• Home
• Canon Text
• Romanized
• sūtrapiṭaka
• mahāyānasūtra
• Kamalākarasarvatathāgatastavaparivartaḥ

Kamalākarasarvatathāgatastavaparivartaḥ

Technical Details

|| kamalākarasarvatathāgatastavaparivartaḥ ||



atha khalu bhagavāṃstāṃ bodhisattvasamuccayāṃ kuladevatāmetadavocat | tena khalu punaḥ kuladevate kālena tena samayena rājā suvarṇabhujendro nāmāsīt | etena kamalākareṇa sarvatathāgatastavenātītānāgatapratyutpannān buddhān bhagavato'bhyastāvīt ||

ye jina pūrvaka ye ca bhavanti

ye ca dhriyanti daśodiśi loke |

teṣa jināna karomi praṇāmaṃ

taṃ jinasaṃghamahaṃ praśayiṣye || 1 ||

śāntapraśāntaviśuddhamunīndraṃ

suvarṇavarṇaprabhāsitagātram |

sarvasurāsurasusvarabuddhaṃ

brahmarute svaragarjitaghoṣam || 2 ||

ṣaṭpadamaulamahīruhakeśaṃ

nīlasukuñcitakāśanikāśam |

śaṅkhatuṣārasupāṇḍaladantaṃ

hemavirājitabhāsitanābham || 3 ||

nīlaviśālaviśuddhasunetraṃ

nīlamivitpalapracyutibhāsam |

padmasuvarṇaviśālasujihvaṃ

padmaprabhāsitapadmamukhābham || 4 ||

śaṅkhamṛṇālanibhāmukhatorṇaṃ

dakṣiṇavartitaverulivarṇam |

sūkṣmaniśākarakṣīṇaśaśīva

gātra munermramarājvalanābham || 5 ||

kāñcanakoṭi suvarṇamṛduraṃ

nāsamukhonnata pīvaraghrāṇam |

agradharāgraviśiṣṭasunāsaṃ

mṛduka sarvajināṃśa satatam || 6 ||

ekasame cittaromamukhāgraṃ

vālasuromapradakṣiṇavartam |

nīlanibhā jvalakuṇḍalajātaṃ

nīlavirājitamaulisugrīvam || 7 ||

jātasamānaprabhāsitagātraṃ

pūjitasarvi deśodiśi loke |

duḥkhamanantapraśāntatriloke

sarvasukhena ca tarpitasattvam || 8 ||

narakagātiṣvatha tiryaggatīṣu

pretasurāsuramanuṣyagatīṣu |

teṣu ca sarvasukhārpitasattvaṃ

sarvapraśānta apāyagatīṣu || 9 ||

varṇasuvarṇakanākanibhāsaṃ

kāñcanataptaprabhāsitagātram |

saumyaśaśāṅkasuvimalavakraṃ

vikāsitarājitasuvimalavadanam || 10 ||

taruṇatanūruhakomalagātraṃ

siṃhamivākramavikramanāgam |

lambitahasta pralambitabāhuṃ

mārutapreritaśālalateva || 11 ||

vyomaprabhājvalamuñcitaraśmiṃ

sūryasahasramiva pratapantam |

nirmalagātravarebhi munīndraṃ

sarvaprabhāsita kṣetramanantam || 12 ||

candraniśākarabhāskarajālaṃ

kṣetramanantasahasraśateṣu |

te'pi ca niṣṭhita sarvamabhūṣi

buddhaprabhāsavirocanatāyai || 13 ||

buddhadivākaralokapradipaṃ

buddhadivākaraśatasahasram |

kṣetramanantasahasraśateṣu

paśyatu sattva tathāgatasūryam || 14 ||

puṇyasahasraśatāccitakāyaṃ

sarvaguṇebhiralaṅkṛtagātram |

śauṇḍagajendranibhaṃ jinabāhuṃ

vimalasulakṣaṇamaṇḍitahastam || 15 ||

bhūmitalopamarajasamatulyaṃ

sūkṣmarajopama ye gatabuddhāḥ ||

sūkṣmarajopama ye ca bhavanti

sūkṣmarajopama ye ca sthihanti || 16 ||

teṣa jināna karomi praṇāmaṃ

kāyatu vācamanena prasannaḥ |

puṣpapradānasugandhapradānai -

rvarṇaśatena sucetasi cāpi || 17 ||

jihvaśatairapi buddhaguṇāni

kalpasahasraśate na hi vaktum |

ye guṇasādhunivṛtti jinānāṃ

sā ca varāgravicitra anekaiḥ || 18 ||

ekajinasya guṇā na hi śakyā

jihvaśatairapi bhāṣitu kaścit |

kāmamaśakti hi sarvajinānāṃ

ekaguṇasya hi vistara vaktum || 19 ||

sarvasadevakuloktasamūhaḥ

sarvabhavāgrabhave jalapūrṇā |

keśagrahaṇena tu śakya pramātuṃ

naiva ca ekaguṇā sugatānām || 20 ||

varṇita saṃstuta me jinasarvaṃ

kāyatu vāca prasannamanena |

yanmama sañcitapuṇyaphalāgraṃ

tena ca sattva prabhotu jinatvam || 21 ||

evaṃ stavitva narapati buddhaṃ

evaṃ karoti nṛpaḥ praṇidhānam |

yatra ca kutraci mahya bhaveta

jāti anāgatakalpamanantā || 22 ||

īdṛśi bheri mi paśyami svapne

īdṛśa deśana tatra śṛṇomi |

īdṛśa jīnastutikamalākara

jātiṣu tatra labhe smaraṇatvam || 23 ||

buddhaguṇāni anantamatulyā

ye'pi ca durlabha kalpasahasraiḥ |

amu śruṇeya ca svapnagato'pi

teṣu ca deśayi divasagato'pi || 24 ||

duḥkhasamudra vimocayi sattvā

pūrayi ṣaḍabhi pi pāramitābhiḥ |

bodhimanuttara paśca labheyaṃ

kṣetra bhaveta mamā asamarthyam || 25 ||

bheripradānavipākaphalena

sarvajināna ca saṃstutihetoḥ |

saṃmukha paśyami śākyamunīndraṃ

vyākaraṇaṃ hyahu tatra labheyam || 26 ||

ye ima dāraka dvau mama putrau

kanakendra kanakaprabhāsvaraḥ |

te ubhi dāraka tatra labheyaṃ

bodhimanuttara vyākaraṇaṃ ca || 27 ||

ye'pi ca sattva arakṣa atrāṇā

śaraṇavihīna viyāsagatāśca |

teṣu bhaveya anāgata sarva

trāṇaparāyaṇaśaraṇebhiśca || 28 ||

duḥkhasamudbhavasaṃkṣayakartā

sarvasukhasya ca ākarabhūtaḥ |

kalpa anāgata bodhi careyaṃ

yattaka pūrvakakoṭigatāśca || 29 ||

svarṇaprabhottamadeśanatāya

pāpasamudra śoṣatu mahyam |

karmasamudra vikīryatu mahyaṃ

kleśasamudra vicchidyatu mahyam || 30 ||

puṇyasamudra prapūryatu mahyaṃ

jñānasamudra viśodhyatu mahyam |

vimalajñānaprabhāsabalena

sarvaguṇāna samudra bhaveyā || 31 ||

bodhiguṇairguṇaratna prapūrṇā

deśanasvarṇa prabhāsabalena |

puṇyaprabhāsa bhaviṣyati mahyaṃ

bodhiprabhāsa viśodhyatu mahyam || 32 ||

kāyaprabhāsa bhaviṣyati mahyaṃ

puṇyaprabhāsa virocanatā ca |

sarvatriloki viśiṣṭa bhaveyaṃ

pūṇyabalena samanvita nityam || 33 ||

duḥkhasamudra uttārayitā

sarvasukhasya ca sāgarakalpya |

kalpamanāgata bodhi careyaṃ

yattakapūrvakakoṭigatāśca || 34 ||

yādṛśakṣetraviśiṣṭa triloke

sarvajinānamananta guṇena |

tādṛśakṣetramanantaguṇaṃ

bheṣyati mahyamanāgatasarvam || 35 ||



iti śrīsuvarṇaprabhāsottamasūtrendrarāje kamalākara -

sarvatathāgatastavaparivarto nāma pañcamaḥ ||