• Home
• Canon Text
• 6 badaradvīpayātrāvadānam

6 badaradvīpayātrāvadānam

Technical Details

6 badaradvīpayātrāvadānam |



dānodyatānām pṛthuvīryabhājāṃ

śuddhātmanāṃ sattvamahodadhīnām |

aho mahotsāhavatām parārthe

bhavantyacintyāni samāhitāni || 1 ||



harmyārohaṇahelayā yadacalāḥ svabhraiḥ sahābhraṃlihā

yadvā goṣpadalīlayā jalabharakṣobhoddhatāh sindhavaḥ |

laṅghyante bhavanasthalīkalanayā ye cāṭavīnāṃ taṭā-

stadvīryasya mahātmanām vilasataḥ sattvorjitaṃ sphūrjitam ||2 ||



purā hi bhagavān buddhaḥ śrāvastyāṃ puravāsināṃ |

upadeśaprakāśena jahārājñānajaṃ tamaḥ || 3 ||



bhikṣusaṃghaiḥ parivṝtaḥ sa kadācidvaṇigjanaiḥ |

kṛtānuyātro magadhāt svayaṃ cārikayā yayau || 4 ||



mahārthasārthānugataṃ vrajantaṃ vanavartmanā |

taṃ dṛṣṭvā taskaragaṇaḥ sālāṭavyāmacintayat ||5 ||



eṣa prayātu bahgavān puraḥ sattvahite rataḥ |

paścāt sārthaṃ grahīṣyāmaḥ pūrṇaṃ draviṇarāśibhiḥ || 6 ||



bhagavānatha sarvajñasteṣāṃ jñātvā samīhitam |

kimetaditi tānūce nirvikārasmitānanaḥ || 7 ||



te tamūcuḥ parityajya krauryaṃ madhurayā girā |

tatprasādasmitālokairvinaṣṭatimirā iva || 8 ||



bhagavan jīvikāsmākaṃ nindyeyaṃ karmanirmitā |

na bhṛtirna kṛṣirnānyarakṣaṇaṃ na pratigrahah || 9 ||



sahajaṃ krauryamasmākaṃ deva tīkṣṇā hi karṇikā || 10 ||



tasmānna vṛttilopo naḥ kartumarhasi gamyatām |

yāte tu tvayi sārthasya vayaṃ sarvārthahāriṇah || 11 ||



iti teṣāṃ vacaḥ śrutvā karuṇāpūrṇamānasaḥ |

dolālolāyitamatirbabhūva bahgavān kṣaṇam || 12 ||



tataḥ sārthadhanaṃ sarvaṃ parisaṃkhyāya tatsamam |

sa dadau cauracakrāya tatkṣaṇāptanidhānataḥ || 13 ||



tadvidhena krameṇaiva punaḥ pathi gatāgataiḥ |

ṣaṭkṛtvaḥ pradadau tebhyaḥ so'rthaṃ sārthasya muktaye || 14 ||



punaścopagate tasmin vartmanā tena sānuge |

babhūva buddhiścaorāṇāṃ tadbhojananimantraṇe || 15 ||



dṛśā diśanti vaimalyaṃ śubhaṃ saṃbhāṣaṇena ca |

vrajanti saṃgamābhyāsaiḥ santaḥ sanmārgasetutām || 16 ||



tatrātiryagdṛśā sarvaṃ sarvākuśalasaṃkṣayāt |

teṣāṃ samāhitaṃ śuddhaṃ vidadhe bhagavān jinah || 17 ||



yeṣāṃ saṃgrahavastūni vatvāri niyatātmanām |

arthacaryā samānārthabḥāvastyāgaḥ priyaṃ vacaḥ || 18 ||



yeṣāṃ brahmavihārāśca catvāraḥ sattvaśālinām |

karuṇā muditopekṣā maitrī ceti parigrahaḥ || 19 ||



yeṣāṃ kuśalamūlāni saktāni trīṇi cetasi |

alobhaścāparidveṣo'pyamohaśca mahātmanām || 20 ||



dānaśīlakṣamāvīryadhyānaprajñājuṣāṃ sadā |

upāyapraṇidhijñānabalairāśritacetasām || 21 ||



paritrāṇaikavīrāṇāṃ sadaivādvayavādinām |

vidyātrayapradīptānāṃ caturvaimalyaśālinām || 22 ||



pañcaskandhavumiktānāṃ ṣaḍayatanabhedinām |

saptabodhyaṅgayuktānāmaryāṣṭāṅgopadeśinām || 23 ||



navasaṃyogahīnānām teṣāṃ daśabalātmanām |

kiṃ vastvaviditaṃ loke jinānāṃ janaceṣṭitam || 24 ||



tatasteṣvatikāruṇyāccaraṇālīnamūrdhasu |

tathetyuvāca bhagavāṃstadbhojyopanimantraṇe || 25 ||



taistatsaṃdarśanakṣīṇakilbiṣaiḥ samamarpitam |

bhikṣusṃghairvṛto bhojyaṃ vidhivat sarvamādade || 26 ||



tatastatpraṇidhānena jñānālokaśalākayā |

te samunmīlitadṛśaḥ prakāśaṃ dadṛśuḥ padam || 27 ||



te sadyastīvravairāgyaparipakkāḥ prasādinaḥ |

pravrajyāyogamāsajya jagmurjagati pūjyatām || 28 ||



tatteṣāṃ kuśalaṃ dṛṣṭvā sahasopanataṃ puraḥ |

babhāṣe bhagavān pṛṣṭaḥ kimetaditi bhikṣubhiḥ || 29 ||



etairyamāyaṃ saṃbandhaḥ sārtharakṣaṇaniṣkrayaiḥ |

dvīpayātrāgatasyāsīdanyasminnapi janmani || 30 ||



asti vistīrṇamārgasya svargavargāvadhirvidheḥ |

purī vārāṇasī nāma kauśalotkarṣaharṣabhūḥ || 31 ||



yasyāmamalakallolavāhinī suravāhinī |

sadā dayeva hṛdayaṃ prasādayati dehinām || 32 ||



ahiṃseva satām sevyā vidyeva viduṣāṃ matā |

kṣameva sarvabhūtānāṃ yā viśrambhasukhasthitiḥ || 33 ||



brahmakalpe nṛpe tasyā vikasatkamalāśraye |

brahmadattābhidhe lokaṃ trailokyamiva rakṣati || 34 ||



priyasenābhidhāno'bhūt tatra vaiśravaṇopamaḥ |

sārthavāho'rthasārthānām sthānamabdhirivāmbhasāṃ || 35 ||



tasyāsīt supriyo nāma saujanyanilayaḥ sutaḥ |

prayayau yaṃ samāśritya guṇasārthaḥ kṛtārthatām ||36 ||



dānaśīlakṣamāvīryadhyānaprajñāsamanvitah |

dhātrā vilobhavāyaiva yaḥ kṛtaḥ sukṛtaśriyaḥ || 37 ||



taṃ sarvavidyāḥ viśadāḥ kalāśca vipulāśayam |

viviśuḥ sarasodārā mahodadhimivāpagāḥ || 38 ||



guṇālaṃkṛtacāritraṃ lakṣaṇālaṃkṛtākṛtim |

puruṣottamalubdheva yaṃ ślāghyaṃ śrīraśiśriyat || 39 ||



kāḻena sukṛtakrītaṃ pitari tridivaṃ gate |

cakre skandhataṭe tasya vyavahārabharaḥ sthitim || 40 ||



so'cintayadiyaṃ lakṣmīrvipulātmakramāgatā |

tathāpi manye paryāptā na sarvārthimanorathe || 41 ||



kiṃ tayā sumahatyāpi śriyā satpuruṣasthayā |

pūrvāgatārthiubhukteva yā śeṣārthiṣu niṣphalā || 42 ||



ratnākarasya vaipulyaṃ niṣphalaṃ vedhasā kṛtam |

adyāpi pūrito yena naiko'pyarthī sa vāḍavaḥ || 43 ||



athavā pṛthusaṃkalpaḥ kenārthī paripūryate |

jagāmābdhiragastyasya culukācamanīyatām || 44 ||



kiṃ karomyatitāpo'yaṃ śrīrekā bahavi'rthinaḥ |

na tadāsādyate vittaṃ yat sarvārthibharakṣamam || 45 ||



pañca ṣaṭ pūritā evaṃ nānye śrīkaustukādibhiḥ |

itivādyāpi tapto'ntarjvaladaurvānalo'mbudhiḥ || 46 ||



tasmāt karomi yatnena niṃsaṃkhyadraviṇārjanam |

na sahe duḥkhaniḥśvāsaṃ vimukhasya mukhe'rthinaḥ || 47 ||



iti saṃcintya sa ciraṃ sārthena mahatā vṛtaḥ |

ratnadvīpapuraṃ gatvā vidadhe ratnasaṃgraham || 48 ||



tataḥ pratīpamāyāntaṃ kṛtārthaṃ taṃ vanecarāḥ |

sārthārtharaṇonmuktā dadṛśurdasyavaḥ pathi || 49 ||



sārthārthaharaṇe dṛṣṭvā sa teṣāṃ sāhasodyamam |

nijasaravsvadānena saṃrarakṣānuyānim || 50 ||



punaḥ krameṇa tenaiva ratnadvīpagatāgatiḥ |

sārthatrāṇāya caurāṇāṃ ṣaṭkṛtvaḥ pradadau dhanam || 51 ||



tathaiva tvāṃ puṇyavipanvānisaṃprāptastathaiva tān (?) |

dadarśa caurān sārthārthaharaṇe adhikādarān || 52 ||



so'cintayadaho vittairmahadbhiḥ paripūritāḥ |

mayaite na nivartante parārthaharaṇodyamāt || 53 ||



jagat saṃpūrayāmyarthairiyuktvāpi mayāsakṛt |

aho nu dasyavo naite varākāḥ paripūritāḥ || 54 ||



acitotsāhahīnasya vyāhatottaravādinaḥ |

vikatthanapratijñasya dhiṅme janma kujanmanaḥ || 55 ||



iti cintayatastasya taptasyānuśayāgninā |

vijane prayayau rātriḥ saṃvatsaraśatopamā || 56 ||



taṃ śokapaṅkasaṃmagnaṃ gajendramiva niścalam |

dīrghocchvāsaṃ maheśākhyā svapne provāca devatā || 57 ||



sumate mā kṛthāḥ śokaṃ śarīrocchoṣaṇaṃ vṛthā |

satsaṃkalpābhirūḍhasya bhaviṣyati tavepsitam ||58 ||



na tadasti jagatyasmin svapnasaṃkalpadurlabham |

yanna sidhyati yatnena dhīrāṇāṃ vyavasāyinām || 59 ||



sā kāpyanupamā śaktirekasyāpi dvijanmanaḥ |

yadājñāspanditenaiva vindhyaḥ kṣmāsamatām yayau || 60 ||



viṣamaṃ samatāṃ yāti dūramāyāti cāntikam |

salilaṃ sthalatāmeti kāryakāle mahātmanām || 61 ||



parārtho'yaṃ tavārambhaḥ phalatyeva na saṃśayam |

na bhavanti visaṃvādasaṃdigdhāḥ sattvavṛttayaḥ || 62 ||



ratnāni badaradvīpe santi tridaśasevite |

yeṣāmekaprabhāvo'pi trijagatpūraṇakṣamaḥ || 63 ||



martyabhūmimatikramya sā hi bhūmirmahīyasī |

āsādyate puṇyamayī nāsattvairnākṛtātmabhiḥ || 64 ||



viṣādastyajyatām putra sthirā buddhirvidhīyatām |

badaradvīpayātrāyāmutsāhaḥ parigṛhyatām || 65 ||



śrūyatāmeṣa tatprāptyau diṅbhātrānukramakramaḥ |

sphītasattvaprabhāvastvaṃ saṃsārottaraṇakṣamah || 66 ||



asti paścimadigbhāge samullaṅghya mahīyasām |

śatāni sapta dvīpānāṃ tathā sapta mahācalān || 67 ||



saptāpatāścānulomapratilomābhidho'mbudhiḥ |

anukūlānilairyasmin pāramāpnoti puṇyavān || 68 ||



tatastattulyanāmādrirvātaistimiramihakṛt |

yatrākṣṇordiśati svāsthyamamoghākhyā mahauṣadhiḥ || 69 ||



athāvartābhidho'mbhodhirvairambhairyatra vāyubhiḥ |

majjanonmajjanairjantuḥ saptāvarteṣu tāryate || 70 ||



āvartākhyastataḥ śailaḥ śaṅkhanābho niśācarah |

ghoraḥ prāṇaharo yatra tridaśatrāsakṛt sthitaḥ || 71 ||



kṛṣṇasarpāvṛtā yatra śankhanābhirmahauṣadhiḥ |

trāyate puṇyasaṃpannaṃ netre śirasi cārpitā || 72 ||



atha nīlodanāmābdhī raktākṣo yatra rākṣasaḥ |

makaryābhibhūtāṃ buddhavidyāvidvān vaśe (?) || 73 ||



atha nīlodanāmādrirnīlagrīvaḥ kṣapācaraḥ |

pratīptanetro yatrāste rakṣasāṃ pañcabhiḥ śataiḥ || 74 ||



tatraoṣadhimamoghākhyām rakṣatyāśīviṣaḥ sadā |

dṛṣṭiniḥ śvāsasaṃsparśadaṃṣṭrotsṛjadviṣānalaḥ || 75 ||



upoṣadhavratavatā maitreṇa karuṇātmanā |

labhyate sā samutsārya kṛṣṇasarpaṃ mahauṣadhiḥ || 76||



taṃ rakṣaḥśakaṭaṃ śailaṃ niṣphalaślakṣṇakandaram |

tāmajjane śikhāyāṃ ca kṛtvā tarati puṇyavān || 77 ||



atha vairambhanāmādriḥ pāre yasyottarā taṭe |

ghorā tāmrāṭavī nāma mahāśālavanāntarā || 78 ||



mahānajagarastatra tāmrākṣo nāma duḥsahaḥ |

āsta yasyogragandhena vāyunaiva na jīvyate || 79 ||



ṣaṇmāsān svapato yasya lālā vyāpnoti yojanam |

kṣutsaṃtaptasya ṣaṇmāsānalpībhavati jāgrataḥ || 80 ||



veṇugulmaśilābaddhāṃ guhāmutpāṭya medinīm |

prāyauṣadhīṃ divārātraṃ jvalantīmañjanocitām || 81 ||



tasmādajagarād ghorādanyato vā mahaujasaḥ |

avairākhyāṃ buddhavidyāṃ japato na bhavedbhayam || 82 ||



tataḥ sapta mahāśailā veṇukaṇṭakasaṃkaṭāḥ |

tāmrapaṭāṅkapādena tīryante vīryaśālinā || 83 ||



tataśca śālmalīvanaṃ sapta kṣārataraṅgiṇīḥ |

uttīryāsādyate prāṅgustriśaṅkurnāma parvataḥ || 84 ||



tatra triśaṅkavo nāma kaṇṭakā vajrabhedinaḥ |

pādayorna viśantyeva tāmrapaṭṭāvanaddhayoḥ || 85 ||



triśankurnāma taṭinī tatrāyaḥśaṅkuparvataḥ |

upaskīlanadī tatra tato dvidhā dvidhā sarit || 86 ||



athāṣṭādaśavakrākhyaḥ parvato niravagrahaḥ |

tattulyasaṃjñātha nadī ślakṣṇi nāma giristataḥ || 87 ||



athādridhūmanetrākhyo dhūmanirdigdhadiktaṭaḥ |

dṛṣṭisparśaviṣairvyāptaḥ krūrāśīviṣamaṇḍalaiḥ || 88 ||



tanmūrdhni palvalasyāntaḥ śilābaddhā mahāguhā |

jyotīraso maṇiryasyāṃ jīvanī ca mahauṣadhiḥ || 89 ||



bhittvā guhām tadabhyakraśiraḥpādakarodaraḥ |

vajra-mantrabalopetaḥ krūrasarpairna bādhyate || 90 ||



athograsattvasaṃkīrṇāḥ saptāśīviṣaparvatāḥ |

nadyaśca tadvidhā yāsāmapāravārisaṃpadaḥ || 91 ||



etaduttīrya nikhilaṃ puṇyaiḥ parahitodyataḥ |

ārohati sudhāśailaṃ śṛṅgairāliṅgitāmbaram || 92 ||



tatastasyāpare pārśve kalpavṛkṣopaśobhitam |

puraṃ rohitakaṃ nāma dṛśyate svargasaṃnibham || 93 ||



asti tatra magho nāma maghavāniva viśrutaḥ |

sārthavāho mahāsattvaḥ sarvasattvahite rataḥ || 94 ||



badaradvīpayātrāyāmudyatasyānavadyadhīḥ |

mārgopadeśaṃ deśajñaḥ sa te sarvaṃ kariṣyati || 95 ||



ityuktvotsāhya bahuśaḥ śubhadrairiva supriyam |

vacobhiricitairdevī sahasāntaradhīyata || 96 ||



prabuddhaḥ supriyaḥ sarvaṃ tattatheti vicintayan |

pratasthe sattvamāruhya nijotsāhapuraḥsaraḥ || 97 ||



sa vrajan vinitāyāsastena nirdiṣṭavartmanā |

puṇyairdvādaśabhirvarṣaiḥ prāpa rphitakaṃ puram || 98 ||



atrāntare karmayogāt tatra sārthapatirmaghaḥ |

vyādhinā duścikitsyena babhūvāsvasthavigrahaḥ || 99 ||



alabdhāntaḥpraveśo'tha gṛhe rājagṛhopame |

tasya vyalambata dvāraṃ supriyaḥ kāryasiddhaye || 100 ||



tato vaidyāpadeśena sa praveśamavāptavān |

upayogakathāprajñā na kasyādarabhūmayaḥ || 101 ||



āyurvedavidhānajñaḥ sa tasyāriṣṭalakṣaṇaiḥ |

ṣaṇmāsaśeṣamevāyurjñātvā cintāntaro'bhavat || 102 ||



tasya priyahitaprāyo bhaiṣajyaparicaryayā |

atyalpenaiva kālena supriyaḥ priyatāṃ yayau || 103 ||



bhaiṣajyayuktistatprītyā tasya vallabhatāṃ yayau |

priyopanītaṃ yatkiṃ cit tatsarvaṃ manasaḥ priyam || 104 ||



priyopacāraistasyātha vyādhirādrāvamāyayau |

ādhiḥ śāmyati satsaṅgāt tao vyādhirviśīryate || 105 ||



tataḥ saṃjātaviśrambhaḥ supriyaḥ praṇayānmagham |

cakre viditavṛttāntaṃ paścānnijakathākṣaṇe || 106 ||



badaradvīpayātrāyāṃ tasyotsāhaṃ mahātmanah |

parārthe niścalaṃ jñātvā tamūce vismayānmaghaḥ || 107 ||



aho batāsmin saṃsāre viḥsāre sārarūpiṇaḥ |

jāyante maṇayaḥ kecit paracintāparāyaṇāḥ || 108 ||



navaṃ vayaḥ priyā mūrtiḥ parārthapravaṇaṃ manaḥ |

puṇyocitastathaivāyaṃ sthāne guṇasamāgamaḥ || 109 ||



iyatīṃ bhūmimullaṅghya parārthe tvamupāgataḥ |

karomi tava sāhāyyaṃ kiṃ tvahaṃ bhṛśamāturaḥ || 110 ||



nibaddhāvadhayaḥ prāṇāḥ prayāntyeva śarīriṇām |

te vrajantu mamānte'pi tvatsamāhitahetutām || 111 ||



evameva vyayo yastu vyayaḥ sa parigaṇyate |

parārthe jīvitasyāpi vyayo lābhaśataiḥ samaḥ || 112 ||



na mayā badaradvīpaṃ dṛṣṭaṃ kiṃ tu śrutaṃ mayā |

mahābdhau diskamuddeśaṃ taistairjānāmi lakṣaṇaiḥ || 113 ||



ityuktvā bhūpatiṃ suhṛdbandhuvākye'pyanādaraḥ |

sa maṅgalapravahaṇaṃ supriyeṇa sahādadhe || 114 ||



tataḥ pravahaṇārūḍhau tau yojanśatānyapi |

pavanasyānulomyena jagmaturvipulāśayau || 115 ||



sthāne sthāne jalaṃ dṛṣṭvā nānāvarṇaṃ mahodadheḥ |

kimetaditi prapaccha supriyaḥ kautukānmagham || 116 ||



jale lohācalāḥ pañca santyasya payasāṃ nidheḥ |

tāmrarūpyamayāścānye hemaratnamayāḥ pare || 117 ||



teṣāṃ chāyāviśeṣeṇa nānāvarṇaḥ pade pade |

dṛśyate'bdhirayaṃ dīptaḥ prāptāntarodgatauṣadhiḥ || 118 ||



ityuktvā vyādhinākrāntaḥ prāptakālāvadhirmaghaḥ |

prāṇānmumoca satkītivinyastasthirajīvitaḥ || 119 ||



vajralepādapi dṛḍhaṃ yathā sattvaṃ mahātmanām |

tathā yadi bhadedāyuḥ kimasādhyaṃ bhave bahvet || 120 ||



kūlāvāptapravahaṇah supriyastadviyogajam |

śucaṃ saṃstabhya vidadhe suhṝdastanusatkriyām || 121 ||



etadevonnataṃ lakṣma sattvotsāhamahātmanām |

vicchinnālambane kāle yatkartavyadṛḍhaṃ manaḥ || 122 ||



punaḥ pravahaṇārūḍhaḥ sa samuttīrya vāridhim |

ratnaparvatapārśvena viveśa vikaṭāṭavīm || 123 ||



na viyogairna codvegairnābhiyogairdviṣāmapi |

na rogaiḥ kleśabhogairvā hīyate mahatāṃ matiḥ || 124 ||



sa tatrākrāntagaganaṃ niruddhāśeṣadiktaṭam |

durārohaṃ dadarśāgre mūrtaṃ vighnamivācalam || 125 ||



upāyahīnastaṃ dṛṣṭvā giriṃ mūrkhamivoddhatam |

adhaḥ pallavaśayyāyām suptaḥ so'cintayat kṣasṇam || 126 ||



aho bata kiyān kālaḥ prayātaḥ prasthitasya me |

badaradvīpanāmāpi na nāma śrūyate kkacit || 127 ||



vyavasāyasahāyo me yo'bhūtpuṇyapaṇaiḥ param |

bhagnaplava ivākāle so'pi karmormiviplavaiḥ || 128 ||



naṣṭopāye'pyupāye'smin vyavasāyānmahīyasaḥ |

na nāma vinivarte'haṃ siddhirnidhanamastu vā || 129 ||



tadekaṃ janmayātrāsu pūjyaṃ janma jagatrtraye |

yasmin paropakrārāya jāyate jīvitavyayaḥ || 130 ||



iti cintākulaṃ tatra taṃ jñātvā satyasāgaram |

nīlo nāma samabhyetya yakṣaḥ prāhācalāśrayaḥ ||131 ||



pūrveṇa yojanaṃ gatvā trīṇi śṛṅgāṇi bhūbhṛtaḥ |

vetrasopānaniśreṇyā samāruhyātha gamyatām || 132 ||



iti yakṣopadeśena sa vilaṅghya mahācalam |

dadarśāgre samuttuṅgaśrṛṅgaṃ sphaṭīkabhūdharam || 133 ||



tasminnekaśilāślakṣṇe durgame pakṣiṇāmapi |

muhūrtamabhavattasya nirvyāpāro manorathaḥ || 134 ||



abhyunnatam nirālambaṃ svasaṃkalpamivācalam |

sa taṃ vicārya suciraṃ citranyasta ivābhavat || 135 ||



atha candraprabho nāma yakṣaḥ śailaguhāśayaḥ |

abhyetyaḥ sattvasaṃpannaṃ tamabhāṣaṭa vusmitaḥ || 136 ||



krośamātramito gatvā pūrveṇāpūrvavibhramam |

dṛśyate candanavanaṃ bālānilacalallatam || 137 ||



tatrāste prasarā nāma guhālīnā mahauṣadhiḥ |

labhyate deharakṣāyai samuttolya mahāśilām || 138 ||



tatprabhāvakṛtālokaṃ sopānaiḥ sphaṭikācalam |

sahasaiva samāruhya gamyatāmīpsitāptaye ||139 ||



tatkṣaṇāt kṛtakārtheva sā prayāti mahāuṣadhiḥ |

na khedastatkṛte kāryastaḍillolāḥ priyāptayaḥ || 140 ||



iti yakṣopadiṣṭena vidhānena sa bhūdharam |

samutkramya dadarśāgre nagaraṃ hemamandiram || 141 ||



merūkūṭairivākīrṇaṃ prakāśairiva nirmitam |

savāścaryairiva kṛtaṃ tad dṛṣṭvā vismito'bhavat || 142 ||



mahāhemakapāṭābhyāṃ ruddhaddhāram vilokya tat |

nirjanaṃ vārasaṃcāraṃ vanānte niṣasāda saḥ || 143 ||



atrāntare dinasyānte vyomānantapathādhvagaḥ |

avāpāstācalopāntaṃ pariśrānta ivāṃśumān || 144 ||



astaṃ gate sahasrāṃśau rajanīramaṇī śanaiḥ |

tārāpatimivānveṣṭuṃ prasasārābhisārikā || 145 ||



atha prakāśavibahvaiḥ sarvāśāpūraṇonmukhaḥ |

bodhisattva iva svacchaḥ sudhādīdhitirudyayau || 146 ||



sphīṭā tamaḥ samūhasya niḥśeṣapraśamocitā |

mānasollāsinī jyotsnā sattvavṛttirivābabhau || 147 ||



tamomohaṃ jahārendurdiśāṃ dinaviyogajam |

paropakāre hi paro dūrāroho mahātmanām || 148 ||



supriyaścandrakiraṇaiḥ pūryamāṇatanuḥ kṣaṇam |

nidrāṃ kāryasamudrormikṣobhamudrāmavāptavān || 149 ||



kṣapāyām kṣīyamāṇāyāṃ guṇadākṣiṇyasādarā |

jagāda devatā svapne maheśākhyā sametya tam || 150 ||



aho bata mahāsattva sattattvābhiniveśinā |

parārthe vipulaḥ kleśaḥ kṛtaḥ sukṛtinā tvayā || 151 ||



alpaśeṣe prayāse'smin nodvegaṃ kartumarhasi |

aparyuṣitasattvānāṃ svādhīnāḥ sarvasiddhayaḥ || 152 ||



haimaṃ yadetannagaraṃ trīṇi cānyānyataḥ param |

santi ratnapurāṇyatra vicitrāṇyuttarottaram || 153 ||



tebhyo niryānti kinnaryaścataśro'ṣṭau ca ṣoḍaśa |

dvātriṃśacca krameṇaiva tvayā dvāri vighaṭṭite || 154 ||



jitendriyasya bhavatastatpramādamavedinaḥ |

kimanyadacireṇaiv vāñchitāptirbhaviṣyati || 155 ||



ityuktaḥ sādaraṃ devyā pratibuddho'tha supriyaḥ |

jaghāna nagaradvāraṃ triḥ samabhyetya pāṇinā || 156 ||



tataścatasraḥ k innaryo niryayustaralekṣaṇāḥ |

āścaryatarumañjarya iva līlānilākulāḥ || 157 ||



mānasillāsakāriṇyo nayanāmṛtavṛṣṭayaḥ |

vadanendusamudyotairdivāpi kṛtacandrikāḥ || 158 ||



tāḥ saṃpūjya smarodāraṃ supriyaṃ priyadarśanāḥ |

tasyābhilāṣapraṇayairātithyamiva cakrire || 159 ||



candrakāntasamāsīnaṃ kṛtāsanaparigrahāḥ |

jīvanauṣadhayo jātāḥ smarasyeva savigrahāḥ || 160 ||



tāstamūcuḥ samunmīladvilāsahasitatviṣaḥ |

dadatya iva karpūraṃ premopāyanatām puraḥ || 161 ||



aho dhanyā vayaṃ yāsāṃ sadguṇālakṛtākṛtiḥ |

svayaemvābhigamyo'pi bhavānadyāgato gṛham || 162 ||



vidheṣaḥ kasya pīyūṣe candane kasya vāruciḥ |

indau mandādaraḥ ko vā sādhuḥ kasya na saṃmataḥ || 163 ||



strīṇāṃ yadyapi saubhāgyabhaṅgāya praṇayaḥ svayam |

kramastvaddarśanenaiva tathāpi mukharīkṛtāḥ || 164 ||



idaṃ ca kinnarapuraṃ vayaṃ ca praṇayārpitāḥ |

ratnaṃ ca saubhāṣaṇikaṃ sādho svādhīnameva te || 165 ||



iti tāsāṃ vacaḥ śrutvā supriyaḥ praṇayocitam |

uvāca sattvadhavalāṃ diśan daśanacandrikām || 166 ||



bahumānāspadaṃ kasya nedaṃ saṃbhāṣaṇāmṛtam |

ātmano'pyādarasthānam bahvatībhiḥ kṛtādaraḥ || 167 ||



ślāghyaṃ darśanamevedaṃ tatrāpyayamanugrahaḥ |

muktālatāstāpaharāḥ kiṃ punaścandanokṣitāḥ || 168 ||



evaṃ vidhānām svacchānāmaindavīnāmiva tviṣām |

ākṛtīnām samucitā rucirā lokavṛttayaḥ || 169 ||



aucityacārucaritaṃ prasādaviśadaṃ manah |

vātsalyapeśalā vāṇī na kasyādarabhūmayaḥ || 170 ||



gṛhīto'smābhirācāraḥ pūjāparikarocitah |

ātmārpaṇaṃ kulāntaṃ vaḥ parāyattā hi yoṣitaḥ || 171 ||



kanyābhāvādapakrāntā yūyaṃ paraparigrahāḥ |

viśrambheṇa bhagiṇyo me jananyaḥ snehagauravāt || 172 ||



paravittaṃ viṣaṃ yeṣāṃ jananyaścānyayoṣitaḥ |

parahiṃsātmahiṃsauva pakṣāsteṣāṃ niratyayāḥ || 173 ||



pauśunyāsatyapāruṣyabhinnavādojjhitaṃ vacaḥ |

sadaiva vadane yeṣām teṣām sarvāśiṣā diśaḥ || 174 ||



abhidhyārahitaṃ ceto vyāpāraparivarjitam |

mithyādṛṣṭivihīnaṃ ca yeṣāṃ te satpathaṃ śritāḥ || 175 ||



daśākuśalamārgebhyo nirgatānāṃ nisargataḥ |

ete kuśalavargasya mārgāḥ svarge nirargalāḥ || 176 ||



dhīreva dhanyaṃ dhanamunnatānāṃ

vidyaiva cakṣurvijitendriyāṇām |

dayaiva puṇyaṃ puruṣottamānāṃ

ātmaiva tīrthaṃ śucimānasānām || 177 ||



evaṃvidho'yaṃ guṇasaṃniveśaḥ

śīlena vaimalyamupaiti puṃsām |

sadratnamuktānikarātiritaṃ

śīlaṃ satāmābharaṇaṃ vadanti || 178 ||



ityuktamākarṇya guṇānurūpaṃ

sattvārthinā tena jitendriyeṇa |

tuṣṭāstamūcurbhuvi candralokaṃ

tāḥ kautukāyaivamukhaiḥ sṛjantyaḥ || 179 ||



maṇerivānarghaguṇojjvalasya

dṛṣṭaiva sādhorucitā ruciste |

yayaiva maulau hṛdaye śrutau ca

sadbhiḥ sadaivābharaṇīkṛto'si || 180 ||



maṇirmahārhaḥ prathitaprabhāvaḥ

pragṛhyatāmātmasamastvayāyam |

dhvajārpito varṣati yojanānāṃ

sahasramevārthisamīhitaṃ yaḥ || 181 ||



uktveti ratnapravaraṃ taruṇya-

stasmei dadurmūrtamiva prasādam |

ādāya taṃ ca praṇayopacāraṃ

so'pi dvitīyaṃ puramāpa raupyam || 182 ||



tatrādarāttaddviguṇābhireva

sa pūjitah kinnarakāminībhiḥ |

krameṇa tenaiva viśuddhabuddhiḥ -

rlebhe maṇiṃ taddviguṇaprabhāvam || 183 ||



* * * *

* * * *

* * * *

* * * * || 184 ||



prāptaśca taṃ ratnamayaṃ caturthaṃ

puraṃ tataḥ sarvapurādhikaści |

so'bhyarthitastaddviguṇābhiragre

guṇādhikaḥ kinnarasundarībhiḥ || 185 ||



tathaiva saddharmakathāprasaṅgai -

stātoṣitāstena susaṃyatena |

utphullanītpaladāmadīrgha-

kaṭākṣavikṣiptakarāstamūcuḥ || 186 ||



bhrātāsti naḥ kinnararājavaṃśa-

ratnākarendurbadarābhidhānaḥ |

tasyāspadaṃ dvīpamidaṃ mahārhaṃ

svanāmacihnaṃ prathitaṃ samṛddhyā || 187 ||



ratnaṃ cedam niyamavidhinā poṣadhākhyavratena

nyastaṃ bhāsvatkiraṇanikaraṃ puṇyabhājāṃ prayatnāt

varṣatyeva sthiraparahitavyāptaye gṛhyatām tat || 188 ||



ityutpāṭyāmarataruphalaṃ sādaraṃ sundarībhiḥ

premoddāmapraṇayasubhagaṃ dattamāsādya ratnam |

bālāhākhyaṃ vijitapavanaṃ taṃ prakṛṣṭaṃ turaṅgaṃ

so'pyāruhya svanagaramagāllabdhamārgopadeśaḥ || 189 ||



tasmin kāle vipulakuśalaiḥ svargamārgaṃ prayāte

vārāṇasyāṃ viśadayaśasi kṣmāpatau brahmadatte |

śrīmān sarvapraṇayiphaladaḥ supriyaḥ pauramukhyai-

rlokatrāṇe vinihitamatirdharmarājye'bhiṣiktaḥ || 190 ||



tataḥ śiraḥsnānavidhikrameṇa

tatpañcadaśyām dhvajamūrdhni ratnam |

sa poṣadhopoṣita eva dhṛtvā

cakāra viśvaṃ paripūrṇakāmam || 191 ||



kṛtvā yātrām parahitaphalāṃ vatsarāṇām śatena

sthitvā rājye mahati nikhilaṃ pūrayitvā ca lokam |

putraṃ dhitvā narapatipade prāpya sarvopaśāntiṃ

tattvajño'sau kimapi paramaṃ brahmabhāvaṃ jagāma || 192 ||



syurete dasyavaḥ sarve pūrvaṃ ye pūritā mayā |

ratnadrīpābhigamane tasmin supriyajanmani || 193 ||



iti śāstā svavṛttāntakathayā vidadhe vibhuḥ |

dānavīryopadeśena bhikṣūṇāmanuśāsanam || 194 ||



iti kṣemendraviracitāyāṃ bodhisattvāvadānakalpalatāyāṃ

badaradvīpayātrāvadānaṃ nāma ṣaṣṭhaḥ pallavaḥ ||