• Home
• Canon Text
• Romanized
• sūtrapiṭaka
• tantra
• kriyā tantra
• Atha trayastriṃśaḥ paṭalavisaraḥ

Atha trayastriṃśaḥ paṭalavisaraḥ

Technical Details

atha trayastriṃśaḥ paṭalavisaraḥ |



atha khalu bhagavāṃ śākyamuniḥ sarvāvantaṃ śuddhāvāsabhavanamavalokya, mañjuśriyaṃ kumārabhūtamāmantrayate sma | tvadīye mañjuśrīkalparāje nirdiśasamākhyāte dharmadhātukośatathāgatagarbhadharmadhātuniṣpandānucarite mahāsūtravararatnapaṭalavisare tathāgataguhyavaramanujñāte mantravadhasādhyamāne nimittajñānacihnakālapramāṇāntaritasādhanaupayikāni sarvabhūtarutavitāni asattvasattvasaṃjñānirghoṣāni bhavanti ||



śābdikaṃ jñānaṃ ityukta aśābdikaṃ caiva kīrtyate |

vyatimiśraṃ tathā yuktimantrāṇāṃ trividhā kriyā ||

divyaśabdasamāyuktā anityārtthaprayojitā |

apaśabdāpagatā nityaṃ saṃskārārthārthabhūṣitā ||

abahiḥ sarvasiddhānte āryāmantrāḥ prakīrttitā |

nityaṃ padārthahīnaṃ tu tat tridhā paribhidyate ||

gurulaghu tathā madhyaiḥ varṇaiścāpi vibhūṣitā |

sā bhavenmantradevī tu svaracchandavibhūṣitā ||

saṃskṛtāsaṃskṛtaṃ vākyaṃ arthānartha tathā pare |

dhātvartthā tathā yuktiḥ gatimantrārthabhūṣitā ||

vikalpabahulā vācā mantrāṇāṃ sarvalaukikā |

ekadvikavarṇaṃ tu cchandaiḥ sāśvaritālayaḥ ||

tricatuḥpañcaṣaṣṭhaṃ vā saptamaṃ vāṣṭamaṃ tathā |

navamaṃ daśamaṃ caiva varṇānāṃ siddhiriṣyate ||

daśākṣarasamāyuktā varṇānāṃ hetunām |

yāvaddaśaguṇā hyete varṇā dṛśyanti mahītale ||

śatākṣaraṃ viṃśatikaṃ yāvadekākṣaraṃ bhavet |

etatpramāṇairvarṇaistu grathitā mantrasampadā ||

padaiścaturbhiḥ saṃyuktā mantrā sarvārthasādhakāḥ |

jyeṣṭhāḥ pravarā hyāryā mantrā ye jinabhāṣitāḥ ||

te tu madhyamā adhamā + + tadā |

tadātmajairjinaputraistu bhāṣitā te tu madhyamā ||

adhamā ye tu mantrā vai bhāṣitā sarvalaukikā |

nikṛṣṭā kathitā mantrā bhāṣitā nairṛtaistu ye ||

daśāṣṭasaptaviṃśaṃ vā yāvadabhyadhikaṃ śatam |

etatpramāṇaṃ tu mantrāṇāṃ āryāṇāṃ jinabhāṣitām ||

ekadvikavarṇaṃ tu sahasrārddhaṃ varṇato bhavet |

yāvatpramāṇaṃ tu mantrāṇāṃ bodhisattvaiḥ prakāśitā ||

tadakṣare padavinyastaṃ mantrayuktimudāhṛtā |

chandāṃsi svarayuktānāṃ dhātvārthārthabhūṣitā ||

vacanaṃ suprayuktaṃ vai tantrayuktisamanvitam |

bhavet kadācikāt siddhiḥ śabdasvaraviyojitā ||

mudrāyuktaṃ tu śabdaistu mūrdhnādūṣmāntatālukaiḥ |

dantoṣṭhakaṇṭhataḥ śabdaṃ visṛtaṃ sādhanaṃ kriyā ||

avyaktavinivṛttaṃ tu suprayuktamudāhṛtam |

sampūrṇaṃ vākyataḥ śabdaṃ samprayuktaḥ sādhayiṣyati ||

vidhibhraṣṭaṃ kriyāhīnaṃ śabdārthaiśca viyojitam |

mantraṃ na siddhyate kṣipraṃ dīrghakālamapekṣate ||

avandhyaṃ tasya siddhistu na vṛthā kārayo japī |

anyajanme'pi dṛśyante mantrasiddhivarapradā ||

tasya mantraprabhāvena cirakālācca jāpinām |

avandhyaṃ kurute karma samantrā mantravido janām ||

nikṛṣṭā sarvamantrāṇāṃ laukikā ye samānuṣā |

sarvabhūtaistu ye proktā mantrā ye ca samatsarā ||

teṣāṃ nyakṣarā proktā ekadvikatrisaṅkhyakam |

vividhaiḥ mlecchabhāṣaistu devabhāṣaprakīrttitaiḥ ||

grathitā paṅktiyuktāśca vyatimiśrā śabdataḥ sadā |

sahasraṃ cāṣṭaśataṃ aṣṭa ca yāvadekaṃ tu varṇataḥ ||

catuḥpādaṃ pādārddhaṃ tu gadyapadyaṃ nigaditam |

ślokaṃ daṇḍakamātraistu gādhaskandhakapañcitam ||

pratipaccārthayuktiśca sahasratārthabhūṣitam |

apabhraṃśasaṃskṛtaṃ śabdaṃ arthahīnaṃ vikalpate ||

avyaktaṃ vyaktahīnaṃ tu mātrāhīnaṃ tu yujyate |

gatideśavisaṃyogānmantrasiddhistaducyate ||

etat sarvamantrāṇāṃ eṣa lakṣaṇaḥ |

śakārabahulā ye mantrā oṅkārārthabhūṣitā ||

takāralakṣaṇatantrasthā siddhisteṣu dhruvaṃ bhavet |

oṅkārā ye mantrā makārāntavinirgatāḥ ||

śakārasahasaṃyuktādavandhyaṃ śobhanaṃ tathā |

takāracaturasrākārā pratyāhārāntavarjitā ||

takārakṣī rephasaṃyuktā samantraṃ sādhanakriyā |

dvirephabahulaṃ ādyaṃ huṅkāraguṇamudbhavam ||

vakāracaturasrānte varṇā sādhanakṣamā |

kakāraṃ rephasaṃyuktaṃ makārāntaṃ mātramiśritam ||

makāraṃ nakāramādyaṃ tu sa mantraḥ śreṣṭha ucyate |

takārabahulaṃ yatra sarvatantreṣu dṛṣyate ||

sa mantraḥ saumyamityukto yāmyahuṅkārabhūṣitam |

aindrāvāyavyamityuktaṃ bhakārabahulaṃ tu yaḥ ||

vāruṇaḥ cakāramityāhuḥ hitaṃ loke tu pauṣṭikam |

vakārabahulo yo mantraḥ māhendraṃ tat pradṛśyate ||

ādyaṃ triratnagamanaṃ yo mantraḥ śaraṇaṃ tathā |

namaskāraṃ pravarteṇa śāntihetuṃ sukhāvaham ||

tadanyat sarvadevānāṃ namaskārārthaṃ prayujyate |

svamantraṃ mantranāthaṃ ca sa mantraḥ sarvakarmikam ||

ḍakārabahulo yo mantraḥ phaṭkārārthahuṅkṛtaḥ |

ete mantrā mahākrūrā tejavanto mahaujasā ||

prāṇoparodhinā sadyaḥ krūrasattvasuyojitā |

tasmānna kuryāt karmāṇi pāpakāni viśeṣataḥ ||

taṃ jāpī varjayed yasmāt munibhirvarjitā sadā |

ubhayārthe'pi siddhyante mantrā śāntikapauṣṭikā ||

kṣaṇena kurute sarvaṃ karmāṃ yāvanti bhāṣitā |

sujaptā mantrā hyete tejavantā maharddhikā ||

śāntikāni ca karmāṇi kuryāttāṃ jinabhāṣitaiḥ |

pauṣṭikāni tu sarvāṇi kuryāt kokanade kule ||

karmā pāpakā sarve ābhicāre prayujyate |

ābhicārukasarvāṇi kuryād vajrakulena tu ||

niṣiddhā lokanāthaistu yakṣendreṇa prakāśitā |

sattvānāṃ vinayārthāya mantramāhātmyamudbhavam ||

kathitaṃ triprakāraṃ tu trikuleṣveva sarvataḥ |

ye tu aṣṭa samākhyātā kulāgryā muninā svayam ||

teṣu siddhistridhā yātā triprakārāḥ samoditāḥ |

uttamā madhyamā nīcā tat tridhā paribhidyate ||

śāntikaṃ pauṣṭikaṃ cāpi ābhicārukamiṣyate |

kevalaṃ mantrayuktistu tantrayuktirudāhṛtā ||

mantrāṇāṃ gatimāhātmyaṃ ābhicāruka yujyate |

etat karma nikṛṣṭaṃ tu sarvajñaistu garhitam ||

na kuryāt kṛcchragatenāpi karma prāṇoparodhikam |

kevalaṃ tu samāsena karmamāhātmyavarṇitaḥ ||

tantrayuktavidhirmantraiḥ karmavistaravistaraḥ |

karmarāje ihoktaṃ tu anyatantreṣu dṛśyate ||

na bheje karmahīnaṃ tu sarvamantreṣu yuktimām |

yāvanti laukikā mantrā sakalā niṣkalāstathā ||

sarve lokottarāścaiva teṣāmeva guṇaḥ sadā |

asaṅkhyaṃ mantrasiddhistvasaṅkhyaṃ tat parikīrtyate ||

ekasaṅkhyaprabhṛtyādi viṃśamuktaṃ tathāpi tu |

tataḥ triṃśat samāsena catvāriṃśaṃ tu cāparam ||

tatastriguṇaṣaṣṭiṃ tu saptabhiḥ sadaśaṃ tathā |

daśaṃ cāparamityāhu aśītisaṅkhyā tu cāparam ||

sadaśaṃ navatimityāhuḥ śataṃ pūrṇaṃ daśāparam |

śatasaṅkhyā tu saṅkhyātā taddaśaṃ sahasrāparam ||

daśasahasramayutaṃ tu daśamayutāni lakṣitam |

daśalakṣāvilakṣaṃ tu vilakṣaṃ daśa koṭim ||

+ + + + + + ṭyo vai daśavikoṭyo'rbudo bhavet |

daśārbudā nirbudaḥ uktaḥ taddaśaṃ khaḍgamiṣyate ||

daśakhaḍganikhaḍgaṃ tu daśanikhaḥ kharvamiṣyate |

daśa nikharvāṃ tathā padmaḥ daśapadmāṃ mahāpadmaḥ ||

daśapadmāni vāhastu daśavivāhāṃstathāparām |

mahāvivāhastathā dṛṣṭastaddaśaṃ māyamucyate ||

taddaśamāyāṃ mahāmāyaḥ mahāmāyāṃ daśāparām |

samudraṃ gaṇitajñāne nirddiṣṭaṃ lokanāyakaiḥ ||

mahāsamudraṃ tataḥ paścād viṃśārddhaṃ parisādhike |

mahāsamudrastathā hyuktaḥ sadaśaṃ sāgaraḥ tataḥ ||

mahāsāgaramityāhurviṃśārddhena prayujyate |

mahāsāgarā daśa guṇīkṛtya pragharā hyevamucyate ||

daśapragharātyuktaḥ ghareti taṃ prakīrttitam |

daśaghare nāmato'pyuktā aśeṣaṃ tu taducyate ||

aśeṣānmahāśeṣaṃ viṃśārddhena guṇīkṛtam |

tadasaṅkhyaṃ pramāṇaṃ tu kathitaṃ lokanāyakaiḥ ||

saṅkhyo daśa saṅkhyāmityāhu tadasaṅkhyaṃ guṇīkṛtamiti |

tataḥ pareṇāpi tathā + + + + + + + + + + + + ||

amitāt sahasraguṇitaṃ taṃ lokaṃ parikīrtyate |

lokāt pareṇa mahālokaṃ mahālokād guṇīkṛtam ||

tatatsaṃstamasamityuktaṃ tamasā jyotirucyate |

jyotiṣo mahājyotsnā guṇīkṛtya mahārāśistaducyate ||

mahārāśyā mahārāśirityuktā rāśye gambhīramucyate |

gambhīrā sthiramityāhuḥ sthirāt sthirataraṃ vrajet ||

tataḥ pareṇa bahumatyā bahumataṃ sthānamucyate |

sthānaṃ sthānataraṃ tyāhuḥ gaṇitajñānasūratāḥ ||

mahāsthānaṃ tato gacchenmahāsthānamitamiṣyate |

mitānmitasamaṃ kṛtvā mahārthaṃ tat parikīrtyate ||

mahārthā suśrutasthānaṃ tato gacchenmahārṇavam |

mahārṇavāt prathamamityāhuḥ prathamāt prathamataraṃ hi tat ||

prathame śreṣṭhamityāhuḥ śreṣṭhājjyeṣṭhāntamucyate |

jyeṣṭhānmandiraso nāma tadacintyaṃ parikīrtyate ||

acintya acintyārthinyatamaṃ ghoraṃ ghorāt rāṣṭratamiṣyate |

rāṣṭrāt pareṇa nidhyasto nidhyastaparataḥ śubham ||

śubhāt pareṇa mahācetaḥ mahācetā cetayiṣyate |

ceto cittavikṣepa abhilāpya taducyate ||

abhilāpyā anabhilāpyāstu viśvaraṃ ca mudāhṛtam |

viśvāt pareṇa mahāviśvaḥ asvaraṃ tu taducyate ||

asvarānmahāsvarasthānaṃ kharvato'dhigarvitastathā |

śreyasaṃ śāntimityuktaṃ sthāna gaṇitapāragaiḥ ||

mahādhṛṣṭastato dhṛṣṭaḥ odakaṃ tadihocyate |

odakā cittavibhrāntaṃ sthānaṃ cāparamuttamam ||

uttamāt parato buddhāṃ viṣayaṃ nādharabhūmikām |

aśakyaṃ mānuṣāṇāṃ tu gaṇanā lokakalpanam ||

tataḥ pareṇa buddhānāṃ gocaraṃ nāparaṃ matam |

buddhakṣetraṃ āsikatā gaṅgānadyāstu mucyate ||

sambhidya paramāṇūnāṃ kathayāmāsa nāyakāḥ |

dṛṣṭāntaṃ kriyate hyetat tarkajñānaṃ tu gocaram ||

hetunā sādhyate dravyaṃ na śakyaṃ gaṇanāparaiḥ |

etatpramāṇaṃ sambuddhā paryupāste mayā purā ||

teṣāmārādhayitvā me kalpe'smiṃ tadacittake |

etāvatkālamaparyantaṃ bodhisattvo'haṃ purā bhavet ||

sattvānāmarthasambuddho buddhatvaṃ ca samāviśet |

tatra tatra mayā tantrā bhāṣitā kalpavistarā ||

etat kalpavaraṃ jyeṣṭhametad buddhaistu bhāṣitam |

etad pramāṇaṃ sambuddhaiḥ kathito'haṃ purātanam ||

adhunā kumāra ! mayā prokta ante kāle tu janmike |

yāvanti laukikā mantrā kalparājāśca śobhanā ||

lokottarā tathā divyā mānuṣyā sasurāsurā |

sarveṣāṃ tu mantrāṇāṃ tantrayuktirudāhṛtā ||

sammato'yaṃ tu sarvatra kalparājo maharddhikaḥ |

teṣāṃ kalpavidhānena siddhimāyāti mañjumām ||

anenaiva tu kalpena vivinā mañjubhāninā |

teṣāṃ siddhimityuktā sarveṣāṃ prabhaviṣṇunā ||

kiṃ punarmānuṣe loke ye cānye mantradevatā |

sarve lokottarā mantrāḥ laukikā samaharddhikā ||

anena vidhiyogena kalparājena siddhitām |

vasitā sarvamantrāṇāṃ sarvakalpamudāhṛtam ||

sammato'yaṃ tu mañjuśrīḥ kalparāje ihottame |

ye kecicchilpavijñānā laukikā lokasammatā ||

nimittajñānaśakunāḥ jyotiṣajñānacihnitāḥ |

nimittajñānacaritā rutāvaiva śubhāśubhā ||

sarvabhūtarutaścaiva caritaṃ cittacihnitam |

dhāturāyatamaṃ dravyaṃ + + + + + + + + ||

iṅgitaṃ śakunamityāhuḥ khanyadhātukriyā tathā |

gaṇitaṃ vyākaraṇaṃ śāstrāṃ śastraṃ caiva kramo vidhiḥ ||

adhyātmavidyā caikitsyaṃ sarvasattvahitaṃ sukham |

hetunīti tathā cānye śabdaśāstraṃ pravarttitam ||

chandabhedo'tha gāndharvaḥ gandhayuktimudāhṛtāḥ |

te mayā bodhisattvena sattvānāmarthāya bhāṣitā ||

purāhaṃ bodhisattvo'smiṃ sattvānāṃ hitakāraṇā |

bhāṣitā te mayā pūrvaṃ saṃsārārṇavavāsinām ||

saṃsāragahane kāntāre cirakālaṃ uṣito hyaham |

yathā vaineyasattvānāṃ tathā tatra karomyaham ||

yathā yathā ca sattvā vai hitaṃ karma samādadheḥ |

tathā tathā karomyeṣāṃ hitārthaṃ karma śubhālayam ||

vicitrakarmanevasthāḥ sattvānāṃ hitayonayaḥ |

vicitraiva kriyate teṣāṃ vicitrārthayonidūṣitā ||

vicitrakarmasaṃyuktā vicitrārthāṃ śāstravarṇitām |

taṃ tathaiva karomyeṣāṃ vicitrāṃ rūpasampadām ||

ahaṃ tathā veṣadhārī syā vicitrāṅgaṃ nijānijām |

hitāśayena sattvānāṃ vicitraṃ rūpaṃ nirmiṣe ||

maheśvaraḥ śakrabrahmādyāṃ viṣṇurdhanadanairṛtām |

vicirāṃ graharūpāṃstu nirmime'haṃ tathā purā ||

mahākaruṇāviṣṭamanasaḥ sattvānāmāśayagocarā |

anupūrvyā tu teṣāṃ vai sthāpayāmi śive pade ||

paryaṭāmi saṃsāre dīrghakālamavekṣitam |

sattvānāmarthaniṣpattiṃ mantrarūpeṇa deśitam ||

anupūrvaṃ matajñānaṃ mantrakalpaṃ pravartitam |

cirā me saṃsaratā janme buddhagotre samāsṛta ||

na ca me vidyate kaścit kartā vā svāmino'pi vā |

niyataṃ gotramāsṛtya buddho'haṃ bodhimuttamāṃ ||

kṣemo'haṃ nirjaraṃ śāntaṃ aśokaṃ vimalaṃ śivam |

prāpto'haṃ nirvṛtiṃ śāntiṃ mukto'haṃ janmabandhanā ||

adhunā pravartitaścakraḥ bhūtakoṭisamāśrita |

darśayāmeṣa kalpaṃ vai mantravādaṃ savistaram ||

na vṛthā kārayejjāpī karmakalpa savistaram |

yāvanti laukikā mantrāḥ kalpāścaivamudāhṛtāḥ ||

pūjyā mānyāśca sarve te avajñā teṣāṃ tu varjitā |

nāvamanye tato mantrī teṣāṃ kalpāni vistaram ||

nimittaṃ jñānayuktiṃ ca jyotiṣajñānaroditam |

na vṛthā kārayedetāṃ maṅgalārthamudāhṛtāḥ ||

dṛṣṭadhārmikamevaṃ tu siddhidravyādimoṣadham |

sāmiṣaṃ lobhanaṃ siddhistasmānmaṅgalamucyate ||

praśastā jinagāthābhiḥ svastigāthābhibhūṣitam |

praśastairdivasairmukhyaiḥ sitapakṣe sucihnitaiḥ ||

śuklagrahavare yukte mantrasādhanamārabhet |

evamādyāḥ śubhā yuktā aśubhāṃścāpi varjayet ||

mayaiva kathitaṃ pūrvaṃ tasmād grāhyā tu jāpibhiḥ |

yāvanti kecilloke'smiṃ jyotiṣajñānakauśalāḥ ||

anye vā tatra kauśalyāḥ nītihetusahetukāḥ |

nyāyaśāstrasusambaddhā sattvānāṃ hitakārayā ||

mayaiva kathitaṃ tat sarvaṃ grāhyate mantrajāpibhiḥ |

siddhiheturayaṃ mārgaḥ darśitaṃ tattvadarśibhiḥ ||

sarvaṃ hyaśeṣasiddhāntaṃ yadyoktaṃ mokṣakāraṇam |

tenaiva kuryānmantrāṇāṃ mārgaṃ siddhikāraṇāḥ ||

na vṛthā kārayejjāpī mantrayuktiṃ hyaśeṣataḥ |

sarve laukikā mantrā uttamāśca prakīrtitāḥ ||

lokottarāstathā divyā sarveṣveva prayojayet |

na mithyaṃ kāraye cittaṃ na dūṣye tatra manaṃ kadā ||

sarve pūjyāstu mantrā vai samayajñaḥ prakīrtitāḥ |

śāsane'smiṃ tathā sāstuḥ buddhānāṃ samatāhite ||

niviṣṭā jinaputrāṇāmākṛṣṭāśca praveśitāḥ |

maṇḍale municandrāṇāṃ samayajña ihoditāḥ ||

avandhyāste sadā mantrairānītā viśanāśayā |

na name paramantrāṇāṃ nāpi sāvajñamācaret ||

anāryā ye tu mantrā vai avandhyāste parikīrttitā |

yāvanti laukikā mantrā adharā jāpasambhavā ||

sakleśā dṛṣṭamārgāntā avandhyāste tu jāpibhiḥ |

na vṛthā kāraye cittaṃ kopane roṣasaṃyutam ||

rocanaṃ na caiva bhaktiṃ na kuryāt karma vṛthāphalam |

tadāyattaṃ hi cittasya na dadyāt sannatiṃ kvacit ||

ekamantrastu yuktisthaḥ japaṃ nityaṃ samāhitaḥ |

labhate phalamaśeṣaṃ tu yathoktaṃ vidhinā vidheḥ ||

niścalaṃ tu manaḥ kṛtvā ekamantraṃ tu taṃ japet |

ekacittasya siddhyante mantrāḥ sarvārthasādhakāḥ ||

vyastacitto hi mūḍhātmā siddhistasya na dṛśyate |

aśeṣaṃ phalaniḥpattiṃ prāpnuyād vipulāṃ gatim ||

nityaśuddhaṃ mano yasya sa śrāddhasyaiva śāsane |

ratnatraye ca prasannasya siddhiriṣṭā udāhṛtā || iti |



āryamañjuśrīmūlakalpāt bodhisattvapiṭakāvataṃsakā-

nmahāyānavaipulyasūtrāt ekatriṃśatimaḥ karmakriyā-

vidhinimittajñānanirdeśapaṭalabi-

saraḥ parisamāptaḥ |