• Home
• Canon Text
• 8 śrīguptāvadānam

8 śrīguptāvadānam

Technical Details

8 śrīguptāvadānam |



kṛtāpakāre'pi kṛpākulāni

krūre'pyalaṃ pallavakomalāni |

dveṣoṣmatapte'pyatiśītalāni

bhavanti cittāni sadāśayānām || 1 ||



purā surapurodāre pure rājagṛhābhidhe |

śrīguptākhyo gṝhapatirbabhūva dhandopamaḥ || 2 ||



dṛptaḥ sujanavidveṣī guṇeṣu viratādaraḥ |

sadā dhanamadādhmātaḥ sā jahāsa matiṃ satām ||3 ||



kaṭhine'ṣvativakreṣu śūnyeṣu mukhareṣu ca |

śankheṣviva khaleṣveva lakṣmīrdākṣiṇyamāśritā || 4 ||



taṃ kadācit gururjñātiputraḥ kṣapaṇakaḥ khalah |

mithaḥ svairakathāsaktaḥ puṇyadveṣādabhāṣata ||5 ||



ya eṣa gṛdhrakūṭākhye girau bhikṣuśatairvṛtaḥ |

sarvajñakīrtiḥ sugatāstrijagatpūjyatāṃ gataḥ || 6 ||



naivāsya pratibhāṃ kāṃcid bhavyāmupalabḥāmahe |

nītaḥ kiṃ tūnnatiṃ mūrkhairbahgavān bhagavāniti || 7 ||



avicāyava satataṃ paroktamanubhāṣate |

gatānugatikaḥ prāyaḥ prasiddhasaraṇau janaḥ || 8 ||



vratādiniyamastasya dambha eva vibhāvyate |

aśnāti maunakṛt matsyānekapādavrato bakaḥ || 9 ||



tasmaāt tasyopahāsāya kriyatām kāpi vajṇcanā |

māyāmohito dhūrtānām paro'pi parituṣyati || 10 ||



iti tenoktamākarṇya śrīguptaḥ karkmamohitaḥ |

patituṃ pāpaśvabhreṣu yuktyā tadupadiṣṭayā || 11 ||



pradīptakhadirāṅgārapūrṇāṃ gūḍhāṃ khadāṃ gṛhe |

kṛtvā saviṣamannaṃ ca yayau bhagavato'ntikam || 12 ||



tena mithyāvihitayā bhaktyā bhoktuṃ nimantritaḥ |

vijñāya sarvaṃ sarvaġyastatheti prāha sasmitaḥ ||13 ||



viṣagniyogakupitām patnīṃ saddharmavādinīm |

gṛhe babandha śrīguptaḥ śaṅkito mantraviśravāt || 14 ||



atha vijñātavṛtto'pi bhagavān svayamāyayau |

vandyamāno jagadvandyaiścaturmukhamukhaiḥ suraiḥ || 15 ||



śrīguptasya tamārambhaṃ vivedaṃ nagare janaḥ |

dikṣu dhāvati pāpānāṃ suguptamapi pātamak || 16 ||



tataḥ kaścit samabhyetya bhagavantamupāsakaḥ |

uvāca caraṇālīnāścintayan dahanaṃ viṣam || 17 ||



mithyānamrah priyālāpī guḍhavahniviṣānnadaḥ |

parihāryaḥ prayatnena bhagavanneṣa durjanah || 18 ||



kuryādanārye nāśvāsi kāryaṃ mādhuryamāśriye |

antracchedī vigīrṇo hi madhudigdhamukhaḥ kṣuraḥ || 19 ||



nānyastutiṃ guṇadveṣī sahate guṇinām khalaḥ |

santastuṣyanti yenaiva tenakupyanti durjanāḥ || 20 ||



tvayi lokatraye netraśatapatravikāśini |

asya rāhoḥ padaṃ prāpte nāndhībhavati kiṃ jagat || 21 ||



tacchrutvā bhagavānūce kiṃcit smitasitāṃśubhiḥ |

tannikārogratimiraṃ dūrāt pariharanniva || 22 ||



na mamāṅgaṃ spṛśatyagniḥ prabahvatyapi vā viṣam |

paradveṣadaridrāṇāṃ doṣo'pi nirupadravaḥ || 23 ||



aroṣaśītalaṃ cetaḥ siktaṃ yasya śamāmṛtaiḥ |

kiṃ karotyanalastasya viṣaṃ vā viṣayadviṣaḥ || 24 ||



viṣāyate tu pīyūṣaṃ kusumaṃ kuliśāyate |

dveṣadoṣottarasyaiva candanaṃ dahanāyate || 25 ||



tiryagyonigatasyāpi bodhisattvapadāsthiteḥ |

kāruṇyamaitrīyuktasya nāgnirdahati vigraham || 26 ||



purā kaliṅganṛpatiḥ khaṇḍadvīpābhidhāvanīm |

dadāha mṛgasaṃghānām saṃkṣepe sa samudyataḥ || 27 ||



kānane jvalite tasminnekastittiriśāvakaḥ |

maitryā bodhiṃ samālambya dahanapraśamaṃ vyaghāt || 28 ||



tasmādadrohamanasāṃ na bhayaṃ vidyate kkacit |

śrūyatāṃ sattvasaṃpatteridamanyacca kautukam || 29 ||



avṛṣṭiviṣame kāle muneḥ kasyacidāśrame |

manuṣyasadṛśālāpaḥ śaśakaḥ suciraṃ sthitaḥ || 30 ||



kṣutkṣāmaṃ munimālokya phalamūlaparikṣayāt |

uvācācalasaṃkalpastadvyathāvyathitāśayaḥ || 31 ||



bhagavan mam māṃsānāṃ saṃprati prāṇavartanam |

kriyatāṃ rakṣaṇīyaṃ tat śarīraṃ dharmasādhanam || 32 ||



ityuktvā dāvaśeṣāgnau vikṣepa śahskastanum |

vāryamāṇo'pi yatnena praṇayānmuninā muhyuḥ || 33 ||



tasya sattvaprabhāveṇa jvalajjvālākulo'nalaḥ |

prayayau majṇjuśiñjānabhramarāmbhojakhaṇḍatām || 34 ||



so'pi divyavapustatra kamale mahati sthitaḥ |

praṇamyamāno munirbhirvidadhe dharmadeśanām || 35 ||



iti bodhipravṛttānāṃ na vahnerna viṣādbhayam |

bhagavān kathayitveti śrīguptabhavanaṃ yayau || 36 ||



tatra tena praviśyaiva nikṣipte dakṣiṇe pade |

babhūvāgnikhadā majṇjuguñjadbhuṅgasarojinī || 37 ||



dṛṣṭvopaviṣṭaṃ śrīguptastaṃ sarorihavistare |

taddṛṣṭinaṣṭakāluṣyaḥ provācaḥ caraṇānataḥ || 38 ||



bhagavan mama pāpasya kṣantavyo'yaṃ vyatikramaḥ |

mohāndhapatite rucyaṃ kāruṇyamadhikaṃ satām || 39 ||



mamākalyāṇamitreṇa yo'yaṃ pāpapathe kṛtaḥ |

upadeśaḥ pramoheṇa tatra trāṇaṃ bhavatsmṛtiḥ || 40 ||



viṣadigdharasaṃ sarvaṃ bhojyaṃ te kalpitaṃ mayā |

aho mamaiva saṃkrāntaṃ paścāttapamayaṃ viṣam || 41 ||



iti bruvāṇaṃ śrīguptaṃ sāśrunetraṃ kṛpānidhiḥ |

dṛṣṭvā babhāṣe bhagavān bhikṣusaṃghasya śṛṇyavataḥ || 42 ||



viṣādaṃ mā kṛthāḥ sādho na vayaṃ vimukhāstvayi |

ghoravairaviṣatyāgānnaivāsmāstapate viṣam || 43 ||



vārāṇasyāṃ purā śrīmān brahmadatto'bhavannṛpaḥ |

abhūdanupamā nāṃ atasya prāṇasamāśrayā || 44 ||



suvarṇabhāsasaṃjñasya tatpurāntavanasthiteḥ |

ravaṃ mayūrarājasya sā kadācidathāśṛṇot || 45 ||



sā tasya śadamākarṇya veṇuvīṇāsvanopamam |

kimetaditi papraccha naranāthaṃ sakautukā || 46 ||



rājovāca vanānte'sminnasti ratnacchadaḥ śikhī |

madhuraṃyojanavyāpi yasyaitat kaṇṭhakūjitam || 47 ||



iti bruvāṇo nṛpatistatsaṃdarśanamarthitaḥ |

premaprayatnaiḥ preyasyā prahasan punarabravīt || 48 ||



darśanaṃ durlabhaṃ mugdhe tadvidhādbhutarūpiṇaḥ |

tathāpi yadi nirbandhaḥ kriyate tatpariśramaḥ || 49 ||



ityuktvā nṛpatistasya grahaṇe jālajīvinaḥ |

vyasṛjat tasya saṃrpāptyaiḥ vidhāya vadhasaṃvidam || 50 ||



vaśīkṛto na vettyeva mohādakṣiparīkṣayā |

anurāgāhataḥ strībhirakarmāṇyapi kāryate || 51 ||



prāptānām praṇayāt patnyāḥ prauḍhāyāḥ pādapīṭhatām |

īrṣyayaiva vinaśyanti dhīdhṛtismṛtikīrtayaḥ || 52 ||



tataḥ śākunikairnyastāḥ pāśabandhāḥ pade pade |

prabhāvādbarhirājasy vyaśīryantaiva saṃtatam || 53 ||



duḥkhitān yatnavaiphalyādbhītān nṛpatiśāsanāt |

mayūrarājastān dṛṣṭvā karuṇākulatāṃ yayau || 54 ||



so'cintayadaho bhītāḥ kṣmāpateḥ śrūraśāsanāt |

madbandhane visaṃvādādvarākā jālajīvinah || 55 ||



saṃcintya kṛpayā spaṣṭagbhirvisṛjya tān |

nṛpamānāyya tadveśma tenaiva sahito yayau || 56 ||



sa tatrāntaḥpure nityaṃ sabhāryeṇa mahībhujā |

pūjyamānaḥ paricayāduvāsa vihitādaraḥ || 57 ||



snigdhaśyāmāmbudatviṣā sunīlamaṇiveśmasu |

citrapatrarucā cakre saṃsaktendrāyudhabhamam || 58 ||



atha digjayayātrāyām kadācidvasudhādhipaḥ |

yayau tadupacārāya devīmādiśya sādaraḥ || 59



tataścānupamā devī patyau yāte pramādinī |

rūpayauvanadarpāndhā nāluloke kulasthitim || 60 ||



taruṇaṃ prekṣya rāgiṇyāstasyāḥ kandarpaviplave |

bhūyaḥ pralambhabhīteva lajjā dūrataraṃ yayau || 61 ||



malinaḥ kuṭilastīkṣṇaḥ karṇasaṃsparśanocitaḥ |

capalaścapalākṣīṇāṃ sudṛśāṃ sadṛśaḥ kramaḥ || 62 ||



vividhonmādakāriṇyaḥ saṃsāramakarākare |

caranti prāṇahāriṇyaḥ kālakūṭacchadāḥ striyaḥ || 63 ||



kusumāt sukumārasya krūrasya krakacādapi |

ko jānāti paricchedaṃ strīṇāṃ citrasya cetasaḥ || 64 ||



pracarantīṃ priyāṃ kaṇṭhe kṛtvā ye yānti nirvṛtim |

śītalāṃ vimalāṃ snigdhāṃ khaṅgadhārāṃ pibanti te || 65 ||



sācintayat sthitaḥ śalyamayamantaḥpure mama |

mayūrarājaḥ śīlajñaḥ puruṣālāpaveṣṭitaḥ || 66 ||



kathayiṣyatyavaśyaṃ me vṛttameṣa mahīpateḥ |

nindyaṃ karma kṛtaṃ tāvadadhunā kiṃ karomyaham || 67 ||



āstāṃ parijñātatattvo marmajño'sau vidagdhadhīḥ |

jātā me kṛtapāpāyāḥ śaṅkā niścetaneṣvapi || 68 ||



iti saṃcintya sā t asya saviṣaṃ bhojanaṃ dadau |

rāgamattāḥ khalāyattāḥ kiṃ kiṃ kurvanti na striyaḥ || 69 ||



tayopācaryamāṇasya saviṣaiḥ pānabhojanaiḥ |

vivṛddhā barhirājasya ruruce rucirā ruciḥ || 70 ||



svasthamālokya taṃ devī rahasyodbhedaśaṅkitā |

śanaiḥ śokāmayagrasyā trasyā tatyāja jīvitam || 71 ||



evaṃ tasya viṣeṇāpi naiva glānirajāyata |

mahatāṃ cittavaimalyaṃ nirviṣaṃ kurute viṣam || 72 ||



rāgo viṣaṃ viṣaṃ moho dveṣaśca viṣamaṃ viṣam |

buddho dharmastathā saṃghaḥ satyaṃ ca paramāmṛtam || 73 ||



ghoraṃ viṣaṃ sṛjati mohamahāmburāśiḥ

ghoraṃ viṣaṃ sṛjati rāgamahoragaśca |

ghoraṃ viṣaṃ sṛjati vairavanāvaniśca

janmakramo'sti viṣamasya viṣasya nānyaḥ || 74 ||



adharmakāmaḥ kṛtavānevamevānyajanmani |

śrīgupto'gnikhadāṃ sāpi tasyābhūtsahadharmiṇī || 75 ||



ityuktvā bhagavān samyakkaruṇālokanāmbubhiḥ |

cakāra vītarajasaṃ śrīguptaṃ śāsanonmukham || 76||



kalitakuśalaḥ śrīgupto'tha prakāśapadāptaye

śaraṇagamanānyeva trīṇi smaran vimalasmṛtiḥ |

jinaparicayāt puṇyaṃ lebhe satām hi volokanaṃ

bhavati mahate kalyāṇāya pramodasukhāya ca ||77 ||



śrīguptasya nikārakilbiṣajuṣo'pyajñānamohāpahaḥ

kṛtvāvaśyamanugraheṇa bhagavān kāruṇyapuṇyodyataḥ |

bhikṣūṇāṃ bhavasaṃkṣayāya vidadhe nirvairatāśāsanaṃ

yenaite na bhavanti bandhabhavane bhūyo bhavagranthaye || 78 ||



iti kṣemendraviracitāyāṃ bodhisattvāvadānakalpalatāyāṃ

śrīguptāvadānaṃ nāma aṣṭamaḥ pallavaḥ ||