• Home
• Canon Text
• Romanized
• sūtrapiṭaka
• jātaka
• 10 yajña-jātakam

10 yajña-jātakam

Technical Details

10. yajña-jātakam



na kalyāṇāśayāḥ pāpapratāraṇāmanuvidhīyanta ityāśayaśuddhau prayatitavyam| tadyathānuśrūyate-



bodhisattvaḥ kila svapuṇyaprabhāvopanatāmānatasarvasāmantāṃ praśāntasvaparacakrādyupadravatvādakaṇṭakāmasapatnāmekātapatrāṃ dāyādyakramāgatāṃ pṛthivīṃ pālayāmāsa|



nāthaḥ pṛthivyāḥ sa jitendriyārirbhuṃktāvagīteṣu phaleṣvasaktaḥ|

prajāhiteṣvāhitasarvabhāvo gharmaikakāryo munivad babhūva||1||



viveda lokasya hi sa svabhāvaṃ pradhānacaryānukṛtipradhānam|

śreyaḥ samādhitsurataḥ prajāsu viśeṣato dharmavidhau sasañje||2||



dadau dhanaṃ śīlavidhiṃ samādade kṣamāṃ niṣeve jagadarthamaihata|

prajāhitādhyāśayasaumyadarśanaḥ sa mūrtimāndharma iva vyarocata||3||



atha kadācittadbhujābhiguptamapi taṃ viṣayaṃ sattvānāṃ karmavaiguṇyātpramādavaśagatvācca varṣakarmādhikṛtānāṃ devaputrāṇāṃ durvṛṣṭiparyākulatā kvacitkvacidabhidudrāva| atha sa rājā vyaktamayaṃ mama prajānāṃ vā dharmāpacārātsamupanato'nartha iti niścitamatiḥ saṃrūḍhahitādhyāśayatvātprajāsu tadduḥkhamamṛṣyamāṇo dharmatattvajñasaṃmatānpurohitapramukhānbrāhmavṛddhānmatisacivāṃśca taduddharaṇopāyaṃ papraccha| atha te vedavihitamanekaprāṇiśatavadhārambhabhīṣaṇaṃ yajñavidhiṃ suvṛṣṭihetuṃ manyamānāstasmai saṃvarṇayāmāsuḥ| viditavṛttāntastu sa rājā yajñavihitānāṃ prāṇivaiśasānāṃ karuṇātmakatvānna teṣāṃ tadvacanaṃ bhāvenābhyanandat| vinayānuvṛttyā cainānpratyākhyānarūkṣākṣaramanuktvā prastāvāntareṇaiṣāṃ tāṃ kathāṃ tiraścakāra| te punarapi taṃ rājānaṃ dharmasaṃkathāprastāvalabdhāvasarā gāmbhīryāvagūḍhaṃ tasya bhāvamajānānā yajñapravṛttaye samanuśaśāsuḥ-



kāryāṇi rājñāṃ niyatāni yāni lābhe pṛthivyāḥ paripālane ca|

nātyeti kālastava tāni nityaṃ teṣāṃ kramo dharmasukhāni yadvat||4||



trivargasevānipuṇasya tasya prajāhitārthaṃ dhṛtakārmukasya|

yajñābhidhāne suralokasetau pramādatandreva kathaṃ matiste||5||



bhṛtyairivājñā bahu manyate te sākṣādiyaṃ siddhiriti kṣitīśaiḥ|

śreyāṃsi kīrtijvalitāni cetuṃ yajñairayaṃ te ripukāla kālaḥ||6||



kāmaṃ sadā dīkṣita eva ca tvaṃ dānaprasaṅgānniyamādarācca|

vedaprasiddhaiḥ kratubhistathāpi yuktaṃ bhavenmoktumṛṇaṃ surāṇām||7||



sviṣṭyābhituṣṭāni hi daivatāni bhūtāni vṛṣṭyā pratimānayanti|

iti prajānāṃ hitamātmanaśca yaśaskaraṃ yajñavidhiṃ juṣasva||8||



tasya cintā prādurabhavat-atidurnyasto batāyaṃ parapratyayahāryapelavamatiramīmāṃsako dharmapriyaḥ śraddadhāno jano yatra hi nāma-



ya eva lokeṣu śaraṇyasammatāsta eva hiṃsāmapi dharmato gatāḥ|

vivartate kaṣṭamapāyasaṅkaṭe janastadādeśitakāpathānugaḥ||9||



ko hi nāmābhisambandho dharmasya paśuhiṃsayā|

suralokādhivāsasya daivataprīṇanasya vā||10||



viśasyamānaḥ kila mantraśaktibhiḥ paśurdivaṃ gacchati tena tadvadhaḥ|

upaiti dharmatvamitīdamapyasatparaiḥ kṛtaṃ ko hi paratra lapsyate||11||



asatpravṛtteranivṛttamānasaḥ śubheṣu karmasvavirūḍhaniścayaḥ|

paśurdivaṃ yāsyati kena hetunā hato'pi yajñe svakṛtāśrayādvinā||12||



hataśca yajñe tridivaṃ yadi vrajennanu vrajeyuḥ paśutāṃ svayaṃ dvijāḥ|

yatastu nāyaṃ vidhirīkṣyate kvacidvacastadeṣāṃ ka iva grahīṣyati||13||



atulyagandharddhirasaujasaṃ śubhāṃ sudhāṃ kilotsṛjya varāpsarodhṛtām|

mudaṃ prayāsyanti vapādikāraṇādvadhena śocyasya paśordivaukasaḥ||14||



tadidamatra prāptakālamiti viniścitya sa rājā yajñārambhasamutsuka iva nāma tatteṣāṃ vacanaṃ pratigṛhyāvocadenan-sanāthaḥ khalvahamanugrahavāṃśca yadevaṃ me hitāvahitamanaso'trabhavantaḥ| tadicchāmi puruṣamedhasahasreṇa yaṣṭum| anviṣyatāṃ tadupayogyasambhārasamudānayanārthaṃ yathādhikāramamātyaiḥ| parīkṣyatāṃ satrāgāraniveśanayogyo bhūmipradeśastadanuguṇaśca tithi-karaṇa-muhūrta-nakṣatra-yoga iti| athainaṃ purohita uvāca-īpsitārthasiddhaye snātu tāvanmahārāja ekasya yajñasya samāptāvavabhṛthe| athottareṣāmārambhaḥ kariṣyate krameṇa| yugapatpuruṣapaśavaḥ sahasraśo hi parigṛhyamāṇā vyaktamudvegadoṣāya prajānāṃ te syuriti| astyetaditi brāhmaṇairuktaḥ sa rājā tānuvāca-alamatrabhavatāṃ prakṛtikopāśaṅkayā| tathā hi saṃvidhāsye yathodvegaṃ me prajā na yāsyantīti| atha sa rājā paurajānapadānsaṃnipātyāvravīt-icchāmi puruṣamedhasahasreṇa yaṣṭum| na ca mayārhaḥ kaścidakāmaḥ puruṣaḥ paśutve niyoktumaduṣṭaḥ| tadyaṃ yamataḥ prabhṛti vo drakṣyāmi vyavadhūtapramādanidreṇa vimalena cāracakṣuṣā śīlamaryādātivartinamasmadājñāṃ paribhavantaṃ taṃ taṃ svakulapāṃsanaṃ deśakaṇṭakamahaṃ yajñapaśunimittamādāsya ityetadvo viditamastviti| atha teṣāṃ mukhyatamāḥ prāñjalayo bhūtvainamūcuḥ-



sarvāḥ kriyāstava hitapravaṇāḥ prajānāṃ

tatrāvamānanavidhernaradeva ko'rthaḥ|

brahmāpi te caritamabhyanumantumarhaḥ

sādhupramāṇa paramatra bhavānpramāṇam||15||



priyaṃ yadeva devasya tadasmākamapi priyam|

asmatpriyahitādanyad dṛśyate na hi te priyam||16||



iti pratigṛhītavacanaḥ paurajanāpadaiḥ sa rājā janaprakāśenāḍambareṇa pratyayitānamātyānpāpajanopagrahaṇārthaṃ janapadaṃ nagarāṇi ca preṣayāmāsa samantataśca pratyahamiti ghoṣaṇāḥ kārayāmāsa|



abhayamabhayado dadāti rājā sthiraśuciśīladhanāya sajjanāya|

avinayanirataiḥ prajāhitārthaṃ narapaśubhistu sahasraśo yiyakṣuḥ||17||



tadyaḥ kaścidataḥ prabhṛtyavinayaślāghānuvṛttyudbhavāt

sāmantakṣitipārcitāmapi nṛpasyājñāmavajñāsyati|

sa svaireva viṣahya yajñapaśutāmāpāditaḥ karmabhi-

ryūpābaddhatanurviṣādakṛpaṇaḥ śuṣyañjanairdrakṣyate||18||



atha tadviṣayanivāsinaḥ puruṣā yajñapaśunimittaṃ duḥśīlapuruṣānveṣaṇādaraṃ tamanvavekṣya rājñastāṃ ca ghoṣaṇāmatibhīṣaṇāṃ pratyahamupaśrṛṇvantaḥ pāpajanopagrahāvahitāṃśca rājapuruṣānsamantataḥ samāpatato'bhivīkṣya tyaktadauḥśīlyānurāgāḥ śīlasaṃvarasamādānaparā vairaprasaṅgaparāṅmukhāḥ parasparapremagauravasumukhāḥ praśāntavigrahavivādā gurujanavacanānuvartinaḥ saṃvibhāgaviśāradāḥ priyātithayo vinayanaibhṛtyaślāghinaḥ kṛta iva yuge babhūvuḥ|



bhayena mṛtyoḥ paralokacintayā kulābhimānena yaśo'nurakṣayā|

suśuklabhāvācca viruḍhayā hriyā janaḥ saḥ śīlāmalabhūṣaṇo'bhavat||19||



yathā yathā dharmaparo'bhavajjanastathā tathā rakṣijano viśeṣataḥ|

cakāra duḥśīlajanābhimārgaṇāmataśca dharmānna cacāla kaścana||20||



svadeśavṛttāntamathopaśuśruvānimaṃ nṛpaḥ prītiviśeṣabhūṣaṇaḥ|

carānpriyākhyānakadānavistaraiḥ santarpayitvā sacivānsamanvaśāt||21||



parā manīṣā mama rakṣituṃ prajā gatāśca tāḥ samprati dakṣiṇīyatām|

idaṃ ca yajñāya dhanaṃ pratarkitaṃ yiyakṣurasmīti yathāpratarkitam||22||



yadīpsitaṃ yasya sukhendhanaṃ dhanaṃ prakāmamāpnotu sa tanmadantikāt|

itīyamasmadviṣayopatāpinī daridratā nirviṣayā yathā bhavet||23||



mayi prajārakṣaṇaniścayasthite sahāyasampatparivṛddhasādhane|

iyaṃ janārtirmadamarṣadīpanī muhurmuṃhurme jvalatīva cetasi||24||



atha te tasya rājñaḥ sacivāḥ paramamiti pratigṛhya tadvacanaṃ sarveṣu grāmanagaranigameṣu mārgaviśrāmapradeśeṣu ca dānaśālāḥ kārayitvā yathāsandiṣṭaṃ rājñā pratyahamarthijanamabhilaṣitairarthavisargaiḥ santarpayāmāsuḥ|



atha vihāya janaḥ sa daridratāṃ samamavāptavasurvasudhādhipāt|

vividhacitraparicchadabhūṣaṇaḥ pravitatotsavaśobha ivābhavat||25||



pramuditārthijanastutisañcitaṃ pravitatāna nṛpasya diśo yaśaḥ|

tanutaraṅgavivardhitavistaraṃ sara ivāmbujakesarajaṃ rajaḥ||26||



iti nṛpasya sunītiguṇāśrayātsucaritābhimukhe nikhile jane|

samabhibhūtabalāḥ kuśalocchrayairvilayamīyurasaṅgamupadravāḥ||27||



aviṣamatvasukhā ṛtavo'bhavannavanṛpā iva dharmaparāyaṇāḥ|

vividhasasyadharā ca vasundharā sakamalāmalanīlajalāśayā||28||



na janamabhyarujanprabalā rujaḥ paṭutaraṃ guṇamoṣadhayo dadhuḥ|

ṛtuvaśena vavau niyato'nilaḥ pariyayuśca śubhena pathā grahāḥ||29||



na paracakrakṛtaṃ samabhūdbhayaṃ na ca parasparajaṃ na ca daivikam|

niyamadharmapare nibhṛte jane kṛtamivātra yugaṃ samapadyata||30||



athaivaṃ pravṛttena dharmayajñena rājñā praśamiteṣvarthijanaduḥkheṣu sārdhamupadravaiḥ pramuditajanasambādhāyāmabhyudayaramyadarśanāyāṃ vasundharāyāṃ nṛpaterāśīrvacanādhyayanasavyāpāre loke vitanyamāne samantato rājayaśasi prasādāvarjitamatiḥ kaścidamātyamukhyo rājānamityuvāca-suṣṭhu khalvidamucyate-



uttamādhamamadhyānāṃ kāryāṇāṃ nityadarśanāt|

uparyupari buddhīnāṃ carantīśvarabuddhayaḥ||31||



iti| devena hi paśuvaiśasavācyadoṣavirahitena dharmayajñena prajānāmubhayalokahitaṃ sampāditamupadravāśca praśamaṃ nītā dāridryaduḥkhāni ca śīle pratiṣṭhāpitānām| kiṃ bahunā? sabhāgyāstāḥ prajāḥ|



lakṣmeva kṣaṇadākarasya vitataṃ gātre na kṛṣṇājinaṃ

dīkṣāyantraṇayā nisargalalitā ceṣṭā na mandodyamaḥ|

mūrdhnaśchatranibhasya keśaracanā śobhā tathaivātha ca

tyāgaiste śatayajvano'pyapahṛtaḥ kīrtyāśrayo vismayaḥ||32||



hiṃsāviṣaktaḥ kṛpaṇaḥ phalepsoḥ prāyeṇa lokasya nayajña yajñaḥ|

yajñastu kīrtyābharaṇaḥ samaste śīlasya nirdoṣamanoharasya||33||



aho prajānāṃ bhāgyāni yāsāṃ gopāyitā bhavān|

prajānāmapi hi vyaktaṃ naivaṃ syād gopitā pitā||34||



apara uvāca-

dānaṃ nāma dhanodaye sati jano datte tadāśāvaśaḥ

syācchīle'pi ca lokapaṃktyabhimukhaḥ svarge ca jātaspṛhaḥ|

yā tveṣā parakāryadakṣiṇatayā tadvatpravṛttistayo-

rnāvidvatsu na sattvayogavidhureṣveṣā samālakṣyate||35||



tadevaṃ kalyāṇāśayā na pāpapratāraṇāmanuvidhīyanta ityāśayaśuddhau prayatitavyam|



iti prajāhitodyogaḥ śreyaḥkīrtisukhāvahaḥ|

yannṛpāṇāmato nālaṃ tamanādṛtya vartitum||36||



evaṃ rājāpavāde'pi vācyam| dharmābhyāsaḥ prajānāṃ bhūtimāvahatīti bhūtikāmena dharmānuvartinā bhavitavyamityevamapyunneyam| na paśuhiṃsā kadācidabhyudayāya dānadamasaṃyamādayastvabhyudayāyeti tadarthinā dānādipareṇa bhavitavyamityevamapi vācyam| lokārthacaryāpravaṇamatirevaṃ pūrvajanmasvapi bhagavāniti tathāgatavarṇe'pi vācyam|



iti yajña-jātakaṃ daśamam|