• Home
• Canon Text
• Romanized
• sūtrapiṭaka
• mahāyānasūtra
• Tathāgatakāyanirdeśaparivartaḥ

Tathāgatakāyanirdeśaparivartaḥ

Technical Details

tathāgatakāyanirdeśaparivartaḥ |



atha khalu bhagavāṃścandraprabhaṃ kumārabhūtamāmantrayate sma-tasmāt tarhi kumāra bodhisattvena mahāsattvena kāye'nadhyavasitena jīvite nirapekṣeṇa bhavitavyam | tat kasya hetoḥ ? kāyajīvitādhyavasānahetorhi kumāra akuśaladharmābhisaṃskāro bhavati | tasmāttarhi kumāra bodhisattvena mahāsattvena na rūpakāyatastathāgataḥ prajñātavyaḥ | tat kasya hetoḥ ? dharmakāyā hi buddhā bhagavanto dharmakāyaprabhāvitāśca na rūpakāyaprabhāvitāḥ | tasmāttarhi kumāra bodhisattvena mahāsattvena tathāgatakāyaṃ prārthayitukāmena tathāgatakāyaṃ jñātukāmena ayaṃ samādhirudgrahītavyaḥ paryavāptavyo dhārayitavyo vācayitavyaḥ pravartitavyaḥ uddeṣṭavyaḥ svādhyātavyo vācayitavyo bhāvanāyogamanuyuktena bhavitavyam parebhyaśca vistareṇa saṃprakāśayitavyaḥ | tatra kumāra tathāgatasya kāyaḥ śatapuṇyanirjātayā buddhyānekārthanirdeśo dharmanirjātaḥ ānimittaḥ sarvanimittāpagato gambhīraḥ apramāṇaḥ apramāṇadharmaḥ ānimittasvabhāvaḥ sarvanimittavibhāvitaḥ | acalo'pratiṣṭhito'tyantākāśasvabhāvo'dṛśyaścakṣuḥpathasamatikrānto dharmakāyaḥ prajñātavyaḥ | acintyaḥ cittabhūmivigataḥ sukhaduḥkhāviprakampyaḥ sarvaprapañcasamatikrānto'nirdeśyo'niketo buddhajñānaṃ prārthayitukāmānāṃ ghoṣapathasamatikrāntaḥ sasāro rāgasamatikrāntaḥ abhedyo doṣapathasamatikrānto dṛḍho mohapathasamatikrānto nirdiṣṭaḥ | śūnyatānirdeśena ajāto jātisamatikrāntaḥ anāsravaḥ vipākasamatikrāntaḥ nityo vyāhāreṇa | vyavahāraśca śūnyaḥ nirviśeṣo nirvāṇena, nirvṛtaḥ śabdena, śānto ghoṣeṇa, sāmānyaḥ saṃketena, saṃketaḥ paramārthena, paramārtho bhūtavacanena | śītalo niṣparidānaḥ animittaḥ amanyitaḥ aninditaḥ aprapañcitaḥ-alpaśabdo nirdeśena | aparyanto varṇanirdeśena, mahābhijñāparikarmanirjātaḥ asmṛtitaḥ avidūre mahābhijñāparikarmanirdeśena | ayamucyate kumāra tathāgatakāya iti ||

atha khalu bhagavāṃstasyāṃ velāyāmimā gāthā abhāṣata-

ya icche lokanāthasya kāyaṃ jānitumīdṛśam |

imaṃ samādhiṃ bhāvitvā kāyaṃ buddhasya jñāsyati || 1 ||

puṇyanirjātu buddhasya kāyaḥ śuddhaḥ prabhāsvaraḥ |

sameti so'ntarīkṣeṇa nānātvaṃ nāsya labhyate || 2 ||

yādṛśā bodhirbuddhasya lakṣaṇāni ca tādṛśāḥ |

yādṛśā lakṣaṇāstasya kāyastasya hi tādṛśaḥ || 3 ||

saṃbodhilakṣaṇaḥ kāyo buddhakṣetraṃ hi tādṛśam |

balā vimokṣā dhyānāni sarve te'pyekalakṣaṇāḥ || 4 ||

evaṃ saṃbhavu buddhānāṃ lokanāthāna īdṛśaḥ |

na jātu kenacicchakyaṃ paśyituṃ māṃsacakṣuṣā || 5 ||

bahū evaṃ pravakṣyanti dṛṣṭo me lokanāyakaḥ |

suvarṇavarṇaḥ kāyena sarvalokaṃ prabhāsati || 6 ||

adhiṣṭhānena buddhānāmanubhāvādvikurvitaiḥ |

yenāsau dṛśyate kāyo lakṣaṇehi vicitritaḥ || 7 ||

ārohapariṇāhena kāyo buddhasya darśitaḥ |

na ca pramāṇaṃ kāyasya labdhaṃ tena acintiyaḥ || 8 ||

yadi pramāṇaṃ labhyeta kāyo buddhasya ettakaḥ |

nirviśeṣo bhavecchāstā devaiśca manujairapi || 9 ||

samāhitasya cittasya vipāko'pi tallakṣaṇaḥ |

tallakṣaṇaṃ nāmarūpaṃ śuddhaṃ bhoti prabhāsvaram || 10 ||

na caiṣa kenacijjātu samādhiḥ śāntu bhāvitaḥ |

yatheha lokanāthena kalpakoṭyo niṣevitaḥ || 11 ||

bahubhiḥ śukladharmaiśca samādhirjanito'pyayam |

samādherasya vaipulyāt kāyo mahyaṃ na dṛśyate || 12 ||

yasya vo yādṛśaṃ cittaṃ nāmarūpaṃ pi tādṛśam |

niḥsvabhāvasya cittasya nāmarūpaṃ vilakṣaṇam || 13 ||

yasya codārasaṃjñādi nāmarūpasmi vartate |

visabhāgāya saṃjñāya udāraṃ cittu jāyate || 14 ||

yasya co mṛdukī saṃjñā nāmarūpasmi vartate |

agṛdhraṃ nāmarūpasmi cittaṃ bhoti prabhāsvaram || 15 ||

smarāmī pūrvajātīṣu asaṃkhyeyeṣu saptasu |

tisro me pāpikāḥ saṃjñā naivotpannāḥ kadācana || 16 ||

anāsravaṃ ca me cittaṃ kalpakoṭyo hyacintiyāḥ |

karomi cārthaṃ sattvānāṃ na ca me kāyu dṛśyate || 17 ||

yathā ca yasya bhāvehi vimuktaṃ bhoti mānasam |

na tasya tehi bhāvehi bhūyo bhoti samāgamaḥ || 18 ||

vimuktaṃ mama vijñānaṃ sarvabhāvehi sarvaśaḥ |

svabhāvo jñātu cittasya bhūyo jñānaṃ pravartate || 19 ||

kṣetrakoṭīsahasrāṇi gacchanti mama nirmitāḥ |

kurvanti cārthaṃ sattvānāṃ yatra kāyo na labhyate || 20 ||

alakṣaṇo nirnimitto yathaiva gaganaṃ tathā |

kāyo nirabhilāpyo me durvijñeyo nidarśitaḥ || 21 ||

dharmakāyo mahāvīro dharmeṇa kāya nirjito |

na jātu rūpakāyeṇa śakyaṃ prajñāpituṃ jino || 22 ||

kathānirdeśu yasyaitaṃ śrutvā prītirbhaviṣyati |

na tasya māraḥ pāpīyānavatāraṃ labhiṣyati || 23 ||

śrutvā ca dharmaṃ gambhīraṃ yasya trāso na bheṣyati |

na cāsau jīvitārthāya buddhabodhiṃ pratikṣipet || 24 ||

bhūtakoṭīsahasrāṇāṃ bhūtanirdeśa jñāsyati |

ālokabhūto lokānāṃ yena yena gamiṣyati || 25 ||

tatra kumāra tathāgatasya kāyo nimittakarmaṇāpi na sukaraṃ jñātum | nīlo vā nīlavarṇo vā nīlanidarśano vā nīlanirbhāso vā | pīto vā pītavarṇo vā pītanidarśano vā pītanirbhāso vā | lohito vā lohitavarṇo vā lohitanidarśano vā lohitanirbhāso vā | avadāto vā avadātavarṇo vā avadātanidarśano vā avadātanirbhāso vā | mañjiṣṭho vā mañjiṣṭhavarṇo vā mañjiṣṭhanidarśano vā mañjiṣṭhanirbhāso vā | sphaṭiko vā sphaṭikavarṇo vā sphaṭikanidarśano vā sphaṭikanirbhāso vā | āgneyo vā agnivarṇo vā agninidarśano vā agninirbhāso vā | sarpirmaṇḍopamo vā sarpirvarṇo vā sarpirnidarśano vā sarpirnirbhāso vā | sauvarṇo vā suvarṇavarṇo vā suvarṇanidarśano vā suvarṇanirbhāso vā | vaidūryo vā vaidūryavarṇo vā vaidūryanidarśano vā vaidūryanirbhāso vā | vidyudvā vā vidyudvarṇo vā vidyunnidarśano vā vidyunnirbhāso vā | brahmo vā brahmavarṇo vā brahmanidarśano vā brahmanirbhāso vā | devo vā devavarṇo vā devanidarśano vā devanirbhāso vā | iti hi kumāra tathāgatasya kāyaḥ śuddhaḥ sarvanimittairapyacintyaḥ apyacintyanirdeśo rūpakāyapariniṣpattyā | na sukaraṃ sadevakenāpi lokena kāyasya pramāṇamudgrahītumanyatra sarvākārairacintyaḥ aprameyaḥ ||

atha khalu bhagavāṃstasyāṃ velāyāmimā gāthā abhāṣata -

yadrajo lokadhātūṣu pāṃsusaṃjñānidarśanam |

utsahradataḍāgeṣu samudreṣu ca yajjalam |

na teṣāṃ labhyate anto ettakā paramāṇavaḥ || 26 ||

samudrādvālakoṭībhirmātuṃ śakyaṃ jalaṃ bhavet |

na tulyā lokanāthena upamā saṃprakāśitā |

jalabindavo'prameyāstathaiva paramāṇavaḥ || 27 ||

paśmāmyekasya sattvasya tato bahutarānaham |

adhimukticittotpādo naikakāle prajānitum || 28 ||

ye mayā ātmabhāvasya bhūtavarṇā nidarśitāḥ |

sarvasattvādhimuktāstāneteṣāmupamākṣamāḥ || 29 ||

nimittakarmaṇā caiva varṇanirbhāsa īdṛśaḥ |

śakyaṃ jānituṃ buddhasya viśeṣo hīdṛśo mama || 30 ||

nimittāpagatā buddhā dharmakāyaprabhāvitāḥ |

gambhīrāścāprameyāśca tena buddhā acintiyāḥ || 31 ||

acintiyasya buddhasya buddhakāyo'pyacintiyaḥ |

acintiyā hi te kāyā dharmakāyaprabhāvitāḥ || 32 ||

cittenāpi na buddhānāṃ kāyaścintayituṃ kṣamaḥ |

tathā hi tasya kāyasya pramāṇaṃ nopalabhyate || 33 ||

aprameyā hi te dharmāḥ kalpakoṭyo niṣevitāḥ |

teno acintiyaḥ kāyo nirvṛto me prabhāsvaraḥ || 34 ||

agrāhyaḥ sarvasattvehi na pramāṇehi gṛhyate |

tathā hi kāyo buddhasya apramāṇo hyacintiyaḥ || 35 ||

apramāṇehi dharmehi pramāṇaṃ tatra kalpitam |

akalpitehi dharmehi buddho'pyevamakalpitaḥ || 36 ||

pramāṇaṃ kalpamākhyāto apramāṇamakalpitam |

akalpyaḥ kalpāpagatastena buddho acintiyaḥ || 37 ||

apramāṇaṃ yathākāśaṃ mātuṃ śakyaṃ na kenacit |

tathaiva kāyu buddhasya ākāśasamasādṛśaḥ || 38 ||

ye kāyamevaṃ jānanti buddhānāṃ te jinātmajāḥ |

te'pi buddhā bhaviṣyanti lokanāthā acintiyāḥ || 39 ||



iti śrīsamādhirāje tathāgatakāyanirdeśaparivarto nāma dvāviṃśatitamaḥ ||