayam |

babhūvānuttarabrahmacaryaparyāptāṃyamaḥ || 134 ||



ghanamohakṣayāttasya vimukte saṃśaye tataḥ |

mahaḥ prasādamāpede śaradīvedadheḥ payaḥ || 135 ||



niṣkāmaḥ praśamaṃ prāptaḥ parāṃ niṣṭhāmupāgataḥ |

śuddhadhīḥ sa samabhyetya bhagavantamabhāṣata || 136 ||



nāpsarobhirna sundaryā bhagavan kṛtyamasti me |

etāḥ paryantavicchāyāḥ sapātā viṣayaśriyaḥ || 137 ||



yathā yatheyaṃ bhāvānāṃ bhāvyate niḥsvabhāvatā |

tathā tathā prqsīdanti nirāvaraṇavṛttayaḥ || 138 ||



iti dandasya vadataḥ prāptasyārtapadaṃ śanaiḥ |

bhagavān nirvāṇaśuddhāmasya siddhimamanyata || 139 ||



keṣāṃ kuśalamūlānāṃ nandenāsāditaṃ phalam |

iti bhikṣubhirabhyetya pṛṣṭhastānavadajjinaḥ || 140 ||



janmāntarārjitaiḥ puṇyaiḥ sukṛtābhyāsakāriṇā |

prāptāḥ kuśalamūlānāṃ nandena phalasaṃpadaḥ || 141 ||



vipulavimala vaṃśe janma smarapratimā tanuḥ

surajanasakhī lakṣī vṛttiḥ priyāḥ satataṃ satām |

praśamasalilasnātaṃ cetaḥ svabhāvagatirgatiḥ

kuśalakusumasyeyaṃ puṃsāṃ viśālaphalodgatiḥ || 142 ||



stūpe vipaśyinaḥ samyaksaṃbuddhasyādaraḥ purā |

nagaryāmaruṇāvatyāmaruṇena mahībhūhā || 143 ||



kriyamāṇo maṇimaye maitro nāma dvijanmajaḥ |

mahataḥ puṇyabhogasya bhāgī kārakatām yayau || 144 ||



tatpuṇyapraṇidhānena jāto gṝhapateḥ kule |

sa eva bhikṣusaṃghasya jantukāsnānasatrakṛt || 145 ||



sa puṇyaśīlaḥ pratyekabuddhopasthāyakah purā |

stūpaṃ cakre śobhamānaṃ mālabhivaraṇojjvalam || 146 ||



tatpuṇyapraṇidhānena kṛkeḥ kāśīpateḥ sutaḥ |

so'bhvaddyutimān nāma divyalakṣaṇalakṣitaḥ || 147 ||



kāśyapasyārhataḥ samyaksaṃbuddasyāntanirvṛtau |

saptaratnamaye stūpe kṛte kāśīmahībhujā || 148 ||



tatsūnurdhyutimān haumacchatramāropya bhāsvaram |

jātastatpraṇidhānena nandaḥ śākyamuke'dhunā || 149 ||



iti sukṛtasamutthaiḥ pūrvajanvakramāptaiḥ

kimapi vipulapuṇyaireva nandaḥ prapede |

kulamamalamudāraṃ rūmamagryaṃ ca bhogaṃ

śamaparicitamante satpadaṃ saugataṃ ca || 150 ||



kathayotveti bhagavān nandakalyāṇakāraṇam |

cakāra bhikṣusaṃghasya tāṃ tāṃ sukṛtadeśanām || 151 ||



iti kṣemendraviracitāyām bodhisattvāvadānakalpalatāyāṃ

sundarīnandāvadānaṃ nāma daśamaḥ pallavaḥ ||