• Home
• Canon Text
• Romanized
• sūtrapiṭaka
• avadāna
• Saptama adhyāyaḥ

Saptama adhyāyaḥ

Technical Details

saptama adhyāyaḥ

svayambhūdharmadhātuvāgīśvaragutikṛtapravartano nāma



atha bhūyaḥ sa maitreyo bodhisattvo mahāmatiḥ|

bhagavanta ta mānasya sāñjalirevamavravīt||1||



bhagavacchilayāchādya dharmmadhātumimaṃ kadā|

kenaiva hetunā stūpaṃ ko vyadhādīṣṭikāmayaṃ||2||



bhagavantatsamālokya sarvvāllokānsakautukān|

etaddhetu samādiśya vinodayitumarhati||3||



iti saṃprārthitaṃ tena maitreyena munīśvaraḥ|

bhagavānsa mahāsattvaṃ sampaśyannevamādiśat||4||



śṛṇu maitreya yenāyaṃ guptikṛto prakāśane|

etaddhetuṃ samākhyāsi sarve lokābhibodhane||5||



tadyathā nivṛtiṃ yāte saṃbuddhe kanakamunau|

viṃśati varṣa sāhasra nṛrṇāmāyu yadā bhavet||6||



tadābhū bhagavāṃñchāstā dharmmarājo munīśvaraḥ|

sarvajño'rhamahābhijñaḥ kāśyapākhyastathāgataḥ||7||



sa saṃbuddho mahāpuryā vārāṇasyāmupāśrame|

mṛgadāve jināvāse vijahāra sasāṃdhikaḥ||8||



tadā saṃbodhisattvo'haṃ jyotirājā bhidhaḥkila|

kāśyapasya jagacchāmtuḥ śaraṇastha upāsakaḥ||9||



yadā sa kāśyapaḥ śāstā sarvatraidhātukādhipaḥ|

saddharmmaṃ samupādeṣṭuṃ sabhāsane samāśrayet||10||



tatsaddharmmāmṛtaṃ pātuṃ sarve lokāḥ samāgatāḥ|

brahmaśakrādayo devāḥ sarve lokādhipā api||11||



grahāstārāgaṇaścāpi vidyādharāścasāpsarāḥ|

siddhāsādhyāśca rudrāśca yakṣa guhyaka kinnarāḥ||12||



kumbhāṇḍā rākṣasāścāpi nāgāśca garuḍā api|

ṛṣayastāpasāścāpi tīrthikā brahmacāriṇaḥ||13||



yatayo yoginaścāpi tathānyecāpyupāsakāḥ|

brāhmaṇā kṣatriyāścāpi rājānopi mahībhṛtaḥ||14||



vaiśyāśca mantriṇo'mātyā bhṛtyā sainyādhipāgaṇā apiḥ

śilpino vaṇijaścāpi sārthavāho mahājanāḥ||15||



paurā jānapadā grāmyānaigamāḥ pārvatā api|

tathonya deśikā lokā api sarvve samāgatāḥ||16||



tatra sabhāsanāsīnaṃ saṃbuddha staṃ munīśvaraṃ|

bhagavantaṃ samālokya sarve saṃghāḥ samāyayuḥ||17||



bhikṣavaḥ śrāvakāḥ sarve yatayo yogino'piḥ|

cailakāvratinaścāpi sarve upāsakā api||18||



bhikṣuṇyopi tathā sarvāścailikāḥ vratiṇyaḥ|

śrāvikāścāpiḥ tathānyāḥ samupāgatāḥ||19||



bodhisattvā mahāsattvā ṛṣayo brahmacāriṇaḥ|

tīrthikā vaiṣṇavāḥ śaivārnirganthāśca tapasvinaḥ||20||



tathānye'pi samāyātāḥ saddharmaguṇalālasāḥ|

sarve'pi te munīndra staṃ dṛṣṭvā yayau pramoditāḥ||21||



tatra sarve'pi te lokāstaṃ munīndraṃ yathākramaṃ|

abhyarcya vidhinā natvā tatsabhāyāmupāśrayan||22||



tatra sarve'pi te lokāḥ parivṛtya samantataḥ|

puraskṛtya munīndrantaṃ saṃpaśyantaḥ samāhitāḥ||23||



tatsaddharmmāmṛtaṃ pātuṃ tṛṣārttā iva sāgaraṃ|

sāñjalayaḥ prasannāsyāḥ samātasthu yathākramaṃ||24||



tāṃlokānsamupāsīnānsarvānsaghānsurānapi|

sarvāllokādhipāṃścāpi dṛṣṭvā sa bhagavāñjinaḥ||25||



āryasatyaṃ samārabhya saṃbodhi jñānasādhanaṃ|

ādi madhyānta kalyāṇaṃ saddharmma samupādiśat||26||



tatsaddharmmāmṛtaṃ pītvā sarve'lokāḥ pravodhitāḥ|

sadā bhadrasukhaṃ prāpnu samīcchire susaṃvaraṃ||27||



tataḥ sarve'pi te lokāḥ saṃbuddha guṇavāñchinaḥ|

bodhicaryā vrataṃ dhṛtvā saṃcarire sadā śubhe||28||



tadā sarvāṇi kāryāṇi kṛtvā vajrī sa yogavit|

mañjudevaḥ sa bhāryānte svayaṃ nirvṛtimāyayau||29||



tato gatvā mahācīne sa mañjuśrī jināśrameṃ|

svadivyavapurādhāya taṃsthau bhāryā samanvitaḥ||30||



atra teṣāṃ śarīrāṇi śiṣyāḥ sarve'pi pāvake|

saṃskṛtya vidhināsthīni gṛhitvā samaśodhayan||31||



tataste'tra tadasthīnigarvyasthāpya yathāvidhi|

caityaṃ kṛtvā pratisthāpya samabhyarcya sadābhajana||32||



yeyīdaṃ caityamabhyarcya bhajanti śraddhayā sadā|

te tasya mañjudevasya saddharmmaguṇamāpnuyuḥ||33||



matvaivaṃ yebhivāñchanti mañjuśrī dharmmasadguṇaṃ|

atra mañjuśrī yaścaitya sarvadā prabhajantu te||34||



ityādiṣṭaṃ munīndreṇa niśamya te sabhājanāḥ|

sarve tatheti śrutva prātyanandatpravodhitāḥ||35||



athā'sau bhagavān bhūyaḥ śākyasiṃho munīśvaraḥ|

maitreya staṃ sabhāṃcāpi samālokyaivamādiśat||36||



tata ścirāṅgate kāle gauḍarāṣṭre narādhipaḥ|

abhūtpracaṇḍa devākhyaḥ śrīmān vajradharāṃśajaḥ||37||



sa rājā suciraṃ rājyaṃ nītidharmmeṇa pālayan|

sarvāllokāñchubhe dharme niyujya samacārayat||38||



etaddharmmānubhāvena sadā tatra samantataḥ|

subhikṣaṃ maṃgalotsāhaṃ nirutpātanavarktata||39||



tadā sarve'pi te lokāḥ saddharmaguṇalālasāḥ|

kuladharma samācārā dānaśīlavratāratāḥ||40||



satyasaṃghā nikādhīrāścaturbrahmavihāriṇaḥ|

kuleśabhajanaṃ kṛtvā prācaranta mitho hite||41||



dṛṣṭvā sa nṛpatī rājā sarvāllokāñchubhārthinaḥ|

muditastānsamāmantraya sampaśyannevamādiśat||42||



bho lokāḥ paurikāḥ sarve saddharma yadi vāñchatha|

triratna bhajanaṃ kṛtvā carata bodhisamvaraṃ||43||



tena yūyaṃ śubhātmānaḥ pariśuddhatrimaṇḍalāḥ|

bodhisattvā mahāsattvā bhavata bodhicāriṇaḥ||44||



tataste nirmalātmāno niḥkleśo vimalendriyāḥ|

arhantā bodhimāsādya sambuddhapadamāpsyathaḥ||45||



ityādiṣṭaṃ narendreṇa sarve lokā niśaṃmyate|

tatheti prativijñapya prābhyanandatpravodhitāḥ||46||



tataḥ sarve'pi te lokā dhṛtvā rājñānuśāsanaṃ|

triratnabhajanaṃ kṛtvā prācaranta śubhācariṃ||47||



dṛṣṭvā tānsakalāllokān bodhicaryā vratāratān|

mahānanda prasannātmā punareva vyacintayan||48||



saphalaṃ jīvitaṃ janma mamayecchāsanāratāḥ|

sarve'lokāḥ samādhāya pracaranti sadā śubhe||49||



atha pracaṇḍadevau'sau dṛṣṭvā rājyaṃ mahotsavaṃ|

saṃsāre'nartha saṃdṛṣṭvā cintayāmāsa sātmavat||50||



atrāhaṃ jalasāṃkrānto'nu nasyāṃ jirṇṇitendriyaḥ|

tadārogābhibhūto'pi vrajeyaṃmaṇaṃ dhruvaṃ||51||



tadatraiva kiyatkālaṃ tiṣṭheyaṃ sansukhānvitaḥ|

avaśyaṃ bhāvino bhāvā bhavanti bhavacāriṇāṃ||52||



sadā bhave bhaved bhadrameva saddharmmacāriṇāṃ|

duḥkhameva sadā kāmacāriṇāṃ bhavacāraṇe||53||



tasmādahaṃ parityajya kāmāśraya gṛhāśramaṃ|

nirjane vana ekākī vihareyaṃ samāhitaḥ||54||



smṛtvā ratnatrayaṃ dhyātvā saṃbodhinihitāśayaḥ|

bodhicaryāvrataṃ dhṛtvā saṃcareyaṃ jagaddhite||55||



iti niścitya sa prājñaḥ pracaṇḍadeva ātmavit|

nṛpatimantriṇaḥ sarvānsamāmantryaivamādiśat||56||



bho sarva mantriṇo yūyaṃ śṛṇudhvaṃ me vaco hitaṃ|

atha mayākhyātaṃ tathā caritumarhatha||57||



tadyathā jarāsākrānto vṛddhosyāṃ jīrṇitendriyaḥ|

tathā rogābhibhūto'pi grasiṣye mṛtyunā dhruvaṃ||58||



iti me trasyate cittaṃ durgati bhayaśaṃkitaṃ|

avaśyaṃ bhāvino bhāvā bhavacāriṇāṃ||59||



bhave bhavet sadā bhadrameva saddharmacāriṇāṃ|

duḥkhameva sadākāmacāriṇāṃ bhavacāriṇe||60||



anartharājyaṃ viṣayopabhogyaṃ bhayaṃkaraṃ sarpabhayākulaṃ yat|

anityamasāreti vicintya tatra āgāramadhyāvasituṃ na rocate||61||



iti matvāhamutsṛjya kāmāśrayaṃ gṛhāśramaṃ|

vanāśrame śubhārāme vihartumutsahe'dhunā||62||



tadahaṃ svātmajaṃ putraṃ śaktidevaṃ nṛpāsane|

pratiṣṭhāpya nṛpaṃ kartumicchāmi sāṃprataṃ khalu||63||



tad bhavanto niśamyātra sarve'pi mama śāsanaṃ|

abhiṣiṃcya nṛpaṃ kṛtvā bhajatainaṃ mamātmajaṃ||64||



ityādiṣṭaṃ narendreṇa śrutvā te mantriṇo janāḥ|

pramāṇaṃ śāsanaṃ bharturityevaṃ pratiśuśruvaḥ||65||



tadā sa rājā putraṃ śaktidevamāmantrayaivamāha|

bhedo daṇḍaḥ sāmadānamityatyupāyacatuṣṭayaṃ||66||



atrāhaṃ jarasābhikrāntaṃ nūnaṃ syād nirjitendriyaṃ|

tadā rogābhibhūte'pi vajreyaṃ maraṇaṃ dhuvaṃ||67||



tad vanāśrayamicchāmi śreyaḥ ślāghena yatmanā|

puro mṛtyu ripuṃ hanti gṛhasaṃraktameva vā||68||



tasmāt saṃsārabhīto me vahudhā bhayaśaṃkayā|

nātra sthātuṃ manoreme gacchāmi nirjanaṃ vanaṃ||69||



tasmāt mayā yathā proktaṃ tathā caritumarhasi|

prajānāṃ pālanaṃ kṛtvā dharmanītyā samācara||70||



lokān mā khekha yattāpaiḥ kuladharmma samācara|

pareṣvapi dayāyuktairdānaṃ hi śraddhayā kuru||71||



prāṇātipātādattādāna kāmamithyādiṃ mā kuru|

mā mṛṣāvāda paiśūnyaṃ pāruṣyaṃ saṃbhinnameva ca||72||



mābhidhyā vyāpādadoṣairmithyādṛṣṭyādi saṃtyaja|

etāni tāni sarvāṇi dhāraya dṛḍhacetasā||73||



pāpānāṃ mūla eṣo hi sugateneti deśitaḥ|

itthaṃ kṛte'pi nṛpateritayo na bhaviṣyati||74||



tatkasmāt dharmmeṇa prāpyate rājyaṃ dharmmeṇa dhanavarddhanaṃ|

dharmmeṇa dhanasādhyante dharmmeṇa kāma sidhyate||75||



kāmasidhyena mokṣaṃ ca prāpyate nātra saṃśayaḥ|

anena jñānamārgeṇa saśāsa nṛpatiḥ sutaṃ||76||



tataḥsa janako rājā śaktidevaṃ mamātmajaṃ|

abhiṣiṃcya pratisthāpya nṛpāsane nṛpaṃ vyadhāt||77||



jñānāṃkuśabhayenaiva kuṃcitaḥ sagajo yathāniva|

tatra sa janakaḥ sarva putrāya sarvamarppayet||78||



tyaktvā parigrahān sarvān punarevamabhāṣata|

adyārabhyāsi sarveṣāṃ lokānāmadhipaḥ prabhuṃ||79||



sarvadharmānuśāstā ca sarvasattvahitārthabhṛt|

namāma pitaraṃ tena śrutvā vākyaṃ rasāniva||80||



dhṛtvājñāṃ te yathā tāta prajānāṃ pratipālane|

iti praśāśya tato bhūpaḥ pracaṇḍadeva sanmatiḥ||81||



prabodhya putrapatnyādiṃ eko yayau vanāśrame|

tṛṇāsanasa tatra sa nirjaneraṇye vivikte utajāśraye||82||



tṛṇāsanasamāsīna tasthau dhyāna samāhitaḥ|

tatraikaṃ viharan kaṃcitkālaṃ sa ṛṣidharmmabhṛt||83||



sarvasattvahitotsāhī manasaivaṃ vyacintayat|

kimevaṃ nirjjane'raṇye dhyātvaiko viharanniha||84||



kasmai samupadekṣyāmi saddharmma bodhisādhanaṃ|

dānaśīlakṣamāvīryadhyānaprajñāsamudbhavaṃ||85||



puṇyaṃ sattvahitārthāya samākhyātaṃ munīśvaraiḥ|

tadevaṃ nirjjane sthitvā kiṃ me dharmārthasādhanaṃ||86||



vinā sattvahitārthena nirartha tapasāpi hi|

kimatra duṣkareṇāpi tapasā siddhisādhanaṃ||87||



kevalaṃ sadgatau śrīmatsaukhyalābhārthameva yat|

vinā sattvahitārthena niṣphalaṃ siddhisādhanaṃ||88||



tadatra nirjjane sthitvā tapasā niṣphalaṃ mama|

yatsattvānāṃ hitārthāya dharmmaśrīguṇasādhanaṃ||89||



vidyāsiddhiḥ samṛddhiśca kṣaṇaṃ vīryabalaṃ śubhaṃ|

tat mamaitāni sarvāṇi saṃsiddhi saṃmitānyapi||90||



vinā sattvahitārthena nirarthāni paśoriva|

tadidaṃ vratamṛsṛjya duṣkaraṃ bodhimānasaḥ||91||



bodhicaryāvrataṃ dhṛtvā care'haṃ jagaddhite|

tasmāt tīrtheṣu tīrtheṣu pīṭheṣu puṇyabhūmiṣu||92||



saddharmmadeśanāṃ kurvan sattvebhyaḥ pracarāṇyahaṃ|

etatpuṇyaviśuddhātmā pariśuddhatrimaṇḍalaḥ||93||



āśu bodhiṃ samāsādya saṃbuddhapada māpnuyāṃ|

iti niścitya sa prājñaḥ pracaṇḍadeva utthitaḥ||94||



tataḥ sattvahitārthena pracacāra samāhitaḥ|

evaṃ saḥ pracaran dharmmamupadeśya samantataḥ||95||



puṇyakṣetreṣu tīrtheṣu pīṭheṣu prāgraman mudā|

evaṃ bhraman sa sarvatra bhūtaleṣu yathākramaṃ||96||



krameṇa saṃcarannatra himālaye samāyayau|

atrāyātaḥ sa saṃvikṣya sarvatra saṃpramoditaḥ||97||



aho hīdaṃ mahāpīṭhamitiproktābhyanandata|

tataḥ sa idamālokya dharmmadhātuṃ jinālayaṃ||98||



jyotirūpyaṃ prasannātmā praṇatvaiha samāyayau|

atra sa samupāgatya saṃmikṣyenaṃ jinālayaṃ||99||



yathāvidhi samabhyarcya śraddhābhakti prasannadhīḥ|

naikapradakṣiṇīkṛtya stutvā gītairmanoharaiḥ||100||



aṣṭāṃgai praṇatiṃ kṛtvā dhyātvā japtvā bhajan mudā|

tataścedaṃ sa saṃvīkṣya mañjudevasya nirmmitaṃ||101||



caityamabhyarcya saṃstutvā gītairnatvā bhajan mudā|

tato'sau ca mahādevī yonirūpāṃ khagānanāṃ||102||



samālokya prasannātmā yathāvidhi samarccayet|

tatrāpi sa mahāsattva stutvā gītairmanoharaiḥ||103||



aṣṭāṅgaiḥ praṇatiṃ kṛtvā pradakṣiṇātyanekaśaḥ|

śraddhayā śaraṇaṃ gatvā smṛtvā dhyātvā samāhitaḥ||104||



tad vidyā dhāraṇīmantraṃ japitvā prābhyanandata|

tato'sau ca mahāsattvo vāgmatīpramukhānyapi||105||



tīrthānyetāni sarvāṇi sa samīkṣya prābhyanandata|

tata sa teṣu tīrtheṣu sarveṣvapi yathākramaṃ||106||



snātvā dānavratādīni kṛtvā bhajan pramoditaḥ|

tato'ṣṭau vītarāgāṃśca dṛṣṭvā sa saṃpraharṣitaḥ||107||



yathāvidhi samabhyarcya stutvā natvā bhajan kramāt|

tataḥ pracaṇḍadevaḥ sa bodhisattvaḥ prasāditaḥ||108||



atraiva sarvadāśritya vrataṃ caritumaicchata|

tataḥ sa vimalālokya himālaye samantataḥ||109||



saddharma paramānandaṃ bhuktvotsahe sunivṛttau|

tataḥ sa mañjudevasya śiṣyaṃ śāsana sambhṛtaṃ||110||



sadguruṃ samupāśritya prārthayadevamānataḥ|

bhadantātra puṇyakṣetre mahāpīṭhe himālaye||111||



prabrajyāsambaraṃ dhṛtvā saṃsthātumutsahe sadāḥ|

tad bhavān kṛpayā mahayaṃ saṃbodhijñānasādhanaṃ||112||



prabrajyāsamvaraṃ dātuṃ samarhati jagaddhite|

iti saṃprārthitaṃ tena niśamya sa guṇākaraḥ||113||



bodhisattvaṃ suvijñaṃ taṃ sampaśyannevamabravīt|

ehi bhadra samīcchā te yadyasti bauddhasambare||114||



pravajyā vratamādhāya saṃcarasva samāhitaḥ|

ityuktvā sa mahābhijñaḥ pravrajitaṃ vidhāya taṃ||115||



bodhicaryāvrataṃ datvā pracārayejjagaddhite|

tatra sa muṇḍitapātrī surakta cīvarāvṛtaḥ||116||



brahmacārī yatirbhikṣuniḥ kleśorhan sudhīrabhūt||

śāntaśrībhikṣuriti nāmo'bhūt|

tataḥ sa sarvavicchāstā bodhisattvā hitārthadik||117||



sa devāsuralokānāmapi vandyārcito'bhavat|

tadārabhya sa śāntaśrīdharmadhāto jinālaye||118||



triratnabhajanaṃ kṛtvā tasthau bodhivrataṃ caran|

sa ekasmin dine cemaṃ jyotīrūpaṃ prabhāsvaraṃ||119||



ratnapadmāsanāsīnaṃ paśyannevaṃ vyacintayet|

aho hyayaṃ svayaṃ jāto jyotirūpo prabhāsvaraḥ||120||



ratnapadmāsanāsīnaḥ saṃtiṣṭhate jagaddhite|

kiyatkālamayaṃ śrīmān dharmmadhāturjinālayaḥ||121||



evaṃ saṃbhāṣayan lokān saṃsthāsyate jagaddhite|

yataḥ kalau samayā te loka pañcakaṣāyite||122||



sarve lokā durācārā bhaviṣyanti durāśayāḥ|

madābhimānino duṣṭā lobhinaḥ kāmacāriṇaḥ||123||



īrṣyālavaḥ pramattāśca mātsaryavyākulāśayāḥ|

kleśāhaṃkāragarvāndhā nirvivekāḥ pramādinaḥ||124||



kāmabhogātisaṃraktā daśākuśalacāriṇaḥ|

tadā kathamayaṃ śrīmān jyotīrūpaḥ prabhāsvaraḥ||125||



ratnapadmāsanāsīna evaṃ tiṣṭhejjagaddhite|

nūnaṃ ye lobhino duṣṭāḥ kleśavyākulamānasāḥ||126||



imaṃ caityaṃ pratikṣipya ratnāni saṃharet tadā|

duṣṭā ca tathānye'pi duṣṭāḥ kleśābhimāninaḥ||127||



jyotīrūpamimaṃ caityaṃ dhvaṃsayiṣyanti sarvathā|

evaṃ tadā kalau kāle dhvaṃsite'smin jinālaye||128||



mahāpātakasaṃbhūtaṃ mahotpātaṃ bhaved dhruvaṃ|

iti hetorahaṃ dharmadhātorasya surakṣaṇe||129||



guptikarttu śilāchādya caityaṃ kuryā mahochrayaṃ|

tadā sarve'pi lokāste imaṃ stūpaṃ mahochritaṃ||130||



samīkṣya śraddhayā bhaktyā bhajiṣyanti prasāditāḥ|

tadaitat puṇyabhāvena sarvadātra samantataḥ||131||



subhikṣaṃ maṅgalotsāhaṃ nirutpātaṃ bhaved dhruvaṃ|

iti dhyātvā sa śāntaśrīḥ śāstāraṃ taṃ punarmudā||132||



upetya sāñjalirnatvā prārthayadevamādarāt|

bhadanta sadgurośāstaryadicchāmiha sāmprataṃ||133||



dharmmādhātumimaṃ caityaṃ gupti karttuṃ surakṣaṇe|

tadūrddha śilayāchādya svīṣṭikābhiḥ samuchritaṃ||134||



stūpaṃ kṛtvā pratiṣṭhāpya sthirīkarttuṃ samutsahe|

ityatra me bhavāñchāstā gupti kṛtvābhirakṣaṇe||135||



dharmmadhātoḥ jagadbhartturanujñāṃ dātumarhati|

iti saṃprārthite tena śāntaśriyā niśamya saḥ||136||



mahāmatirmahāsattvaṃ taṃ paśyannevamabravīt|

bhadrasvaṃyambhūvāṃstasya guptikarttuṃ yadīcchasi||137||



pratyekaṃ śrāvakaṃ yānaṃ muktvā mahati saṃśritaḥ|

vajrābhiṣekamādāya cara vajravrataṃ punaḥ||138||



tato mārān vinirjjitya samārādhya jineśvaraṃ|

saṃprārthya śilayācchādya kuru stūpaṃ samuchritaṃ||139||



iti śāstā samādiṣṭaṃ niśamya sa pramoditaḥ|

śāstāraṃ taṃ praṇatvā ca prārthayadevamādarāt||140||



sadgururme bhavāñchāstā dharmmadhātusurakṣaṇe|

vajracaryāvrataṃ datvā cāraya māṃ jagaddhite||141||



iti saṃprārthite tena śāntaśriyā niśamya saḥ|

mahāmatirmahāsattvaṃ taṃ samīkṣyaivamabravīt||142||



yadi śraddhāsti te bhadra vajracaryā mahāvrataṃ|

yathāvidhi pradāsyāmi tad gṛhāṇa jagaddhite||143||



ityuktvā sa mahācāryastasmai śāntaśriye kramāt|

sābhiṣekaṃ mahāyāne vajracaryāvrataṃ dadau||144||



śāntaśrīvajrācārya iti sthāpitaḥ tatkṣaṇe'rye cādhijñaprāpto'bhūt|

tataḥ prāptābhiṣekaḥ sa śāntaśrī vajrayogavit||145||



sa svātmā dakṣiṇāṃ tasmai gurave pradadau mudā|

tataḥ sa vajradhṛg yogī mahābhijñaḥ susiddhimān||146||



svakuleśaṃ samārādhya sagaṇaṃ prābhajan mudā|

tataḥ sa vajradhṛg yogī mahābhijñaḥ susiddhimān||147||



saddharmmasādhanotsāhī sarvavidyādhipopyabhūt|

tataḥ sāsturanujñāṃ sa samāsādya prasāditaḥ||148||



dharmadhātuṃ samārādhya prārthayadevamānataḥ|

bhagavan nātha sarvajña bhavatāṃ rakṣaṇāya yat||149||



jyotīrūpaṃ samācchādya caityaṃ karttumihotsahe|

tad bhavān trijagannātha kṛpayā me prasīdatu||150||



yada trāpyaparārdha me tatsarva kṣantumarhati|

iti saṃprārthya sa prājña jyotīrūpaṃ jinālayaṃ||151||



sa ratnapadmāchādya śilayā samagopayat|

taduparīṣṭikābhiśca vidhāya caityamucchritaṃ||152||



yathāvidhi pratiṣṭhāpya mahotsāhaiḥ sadābhajat|

tata idañca pucchāgraṃ mañjudevasya nirmmitaṃ||153||



caityaṃ sa śilayāchādya stūpaṃ vyadhāttathottamaṃ|

idaṃ stūpaṃ ca sa śāntaśrīḥ pratiṣṭhāpya yathāvidhi||154||



sarvadā śraddhayā bhaktyā mahotsāhairmudābhajat|

tataścāsau mahācāryaṃ ārādhya pañcadevatāḥ||155||



pañca sutāḥ pureṣvevaṃ pratiṣṭhāpya sadābhajat|

tad yathā devatā pañca prathamaṃ vāyudevatā||156||



vāyupure pratiṣṭhāpya vahnipuro'gnidevatā|

nāgapure ca nāgendro vasupure vasundharāṃ||157||



śāntipure mahāśrīmatsambaraṃ sugaṇaṃ tathā|

etān sarvān samārādhya sa ācārya yathāvidhi||158||



mahotsāhaiḥ samabhyarcya prābhajan sarvadā mudā|

evaṃ kṛtvā sa ācārya śāntaśrīḥ kṛtakṛtyau maharddhikaḥ||159||



bhadraśrīmantrasaṃsiddhaḥ sarvavidyādhipo'bhavat|

tato bhūyaḥ sa ācāryo bodhisattvā mahāmatiḥ||160||



sarvasattvahitotsāhī dhyātvaivaṃ samacintayat|

atraivamahamārādhya sarvān devān yathāvidhi||161||



pratiṣṭhāpya samabhyarcya mahotsāhairbhaje mudā|

tathātra sarvadā dharmmadhātuvāgīśvaraṃ sadā||162||



smṛtvā dhyātvā samārādhya saṃtiṣṭheyaṃ jagaddhite|

iti dhyātvā sa śāntaśrīrācāryastriguṇārthabhṛt||163||



sarvasattvahitārthena tathāvatraiva nanditaḥ|

evaṃ tā devatā bhaktyā bhajanti ye yathāvidhi||164||



te bhadraśrīguṇāpannā bhaveyurbodhicāriṇaḥ|

tad viśeṣaphalaṃ cāpi śṛṇu maitreya sāṃprataṃ||165||



sarva sattvānubodhārtha vakṣyāmyatra samāsataḥ|

tadyathā ye samārādhya sagaṇāṃ vāyudevatāṃ||166||



yathāvidhi samabhyarcya saṃbhajante samādarāt|

teṣāṃ vātamahotpātabhayaṃ kvāpi na vidyate||167||



nīrogyaṃ śrīsamāpannaṃ kāmabhojyaṃ sadā bhave|

ye cāpyevaṃ samārādhya sagaṇāṃ vahnidevatāṃ||168||



yathāvidhi samabhyarcya sambhajante samādarāt|

teṣāṃ vahnimahotpātaṃ bhayaṃ kvāpi na vidyate||169||



paripuṣṭendriyārogya mahāsaukhyaṃ sadā bhave|

ye cāpyevaṃ samārādhya sagaṇāṃ nāgadevatāṃ||170||



yathāvidhi samabhyarcya prabhajante sadā mudā|

teṣāṃ na vidyate kvāpi durbhikṣotpātajaṃ bhayaṃ||171||



bhadraśrīratnasaṃpattikāmabhojyaṃ sadā bhave|

ye cāpyevaṃ samārādhya sagaṇāṃ śrībasundharāṃ||172||



yathāvidhi samabhyarcya saṃbhajante samādarāt|

teṣāṃ dāridrayaduḥkhādi bhayaṃ nāsti kadācana||173||



bhadraśrīsadguṇāpannamahāsaṃpatsukhaṃ sadā|

ye cāpyevaṃ samārādhya sagaṇaṃ sambaraṃ jinaṃ||174||



yathāvidhi samabhyarcya saṃbhajante sadādarāt|

teṣāṃ mārāpasargga ca bhayaṃ kvāpi na vidyate||175||



saddharmmaratnasaṃpattimahaiśvaryasukhaṃ sadā|

ye cedaṃ caityamārādhya mañjudevasya nirmmitaṃ||176||



yathāvidhi samabhyarcya saṃbhajante samādarāt|

taddurbhbhagā durācārā duṣṭā syurna kadācana||177||



sarve dharmādhipā nāthā bhaveyuḥ śrīguṇākarāḥ|

ye cāpīdaṃ samārādhya dharmmadhātuṃ jinālayaṃ||178||



yathāvidhi samabhyarcya sambhajante samādarāt|

te sarvve vimalatmāno bhadraśrīsadguṇāśrayāḥ||179||



bodhisattvā mahābhijñā bhaveyu bodhicāriṇaḥ|

ya etā devatāḥ sarvāḥ smṛtvā dhyātvāpi sarvadā||180||



nāmāpi ca samuccārya saṃbhajante samādritāḥ|

te'pi sarve na yāsyanti durggatiṃ ca kadācana||181||



sadā sadgatisaṃjātā bhaveyuḥ śrīguṇāśrayāḥ|

tataste sukṛtāraktāḥ sadharmmaguṇalālasāḥ||182||



triratnaśaraṇaṃ kṛtvā saṃcareran sadā śubhe|

tataste vimalātmānaḥ pariśuddhendriyāśayāḥ||183||



bodhisattvā mahāsattvāścaturbrahmavihāriṇaḥ|

sarvasattvahitādhānaṃ careyurbodhisambaraṃ||184||



tataste bodhisaṃbhāraṃ purayitvā yathākramaṃ|

daśabhūmīśvarā nāthā bhaveyuḥ sugatātmajāḥ||185||



tataste nirmmalātmānaḥ saṃsāragati niḥspṛhāḥ|

arhantaḥ savala māraṃ nirjitya syurniraṃjanāḥ||186||



trividhāṃ bodhimāsādya saddharmmaguṇabhāskarāḥ|

sarvasattvahitārthena saṃbuddhapadamāpnuyu ||187||



yepyetadguṇamāhātmyaṃ śrutvāpyatyanumoditāḥ|

tathā tatpuṇyamāhātmyaṃ praśasanti samādarāt||188||



te'pi sarve vikalmāṣāḥ pariśuddhitrimaṇḍalāḥ|

śrīmantaḥ sadguṇādhārā bhaveyu bodhimānasāḥ||189||



na yāyurdugatiṃ kvāpi sadā sadgatisambhavāḥ|

sarvasattvahitaṃ kṛtvā saṃcarerañjagaddhite||190||



tataḥ sarvādhipāste syu rdhammārthi saṃprapūrakāḥ|

bodhisaṃbhāraṃ saṃpūrya saṃbuddhapadamāpnuyuḥ||191||



iti satyaṃ parijñāya bauddhaṃ padaṃ yadīcchatha|

etān devān samārādhya bhajadhvaṃ sarvadā bhave||192||



etatpuṇyānubhāvena yūyamapyevamābhavaṃ|

durggatiṃ naiva yāyāta kadācin kutracid dhruvaṃ||193||



sadā sadgatisaṃjātā bhadraśrīsadguṇāśrayāḥ|

bodhisattvā mahāsattvā bhavata bodhicāriṇaḥ||194||



tataḥ saṃbodhisaṃbhāraṃ pūrayitvā yathākramaṃ|

trividhāṃ bodhimāsādya saṃbuddhapadamāpsyatha||195||



iti matvātra ye lokā rvāñchanti saugataṃ padaṃ|

sa devān sagaṇāṃ sarvān samārādhya bhajantu te||196||



ityādiṣṭaṃ munīndreṇa niśamya te sabhāśritāḥ|

sarve tatheti vijñapya prābhyanandan prabodhitāḥ||197||



tadā śāntaśriyā yaṃssaṃ guptikṛto jinālayaḥ|

ityādiśya munīndro'pi samādhiṃ viddhekṣaṇaṃ||198||



iti śrīsvayaṃbhūdharmmadhātuvāgīśvara guptikṛta pravarttano nāma saptamo'dhyāyaḥ samāptaḥ|