• Home
• Canon Text
• Romanized
• sūtrapiṭaka
• tantra
• tantra darśana
• 8 pañcākāraḥ

8 pañcākāraḥ

Technical Details

 

8 | pañcākāraḥ |

 

namo buddhāya |

 

vajrasattvaṃ namaskṛtya niṣprapañcamanuttaram |

pañcākāramahaṃ vakṣye samākṣipya [ca]bodhaye ||

 

om āḥ hū ityanena sthānātmayogarakṣāṃ kṛtvā sugandhādiliptabhūbhāge caturastrādimaṇḍalamadhye pañcatathāgatāḥ pañcayoginyaḥ pūjanīyāḥ | tatra madhye viśvavarṇapakārapariṇataviśvāṣṭadalavikasitakamalavaraṭakopari raktarephapariṇata sūryyamaṇḍalasthanīlahūkāraniṣpanno dvibhuja ekamukho bhū sparśamudrādharo vajraparyyaṅkī dvātriṃśallakṣaṇāśītyanuvyañjanālaṅkṛtaśarīro daśabalavaiśāradyādiguṇagaṇaikanilayaḥ sauśīryyamāṃsāsthirahitaḥ pratibhāsamātradarpaṇapratibimbasamo na satyaṃ na mṛṣā atimaitryātmyakatvāt kṛṣṇavarṇaḥ kṛṣṇavajracihnaḥ suviśuddhadharmmadhātuvijñānaskandhasvabhāvaḥ śiratuṇḍamuṇḍitakāṣāyāvaguṇṭhitavigrahaḥ vajrasattvāṅkitaśirāḥ vajrasattvasvabhāvaḥ śiratunḍamuṇḍitakaḥ,ata eva hetuphalātmakaḥ,sarvvākāravaropetaśūnyatālakṣaṇaḥ,asaṃskṛtatathāgatātmakatvāt dharmmakāyaḥ,pratibhāsamātratvāt sambhogakāyaḥ,kalpitanirmmāṇakāyaṃ nirmmāṇakāyaḥ,kāyatritayaikarasattvāt svābhāvikakāyaḥ | taduktam --

 

asaṃskṛtamanodharmmaḥ copaḥsambhogalakṣaṇaḥ |

tadeva nirmmitaṃ citraṃ bījaḥ sarvvasvabhāvataḥ |

 

iti vikalpāderaspṛśyatvāt vajrakulī- vajrakulaśca lokaiḥ na spṛśyate - dveṣavajraśca śiśiramadhyāhnakaṭuśruti ākāśaśabdacavargo akṣobhyaviśuddho amī bāhyādhyātmikavyavastheyamiti kāyacatuṣṭayavyavasthā cātrāpi pūrvvavat | āḥ vajradhṛk hū asya jāpamantraḥ |

 

vajrasattvastu hūkārajanmā śuklo dvibhūja ekavakto vajravajraghaṇṭādharo manaḥsvabhāvaḥ kāṣāyarasaśarīraḥ śaradṛtuviśuddho yaralavādyātmakaḥ arddharātrataḥ prabhātakālaparyyanto dharmmadhātuparanāmā |

 

ataḥ pūrvvadale candramaṇḍalopari omkārajaḥ śuklavarṇavairocanaḥ śuklacakra(vajra)cihnaḥ bodhyaṅgīmudrādharaḥ rūpaskandhasvabhāvaḥ mohasvarūpo viṭaviśuddhaḥ tathāgatakulī ādarśatvena pratiṣṭhitaḥ hemantaṛtuviśuddhaḥ madhurarasaśarīraḥ kavargavyāpīprabhātasandhyātmakāyasvabhāvaḥ | om āḥ jinajika hū [i]tyasya jāpamantraḥ |

 

dakṣiṇadale sūryyamaṇḍalopari trākārajaḥ pītavarṇo ratnasambhavo ratnacihnavaradamudrādharo vedanāsvabhāvapiśunaśarīraḥ raktātmako ratnakulī samatājñānavān vasantaṛturūpalavaṇaśarīraḥ ṭavargavyāpī tṛtīyacaturthapraharātmakaḥ | om āḥ ratnadhṛk hū asya jāpamantraḥ |

 

tataḥ paścimadale ravimaṇḍalopari raktahrīḥkārasambhūto raktavarṇo'mitābhaḥ padmacihnaḥ samādhimudrādharaḥ saṃjñāskandhasvabhāvo rāgaśarīraḥ śukrātmakaḥ padmakulī pratyavekṣaṇājñāna lakṣaṇo grīṣmaṛturūpa āmlarasa[śa]rīraḥ tavargātmā pradoṣavān | jāpamantraścāyaṃ om āḥ ārolika hū |

 

tata uttaradale sūryyamaṇḍalopari śyāmakhakārajaḥ [śyāma varṇo'moghasiddhiḥ viśvavajracihnābhayamudrādharaḥ saṃskāraskandhasvabhāvo varṣāṛturūpaḥ]piśitāpaḥ tiktarasātmakaḥ pavargaviśuddhaḥ arddharātrasvabhāvaḥ | asya ca mantraḥ om āḥ prajñādhṛk hū iti |

 

ete vajraparyyaṅkinaḥ dvibhujai[ka]vaktāḥ soṣṇīṣaśiratuṇḍamuṇḍita kāpā[yā]vaguṇṭhita -dvātriṃśallakṣaṇāśītyanuvyañjanālaṅkṛta-daśavalavaiśāradyādiguṇagaṇaikanilayāḥ sauśīryyamāṃsāsthirahitā darpaṇapratibimbopamā na satyāsatyādisaṅkalpanāpagamavimalapratibhāsamātrakasambhogavigrahāḥ kāyatritayaikarasatāsvābhāvikakāyamupādāya asaṃskṛtatathātmakarmmakāyakalpitavijñānakāyāvyabhinnā rūpavedanāsaṃjñāsaṃskāraskandhātmakā vairocanaratnasambhavāmitābhāmoghasiddhayo vijñānamātratā iti pratipādanāya akṣobhyena mudyante iti | akṣobhyāṅkitaśirasi vijñānasya naiḥ svābhāvyasya śūnyatākaruṇayostādātmaka[tvaṃ]ca pratipādayituṃ akṣobhyo'pi vajrasattvena mudryate | etena hetuphalātmakaṃ bhavanirvvāṇaikarasatāmātraṃ jagaditi pratipāditaṃ bhavati |

 

tathā ca -

śūnyatākaruṇābhinnaṃ yatra cittaṃ prabhāvyate |

sā hi buddhasya dharmmasya saṅghasyāpi hi deśanā ||

guḍe madhuratā cāgneruṣṇatvaṃ pra[kṛ]tiryathā |

śūnyatā sarvvadharmmāṇāṃ tathā prakṛtiriṣyate ||

 

tathā ca -

 

bhavasyaiva parijñānaṃ nirvvāṇaṃ iti kathyate |

āgneyakoṇadale candramaṇḍalopari śuklalokārajā śuklavarṇā locanā cakracihnā pṛthvidhātusvarūpā tathāgatakulodbhavā moharaktā | asyā bījaṃ om āḥ lo hū svāhā iti |

 

nairṛtyāṃ candramaṇḍalopari kṛṣṇamākārabījasambhūtā māmakī kṛṣṇavarṇā kṛṣṇavajracihnā abdhātusvabhāvā vajrkulā dveṣaraktā | asyā bījaṃ om āḥ mā hū svāhā iti |

 

vāyavyāṃ candramaṇḍalopari pākārabījasaṃbhūtā pāṇḍaravāsinaī raktā raktavarṇā padmacihnatejodhātusvarūpā padmakulā rāgaraktā | asyā bījaṃ om āḥ pā hū svāheti |

 

aiśānyāṃ candramaṇḍalopari kanakaśyāmatākārapariṇatā tāriṇī śyāmavarṇā śyāmanīlotpalacihnā vāyudhātusvarūpā karmmakulā īrṣāraktā | asyā bījaṃ om āḥ tā hū svāhā |

 

etāḥ catasraḥ ṣoḍaśābdikā asādhāraṇarūpayauvanaśālinyo  yathāśobhasaṃsthitā pūrvvavat kāyacatuṣṭayātmikā manohlādinyaḥ sakalajinaguṇādhārabhūtāḥ pañcatathāgatasvarūpāḥ | āsāṃ(asyāṃ)madhye ālisvabhāvā vajrasattvasvarūpiṇī vajradhātvīśvarī nāyikā | iyameva bhagavatī tathatā śūnyatā prajñāpāramitā bhūtakoṭinairātmyeti vyapadiśyate |

 

na granthaḥ kṛtikauśalyamāpādayitumeṣa me |

prayatnaḥ kiṃ ca saṃkṣipya bodhayeyaṃ śiśūn iti ||

 

iti vidhivadudīryyasattvahetoḥ

sakalajināgamayuktisaṅgataṃ hi |

akhilamihaśubhaṃ samāptaṃ

bhavatu tato jina eṣa vajrasattvaḥ ||

 

|pañcākāraḥ samāptaḥ ||